ပြည်တွင်းကုန်သွယ်မှုသတင်း

    မကွေးတိုင်းဒေသကြီး၊ အောင်လံမြို့၊ အောင်လံကုန်စည်ဒိုင်တွင် နှမ်းနှင့်ပဲမျိုးစုံသီးနှံများ နေ့စဉ် အရောင်းအဝယ်ဖြစ်လျက်ရှိရာ ဇွန်လ(စတုတ္ထပတ်)အတွင်းတွင် နှမ်းနက်(စမုံ)မှာ (၄၅)ပိဿာပါဝင် (၁)အိတ်လျှင် အနိမ့်ဈေး ကျပ်(၃၇၅၀၀၀)၊ အမြင့်ဈေး ကျပ်(၃၈၀၀၀၀)ဖြင့် အိတ်ရေ(၄၃၀) အိတ် အရောင်းအဝယ်ဖြစ်ခဲ့ပါကြောင်း သိရှိခဲ့ရပါသည်။

    ပဲမျိုးစုံသီးနှံဈေးကွက်တွင် ဇွန်လ(စတုတ္ထပတ်)အတွင်းတွင် မတ်ပဲ(၁)တင်းလျှင် အနိမ့်ဈေး ကျပ်(၁၀၅၀၀၀)၊ အမြင့်ဈေးကျပ်(၁၀၇၅၀၀)ဖြင့် (၃၀)ပိဿာဝင် အိတ်(၂၃၀)ကိုလည်းကောင်း၊ ပဲစဉ်း ငုံနီမှာ(၁)တင်းလျှင် အနိမ့်ဈေးကျပ် (၁၄၁၀၀၀)၊ အမြင့်ဈေးကျပ်(၁၄၅၀၀၀)ဖြင့် (၃၀)ပိဿာဝင် အိတ်(၂၁၀၀)ကိုလည်းကောင်း၊ ကုလားပဲ(HL) (၁)တင်းလျှင် အနိမ့်ဈေး ကျပ်(၈၄၀၀၀) အမြင့်ဈေး ကျပ်(၈၅၅၀၀)ဖြင့် (၃၀)ပိဿာဝင် အိတ်(၃၀၀)ကိုလည်းကောင်း၊ ကုလားပဲ(မြကြေး) (၁)တင်းလျှင် ကျပ်(၈၉၀၀၀)ဖြင့် (၃၀)ပိဿာဝင် အိတ်(၁၈၀)ကိုလည်းကောင်း၊ ဘိုကိတ်ပြာ (၁)တင်းလျှင် ကျပ် (၈၅၀၀၀)ဖြင့် (၃၀)ပိဿာဝင် အိတ်(၉၀)ကိုလည်းကောင်း၊ မြေပဲလုံးဆံ(နီ)(၁)ပိဿာလျှင် ယခု တစ်ပတ်အတွင်း ကျပ်(၇၄၀၀)ဖြင့် (၃၀)ပိဿာဝင် အိတ်(၁၃၀)ကိုလည်းကောင်း၊ မြေပဲလုံးဆံ (ဖြူ) (၁)ပိဿာလျှင် ယခုတစ်ပတ်အတွင်း အနိမ့်ဈေး ကျပ်(၇၄၀၀)၊ အမြင့်ဈေးကျပ်(၇၅၀၀)ဖြင့် (၃၀) ပိဿာဝင် အိတ်(၁၅၀)ကိုလည်းကောင်း အသီးသီးအရောင်းအဝယ်ရှိခဲ့ပါကြောင်း သိရသည်။ ကုလားပဲ(HL)၊ ကုလားပဲ(မြကြေး)တို့ကို အောင်လံမြို့နယ်တွင်းရှိ ပဲခွဲစက်များသို့ ပေးပို့ရောင်းချရခြင်းဖြစ်ပြီး မြေပဲလုံးဆံ(ဖြူ)၊ မြေပဲလုံးဆံ(နီ)တို့ကို ပဲကြော်လုပ်ငန်းဖိုသို့လည်းကောင်း၊ မတ်ပဲ၊ ပဲစဉ်းငုံနီ၊ ဘိုကိတ်ပြာတို့ကို ရန်ကုန်မြို့သို့လည်းကောင်း တင်ပို့ရောင်းချရခြင်းဖြစ်ပါကြောင်းနှင့် ဈေးနှုန်းဈေးကွက်အနေဖြင့် နှမ်းသီးနှံမှာ ဈေးနှုန်းပြောင်းလဲခြင်းမရှိဘဲ တည်ငြိမ်လျက်ရှိပြီး ပဲမျိုးစုံ သီးနှံဈေးကွက်တွင် သိသိသာသာ အတက်အကျဈေးနှုန်းမရှိဘဲ တစ်နေ့နှင့်တစ်နေ့ ကျပ်(၁၀၀၀-၂၀၀၀) အတက်အကျမျှသာရှိခဲ့ပါကြောင်း အောင်လံကုန်စည်ဒိုင်မှသိရှိရပါသည်။

    ထို့နောက် ဝါသီးနှံမှာ ယခုတစ်ပတ်အတွင်းတွင် (၁)ပိဿာလျှင် ကျပ်(၂၉၀၀ မှ ၃၀၀၀) ဈေးနှုန်းရှိပြီး ဝါပိဿာချိန် (၄၀၀၀)ပိဿာခန့်အား မန္တလေးမြို့သို့ တင်ပို့ရောင်းချပါကြောင်း၊ ဇွန်လ (တတိယပတ်)နှင့် (စတုတ္ထပတ်)အတွင်းတွင် ဈေးနှုန်းပြောင်းလဲမှုမရှိပါကြောင်း၊ အရောင်းအဝယ်မှာ ပုံမှန်အနေအထားမျှသာရှိပါကြောင်း အောင်လံကုန်စည်ဒိုင်မှ သိရပါသည်။

DOCA(မကွေး)

    ပန်းတိမ်ငိုပန်းသည် မိုးတွင်းကာလ၌ ပွင့်တက်သည့်ပန်းတစ်မျိုးဖြစ်သည်။ ပန်းတိမ်ငိုပန်းသည် အအေးပိုင်းနေရာဒေသတွင် ကြိုက်နှစ်သက်သော်လည်း အပူပိုင်းဒေသတွင်လည်း စတင်စိုက်ပျိုးလာကြသည်။  ပန်းတိမ်းငိုပန်းသည် အမျိုးအစားသုံးမျိုးရှိပြီး တစ်ထပ်ပန်းတိမ်ငို၊ နှစ်ထပ်ပန်းတိမ်ငို၊ သုံးထပ် ပန်းတိမ်ငို(ခေါ်) ဆင်ဆွယ်ဟူ၍ သုံးမျိုးရှိသည်။ မျိုးကွဲပေါင်းများစွာရှိပြီး ပန်းအရောင်မှာ ပန်းရောင်၊ ခရမ်းရောင်၊ ခရမ်းဖျော့၊ အဖြူရောင်ရှိကြသည်။ အပင်အမြင့်သည် ၁၈လက်မ မှ ၂၄လက်မအထိရှိပြီး အရွက်များမှာ အမြဲစိမ်းစိုနေသည်။ ပန်းတိမ်ငိုပန်းသည် အအေးပိုင်းဒေသများတွင် အများဆုံးစိုက်ပျိုးကြပါသည်။ ပန်းတိမ်ငိုပန်းသည် ရှမ်းပြည်နယ်၊တောင်ပိုင်း ရွာငံနှင့် ပင်းတယမြို့နယ်တွင် အများဆုံးစိုက်ပျိုးကြသည်။ပန်းတိမ်ငိုပန်းပင်သည် ရေကြိုက်နှစ်သက်သော်လည်း ရေဝပ်သည့် ဒဏ်ကိုမခံနိုင်ကြောင်း သိရပါသည်။ ပန်းတိမ်းငိုပန်းသည် ဘုရားပန်းအဖြစ်သာမက အခမ်းအနားများတွင် တန်ဖိုးထားအလှဆင်သည့် ပန်းတစ်မျိုးဖြစ်သဖြင့် ပန်းစိုက်တောင်သူတို့အတွက် တွက်ခြေကိုက်သောပန်းတစ်မျိုးဖြစ်ပါသည်။ ယခုအခါ ပန်းတိမ်ငိုပန်းသည် ပေါ်ဦးပေါ်ဖျားဖြစ်သောကြောင့် ယနေ့ဒေသပေါက်ဈေးအနေဖြင့် ပန်းတိမ်ငိုပန်း (ခရမ်းရောင်) ၁၀ပင်ပါ တစ်စည်းမှာ ၄၀၀၀ကျပ်နှုန်းရှိပြီး ပန်းတိမ်ငိုပန်း (အဖြူရောင်နှင့်အပန်းရောင်) ၁၀ပင်ပါ တစ်စည်းမှာ ၃၅၀၀ကျပ်နှုန်းဝန်ကျင်ဖြင့် ရောင်းချလျက်ရှိပါကြောင်း ဈေးကွက်မှ သိရှိရပါသည်။

DOCA(ရှမ်း)

    အင်္ဂလိပ်လို Cabbage လို့ခေါ်ပြီး အချို့ဒေသများတွင်တော့ ဂေါ်ဖီထုပ်လို့ ခေါ်ကြသည့် ထိုဝဝတုတ်တုတ်ဂေါ်ဖီထုပ်များကို ရှမ်းပြည်နယ်(တောင်ပိုင်း) အောင်ပန်း၊ ကလောမြို့နယ်များတွင် အများဆုံးစိုက်ပျိုးပြီး ကျန်မြို့နယ်များတွင် တစ်ပိုင်တစ်နိုင် စိုက်ပျိုးကြပါသည်။ ဂေါ်ဖီထုပ်တွင် ကျန်းမာရေးအတွက် လိုအပ်သော အာဟာရဓါတ်များစွာ ပါဝင်ပါသည်။ ဂေါ်ဖီထုပ် စားသုံးခြင်းဖြင့် ကိုယ်ခံစွမ်းအားကောင်းစေခြင်း၊ အစာအိမ်နှင့်အူလမ်းကြောင်းကို အထောက်အကူပြုစေသောကြောင့် ဝမ်းမှန်စေခြင်း၊ သွေးတွင်း မကောင်းသောအဆီဓါတ်များကို လျော့နည်းစေခြင်း၊ ဆံကေသာ ကျန်းမာရေးအတွက် အထောက်အကူပြုခြင်း အစရှိသည့် ကျန်းမာရေး ကောင်းကျိုးများကို ရရှိစေနိုင်ပါသည်။ ထို့အပြင် ဂေါ်ဖီထုပ်စားသုံးခြင်းသည် ကိုယ်အလေးချိန် လျှော့ချလိုသူများအတွက် ထိရောက်သော သဘာဝနည်းလမ်းတစ်ခု ဖြစ်ပါသည်။ ဂေါ်ဖီထုပ်ကို ဝယ်သူသုံးစွဲသူများတွင် စားသောက်ဆိုင်များမှ အများဆုံး ဖြစ်ပါသည်။  ရှမ်းပြည်နယ်(တောင်ပိုင်း) တောင်ကြီးမြို့တွင် ဂေါ်ဖီထုပ်ဈေးနှုန်း ၃၀၀၀/- မှ ၃၅၀၀/- ကျပ်ဈေးရှိပြီး ယခင်နှစ်ထက် ဈေးပိုမိုရရှိကြောင်း သိရှိရပါသည်။ ယခုနှစ်တွင် ဂေါ်ဖီထုပ်များ ဈေးကောင်းရရှိသဖြင့် တောင်သူများ အကျိုးအမြတ် များစွာရရှိကြောင်း သိရှိရပါသည်။

DOCA(ရှမ်း)

   ရှမ်းပြည်နယ်(တောင်ပိုင်း)အောင်ပန်းဒေသတွင် ယခုတစ်ပတ်ပြောင်းသီးနှံမှာ တစ်ပိဿာလျှင် အမြင့်ဈေး (၁၂၅၀)ကျပ်ရှိ၍ ယခင်အပတ်အတိုင်း ဈေးနှုန်းတည်ငြိမ်လျက် ပြည်တွင်းဈေးကွက်သာရှိသဖြင့် စီးဆင်းမှုနည်းပါးနေပါသည်။တရုတ်ပြည် ကြူကုတ်ကြက်သွန်ဖြူများ ဝင်ရောက်လာပြီး ရှမ်း ကြက်သွန်ဖြူအသုံးပါးလာသဖြင့် ဈေးအနည်းငယ်ကျဆင်းသွားကြောင်း သိရှိရပါသည်။

     အာလူးသီးနှံမှာမျက်နီ S2-၃၂၀၀ကျပ်၊ S1-၃၀၀၀ကျပ်၊ OK-၂၉၀၀ကျပ်၊ ဆွဲသီး ၂၀၀၀ကျပ်၊ ဂေါ် လီဆိုဒ်မှာ ၁၂၀၀ကျပ်ဖြစ်ပြီး မားကီးနှင့်နယ်သာလန်မျိုးတို့တွင် S2-၃၅၀၀ကျပ် နှင့် S1-၃၄၀၀ကျပ် ပေါက်ဈေးရှိပြီး ယခင်အပတ်တိုင်းဈေးနှုန်းတည်ငြိမ်၍ အဝင်ပါးကာစီးဆင်းမှုနည်းလာကြောင်း သိရှိရပါသည်။

    ချင်းသီးနှံမှာချင်းဥမပေါ်ချိန်ဖြစ်၍ ချင်းအနုအသေးမှာ တစ်ပိဿာလျှင်(၄၅၀၀)ကျပ်ခန့်ဈေးရှိနေပြီး ချင်းအဟောင်းလက်ကျန်နည်းကာ အခက်ကြီးအသန့် တစ်ပိဿာလျှင် (၈၅၀၀)ကျပ်ဖြင့် ဈေးပေါက်နေပြီး လက်ကျန်နည်းကြောင်း သိရှိရပါသည်။

    ကုန်စိမ်းသီးနှံများတွင် ဂေါ်ဖီ ၄၀၀၀-၄၅၀၀ကျပ်၊ ပန်းမုံလာ ၈၅၀-၁၀၀၀ကျပ်၊ ခရမ်းချဉ်ဂွတ် ရှယ်သီး၃၈၀၀ကျပ်နှင့် အသေးဆုံးသီး ၃၂၀၀ကျပ်၊ ဘိုစားပဲ ၂၀၀၀ကျပ်၊ ဥနီ ၃၅၀၀-၃၈၀၀ကျပ်၊ ဖရုံသီး ၁၀၀၀ကျပ်၊ ရွှေပဲ ၁၅၀၀၀-၁၆၀၀၀ကျပ်၊ ငရုတ်ပွ ၁၅၀၀-၁၇၀၀ကျပ်၊ ခရမ်းသီး ၁၅၀၀ကျပ်၊ မုန်ညှင်း ၈၀၀-၁၀၀၀ကျပ် အသီးသီးဈေးပေါက်နေကြပြီး ပန်းမုန်လာသီးနှံနှင့် ဘိုစားသီးနှံတို့မှာ ဝင်ရောက်မှုများလာသဖြင့် ဈေးနှုန်းကျဆင်းသွားကြောင်း ဈေးကွက်အတွင်းမှ လေ့လာသိရှိရပါသည်။

DOCA(ရှမ်း)

   တနင်္သာရီတိုင်းဒေသကြီးအတွင်းရှိ ခရိုင်များနှင့်မြို့များတွင် ကွမ်းသီးပင်များ စိုက်ပျိုးထားလျက်ရှိရာ ထားဝယ်၊ မြိတ်၊ ကော့သောင်းခရိုင်များနှင့်မြို့များမှ အဝယ်ဒိုင်ကြီးများကဝယ်ယူကာ ကွမ်းသီးခြောက်လုံးနှင့် ကွမ်းသီးခြောက်ခြမ်းများကို ရန်ကုန်မြို့နှင့်မန္တလေးမြို့များသို့ အများဆုံး တင်ပို့ရောင်းချလျက်ရှိပြီး အခြားပြည်နယ်နှင့် မြို့များသို့လည်း တင်ပို့ရောင်းချလျက်ရှိကြောင်း သိရပါသည်။ ထို့အပြင် ၎င်းတို့မှ တစ်ဆင့် ပြည်ပနိုင်ငံများသို့လည်း တင်ပို့ရောင်းချလျက်ရှိကြောင်း သိရပါသည်။

    ၂၀၂၄ ခုနှစ်၊ ဇွန်လ ၂၁ ရက်နေ့မှ ၂၇ ရက်နေ့အထိ ကွမ်းသီးတင်ပို့မှုမှာ ထားဝယ်ခရိုင်မှ (၁၈၄၃၁၀)ပိဿာ တန်အားဖြင့်(၃၀၀.၉၆၈)တန်ရှိပြီး ၊ မြိတ်ခရိုင်မှ (၈၂၇၅၀၀)ပိဿာ တန်အားဖြင့် (၁၃၅၁.၂၆၃)တန်နှင့် ကော့သောင်းခရိုင်မှ(၄၁၁၂၀၀)ပိဿာ တန်အားဖြင့်(၁၈၆.၄၈၂)တန်ရှိကြောင်း သိရှိရပါသည်။ ယခုတစ်ပတ်အတွင်း ကွမ်းသီးခြောက်လုံးဈေးနှုန်းမှာ တစ်ပိဿာလျှင် (၄၅၀၀)ရှိပြီး ကွမ်းသီးခြောက်ခြမ်းဈေးနှုန်းမှာ တစ်ပိဿာလျှင်(၆၅၀၀)ရှိကြောင်း ကွမ်းသီးလုပ်ငန်းရှင်ထံမှ သိရှိရပါသည်။

DOCA(တနင်္သာရီ)