ပြည်တွင်းကုန်သွယ်မှုသတင်း

      မကွေးတိုင်းဒေသကြီး၊ သရက်ခရိုင်၊ အထက်မင်းလှမြို့နယ်၊ ဘွဲ့ကျေးရွာအုပ်စုရှိ ညှင်းသွန်း၊ ကွန်းသွန်း၊ ဘွဲ့၊ ဇီးတော၊ မင်းဂံ စသည့်ကျေးရွာများ၌ စပါး၊ ကြက်သွန်နီ၊ ကုလားပဲ၊ ဝါ၊ နှမ်း၊ ပဲကြီး၊ မြေပဲနှင့် စားဖိုဆောင်သုံးသီးနှံများကို ရာသီအလိုက်စိုက်ပျိုးကြပြီး ဇီးတောကျေးရွာတွင် ပဲနက်စေ့ (ခေါ်) မောင်မခေါ်ပဲစိုက်တောင်သူများဈေးကောင်းရရှိပြီး အဆင်ပြေလျက်ရှိကြောင်းသိရှိရပါသည်။

      ဇီးတောကျေးရွာ၌ ပဲနက်စိုက်တောင်သူ(၁၅)ဦးခန့်ရှိပြီး စိုက်ဧကမှာ (၂၅)ဧကခန့်ရှိကြောင်းသိရှိရပါသည်။ စိုက်ပျိုးရာတွင် (၁)ဧကလျှင် မျိုး(၈)ပြည်ခန့်ကုန်ကျကြောင်း၊ ယခင်နှစ်တွင် ပဲနက်စိုက်ခင်းမှထွက်ရှိသည့် ပဲနက်စေ့များကို မျိုးအဖြစ်ဖယ်ချန်၍ စိုက်ပျိုးခြင်းဖြစ်ကြောင်း၊ လယ်မြေတွင် ကြဲပက်စနစ်ဖြင့်စိုက်ပျိုးပြီး ကိုင်းမြေတွင် ထွန်တုံးဖြင့်ကြောင်းဆွဲကာ အစေ့ချစနစ်ဖြင့်စိုက်ပျိုးကြောင်း၊ လယ်မြေများ၌ ၂၀၂၃ခုနှစ်၊ အောက်တိုဘာလတွင်စိုက်ပျိုးပြီး ကိုင်းမြေများတွင်မူ နိုဝင်ဘာလ၌ စိုက်ပျိုးကြောင်း၊ စိုက်ပျိုးပြီး (၅)လအကြာတွင် ခူးဆွတ်ရကြောင်း၊ အထွက်နှုန်းအနေဖြင့် ယခင်နှစ်တွင် (၁)ဧကလျှင် (၁၀)တင်းသာထွက်ရှိပြီး ယခုနှစ်တွင် ရာသီဥတုကောင်းမွန်၍ (၁၅)တင်းအထိထွက်ရှိကြောင်း၊ ကုန်ကျစရိတ်အနေဖြင့် ယခင်နှစ်တွင် (၁)ဧကလျှင် ကျပ်(၂၀၀၀၀၀) သာကုန်ကျပြီး ယခုနှစ်တွင်မူ သွင်းအားစုစရိတ်မြင့်တက်လာ၍ လုပ်အားခ၊ မြေပြုပြင်ခနှင့် အသီးအပွင့်အားဆေးအပါအဝင် စုစုပေါင်းကုန်ကျစရိတ်မှာ ကျပ်(၃၀၀၀၀၀)ခန့်ကုန်ကျကြောင်း၊ ဈေးနှုန်းအနေဖြင့် ယခင်နှစ်တွင် ပဲနက်(၁)တင်းလျှင် အမြင့်ဆုံးဈေးအနေဖြင့် ကျပ်(၆၀၀၀၀)ရရှိခဲ့ပြီး ယခုနှစ်တွင် ပဲနက်ပေါ်ခါစအချိန် ၂၀၂၄ခုနှစ်၊ မတ်လ(ဒုတိယပတ်)တွင် (၁)တင်းလျှင် ကျပ်(၉၅၀၀၀) အထိဈေးရရှိကြောင်း၊ ယခုဧပြီလ(ပထမပတ်)တွင် ဈေးနှုန်းအနည်းငယ်ကျဆင်းကာ (၁)တင်းလျှင် ကျပ်(၈၀၀၀၀) ဈေးရရှိကြောင်း၊ ယခုနှစ်တွင် ပဲနက်စေ့ (ခေါ်) မောင်မခေါ်ပဲမှာ ယခင်နှစ်ထက် အထွက်နှုန်းနှင့် ဈေးနှုန်းမှာကောင်းလျက်ရှိသည့်အတွက် တောင်သူများအနေဖြင့် အကျိုးအမြတ်များစွာရရှိကာ အဆင်ပြေလျက်ရှိကြောင်း  ဇီးတောကျေးရွာနေ ပဲနက်စေ့စိုက်တောင်သူတစ်ဦးထံမှသိရှိရပါသည်။

DOCA(မကွေး)

      မွန်ပြည်နယ်တွင် မတ်လမှစ၍ ပိန္နဲသီးများစတင်ထွက်ပေါ်နေပြီး အဝယ်လိုက်ကာ အရောင်းအဝယ်ကောင်း၍ ယခင်နှစ်ထက် ဈေးကောင်းရရှိနေကြောင်းသိရသည်။  ရာသီပေါ်ပိန္နဲသီးများကို အလုံးလိုက်ဈေးဖြင့်ရောင်းချနေသည့်အပြင် ကီလိုဖြင့်လည်းရောင်းချလျက်ရှိသည်။ အရွယ်အစားပေါ်မူတည်ပြီး တစ်လုံးလျှင် အနည်းဆုံး ကျပ်၂၅၀၀မှ အများဆုံး ကျပ်၁၂၀၀၀ထိ ဈေးနှုန်းအသီးသီးရရှိနေပြီး ယခင်နှစ်ထက် တစ်လုံးလျှင်  အနည်းဆုံး ကျပ်၁၀၀၀မှ အများဆုံး ကျပ်၅၀၀၀ထိဈေးပိုမိုရရှိကြောင်း၊ ဝယ်ယူမှုအနေဖြင့် ပြည်နယ်တွင်းဝယ်ယူမှုသာမက အခြားတိုင်းနှင့် ပြည်နယ်များမှလည်း မှာယူမှုများနေကြောင်း ပိန္နဲစိုက်ပျိုးရောင်းချသူထံမှသိရှိရပါသည်။

DOCA(မွန်)

၇.၄.၂၀၂၄ ရက်နေ့တွင် တိုင်းဒေသကြီးနှင့်ပြည်နယ် မြို့နယ်အလိုက် ဆန်၊ ဆီ၊ မီးဖိုချောင်သုံးပစ္စည်းများ၊ သားငါး၊ စက်သုံးဆီ၊ ရွှေ၊ ဒေါ်လာ ဈေးနှုန်းများအား အောက်ပါ .pdf တွင် ဝင်ရောက်ကြည့်ရှုနိုင်ပါသည်-

နေပြည်တော်၊ ရန်ကုန်၊ မန္တလေး နှင့် ပုသိမ်မြို့ကြီးများ၏ အခြေခံစားကုန်(လက်လီ)၊ ပြည်ပပို့ကုန်၊ စက်သုံးဆီ နှင့် ရွှေဈေးနှုန်းများအား ယခင်နှစ်၊ ယခင်လ၊ ယခင်အပတ်၊ ယနေ့ ကာလတူ နှိုင်းယှဉ်၍ ပြုစုတင်ပြအပ်ပါသည်။

    စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီး၊ ကန့်ဘလူခရိုင်ဦးစီးမှူးရုံးသည် စားသုံးသူကာကွယ်ရေးလုပ်ငန်းများအပြင် ပြည်တွင်းကုန်သွယ်ရေးလုပ်ငန်းများဖွံ့ဖြိုးတိုးတက်စေရေးအတွက် အားပေးမြှင့်တင်ဆောင်ရွက်လျက်ရှိသည့်အပြင် ပြည်သူများအလွယ်တကူဝယ်ယူသုံးစွဲနိုင်စေရန်နှင့် ဈေးနှုန်း၊ ဈေးကွက်တည်ငြိမ်မှန်ကန်စေရန်ရည်ရွယ်၍ (၁-၄-၂၀၂၄)ရက်နေ့တွင် ကန့်ဘလူ မြို့နယ်တာဝန်ခံ ဦးမျိုးဝင်းသန်းနှင့် ဝန်ထမ်း(၁)ဦးတို့သည် ကန့်ဘလူမြို့ပေါ်ရှိ ဆောက်လုပ်ရေးလုပ်ငန်းသုံးပစ္စည်းရောင်းချသည့်ဆိုင်များအား ကွင်းဆင်းစစ်ဆေးခဲ့ကြသည်။

    ထိုသို့ကွင်းဆင်းစစ်ဆေးခဲ့ရာ ကန့်ဘလူခရိုင်၊ ကန့်ဘလူမြို့နယ်နှင့် ကျွန်းလှမြို့နယ်ရှိ လုပ်ငန်းရှင်များအနေဖြင့် ဘိလပ်မြေများကို မန္တလေးမြို့မှတစ်ဆင့်ဝယ်ယူ၍ ဖြန့်ဖြူးရောင်းချပေးလျက်ရှိကြောင်း၊ ဈေးနှုန်းအနေဖြင့် “CROWN” အမှတ်တံဆိပ် ဘိလပ်မြေ‌ဈေးနှုန်းမှာ တစ်အိတ်လျှင် ၁၆၅၀၀ကျပ်နှင့် “ကြံ့နှစ်ကောင်”အမှတ်တံဆိပ် ဘိလပ်မြေဈေးနှုန်းမှာ တစ်အိတ်လျှင် ၁၆၀၀၀ကျပ်၊ မြန်မာထုတ် ဆောက်လုပ်ရေးလုပ်ငန်းသုံး ငါးမူးသံချောင်းလုံး (၁)ချောင်းလျှင် ၁၆၀၀၀ကျပ်နှင့် သုံးမူးသံချောင်းလုံး (၁)ချောင်းလျှင် ၁၁၀၀၀ကျပ်ဖြင့်ရောင်းချလျက်ရှိကြောင်း လုပ်ငန်းရှင်ထံမှသိရှိရပါသည်။

DOCA(စစ်ကိုင်း)