ပြည်တွင်းကုန်သွယ်မှုသတင်း

        ရန်ကုန်တိုင်းဒေသကြီးသို့ ပြည်နယ်နှင့် တိုင်းဒေသကြီးအသီးသီးမှဝင်ရောက်လာသည့် ကြက်သွန်နီများသည် အနောက်ပိုင်းခရိုင်၊ စားသုံးသူရေးရာဦးစီးဌာနကွပ်ကဲမှုအောက်ရှိ ဘုရင့်နောင်ကုန်စည်ဒိုင်သို့  နေ့စဉ်မော်တော်ယာဉ်များဖြင့် ဝင်ရောက်လျက်ရှိပါသည်။ ပွဲရုံများ၏  ကြက်သွန်နီလက်ကျန်အခြေအနေများအား  အမှန်ကန်ဆုံးသိရှိနိုင်ရန်အတွက် ဘုရင့်နောင်ပွဲရုံဝင်းအတွင်းရှိ  ကြက်သွန်နီပွဲရုံ (၄၀) အနက် Random စနစ်ဖြင့် ပွဲရုံ (၁၀) ရုံအား မေးမြန်းချက်များအရလည်းကောင်း၊ ဘုရင့်နောင်ကုန်စည်ဒိုင်သို့ ကြက်သွန်နီ နေ့စဉ်ဝင်ရောက်မှုစာရင်းများအရလည်းကောင်း၊ ကြက်သွန်နီလက်ကျန်အခြေအနေအား နေ့စဉ်စုံစမ်းလျက်ရှိပါသည်။ နိုဝင်ဘာလ (၁၁) ရက်နေ့မှ နိုဝင်ဘာလ (၁၇) ရက်နေ့အထိ ဘုရင့်နောင်ကုန်စည်ဒိုင်သို့ ကြက်သွန်နီဝင်ရောက်ရာဒေသများဖြစ်သည့် ဆိပ်ဖြူ၊ မုံရွာ၊ တောင်သာဒေသတို့မှ ကြက်သွန်နီ (၇၂၀၀၀၀) ပိဿာဝင်ရောက်ခဲ့ပြီး (၆၀) ရာခိုင်နှုန်းခန့်ပြန်လည်စီးထွက်မှုရှိကြောင်းသိရှိရပါသည်။ ထို့ကြောင့် ကြက်သွန်နီလက်ကျန်မှာ (၂၈၈၀၀၀) ပိဿာကျန်ရှိကြောင်း ကုန်စည်ဒိုင်သတင်းအရသိရှိရသည်။ ဆိပ်ဖြူကြက်သွန်နီ (အသစ်) အချောတစ်ပိဿာလျှင် ကျပ်၂၃၀၀၊ အသန့်မှာ တစ်ပိဿာလျှင် ကျပ်၃၆၀၀၊ အကြီးမှာ ကျပ်၄၅၀၀၀၊ ရှယ်မှာ ကျပ်၄၂၀၀၊  မုံရွာကြက်သွန်နီ (အသစ်) အသန့်မှာ တစ်ပိဿာလျှင် ကျပ်၃၅၀၀၊ အကြီးမှာ ကျပ်၃၉၀၀၊ ရှယ်မှာ ကျပ်၄၂၀၀၊ တောင်သာကြက်သွန်နီ(အသစ်) အချောတစ်ပိဿာလျှင် ကျပ်၁၀၀၀၊ အသန့်မှာ တစ်ပိဿာလျှင် ကျပ်၂၀၀၀၊ အကြီးမှာ ကျပ်၂၅၀၀ဈေးတို့အသီးသီးရှိကြောင်း စုံစမ်းသိရှိရပါသည်။

        ယခင်အပတ်နှင့် ယခုအပတ်တို့၏ ကြက်သွန်နီဈေးနှုန်းများကိုနှိုင်းယှဉ်ရာတွင် ကထိန်ခင်းပြီးပြီဖြစ်၍ ကြက်သွန်ဈေးနှုန်းများမှာ ယခင်အပတ်ထက် အနည်းငယ်ကျဆင်းမှုရှိကြောင်းသိရှိရပါသည်။

DOCA(ရန်ကုန်)

             မြိတ်ခရိုင်၊ မြိတ်မြို့၏ ဒေသတွင်းစားသုံးဆီဖူလုံစေရေးနှင့် စျေးနှုန်းမြင့်တင်ရောင်းချခြင်းမရှိစေရန်အတွက် ရန်ကုန်မြို့ ဆီကုမ္ပဏီများမှ ခွဲဝေဖြန့်ဖြူးရောင်းချပေးသောစားအုန်းဆီများသည် ၂၀၂၄ခုနှစ်၊ နိုဝင်ဘာလ(၁၈)ရက်နေ့တွင် မော်တော်ယာဥ်အမှတ်7M-6723နှင့် 6C-5057တို့ဖြင့် မြိတ်မြို့သို့ ရောက်ရှိလာခဲ့ကြောင်း သိရှိရပါသည်။

             အဆိုပါစားအုန်းဆီများကို Globle Good Pure Group ကုမ္ပဏီ၊ Kaung Hlyan New Asia ကုမ္ပဏီနှင့် Mahar Phone Let Yone ကုမ္ပဏီမှ ခွဲတမ်းရရှိပြီး စုစုပေါင်းစားအုန်းဆီပေပါ (၁၄၀)ပေပါရောက်ရှိလာခဲ့ပါသည်။ ၎င်းတို့ကို ရည်ညွှန်းစျေးတစ်ပိဿာ (၆၆၃၅)ကျပ်အပေါ် သယ်ယူပို့ဆောင်ကုန်ကျစရိတ်နှင့် ၂% အမြတ်တို့ဖြင့် လက်လီဆိုင်များသို့ ခွဲဝေရောင်းချပေးသွားမည်ဖြစ်ကြောင်း သိရှိရပါသည်။

DOCA(တနင်္သာရီ)

     ဧရာဝတီတိုင်းဒေသကြီး မအူပင်ခရိုင် ညောင်တုန်းမြို့နယ်မှ ကွမ်းသီးခြောက်များ ဝယ်ယူမှုအားကောင်းနေပြီး အ‌ရောင်းအဝယ်ကောင်းမွန်နေကြောင်း ညောင်တုန်းမြို့နယ် ကွမ်းသီးရောင်းဝယ် ရေးလုပ်ငန်းရှင် ဦးရာမွန်က ပြောပြ၍ သိရသည်။ ညောင်တုန်းမြို့နယ်မှ ကွမ်းသီးခြောက်များကို ဩဂုတ်လမှ နိုဝင်ဘာလ ၁၅ ရက်နေ့ထိ ဝယ်ယူမှုအားကောင်းလာပြီး အရောင်းအဝယ်ကောင်းမွန်နေကြောင်း၊ အဆိုပါဒေသမှ ကွမ်းသီးခြောက် တစ်ပိဿာလျှင် ငွေကျပ် ၁၃၀၀၀ ထိ ဈေးပေါက်နေကြောင်း သိရသည်။

     ညောင်တုန်းမြို့နယ်ဘက်ကထွက်တဲ့ ကွမ်းသီးခြောက်တွေကို ရန်ကုန်ဈေးကွက်ဘက်က ဝယ်ယူကြောင်း၊ လက်ရှိကွမ်းသီးခြောက်တွေက ပိုမိုထွက်ရှိလာပြီး ကွမ်းသီးခြောက်က အခုအချိန်မှာ အရောင်းအဝယ် အားကောင်းနေပါတယ်။ ညောင်တုန်းမြို့နယ်တွင် ကွမ်းသီးခြောက် စိုက်ဧက  ၁၅၅ ဧကရှိပြီး ၁ဧကတွင် အပင်ရေ ၃၀၀ ခန့်စိုက်ပျိုးနိုင်ပြီး ကွမ်းသီးအပင်မျိုး အနေဖြင့် တစ်လုံးကို ၃၀၀  ထိ ပေးဝယ်ရကြောင်း၊ ၁ဧက ကုန်ကျစရိတ်အနေဖြင့် ၃၀၀၀၀၀ခန့်သာ ကုန်ကျကြောင်း၊ ကွမ်းသီးပင် နှစ်ရှည်ပင်ဖြစ်၍ နှစ်တစ်ပတ်လည်လုံး အသီးသီး၍ တစ်နေ့ကို အလုံးရေ ၈၀၀ ထိ ထွက်ရှိကြောင်း၊ တစ်နှစ်တွင် ၈လလောက် ကွမ်းသီးထွက်ရှိသည်။ ၁လကို အလုံးရေ ၂သောင်းခွဲထိ ထွက်ရှိပြီး ယနေ့ ကွမ်းသီးခြောက် ၁လုံးကို ၁၅၀ကျပ်ဖြင့် ရောင်းချရပြီး တစ်နှစ်ကို အကျိုးအမြတ် သိန်း၂၀အကျိုးအမြတ်ရရှိကြောင်း သိရသည်။ ညောင်တုန်းမြို့နယ်တွင် ကွမ်းသီးစိမ်းများကို ဒေသကွမ်းသီးရောင်းဝယ်ရေးလုပ်ငန်းရှင်များက ဝယ်ယူပြီး စနစ်တကျသန့်စင်ထုပ်ပိုးကာ ရန်ကုန်ဈေးကွက်သို့ အများဆုံးတင်ပို့ရောင်းချလျက်ရှိကြောင်း ညောင်တုန်းမြို့နယ် ကွမ်းသီးရောင်းဝယ်ရေးပွဲရုံပိုင်ရှင် ဒေါ်သူအောင်က ပြောပြ၍ သိရသည်။

DOCA(ဧရာဝတီ)

         ရန်ကုန်တိုင်းဒေသကြီး၊ လှိုင်မြို့နယ်၊ သီရိမင်္ဂလာဈေးတွင် နိုဝင်ဘာလ (၁၂) ရက်နေ့မှ နိုဝင်ဘာလ (၁၈) ရက်နေ့အထိဖြစ်ပေါ်ခဲ့သော ကြံခင်းမှ ထန်းမြစ်အစည်းကြီးတစ်စည်းလျှင်ကျပ်၃၅၀၀၊ အလတ် ကျပ်၃၀၀၀၊ ရဲမွန်တပ်မြို့ မှ ဖရဲသီး(ဘာဟုဘာလီ) အလုံးကြီး ကျပ်၈၀၀၀၊ အလုံးလတ် ကျပ်၅၀၀၀၊ အလုံးသေး ကျပ်၃၀၀၀၊ အင်းမမှ ဖရဲသီး (၈၅၅) အလုံးကြီးတစ်လုံးလျှင် ကျပ်၂၀၀၀၀၊ အလုံးလတ် ကျပ်၁၈၀၀၀၊ အလုံးသေး ကျပ်၁၅၀၀၀၊  တောင်ကြီးမှ ထောပတ်သီးတစ်လုံးဈေးနှုန်းမှာ အလုံးကြီး ကျပ်၁၀၀၀၊ အလုံးသေး ကျပ်၅၀၀၊ အောင်ပန်းမှ လိမ္မော်သီးတစ်ပိဿာလျှင် အလုံးကြီး ကျပ်၇၀၀၀၊ အလုံးလတ် ကျပ်၆၀၀၀၊ အလုံးသေး ကျပ်၅၀၀၀၊ ပုပ္ပါးမှ မာလာကာသီးအိတ်ကြီးတစ်အိတ်လျှင် ကျပ်၅၅၀၀၀၊ မော်လမြိုင်မှ ကျွဲကောသီးအလုံးကြီးတစ်လုံးလျှင် ကျပ်၇၀၀၀၊ အလုံးလတ် ကျပ်၆၀၀၀၊ အလုံးသေး ကျပ်၅၀၀၀၊ တိုက်ကြီးမှ ကလောဥတစ်ပိဿာလျှင် အလုံးကြီး ကျပ်၁၅၀၀၊ ရှမ်းပြည်မှ အာတာလွတ်ဥတစ်ပိဿာလျှင် ကျပ်၃၀၀၀၊ ယိုးဒယားပန်းသီးတစ်သေတ္တာလျှင် ကျပ်၇၈၀၀၀တို့ရှိကြောင်း သီရိမင်္ဂလာဈေးရှိ မြန်မာနိုင်ငံသစ်သီးဝလံပန်းမန် ဟင်းသီးဟင်းရွက်စိုက်ပျိုးထုတ်လုပ်တင်ပို့ရောင်းချသူများအသင်း (MFVP) မှသိရှိရပါသည်။

DOCA(ရန်ကုန်)

               ပဲခူးတိုင်းဒေသကြီး၊ နတ်တလင်းမြို့နယ်အတွင်းရှိ ကျေးရွာအချို့တွင် ကွမ်းကိုစီးပွားဖြစ် တစ်ပိုင်တစ်နိုင်စိုက်ပျိုးလျက်ရှိရာ ကွမ်းစိုက်သူများအနေဖြင့် ကွမ်းခြံစိုက်မည့်နေရာကို နွားချေး၊ မြေဆွေးများထည့်ကာ မြေပြုပြင်ပေးရသည်။ အမြင့်(၄)လက်မနှင့် အကျယ်(၂)ပေရှိဘောင်များ ပြုလုပ်ပေးရသည်။ ကွမ်းခြံတစ်ပိုင်တစ်နိုင်စိုက်သူများအနေဖြင့် ပေါက်ပြားဖြင့်ကွမ်းဘောင်များ ပြုလုပ်ပေးရသည်။ ကွမ်းခြံဆောက်လုပ်ရာတွင် ဝါးလုံးအကြီးများကိုတိုင်အဖြစ်အသုံးပြုပြီး ကွမ်းစိုက်တိုင်များကိုလည်း ဝါးလုံးအသေးများဖြင့်လည်းကောင်း၊ ဝါးလုံးအကြီးများကို ခြမ်း၍လည်းကောင်း စိုက်ပျိုးကြသည်။ ကွမ်းခြံစင်ကိုလည်း အမြင့်(၇)ပေ (၈)ပေအထိဆောက်လုပ်ကြကြောင်း၊ နေပူဒဏ် မှကာကွယ်ပေးရန် အမိုးအကာများကို အုန်းလက်၊ အမိုးအစိမ်း၊ အမိုးအမည်းများ အသုံးပြုရကြောင်းနှင့် ကွမ်းအမျိုးအစားများမှာ ကွမ်းနုဝါနှင့် ကွမ်းစိမ်းဟူ၍ (၂)မျိုးရှိသော်လည်း ကွမ်းနုဝါကိုအများဆုံး အသုံးပြုကြောင်း သိရပါသည်။

               ကွမ်းညွှန့်များကိုမိမိတို့နှစ်သက်ရာခြံမှ မျိူးဝယ်ယူကာ စိုက်ပျိုး‌လေ့ရှိကြသည်။ ကွမ်းနုဝါတစ်ညွှန့်လျှင် လက်ကားစျေး (၅၀၀)ကျပ်ခန့်ဖြင့် ဝယ်ယူကာ စိုက်ပျိုးကြရသည်။ ကွမ်းဘောင်အပေါ်ရှိ မြောင်းအရှည်အတွင်း၌ နှစ်ဆစ်မြုပ်ထည့်ကာ မြေဖုံး၍စိုက်ပျိုးပေးရကြောင်း၊ ကွမ်းညွှန့်အဖျားပိုင်းကို ခပ်ကွေးကွေးအနေအထားဖြင့် ကွမ်းတိုင်တွင်ကွမ်းညွှန့်များ ထောင်မတ်နေသည့်ပုံစံဖြင့် ချည်ပေးရသည်။ ကွမ်းညွှန့်များကို စိုက်နည်းကွာခြားသော်လည်း တစ်ပင်နှင့်တစ်ပင်ကွာခြားချက်မှာ တစ်ပေခန့်သာရှိကြောင်း၊ ကွမ်းပင်များရေလောင်းရာတွင် ရေဖျန်းပုံးဖြင့်ဖျန်းလေ့ရှိသည်။ ကွမ်း စိုက်ပျိုးပြီး(၄)အကြာတွင် စတင်ခူးဆွတ်နိုင်ပါသည်။ မိုးရာသီနှင့်ဆောင်းရာသီတွင် (၁၀)ရက် တစ်ကြိမ်ခူးရသော်လည်း နွေရာသီတွင် ရာသီဥတုအပူဒဏ်ကြောင့် (၁၅)ရက်ကို တစ်ကြိမ်သာ ခူးရပါသည်။ ကွမ်းခူးပြီးလျှင် (၁၅)ပတ်လည်ကွန်ပေါင်းဓာတ်မြေဩဇာနှင့် မှိုဆေးများကို ဖျန်းပေးရသည်။ မြေအနေအထားပေါ်မူတည်၍ ၃နှစ်မှ၅နှစ်အထိထားလေ့ရှိကြောင်း သိရပါသည်။ စိုက်ပျိုးကုန်ကျစရိတ်အနေဖြင့် ကွမ်းခြံတစ်ပိုင်တစ်နိုင်စိုက်သူများအနေဖြင့် ကွမ်းတိုင်(၅၀၀)စိုက်လျှင် စုစုပေါင်းကုန်ကျစရိတ်မှာ ငွေကျပ်(၈)သိန်းခန့်ကုန်ကျကြောင်း ကွမ်းစိုက်တောင်သူများထံမှ သိရှိရပါသည်။ ကွမ်းနုဝါစျေးနှုန်းများမှာ နိုဝင်ဘာလပထမအပတ်တွင်(၁၀၀၀၀)ကျပ်အထိရှိပြီး နိုဝင်ဘာလဒုတိယအပတ်တွင် (၁၂၀၀၀)ကျပ်အထိ စျေးနှုန်းမြင့်တက်လာကြောင်းသိရပါသည်။ မိုးရာသီတွင် ကွမ်းအထွက်နှုန်းတိုးသော်လည်း မိုးများလျှင် ရောဂါပိုးကျရောက်လာသည့်အတွက် အထူးဂရုစိုက်ရပါ‌ကြောင်း ဆောင်းရာသီနှင့်နွေရာသီတွင် အထွက်နှုန်းနည်းသွားသည့်အတွက် စျေးနှုန်းမြင့်တက်လာကြောင်း ကွမ်းစိုက်တောင်သူများထံမှ သိရှိရပါသည်။

DOCA(ပဲခူး)