ပြည်တွင်းကုန်သွယ်မှုသတင်း

           စစ်ကိုင်းတိုင်းဒေသကြီး၊ ကန့်ဘလူခရိုင် ကန့်ဘလူမြို့နယ်သည် လယ်ယာစိုက်ပျိုးရေးလုပ် ငန်းများကို အဓိကလုပ်ကိုင်သော ဒေသတစ်ခုဖြစ်ပြီး သီးနှံမျိုးစုံစိုက်ပျိုးလျက်ရှိရာ ဇွန်လ ပထမပတ်ဈေးနှုန်းများကို စုစည်းဖော်ပြလိုက်ပါသည်။

      ၂၀၂၆ ခုနှစ်၊ ဇွန်လ ပထမပတ်အတွင်း ကန့်ဘလူမြို့နယ်၌ ကုလားပဲ(ထိုင်ဝမ်) တစ်တင်းလျှင် ကျပ်(၆၀၀၀၀)၊ (929)တစ်တင်းလျှင် ကျပ်(၆၂၀၀၀)၊ (V2)တစ်တင်းလျှင် ကျပ်(၆၃၀၀)နှင့် (V7)တစ်တင်းလျှင် ကျပ်(၆၂၀၀၀)ဈေးနှုန်းတို့ဖြင့် အရောင်းအဝယ်ဖြစ်လျက်ရှိရာ ယခင်အပတ်၏ ဈေးနှုန်းများနှင့်နှိုင်းယှဉ်ပါက တစ်တင်းလျှင် ကျပ် ၁၀၀၀ ဈေးနှုန်းမြင့်တက်လာကြောင်း သိရသည်။

     ဇွန်လ ပထမပတ်အတွင်း မတ်ပဲရိုးရိုးတစ်တင်းလျှင် ကျပ် ၇၁၀၀၀၊ မတ်ပဲမျက်ကွင်းဖြူ တစ်တင်းလျှင် ကျပ် ၇၃၅၀၀နှုန်းတို့ဖြင့် အရောင်းအဝယ်ဖြစ်လျက်ရှိရာ ယခင်အပတ်ဈေးနှုန်းများနှင့် နှိုင်းယှဉ်ပါက မတ်ပဲတစ်တင်းလျှင် ကျပ် ၅၀၀၀ ဈေးနှုန်းကျဆင်းသွားကြောင်း သိရသည်။

          ပဲစင်းငုံနီတစ်တင်းလျှင် ကျပ် ၈၅၀၀၀၊ ပဲစင်းငုံဖြူတစ်တင်းလျှင် ကျပ် ၇၅၀၀၀နှင့် အောက်စ တစ်တင်းလျှင် ကျပ် ၇၄၅၀၀ဈေးနှုန်းတို့ဖြင့် အရောင်းအဝယ်ဖြစ်လျက်ရှိရာ ယခုပတ်အတွင်း အရောင်းအဝယ်အေး၍ ဈေးနှုန်းတည်ငြိမ်နေကြောင်း သိရသည်။

           ပဲတီစိမ်းရိုးရိုးတစ်တင်းလျှင် ကျပ် ၈၇၀၀၀၊ ပဲတီစိမ်းထွက်တိုးတစ်တင်းလျှင် ကျပ် ၉၀၀၀၀ ဈေးနှုန်းတို့ဖြင့် အရောင်းအဝယ်ဖြစ်လျက်ရှိရာ ယခင်အပတ်ဈေးနှုန်းများနှင့် နှိုင်းယှဉ်ပါက ပဲတီစိမ်း တစ်တင်းလျှင် ကျပ် ၃၀၀၀ ဈေးနှုန်းမြင့်တက်လာကြောင်း သိရသည်။

          စွန်တာနီ(ပဲနီ)တစ်တင်းလျှင် ကျပ် ၉၇၀၀၀၊ အကွဲအနာပါတစ်တင်းလျှင် ကျပ် ၉၆၅၀၀ ဈေးနှုန်းတို့ဖြင့် အရောင်းအဝယ်ဖြစ်လျက်ရှိရာ ယခင်အပတ်ဈေးနှုန်းများနှင့် နှိုင်းယှဉ်ပါက စွန်တာနီ (ပဲနီ)တစ်တင်းလျှင် ကျပ် ၄၀၀၀ ဈေးနှုန်းမြင့်တက်လာကြောင်း သိရသည်။

       ပဲဇီးကွက်တစ်တင်းလျှင် ကျပ် ၈၂၀၀၀၊ အကွဲအနာပါလျှင် ကျပ် ၈၁၅၀၀ ဈေးနှုန်းဖြင့် အရောင်းအဝယ်ဖြစ်လျက်ရှိရာ ယခင်အပတ်ဈေးနှုန်းများနှင့် နှိုင်းယှဉ်ပါက ပဲဇီးကွက် တစ်တင်းလျှင် ကျပ် ၇၀၀၀ ဈေးနှုန်းကျဆင်းသွားကြောင်း သိရသည်။

     ဇွန်လ ပထမပတ်အတွင်း ထောပတ်ပဲတစ်တင်းလျှင် ကျပ် ၁၃၄၀၀၀၊ အကွဲအနာပါတစ်တင်းလျှင် ကျပ် ၁၃၃၅၀၀ဈေးနှုန်းဖြင့် အရောင်းအဝယ်ဖြစ်လျက်ရှိရာ ယခင်အပတ်ဈေးနှုန်းများနှင့် နှိုင်းယှဉ်ပါက ထောပတ်ပဲဖြူတစ်တင်းလျှင် ကျပ် ၁၀၀၀၀ ခန့်ပြန်လည်မြင့်တက်လာကြောင်း သိရသည်။

      ဇွန်လ ပထမပတ်အတွင်း ပဲလွမ်းဖြူတစ်တင်းလျှင် ကျပ် ၉၁၀၀၀၊ အကွဲအနာပါ တစ်တင်းလျှင် ကျပ် ၉၀၅၀၀ ဈေးနှုန်းတို့ဖြင့် အရောင်းအဝယ်ဖြစ်လျက်ရှိရာ ယခင်အပတ်ဈေးနှုန်းများနှင့် နှိုင်းယှဉ်ပါက ပထမပတ်အတွင်း မန္တလေးဈေးကွက်တွင် သီးနှံအဝင်နည်း၍ အဝယ်လိုက်ကာ ပဲလွမ်းဖြူသီးနှံ တစ်တင်းလျှင် ကျပ် ၁၀၀၀၀ ဈေးနှုန်းမြင့်တက်လာကြောင်း ဒေသတွင်း သီးနှံပွဲရုံများထံမှ သတင်းရရှိသည်။

DOCA(စစ်ကိုင်း)

        စစ်ကိုင်းတိုင်းဒေသကြီး၊ ကန့်ဘလူမြို့နယ်သည် စိုက်ပျိုးရေးကို အဓိကအားထားလုပ်ကိုင်သောဒေသဖြစ်ပြီး ပဲစင်းငုံ (Pigeon Pea)သည် တောင်သူများအတွက် မိုးသီးနှံ/ ဆောင်းသီးနှံအဖြစ် အားထားရသည့် အဓိကစီးပွားဖြစ် သီးနှံတစ်မျိုးဖြစ်ပြီး စာရင်းဇယားများအရ ယခင်နှစ်စိုက်ပျိုးရာသီတွင် ဧကတစ်သိန်းကျော် စိုက်ပျိုးခဲ့ကြောင်း၊ ယခုနှစ်တွင်လည်း ပြည့်မီကျော်လွန်အောင် စိုက်ပျိုးနိုင်ရန် ဆောင်ရွက်လျက်ရှိကြောင်း သက်ဆိုင်ရာဌာနများထံမှ သိရသည်။

        ကန့်ဘလူဒေသတွင် ပဲစင်းငုံကို သီးသန့်စိုက်ပျိုးခြင်းထက် သီးညှပ်အဖြစ် စိုက်ပျိုးမှုများပါသည်။ အထူးသဖြင့် မိုးမြေပဲ၊ နှမ်း၊ သို့မဟုတ် နေကြာ စသည့် သီးနှံများနှင့် တွဲဖက်၍ တန်းကြားညှပ် စိုက်ပျိုးကြသည်။ မြေစေးဆန်သောမြေနှင့် နှုန်းမြေများတွင် ဖြစ်ထွန်းမှုကောင်းပြီး ကန့်ဘလူမြို့နယ်၏ ရာသီဥတုနှင့် မြေဆီလွှာသည် ပဲစင်းငုံစိုက်ပျိုးရန် သင့်တော်သည်။ ပျမ်းမျှအားဖြင့် ပဲစင်းငုံ တစ်ဧကလျှင် ၁၅ တင်းမှ တင်း ၂၀ ကြား (စိုက်ပျိုးသည့် မျိုးစေ့၊ ရာသီဥတုနှင့် ပြုစုပျိုးထောင်မှုအပေါ်မူတည်၍) ထွက်ရှိလေ့ရှိသည်။ တန်းညှပ်စိုက်ပျိုးပါက အဓိကသီးနှံအပြင် ပဲစင်းငုံပါ ထပ်ဆောင်းရရှိသဖြင့် မြေအသုံးချမှု ထိရောက်ကြောင်း သိရသည်။

          ပဲစင်းငုံသည် အခြားသီးနှံများနှင့်နှိုင်းယှဉ်ပါက အပင်ပြုစုခြင်းနှင့် သွင်းအားစု (မြေသြဇာ၊ ပိုးသတ်ဆေး) သုံးစွဲရမှု အနည်းငယ်သက်သာသော သီးနှံဖြစ်သည်။ မြေပြင်ခ၊ မျိုးစေ့ဖိုး၊ စိုက်ပျိုးခ၊ ပေါင်းမြက်ရှင်းလင်းခနှင့် ရိတ်သိမ်း/ခြွေလှေ့ခတို့ ဖြစ်သည်။ လက်ရှိသွင်းအားစုနှင့် လုပ်အားခ ဈေးနှုန်းများအရ ပဲစင်းငုံ တစ်ဧက စိုက်ပျိုးထုတ်လုပ်မှု ကုန်ကျစရိတ်မှာ (သီးညှပ်စိုက်ပျိုးခွဲဝေမှု အပေါ်မူတည်၍) ခန့်မှန်းခြေ ကျပ် ၅ သိန်းမှ ၇ သိန်းဝန်းကျင် ရှိနိုင်ကြောင်း သိရသည်။

          ပဲစင်းငုံသည် ပြည်ပပို့ကုန် (အထူးသဖြင့် အိန္ဒိယနိုင်ငံဈေးကွက်) ကို တိုက်ရိုက်မှီခိုနေရသော သီးနှံဖြစ်သဖြင့် အကျိုးအမြတ်သည် ကမ္ဘာ့ဈေးကွက်နှင့် နိုင်ငံခြားငွေလဲလှယ်နှုန်းအပေါ် များစွာမူတည်နေသည်။ ပြီးခဲ့သည့် နှစ်ပိုင်းများမှစ၍ အိန္ဒိယနိုင်ငံ၏ ဝယ်လိုအားမြင့်တက်မှုကြောင့် ပဲစင်းငုံဈေးနှုန်းမှာ သိသိသာသာ မြင့်တက်ခဲ့ပြီး တစ်တင်းလျှင် ကျပ်သိန်းဂဏန်းအထိ စံချိန်တင် ဈေးကောင်းရရှိခဲ့ဖူးသည်။ ပဲစင်းငုံရိတ်သိမ်းပြီးနောက် ကျန်ရှိသော ပဲရိုး/ပဲပင်တိုင်များသည် ကျေးလက်ဒေသတွင် အဖိုးတန် ထင်းစိုက်စရာ (လောင်စာ) အဖြစ်သော်လည်းကောင်း၊ နွားစာအဖြစ်သော်လည်းကောင်း အသုံးဝင်သဖြင့် ကုန်ကျစရိတ်ကို တစ်ဖက်တစ်လမ်းမှ သက်သာစေသည်။

          ပဲစင်းငုံသည် သက်တမ်းရှည်သီးနှံ (၆ လမှ ၈ လခန့်) ဖြစ်သဖြင့် စိုက်ပျိုးချိန်နှင့် ပွင့်ငုံချိန်များတွင် မိုးခေါင်ခြင်း သို့မဟုတ် မိုးရွာသွန်းမှု မမှန်ကန်ပါက အထွက်နှုန်း သိသိသာသာ လျော့ကျတတ်သည်။ သီးတောင့်ဖောက်ပိုးနှင့် ယင်ကောင်အန္တရာယ်ကြောင့် အထွက်နှုန်း ထိခိုက်တတ်သဖြင့် စနစ်တကျ ကာကွယ်နှိမ်နင်းရန် လိုအပ်သည်။ ပြည်ပဝယ်လိုအားနှင့် ပေါ်လစီအပြောင်းအလဲပေါ်မူတည်ပြီး ဈေးနှုန်းအတက်အကျ ကြမ်းတတ်ခြင်းက တောင်သူများအတွက် စွန့်စားရမှုတစ်ခုဖြစ်ကြောင်း သိရသည်။

        ကန့်ဘလူမြို့နယ်တွင် ပဲစင်းငုံစိုက်ပျိုးခြင်းသည် သီးညှပ်စနစ်ဖြင့် စိုက်ပျိုးနိုင်ခြင်း၊ သွင်းအားစု စရိတ်သက်သာခြင်းတို့ကြောင့် စနစ်တကျ ပြုစုပျိုးထောင်ပြီး ဈေးကွက်အဆင်ပြေပါက တောင်သူများအတွက် မိသားစုဝင်ငွေ တိုးပွားစေရုံသာမက ဒေသတွင်း စီးပွားရေးကိုပါ အကျိုးပြုစေသည့် အလားအလာကောင်းသော သီးနှံတစ်ခုဖြစ်ကြောင်း သိရှိရပါသည်။

DOCA(စစ်ကိုင်း)

        တနင်္သာရီတိုင်းဒေသကြီးအတွင်းရှိ ခရိုင်များနှင့်မြို့များတွင် နှစ်ရှည်သီးပင်စားပင်များ စိုက် ပျိုးထားလျက်ရှိရာ ကွမ်းသီးပင်များလည်းစိုက်ပျိုးထားပါသည်။ ကွမ်းသီးပင်များမှ ကွမ်းသီး များကို ထားဝယ်၊ မြိတ်၊ ကော့သောင်းနှင့် ဘုတ်ပြင်းမြို့များမှ အဝယ်ဒိုင်ကြီးများကဝယ်ယူကာ ကွမ်းသီး ခြောက်များကို ရန်ကုန်နှင့် မန္တလေးမြို့များသို့ အများဆုံးတင်ပို့ရောင်းချလျက်ရှိပြီး အခြားပြည်နယ် နှင့်မြို့များသို့လည်း တင်ပို့ရောင်းချလျက်ရှိကြောင်းသိရပါသည်။ ထို့အပြင်  ၎င်းတို့မှတစ်ဆင့် ပြည်ပ နိုင်ငံများသို့  တင်ပို့ရောင်းချလျက်ရှိကြောင်းသိရပါသည်။

       ၂၀၂၆ ခုနှစ်၊ မေလအတွင်း ကွမ်းသီးတင်ပို့မှုမှာ ထားဝယ်ခရိုင်မှ (၁၄၇၀၇၄၀)ပိဿာ တန်အားဖြင့်(၂၄၀၁.၆၃၉)ရှိပြီး၊ မြိတ်ခရိုင်မှ (၇၂၃၈၉၀၀) ပိဿာ တန်အားဖြင့်(၁၁၈၂၀.၇၃၅)ရှိပြီး၊ ကော့သောင်းခရိုင်မှ (၅၉၃၀၀)ပိဿာ တန်အားဖြင့် (၉၆.၈၃၄)နှင့် ဘုတ်ပြင်းခရိုင်မှ (၇၅၇၀၅၀) ပိဿာ တန်အားဖြင့်(၁၂၃၆.၂၂၂)ရှိကြောင်း သိရပါသည်။ ယခုတစ်ပတ်အတွင်း ကွမ်းသီးခြောက် အခြမ်းဈေးနှုန်းမှာ တစ်ပိဿာလျှင် (၈၀၀၀)ကျပ်ရှိပြီး တောင်သူများတွက်ချေ ကိုက်လျက်ရှိ ကြောင်းသိရပါသည်။

DOCA(တနင်္သာရီ)

            ပြည်သူတို့နေ့စဉ်ချက်ပြုတ်စားသောက်ကြရာတွင် ကြက်သွန်နီကို ဟင်းခတ်အမွှေးကြိုင်အဖြစ် အသုံးပြုကြပါသည်။ ကြက်သွန်နီသည် ဟင်းများချက်ပြုတ်ရာတွင် အိမ်ရှင်မများအတွက် မရှိမဖြစ် လိုအပ်သည့်အတွက် အရောင်းသွက်လျက် ရှိနေသည်။ ကြက်သွန်နီကြော်ပြုလုပ်ရာတွင် ကြက်သွန်နီ ပိဿာ(၂၀)ကို ပါးပါးလှီး၍ ရေဆေး၍ စစ်ပြီးပါက ဆီ(၃)ပိဿာ၊ ဆန်မှုန့်(၃)ပိဿာဖြင့် ပြုလုပ်ပါက ကြက်သွန်နီအသင့်စား (၆)ပိဿာ ခန့် ထွက်ရှိကြောင်း တောင်ငူမြို့ အသင့်စားကြက်သွန်နီကြော် ပြုလုပ်ရောင်းချသူ ပိုင်ရှင်၏ ပြောကြားချက်အရ သိရှိရသည်။

            ယခင်နှစ်ကြက်သွန်နီဝယ်ယူရာတွင် ကြက်သွန်နီ(ဂျွန်) ၁ပိဿာလျှင် ၂၀၀၀ ကျပ်မှ ၂၅၀၀ ဝယ်ယူရပြီး အသင့်စား ကြက်သွန်နီကြော်၂၅ ကျပ်သား လျှင် ၃၅၀၀ ကျပ်၊(၁)ပိဿာလျှင် ၁၄၀၀၀ကျပ်ဖြင့် တောင်ငူခရိုင်အတွင်းရှိ အမြို့မြို့အနယ်နယ်သို့ လက်လီ /လက်ကား ဖြုန့်ဖြူး ရောင်းချလျက်ရှိနေသည်။ ဖြန့်ဖြူးရောင်းချရာတွင် တစ်နေ့လျှင် ပိဿာ(၁၀)ခန့် ရောင်းချရကြောင်း၊  ဟင်းချက်ရာတွင် အချိန်ကုန် သက်သာစေပြီး အသုံးပြုရာတွင် လွယ်ကူစေသည့်အတွက် ရောင်းအားကောင်းကြောင်း တောင်ငူမြို့ အသင့်စားကြက်သွန်နီကြော် ပြုလုပ်ရောင်းချသူ၏ ပြောကြားချက်အရ သိရှိရသည်။

DOCA(ပဲခူး)   

    တနင်္သာရီတိုင်းဒေသကြီး၊ မြိတ်ခရိုင်၊ မြိတ်မြို့သည် ပင်လယ်ကမ်းရိုးတန်းဒေသဖြစ်သော ကြောင့် စိုက်ပျိုးရေးထက် ရေလုပ်ငန်းကို ပိုမိုလုပ်ကိုင်ကြပါသည်။ ဒေသစားသုံးရန်လိုအပ်သော ဟင်းသီးဟင်းရွက်မျိုးစုံနှင့် အသီးအနှံများအား ရန်ကုန်မြို့မှကားလမ်းများဖြင့်သယ်ယူ၍ မြို့ပေါ်ရှိ ဈေးကြီး များရပ်ကွက်ဈေးဆိုင်များတွင် ရောင်းချကြပါသည်။ ယခုအခါ ကုန်စိမ်းသီးနှံများဖြစ်သော ရုံးပတေ သီး၊ ဘူးသီး၊ ခရမ်းသီး၊ ကျောက်ဖရုံသီး၊ ကန်စွန်းရွက်၊ ချဥ်ပေါင်ရွက်၊ မုန်ညင်းဖြူ၊ ကိုက်လန်ရွက်၊ ထိုင်ဝမ်မုန်ညင်း စသည်တို့ကို မြိတ်ခရိုင်အတွင်းရှိ မြိတ်၊ ပုလော၊ ကျွန်းစု၊ တနင်္သာရီ မြို့တို့တွင် ယခင်ကထက် စိုက်ပျိုးလာကြောင်းသိရပါသည်။ ထွက်ရှိလာသော ကုန်စိမ်းသီးနှံများကို ဒေသတွင်း ပြန်လည်ဖြန့်ဖြူးရောင်းချကြပါသည်။ ကုန်စိမ်းသီးနှံများထဲမှ ရုံးပတေသီးကို ရာသီမရွေးစိုက်ပျိုးနိုင် သောကြောင့် စိုက်ပျိုးသူများအတွက် တွက်ချေကိုက်သောကြောင့် ပိုမိုစိုက်ပျိုးလာြကပါသည်။ ရုံး ပတေသီးစားသုံးခြင်းဖြင့် အစာအိမ်ရောဂါတွေကောင်းစေသလို အစာအိမ်ထဲကအက်ဆစ်ကို လျော့ချ ပေးလို့ ဗိုက်အောင့်တာသက်သာစေပြီး၊ သွေးနီဥတွေ ထုတ်လုပ်မှုကို လှုံဆော်ပေးတာကြောင့် ခွန်အား ပိုမိုရရှိစေပါသည်။ “ဝမ်းတစ်လုံးကောင်းလျှင် ခေါင်းမခဲဘူး’’ဆိုသလို ဝမ်းကိုမှန်စေပါသည်။ တနေ့ လျှင် ရုံးပတေသီး ၂ တောင့် ၃ တောင့် စားပေးခြင်းဖြင့် ကျန်းမာရေးအကျိုးကျေးဇူးအများကြီးရရှိ စေမှာ ဖြစ်ပါသည်။

          ၂၀၂၆ခု၊ ဇွန်လ ပထမပတ်တွင် မြိတ်မြို့ပေါ်တွင်ရုံးပတေသီး(၁၀)တောင့်လျှင် ၁၀၀၀ ကျပ်ခန့် ရှိပြီး ယခင်မေလပထမအပတ်နှင့်နှိုင်းယှဥ်ပါက စျေးနှုန်းကျဆင်းသွားကြောင်း ကုန်စိမ်းရောင်းချသူ များထံမှ သိရှိရပါသည်။

DOCA(တနင်္သာရီ)