ပြည်တွင်းကုန်သွယ်မှုသတင်း

            မိတ္ထီလာဈေးကွက်တွင် ဒီဇင်ဘာလဆန်းပိုင်း၌ ကြက်သွန်နီအဟောင်း (ဆောင်းကြက်သွန်နီ) ဈေးအနည်းငယ်ပြန်လည်မြင့်တက်လာကြောင်းသိရသည်။ ပြည်ပဝယ်လက်များအေးနေခြင်း၊ မိုးကြက်သွန်နီအသစ်ပေါ်လာခြင်းတို့ကြောင့် ဈေးအနည်းငယ်နိမ့်ခဲ့ပါသည်။ ယခုတစ်ပတ်တွင် ပြည်ပဝယ်လက်များကအဟောင်းကိုသာ ဝယ်ယူမှုရှိသည့်အတွက် ဈေးနှုန်းပြန်လည်မြင့်တက်လာခြင်း ဖြစ်ကြောင်းသိရသည်။ ကြက်သွန်နီအဟောင်းမှာ ယခင်နှစ် ဆောင်းစိုက်ကြက်သွန်နီများဖြစ်ပြီး အထားခဲ့သည့်အတွက် နှစ်ပေါက်သိုလှောင်လေ့ရှိပါသည်၊၊

              မိုးကြက်သွန်နီအသစ်မှာ ဩဂုတ်၊ စက်တင်ဘာလများတွင်စိုက်ခဲ့ပြီး နိုဝင်ဘာလမှစ၍ နုတ်သိမ်းခဲ့ရာ လက်ရှိအချိန်တွင် ဈေးကွက်သို့အဝင်များနေပါသည်။ မိုးကြက်သွန်နီကို မိတ္ထီလာခရိုင်အတွင်း မလှိုင်မြို့နယ်နှင့် ဝမ်းတွင်းမြို့နယ်တို့တွင်သာစိုက်ပျိုးပြီး ထွက်ရှိမှုမှာလည်း ဆောင်းကြက်သွန်နီလောက် မထွက်ရှိသည့်အတွက် ဈေးကွက်အတွင်းဝင်ရောက်မှု၌ လာမည့်ဆောင်းကြက်သွန်နီမပေါ်မီကာလအတွင်း သုံးစွဲရန်ခန့်သာရှိကြောင်းသိရသည်။ ယခင်နှစ် ဆောင်းကြက်သွန်နီအဟောင်းမှာ မိုးကြက်သွန်နီမပေါ်မီ နိုဝင်ဘာလဆန်းက တစ်ပိဿာလက္ကားဈေး (၄၀၀၀) ကျပ် ထိမြင့်တက်ခဲ့ရာက နိုဝင်ဘာလကုန်ပိုင်းမှ တစ်ပိဿာ (၂၅၀၀) အထိ ဈေးနှုန်းကျဆင်းခဲ့ပါသည်။ လက်ရှိအချိန်တွင် မိုးကြက်သွန်နီအသစ်မှာ လက္ကားဈေး တစ်ပိဿာ (၂၀၀၀-၂၅၀၀) ကျပ်နှင့် အဟောင်းတစ်ပိဿာ (၂၇၀၀)ကျပ်၊ အဟောင်းအနေဖြင့် ယခင်တစ်ပိဿာကထက် တစ်ပိဿာ (၂၀၀) ကျပ် ပြန်မြင့်လာတယ်လို့ ဈေးကွက်မှ သိရှိရပါသည်။

DOCA(မန္တလေး)

    တနင်္သာရီတိုင်းဒေသကြီးမှ နိုဝင်ဘာလ ပထမပတ်အတွင်း ကွမ်းသီးတင်ပို့မှုမှာ ထားဝယ်ခရိုင်မှ (၁၄၂၀၄၀)ပိဿာ တန်အားဖြင့်(၂၃၁.၉၄၄)ရှိပြီး၊ မြိတ်ခရိုင်မှ (၃၃၉၀၅၀) ပိဿာ တန်အားဖြင့်(၅၅၃.၆၅၀)ရှိပြီး၊ ကော့သောင်းခရိုင်မှ တင်ပို့မှုမရှိသေးကြောင်း သိရပါသည်။ ယခု တစ်ပတ်အတွင်း ထားဝယ် ခရိုင်တွင် ကွမ်းသီးခွဲခြမ်းဈေးနှုန်းမှာ တစ်ပိဿာလျှင် (၉၀၀၀)ကျပ်ရှိပြီး၊ မြိတ်ခရိုင် တွင် (၇၅၀၀ မှ ၈၀၀၀)ကျပ်ရှိပါသည်။  ကွမ်းအလုံးခြောက်တစ်ပိဿာလျှင်(၁၀၀၀၀ မှ၁၂၀၀၀) ကျပ်ရှိသဖြင့် တောင်သူများ တွက်ချေကိုက်လျက်ရှိကြောင်း သိရှိရပြီး ကွမ်းသီးပေါ်ချိန်တွင် ဈေးကောင်းရမည်ဟု ခန့်မှန်းနေကြကြောင်း သိရှိရပါသည်။

DOCA(တနင်္သာရီ)

    စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန ကန့်ဘလူမြို့နယ်တာဝန်ခံရုံးသည် တိုင်းဒေသကြီးဦးစီးမှူး၏လမ်းညွှန်မှု ၊ ခရိုင်ဦးစီးမှူး၏ကြီးကြပ်မှုတို့ဖြင့် စားသုံးသူကာကွယ်ရေး လုပ်ငန်းများအပြင် အခြားသောသတင်းအချက်အလက်များကိုလည်း သိရှိလေ့လာနိုင်စေရန် ရည်ရွယ်၍ ဒေသတွင်းရှိ စိုက်ပျိုးမွေးမြူရေးလုပ်ငန်းများ၏ စိုက်ပျိုးထုတ်လုပ်မှု၊ အကျိုးအမြတ်ရရှိမှုတို့ကို ကွင်းဆင်းလေ့လာပြီး ရေးသားတင်ပြလျက်ရှိကြောင်း သိရသည်။

      ကန့်ဘလူမြို့နယ် တာဝန်ခံဦးမျိုးဝင်းသန်းနှင့် ဝန်ထမ်း(၁)ဦးတို့သည် ကန့်ဘလူမြို့၊ အမှတ် (၅)ရပ်ကွက်တွင် ရာသီအလိုက်အသီးအနှံများကို တစ်နိုင်တစ်ပိုင်စိုက်ပျိုးရောင်းချနေသည့် လုပ်ငန်းရှင်ဦးကျော်မျိုး၏ မုန့်ညင်းရွက်စိုက်ခင်းသို့ ကွင်းဆင်းလေ့လာခဲ့ရာ အောက်တိုဘာလနောက်ဆုံး အပတ်တွင် စတင်စိုက်ပျိုးခဲ့ကြောင်း၊ စိုက်ပျိုးပြီး(၁)လခန့်အကြာတွင် မုန့်ညင်းရွက်များစတင်ခူးဆွတ်ရကြောင်း၊ ယခုအခါ  မုန့်ညင်းရွက်များကို ကန့်ဘလူမြို့မဈေးသို့ (၁၀)စီးပါတစ်ထုံးလျှင် (၂၀၀၀)ကျပ်ဖြင့် လက်ကားရောင်းချပေးပြီး ၊ ခြံလက်လီရောင်းဈေးမှာ (၁)စီးလျှင်(၂၅၀)ကျပ်ဖြစ် ကြောင်း၊ မုန့်ညင်းရွက်သည် စိုက်ပျိုးရလွယ်ကူပြီး နေ့စဉ်ခူးဆွတ်ရောင်းချရသည့်အတွက် ဝင်ငွေရရှိကာ မိသားစုအဆင်ပြေလျက်ရှိကြောင်း သိရှိရသည်။

DOCA(စစ်ကိုင်း)

     စစ်ကိုင်းတိုင်းဒေသကြီးတွင် ကုလားပဲ၊ မတ်ပဲ၊ ပဲတီစိမ်း၊ ပဲစဉ်းငုံစသည့်  သီးနှံမျိုးစုံ စိုက်ပျိုးသည့်အနက်မှ  ပြောင်းဖူးကို မြန်မာနိုင်ငံအလယ်ပိုင်းဒေသ၊ စစ်ကိုင်းတိုင်းဒေသကြီး၊ မုံရွာမြို့ နယ်ရှိ ကျေးရွာများတွင် စီးပွားဖြစ်စိုက်ပျိုးလျက်ရှိသည်ကို  တွေ့ရှိရပါသည်။

     ပြောင်းဖူးကို မြေတစ်ဧကလျှင် မျိုးစေ့ ၁ ထုပ်စိုက်ပျိုးရပြီး ပြောင်းမျိုးစေ့ အများအပြား ရှိသော်လည်း ၆၁၂နှင့် ၈၀၈ မျိုးများကိုသာ အများဆုံး စိုက်ပျိုးလျက်ရှိပါကြောင်း၊ မျိုးစေ့ ၆၁၂ တစ်ထုပ် ၈၀၀ဝ၀ ကျပ်၊ ၈၀၈ တစ်ထုပ် ၆၀၀၀၀ ကျပ်  ပေးဝယ်ရပါကြောင်း၊ မြေတစ်ဧကလျှင် ထွန်ယက်ခ တမနက် ၁၅၀ဝ၀ ကျပ်နှုန်းဖြင့် ၁၀မနက် ၁၅၀ဝ၀ဝ ကျပ် ပေး၍ ထွန်ယက်ရပါကြောင်း၊ စိုက်ပျိုးပြီး အပင်ပေါက်များကို ၂ ပတ်တစ်ကြိမ် ရေတင်ပေးရပြီး ၊ အပင်ပေါက် ၁လကျော်လျှင် အပင်ဖြစ်ဆေး၊ ပိုးသတ်ဆေးများ ဖျန်းပေးခဲ့ရပါကြောင်း၊ မြေဆီ(၃) အိတ်ကုန်ကျခဲ့ပြီး မြေဆီ တစ်အိတ်လျှင် (၁)သိန်းကျပ်နှုန်းဖြင့် (၃)သိန်းကျပ်ခန့် ကုန်ကျခဲ့ပါကြောင်း၊ မြေတစ်ဧက စိုက်ပျိုးလျှင် အပြီးအစီး ၁၀ သိန်းဝန်းကျင်ကုန်ကျခဲ့ပြီး   ပြောင်းကို ရာသီမရွေး ရေတင်စိုက်ပျိုးနိုင်ပြီး နွေရာသီစိုက်ပျိုးလျှင် ရက် ၁၀ဝ ကြာပြီး ရေ ၆ ခါတင်ပေးရပါကြောင်း၊ ဆောင်းရာသီစိုက်ပျိုးလျှင် ရက်ပေါင်း ၁၁၀ မှ၁၂၀ ထိကြာပြီး ရေ ၅ ခါတင်ပေးရပါကြောင်း သိရပါသည်။

    ပြောင်းဖူးအား စက်တင်ဘာလနှင့် အောက်တိုဘာလများတွင် စတင်စိုက်ပျိုးပြီး ဇန်နဝါရီလနှင့် ဖေဖော်ဝါရီလမျာတွင် ရိတ်သိမ်းရပါကြောင်း၊ ဆောင်းရာသီ စိုက်ပျိုးလျှင် အမြတ်ပိုမို ထွက်ရှိပါကြောင်း၊ အဖူးရိတ်သိမ်း ချိန်ရောက်လျှင် တစ်ဧကကို လူငှား ၁၀ ဦးငှားရပြီး တစ်မနက်လျှင် မိန်းကလေး ၂၅၀ဝ ကျပ် ၊ ယောင်္ကျားလေး အထမ်း အသယ်အနေဖြင့်  ၄၀၀ဝ ကျပ်ပေးရပါကြောင်း၊ အဖူးကိုချွေစက်ဖြင့်  ချွေလှေ့လျှင် ၁တင်း ၅၀ဝကျပ် ပေးရပြီး၊ ပြောင်းဖူး ၁တင်းကို ကျပ် ၁၉၀ဝ၀ မှ ၂၀၀ဝ၀ ကျော် ရောင်းချရပါကြောင်း၊ ပြောင်းဖူး ၁တင်းလျှင် ၁၈ပိဿာ ရှိပါကြောင်း၊ တစ်ဧက အထွက်နှုန်းမှာ ဆောင်းရာသီစိုက်ပျိုးလျှင် တင်း ၉၀ မှ ၁၀ဝ ထွက်ရှိပြီး နွေရာသီတွင် တင်း ၇၀ မှ ၈၀ ဝန်းကျင် ခန့်သာထွက်ရှိ ပါကြောင်း၊ ပြောင်းဖူးစေ့များကို ဒေသခံပွဲရုံများသို့ ရောင်းချခြင်း၊ မုံရွာပွဲရုံများသို့ ကိုယ်တိုင်ကိုယ်ကျရောင်းချလျက်ရှိကြောင်း၊ တောင်သူအချို့မှာ ပြောင်းဖူးကို ၃/၄ ဧက စိုက်ပျိုးလျက်ရှိကြပြီး တောင်သူတချို့မှာ တပိုင်တနိုင် ၁ဧက/ ၂ဧက ဝန်းကျင်ခန့် စိုက်ပျိုးလျက်ရှိကြောင်း သိရှိရပြီး  ပြောင်းဖူးသည် မုံရွာမြို့နယ်ရှိ ကျေးရွာများတွင် ကြက်စာနှင့် ငုံးစာများအဖြစ် အသုံးပြုလျက်ရှိပြီး ၊ ဈေးပေါ်မူတည်သော်လည်း အရှုံးမရှိဘဲ အောင်မြင်ဖြစ်ထွန်းလျှင် အကျိုးအမြတ် ကျပ်(၁၀)သိန်း ဝန်းကျင်အမြတ် အစွန်းရရှိနိုင်ကြောင်း သိရှိခဲ့ရပါသည်။

DOCA(စစ်ကိုင်း)

    ရာသီပေါ်သီးနှံဖြစ်သည့် နံနံပင်နှင့်ကြက်သွန်မြိတ်များမှာ ဆောင်းရာသီတွင် လှိုင်လှိုင်ထွက် ရှိ၍ အခြားမြို့များမှ သယ်ယူရောင်းချစရာမလိုဘဲ မိမိတို့အိမ်ရှိနေရာလွတ်များတွင်လည်းကောင်း၊ ခြံကျယ်များတွင်လည်းကြောင်း စိုက်ပျိုးကြကြောင်း၊ ရွှေဘိုမြို့နှင့် အနီးတဝိုက်ရှိ ကျေးရွာများမှလည်း လာရောက်ရောင်းချကြကြောင်း၊ နံနံပင်နှင့် ကြက်သွန်မြိတ်မှာ ဟင်းခတ်အမွှေးအကြိုင်ဖြစ်၍ ဟင်းလျာတိုင်းတွင် ထည့်၍ အသုံးပြုကြောင်း၊ ဆောင်းရာသီတွင် ထွက်ရှိသည့် နံနံပင် ဈေးနှုန်းမှာ (၁)စည်းလျှင် (၂၀ဝိ/-)ကျပ် နှင့် (၃)စည်းလျှင် (၅၀ဝိ/-)ကျပ်ဖြင့် အရောင်းအဝယ်ဖြစ်လျက်ရှိပြီး ကြက်သွန်မြိတ် ဈေးနှုန်းမှာ (၁)စည်းလျှင် (၆၀ဝိ/-)ကျပ်ဖြင့် အရောင်းအဝယ်ဖြစ်လျက်ရှိကြောင်း သိရှိရပါသည်။

DOCA(စစ်ကိုင်း)