ပြည်တွင်းကုန်သွယ်မှုသတင်း

   အင်ဒိုနီးရှားနိုင်ငံ၏ ပြည်တွင်းဆန်လက်ကျန်ပမာဏသည် ၂၀၂၄ ခုနှစ် ကုန်ဆုံးချိန်တွင် တန်ချိန် ၈ သန်းအထိ ရောက်ရှိနိုင်သဖြင့် ပြည်ပမှဆန်များအား ရှေ့လာမည့်နှစ်အတွက်အပါအဝင် ထပ်မံတင်သွင်းရန် လိုအပ်တော့မည်မဟုတ်ဟု စားနပ်ရိက္ခာရေးရာ ပူးပေါင်းဆောင်ရွက်မှုဝန်ကြီး Zulkifli Hasan က ဒီဇင်ဘာ ၉ ရက်နေ့၌ ဂျကာတာမြို့တော်တွင် ပြောကြားခဲ့ကြောင်း Antara News သတင်းဌာနက ဖော်ပြပါသည်။

    တစ်နိုင်ငံလုံးတွင် အစိုးရနှင့် ပုဂ္ဂလိကကဏ္ဍတို့ လက်ဝယ်ရှိ ဆန်လက်ကျန်ပမာဏသည် တန်ချိန် ၈ သန်းကို ကျော်လွန်ရောက်ရှိခဲ့ပြီး နိုင်ငံပိုင်ဝယ်ယူရေးအေဂျင်စီဖြစ်သော Bulog အဖွဲ့ တစ်ခုတည်းထံ၌ပင် ဆန်တန်ချိန် ၂ သန်းကို သိုလှောင်ထားကြောင်း၊ အဆိုပါ ဆန်လက်ကျန် ပမာဏကို အစိုးရ၏ အရန်ရိက္ခာအစီအစဉ်အတိုင်း သိုလှောင်ထားရှိမည်ဖြစ်ကြောင်း၊ ပြည်တွင်း စားသုံးရန် လိုအပ်သည့် ပမာဏသည် တန်ချိန် ၃၁ သန်းခန့်သာ ဖြစ်သော်လည်း အစိုးရအနေဖြင့် ၂၀၂၅ ခုနှစ်တွင် ဆန်တန်ချိန် ၃၂ သန်းအထိ ထုတ်လုပ်လျက် ပြည်ပမှဆန်တင်သွင်းမှုကို ရပ်ဆိုင်း ရန် ဆုံးဖြတ်ချက် ချမှတ်ခဲ့ကြောင်း၊ သို့ဖြစ်ရာ သဘာဝဘေးအန္တရာယ် သို့မဟုတ် ထူးခြားသည့် အခြေအနေတစ်ရပ် ပေါ်ပေါက်ခဲ့လျှင်ပင် ဆန်တင်သွင်းတော့မည် မဟုတ်ကြောင်းဖြင့် ဝန်ကြီး Hasan က ပြောဆိုခဲ့ခြင်းဖြစ်သည်။

    အင်ဒိုနီးရှား အမျိုးသားစားနပ်ရိက္ခာအေဂျင်စီ (Bapanas) ၏ အကြီးအကဲဖြစ်သူ Arief Prasetyo Adi ကလည်း နိုင်ငံတော် အရန်ဆန် သိုလှောင်ထားရှိမှုသည် လုံလောက်သည့် ပမာဏကို ရောက်ရှိခဲ့ပြီဖြစ်၍ အင်ဒိုနီးရှားနိုင်ငံအနေဖြင့် ဆန်ဆက်လက်တင်သွင်းရန် မလိုအပ်တော့ ကြောင်း၊ Bulog အဖွဲ့ လက်ဝယ်ရှိ လက်ရှိဆန်ပမာဏသည် လိုအပ်သည်ထက် ပိုလျှံနေပြီဖြစ်၍ စားနပ်ရိက္ခာ ထောက်ပံ့မှု အစီအစဉ်အတွက် ဆန်တန်ချိန် ၂၂၀၀၀၀ ကိုပင် ထိုသို့သိုလှောင်ထားရှိမှုမှ ထုတ်နုတ်သုံးစွဲလျက်ရှိကြောင်း၊ လက်ရှိကာလတွင် အင်ဒိုနီးရှား အနေဖြင့် ဖေဖော်ဝါရီလကုန်နှင့် မတ်လတို့တွင် ရိတ်သိမ်းမည့် အဓိကစပါးသီးနှံရာသီမှ ဆန်တန်ချိန် ၁၂ သန်းမှ ၁၃ သန်းအထိ ထွက်ရှိနိုင်ရေးကို အလေးထား ပြင်ဆင်ဆောင်ရွက်ရမည်ဖြစ်ကြောင်း၊ ရိတ်သိမ်းထွက်ရှိသည်နှင့် တစ်ပြိုင်နက် အရန်သင့် ဝယ်ယူနိုင်အောင် လုပ်ဆောင်ရမည်ဖြစ်ကြောင်း၊ ထိုသို့လုပ်ကိုင်နိုင်ခြင်း မရှိပါက စပါးဈေးနှုန်းကျဆင်းပြီး တောင်သူလယ်သမားများ၏ ထွန်ယက်စိုက်ပျိုးလုပ်ကိုင်လိုမှုကို လျော့ကျစေမည်ဖြစ်ကြောင်း ပြောဆိုခဲ့သည်။

Source: Antara News, 9 Dec 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

               ၉.၁၂.၂၀၂၄ ရက်နေ့ ဘုရင့်နောင်ကုန်စည်ဒိုင်တွင် ဖြစ်ပေါ်ခဲ့သော ကြက်သွန်ဖြူ တစ်ပိဿာဈေးနှုန်းများမှာ အောင်ပန်းထူး-၂ ကျပ် ၁၂၅၀၀၊  အောင်ပန်းထူး-၃ ကျပ် ၁၄၀၀၀၊ အောင်ပန်းထူး-၄ ကျပ် ၁၅၀၀၀၊ အောင်ပန်းထူး-၅ ကျပ် ၁၆၀၀၀၊ ကြက်သွန်နီ ဈေးနှုန်းများမှာ ဆိပ်ဖြူရှယ် ကျပ် အမြင့်ဆုံးဈေး ၄၀၀၀ ၊ ဆိပ်ဖြူလတ်ကြီး ကျပ် အမြင့်ဆုံးဈေး ကျပ် ၃၆၀၀ ၊  ဆိပ်ဖြူလတ်သန့် ကျပ် အမြင့်ဆုံးဈေး ၂၈၀၀ မှ အနိမ့်ဆုံးဈေး ကျပ် ၂၆၀၀၊ ဆိပ်ဖြူလတ်ချော ကျပ် အမြင့်ဆုံးဈေး ၁၈၀၀ မှ အနိမ့်ဆုံးဈေး ကျပ် ၁၇၀၀၊ မြင်းခြံ ရှယ် ကျပ် အမြင့်ဆုံးဈေး ကျပ် ၄၀၀၀၊ လတ်ကြီး အမြင့်ဆုံးဈေး ကျပ် ၃၄၀၀ ၊  လတ်သန့်  အမြင့်ဆုံး ဈေး ကျပ် ၂၅၀၀၊ လတ်ချော ကျပ် အမြင့်ဆုံးဈေး ကျပ် ၁၆၀၀ ၊ မြင်းခြံ(ကံဆင့်) ရှယ် ကျပ် ၄၁၀၀၊ မြင်းခြံ(ကံဆင့်) လတ်ကြီးs ကျပ် ၃၇၀၀၊ မြင်းခြံ(ကံဆင့်) လတ်သန့် ကျပ် ၂၉၀၀၊ မြင်းခြံ(ကံဆင့်) လတ်ချော ကျပ် ၁၉၀၀၊ အာလူး တစ်ပိဿာဈေးနှုန်း အောင်ပန်း(A-1) ကျပ် ၄၀၀၀၊ အောင်ပန်း(OK) ကျပ် ၅၀၀၀၊ အောင်ပန်း(S-1) ကျပ် ၆၀၀၀၊ အောင်ပန်း(S-2) ကျပ် ၇၀၀၀၊ တရုတ်အာလူး ကျပ် ၈၃၀၀ ဈေးတို့ အသီးသီးရှိကြကြောင်း ကုန်စည်ဒိုင်မှ စုံစမ်းသိရှိရပါသည်။

DOCA(ရန်ကုန်)

               ပဲခူးတိုင်းဒေသကြီး၊ နတ်တလင်းခရိုင်၊ ဇီးကုန်းမြို့နယ်အတွင်းရှိ မော်ရကျေးရွာ၊ ထန်းတပင်ကျေးရွာ နှင့် အခြားကျေးရွာများတွင် မိုးခရမ်းသီးများကို တစ်နိုင်တစ်ပိုင်စိုက်ပျိုး ကြပါသည်။ မိုးခရမ်းသီးစိုက်ပျိုးရန် ပျိုးပင်တစ်ပင်ကို ၅၀ကျပ်နှုန်းဖြင့် တစ်ဧကကို ပျိုးပင် ၄၀၀၀ ခန့်စိုက်ပျိုးရပါသည်။ မြေကျင်းကလေးများတူးပြီး ပျိုးပင်တစ်ပင်ကို ပင်ခြားတန်းခြား နှစ်ပေခွဲ ထား ပြီးစိုက်ပျိုးကြပါသည်။ ခရမ်းသီးစိုက်ပျိုးရာတွင် တစ်ဧက ကုန်ကျစရိတ်အနေဖြင့် ပျိုးပင်၊ ထွန်ယက်ခ၊ စိုက်ပျိုးခ၊ ပေါင်းမြက်ရှင်းခ၊ မြေဩဇာ၊ ပိုးသတ်ဆေး အပါအဝင်စုစုပေါင်း ၈၂၀၀၀၀ကျပ် ကုန်ကျပါကြောင်း  တစ်ဧကအထွက်နှုန်းမှာ အလုံးရေ ၁၃၀၀၀ ခန့်ထွက်ရှိကြောင်း တစ်လုံးလျှင် ၁၀၀ကျပ်မှ ၁၅၀ကျပ် နှုန်းဖြင့် ဒေသတွင်းသာမက ကုန်စိမ်းဒိုင်များမှတဆင့် အခြားမြို့နယ်များသို့ပါ တင်ပို့ရောင်းချလျက်ရှိကြောင်း ခရမ်းစိုက်တောင်သူ တစ်ဦးထံမှသိရှိရပါသည်။

DOCA(ပဲခူး)

     ဒီဇင်ဘာလအတွင်း အရောင်းအဝယ်အနေဖြင့် ကြက်ဥဘဲဥကို နေ့စဉ် စားသုံးမှု လျော့နည်းမှုမရှိဘဲ ပုံမှန်အရောင်းအဝယ်နှင့် စားသုံးလျက်ရှိကြောင်း သိရှိရသည်။

    သို့သော် မော်လမြိုင်မြို့ ဈေးကွက်အတွင်း၌ ကြက်ဥ/ ဘဲဥ ဈေးနှုန်းမြင့်တက်မှု   ရှိနေကြောင်း၊  ယခုဒီဇင်ဘာလ (ဒုတိယပတ်)တွင် ကြက်ဥတစ်လုံး ၄၅၀ ကျပ်နှင့် ၅၀၀ ကျပ်အတွင်း၊ ဘဲဥတစ်လုံး ၅၈၀ ကျပ်ဖြစ်ပေါ်လျက်ရှိကြောင်း သိရှိရသည်။ ယခင်နိုဝင်ဘာလ(ဒုတိယပတ်)တွင် ကြက်ဥတစ်လုံး  ၄၅၀ကျပ်၊ ဘဲဥတစ်လုံး ၅၅၀ကျပ် ဖြစ်ပေါ်ခဲ့ရာ မော်လမြိုင်ဒေသ၏ ကြက်ဥဘဲဥဈေးနှုန်းမှာ  တစ်လုံးဈေးနှုန်းအရ ကြက်ဥဈေး ၅၀ ကျပ်နှင့် ဘဲဥဈေး  ၅၀ကျပ် ဈေးနှုန်းမြင့်တက်မှုရှိကြောင်း  ကြက်ဥဘဲဥအရောင်းဆိုင်များမှ သိရှိရပါသည်။

DOCA(မွန်)

             ရွှေဘိုခရိုင်အနေဖြင့် စပါးကိုအဓိကစိုက်ပျိုးကြသော်လည်း မိုးကောင်းတောဒေသများတွင် ပဲ၊ ပြောင်း သီးနှံများကိုစိုက်ပျိုးကြရာ ၂၀၂၃-၂၀၂၄ခုနှစ်မိုးသီးနှံတွင် အစေ့ထုတ်ပြောင်း(၃၈၂၅)ဧက စိုက်ပျိုးကြောင်း၊ အစေ့ထုတ်ပြောင်းကို ပဲစဉ်းငုံနှင့် သီးညှပ်သော်လည်းကောင်း၊ သီးသန့် သော်လည်းကောင်းစိုက်ပျိုးကြပြီး ဇွန်လတွင်စတင်စိုက်ပျိုး၍ စက်တင်ဘာလတွင် ရိတ်သိမ်းကြကြောင်း၊ တစ်ဧကအထွက်နှုန်းမှာ(၅၄)တင်းခန့် ထွက်ရှိကြောင်း သက်ဆိုင်ရာဌာန၏ စာရင်းများအရ သိရှိရပါသည်။

            ရွှေဘိုမြို့ရှိ ပဲ၊ နှမ်းကုန်စည်ဒိုင်သို့ ရွှေဘိုခရိုင်သာမက နယ်မြေခြင်းသထိစပ်လျက်ရှိသည့် ရေဦး ခရိုင်နှင့် ကန့်ဘလူခရိုင်မှ အစေ့ထုတ်ပြောင်းများလည်း ဝင်ရောက်လျက်ရှိကြောင်း၊ အစေ့ထုတ်ပြောင်းမှာ စက်တင်ဘာလ၊ ဒုတိယအပတ်မှစတင်၍ ရွှေဘိုဈေးကွက်သို့ စတင်ဝင်ရောက်ခဲ့ပြီး နိုဝင်ဘာလ၊ စတုတ္ထအပတ်တွင် အရောင်းအဝယ်ဖြစ်သည့်ဈေးနှုန်းမှာ အစေ့ထုတ်ပြောင်းတစ်တင်းလျှင်(၂၅၀၀ဝိ/-) ကျပ် ပေါက်ဈေးရှိပြီး တစ်ပတ်အတွင်း အရောင်းအဝယ်ဖြစ်မှုမှာ (၁၃၅၀၀)တင်း/ (၃၃၇)တန်ဖြစ်ကြောင်း၊ ယခင်အပတ်နှင့်ယခုအပတ်တို့၏ အရောင်းအဝယ်ဖြစ်သည့် ဈေးနှုန်းတို့ကို နှိုင်းယှဉ်ပါက ယခင်အပတ်၌ အစေ့ထုတ်ပြောင်းတစ်တင်းလျှင် (၂၄၅၀ဝိ/-)ကျပ်ပေါက်ဈေးရှိခဲ့သဖြင့် ယခုအပတ်တွင် ယခင်အပတ် ထက် အစေ့ထုတ်ပြောင်းတစ်တင်းလျှင်(၅၀ဝိ/-)ကျပ် ဈေးပိုမိုရရှိခဲ့ကြောင်း၊  ယခုအပတ်၌ ရွှေဘိုဈေးကွက်သို့ အစေ့ထုတ်ပြောင်းအဝင်များသော်လည်း ဝင်ရောက်သမျှ အရောင်းအဝယ် ဖြစ်လျက်ရှိ ကြောင်း ပဲ၊ နှမ်းကုန်စည်ဒိုင်ရှိ တာဝန်ရှိသူများနှင့် ဆက်သွယ်မေးမြန်းမှုအရ သတင်းရရှိပါသည်။

DOCA(စစ်ကိုင်း)