ပြည်တွင်းကုန်သွယ်မှုသတင်း

             စစ်ကိုင်းတိုင်းဒေသကြီး၊ မုံရွာမြို့နယ်အတွင်းရှိ ကျေးရွာများနှင့် မြို့ပေါ်ရပ်ကွက်များတွင် ရာသီပေါ်သီးနှံများဖြစ်သည့် ခရမ်းသီး၊ ဘူးသီး၊ ကျောက်ဖရုံသီး၊ ငရုတ်သီး၊ ပဲသီး၊ ရုံးပတီသီး၊ သခွားသီးများကို တစ်နိုင်တစ်ပိုင် စိုက်ပျိုးလုပ်ကိုင်လျက်ရှိကြပါသည်။ စိုက်ပျိုးထွက်ရှိသော ရာသီပေါ်သီးနှံဖြစ်သည့် ခရမ်းသီး၊ ဘူးသီးနှင့် ကျောက်ဖရုံသီးများကို သာစည်ဈေးနှင့် ရပ်ကွက်ဈေးငယ်များတွင် ရောင်းချလျက်ရှိကြောင်း သိရပါသည်။

          ၂၀၂၆ ခုနှစ်၊ ဇန်နဝါရီလ ဒုတိယပတ်တွင်  သာစည်ဈေးတွင် ရောင်းချနေသော ခရမ်းသီးဈေးနှုန်းများမှာ ခရမ်းသီးလက္ကား တစ်ပိဿာလျှင်(၂၈၀၀)ကျပ်၊ လက်လီတစ်ပိဿာ လျှင် (၃၃၀၀) ကျပ်၊ ဘူးသီးဈေးနှုန်းမှာ ဘူးသီးအသေး(၁)လုံးလျှင် (၇၀၀)ကျပ်၊ အလတ် (၁)လုံးလျှင်(၁၆၀၀)ကျပ်နှင့် အကြီး(၁)လုံးလျှင် (၂၇၀၀)ကျပ်ဖြင့်လည်းကောင်း၊ ကျောက်ဖရုံသီးဈေးနှုန်းမှာ အကြီးတစ်လုံးလျှင် (၄၅၀၀)ကျပ်၊ အလတ်တစ်လုံးလျှင် (၃၂၀၀) ကျပ်၊ အသေးတစ်လုံးလျှင် (၂၂၀၀)ကျပ်ဖြင့် ရောင်းချလျက်ရှိကြောင်း ကုန်စိမ်းရောင်းချသူများထံမှ  သိရှိရပါသည်။

DOCA(စစ်ကိုင်း)

   တောင်သာမြို့နယ်အတွင်းရှိ ကျောက်ဖူးကျေးရွာ၊ ဝဲလောင်ရွာ၊ ဆည်ကုန်းကျေးရွာ၊ ဇဂျမ်း ကျေးရွာ၊ ရသစ်ကျေးရွာနှင့် မင်းစုကျေးရွာများ၌ ကုန်စိမ်းသီးနှံဖြစ်‌သော ခရမ်းကြွပ်သီးနှံကိုလည်း စီးပွားဖြစ် စိုက်ပျိုးလျက်ရှိကြောင်း၊ ခရမ်းကြွပ်သီးအပင်ကို ရာသီမရွေးစိုက်ပျိုးနိုင်ကြောင်း၊ ခရမ်းကြွပ်သီးစိုက်ပျိုး မည်ဆိုပါက မျိုးစေ့ကို ပျိုးထောင်ခြင်းနှင့် တိုက်ရိုက်အစေ့ချစိုက်ပျိုး နည်းဟူ၍ (၂)မျိုးစိုက်ပျိုးကြောင်း၊ ခရမ်းကြွပ်သီးကို ပျိုးထောင်ပြီး စိုက်ပျိုးမည်ဆိုပါက ပျိုးသက် တစ်လခွဲသား အရွယ်တွင် စတင်စိုက်ပျိုးရကြောင်း၊ စိုက်ပျိုးပြီး (၂)လ အကျော်တွင် အသီးများစတင် ခူးဆွတ်နိုင်ပြီး တစ်ပတ်ခြားတစ်ကြိမ် ခူးဆွတ်ရကြောင်း၊ စတင်ခူးဆွတ်ပြီးမှ တစ်ပတ်နှင့် တစ်ပတ် အထွက် နှုန်း  ပိုမိုလာကြောင်း၊ သက်တမ်းအနေဖြင့် (၂)လခန့်အထိ ခူးဆွတ်နိုင်ကြောင်း၊ တစ်ဧကကုန်ကျစရိတ် အနေ ဖြင့် လုပ်သားခ၊ မျိုး၊ သွင်းအားစုအပါအဝင် စုစုပေါင်းကုန်ကျစရိတ် အနေဖြင့် (၈၇၀၀၀၀)ကျပ်ခန့် ကုန်ကျကြောင်း၊ ခရမ်းကြွပ်သီး လက်ကားဈေးအနေဖြင့် တစ်ပိဿာလျှင် (၂၀၀၀) ကျပ်၊  လက်လီဈေး အနေဖြင့် တစ်ပိဿာလျှင် (၂၅၀၀)ကျပ်ဖြင့် အရောင်းအဝယ် ဖြစ်နေကြောင်း၊ ခရမ်းကြွပ်သီးကို ကုန်သည်များမှ စိုက်ခင်းအထိလာရောက်ဝယ်ယူပြီး တောင်သာ မြို့ရှိဘုရားကြီးဈေး၊ မြို့မဈေးနှင့် မင်္ဂလာရွှေတောင်ကြီးဈေးသစ်များသို့ တောင်သူများ ကိုယ်တိုင် ရောင်းချကြသလို၊ ဈေးကွက်အနေဖြင့် မြင်းခြံမြို့နှင့် မိတ္ထီလာမြို့များသို့လည်းတင်ပို့ ရောင်းချကြောင်း၊ အချိန်တိုအတွင်း စီးပွားဖြစ်ဝင် ငွေရရှိကြောင်း ခရမ်းစိုက်တောင်သူတစ်ဦး၏ ပြောပြချက် အရသိရှိရသည်။

DOCA(မန္တလေး)

        နွားထိုးကြီးမြို့နယ်၌ ပြည်တွင်းစားသုံးဆီဖူလုံစေရေးနှင့် ပိုလျှံရေးအတွက် အရေးကြီးသီးနှံ တစ်မျိုးဖြစ်သည့် ဆီနေကြာ(မိုး)သီးနှံစိုက်ပျိုးထားရှိကြောင်း သိရှိရသည်။ ရွာကြီးကျေးရွာ၊ ကြာပင် အိုင်ရွာ၊ ကနားရွာ၊ ဝက်လူးရွာ၊ ပြင်စည်ရွာ၊ လုံးတောရွာနှင့် လက်ပံကျေးရွာများ၌ ဆီနေကြာများကို တောင်သူများအနေဖြင့် စီးပွားဖြစ်စိုက်ပျိုးထားကြောင်း၊ ဆီနေကြာသီးနှံကို မေလ၊ ဇွန်လနှင့် ဩဂုတ်လတို့တွင် စတင်စိုက်ပျိုးပြီး စက်တင်ဘာ၊ အောက်တိုဘာလ၊ နိုဝင်ဘာလနှင့် ဒီဇင်ဘာလတို့တွင် ရိတ်သိမ်းထွက်ပေါ်ကြောင်း၊ စိုက်ပျိုးချိန်မှ ရိတ်သိမ်းချိန်အထိ (၄)လခန့်ကြာ မြင့်ကြောင်းသိရှိရသည်။  ၂၀၂၅-၂၀၂၆ခုနှစ်၊ မိုးနေကြာကို တစ်မြို့နယ်လုံးအနေဖြင့် စိုက်ပျိုးထားရှိမှု ဧက (၂၉၇၀) ဧက စိုက်ပျိုးထားရှိမှုတွင် ရိတ်သိမ်း (၅၇၀)ဧကရိတ်သိမ်းထားရှိပြီး၊ တစ်ဧက အထွက်နှုန်းအနေဖြင့် (၁၉-၂၀)တင်းခန့်ထွက်ရှိကြောင်း၊ ကျန်ဧကများ ဆက်လက်ရိတ်သိမ်းလျက်ရှိ ကြောင်း မြို့နယ်ကြေးတိုင်နှင့် မြေစာရင်းဦးစီးဌာန၏စာရင်းများအရသိရှိရသည်။ ဆီနေကြာသီးနှံကို ကြဲပတ်စနစ်ဖြင့် စိုက်ပျိုး ကြောင်း၊ တစ်ဧကကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် (၆၅၀,၀၀၀) ကျပ်ခန့်ကုန်ကျကြောင်း၊ ယခုနှစ်တွင် နေကြာတစ်တင်း လျှင်(၆၀,၀၀၀)ကျပ်ခန့် အရောင်းအဝယ် ဖြစ်နေကြောင်း၊ တစ်ဧကအကျိုး အမြတ်အနေဖြင့် (၅၅၀,၀၀၀)ကျပ်ခန့် ရရှိကြောင်း၊  တောင်သူများ အနေဖြင့် နေကြာသီးနှံကို စိုက်ပျိုးမှုထားရှိမှုမှာ ဆင်းရွှေကြာ-၂ ၊ ရေဆင်းစပ်မျိုး-၁ နေကြာမျိုးကို အဓိကစိုက်ပျိုးကြကြောင်း၊ နွားထိုးကြီးမြို့နယ်၌ ဆီနေကြာကို စီးပွားဖြစ်ကြိတ်ခွဲထုတ်လုပ်ခြင်း မရှိကြောင်း၊ ကျေးရွာများမှ စားသုံးရန်အတွက် သာကြိတ်ခွဲကြောင်း၊ ဆီကြိတ်ခွဲပါက နေကြာ တစ်တင်းလျှင် ဆီ(၃-၄)ပိဿာ ခန့်ထွက်ရှိကြောင်း ၊ ဒေသတွင်းနေကြာဆီပေါက်ဈေးမှာ တစ်ပိဿာလျှင် (၁၅၅၀၀)ကျပ်၊ နေကြာဖတ်တစ်ပိဿာလျှင် (၃၅၀၀)ကျပ်ခန့်  ပေါက်ဈေးများ ရှိကြောင်း၊ ‌နွားထိုးကြီးမြို့နယ် များမှထွက်ရှိသော ဆီနေကြာသီးနှံများကို မြင်းခြံမြို့ရှိပွဲရုံများ၊ မန္တလေးမြို့နှင့် ရန်ကုန်မြို့များသို့ တင်ပို့ရောင်းချကြောင်း၊ အကျိုးအမြတ်များလည်းရရှိကြောင်း ရွာကြီးကျေးရွာရှိ မိုးနေကြာစိုက် တောင်သူတစ်ဦး၏ ပြောပြချက်အရ သိရှိရသည်။

DOCA(မန္တလေး)

    မအူပင်ခရိုင်၊ ညောင်တုန်းမြို့နယ်သည် လယ်ယာမြေစိုက်ပျိုးခြင်း၊ မွေးမြူရေးလုပ်ငန်းပြုလုပ်ခြင်း လုပ်ငန်းတို့ဖြင့် ဖွံ့ဖြိုးတိုးတက်သော မြို့နယ်တစ်ခုဖြစ်သည်။ ညောင်တုန်းမြို့နယ် ကုမ္ပဏီများမှ ၂၀၂၆ခုနှစ် ဇန်နဝါရီ ၃ရက်နေ့တွင် မြို့နယ်တွင်းနှင့် တိုင်းဒေသကြီးအတွင်း အခြားမြို့နယ်များမှ စပါးများကို ဝယ်ယူလျက်ရှိကြောင်း သိရသည်။

     စပါးများကို ဝယ်ယူသော ကုမ္ပဏီများမှ ရွှေဝါနဒီကုမ္ပဏီမှ ဆင်းသုခ (၂၃၀၇) တင်း၊ (၅၀)ပေါင် စပါးတင်း ၁၀၀နှုန်း ၁၄၅၀၀၀၀/-ကျပ် ဖြင့်၊ ၎င်းစပါးများကို မအူပင်မြို့နယ် ရွှေတောင်မှော်ဘက်မှ ဝယ်ယူခြင်းဖြစ်ကြောင်း၊ ကရင်မ စပါးကို (၅၀)ပေါင် (၁၃၀၂) တင်း တင်း(၁၀၀)နှုန်းဈေး ၁၄၇၀၀၀၀/-ကျပ်ဖြင့် မအူပင်မြို့နယ် ရွှေတောင်မှော်ကျေးရွာ ဘက်မှ ဝယ်ယူခဲ့ကြောင်း သိရသည်။

    ၄-၁-၂၀၂၆ ရက်နေ့က ရွှေဝါနဒီ ကုမ္ပဏီမှ အသွယ်စပါးကို (၅၀)ပေါင် (၁၄၅၉) တင်း တင်း(၁၀၀) ဈေးနှုန်း ၁၄၆၀၀၀၀/-ကျပ်ဖြင့် ထန်းတပင်ဘက်မှ ဝယ်ယူကြောင်း၊ ဆင်းသုခ စပါး (၉၀၇) တင်းကို (၅၀)ပေါင် တင်း(၁၀၀)ဈေး ၁၄၂၅၀၀၀/- ကျပ်ဖြင့်လည်းကောင်း၊ ကရင်မ စပါး (၅၀)ပေါင် (၃၅၅၈) တင်း တင်း (၁၀၀)ဈေး ၁၄၇၀၀၀၀/- ကျပ်ဖြင့် မအူပင်ရွှေတောင်မှော် ကျေးရွာဘက်မှလည်းကောင်း ၊ GoodBrother ကုမ္ပဏီမှ (၅၀)ပေါင် ဆင်းသုခ စပါး (၂၁၀၀) တင်း၊ တင်း(၁၀၀) ဈေး ၁၄၅၀၀၀၀/- ကျပ်ဖြင့် ကျောင်းကုန်ဘက်မှ စပါးအခြောက်များကို ဝယ်ယူခဲ့ကြောင်း သိရှိရပါသည်။

     ၅-၁-၂၀၂၆ ရက်နေ့က ရွှေဝါနဒီကုမ္ပဏီမှ ဆင်းသုခ (၉၁၉) တင်း၊ (၅၀)ပေါင် စပါးတင်း (၁၀၀)ဈေးနှုန်း ၁၄၆၀၀၀၀/-ဖြင့်၊ မအူပင်မြို့နယ် မလတ်တိုဘက်မှာလည်းကောင်း၊ ကရင်မ စပါး (၅၀)ပေါင် (၁၀၀၆) တင်း တင်း ၁၀၀ ဈေး ၁၄၅၀၀၀၀/-ကျပ်ဖြင့် မအူပင်ရွှေတောင်မှော် ကျေးရွာဘက်မှဝယ်ယူကြောင်း၊ The Perpetual ကုမ္ပဏီမှ ဆင်းသုခစပါး(၅၀)ပေါင် (၁၄၅၁) တင်း၊ တင်း၁၀၀ဈေးနှုန်း ၁၄၅၅၀၀၀/-ကျပ်ဖြင့် ညောင်တုန်းမြို့နယ်မှ ဝယ်ယူခဲ့ကြောင်း ၊ ၆-၁-၂၀၂၆ ရက်နေ့ စပါးအဝယ်အနေဖြင့် ရွှေဝါနဒီကုမ္ပဏီမှ ဆင်းသုခ (၁၆၉၁) တင်း၊ (၅၀)ပေါင် စပါးတင်း ၁၀၀ဈေးနှုန်း ၁၄၆၅၀၀၀/-ဖြင့်၊ မအူပင်မြို့နယ် မလတ်တိုဘက်မှာလည်းကောင်း၊ ကရင်မ စပါး (၅၀)ပေါင် (၁၀၆၈) တင်း၊ တင်း (၁၀၀) ဈေး ၁၄၆၅၀၀၀/- ကျပ်ဖြင့် မအူပင်ရွှေတောင်မှော် ကျေးရွာဘက်မှဝယ်ယူကြောင်း၊ ကုမ္ပဏီတာဝန်ရှိသူများ ပြောပြချက်အရ သိရှိရပြီး မြို့နယ်တာဝန်ရှိသူများမှ စပါးဝယ်ယူနေမှုများကို နေ့စဉ်စာရင်းပြုစု ပေးပို့နိုင်ရန် ဆွေးနွေးခဲ့ကြောင်း သိရသည်။

DOCA(ဧရာဝတီ)

   ကျောက်ဆည်ခရိုင်သည်  ဆည်ရေသောက်ဒေသတစ်ခုဖြစ်ပြီး  သီးနှံမျိုးစုံ   အောင်မြင်ဖြစ်ထွန်းလျက်ရှိရာ စပါး ၊ ပဲ ၊ ပြောင်းသီးနှံများအပြင် စားဖိုဆောင်သီးနှံတစ်မျိုးဖြစ်သော ကြက်သွန် သီးနှံကိုလည်း စိုက်ပျိုးလျက်ရှိပါသည် ။ မြစ်သားမြို့နယ်အတွင်း ဆောင်းကြက်သွန်နီ စိုက်ဧက (၇၅၀၀)ဧကစိုက်ပျိုးပြီးစီးပြီဖြစ်ကြောင်း သက်ဆိုင်ရာဌာများ၏ စာရင်းများအရ သိရှိပါသည် ။  ယခုအခါ ကြက်သွန်နီများ အောင်မြင်ဖြစ်ထွန်းလျက်ရှိပြီး မကြာမီကာလအတွင်း ရိတ်သိမ်းတော့မည် ဖြစ်ကြောင်း၊ အများဆုံးစိုက်ပျိုးသော ကျေးရွာများမှာ ကသဲကုန်း၊ လေးဆယ်ကုန်း၊ ဆည်ရွာများ ဖြစ်ပါသည်။စိုက်ပျိုးမှုအနေဖြင့် ကြက်သွန်ကို ပျိုးထောင်ပြီး(၄၅)ရက်သားပျိုးပင်များကို စိုက်ပျိုးရန် အသင့်ပြုလုပ်ထားသော စိုက်ဘောင်များသို့ ရွှေ့ပြောင်းစိုက်ပျိုးရပါသည်။ အများဆုံး စိုက်ပျိုးသော မျိုးများမှာ ရွှေဖလားမျိုး၊ ရွှေဖလားထိပ်မောက်မျိုးများကို စိုက်ပျိုးကြကြောင်း၊ ကြက်သွန်နီ (၁)ဧက စိုက်ပျိုးထုတ်လုပ်မှု ကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခ အပါအဝင် စုစုပေါင်း သိန်း (၃၀)ကျော်ကုန်ကျကြောင်း၊ ထွက်ရှိမှုအနေဖြင့်(၁)ဧက အထွက်နှုန်း (၃၀၀၀)ပိဿာ ကျော်ထွက် ရှိခဲ့ ကြောင်း၊ ယခင်နှစ် ဆောင်းကြက်သွန်နီ စျေးနှုန်းအနေဖြင့် အကြီး၊ အလတ်၊ အသေးအရော (၁)ပိဿာလျှင်(၂၅၀၀-၃၀၀၀)ကျပ် အထိစျေးနှုန်းများဖြင့် အရောင်း အဝယ်ဖြစ်ခဲ့ကြောင်း၊ အကျိုး အမြတ်အနေဖြင့် ထွက်ပေါ်ချိန်တွင် (၁) ပိဿာလျှင်(၂၈၀၀)ကျပ်ခန့် ရောင်းချရသောကြောင့် စိုက်ပျိုးစရိတ်နှုတ်ပြီး (၅၀)သိန်းကျော် မြတ်ခဲ့ကြောင်း ၊ ယခုလက်ရှိ ကြက်သွန်နီ(မိုး) အကြီး (၁)ပိဿာလျှင်(၃၀၀၀)ကျပ် ၊ အလတ် (၁)ပိဿာလျှင်(၂၅၀၀)ကျပ် ၊ အသေး (၁)ပိဿာလျှင် (၂၀၀၀)ကျပ်ဖြင့် ရောင်းဝယ်လျက်ရှိကြောင်း ၊  ဆောင်းကြက်သွန်နီ ပေါ်ချိန်တွင် ရောင်းဝယ်မှု အနေဖြင့် ပွဲစားများမှ စိုက်ခင်းထဲအရောက် လာရောက်ဝယ်ယူကြကြောင်း ၊ မြို့ပေါ်ပွဲရုံများသို့လည်း တိုက်ရိုက်တင်ပို့ရောင်းချကြကြောင်း ၊ ကြက်သွန်နီထွက်ရှိချိန်တွင် စျေးနှုန်းများ ကောင်းမွန်ပါက တောင်သူများအကျိုးအမြတ် ပိုမိုဖြစ်ထွန်းနိုင်မည်ဖြစ်ကြောင်း ဆောင်းကြက်သွန်နီ စိုက်ပျိုးသော တောင်သူတစ်ဦး၏ ပြောကြားချက်အရသိရှိရပါသည်။

DOCA(မန္တလေး)