ပြည်တွင်းကုန်သွယ်မှုသတင်း

    စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်တွင် စပါးနှင့်ဆီထွက်သီးနှံများအပြင် ပဲမျိုးစုံကိုလည်းစိုက်ပျိုးကြောင်း၊ ပဲလွန်းဖြူသီးနှံများကို ကံကြီးကုန်းကျေးရွာ၊ တောက္ကရှပ်ကျေးရွာနှင့် အခြားသောကျေးရွာများမှ အများဆုံးထွက်ရှိလျက်ရှိကြောင်း၊  ပဲလွန်းဖြူသီးနှံသည် စိုက်ပျိုးရလွယ်ကူပြီး ဈေးကောင်းရသဖြင့် စိုက်ပျိုးသူများအနေဖြင့် ဝင်ငွေရရှိကာ အဆင်ပြေလျက်ရှိကြောင်း သိရသည်။

    ၂၀၂၅ ခုနှစ်၊ နိုဝင်ဘာလ တတိယပတ်အတွင်း ပဲလွန်းဖြူတစ်တင်းလျှင် ၈၂၀၀၀/-ကျပ်၊ အကွဲအနာပါတစ်တင်းလျှင် ၈၁၅၀၀/-ကျပ်ဈေးနှုန်းဖြင့် အရောင်းအဝယ်ဖြစ်လျက်ရှိရာ ယခု နိုဝင်ဘာလဒုတိယပတ်၏ ဈေးနှုန်းနှင့်နှိုင်းယှဉ်ပါက တတိယပတ်အတွင်း ပဲလွန်းဖြူသီးနှံတစ်တင်းလျှင် ၇၀၀၀/- ကျပ် ဈေးနှုန်းကျဆင်းသွားကြောင်း၊ ပဲလွန်းဖြူသီးနှံများကို မန္တလေးမြို့ရှိ ကုန်စည်ဒိုင်များနှင့်ပွဲရုံများသို့ တင်ပို့လျက်ရှိကြောင်း လုပ်ငန်းရှင်များထံမှ သိရှိရသည်။

DOCA(စစ်ကိုင်း)

            ငါးသည် အာဟာရဓာတ် ကောင်းစွာပါဝင်သော စားသောက်ဖွယ်ရာတစ်မျိုးဖြစ်ပါသည်။ ငါးအများစုသည် ပရိုတင်းဓာတ်ကောင်းစွာပါဝင်၍ ဗီတာမင်၊ သတ္တုဓာတ်များစွာပါဝင်ခြင်း၊ ဗီတာမင်Dနှင့် B2 များစွာပါဝင်ခြင်း၊ သံဓာတ်၊ ဇင့်၊ အိုင်အိုဒင်း၊ မဂ္ဂနီဆီယမ်၊ ပိုတက်ဆီယမ် စသည့် သတ္တုဓာတ်များလည်း ကြွယ်ဝစွာ ပါဝင်ခြင်းတို့ကြောင့် တစ်ပတ်လျှင် (၂)ကြိမ်(၃)ကြိမ် စားသုံးသင့်ပါသည်။ ငါးတွင် ပါဝင်သော အဆီဓာတ်သည် နှလုံးကျန်းမာရေးကို ကောင်းစေခြင်း၊ ငါးကို ပုံမှန်စားသုံးသူများသည် နှလုံးထိခိုက်ခြင်း၊ လေဖြတ်ခြင်း၊ အခြားနှလုံးရောဂါဖြစ်နိုင်ချေ နည်းပါးစေခြင်း၊ ဦးနှောက်နှင့်မျက်စိပိုင်းဆိုင်ရာ ဖွံ့ဖြိုးတိုးတက်ရေးအတွက် အထူးကောင်းမွန်ပါကြောင်း၊ ငါးမှရရှိသော ပရိုတင်းဓာတ် များသည် ကိုယ်ခန္ဓာအစိတ်အပိုင်းများကိုလည်း ဖွံ့ဖြိုးစေရန် အထောက်အကူပြုစေကြောင်း၊ အသက်ကြီးသောအချိန်တွင် ဖြစ်တတ်သော မျက်စိကြွက်သားများ အားနည်းခြင်း ဖြစ်နိုင်ခြေလျော့ချပေးနိုင်ကြောင်း၊ ဗီတာမင်D ကြွယ်ဝသောကြောင့် စိတ်ပိုင်းဆိုင်ရာ၊ ရုပ်ပိုင်းဆိုင်ရာ ကျန်းမာရေးကောင်းမွန်စေနိုင်ကြောင်း သိရှိရသည်။ ့ကြောင့် ယခုလို ဆောင်းရာသီတွင် ပေါများသောငါးများကို နေ့စဉ်စားသုံးသင့်ပါကြောင်းနှင့် ကျန်းမာရေးအကျိုးကျေးဇူးများစွာ ပါဝင်သော ငါးများသည် မြင်းခြံမြို့တွင် မြစ်ငါးမျိုးစုံဝင်ရောက်၍  တီလားဗီးယားငါး (၂၅)ကျပ်သားလျှင် ၂၀၀၀/- မှ ၂၅၀၀/- ကျပ်၊ ငါးဇင်ရိုင်း (၂၅)ကျပ်သားလျှင် ၂၅၀၀/-ကျပ်၊ ငါးဖားမ (၂၅)ကျပ်သားလျှင် ၁၅၀၀/-မှ ၂၀၀၀/-ကျပ် စသည့်ဖြင့် အရောင်းအဝယ်ဖြစ်လျက်ရှိကြောင်း သိရသည်။

DOCA(မန္တ‌လေး)                  

      စစ်ကိုင်းတိုင်းဒေသကြီး၊ ကန့်ဘလူခရိုင် ကန့်ဘလူမြို့နယ်တွင် ဆီထွက်သီးနှံများဖြစ်သည့် မြေပဲ၊ နှမ်း၊ ကြက်ဆူနှင့် နေကြာသီးနှံတို့ကို စိုက်ပျိုးလျက်ရှိကြောင်း၊ ဆီနေကြာစိုက်ပျိုးရာတွင် မိုးနေကြာနှင့် ဆောင်းနေကြာဟူ၍ (၂)မျိုးရှိကြောင်း၊ ကန့်ဘလူမြို့နယ်၌ စိုက်ပျိုးလျက်ရှိသည့် နေကြာမျိုးအနေဖြင့် ဆင်းရွှေကြာ-၂ ကို အများဆုံးစိုက်ပျိုးကြောင်း၊ သွင်းအားစုနှင့် မြေအနေအထားအပေါ်မူတည်၍ နေကြာအထွက်နှုန်း ကွာခြားမှုရှိကြောင်း သိရသည်။

    ၂၀၂၅ ခုနှစ်၊ နိုဝင်ဘာလ တတိယပတ်အတွင်း ဆီနေကြာတစ်တင်းလျှင် ၅၇၀၀၀/- ကျပ်၊ နေကြာညံ့လျှင် ၅၆၅၀၀/- ကျပ်ဈေးနှုန်းတို့ဖြင့် အရောင်းအဝယ်ဖြစ်လျက်ရှိရာ ယခုနိုဝင်ဘာလ ဒုတိယပတ်၏ ဈေးနှုန်းများနှင့်နှိုင်းယှဉ်ပါက တတိယပတ်အတွင်း ဆီနေကြာတစ်တင်းလျှင် ၁၀၀၀/-ကျပ်  ဈေးနှုန်းကျဆင်းသွားကြောင်း၊ ကန့်ဘလူမြို့နယ်တွင် နေကြာသီးနှံကို ဆီကြိတ်၍ ကုန်ချောထုတ်လုပ်ပြီး ပိုလျှံသောနေကြာများကို ရွှေဘိုမြို့နှင့် မန္တလေးမြို့ရှိ  ပွဲရုံများ၊ ကုန်စည်ဒိုင်များသို့တင်ပို့လျက်ရှိကြောင်း ဒေသတွင်းပွဲရုံ လုပ်ငန်းများထံမှ သိရပါသည်။

DOCA(စစ်ကိုင်း)

    စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ် ကန့်ဘလူမြို့ပေါ်နှင့် နတ်ပေးကျေးရွာ၊ နတ်အင်းကျေးရွာရှိ တောင်သူဦးကြီးများသည်  လယ်ယာစိုက်ပျိုးရေးလုပ်ငန်းများအပြင် တစ်ပိုင်တစ်နိုင်ဒေသနွားနှင့် မေထုံနွားများ မွေးမြူ၍  နွားနို့များညှစ်ကာ မိသားစုစားဝတ်နေရေးအဆင်ပြေစေရန်နှင့် အပိုဝင်ငွေရရှိစေရန် ဆောင်ရွက်လုပ်ကိုင်လျက်ရှိကြောင်း သိရသည် ။

     မေထုံနွားမ တစ်ကောင်ကို တစ်နေ့လျှင် နို့ပိဿာ ၇ ပိသာခန့်ထွက်ရှိပြီး ဒေသနွားမတစ်ကောင်က ၃ ပိဿာခန့် ထွက်ရှိကြောင်း၊ ၂၀၂၅ ခုနှစ်၊ နိုဝင်ဘာလ တတိယပတ်တွင်  ဒေသထွက် နွားနို့(၁)လီတာ(၁)ဘူးလျှင် ငွေကျပ် ၁၈၀၀/- မှ ၂၀၀၀/- ကျပ်၊ မေထုံနွားနို့(၁)လီတာ(၁)ဘူးလျှင် ကျပ် ၁၆၀၀/- မှ ၁၈၀၀/- ကျပ်ဈေးနှုန်းတို့ဖြင့် ရောင်းချနေပြီး    လက်ဖက်ရည်ဆိုင်များ၊ နွားနို့ကြိုက်နှစ်သက်သူများက နေ့စဉ်ဝယ်ယူသည့်အတွက် မိသားစုနေ့စဉ်ဝင်ငွေရရှိကာ အဆင်ပြေလျက်ရှိကြောင်း နွားနို့ရောင်းချသူထံမှ သိရှိရပါသည်။

DOCA(စစ်ကိုင်း)

      စစ်ကိုင်းတိုင်းဒေသကြီး ၊ ကန့်ဘလူခရိုင်သည် စိုက်ပျိုးရေးလုပ်ငန်းများကို အဓိကထား လုပ်ကိုင်သောဒေသတစ်ခုဖြစ်ပြီး သီးနှံစိုက်ပျိုးရာတွင် အထွက်နှုန်းများ ပိုမိုကောင်းမွန်စေရန်နှင့် ပန်းတိုင်အထွက်နှုန်းရရှိရေးအတွက် ကန့်ဘလူခရိုင်အတွင်းရှိ  သီးနှံစိုက်ပျိုးသူများက စိုက်ပျိုးရေးသုံးဓာတ်မြေဩဇာနှင့် ပိုးသတ်ဆေးကို ဝယ်ယူအသုံးပြုလျက်ရှိကြောင်း သိရသည်။

          ၂၀၂၅ ခုနှစ်၊ နိုဝင်ဘာလ တတိယပတ်အတွင်း ကန့်ဘလူခရိုင်၏ စိုက်ပျိုးရေးသုံးဓာတ် မြေဩဇာနှင့် ပိုးသတ်ဆေးဈေးနှုန်းများမှာ ပန်းဖူး(50)kg   တစ်အိတ်လျှင် ၁၄၅,၀၀၀/- ကျပ်၊ မြားကမ္ဘာ(50)kg   တစ်အိတ်လျှင် ၁၂၀၀၀၀/- ကျပ်၊ အာမိုမာတီပလပ် ကွန်ပေါင်းဓာတ်မြေဩဇာ(50)  kg  တစ်အိတ်လျှင် ၁၃၀၀၀၀/- ကျပ်၊ ရွှေနဂါးပုလဲသာ (50)kg တစ်အိတ်လျှင် ၁၀၈၀၀၀/-ကျပ်၊ ရွှေတောနစ် (၅၀၀)စီစီ တစ်ဘူးလျှင် ၁၆၀၀၀/-ကျပ်၊ မိုရယ်လ်မုန်း အမြစ်ပွား၊ အသီးတင်၊ အပင်သန် ဟော်မုန်း ဆေး(၅၀၀)စီစီတစ်ဘူးလျှင် ၄၅၀၀၀/-ကျပ်ဈေးနှုန်းဖြင့် အရောင်းအဝယ်ဖြစ်လျက်ရှိကြောင်း၊ ဓာတ်မြေဩဇာနှင့်ပိုးသတ်ဆေး ရောင်းချသည့်ဆိုင်များထံမှ သိရှိရသည်။

DOCA(စစ်ကိုင်း)