ပြည်တွင်းကုန်သွယ်မှုသတင်း

  ခဝဲသီးသည် ဘူး၊ ဖရုံအမျိုးအစားတွင် ပါဝင်ပါသည်။ နှစ်ပတ်လည်စိုက်ပျိုး၍ ရနိုင်ပါသည်။ နွယ်ပင်အမျိုးအစားဖြစ်ပါသည်။ လတ်ဆတ်နေချိန်တွင် ခဝဲသီး၏အရောင်မှာ အစိမ်းရင့်ရောင် ဖြစ်ပါ သည်။ အသီး၏ဘေးပတ်လည်တွင် စောင်း (သို့) မြောင်းကလေးများပါရှိပါသည်။

          ခဝဲပင်၏ အပွင့်မှာ အဝါရောင်ရှိပါသည်။ ခဝဲသီးပင်များသည် နှစ်စဉ်တန်ဆောင်မုန်းလတွင် အသီး များလှိုင်လှိုင်ရရှိပါသည်။ ခဝဲပင်မှာ အပုမျိုးနှင့် အရှည်မျိုးဟူ၍ (၂) မျိုးရှိပါသည်။ အပုမျိုးမှာ အလုံးအပု လေးများဖြစ်ပြီး အရှည်မျိုးမှာ တစ်ပေခန့် ရှည်ပါသည်။

          ခဝဲပင်များအား မိုးရာသီ ဇွန်၊ ဇူလိုင်နှင့် ဩဂုတ်လများတွင် အစိုက်များပါသည်။ စက်တင်ဘာလ နှင့် အောက်တိုဘာလများတွင် ခူးဆွတ်ရပါသည်။ ခဝဲပင်များအား စင်ထုးပြီးစိုက်ပျိုးခြင်း၊ ဝါးတန်းထိုး စနစ် စသဖြင့် စိုက်ပျိုးကြပါသည်။ ခဝဲပင်များအား အစေ့ချစနစ်ဖြင့် စိုက်ပျိုးကြပါသည်။ ခဝဲပင်မှ စိုက်ပျိုးပြီး ၁လခွဲ ၂လအကြာတွင် အသီးများခူးဆွတ်ပြီး ဈေးကွက်အတွင်း ရောင်းချ၍ ရပါသည်။

          ဈေးကွက်အတွင်း ရောင်းချရာတွင် ဟင်းသီးဟင်းရွက်ဒိုင်များမှ အခင်းပြတ်ဝယ်ယူပြီး ရန်ကုန်မြို့ရှိ သီရိမင်္ဂလာဈေးသို့ ပီနံအိတ်များအတွင်းထည့်ပြီး ကုန်တင်ကားများဖြင့် တင်ပို့ကြောင်း သိရှိရပါသည်။ ဈေးကွက်အတွင်း ရောင်းချနေသည့် ခဝဲသီးဈေးမှာ အတောင့်အပုများအား ၁၀တောင့်ပါတစ်စည်းလျှင် ၅၀၀ ကျော်၊ အတောင့်ရှည်အသီးတစ်တောင့်လျှင် ၅၀၀ ကျပ်နှုန်းဖြင့် ဈေးကွက်အတွင်း အရောင်းဝယ် ဖြစ်နေပါသည်။

DOCA(ပဲခူး)

  ပြည်ကုန်စည်ဒိုင်တွင် ပဲမျိုးစုံရောင်းဝယ်လျက်ရှိပြီး မတ်ပဲ၊ ပဲစဉ်းငုံ၊ ကုလားပဲ၊ ပဲကြီး၊ စားတော်ပဲ သီးနှံများအရောင်းအဝယ်ဖြစ်လျက်ရှိပါသည်။

          အောက်တိုဘာ ဒုတိယပတ်တွင် မတ်ပဲတစ်တင်းကို ကျပ် (၉၀၀၀၀ - ၉၀၅၀၀) ဈေးဖြင့် ရန်ကုန် အဝယ်တစ်ရက်ကိုအိတ် (၂၅၀) ခန့် အဝယ်ရှိပါသည်။ အောက်တိုဘာ ဒုတိယပတ်တွင် ပဲစဉ်းငုံ တစ်တင်းကို ကျပ် (၈၀၀၀၀) ကျပ်ဖြင့် ဈေးကျနေခဲ့ပြီး အရောင်းအဝယ်မှာ တစ်ခါတစ်ရံ မှသာဖြစ်ပြီး အဝယ် ဖြစ်လျှင်အိတ် (၂၀၀) ခန့် အရောင်းအဝယ်ရှိပါသည်။ ကုလားပဲ (HL) တစ်တင်း ကို (၈၆၀၀၀) ကျပ်၊ မြကြေးမှုံတစ်တင်းကို ကျပ် (၉၃၀၀၀) ကျပ်ဖြင့် မြို့တွင်းခွဲစက်သမားများ တစ်ရက်ကိုအိတ် (၃၀၀) ခန့် အဝယ်ရှိပါသည်။

          အောက်တိုဘာ ဒုတိယပတ်တွင် ပဲကြီး (ရွှေကျွန်း) တစ်တင်းကို (၁၂၀၀၀၀) ကျပ်၊ ပဲကြီး (ကုန်းပဲ) တစ်တင်းကို (၁၀၀၀၀၀) ကျပ်ဖြင့် ဈေးအေးနေပြီး တစ်ရက်ကို အိတ် (၃၀၀) ခန့် မြို့တွင်း ပဲကြော်သမား များ အဝယ်ရှိပါသည်။

          အောက်တိုဘာ ဒုတိယပတ်တွင် စားတော်ပဲကျွန်း တစ်တင်းကို (၂၃၀၀၀၀) ကျပ်ဖြင့် စားတော်ပဲ (ကျွန်း) ဈေးမြင့်နေပြီး မြို့တွင်းအဝယ်တစ်ရက်ကို အိတ် (၂၀ - ၂၅) ခန့်သာ အဝယ်ရှိပါ သည်။

          ပြည်ကုန်စည်ဒိုင်တွင် ပဲအရောင်းအဝယ်မှာ သွက်လျှက်ရှိပြီး တစ်ချို့ပဲများမှာ လက်ကျန် နည်းလျက်ရှိပါသည်။

DOCA(ပဲခူး)

   မြန်မာတို့၏ ဆယ့်နှစ်လရာသီပွဲတော်များတွင် သီတင်းကျွတ်မီးထွန်းပူဇော်ပွဲသည် အစည်း ကားဆုံးဖြစ်သည်။ ဘုရား၊ စေတီ၊ ပုထိုးကျောင်းကန်များ၊ လမ်းများ၊ အိမ်များတါင် ဆီမီးထွန်းညှိ ပူဇော်ကြပါသည်။ ခေတ်ကာလ တဖြည်းဖြည်းရွေ့လျောလာသောအခါ မီးထွန်းပွဲတော်များကို ပုံသဏ္ဌာန်အမျိုးမျိုးဖြင့် ပြောင်းလဲကျင်းပလာကြပါသည်။ သီတင်းကျွတ်အခါသမယမှာ ဆီးမီး မြိုင်မြိုင်ပူဇော်နိုင်ဖို့ ရောင်တော်စဉ်နဲ့ ထွန်းညှိဖို့ အထွန်းခံဖယောင်းတိုင် ကုန်ကြမ်းဈေးလေး အနည်းငယ်တက်သွားသည့်အတွက် ဖယောင်းတိုင် ဈေးလေးပါ အနည်းငယ်တက်သွားပေမဲ့ လူသုံး ကုန် ဈေးကွက်အတွင်း ဖယောင်းတိုင်များ ဈေးကောင်းနေပြီး ထုတ်လုပ်သည့်လုပ်ငန်းရှင်များလည်း ရောင်းအားတက်နေကြောင်း ဖယောင်းတိုင်လုပ်ငန်းလုပ်ငန်းရှင်များနှင့် ကုန်မျိုးစုံပစ္စည်းအရောင်း ဆိုင်ပိုင်ရှင်များထံမှ သိရှိရပါသည်။ ရောင်စုံဖယောင်းတိုင်အသေးတစ်ထုပ်လျှင် ယခင်က ကျပ် (၇၅၀) မှ ယခင် သီတင်းကျွတ် ကာလတွင် ရောင်စုံဖယောင်းတိုင် အသေးတစ်ထုပ်လျှင် ကျပ် (၉၀၀) ၊ အနီရောင်သတ်သတ်၊ အဝါရောင်သတ်၊ အဖြူရောင်သတ်သတ်၊ ရွှေရောင်၊ ငွေရောင်၊ အစိမ်းရောင်သတ်သတ်ချည်းပါသည့် (၂၁) ချောင်းပါ ဖယောင်းတိုင် တစ်ထုတ်လျှင် ကျပ် (၁၂၀၀)၊ ဓါတုဖယောင်းတိုင် အလတ် အချောင်း(၅၀) ပါတစ်ထုတ်လျှင် ကျပ် (၃၅၀၀)၊ ငါးချောင်းပါ ဖယောင်းတိုင်အလတ်အမျိုး အစားတစ်ထုတ်လျှင် ကျပ် (၁၅၀၀)၊ ငါးချောင်းပါ ဖယောင်းတိုင်အကြီး တစ်ထုတ်လျှင် ကျပ် (၂၅၀၀)၊ အလှရောင်စုံဖယောင်းတိုင်များမှာ ဒီဇိုင်းကိုလိုက်ပြီး အကြီး အသေး ဆိုဒ်ပေါ်မူတည်၍ အနည်းဈေးမှာ တစ်တိုင်လျှင် ကျပ် (၁၀၀၀) မှ ကျပ် (၁၀၀၀၀) အထိရှိပြီး ဘုရားဆီးမီး ပူဇော်မည့် သူများအနေဖြင့် စိတ်ကြိုက်ဝယ်ယူ ပူဇော်နိုင်ကြပါသည်။ လက်ရှိကာလ တွင် ဖယောင်းတိုင်မှာ ဝယ်လိုအားကောင်းနေပြီး ဈေးကွက်လိုအပ်ချက် မြင့်မားနေကြောင်း သိရှိရပါ သည်။ သီတင်းကျွတ်အတွက် ရောင်စုံဖယောင်းတိုင်ဈေးကွက်အနေဖြင့် ဈေးနှုန်းအနည်းငယ် မြှင့်တက်လာသော်လည်း အရောင်းအဝယ်သွက်လျက်ရှိကြောင်း သိရှိရပါသည်။

DOCA(ပဲခူး)

     မြန်မာနိုင်ငံစက်သုံးဆီတင်သွင်းသိုလှောင်၊ ဖြန့်ဖြူးခြင်းလုပ်ငန်းကြီးကြပ်ရေး ကော်မတီ မှ တိုင်းဒေသကြီး၊ ပြည်နယ်အလိုက်  မြို့ကြီးများ၏ စက်သုံးဆီ ရည်ညွှန်းလက်ကားဈေးနှုန်းများအား နေ့စဉ်ထုတ်ပြန်ပေးလျက်ရှိပါသည်။

     ပဲခူးတိုင်းဒေသကြီး၊ နတ်တလင်းခရိုင်၊ နတ်တလင်းမြို့နယ်တွင် စက်သုံးဆီဆိုင်(၈)ဆိုင် ရှိရာ ၂၀၂၅ခုနှစ် ယခင်စက်တင်ဘာလ (ဒုတိယပတ်)တွင် ဖြစ်ပေါ်ခဲ့သော စက်သုံးဆီဈေးနှုန်းများမှာ ဓာတ်ဆီ(92) တစ်လီတာလျှင်(၂၉၆၄)ကျပ်၊ ဓာတ်ဆီ(95) တစ်လီတာ လျှင်(၃၀၃၄)ကျပ် ဒီဇယ်ရိုးရိုး တစ်လီတာ လျှင်(၂၆၁၄)ကျပ်၊ ဒီဇယ်(ပရီမီယမ်)တစ်လီတာလျှင် (၃၂၁၉)ကျပ် ဖြင့်ရောင်းချလျှက်ရှိ ကြောင်းသိရပါသည်။

        ယခု အောက်တိုဘာလ (ဒုတိယပတ်)တွင် ဖြစ်ပေါ်ခဲ့သော စက်သုံးဆီ ဈေးနှုန်းများမှာ ဓာတ်ဆီ(92) တစ်လီတာလျှင်(၂၇၆၃)ကျပ်၊ ဓာတ်ဆီ(95) တစ်လီတာ လျှင်(၂၈၃၉)ကျပ် ဒီဇယ်ရိုးရိုး တစ်လီတာ လျှင်(၂၅၄၄)ကျပ်၊ ဒီဇယ်(ပရီမီယမ်) တစ်လီတာလျှင် (၃၀၉၄)ကျပ် ဖြင့်ရောင်းချလျှက်ရှိ ကြောင်းသိရပါသည်။

         ယခုအပတ်နှင့် နှိုင်းယှဉ်ပါက ဓာတ်ဆီ (92)တစ်လီတာလျှင် (၂၀၁)ကျပ်၊ ဓာတ်ဆီ (95) တစ်လီတာလျှင် (၁၉၅)ကျပ် ၊ ဒီဇယ်ရိုးရိုးဈေးနှုန်းမှာ တစ်လီတာ (၇၀)ကျပ်၊ ဒီဇယ် (ပရီမီယမ်)  တစ်လီတာ လျှင်(၁၂၅)ကျပ် ဈေးကျသွားကြောင်း သိရပါသည်။

DOCA(ပဲခူး)

  ဧရာဝတီတိုင်းဒေသကြီး၊ မအူပင်ခရိုင်၊ ညောင်တုန်းမြို့နယ် အနေဖြင့် မြို့နယ်များအပါအဝင် ၁၅တန်နှင့်အထက် ဆန်စက်အလုံးရေ (၄၈)လုံး ရှိပြီး စပါးကြိတ်ခွဲထွက်ရှိမှုမှ ဆန်များကို ရန်ကုန်တိုင်းဒေသကြီးသို့ အဓိကထား၍ တင်ပိုနေပြီး ရန်ကုန်မှတဆင့် အခြားဒေသများသို့ နေ့စဉ် ပုံမှန် (စီးထွက်) လျက်ရှိကြောင်း သိရသည်။

   ညောင်တုန်းမြို့နယ် ၂၀၂၅ ခုနှစ် စက်တင်ဘာလ ၁လအတွင်း ဆန်တင်ပို့မှုအနေဖြင့် ၁၃၆၅၅၀အိတ်၊ တန်အားဖြင့် ၆၈၂၇ တန်နှင့်  ဆန်ကွဲအနေဖြင့် ၄၂၂၉၂ အိတ်၊ တန်အားဖြင့်၂၁၁၀တန် တင်ပို့နိုင်ခဲ့ပြီး ယခင်လနှင့် တင်ပို့မှု အနေဖြင့် ဆန် ၁၁၃၂၅၀ အိတ် နှင့် တန်အားဖြင့်  ၅၆၆၀ တန်ကိုလည်းကောင်း၊ ဆန်ကွဲ ၃၃၅၁၀ အိတ်နှင့် တန်အားဖြင့်၁၆၇၅တန် တင်ပို့ခဲ့ကြောင်း ယခုလအနေဖြင့် ဆန်အိတ် ၂၃၃၀၀အိတ် ပိုမိုတင်ပိုခဲ့ကြောင်းနှင့်  ၈၇၈၂အိတ် ပိုမိုတင်ပို့နိုင်ခဲ့ကြောင်း ပန်းတိုင်စစ်ဆေးရေးဂိတ်စာရင်းများအရ သိရသည်။

DOCA(ဧရာဝတီ)