ပြည်တွင်းကုန်သွယ်မှုသတင်း

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူးရုံးအနေဖြင့် ကုန်စည်ဒိုင်များ၏ သီးနှံဈေးနှုန်းများနှင့် အရောင်းအဝယ်ဖြစ်မှုတင်း/တန် စာရင်းတို့ကို အပတ်စဉ်၊ လစဉ်တင်ပြလျက်ရှိရာ ၂၀၂၄ခုနှစ်၊ ဧပြီလ ပထမပတ်အတွင်း အရောင်းအဝယ်ဖြစ်သည့် သီးနှံနှင့်ဈေးနှုန်းအခြေအနေများကို ရွှေဘိုမြို့ ပဲ၊ နှမ်းကုန်စည်ဒိုင်ရှိ တာဝန်ရှိသူများနှင့်ဆက်သွယ်မေးမြန်းခဲ့ပါသည်။ ‌

       မတ်လ ဒုတိယပတ်မှစတင်၍ ရွှေဘိုဈေးကွက်သို့ ကုလားပဲ(V2)များစတင်ဝင်ရောက်ခဲ့ကြောင်း၊ ဧပြီလ ပထမပတ်တွင် အရောင်းအဝယ်ဖြစ်သည့် ဈေးနှုန်းမှာ ကုလားပဲ(V2)တစ်တင်းလျှင် (၇၈၀၀ဝိ/-)ကျပ်ပေါက်ဈေးရှိပြီး တစ်ပတ်အတွင်း အရောင်းအဝယ်ဖြစ်မှုမှာ (၉၀၀)တင်း/ (၂၅)တန်ဖြစ်ကြောင်း၊ ယခင်အပတ်နှင့် ယခုအပတ်တို့၏ အရောင်းအဝယ်ဖြစ်သည့် ဈေးနှုန်းတို့ကိုနှိုင်းယှဉ်ပါက ယခင်အပတ်၌ ကုလားပဲ(V2)တစ်တင်းလျှင် (၇၂၅၀ဝိ/-)ကျပ်ပေါက်ဈေးရှိခဲ့သဖြင့် ယခုအပတ်တွင် ယခင်အပတ်ထက် ကုလားပဲ(V2)တစ်တင်းလျှင် (၅၅၀ဝိ/-)ကျပ်ဈေးပိုမိုရရှိခဲ့ကြောင်း၊ ယခင်နှစ်ကာလတူနှင့် အရောင်းအဝယ်ဖြစ်သည့် ဈေးနှုန်းတို့ကိုနှိုင်းယှဉ်ပါက ယခင်နှစ်ကာလတူ၌ ကုလားပဲ(V2) တစ်တင်းလျှင် (၆၇၃၀ဝိ/-)ကျပ်သာပေါက်ဈေးရှိခဲ့သဖြင့် ယခုနှစ်တွင် ယခင်နှစ်ကာလတူထက် ကုလားပဲ(V2)တစ်တင်းလျှင် (၁၀၇၀ဝိ/-)ကျပ်ဈေးနှုန်းပိုမိုရရှိခဲ့ကြောင်းနှင့်  ဝင်ရောက်သမျှ ပုံမှန်အရောင်းအဝယ်ဖြစ်လျက်ရှိကြောင်း သတင်းရရှိပါသည်။

DOCA(စစ်ကိုင်း)

       မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့ပေါ်တွင် စားသုံးဆီ လက်လီ/ လက်ကားအရောင်းဆိုင်(၁၈)ဆိုင်ရှိပြီး နေ့စဉ်အရောင်းအဝယ်ဖြစ်လျက်ရှိပါသည်။ ၂၀၂၄ခုနှစ်၊ ဧပြီလ (ပထမပတ်)တွင် စားသုံးဆီဈေးနှုန်းများငြိမ်၍ အရောင်းအဝယ်ဖြစ်လျက်ရှိသည်။ ဆုံပဲဆီသန့်တစ်ပိဿာလျှင် ကျပ် (၁၆၀၀၀)၊ စက်ပဲဆီတစ်ပိဿာလျှင် ကျပ်(၁၄၅၀၀)၊ ပဲစက်ကျဆီတစ်ပိဿာလျှင် ကျပ်(၁၂၀၀၀)၊ ပဲရောဆီတစ်ပိဿာလျှင် ကျပ်(၉၀၀၀မှ ၉၅၀၀)၊ နှမ်းဆီတစ်ပိဿာလျှင် ကျပ်(၁၅၀၀၀)၊ နှမ်းရောဆီတစ်ပိဿာလျှင် ကျပ်(၇၀၀၀ - ၉၅၀၀ - ၁၂၀၀၀)၊ စားအုန်းဆီတစ်ပိဿာလျှင် ကျပ်(၆၈၀၀)ဈေးနှုန်းဖြင့် အရောင်းအဝယ်ဖြစ်နေကြောင်းသိရှိရသည်။

    ယခင်မတ်လ (ပထမပတ်) နှင့် ဈေးနှုန်းတို့နှင့်နှိုင်းယှဉ်ပါက စားအုန်းဆီများကို သတ်မှတ်ရည်ညွှန်းဈေးနှုန်းဖြင့် ရောင်းချလျက်ရှိပြီး မြေပဲ/နှမ်းဆီဈေးနှုန်းများမှာ ဈေးငြိမ်၍ အရောင်းအဝယ်ဖြစ်လျက်ရှိကြောင်း၊ ဒေသတွင်း ဆီထွက်သီးနှံမြေပဲများမှာ လှိုင်လှိုင်ပေါ်လျက်ရှိသော်လည်း မြေပဲဈေးကွက်မှာ ကျဆင်းခြင်းမရှိ၍ စားသုံးဆီဈေးနှုန်းမှာလည်း ဈေးငြိမ်‌နေကြောင်း မြို့ပေါ်ရှိ စားသုံးဆီအရောင်းဆိုင်များမှသိရှိရပါသည်။

DOCA(မကွေး)

      မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့နယ်သည် စိုက်ပျိုးရေးလုပ်ငန်းကို စီးပွားဖြစ်လုပ်ကိုင်ကြပြီး သီးနှံမျိုးစုံအနက် ဆောင်းသီးနှံ ကျွန်းစားတော်ပဲစိုက်ပျိုးမှုကိုလည်း ဧရာဝတီမြစ်ရိုးတစ်လျှောက်ရှိ ကိုင်းကျွန်းမြေများတွင် သီးညှပ်စိုက်ခင်းအပြင် သီးသန့်စိုက်ပျိုးမှုကိုလည်း နှစ်စဉ်စိုက်ပျိုးကြောင်း၊ ယခုနှစ် မြစ်ရေတက်ချိန်တွင် စိုက်ခင်းများအတွင်း သဲနုန်းမြေများ မြေသားတင်မှုများခြင်းကြောင့် စားတော်ပဲစိုက်တောင်သူများ နှစ်စဉ်ထက် စိုက်ဧကများလာကြောင်း၊ ယခင်နှစ်တွင် စိုက်ဧက(၂၀၀၀)ခန့်စိုက်ပျိုးပြီး ယခုနှစ်တွင် ဧက(၂၅၀၀)တိုးချဲ့စိုက်ပျိုးကြောင်း၊ စားတော်ပဲသီးနှံကို တန်ဆောင်မုန်းလဆန်းပိုင်းတွင်စတင်၍ ကျဲပက်စိုက်ပျိုးပြီး တပေါင်းလဆန်းပိုင်းတွင် သီးနှံရိတ်သိမ်းကြောင်း၊ မြေအောက်ရေအပြင် ရေသွင်းစနစ်ဖြင့် စိုက်ပျိုးမှုများကြောင်း၊ စားတော်ပဲသီးနှံသည် ပြည်တွင်းသုံးစွဲမှုများပြီး ဈေးကွက်ခိုင်မာမှုရှိ၍ စိုက်တောင်သူများက နှစ်စဉ်စိုက်ပျိုးကြောင်းသိရှိရသည်။

       ကျွန်းစားတော်ပဲသီးနှံတစ်ဧကစိုက်ပျိုးလျှင် မျိုးစေ့(၂)တင်း(၈)ပြည်ခန့်ကုန်ကျကြောင်း၊ စိုက်ပျိုးချိန်တွင် မျိုးစေ့(၁)ပြည်လျှင် ကျပ်(၉၀၀၀)၊ (၁)တင်းလျှင် ကျပ်(၁၄၀၀၀၀)ဈေးနှုန်းဖြင့် ဝယ်ယူရကြောင်း၊ စားတော်ပဲသီးသန့်စိုက်ခင်းများမှာ ရေသွင်းစိုက်ပျိုးပါက အထွက်နှုန်းကောင်းမွန်ကြောင်း၊ တောင်သူများအနေဖြင့် မြေပဲခင်းများကြားတွင် သီးညှပ်စိုက်ပျိုးမှုများကြောင်း၊ (၁)ဧကကုန်ကျစရိတ်အနေဖြင့် သီးညှပ်စိုက်ခင်းများတွင် ကုန်ကျစရိတ်နည်းသော်လည်း သီးသန့်စိုက်ပျိုးပါက (၁)ဧကလျှင် ကျပ်(၅၀၀၀၀၀) ခန့်ကုန်ကျကြောင်း၊ အထွက်နှုန်းအနေဖြင့် (၁)ဧကလျှင် တင်း(၁၀ - ၁၅)ထိထွက်ရှိကြောင်း၊ ယခုနှစ်၌ စားတော်ပဲဖြစ်ထွန်းမှုများ၍ အထွက်နှုန်းကောင်းကြောင်း၊ ဒေသတွင်းကျွန်းစားတော်ပဲသီးနှံဈေးကွက်တွင် မြို့ပေါ်ရှိ စားတော်ပဲကြော်လုပ်ငန်းရှင်များ၊ စားသောက်ကုန်လုပ်ငန်းရှင်များနှင့် ပဲပြုတ်ရောင်းချသူများက ဝယ်ယူသိုလှောင်ထားရှိ၍ စားတော်ပဲ(၁)တင်းလျှင် ကျပ်(၁၀၀၀၀၀)ပေါက်ဈေးရှိ၍ (၁)ဧကဝင်ငွေမှာ ကျပ်(၁၅၀၀၀၀၀)ခန့်ရရှိပြီး အကျိုးအမြတ်အနေဖြင့် ကျပ်(၁၀၀၀၀၀၀)ခန့်ရရှိကြောင်း၊ ယခုနှစ်တွင် စားတော်ပဲသီးနှံဈေးကွက်ကျဆင်းသော်လည်း အထွက်နှုန်းကောင်းမွန်ခြင်းကြောင့် စိုက်တောင်သူများအဆင်ပြေကြောင်း ဒေသခံတောင်သူမှတစ်ဆင့်သိရှိရသည်။

         စားတော်ပဲသီးနှံမှာ ပြည်တွင်းစားသုံးမှုပဲများအနက် တစ်မျိုးအပါအဝင်ဖြစ်ပြီး စားသုံးရာတွင်လည်း အရသာအကောင်းဆုံးပဲတစ်မျိုးဖြစ်၍ ပြည်တွင်းစားသုံးမှုများပြီး ဆန်စိုက်ဧက နည်းပါး၍ စားသုံးမှုလိုအပ်ချက်အရ ပြည်ပနိုင်ငံများမှ တင်သွင်းရခြင်းကြောင့် ပြည်တွင်းဈေးကွက်ခိုင်မာလျက်ရှိသော သီးနှံဖြစ်၍ စိုက်တောင်သူများအနေဖြင့် ကျွန်းစားတော်ပဲသီးနှံများ စိုက်ပျိုးရရှိသည့်မြေများတွင် နှစ်စဉ်မပြတ်တိုးချဲ့စိုက်ပျိုးသင့်ကြောင်း သုံးသပ်တင်ပြလိုက်ရပါသည်။

DOCA(မကွေး)

        ခရိုင်စားသုံးသူရေးရာဦးစီးဌာနမှ ဒေါ်ဥမ္မာလင်း(ဦးစီးမှူး)နှင့် ဒေါ်အေးအေးသန့်(အကြီးတန်းစာရေး) တို့သည် ပေါင်းစပ်ဌာနဆိုင်ရာများနှင့် အတူပူးပေါင်းပြီး (၃.၄.၂၀၂၄)ရက်နေ့တွင် ကျောက်မဲမြို့၊ အမှတ်(၁)ရပ်ကွက်၊ ပြိန်းနင်ရပ်ရှိ “ ဟိန်း ”အမှတ်တံဆိပ်ဖြင့် ဆီကြိတ်ခွဲထုတ်လုပ် ဖြန့်ဖြူးရောင်းချသည့် ဆီစက်လုပ်ငန်းသို့သွားရောက်၍  ဆီလုပ်ငန်းရှင် ဦးစိုင်းခွန်ထီးနှင့်တွေ့ဆုံပြီး လုပ်ငန်းလည်ပတ် နေမှုအခြေအနေများ၊ ကုန်ကြမ်းဝယ်ယူစုဆောင်းမှုအခြေအနေများ၊ ဆီထုတ်လုပ်ရောင်းချမှုအမျိုးအစားများ၊ တစ်ရက်ကြိတ်ခွဲထုတ်လုပ်နိုင်မှုအခြေအနေများ၊ ရောင်းချသည့်ဈေးနှုန်းနှင့်ဈေးကွက်အတွင်း ထုတ်လုပ်ရောင်းချရာတွင် သတ်မှတ်ထားသော ကုန်အညွှန်းအမှတ်အသားများပြည့်စုံ မှန်ကန်စွာဖော်ပြထားမှု ရှိ/မရှိ  မေးမြန်းရာတွင် လုပ်ငန်းလည်ပတ်နေမှုမှာ ယခင်က တစ်ရက်လျှင် ပျမ်းမျှ(၅)နာရီခန့် လည်ပတ်လျက်ရှိသော်လည်း ယခုတွင် ကုန်ကြမ်းဝယ်ယူမှု အခက်အခဲများကြောင့် စက်လည်ပတ်နိုင်ခြင်းမရှိဘဲ ရပ်နားထားကြောင်းသိရသည်။

          လုပ်ငန်းရပ်နားထားမှုနှင့်ပတ်သက်ပြီး ကုန်ကြမ်းများကို ယခင်ကမန္တလေးမြို့၊ မိုင်းရယ်မြို့ဘက်မှ ဝယ်ယူစုဆောင်းကြောင်း၊ ယခုအခါကုန်ကြမ်းများကို မန္တလေးမြို့မှဝယ်ယူ၍ မရရှိခြင်း၊ မိုင်းရယ်မြို့မှ ဝယ်ယူရာတွင် လမ်းကြောင်းအခြေအနေများကြောင့် ဝယ်ယူရာတွင် အခက်အခဲများရှိ၍ ဝယ်ယူမရရှိနိုင် ခြင်းဖြစ်ကြောင်းသိရသည်။

          ဈေးကွက်အတွင်း (၁)ပိဿာဗူး၊ (၅၀)ကျပ်သားဗူး၊ (၂၅)ကျပ်သားဗူးဖြင့် အမျိုးအစား(၃)မျိုး‌အား ပုံမှန်ရောင်းချလျက်ရှိပြီး ရံဖန်ရံခါမှာယူသူများရှိပါက (၃)ပိဿာဗူး၊ (၅)ပိဿာဗူး၊ (၁၀)ပိဿာဗူး များကို လည်းရောင်းချလျက်ပေးကြောင်းနှင့် ရောင်းချဈေးနှုန်းမှာ (၁)ပိဿာလျှင် (၁၇၀၀၀)ကျပ် ရှိကြောင်းသိရသည်။

          ပုံမှန်အတိုင်းစက်လည်ပတ်ပြီး ဆီကြိတ်ခွဲထုတ်လုပ်ရပါက တစ်ရက်လျှင် ကုန်ချော (၃၀၀) ပိဿာ ကြိတ်ခွဲထုတ်လုပ်နိုင်ကြောင်း၊ ဈေးကွက်အတွင်းဖြန့်ဖြူးရောင်းချရာတွင် သက်ဆိုင်ရာဌာနများ မှချမှတ်ထားသည့် စည်းကမ်း သတ်မှတ်ချက်များ၊ ညွှန်ကြားချက်များနှင့်အညီ လိုက်နာဆောင်ရွက် ထားရှိပါကြောင်း၊ ဆီများကိုသန့်သန့်ရှင်းရှင်းသပ်သပ်ရပ်ရပ် ထုတ်ပိုး၍ရောင်းချပေးခြင်းကြောင့် စားသုံးသူများယုံကြည်စိတ်ချစွာဖြင့် ဘေးအန္တရာယ်ကင်းကင်း  ဝယ်ယူသုံးစွဲနိုင်ပါကြောင်း သိရသည်။

DOCA(ရှမ်း)

     မကွေးတိုင်းဒေသကြီး၊ အောင်လံမြို့၊ အောင်လံကုန်စည်ဒိုင်တွင် မတ်လ စတုတ္ထပတ်အတွင်း လယ်ယာထွက်ကုန်သီးနှံမျိုးစုံဖြစ်သည့် နှမ်းနှင့်ပဲမျိုးစုံသီးနှံများဖြစ်ပေါ်နေသော ဈေးနှုန်းများနှင့် အရောင်းအဝယ်အခြေအနေများမှာ နှမ်းနက်(စမုံ) (၄၅)ပိဿာပါ (၁)အိတ်လျှင် ကျပ်(၃၅၀၀၀၀-၃၈၀၀၀၀)ဖြင့် အိတ်(၁၂၀၀)ကိုလည်းကောင်း၊ နှမ်းပြာ(၄၅)ပိဿာပါ (၁)အိတ်လျှင် ကျပ် (၃၄၀၀၀၀)ဖြင့် အိတ်(၁၈၀)ကိုလည်းကောင်း၊ နှမ်းနီ(၄၅)ပိဿာပါ (၁)အိတ်လျှင် ကျပ်(၃၄၀၀၀၀) ဖြင့် အိတ်(၈၀)ကိုလည်းကောင်း၊ နှမ်းဖြူ(၄၅)ပိဿာပါ (၁)အိတ်လျှင် ကျပ်(၃၅၀၀၀၀)ဖြင့် အိတ် (၆၀)ကိုလည်းကောင်း နှမ်းသီးနှံဈေးနှုန်းများပြောင်းလဲခြင်းမရှိဘဲ ပုံမှန်အရောင်းအဝယ်မျှသာဖြစ်လျက်ရှိပြီး ကုလားပဲ (HL) (၁)တင်းလျှင် ကျပ်(၈၀၀၀၀-၈၃၀၀၀)ဖြင့် (၃၀)ပိဿာပါ အိတ် (၁၃၀၀) အိတ်ကိုလည်းကောင်း၊ ကုလားပဲ (မြကြေး) (၁)တင်းလျှင် ကျပ်(၈၂၀၀၀-၈၇၀၀၀)ဖြင့် (၃၀)ပိဿာပါအိတ် (၈၀၀)အိတ်ကိုလည်းကောင်း၊ မတ်ပဲ(၁)တင်းလျှင် ကျပ်(၈၉၀၀၀-၉၀၅၀၀)ဖြင့် (၃၀)ပိဿာပါ အိတ်(၁၇၀)အိတ်ကိုလည်းကောင်း၊ ပဲစင်းငုံနီ(၁)တင်းလျှင် ကျပ်(၁၁၆၀၀၀-၁၂၀၀၀၀)ဖြင့် (၃၀)ပိဿာပါအိတ် (၁၀၀၀) အိတ်ကိုလည်းကောင်း၊ ဘိုကိတ်ပြာ(၁)တင်းလျှင် ကျပ်(၆၀၀၀၀-၆၄၀၀၀)ဖြင့် (၃၀)ပိဿာပါ အိတ်(၁၀၀)အိတ်ကိုလည်းကောင်း၊ ပဲကြီး(၁)တင်းလျှင် ကျပ်(၈၄၀၀၀-၉၃၀၀၀)ဖြင့် (၃၀)ပိဿာပါ အိတ်(၅၅၀) အိတ်ကိုလည်းကောင်း၊ မြေပဲလုံးဆန် (ဖြူ) (၁)ပိဿာလျှင် ကျပ်(၆၃၅၀-၆၅၀၀)ဖြင့် (၃၀)ပိဿာဝင်အိတ် (၃၈၀) အိတ်ကိုလည်းကောင်း၊ မြေပဲလုံးဆန်(နီ) (၁)ပိဿာလျှင် ကျပ်(၇၂၀၀-၇၉၀၀)ဖြင့် (၃၀)ပိဿာဝင်အိတ် (၁၇၀)အိတ်ကို လည်းကောင်း၊ ဝါ(၁)ပိဿာလျှင် ကျပ်(၂၉၀၀-၃၂၀၀) ဈေးနှုန်းဖြင့် ပိဿာ(၅၀၀၀) စသည်ဖြင့် အသီးသီးအရောင်းအဝယ်ရှိခဲ့ပါသည်။

      မတ်လ (တတိယပတ်) နှင့်နှိုင်းယှဉ်ပါက ပဲမျိုးစုံသီးနှံဈေးနှုန်းမှာ ဈေးနှုန်းအနည်းငယ်လျော့ကျလျက်ရှိပြီး အရောင်းအဝယ်မှာ ခပ်ပါးပါးမျှသာရှိပါသည်။ ပဲကြီး၊ ကုလားပဲသီးနှံတို့မှာ  အသစ်ထွက်ရှိလျက်ရှိသော်လည်း တောင်သူများက အတက်ဈေးနှုန်းကိုစောင့်ကြည့်နေခြင်းဖြစ်၍ အရောင်းအဝယ်နည်းပါးနေသေးကြောင်းနှင့် ဈေးနှုန်းအခြေအနေများကို စောင့်ကြည့်နေခြင်းဖြစ်ကြောင်း အောင်လံကုန်စည်ဒိုင်မှသိရှိရပါသည်။

DOCA(မကွေး)