ပြည်တွင်းကုန်သွယ်မှုသတင်း

              ရှမ်းပြည်နယ်(တောင်ပိုင်း)အောင်ပန်းဒေသတွင် ယခုတစ်ပတ်ပြောင်းသီးနှံမှာ တစ်ပိဿာလျှင် အမြင့်ဈေး(၁၄၀၀)ကျပ်ဖြင့် ဈေးကောင်းနေပြီး ပြောင်းများဝင်ရောက်မှုရှိသဖြင့် စီးဆင်းမှုမှာယခင်အပတ်ထက်ပို၍ကောင်းလာပါသည်။ ကြက်သွန်ဖြူသီးနှံမှာ တစ်ပိဿာလျှင် ထူး၁ -၁၁၅၀၀၊ ထူး၂ ၁၂၅၀၀၊ ထူး၃ -၁၃၅၀၀၊ ထူး၄ -၁၄၅၀၀၊ ထူး၅- ၁၅၀၀၀ ၊ ထူးလွန်-၁၆၀၀၀နှင့်ဥတစ်လုံးမှာ ၂၅၀၀၀ကျပ် ဈေးပေါက်နေကြပြီး အဝင်နည်း၊ လက်ကျန်နည်းသော်လည်း ဈေးကွက်အသုံးများသဖြင့် အမြင့်ဈေးဖြင့်ငြိမ်နေပြီး စီးဆင်းမှုမှာပုံမှန်ဖြစ်နေပါသည်။

            အာလူးသီးနှံမှာ တစ်ပိဿာလျှင်မျက်နီ S₂၈၅၀၀ကျပ်၊ S₁ ၈၀၀၀၊ OK၇၀၀၀၊ ဆွဲသီး ၅၂၀၀နှင့် ဂေါ်လီဆိုဒ်မှာ၂၅၀၀ကျပ်ဈေးရှိနေပြီး မားကီး S₁ S₂ မှာ ဈေးကွက်အဝင်မရှိဘဲ မျက်နီ၊ဆွဲသီးနှင့် ဂေါ်လီဆိုဒ်များသာ အဝင်ရှိသဖြင့် စီးဆင်းမှုမှာ လျော့နည်းနေသော်လည်း ယခင်အပတ်ထက်အနည်းငယ်ပိုလာပါသည်။

           ကုန်စိမ်းသီးနှံများတွင် ‌ဂေါ်ဖီ ၂၇၀၀-၃၀၀၀၊ ပန်းမုံလာ ၂၈၀၀-၃၂၀၀၊ ရွှေပဲ ၈၀၀၀-၁၀၀၀၀၊ ခရမ်းချဉ်ဂွတ်ရှယ်သီး ၇၀၀၀၊ဘိုစား ၁၈၀၀-၂၅၀၀၊ မုန်လာဥနီ ၃၀၀၀-၃၅၀၀၊ ဖရုံသီး ၁၈၀၀၊ ငြုပ်ပွ ၉၀၀၀-၁၀၀၀၀၊ ခရမ်းသီး ၃၀၀၀-၃၅၀၀၊ မုန်ညှင်း၃၅၀၀-၄၀၀၀ကျပ်ဖြင့်အသီးသီးဈေးပေါက်နေကြပြီး ပန်းမုံလာသီးနှံမှာဈေးကွက်အဝင်နည်းပြီး ခရမ်းချဉ်သီးနှံနှင့် ဘိုစားသီးနှံတို့မှာ ဈေးအနည်းငယ်မြင့်တက်လာကာ ဈေးကွက်လိုအပ်ချက်အရ  အရောင်းအဝယ်ဖြစ်နေသဖြင့် စီးဆင်းမှုမှာ ယခင်အပတ်ထက်ပိုလာကြောင်းလေ့လာသိရှိရပါသည်။

DOCA(ရှမ်း)

        မြန်မာလူမျိုးတို့ နှစ်ခြိုက်စွာစားသုံးကြသည့် အစားအစာများတွင် ငါးပိသည်လည်း တစ်ခုအပါအဝင်ဖြစ်ပေသည်။ ငါးပိတွင် ရေချိုငါးပိနှင့် မျှင်ငါးပိဟူ၍နှစ်မျိုးရှိပါသည်။ ထားဝယ်ဒေသတွင် မျှင်ငါးပိကို စိမ်းစားငါးပိဟုလည်းခေါ်သည်။ မျှင်ငါးပိကို မျှင်ကောင်(ပုစွန်ငယ်တစ်မျိုးဖြင့်) ပြုလုပ်ရ၍ မျှင်ငါးပိဟုခေါ်ဆိုကြသည်။ မျှင်ငါးပိ (ပုစွန်ငါးပိ)၏ အခြေခံကုန်ကြမ်းမှာ စက်တင်ဘာလမှ ဒီဇင်ဘာလအတွင်း ကမ်းခြေအနီးတွင် ဝင်ရောက်ကျက်စားလေ့ရှိသော မျှင်ကောင်လေးများဖြစ်ပါသည်။ မျှင်ကောင်မှရသောဥကို “ဂွေးဥ”ဟုလည်းခေါ်ကြပါသည်။ မျှင်ကောင်လေးများမှာ အကောင်ရေသိန်းသန်းချီပြီး ကမ်းခြေအနီး ရေတိမ်ပိုင်းတွင် အုပ်စုဖွဲ့နေထိုင်လေ့ရှိကြပါသည်။

        အရွယ်အစားမှာ အလွန်သေးငယ်ပြီး အရောင်မှာ အနီရောင်သန်းကာ ပုံသဏ္ဌာန်မှာ ပုစွန်နှင့်တူပြီး ပုန်အငယ်စားလေးဖြစ်ပါသည်။ မျှင်ငါးပိ(ပုစွန်ငါးပိ)ပြုလုပ်ရာ၌ ပထမဦးစွာ ဖမ်းဆီးရမိလာသော မျှင်ကောင်များအား အမှိုက်၊ သဲများနှင့်ရောနှောပါလာတတ်သည့် ငါးငယ်များကို ဖယ်ယူသန့်စင်ရပါသည်။ ထို့နောက် မျှင်ကောင် (ပုစွန်ငယ်)လေးများအား တစ်နေ့လုံး နေရောင်ရနိုင်သည့် ကွင်းပြင်ကျယ်များတွင် သန့်ရှင်းသည့် အကွက်စိပ်ပလတ်စတစ်ပိုက်များခင်းကာ တစ်နေ့တာနေလှန်းပြီးနောက် မျှင်ခြောက်များအား ဒေသရိုးရာလက်ထောင်းဆုံ၊ ခြေနင်းမောင်းဆုံတို့ဖြင့် ရေနည်းငယ်ဆွတ်ဖျန်း၍ ကြေညက်အောင်ထောင်းရပါသည်။ ထိုသို့ထောင်းယူပြီးနောက် အဖဲ့ငယ်များဖဲ့ကာ နေထပ်လှန်းရပါသည်။ ပထမအကြိမ် တစ်ထပ်ထောင်းနေလှန်းပြီးနောက် ဒုတိယအကြိမ်တွင်လည်း ရှေ့နည်းတူ ထပ်ထောင်းရပါသည်။ ထိုသို့ထောင်းပြီးနောက်တွင် နောက်တစ်ကြိမ်ထပ်၍ နေလှန်းပြီးလျှင် ရှေ့နည်းတူထပ်၍ ထောင်းပြီးပါက အသင့်စားသုံးနိုင်သည့် “သုံးထပ်ထောင်းမျှင် ငါးပိမွှေးမွှေးလေး” ကိုရရှိပါသည်။ မျှင်ငါးပိတွင် ရေငွေ့ဓာတ်၊ အသားဓာတ်၊ ထုံးဓာတ်ပါဝင်သောကြောင့် အဟာရဓာတ်မြင့်မားကြောင်းသိရှိရပါသည်။

         ထားဝယ်ဒေသထွက် ထားဝယ်ငါးပိထောင်း၊ ငါးပိသုပ်မှာ နာမည်ကျော်လှပါသည်။ ငါးပိထောင်း၊ ငါးပိသုပ်မှာ ဆီမလိုသောကြောင့် ကျန်းမာရေးလည်းညီညွတ်၊ ချွေတာရာလည်းရောက်ကာ စွဲမက်ဖွယ်အရသာလည်းရှိ၍ လူအများနှစ်ခြိုက်ကြပါသည်။ ငါး၊ ပုစွန်တို့ဖြင့်ပြုလုပ်ထားသောငါးပိကို မြန်မာလူမျိုးများမှာ ငါးပိသုပ်၊ ငါးပိကြော်၊ ငါးပိချက်၊ ငါးပိထောင်း၊ ငါးပိရည်ကျိုပြုလုပ်၍ အတို့အမြှုပ်ဖြင့် စားသုံးရသည်ကိုနှစ်သက်ကြပါသည်။ မြန်မာ့ထမင်းဝိုင်းတွင် ငါးပိသည် မပါမဖြစ်အရေးပါသော ရေထွက်ထုတ်ကုန်တစ်ခုဖြစ်ကာ ထားဝယ်မြို့၌ ငါးပိတစ်ပိဿာလျှင် (၁၂၀၀၀)ကျပ်ရှိကြောင်းသိရှိရပါသည်။

DOCA(တနင်္သာရီ)

                ရှမ်းပြည်နယ်(အရှေ့ပိုင်း)၊ ကျိုင်းတုံမြို့နယ်အတွင်းရှိ မိုင်းခွန်၊ တောင်ပေါ်(၅)အုပ်စု မိုင်းလပ်၊ လွယ်မွေ၊ ပန်ဝိုင်၊ မိုင်းခွန်၊ ကတ်ထိုက် အုပ်စုတို့တွင် မိုးသီးနှံဒေသထွက်ကုန်တစ်မျိုးဖြစ်သော မိုးအစေ့ထုတ်ပြောင်းကို နှစ်စဉ် တောင်ကုန်းတောင်စောင်းများ၌ အများဆုံးစိုက်ပျိုးကြပါသည်။ ကျိုင်းတုံမြို့နယ်အတွင်း၌ စိုက်ပျိုးခဲ့သည့်မိုးအစေ့ထုတ်ပြောင်း ခန့်မှန်းဧက(၄၁၆၉)ဧကစိုက်ပျိုးကြသည်ကို တောင်သူဦးကြီးများထံမှ စုံစမ်းသိရှိရပါသည်။

               ကျိုင်းတုံမြို့နယ်တွင် မိုးအစေ့ထုတ်ပြောင်းသည် ဈေးကွက်ရှိခြင်းကြောင့် တစ်နှစ်ထက်တစ်နှစ် မိုးအစေ့ထုတ်ပြောင်းကို ပိုမိုတိုးချဲ့စိုက်ပျိုးလာကြပါသည်။ မိုးအစေ့ထုတ်ပြောင်းကို နှစ်စဉ်မေ လ ၊ ဇွန်လတို့တွင် စိုက်ပျိုးပြီး အောက်တိုဘာလနှင့် နိုဝင်ဘာလတို့တွင် ခူဆွတ်ကြပါသည်။ ယခုနှစ် ၂၀၂၄ ခုနစ်တွင် မိုးအစေ့ထုတ်ပြောင်း အသစ်ကိုအောက်တိုဘာလ တတိယပတ်တွင် စတင်၍ရောင်းချပြီး မိုးအစေ့ထုတ်ပြောင်း ရောင်းချရသည့်ဈေးနှုန်းမှာ (၅၀)ကီလို တစ်အိတ်လျှင် လက်ကားဈေးနှုန်း (၅၈၀၀၀) ကျပ် ဖြင့်လည်းကောင်း လက်လီဈေးနှုန်းမှာ (၆၀၀၀၀) ကျပ် ဖြင့်လည်းကောင်း ရောင်းဝယ်လျက်ရှိကြောင်းဈေးကွက်အတွင်း ရောင်းဝယ်သူများထံမှ သိရှိရပါသည်။

DOCA(ရှမ်း)

     ဧရာဝတီတိုင်းဒေသကြီး ညောင်တုန်းမြို့နယ်တွင် ငရုတ်အစို၊ ငရုတ်ခြောက် စိုက်ပျိုးလျက်ရှိသည်။ ညောင်တုန်းမြို့နယ်တွင် ငရုတ်စိုက်ဧက (၄၅)ဧကရှိကြောင်း သိရသည်။ ငရုတ်စိုက်ပျိုးထုတ်လုပ် အရောင်းအဝယ်လုပ်ကိုင်သူ လုပ်ငန်းရှင် တစ်ဦးအား ၂၀.၁၁.၂၀၂၄ ရက်နေ့က မေးမြန်းရာ ရန်ကုန်ဈေးကွက်သို့ အောက်တိုဘာလအတွင်း ငရုတ်သီးခြောက် ပိဿာချိန် ၈၇၀၀၀ ထိ တင်ပို့ရောင်းချနိုင်ခဲ့ကြောင်း ပြောပြသည်။  ညောင်တုန်းမြို့နယ်မှ ငရုတ်ခြောက်များကို  စက်တင်ဘာလအတွင်း ငရုတ်သီးခြောက်ပိဿာချိန် ၅၅၀၀၀ ထိသာ တင်ပို့ရောင်းချနိုင်ခဲ့ပြီး၊ အောက်တိုဘာလ တင်ပိုမှုအနေဖြင့်  ငရုတ်သီးခြောက်ပိဿာချိန် ၈၇၀၀၀ ထိ တင်ပို့ရောင်းချနိုင်ခဲ့ကြောင်း ငရုတ်စိုက်ပျိုးထုတ်လုပ်သူ ဦးဌေးဝင်းက ရှင်းလင်းပြောပြ၍ သိရသည်။

    အဆိုပါ ဒေသမှ တင်ပို့ရောင်းချခဲ့သည့် ငရုတ်သီးခြောက်ပိဿာချိန် ၁၀ လျှင် ငွေကျပ် ၈၀၀၀၀ ထိ ပေါက်ဈေးရှိကြောင်း ညောင်တုန်းမြို့နယ်က ထွက်တဲ့ငရုတ်သီးခြောက်တွေက အရည်အသွေးကောင်းပါတယ်။ လက်ရှိငရုတ်သီးခြောက်ပိဿာချိန် ၁၀ လျှင် ငွေကျပ် ၈၀၀၀၀ ထိ ပေါက်ဈေးရှိပါတယ်။ ငရုတ်ဈေးမှာ အရမ်းကြီးအတက်သလို ဈေးလည်းမကျကြောင်း။ ၁ဧက ကုန်ကျစရိတ်အနေဖြင့် ၂၅၀၀၀၀၀ ခန့်ကုန်ကျသော်လည်း၊ ၁ဧက အကျိုးအမြတ်အနေဖြင့် ၁၅၀၀၀၀၀ ခန့် အကျိုးမြတ်ရရှိကြောင်း၊ ၁ဧကအထွက်နှုန်း ၂၃၀၀ကျော် ထွက်ရှိကြောင်း စိုက်ပျိုးထုတ်လုပ်သူမှ ရှင်းလင်းပြောပြသည်။

    ငရုတ်တင်ပို့မှု ဈေးကွက်အနေဖြင့် ရန်ကုန်ဘုရင်နောင် ဈေးကွက်၊ သီရိမင်္ဂလာဈေး၊ တညင်းကုန်းဈေး ရန်ကုန်ငရုတ် ကုန်စည်ဝယ်ယူသူများထံသို့ ချိတ်ဆက်၍  ဝယ်လက်တွေနဲ့ နှစ်စဉ်တင်ပို့ရောင်းချကြောင်း ညောင်တုန်း ငရုတ်အသင်း ဥက္ကဌ ဦးဌေးဝင်းပြောပြချက်အရ သိရသည်။  

DOCA(ဧရာဝတီ)

        မြင်းခွာရွက်ဟုဆိုသည်နှင့် မြန်မာလူမျိုးတိုင်း သိကြမည်ဖြစ်ပါသည်။ မြင်းခွာပင်သည် အပင်ငယ်လေးဖြစ်ပြီး မြေကြီးတွင် ကပ်လျက်ပေါက်ဖွားကာ အဆစ်အမြစ်ကလေးများထွက်လာပြီး ထိုအဆစ်ကလေးများမှ အညွန့်နှာမောင်းထွက်လာပြီး မျိုးဆက်ပွားလေ့ရှိသည်။ ‌နွေ၊ မိုး၊ ဆောင်း သုံးရာသီပတ်လုံး အလေ့ကျပေါက်ပြီး အပွင့်အဖြူရောင်ရှိကာ အစေ့မှာမူ အပြား၊ အလျားလိုက် သေးငယ်သည့်အမြှောင်း ကိုးမြှောင်းပါသည်။ မြင်းခွာပင်တွင် အရိုင်းမျိုး၊ မြင်းခွာရွက်အဖြူမျိုး၊ အနီမျိုးဟူ၍သုံးမျိုးရှိသည်။

          မြင်းခွာရွက်ကိုစားသုံးခြင်းဖြင့် ကောင်းကျိုးသာရရှိမည်ဖြစ်ပြီး ဘေးထွက်ဆိုးကျိုးမရှိသည့်အတွက် သစ္စာရှိတာဝန်သိသိ ကျေးဇူးပြုသောအပင်ဖြစ်ပါသည်။ မြင်းခွာရွက်ကိုစားပေးခြင်းဖြင့် သွေးတိုးရောဂါ၊ အဆုတ်ရောဂါ၊ ချောင်းဆိုးရောဂါ၊ ‌‌ရေငတ်ရောဂါတို့ကိုပျောက်ကင်းစေပြီး အပူငြိမ်းကာ အသက်ရှည်စေပါသည်။ ဆီးနည်း၊ ဆီးကျင်၊ ဆီးအောင့်ရောဂါများအတွက် မြင်းခွာပင်သုံးစည်း/လေးစည်းခန့်ကို ရေစင်အောင်ဆေးပြီး သန့်ပြန့်သည့် ကျောက်ဆုံနှင့်ထောင်း၍ အရည်ညှစ်ယူပြီး သကြားသင့် ယုံထည့်ကာ လက်ဖက်ရည်အကြမ်းတစ်ပန်းကန်ကို ည၊ မနက်သောက်ရမည်ဖြစ်ပါသည်။

          ထားဝယ်မြို့ရှိစျေးများတွင် မြင်းခွာရွက်စျေးသင့်လျက်ရှိပြီး ‌ဒေသဓလေ့အရ ဗန်းထဲတွင် အပုံငယ်များပုံ၍ ရောင်းချလျက်ရှိကာ တစ်ပုံလျှင် (၃၀၀မှ ၅၀၀)ကျပ်ရှိကြောင်းသိရှိရပါသည်။

DOCA(တနင်္သာရီ)