ပြည်တွင်းကုန်သွယ်မှုသတင်း

             ဧရာဝတီတိုင်းဒေသကြီး၊ မအူပင်မြို့တွင် ဒေသထွက်ကုန်အနေဖြင့် ငါးချဉ်နှင့် ငါးခုံးမချဉ်လုပ်ငန်းအား တစ်နိုင်တစ်ပိုင်လုပ်ကိုင်လျက်ရှိပြီး မအူပင်မြို့အခြေပြု စီးပွားဖြစ်ထုတ်လုပ်ရောင်းချ လျက်ရှိသည်။ ငါးဖယ်ချဉ်၊ ပုစွန်ချဉ်များကို အမှတ်တံဆိပ်အသီးသီးဖြင့် ထုတ်လုပ်ရောင်းချလျက်ရှိပြီး လုပ်ငန်းပေါင်း ၁၂ခုရှိကြောင်းသိရသည်။ ငါးဖယ်ချဉ်၊ ပုစွန်ချဉ်ပြုလုပ်သလို ငါးခုံးမချဉ်ကိုလည်းပြုလုပ်ကြောင်း၊ ငါးခုံးမချဉ်ပြုလုပ်သူ ကျေးရွာများမှ ၂၀ဦးခန့်ရှိကြောင်း၊ မအူပင် ငါးခုံးမချဉ်သည် သန့်ရှင်းလပ်ဆပ်ပြီး ဈေးအတွင်း ဝယ်ယူသူများကို အချိန်ဖြင့် ရောင်းချခြင်းများသာဖြစ်ကြောင်း သိရသည်။

             ငါးခုံးမချဉ်ပြုလုပ်ရာတွင် အဓိကအသုံးပြုသည့် ငါးခုံးမအကောင်သေးအမျိုးအစားဖြစ်ပြီး မအူပင် တိုးမြစ်အတွင်းမှ ဖမ်းစီးရမိသော ငါးခုံးမငါးကလေးများကိုသာ ကုန်ကြမ်းအဖြစ်အသုံးပြူပြီး ငါးများကို မအူပင်မြို့ရှိ မြစ်ငါးသီးသန့်ရောင်းချသူများထံမှ ပိဿာလိုက်ဝယ်ယူအသုံးပြုလျက်ရှိကြောင်း၊  ငါးခုံးမချဉ်ထုပ်ပိုးရာတွင် သန့်ရှင်းသော ငှက်ပျောဖတ်ဖြင့် ထုတ်ပြီးအပေါ်မှ ဖျင်ပါးပိတ်စသန့်သန့်ဖြင့် အချဉ် ၃ရက်မှ ၅ရက်ထိ အချဉ်ခံထားသိပ်ပြီး အချိန်ဖြင့်လှီးဖြတ်ရောင်းချကြောင်း သိရသည်။

              ငါးခုံးမချဉ်ပြုလုပ်ရာတွင် ငါးခုံးမ ပိသာချိန် ၁၀ ကို ဆန် ၁ပြည်နှင့် ဆား ၁ပိသာသုံးရကြောင်း၊ ငါးခုံးမချဉ်ထုတ်လုပ်သည့် လုပ်ငန်းငယ်တစ်ခုတွင် တစ်ရက်လျှင် ငါးပိဿာချိန် ၁၀ မှ ၅၀ အထိ အသုံးပြု၍ထုတ်လုပ်သည်။ ငါးပိဿာချိန် ၁၀ လျှင် ငါးခုံးမချဉ် ၇ပိဿာ ခန့်ထွက်ရှိကြောင်း၊ ငါးပိဿာချိန် ၁၀ လျှင် ငါးခုံးမချဉ်ထုတ်လုပ်မှုကုန်ကျစရိတ် ၅၅၀၀၀ ခန့်သာ ကုန်ကျကြောင်း၊ စျေးနှုန်းအနေဖြင့် ငါးခုံးမချဉ် ၁၀ ကျပ် ငွေကျပ် ၁၅၀၀  နှုန်းဖြင့် ရောင်းချ လျက်ရှိကြောင်း၊ တစ်ရက်လျင် ငါးပိဿာချိန် ၁၀ အသုံးပြုရပြီး ငါးချဉ်ထုတ်လုပ်နိုင်ပါက ငွေကျပ် ၅၀၀၀၀ နှင့် ငါးပိဿာချိန် ၅၀ အသုံးပြုရပြီး ငါးချဉ်ထုတ်လုပ်နိုင်ပါက ငွေကျပ် ၂၅၀၀၀၀ အကျိုးအမြတ်ရရှိကြောင်း၊စျေးကွက်အနေဖြင့် ဒေသတွင်းရှိဈေးများ၊ ကျိုတ်လတ်၊ ဖျာပုံ၊ မော်ကျွန်း၊ မြောင်းမြ၊ အိမ်မဲနှင့် ရန်ကုန်မြို့မှ မှာယူပါကလည်း တစ်ပါတ်လျင် အချိန်၁၀ပါ ငါးခုံးမချဉ်  အချိန် ၃၀ တင်ပို့ပြီး တစ်လလျှင် ၁၂၀ ပိဿာ တင်ပို့ပေးရကြောင်း၊ ငါးခုံမ ပေါပေါများများထွက်ရှိချိန်တွင်  ရန်ကုန်သို့ ပိဿာ ၂၀၀ နီးပါးမှာယူ၍ တင်ပို့ရပြီး ဝယ်ယူသုံးစွဲမှု မြင့်တက် လျက်ရှိကြောင်း သိရှိရပါသည်။          

DOCA (ဧရာဝတီ)

     မကွေးတိုင်းဒေသကြီး၊ ပခုက္ကူခရိုင်၊ ပခုက္ကမြို့ မြို့မဈေးကြီးနှင့် ပန်းခြံဈေးတို့တွင် ၂၀၂၄ခုနှစ်၊ ဒီဇင်ဘာလ(ပထမပတ်) အစောပိုင်းတွင် ရာသီပေါ်ကုလားပဲရွက်များ စတင်ဝင်ရောက်ပြီး ဈေးအမြင့်ဖြင့် အရောင်းအဝယ်ဖြစ်လျက်ရှိကြောင်း သိရသည်။ ပခုက္ကူမြို့နယ်သည် သီးနှံမျိုးစုံစိုက်ပျိုးရာမှ ဆောင်းသီးနှံကုလားပဲကိုလည်း အဓိက စိုက်ပျိုးကြပါသည်။ အောက်တိုဘာလတွင် စတင်စိုက်ပျိုးခြင်းဖြစ်၍ ယခုအချိန်တွင် ကုလားပဲပင်များ အောင်မြင်ဖြစ်ထွန်းလျက်ရှိပြီး အရွက်ဝေချိန်တွင် အညွှန့်များ ခူးပေးခြင်းဖြင့် အပွင့်အသီးလိုက်၍ အသီးတင်မှုများပြီး အထွက်နှုန်းကောင်းစေရန်အတွက် စိုက်တောင်သူအများစုသည် ကုလားပဲရွက်များခူး၍ ရောင်းချခြင်းများ ပြုလုပ်ကြပါသည်။ ယခုအချိန်တွင် ကုလားပဲရွက်များ ဈေးကွက်သို့ ဝင်ရောက် အရောင်းအဝယ်ဖြစ်လျက်ရှိကြောင်း သိရသည်။

     ဈေးနှုန်းအနေဖြင့် ကုလားပဲရွက်(၁၀)ကျပ်သားလျှင် ငွေကျပ်(၁၀၀၀)၊ (၁)ပိဿာလျှင် ငွေကျပ် (၁၀၀၀၀)ဈေးဖြင့် အရောင်းအဝယ်ဖြစ်နေကြောင်း၊ ယခင်နှစ်‌ကဒေသတွင်း ကုလားပဲရွက်ပေါ်ချိန်တွင် (၁၀)ကျပ်သားလျှင် ငွေကျပ်(၈၀၀)၊ (၁)ပိဿာလျှင် ငွေကျပ်(၈၀၀၀) ဈေးဖြင့် အရောင်းအဝယ် ဖြစ်ခဲ့ ကြောင်း သိရသည်။ ကုလားပဲသီးနှံသည် စိုက်ပျိုးရာသီချိန်တွင် သီးနှံမျိုးစုံအနက်မှ ဓာတုဆေးဝါးသုံးစွဲမှု အနည်းဆုံး သီးနှံတစ်မျိုးဖြစ်၍ အပင်မှရရှိသော ကုလားပဲရွက်များကို ကြော်စားခြင်း၊ သုပ်စားခြင်း၊ ဟင်းရည်ချို ပြုလုပ်၍ စားသုံးခြင်းများ ပြုလုပ်ကြသည်။ ရာသီပေါ်ကုလားပဲရွက်သည် ကျန်းမာရေးနှင့် ညီညွတ်ပြီး အရသာမှာလည်း ဆိမ့်ပြီးလေးရာမှုရှိခြင်းကြောင့် ဈေးကောင်းသော်လည်း ဝယ်ယူစားသုံးမှု များကြောင်း သိရှိရပါသည်။

DOCA(မကွေး)

              ပြည်ခရိုင်၊ ရွှေတောင်မြို့နယ်၊ ဝါးတောအုပ်စု၊ ဖားအိုင့်ရွာရှိ တောင်သူဒေါ်နွယ်နွယ်ဝင်း၏ ပင်ဆိုင်စိုက်ခင်းသို့ (၆.၁၂.၂၀၂၄)ရက်နေ့ နံနက်(၁၀:၃၀)နာရီအချိန်တွင် သွားရောက်လေ့လာခဲ့ရာ ပင်ဆိုင်ပင်များကို သီတင်းကျွတ်လတွင်စိုက်ပျိုးပြီး တစ်လကြာလျှင် ပင်ဆိုင်ပင်များကိုနုတ်ယူရောင်းချ၍ရပါသည်။ ပင်ဆိုင်ပင်ကို တစ်ပင်နှင့် တစ်ပင် ၁ပေ အကွာတွင် စိုက်ပျိုးပြီး မြောင်း(၁၀) မြောင်းတူး၍ မြောင်း(၁၀)မြောင်းကို မျိုးစေ့ ၁ထုပ် ဖြင့်စိုက်ပျိုးရပါသည်။ ပင်ဆိုင်ပင်များသည် တစ်လလုံးအတွက် အစာကို ၂ပြည် အနည်းဆုံးကျွေးရပြီး ပင်ဆိုင်အပင်မှာ အားကောင်းလျင် အပင် ရေ(၅၀၀၀)ထွက်ရှိပါသည်။ ပင်ဆိုင်ပင်များကို နှုတ်ယူရောင်းချချိန်တွင် တစ်နေ့လျင် အပင်ရေ၁၀၀ပင်မှ အပင်ရေ ၁၅၀ အထိနုတ်လို့ရရှိကြောင်း သိရပါသည်။ ပင်ဆိုင်ပင်များကို ဒိုင်များမှ အပင်အကြီးအသေးကို တစ်ပင်လျှင် ၁၅၀ ကျပ် နှုန်းဖြင့် လာရောက်ဝယ်ယူကြောင်း သိရှိရပါသည်။ ကုန်စိမ်းဒိုင်များမှတစ်ဆင့် လက်လီပြန်လည်ရောင်းဈေးမှာ ပင်ဆိုင်တစ်ပင်ကို ၂၀၀-၃၀၀ ကျပ်ဖြင့် ရောင်းချကြပါသည်။ ပင်ဆိုင်မျိုးစေ့ တစ်ထုပ်စိုက်ပျိုးခြင်း၏ ကုန်ကျစရိတ်မှာ ၅၀၀၀၀ ကျပ်ခန့်ကုန်ကျပြီး တစ်နေ့ကို အနည်း ဆုံးအပင်ရေ (၁၀၀)ထွက်ပါက တစ်နေ့ဝင်ငွေမှာ ၂၀၀၀၀ ကျပ်ရရှိသောကြောင့် တစ်လကြာစိုက်ပျိုးရသောအပင်ဖြစ်ပြီး အကျိုးအမြတ်များများရရှိကြောင်း သိရှိရပါသည်။

DOCA(ပဲခူး)

              ပြင်သစ်ပန်း(ခ) ဆောင်တော်ကူးပန်းသည် အရောင်မှာဖြူစွတ်စွတ်အရောင်ရှိပြီး ပန်းပွင့်ချိန်တွင်  အဆုပ်လိုက်အဆုပ်လိုက်ပွင့်တက်သော နွယ်ပင်တစ်မျိုးဖြစ်ပါသည်။ ထိုပန်းသည် ဆောင်းဦးပေါက်ရာသီချိန်ဖြစ်သော နိုဝင်ဘာလနှင့် ဒီဇင်ဘာလတို့တွင် ထွက်ပေါ်လာပြီး တစ်နှစ်မှတစ်ခါသာပေါ်တက်သဖြင့် လူအများက နှစ်ခြိုက်စွာဝယ်ယူကြသော ပန်းတစ်မျိုးဖြစ်ပါသည်။ ပြင်သစ်ပန်း(ခ) ဆောင်တော်ကူးပန်းများကို ပြည်ဈေးကွက်သို့ အနီးအနားရှိ ကျေးရွာများ၊ ဧရာဝတီမြစ် အနောက်ဘက်ကမ်းရှိ ကျေးရွာများမှ လာရောက်ရောင်းချကြပါသည်။ ရောင်းချသောဈေးနှုန်းများမှာ အစည်းတစ်စည်းလျှင် ၁၂၀၀-၁၃၀၀ကျပ်ဖြင့်ရောင်းချကြောင်း သိရပါသည်။ ပန်းမှာ ဘုရားပန်းကပ်လှူရာတွင်လည်းကောင်း၊ နတ်ပန်းအိုးထိုးရာတွင်လည်းကောင်း၊ ပန်ဆင်ရာတွင်လည်းကောင်း ဝယ်ယူသုံးစွဲကြသဖြင့် ရောင်းချသူများအနေဖြင့်လည်း တစ်နှစ်တစ်ခါထွက်ပေါ်သည့်ပန်းဖြစ်၍ စရိတ်ငြိမ်းအမြတ်အစွန်းများလည်းရရှိသည့် ပန်းဖြစ်ကြောင်းသိရှိရပါသည်။

DOCA(ပဲခူး)

     တနင်္သာရီတိုင်း‌ဒေသကြီး ထားဝယ်မြို့အနီးရှိ ပတ်ဝန်းကျင်ကျေးရွာများမှ ပြည်သူများသည် မိမိတို့နေအိမ်ခြံဝင်းနှင့်လယ်ယာမြေများတွင် သီးပင်စားပင်များအပြင် မုန်လာဥပင်များ စိုက်ပျိုးထားကြပါသည်။ မုန်လာဥပင်စိုက်ပျိုးရန် အသင့်တော်ဆုံးမြေမှာ သဲနုန်းမြေဖြစ်သည်။ ဥအတွက်စိုက်ပျိုးရသော အပင်မျိုးဖြစ်သဖြင့် မြေကြီးနက်နက်အထိ မြေသားပွရန်လိုအပ်ပါသည်။ မုန်လာဥများကို စိုက်ပျိုးပြီး (၃၀) ရက်ခန့်အကြာတွင် နုတ်သိမ်းနိုင်ပါသည်။ အရွက်နှင့်အတူနုတ်သိမ်းရာ၌ ဥမကျိုးစေရန်ဂရုစိုက် ရပြီး အချိန်မီ မနုတ်သိမ်းပါက ဥကွဲခြင်း၊ အူချောင်ခြင်းများဖြစ်ပေါ်နိုင်သည်ဟု သိရှိရပါသည်။

          နုတ်သိမ်းပြီးသောမုန်လာဥများကို ဥသေး(၅)လုံးတစ်စည်းလျှင် (၂၅၀၀) ကျပ်နှင့် ဥကြီး (၅) လုံး တစ်စည်းလျှင် (၃၅၀၀) ကျပ်ဖြင့် ထားဝယ်မြို့စည်ပင်သာယာစျေးကြီးနှင့် ရပ်ကွက်စျေးများတွင် လာ ရောက်ရောင်းချကြောင်း သိရှိရပါသည်။

DOCA(တနင်္သာရီ)