၂၁-၆-၂၀၂၄ ရက်နေ့တွင် တိုင်းဒေသကြီး/ ပြည်နယ်များ၏ စပါးဆန်ဈေးနှုန်းများအား ယခင်နှစ်၊ ယခင်လ၊ ယနေ့ ကာလတူနှိုင်းယှဉ်ချက်အား အောက်ပါ .pdf တွင် ဝင်ရောက်ကြည့်ရှုနိုင်ပါသည်-
ရန်ကုန်တိုင်းဒေသကြီး၊ တောင်ပိုင်းခရိုင်၊ သန်လျင်မြို့နယ်ရှိ သီလဝါစက်မှုဇုန်၊ Wilmar ဆီကန်မှတစ်ဆင့် ရန်ကုန်တိုင်းဒေသကြီးအတွင်းရှိ မြို့နယ်များနှင့် အခြားတိုင်းဒေသကြီး/ ပြည်နယ်များရှိ ကိုယ်စားလှယ်များသို့ စားအုန်းဆီ နေ့စဉ်ထုတ်ပေးလျက်ရှိပါသည်။ စားအုန်းဆီအား ပြည်တွင်းဈေးကွက်၌ ရောင်းဝယ်ဖောက်ကားရာတွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားအုန်းဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီ၏ အပတ်စဉ်ထုတ်ပြန်ထားသော အခြေခံလက်ကားရည်ညွှန်းဈေးနှုန်းအပေါ် လက်ကားပြန်လည်ဖြန့်ဖြူးရောင်းချသူများအနေဖြင့် ဒေသအရောက်ဈေးနှုန်းများအပေါ် (၂)ရာခိုင်နှုန်းအမြတ်ထက်မပိုသောဈေးနှုန်းဖြင့် ဈေးကွက်အတွင်းသို့ ပြန်လည်ဖြန့်ဖြူးရောင်းချစေရေးနှင့် ဈေးနှုန်းအဆမတန်မြှင့်တင်ရောင်းချခြင်းများမပြုလုပ်စေရေးတို့အတွက်လည်း ဝန်ထမ်းများက ကွင်းဆင်းကြပ်မတ်ဆောင်ရွက်လျက်ရှိကြောင်းနှင့် (၁၀-၆-၂၀၂၄)ရက်နေ့မှ (၁၇-၆-၂၀၂၄)ရက်နေ့အထိ ဆီကုမ္ပဏီ(၁၈)ခုနှင့် စားအုန်းဆီ တန်ချိန် (၃၆၁၆.၆၆၂)တန်ထုတ်ပေးခဲ့ကြောင်းသိရှိရပါသည်။
DOCA(ရန်ကုန်)
၂၁.၆.၂၀၂၄ ရက်နေ့တွင် တိုင်းဒေသကြီးနှင့်ပြည်နယ် မြို့နယ်အလိုက် ဆန်၊ ဆီ၊ မီးဖိုချောင်သုံးပစ္စည်းများ၊ သားငါး၊ စက်သုံးဆီ၊ ရွှေ၊ ဒေါ်လာ ဈေးနှုန်းများအား အောက်ပါ .pdf တွင် ဝင်ရောက်ကြည့်ရှုနိုင်ပါသည်-
၁၉-၆-၂၀၂၄ရက်နေ့တွင်စားသုံးသူရေးရာဦးစီးဌာန၊ကလောခရိုင်ဦးစီးမှူးရုံးမှ ဦးဝင်းလှိုင်ဦး (ရုံးအုပ်)သည် “ရွှေကဲ” အမှတ်တံဆိပ်အသင့်စားအာလူးကြော်ထုတ်လုပ်သည့်လုပ်ငန်းရှင်နှင့်တွေ့ ဆုံခဲ့ပါသည်။
ထိုသို့တွေ့ဆုံရာတွင် ဦးဝင်းလှိုင်ဦး(ရုံးအုပ်) မှလုပ်ငန်းရှင်အား ၎င်း၏ထုတ်ကုန်ပစ္စည်းပေါ် တွင် ဖော်ပြရမည့်အမျိုးအမည်၊ အရွယ်အစား၊ သုံးစွဲပုံနည်းလမ်း၊ ထားသိုသိမ်းဆည်းမှုအညွှန်း၊ ဓာတ်မတည့်ကြောင်းဖော်ပြချက်များကို မြန်မာနိုင်ငံစားသုံးသူကာကွယ်ရေးဥပဒေနှင့်အညီ ဖော်ပြရမည့်အပြင် အမှတ်တံဆိပ်၊ ပါဝင်ပစ္စည်း၊ နေရပ်လိပ်စာ၊ ဖုန်းနံပါတ်တို့ကိုလည်းပြည့်စုံစွာဖော်ပြပေးရန်လိုအပ်ကြောင်း ဆွေးနွေးခဲ့သည်။
အာလူးကြော်ကိုအချိုနှင့်အစပ်(၂) မျိုးထုတ်လုပ်ပြီးအစပ်ကိုပို၍ လူကြိုက်များကြောင်း သိရပါသည်။ အားလူးကြော်တစ်ထုပ်လျှင် အလေးချိန် (၅) ကျပ်သားခန့်ရှိပြီး ဈေးကွက်တွင် (၁၅၀၀) ကျပ်ဖြင့်ရောင်းချဖြန့်ဖြူး၍ တစ်ထုပ်ကို (၁၄၀၀) ကျပ်ဖြင့် ဖောက်သည်ဈေးကို လက်ကားပေးကြောင်း သိရှိခဲ့ရပါသည်။
ယခုအခါကုန်ဈေးနှုန်းမြင့်တက်ခြင်း ၊ အားလူးအဟောင်းပြတ်၍ အသစ်ဝင်မှုနည်းပါးသဖြင့် အာလူးဈေးနှုန်းမြင့်တက်လာပြီး အလှူမင်္ဂလာများတွင်သာ အဓိကထားရောင်းရပါကြောင်းလေ့လာ မေးမြန်း၍ သိရှိရပါသည်။
DOCA(ရှမ်း)
မွန်ပြည်နယ်၊ မုဒုံမြို့နယ်ရှိ အသေးစားစက်မှုလက်မှုလုပ်ငန်းဦးစီးဌာန၊ ရက်ကန်းနှင့် အသက်မွေးပညာသင်တန်းကျောင်း၌ လက်ရက်ကန်း (၆)လသင်တန်း ဒုတိယအကြိမ်ကို ဇူလိုင် ၁ရက်နေ့တွင် စတင်ဖွင့်လှစ်မည်ဖြစ်ကြောင်းသိရှိရပါသည်။
သဘာဝဆိုးဆေးကိုအခြေခံ၍ အဝတ်အထည်အသုံးအဆောင်ပစ္စည်းများအား တန်ဖိုးမြှင့်ထုတ်ကုန်အဖြစ် ထုတ်လုပ်နိုင်စေရန်၊ ရက်ကန်းပညာရပ်များ တိမ်ကောပပျောက်မှုမရှိစေရေး၊ ဒေသတွင်း အသေးစား၊ အလတ်စား (MSMEs) လုပ်ငန်းများဖွံ့ဖြိုးတိုးတက်စေရေးနှင့် ရက်ကန်းလုပ်ငန်းများ ကျွမ်းကျင်စွာတတ်မြောက်၍ ကျေးလက်နေပြည်သူများ အလုပ်အကိုင်အခွင့်လမ်းရရှိစေပြီး တစ်နိုင်တစ်ပိုင်စီးပွားရေးလုပ်ငန်းတိုးပွားလာစေရန်၊ ယင်းလုပ်ငန်းများအတွက် လိုအပ်သောနည်းပညာအထောက်အပံ့များ ဆောင်ရွက်ပေးနိုင်ရေးအတွက် လက်ရက်ကန်းသင်တန်းကို တစ်နှစ်လျှင် နှစ်ကြိမ် ဖွင့်လှစ်ပေးလျက်ရှိကြောင်း ကျောင်းအုပ်ဆရာမကြီး ဒေါ်မြတ်ဇာခြည်ကျော်က ပြောကြားခဲ့သည်။
ဇူလိုင်လ ၁ရက်နေ့မှ ဒီဇင်ဘာလ ၃၁ရက်နေ့အထိ လက်ရက်ကန်းပညာရပ်များကို သင်ကြားပေးသွားမည်ဖြစ်ရာ တက်ရောက်သူများအတွက် ကျောင်းတွင် နေထိုင်စားသောက်ရေးများစီစဥ်ထားကြောင်း၊ သင်တန်းသူတစ်ဦးလျှင် လစဥ် ငွေကျပ်၃၀၀၀၀ထောက်ပံ့ပေးသွားမည်ဖြစ်ပြီး (၁၀) ဦးလက်ခံသွားမည်ဖြစ်ကြောင်းသိရှိရပါသည်။
DOCA(မွန်)
ယခုကဲ့သို့မိုးဦးကာလတွင် ရာသီစာဖြစ်သောအင်ဥလေးများစတင်ပေါ်ထွက်နေပြီဖြစ်ပြီး အင်ဥသည်အင်ပင်များ၏အောက်တွင် အင်ပင်အမြစ်နှင့်ဆက်စပ်နေသောမှိုတစ်မျိုးဖြစ်ကြောင်း သိရပါသည်။ မိုးဦးကျကာလတွင် မိုးလေးကျလိုက်နေရောင်လေးကျလိုက်ဖြစ်ရာမှ အင်ရွက်တွေမြေဆွေး တွေကနေဖြစ်ပေါ်လာသော သဘာဝမြေအောင်းမှိုတစ်မျိုးဖြစ်ပါသည်။ အင်ဥသည် အိန္ဒိယ၊ မြန်မာ၊ ထိုင်းနှင့် အရှေ့တောင်အာရှဒေသတွင်း နိုင်ငံအချို့၌ပေါက်ရောက်ကြသည်။ မြန်မာနိုင်ငံတွင် ပဲခူး ရိုးမတကြော အင်တိုင်းမြေများတွင် မိုးဦးကာလ မေနှင့်ဇွန်လများတွင် အင်ဥများကိုပေါများစွာတွေ့ ရကြောင်း သိရပါသည်။
အင်ဥတူးသူများမှ မြေကြီးထဲရှိ အင်ဥများကိုဝါးပြားနှင့်ကလော်ယူကြပြီး ရရှိလာသော အင်ဥများကိုစုဆောင်း၍ နှစ်နာရီခန့်ကြာအောင် ရေစိမ်ထားပြီးမှ ဆေးကြောလျှင် ပိုမိုလွယ်ကူ ကြောင်းနှင့် တူး၍ရရှိလာသော အင်ဥကို နေ့မကူးခင်ချက်ပြုတ်စားသုံးရပြီး နေ့ကူးသွားပါက ရင့်သွား၍ စားမကောင်းကြောင်းသိရှိရပါသည်။ အင်ဥကို သူ့အတိုင်း ငရုတ်သီးစိမ်း၊ ကြက်သွန်နီတို့နဲ့ ခပ်စပ်စပ်လေး ကြော်စားလို့ရသလို့ ကြက်သွန်နီ၊ ငရုတ်သီးစိမ်း၊ သံပုရာသီးတို့နဲ့ သုပ်စားတာ၊ ကန်စွန်းရွက်နဲ့ ကြော်စားခြင်းနှင့် ဟင်းရည်ချက်သောက်တာမျိုးလည်း စားလေ့ရှိကြောင်း သိရှိရပါသည်။
အင်ဥစားသုံးခြင်းကြောင့် ကျန်းမာရေးအတွက်အကျိုးကျေးဇူးများစွာရရှိစေပြီး စားသုံးသူ ပေါများလာသည့်အတွက် စားသောက်ဆိုင်များမှဝယ်ယူမှုများပြားလာခြင်းကြောင့် ဈေးကွက်အတွင်း အရောင်းဝယ်ဖြစ်နေကြောင်းနှင့် မိုးဦပေါ်စတွင် အင်ဥနို့ဆီဗူးတစ်ဗူးလျှင် (၂၅၀၀) ကျပ်မှ (၃၀၀၀) ကျပ်အထိ ဈေးရှိကြောင်း သိရှိရပါသည်။
DOCA(ရှမ်း)
နယ်စပ်ရေးရာဝန်ကြီးဌာန၊ ပညာရေးနှင့်လေ့ကျင့်ရေးဦးစီးဌာန၊ အမျိုးသမီးအိမ်တွင်းမှုသက်မွေးလုပ်ငန်းပညာသင်တန်းကျောင်း (မုဒုံ)တွင် အဆင့်မြင့်အိမ်တွင်းမှုစက်ချုပ်သင်တန်းနှင့် မွန်ရိုးရာလက်ရက်ကန်းများသင်ကြားပေးလျက်ရှိသည်။
တိုင်းရင်းသားဒေသခံလူငယ်များ အလုပ်အကိုင်အခွင့်အလမ်းရရှိစေပြီး ကိုယ်ပိုင်စီးပွားရေးလုပ်ငန်းများထူထောင်နိုင်စေရန်၊ MSMEs လုပ်ငန်းများဖွံ့ဖြိုးတိုးတက်စေရေးအတွက် သင်တန်းသူများအနေဖြင့် မိမိဒေသသို့ ပြန်လည်ရောက်ရှိပါက တတ်မြောက်ကျွမ်းကျင်ထားသည့် ပညာရပ်များကိုအသုံးချကာ တစ်နိုင်တစ်ပိုင်အသက်မွေးဝမ်းကျောင်းပြုနိုင်၍ ဒေသဖွံ့ဖြိုးတိုးတက်ရေးလုပ်ငန်းများတွင် ပူးပေါင်းပါဝင် ဆောင်ရွက်နိုင်ရန် သင်တန်းများဖွင့်လှစ်သင်ကြားပေးလျက်ရှိကြောင်း ကျောင်းအုပ်ဆရာမကြီး ဒေါ်ညိုညိုရှိန်ကပြောကြားခဲ့သည်။
အဆိုပါသင်တန်းကျောင်းတွင် အဆင့်မြင့်အိမ်တွင်းမှုစက်ချုပ်၊ လက်ရက်ကန်း၊ ကြိမ်/ ဝါး လက်မှုပညာရပ်များအပြင် ဟင်းလျာသင်တန်းများကို နှစ်စဥ်ဖွင့်လှစ်သင်ကြားပေးလျက်ရှိပြီး ၎င်းသင်တန်းသို့ သင်တန်းသူ (၃၀) ဦးတတ်ရောက်လျက်ရှိကြောင်းသိရှိရပါသည်။
DOCA(မွန်)
မွန်ပြည်နယ်၊ ဘီးလင်းမြို့နယ်တွင် မြန်မာနိုင်ငံဆီကုန်သည်နှင့် ဆီလုပ်ငန်းရှင်များအသင်း၏ အစီအစဉ်ဖြင့် (Kaung Hlyan New Asia Co.ltd) မှ ပြည်သူများထံ သက်သာသောဈေးနှုန်းဖြင့် စားအုန်းဆီများကို ကန်သာယာရပ်ကွက်နှင့် ရန်ကုန်-မော်လမြိုင် အဝေးပြေးလမ်းမကြီးဘေး၌ ရောင်းချပေးခဲ့ကြောင်းသိရှိရသည်။
ထိုသို့ရောင်းချပေးရာတွင် တစ်ပိဿာလျှင် (၅၉၆၀) ကျပ်ဖြင့် လူတစ်ဦးလျှင် ဆီတစ်ပိဿာနှုန်းရောင်းချပေးရာ စားသုံးသူပြည်သူများက အေးချမ်းပျော်ရွှင်စွာလာရောက်ဝယ်ယူခဲ့ကြပြီး စားအုန်းဆီများအား သတ်မှတ်ရည်ညွှန်းစျေးအတိုင်း ရောင်းချခြင်းရှိ/မရှိ မြို့နယ်ရဲတပ်ဖွဲ့မှူး မင်းတင်ဦးဆောင်သော ကွင်းဆင်းစစ်ဆေးရေးအဖွဲ့နှင့် စားသုံးသူရေးရာဦးစီးဌာနမှတာဝန်ရှိသူများ၊ ဌာနဆိုင်ရာများက လိုအပ်သည်များ ကူညီဆောင်ရွက်ပေးခဲ့ကြသည်။
အဆိုပါနေ့တွင် စားသုံးသူပြည်သူတို့အား ဆီပိဿာချိန် (၁၉၈၀) ရောင်းချပေးခဲ့ကြောင်း၊ ပြည်သူများအနေဖြင့် အခြေခံစားသောက်ကုန်များအား သက်သာသောဈေးနှုန်းဖြင့် အဆင်ပြေစွာအလွယ်တကူ ဝယ်ယူစားသုံးနိုင်ပြီး ကုန်ဈေးနှုန်းတည်ငြိမ်နိုင်ရေးရည်ရွယ်ကာ ယခုကဲ့သို့ စီစဉ်ရောင်းချပေးခြင်းဖြစ်ကြောင်းသိရှိရပါသည်။
DOCA(မွန်)
မန္တလေးမှလားရှိုးသို့ လက်ရှိကုန်စည်သယ်ယူပို့ဆောင်လျက်ရှိသော လမ်းကြောင်းများမှာ မန္တလေး -သာစည်-ကလော-အောင်ပန်း-ရပ်စောက်-ကျောက်ဂူ-နမ့်လန်- ကုန်းမုံ - မိုင်းရယ်-လားရှိုး လမ်းကြောင်း၊ မန္တလေး- ပြင်ဦးလွင်- နောင်ချို- ကျောက်ဂူ- နမ့်လန်- ကုန်းမုံ- မိုင်းရယ်- လားရှိုးလမ်းကြောင်းတို့ဖြစ်ပြီး ကုန်စည် သယ်ယူစရိတ်မှာ ကုန်ကျစ် တစ်ပိဿာလျှင် (၄၀၀) ကျပ်နှင့် ကုန်ပွ တစ်ပိဿာ လျှင် (၄၅၀) ကျပ်နှုန်းဖြစ်ကြောင်း သိရသည်။
ယခင်ရှမ်းပြည်နယ်(မြောက်ပိုင်း)အတွင်း တိုက်ပွဲများမဖြစ်ပွားခင်ကာလ (၂၀၂၃ခုနှစ်၊ အောက်တိုဘာလ)တွင် ပြည်ထောင်စုလမ်းမကြီးအတိုင်း ကုန်စည်များသယ်ယူပို့ဆောင်ရာ မန္တလေး - လားရှိုး ကုန်စည်သယ်ယူစရိတ်အနေဖြင့် ကုန်ကျစ်တစ်ပိဿာလျှင် (၇၀) ကျပ်နှင့် ကုန်ပွတစ်ပိဿာလျှင် (၁၂၀) ကျပ်နှုန်းဖြစ်ကြောင်း တွေ့ရှိရသဖြင့် လမ်းတံတားများ ပျက်စီးပြီးနောက်ပိုင်းတွင် ကုန်ကျစ်/ ကုန်ပွ တစ်ပိဿာလျှင် (၃၃၀) ကျပ်ခန့် ဈေးမြင့်တက်ခဲ့ကြောင်းနှင့် သယ်ယူစရိတ်မြင့်မားလာမှုကြောင့် အခြေခံစားသောက်ကုန်များလည်း ဈေးနှုန်းမြင့်တက်လာကြောင်းသိရှိရပါသည်။
နယ်မြေအေးချမ်းပြီး မန္တလေး - လားရှိုး ပြည်ထောင်စုလမ်းမကြီးပေါ်ရှိ လမ်း/ တံတားများ ပြန်လည်ကောင်းမွန်စွာ အသုံးပြုနိုင်မည်ဆိုပါက သယ်ယူစရိတ်ကျဆင်းပြီး ကုန်ဈေးနှုန်းများလည်း ပြန်လည်ကျဆင်းလာနိုင်မည်ဖြစ်ပါကြောင်း ဒေသခံပြည်သူများထံမှ သိရှိခဲ့ရပါသည်။
DOCA(ရှမ်း)
မွန်ပြည်နယ်၊ ကျိုက်မရောမြို့နယ်အတွင်းရှိ ဒေသခံပြည်သူများအား သက်သာသောစျေးနှုန်းဖြင့် စားသုံးဆီများဖြန့်ဖြူးရောင်းချပေးခြင်းကို ၁၈-၆-၂၀၂၄ ရက်နေ့၊ နံနက်ပိုင်းတွင် ကျိုက်မရောမြို့မစျေးကြီး၌ ဆောင်ရွက်ပေးခဲ့ကြောင်းသိရသည်။
ဒေသခံပြည်သူများအား စားသုံးဆီများရောင်းချပေးရာတွင် တစ်ပိသာလျှင် ၆၀၀၀ကျပ်ဖြင့် လူတစ်ဦးလျှင် တစ်ပိသာစီဖြန့်ဖြူးပေးလျက်ရှိရာ ဒေသခံပြည်သူများ အဆင်ပြေလွယ်ကူစွာဝယ်ယူနိုင်ရေးအတွက် မြို့နယ်စည်ပင်သာယာရေးအဖွဲ့တာဝန်ရှိသူများနှင့်အတူ စားသုံးသူရေးရာဦးစီးဌာနက အနီးကပ်ကြီးကြပ်၍ စနစ်တကျဖြန့်ဖြူးပေးလျက်ရှိကြောင်းသိရသည်။ အဆိုပါစားသုံးဆီများကို တစ်ပိဿာလျှင် ၆၀၀၀ကျပ်နှုန်းဖြင့် အပတ်စဥ် အင်္ဂါနေ့တိုင်းရောင်းချပေးမည်ဖြစ်ကြောင်း မြို့နယ်ကုန်စျေးနှုန်းတည်ငြိမ်ရေးအဖွဲ့ တာဝန်ရှိသူထံမှသိရှိရပါသည်။
DOCA(မွန်)
