ပြည်တွင်းကုန်သွယ်မှုသတင်း

              ၂၀၂၄ခုနှစ် နိုဝင်ဘာလဆန်းပိုင်းတွင် အာလူးသီးနှံကုန်စည်ဝင်‌ရောက်မှုနည်းပါးနေဆဲဖြစ်ပါသည်။ အားလူးကြော်ဈေးကွက်အကိုက် အကြီးဆိုဒ်များဖြစ်သည့် မားကစ်     S₁  S₂ ဆိုဒ်များ မျက်နီ S₁  S₂ ကုန်ဝင်မရှိသလောက်ဖြစ်နေပြီး ဝင်လာသောအကြီးဆိုဒ်များသည်လည်း ဈေးကွက်တွင်ရောက်မလာဘဲ အကြော်လုပ်ငန်းရှင်များနှင့် တိုက်ရိုက်ချိတ်ဆက်ထားသော ပွဲရုံဂိုထောင်များမှတဆင့် တိုက်ရိုက်တင်ပို့ခြင်းကြောင့် ဈေးနှုန်း ၈၅၀၀ပေါက်သော်လည်း ကုန်စည်သည်ဈေးကွက်တွင် ပြတ်လပ်နေကြောင်းသိရသည်။

               ဒေသသုံးအလတ်ဆိုဒ်များဖြစ်သည့် S₁ OK ၇၀၀၀၊ OK ၆၈၀၀A₁ ၅၅၀၀နှင့် A₁ဆွဲ၅၂၀၀ဈေးပေါက်နေပြီး ဂေါ်လီဆိုဒ်မှ၂၅၀၀/ ၃၀၀၀ဖြင့် ဈေးကွက်တွင်ဖြန့်ဖြူးရောင်းဝယ်နေကြောင်း ပွဲရုံလုပ်ငန်းရှင်များထံမှသိရှိရပါသည်။ကုန်စည်လက်ကျန်ရှိသော တောင်သူများကလည်း ပွဲရုံသို့မပို့ဘဲ ဈေးနှုန်းပိုရသောဒေသဈေးကွက်သို့ ဖြန့်ဖြူးရောင်းချနေကြသဖြင့် အသေးဆိုဒ် အလတ်ဆိုဒ်များ ဈေးနှုန်းပိုမိုလာပါသည်။ပွင့်လင်းရာသီ ကုန်ထုတ်လမ်းများကောင်းလာပြီး အာလူးပေါ်ချိန်တွင် ဈေးပြန်ကျလာနိုင်ကြောင်းလေ့လာသုံးသပ်ရကြောင်းသိရှိရပါသည်။

DOCA(ရှမ်း)

            မွန်ပြည်နယ်၊ မုဒုံမြို့နယ်တွင် မိုးစပါးတစ်ဧက အထွက်နှုန်းတိုးတက်မြင့်မားရေး ရိတ်သိမ်းချိန်လွန် နည်းပညာပေးခြင်းနှင့် စံကွက်ရိတ်သိမ်းခြင်းကွင်းသရုပ်ပြပွဲကို ၁၉.၁၁.၂၀၂၄ ရက်နေ့၊ နံနက် (၀၉:၀၀) နာရီအချိန်တွင် ဘဲရမ်းကျေးရွာရှိ တောင်သူဦးမောင်ခင် ကွင်းအမှတ် (၈၄၃) လယ်ဧကသုံးဧက၌ ပြုလုပ်ကြောင်းသိရှိရပါသည်။

            အဆိုပါ မိုးစပါးစံကွက်ရိတ်သိမ်းပွဲသို့ မော်လမြိုင်ခရိုင်စီမံအုပ်ချုပ်ရေးအဖွဲ့ဝင် ဦးကျော်မြင့်၊ ခရိုင်စိုက်ပျိုးမွေးမြူရေးလုပ်ငန်းကြီးကြပ်မှုကော်မတီများ၊ မြို့နယ်စီမံအုပ်ချုပ်ရေးအဖွဲ့ ဥက္ကဋ္ဌဦးပြည်သိမ်းနှင့် အဖွဲ့ဝင်များ၊ မြို့နယ်ဌာနဆိုင်ရာတာဝန်ရှိသူများကကြည့်ရှု၍ စိုက်ပျိုးရေးဝန်ထမ်းများနှင့် တောင်သူများပူးပေါင်းပြီး ရိတ်သိမ်းရာစပါးအစို (၀ ဒသမ ၀၀၁) အကွက်ငယ် အထွက်နှုန်း ၇၁ တင်း၊ (၀ ဒသမ ၁၀) အထွက်နှုန်း (၆၈ ဒသမ ၁၇) တင်း ထွက်ရှိကြောင်းသိရှိရပါသည်။

              မုဒုံမြို့နယ်တွင် ယခုနှစ်မိုးစပါးစိုက်ဧက ၇၅၁၉၆ ဧကကိုလျာထားပြီး ၇၅၆၆၅ ဧကကျော် စိုက်ပျိုးနိုင်ခဲ့ကြောင်း၊ ယခုအခါ မြို့နယ်အတွင်းရှိ စပါးစိုက်တောင်သူများက မိုးစပါးများရိတ်သိမ်းလျက်ရှိပြီး စပါးအထွက်နှုန်းကောင်းမွန်ကာ စပါးပေါ်ချိန်စျေးကောင်းရရှိ၍ တောင်သူများအဆင်ပြေလျက်ရှိကြောင်း သိရှိရပါသည်။

DOCA(မွန်)

        ပြည်မြို့နယ်အနီးတစ်ဝိုက်ရှိရွာများဖြစ်သော ပျဉ်းပင်ကိုင်းရွာ၊ အောင်မြေရွာ၊ မြေပဒေသာရွာများတွင် ကီလိုမာလကာသီးများကို ခြံမြေရှိသလောက်စိုက်ပျိုးကြပြီး တစ်ဦးလျှင် ၂ယောက်စိုက်၊ ၃ယောက်စိုက်၊ ၁ဧက၊ ၂ဧက စသည်ဖြင့် စိုက်ပျိုးကြောင်း ပျဉ်းပင်ကိုင်းရွာရှိ တောင်သူ ဒေါ်တင်တင်ညို၏ ပြောကြားချက်အရသိရပါသည်။ ကီလိုမာလကာပင် ၁ဧကလျှင် နေ့စဉ် အလုံး ၁၀၀၀ခန့်ဆွတ်ခူးရကြောင်းလည်းသိရပြီး ပြည်ဈေးကွက်သို့ အလုံးအကြီး/ အသေး အရော(၆၀၀-၇၀၀)ခန့် နေ့စဉ်အဝင်ရှိနေသည်။ ဈေးနှုန်းမှာ အလုံးချောတစ်လုံးလျှင် (၅၀၀-၆၀၀)ကျပ်နှုန်း၊ အလတ် (၃၅၀-၄၀၀)ကျပ်နှုန်း၊ အသေး (၂၀၀-၂၅၀)ကျပ်နှုန်းတို့ဖြင့် အသီးသီးရောင်းချလျက်ရှိပြီး ဝင်ရောက်မှု၏ အားလုံးနီးပါးခန့် အရောင်းအဝယ်ဖြစ်လျက်ရှိပြီး အကျိုးအမြတ်အနေဖြင့် နေ့စဉ် (၇၀၀၀-၈၀၀၀)ကျပ်ရရှိကြောင်းသိရပါသည်။

DOCA(ပဲခူး)

        ပြည်ဈေးကွက်သို့ ယခုနိုဝင်ဘာလ တတိယပတ်တွင် ပန်းတောင်းမြို့နယ်၊ ဥသျှစ်ပင်ဒေသမှထွက်ရှိသော ဆင်ခရမ်းချဉ်သီးများ နှစ်ရက်လျှင် (၁)ကြိမ်ဝင်ရောက်လျက်ရှိနေပြီး (၁၀)ကြိမ်လျှင် ကြီး၊ လတ်၊ သေး အရော အလုံးရေ (၇၀၀-၆၀၀)ခန့်ဝင်ရောက်မှုရှိနေပါသည်။ ယခုဝင်ရောက်မှုမှာ ဥသျှစ်ပင်ဘက်မှသာအဝင်ရှိနေပြီး ယခင်နှစ်ကာလတူဝင်ရောက်မှုမှာ တောင်ကုတ်၊ ပေါက်ခေါင်းနှင့် ဥသျှစ်ပင်ဒေသတို့မှ အလုံးရေ (၁၅၀၀)ခန့်ဝင်ရောက်မှုနှင့်နှိုင်းယှဉ်ပါက ထက်ဝက်ခန့်လျော့နည်းဝင်ရောက်ကြောင်းသိရှိရပါသည်။ ဝင်ရောက်မှုနည်းသဖြင့် ဈေးနှုန်းများမြင့်တက်လျက်ရှိပြီး ယခင်နှစ်တွင် အလုံးအကြီး/အသေးပေါ်မူတည်၍ ပျမ်းမျှ ကျပ်(၁၈၀-၂၀၀)ခန့်ရှိခဲ့ပြီး ယခုနိုဝင်ဘာလ တတိယပတ်တွင် ကျပ်(၃၅၀-၄၀၀)နှုန်းဖြင့် အသီးသီးရောင်းလျက်ရှိကာ ဈေးကွက်အတွင်း ဝင်ရောက်မှု၏ သုံးပုံနှစ်ပုံခန့်အရောင်းအဝယ်ဖြစ်လျက်ရှိကြောင်းသိရပါသည်။

DOCA(ပဲခူး)

         ဘူးသီးကို တစ်နိုင်ငံလုံးအတိုင်းအတာဖြင့် စိုက်ပျိုးကြပြီး တစ်နှစ်ပတ်လုံး အသီးသီးသော ဟင်းသီးဟင်းရွက်အုပ်စုဝင်အပင်လည်းဖြစ်ပါသည်။ ဘူးသီးစိုက်ပျိုးရာတွင် ရေများများ လောင်းနိုင်မှသာ အပင်ကြီးထွားပြီး အသီးများများတင်နိုင်သော်လည်း ရေအများသွင်းမိ၍ အပင်ခြေရင်းတွင် ရေဝပ်သွားပြီး အမြစ်ကို လေမတိုးခဲ့လျှင် အမြစ်များရိကာ အပင်သေသွားနိုင်ပါသည်။ ဘူးပင်မျာကို ပြည်ဒေသတွင်း၌ စိုက်ပျိုးကြသည့်အပြင် ရွှေတောင်မြို့နယ်၊ ပုတီးကုန်းမြို့နယ်များတွင်လည်းစိုက်ပျိုးကြပါသည်။ ဘူးပင်မှာ အရွက်ကိုစားသုံးနိုင်သည့်အပြင် အသီးကိုလည်းစားသုံးရသဖြင့် ဘူးညွန့်ရော ဘူးသီးပါ ရောင်းချရပါသည်။ ဘူးသီးများစိုက်ပျိုးသော ကျေးရွာများမှ ပြည်ဈေးကွက်သို့ လာရောက်ရောင်းချကြောင်းသိရပါသည်။ ရောင်းချသောဈေးနှုန်းများအနေဖြင့် ဘူးသီးတစ်စိတ်လျှင် ကျပ်(၅၀၀)ခန့်ရှိပြီး၊ ဘူးသီးတစ်လုံးဈေးနှုန်းမှာ အကြီးအသေးပေါ်မူတည်၍ ကျပ်(၃၀၀၀-၄၀၀၀)ထိဈေးနှုန်းများဖြင့် အသီးသီး ဈေးကွက်ထဲတွင် ရောင်းချနေကြကြောင်းသိရပါသည်။ ပြည်ဈေးကွက်မှတစ်ဆင့် ရန်ကုန်မြို့ရှိ ကုန်စိမ်းဈေးကွက်များအပြင် နယ်မြို့များသို့လည်း တင်ပို့ရောင်းချကြောင်းသိရပါသည်။

DOCA(ပဲခူး)