ပြည်တွင်းကုန်သွယ်မှုသတင်း

         မိတ္ထီလာမြို့ ဖောင်တော်ဦး ဘုရားပွဲတော်ကို တော်သလင်းလဆန်း (၈) ရက် မှစ၍ ကျင်းပလျက်ရှိရာ မိတ္ထီလာမြို့အနီး မလှိုင်၊ သာစည်၊ ဝမ်းတွင်း၊ ပျော်ဘွယ်မြို့နယ်ရှိ မြို့ပေါ်ကျေးရွာများမှ ဘုရားဖူးလာပြည်သူများနှင့်  စည်ကားလျက်ရှိပါသည်။ ဘုရားဖူးလာ ပြည်သူများအနေဖြင့် ပွဲဈေးလည်၊ လှေပြိုင်ပွဲကြည့်ပြီး အဆာပြေစားသုံးသူရန်နှင့် အိမ်အပြန်လက်ဆောင် မုန့်ပဲသွားရည်စာများ ဝယ်ယူကြရာတွင် ပေါင်းတင်းဝါး(ခေါ်) ခဲတံချောင်း (ခေါ်) ကောက်ညှင်းကျဉ်ထောက်မှာလည်း အရောင်းသွက်ကြောင်း သိရသည်။ ဘုရာပွဲဈေးဖြစ်၍ (၁၂) ပွဲဈေးသည်များက အနယ်နယ်အရပ်ရပ်မှ လာရောက်ရောင်းချကြရာ ကောင်းညှင်းကျဉ်ထောက်ကို ရန်ကုန်မှ လာရောက်ရောင်းချကြကြောင်း သိရသည်။ မိတ္ထီလာမြို့ ဖောင်တော်ဦးဘုရားပွဲဈေးတွင် ကောက်ညှင်းကျဉ်ထောက်ကို အတုံးသေး (၂)တုံးပါ တစ်ဗူးလျှင် (၂၀၀၀) ကျပ် ကောက်ညှင်းကျဉ်ထောက်တစ်တောင့်လုံးဆိုလျှင် (၁၁၀၀၀) ကျပ် ဖြင့် ရောင်းချလျက်ရှိကြောင်း သိရှိရပါသည်။

DOCA(မန္တလေး)

      ဧရာဝတီတိုင်းဒေသကြီး၊ ပုသိမ်မြို့ပေါ်တွင် ဒေသထွက်ကုန်များနှင့်အတူ အနယ်နယ် အရပ်ရပ်မှ တင်သွင်းလာသော လူသုံးကုန်၊ စားသောက်ကုန်များ အများအပြား ရောင်းချလျက် ရှိရာတွင် Hass မျိုး ထောပတ်သီး သည်လည်း လူကြိုက်များလျက်ရှိသည့် သစ်သီးတစ်မျိုး ဖြစ်သည်။ ဗီတာမင်နှင့် ကျန်းမာရေးနှင့်ညီညွတ်သော အဆီဓာတ်များ ကြွယ်ဝစွာပါဝင်ပြီး နှလုံး ကျန်းမာရေးအတွက် ကောင်းမွန်သည်ဟု လူသိများသည့် အသီးဖြစ်ပါသည်။ ရှမ်းပြည်နယ် (ညောင်ရွှေ၊ အောင်ပန်း) နှင့် မန္တလေးတိုင်းဒေသကြီး (ပြင်ဦးလွင်) စသည့် ဒေသများမှ တင်သွင်း လာသော Hass မျိုး ထောပတ်သီးများကို ပုသိမ်မြို့ပေါ်ရှိ  ဈေးများနှင့် သစ်သီးဆိုင်တို့တွင် အဓိက ရောင်းချလျက်ရှိကြောင်း သိရပါသည်။

          ဈေးနှုန်းအခြေအနေအရ ယခင်က ထောပတ်သီး ၁ ကီလိုဂရမ်လျှင် (၁၂,၀၀၀) ကျပ် နှင့် ကီလိုဝက်လျှင် (၆,၀၀၀) ကျပ် နှုန်းဖြင့် ရောင်းချလျက်ရှိရာမှ ယခု ၂၀၂၅ ခုနှစ်၊ စက်တင်ဘာလ ဒုတိယပတ်အတွင်း ထောပတ်သီး ၁ ကီလိုဂရမ်လျှင် (၇,၀၀၀) ကျပ် သို့ ဈေးကျဆင်းသွား ကြောင်း သစ်သီးရောင်းချသူများထံမှ သိရှိရပါသည်။ ဈေးနှုန်းများ သိသိသာသာ ကျဆင်းရခြင်း အကြောင်းအရင်းမှာ ရှမ်းပြည်နယ်ဘက်မှ ဝင်ရောက်လာသော ထောပတ်သီး အရင်းအမြစ် များပြားလာပြီး ဈေးကွက်အတွင်း ရောင်းချမှုပမာဏ များပြားလာသောကြောင့်ဟု ရောင်းချ သူများက ဆိုပါသည်။ ထို့အပြင် လမ်းပန်းဆက်သွယ်ရေး ပိုမိုကောင်းမွန်လာခြင်းကြောင့်လည်း ကုန်စည်အရောက်အပေါက်မြန်ဆန်ကာ ကုန်ကျစရိတ် သက်သာရာမှ ဈေးနှုန်းကျဆင်းလာခြင်း ဖြစ်နိုင်ကြောင်း သိရပါသည်။ ယခုလို ဈေးနှုန်းသက်သာလာမှုသည် စားသုံးသူများအတွက် ကောင်းမွန်သော အခွင့်အရေးတစ်ရပ်ဖြစ်ပြီး ရောင်းအားကောင်းမွန်နေဆဲဖြစ်ပါသည်။

DOCA (ဧရာဝတီ)

     ဧရာဝတီတိုင်းဒေသကြီး၊ ပုသိမ်မြို့တွင် ကြက်အူချောင်း/ဝက်အူချောင်းများကို ကိုယ်တိုင် ပြုလုပ်၍ ဈေးများတွင် ရောင်းချသကဲ့သို့ နာမည်ကြီး ဒေါ်ကျင်မြကဲ့သို့ ကြက်အူချောင်း/ ဝက်အူချောင်းရောင်းချနေသည့် လုပ်ငန်းရှင်များလည်းအများအပြားရှိပါသည်။ ကြက်အူချောင်း/ ဝက်အူချောင်းသည် ချက်ပြုတ်ရန် မြန်ဆန်လွယ်ကူသည့်အတွက် အချိန်ကုန်သက်သာစေသော အစားအစာတစ်မျိုးအဖြစ် လူကြိုက်များပါသည်။

      ကြက်အူချောင်း/ဝက်အူချောင်းများကို မြို့ပေါ်ရှိ စားသောက်ဆိုင်များ၊ ထမင်းဆိုင်များမှ လည်းကောင်း၊ အိမ်ရှင်မများ ဟင်းလျာများ ချက်ပြုတ်ရာတွင်လည်းကောင်း အများဆုံး အသုံးပြုနေကြကြောင်း သိရပါသည်။ ၂၀၂၅ခုနှစ်၊ စက်တင်ဘာလ ပထမပတ်တွင် ရောင်းချ ခဲ့သော ဝက်အူချောင်းဈေးနှုန်းမှာ ဝက်အူချောင်း(၁)ပိဿာလျှင် (၆၀၀၀၀)ကျပ်၊ (၅၀)ကျပ်သား လျှင် (၃၀၀၀၀)ကျပ်၊ (၁၀)ကျပ်သားလျှင် (၆၀၀၀)ကျပ် ရှိခဲ့ပါသည်။ ယခု ၂၀၂၅ ခုနှစ်၊ စက်တင် ဘာလ ဒုတိယပတ်အတွင်း ရောင်းချလျက်ရှိသော ဝက်အူချောင်းဈေးနှုန်းမှာ ဝက်အူချောင်း(၁) ပိဿာလျှင် (၆၅၀၀၀)ကျပ်၊ (၅၀) ကျပ်သားလျှင် (၃၂၅၀၀)ကျပ်၊ (၁၀)ကျပ်သားလျှင် (၆၅၀၀) ကျပ်အထိ ဖြစ်လျက်ရှိကြောင်း ဈေးသည်တစ်ဦးထံမှ သိရှိရပါသည်။ ယခင်အပတ်နှင့် နှိုင်းယှဉ် ပါက ပိဿာချင်း (၅,၀၀၀)ကျပ်၊ ကျပ်သားချင်း (၅၀)ကျပ်မှ (၂၅၀၀)ကျပ် အထိ ဈေးနှုန်း အနည်းငယ် မြင့်တက်လာကြောင်း တွေ့ရှိရပါသည်။

      ဈေးနှုန်းမြင့်တက်ရခြင်း၏ အကြောင်းရင်းမှာ ကုန်ကြမ်းဈေးနှုန်းများမြင့်တက်လာခြင်း နှင့် သယ်ယူပို့ဆောင်ခွင့်စရိတ်တို့ကြောင့် ဖြစ်နိုင်ကြောင်း ရောင်းချသူများက ဆိုပါသည်။ သို့ရာတွင် လူကြီးလူငယ်မရွေး ကြိုက်နှစ်သက်လှသော အစားအစာဖြစ်သည့်အတွက် ဈေးနှုန်းအနည်းငယ် မြင့်တက်လာသော်လည်း ရောင်းအားကောင်းမွန်ဆဲဖြစ်ကြောင်း သတင်းရရှိပါသည်။

DOCA (ဧရာဝတီ)

       သာစည်မြို့နယ်တွင် စက်တင်ဘာလဆန်းရှိ ဆန်ဈေးနှုန်းများ ဈေးငြိမ်နေကြောင်းသိရသည်။ ဆန်ဈေးကွက်အတွင်း အရောင်းအဝယ်ဖြစ်သော ဆန်အမျိုးအစားများ ရွှေဘိုပေါ်ဆန်း၊ ပဒေသာ၊ မနောသုခ၊ သုခထွန်း၊ ရက်(၉၀)ဆန်များ အရောင်းအဝယ်ဖြစ်ရာ မနောသုခ၊ သုခထွန်း၊ ရက်(၉၀)ဆန်များမှာ မိုးဆန်(ကြားဆန်) များနှင့် နွေဆန်သစ်များတွေ့ရပြီး၊ ပေါ်ဆန်း၊ ပဒေသာဆန်တို့မှာ မိုးဆန်( ကြားဆန်) များဖြင့်အရောင်းအဝယ်ဖြစ်နေကြောင်းသိရသည်။ ဆန်ဈေးနှုန်းအနေဖြင့်  ရွှေဘိုမှဝင်ရောက်သောဆန်များမှာ ကားသယ်ခအနေဖြင့် ရွှေဘိုမှ မိတ္ထီလာသို့ တစ်အိတ်လျှင် ၈၀၀၀မှ ၈၅၀၀ ကျပ်ဈေးရှိသည့်အတွက် ဆန်ဈေးများပါမြင့်တက်နေပြီး ကျန်အမျိုးအစားများမှာ ဈေးငြိမ်လျက်ရှိပါသည်။ စက်တင်ဘာလဆန်းတွင် အရောင်းအဝယ်ဖြစ်သော ဈေးနှုန်းများမှာ (၂၄)ပြီ (၁)အိတ်လျှင် ရွှေဘိုပေါ်ဆန်းမှာ(၁၆၅၀၀၀)ကျပ်၊ ရွှေဘိုပဒေသာမှာ(၁၃၀၀၀၀)ကျပ်၊ ကျောက်ဆည်ပဒေသာမှာ (၁၂၀၀၀၀)ကျပ်၊ မနောသုခ(မိုး)နှင့် ရက်(၉၀)(မိုး)မှာ(၇၀၀၀၀)ကျပ်၊ မနောသုခ(နွေ)နှင့် သုခထွန်းမှာ (၆၅၀၀၀)ကျပ်၊ တို့ဖြင့် အရောင်းအဝယ်ပုံမှန်ရှိကြောင်း၊ သာစည်မြို့နယ်အနေဖြင့် မိတ္ထီလာမှတစ်ဆင့် ဝယ်ယူရောင်းချမှုများအကြောင်း ဆန်ဆိုင်များမှ သိရှိရပါသည်။

DOCA(မန္တလေး)

     ဧရာဝတီတိုင်းဒေသကြီးအတွင်း ကြက်သားနှင့် ကြက်ဥဈေးနှုန်းများသည် မတည်ငြိမ်ဘဲ နေ့စဉ်လိုလို အတက်အကျမြန်နေပြီး ပြည်သူများအတွက် ဈေးဝယ်ချိန်ရွေးရခက်စေကာ မွေးမြူရေးလုပ်ငန်းရှင်များအတွက်လည်း ကုန်ကျစရိတ်မြင့်မားမှုနေကြောင်း သိရသည်။

          ဧရာဝတီတိုင်းရှိ ကြက်မွေးမြူရေးလုပ်ကိုင်သူများထံမှ ရရှိသော သတင်းအချက်အလက် များအရ ကြက်စာအတွက် အဓိကကုန်ကြမ်းများဖြစ်သည့် ပဲဖတ်၊ ငါးမှုန့်နှင့် ဆန်ကွဲဈေးနှုန်းများ ကမ္ဘာ့ဈေးကွက်အရ သိသိသာသာ မြင့်တက်နေခြင်း၊ ရောဂါဘယများ ကာကွယ်ရန် ကာကွယ် ဆေးနှင့် ဆေးဝါးကုန်ကျစရိတ်များ မြင့်မားလာခြင်း၊ လျှပ်စစ်မီတာခနှင့် လောင်စာဆီဈေးများ ကြောင့် ထုတ်လုပ်မှုစရိတ် သိသိသာသာ မြင့်တက်လာခဲ့သည်။

          ထိုသို့ ကုန်ကျစရိတ်များ မြင့်တက်လာသော်လည်း ဈေးကွက်အတွင်း ဝယ်လိုအားသည် မပီပြင်ဘဲ ရှိနေသဖြင့် မွေးမြူရေးသမားများအနေဖြင့် ၎င်းတို့၏ ကုန်ကျစရိတ်ကို အတိအကျ ဈေးနှုန်းသတ်မှတ်ရန် အခက်အခဲရှိနေကြောင်း၊ ရက်အနည်းငယ်အတွင်း ကြက်သားနှင့် ကြက်ဥဈေးများ မကြာခဏ ပြောင်းလဲနေကြောင်း သိရသည်။

          ဈေးကွက်ဘက်မှလည်း ဝယ်လိုအားသည် လစဉ်လိုလို မတည်ငြိမ်ဘဲ ရှိနေပြီး အထူး သဖြင့် လစာနှင့် ဝင်ငွေရသည့်ရက်များတွင် ဈေးနှုန်း အနည်းငယ်မြင့်တက်လာကာ ရက်သတ္တ ပတ်အလယ်ပိုင်းရောက်လျှင် ပြန်လည်ကျဆင်းသွားတတ်သည့် သံသရာလည်နေကြောင်း သိရသည်။ ထို့အပြင် ကျေးလက်ဒေသမှ ဝင်ငွေနည်းပါးသည့် မိသားစုများအနေဖြင့် ပရိုတိန်း ဓာတ်ရရှိရန် အဓိကအားထားရသည့် ကြက်သားနှင့် ကြက်ဥများ ဝယ်ယူရန် အခက်အခဲရှိလာ နိုင်သည်ဟု စီးပွားရေးပညာရှင်အချို့က သုံးသပ်ထားသည်။

          ဧရာဝတီတိုင်းဒေသကြီး မွေးမြူရေးဦးစီးဌာနမှလည်း "မွေးမြူရေးလုပ်ကိုင်သူတွေ စရိတ် ချွေတာနိုင်ဖို့၊ ရောဂါကာကွယ်နိုင်ဖို့ နည်းပညာပေးသင်တန်းတွေ ဆက်လက်ပေးသွားဖို့ ရှိပါတယ်။ တဖက်မှာလည်း ဈေးကွက်တည်ငြိမ်ဖို့နဲ့ ထုတ်လုပ်သူတွေရော စားသုံးသူတွေပါ အဆင်ပြေစေဖို့ ညှိနှိုင်းဆောင်ရွက်ပေးသွားမှာဖြစ်ပါတယ်" ဟု ပြောကြားကြောင်း သတင်းရရှိ ပါသည်။

DOCA (ဧရာဝတီ)