ပြည်တွင်းကုန်သွယ်မှုသတင်း

         ပြည်မြို့၏ သစ်သီးဝလံရောင်းဝယ်မှုဈေးကွက်တွင် ပြောင်းဖူးဈေးကွက်သည်လည်း နေ့စဉ် အရောင်းအဝယ်ဖြစ်လျက်ရှိပါသည်။ပြောင်းဖူးစိမ်းများအား ဈေးများသို့ ပြည်အနီးအနားဒေသများဖြစ်သောဆင်မြီးဆွဲ၊ မှော်ဇာကျေးရွာများမှ ဝင်ရောက်ကြကြောင်းသိရှိရပါသည်။ ပြောင်းဖူးပြုတ်နှင့် ပြောင်းဖူးစိမ်းများအား စက်ဘီး၊ ဆိုင်ကယ်များဖြင့် ရပ်ကွက်များအတွင်း လှည့်လည်ရောင်းချသလို လမ်းဘေးတွင် ပြောင်းဖူးဖုတ်ရောင်းချသူများလည်းရှိကြပါသည်။ မိုးကုန်ရာသီကာလဖြစ်သောကြောင့် ပြောင်းဖူးများဈေးကွက်အတွင်း ပေါများထွက်ပေါ်ခြင်းမှာ ခုတ်တက်စနစ်စိုက်ပျိုးသောကြောင့် ပြောင်းဖူးများ တစ်ခင်းပြီးတစ်ခင်း ထွက်ရှိသောကြောင့် ဈေးကွက်တွင် ပြောင်းဖူးသီးနှံကို ရာသီအချိန်ကာလမရွေး စားသုံးနေကြရပါသည်။ပြောင်းဖူးဈေးကွက်အနေဖြင့် တစ်ဖူးလျှင် (၅၀၀/ ၇၀၀)ကျပ်ဖြင့် ရောင်းချပြီး အရွယ်အစားအလိုက် ဈေးကွာခြားမှုများရှိကြောင်းလည်း တွေ့ရှိရပါသည်။                                                                                               

DOCA(ပဲခူး)

         ပြည်ကြက်သွန်နီဈေးကွက်အတွင်း ၂၀၂၅ ခုနှစ်၊ အောက်တိုဘာလသည် ကထိန်ရာသီ ဖြစ်သည့်အတွက် ကြက်သွန်နီအရောင်းအဝယ်သွက်လျက်ရှိပါသည်။ပြည်ပွဲရုံများသို့ အောင်လံ မြို့နယ်၊ ဆိပ်ဖြူမြို့နယ်နှင့် ကျောက်ပန်းတောင်းမြို့နယ်ဘက်မှ ကြက်သွန်နီများ တစ်ရက်လျှင် ပိသာချိန် တစ်သောင်းခွဲခန့် အဝင်ရှိနေကြောင်းသိရပြီး အောင်လံဘက်မှ ကြက်သွန်နီမှ ဈေးချိုသဖြင့် ပိုမိုအရောင်းသွက်လျက်ရှိသည်။ ပြည်ဈေးကွက်မှ တစ်ဆင့် ပန်းတောင်းနှင့် ဥသျှစ်ပင်၊ နတ်တလင်းခရိုင်၊ သာယာဝတီခရိုင်နှင့် ပေါက်ခေါင်းနယ်ဘက်တို့မှ ဝယ်ယူမှုများရှိနေပြီး ဒေသတွင်း ပုံမှန်ဝယ်လက်များ၊ အိတ်ဆွဲဝယ်ရောင်းသမားများနှင့် အရောင်းအဝယ်ဖြစ်လျက်ရှိရာ ဝင်ရောက်မှု ၏ သုံးပုံနှစ်ပုံအရောင်းအဝယ်ဖြစ်လျက်ရှိနေသည်။ ဈေးနှုန်းမှာ အောင်လံနယ်ဘက်မှ ကြက်သွန်နီ မှာ အရည်အသွေးပိုင်း အနည်းငယ်အားနည်းသဖြင့် တစ်ပိဿာလျှင် ပွဲရုံလက်ကားဈေးမှာ ကျပ် ၁၀၀၀ - ၁၂၀၀ နှုန်းခန့်ရှိပြီး ကျန်အမျိုးအစားကြက်သွန်နီမှာ ပွဲရုံလက်ကားဈေးတစ်ပိဿာလျှင် ကြီး/ လတ်/ သေးကျပ် ၁၆၀၀/၁၅၀၀-၁၄၀၀/၁၃၀၀ နှုန်းတို့နှင့် လက်လီဈေးအသေးများတွင် ကျပ် ၂၀၀၀-၁၉၀၀-၁၈၀၀-၁၇၀၀နှုန်းတို့ဖြင့် အသီးသီးရောင်းဝယ်လျက်ရှိကြောင်း သိရပါသည်။

DOCA(ပဲခူး)

       တောင်ငူမြို့နယ်အတွင်းရှိ ညောင်ပင်လေးဈေးသို့ တောင်ပေါ်ဒေသဖြစ်သော ရှမ်းပြည်နယ် နှင့်တောင်ငူမြို့နယ်အနီးတစ်ဝိုက်မြို့များမှ ဒေသထွက်သီးနှံများ တင်ပို့ရောင်းချလျက် ရှိရာ ယခုအခါ ရှမ်းပြည်နယ်မှတင်ပို့သောဒညင်းသီးများ ဈေးကွက်အတွင်း အရောင်းအဝယ်ဖြစ်လျက်ရှိပါသည်။ ဒညင်းသီးကို ပြုတ်စားခြင်း၊ ချက်စားခြင်း၊ မီးကင်စားခြင်း၊ ဆားရည်စိမ်ခြင်း စသည်ဖြင့် နှစ်သက်ရာ စားသုံးကြပါသည်။

            ဒညင်းသီးကို အဆိပ်သီးဟုခေါ်ဆိုသော်လည်း စားသုံးမှုများသောကြောင့် အရောင်းအဝယ် သွက်လျက်ရှိကြောင်း ရောင်းချသည့်ဈေးသည်များထံမှ သိရှိရပြီး ဒညင်းသီးကို အလုံးအရွယ် အစားပေါ်မူတည်၍ အသေး ၊ အလတ်၊ အကြီးဟူ၍ သုံးမျိုးခွဲထားပြီး ဈေးနှုန်းမှာ အနည်းငယ် ကွာခြားလျက် ရှိပါသည်။ အသေး (၁၀) လုံးလျှင် ၁၀၀၀ ကျပ်၊ အလတ် (၁၀) လုံးလျှင် ၁၂၀၀ ကျပ်၊ အကြီး (၁၀) လုံးလျှင် ၁၅၀၀ ကျပ်ရှိပြီး အလုံး (၁၀၀) နှင့်အထက်ဝယ်ယူပါက ဈေးနှုန်းအပြောင်း အလဲရှိပြီး ရှမ်းပြည်ဒေသထွက်ဒညင်းသီးမှာ သံတောင်ဒညင်းသီးထက် ပိုစည်းပြီးပြုတ်၍ ချက်စားရာ တွင်ပိုမိုကောင်းမွန်ပြီး ဆားရည်စိမ်ရာတွင်လည်း အသီးမှာ ပိုမာပြီးကျွတ်သဖြင့် ထမင်းဆိုင်များမှ အများဆုံး ဝယ်ယူပြီး ဆားရည်စိမ်ခြင်းအတွက် အသုံးပြုကြောင်းသိရှိရပါသည်။

DOCA(ပဲခူး)

      တနင်္သာရီတိုင်းဒေသကြီး၊ မြိတ်ခရိုင်၊ မြိတ်မြို့တွင် သစ်သီးမျိုးစုံဖြစ်သည့် ပန်းသီး၊ ဇီးသီး၊ နဂါးမောက်သီး၊ မာလကာသီး၊သရက်သီး၊ ဌက်ပျောသီး၊ နာနတ်သီး၊ လိမ္မော်သီး၊ စပျစ်သီး၊ သခွားမွေးသီး၊ ပန်းသစ်တော်၊ လိုင်ချီးသီး၊ စိမ်းစားဥနှင့် အစရှိသည့်သီးနှံများကို မြိတ်မြို့ဈေးကြီးများနှင့် လမ်းဘေးသစ်သီးဆိုင်များတွင် ရောင်းချနေကြောင်း သိရှိရပါသည်။

      ၂၀၂၅ခုနှစ် နိုဝင်ဘာလဒုတိယပတ်တွင် မြိတ်မြို့ပေါ်ရှိ ဈေးနှုန်းမှာ ထောပတ်သီးဈေးနှုန်း တစ်လုံးလျှင် (၁၅၀၀)ကျပ်နှင့် မာလကာသီးတစ်လုံးလျှင် (၁၅၀၀)ကျပ်မှ (၂၀၀၀)ကျပ်ရှိကြောင်း သိရှိရပါသည်။

DOCA(တနင်္သာရီ)

     တနင်္သာရီတိုင်းဒေသကြီး၊ မြိတ်မြို့နယ်အတွင်းရှိ ကျေးရွာများနှင့် မြို့ပေါ်ရပ်ကွက်များ တွင် ဟင်းသီးဟင်းရွက်စိုက်ပျိုးရေးလုပ်ငန်းများကို အများအပြားလုပ်ကိုင်လျက်ရှိကြောင်း သိရှိရ သည်။ ဒေသခံများသည် သခွားသီး၊ ခရမ်းသီး၊ ကန်စွန်းရွက်၊ ချဉ်ပေါင်ရွက်၊ ရုံးပတီသီး၊ ဘူးသီး၊ ငရုတ်သီး စသည့် သီးနှံများကို စိုက်ပျိုးကြသည့်အပြင် ဘူးသီးများကိုလည်း တစ်နိုင်တစ်ပိုင် စိုက်ပျိုးကြပြီး မြိတ်မြို့ဈေးကြီးနှင့် ကျေးရွာဈေးများသို့ လာရောက်ရောင်းချကြကြောင်း သိရှိရသည်။ ဘူးသီးသည် အာဟာရဓာတ်များစွာပါဝင်ပြီး ကျန်းမာရေးအတွက် အထူးကောင်းမွန်သည့် ဟင်းသီးဟင်းရွက် တစ်မျိုးဖြစ်ကာ ဒေသခံများအနေဖြင့် ဟင်းချိုချက်သောက်ခြင်း၊ ကြော်စား ခြင်းများ  ပြုလုပ်လေ့ရှိ ကြောင်း သိရှိရသည်။

      ၂၀၂၅ခုနှစ်၊ နိုဝင်ဘာလဒုတိယပတ်အတွင်း မြိတ်မြို့ပေါ်ရှိဈေးများ၌ ရောင်းချလျက် ရှိသော ဘူးသီးဈေးနှုန်းမှာ(၄၀၀၀)ကျပ်ဖြင့် အရောင်းအဝယ်ဖြစ်ပွားလျက်ရှိကြောင်း ဒေသခံကုန်စိမ်း ရောင်း ချသူများထံမှ သိရှိရသည်။

DOCA(တနင်္သာရီ)