ပြည်တွင်းကုန်သွယ်မှုသတင်း

            မြန်မာနိုင်ငံသည် လယ်ယာစိုက်ပျိုးရေးလုပ်ငန်းကို အဓိကလုပ်ကိုင်ကြသည့် နိုင်ငံဖြစ်သည်နှင့်အညီ စစ်ကိုင်းတိုင်းဒေသကြီး၊ ကန့်ဘလူခရိုင်သည်လည်း လယ်ယာစိုက်ပျိုးရေးလုပ်ငန်းများကို အဓိကထားလုပ်ကိုင်သော ဒေသတစ်ခုဖြစ်သည်။ ကန့်ဘလူခရိုင်၏ အဓိကစိုက်ပျိုးသီးနှံတစ်ခုဖြစ် သည့် အစေ့ထုတ်ပြောင်းများလည်း စိုက်ပျိုးကြကြောင်းသိရသည်။

         ကန့်ဘလူမြို့နယ်၌ အစေ့ထုတ်ပြောင်းစိုက်ပျိုးရာတွင် မျိုးအနေဖြင့် C.P.808 နှင့် C.P.888 မျိုးတို့ကို အများဆုံးစိုက်ပျိုးကြကြောင်း၊ ၂၀၂၅ခုနှစ်၊ မတ်လတတိယပတ်အတွင်း အစေ့ထုတ်ပြောင်း (၁)တင်းလျှင် (၂၃၇၀၀)ကျပ်၊ ပြောင်းအရည်အသွေးညံ့လျှင် (၂၃၂၀၀)ကျပ်ဖြင့် အရောင်းအဝယ်ဖြစ်လျက်ရှိကြောင်း၊  ယခုအခါ အစေ့ထုတ်ပြောင်းများ ဈေးကွက်အတွင်း ဝင်ရောက်မှုနည်းသော်လည်း ပုံမှန်အရောင်းအဝယ်ဖြစ်လျက်ရှိကြောင်း ဒေသတွင်းပွဲရုံလုပ်ငန်းရှင်များထံမှ သိရှိရပါသည်။

DOCA(စစ်ကိုင်း)

တနင်္သာရီတိုင်းဒေသကြီး၊ ထားဝယ်မြို့အတွင်းရှိ မြို့နယ်များတွင် ခရမ်းဖြူသီး များကို စီးပွားဖြစ် စိုက်ပျိုး သောကြောင့် အများအပြားထွက်ရှိသော ဒေသများဖြစ်ပါသည်။ ထွက်ရှိ လာသော ခရမ်းဖြူသီးများကို ဒေသတွင်း ရောင်း ချကြောင်း သိရပါသည်။ ယခုအချိန်သည် ရာသီစာသီးနှံ တစ်မျိုး ဖြစ်သည့် ခရမ်းဖြူသီးကို ချက်၍ စားသည့် အပြင် နှပ်စား၊ မီးဖုတ်ပြီး သုတ်စားလို့လည်းရပါသည်။ ရာသီစာဖြစ်သောကြောင့် အရောင်းအဝယ်သွက်လျက် ရှိပါသည်။ ခရမ်းဖြူသီး အကြီး တစ်လုံးလျှင် (၅၀၀-၇၀၀)ကျပ်၊ အလတ်တစ်လုံးလျှင် (၃၀၀)ကျပ်ဖြင့် ရောင်းချ ကြောင်း သိရပါသည်။

DOCA(တနင်္သာရီ)

          စားဖိုဆောင်သီးနှံတစ်မျိုးဖြစ်သည့် ကြက်သွန်ဖြူကို ဟင်းလျာများတွင် အသုံးပြုပြီး ပြည်နယ် အတွင်းတွင် တစ်နိုင်တစ်ပိုင်စိုက်ပျိုးလျက်ရှိကြပြီး အောင်ပန်း၊ ကလောတို့မှ သယ်ယူရောင်းချလျက် ရှိပါသည်။ လက်ရှိစျေးကွက်အတွင်းဖြစ်ပေါ်နေသော ကြက်သွန်ဖြူစျေးနှုန်းမှာ ယခုမတ်လအတွင်း ကြက်သွန်ဖြူ(ရှမ်းစ)တစ်ပိဿာလျှင် ယခင်ပတ်(၁၅၀၀၀/-)ကျပ်မှ ယခုပတ်(၁၃၀၀၀/-)ကျပ်သို့ လည်းကောင်း၊ ကြက်သွန်ဖြူ(ကြူကုတ်) တစ်ပိဿာလျှင် ယခင်ပတ်(၁၇၀၀၀/-)ကျပ်မှ ယခုပတ် (၁၅၀၀၀/-)ကျပ်သို့လည်းကောင်း ကျဆင်းသွားကြောင်းသိရှိရပါသည်။

          ယခုမတ်လအတွင်း ယခင်ပတ်နှင့်နှိုင်းယှဥ်ကြည့်လျှင် ကြက်သွန်ဖြူ တစ်ပိဿာလျှင် (၂၀၀၀ /-) ကျပ်မျှ အနည်းငယ် ကျဆင်းလာကြောင်း ထားဝယ်မြို့ စည်ပင်သာယာစျေးအတွင်းရှိ စားဖိုဆောင် သုံးပစ္စည်းများ ရောင်းချနေသူတစ်ဦးထံမှသိရှိရပါသည်။

DOCA(တနင်္သာရီ)

   ကမ္ဘာပေါ်တွင် ပန်းသီးအမျိုးအစားများစွာရှိသည့်အနက် လူကြိုက်အများဆုံးပန်းသီးမှာ အနီ ရောင် အသီးဖြစ်သည်။ အစိမ်း‌ရောင်ပန်းသီးသည်လည်း လူကြိုက်နှစ်သက်မှုအတော်အသင့်ရှိသည်။ အစိမ်းရောင်ပန်းသီးသည် အနီရောင်ပန်းသီးထက် အနည်းငယ်အချိုပေါ့သဖြင့် လူကြီးသူမများ၊ ဆီးချို/ သွေးချိုရောဂါရှိသူများနှင့် ကလေးသူငယ်များလည်း စားသုံးရန်သင့်တော်သော သီးနှံတစ်မျိုးဖြစ်ပါ သည်။

          လက်ရှိ ထားဝယ်မြို့ စည်ပင်သာယာစျေးကြီးများနှင့် ကမ်းနားစျေးရှိ အသီးအနှံအရောင်းဆိုင် များတွင် ပန်းသီးအစိမ်းတစ်လုံးလျှင် (၂၅၀၀) ကျပ်ခန့် စျေးရရှိနေကြောင်း သိရှိရပါသည်။

DOCA(တနင်္သာရီ)

          တနင်္သာရီတိုင်းဒေသကြီး၊ ထားဝယ်မြို့ပေါ်ရှိ အိမ်ဆောက်ပစ္စည်းအ‌ရောင်းဆိုင်ကြီးများတွင် ရောင်းချလျက်ရှိသော ဘိလပ်မြေစျေးနှုန်းများမှာ ကြံ့နှစ်ကောင်အမှတ်တံဆိပ် ဘိလပ်မြေတစ်အိတ် လျှင် (၂၄၅၀၀)ကျပ်ရှိပြီး စိုက်ပျိုးရေးသုံးပစ္စည်း အရောင်းဆိုင်ကြီးများမှရောင်းချလျက်ရှိသော ဓါတ်မြေ သြဇာစျေးနှုန်းများမှာ မြင်းပျံ၊ အာမို၊ သြဘာ အမှတ်တံဆိပ် ယူရီးယား ၅၀ ကီလိုဂရမ် တစ်အိတ်လျှင် (၁၀၉၆၀၀) ကျပ်၊ သံကွင်း အမှတ်တံဆိပ် တီစူပါ ၅၀ ကီလိုဂရမ် တစ်အိတ်လျှင် (၁၅၂၅၀၀)ကျပ်၊ တိုတာ၊ ဂျာမနီ အမှတ်တံဆိပ် ပိုတက်ရှ်  ၅၀ ကီလိုဂရမ် တစ်အိတ်လျှင် (၁၄၄၉၀၀)ကျပ်၊ အာမို အမှတ်တံဆိပ် ၁၅ ပတ်လည် ၅၀ ကီလိုဂရမ် တစ်အိတ်လျှင်(၁၆၃၀၀၀)ကျပ် ခန့်အသီးသီးရှိပြီး စျေးနှုန်းများတည်ငြိမ် လျက်ရှိကြောင်း သိရှိရပါသည်။

DOCA(တနင်္သာရီ)