ပြည်တွင်းကုန်သွယ်မှုသတင်း

               တောင်ငူမြို့ဈေးများသို့ ဒေသထွက်ကုန်များ၊ ဟင်းသီးဟင်းရွက်နှင့် သစ်သီးဝလံများ လာရောက် ရောင်းချလျက်ရှိရာ ယခုအခါ အညာဒေသထွက် ပဲလိပ်ပြာများ လာရောက်ရောင်းချ လျက်ရှိပါသည်။

          ယခင်က ပဲလိပ်ပြာ(၂၅)ကျပ်သားလျှင် (၃၀၀၀)ကျပ်၊ တစ်ပိဿာလျှင်(၁၁၀၀၀)ကျပ် ရှိခဲ့ပါ သည်။ ယခုဩဂုတ်လတတိယပတ်တွင် ပဲလိပ်ပြာ (၂၅)ကျပ်သားလျှင် (၃၅၀၀)ကျပ်၊ တစ်ပိဿာ လျှင်(၁၂၀၀၀) ကျပ် ရှိသဖြင့် ယခင်ကထက် တစ်ပိဿာလျှင် (၁၀၀၀)ကျပ် ဈေးတက်ပါသည်။

          ပဲလိပ်ပြာသည် အခြားပဲများကဲ့သို့ ကြာကြာချက်စရာမလိုပဲ ခဏလေးနှင့် နူးလွယ်ပြီး အရသာ လည်း ချိုဆိမ့်သဖြင့် ပဲဟင်းရည်ချက်စားရာတွင် အလွန်ကောင်းမွန်ပါသည်။ ထို့အပြင် အခွံနှင့် တစ်မျိုး၊ အခွံခွာ၍ ခရမ်းချဉ်သီးကို အနှစ်ပြုလုပ်ပြီး ရော၍ချက်စားလျှင်လည်း အရသာ ကောင်းမွန် သဖြင့် လူကြိုက်များ၍ ရောင်းအားကောင်းကြောင်း တောင်ငူမြို့ရှိဈေးသည်များထံမှ သိရပါသည်။

DOCA(ပဲခူး)

       မြန်မာနိုင်ငံ၏ လူဦးရေ ၇၀ ရာခိုင်နှုန်းသည် ကျေးလက်တွင် နေထိုင်ကြပြီး စိုက်ပျိုးရေးနှင့် မွေးမြူရေးကို အခြေခံသော ကျေးလက်စီးပွားရေးလုပ်ငန်းအဖြစ် လုပ်ကိုင်နေကြခြင်းဖြစ်သည်။ ကျေးလက်ဒေသသည် စိုက်ပျိုးမွေးမြူ ကုန်ထုတ်လုပ်မှုနှင့် တစ်ပိုင်တစ်နိုင် စီးပွားရေးလုပ်ငန်း အများစုတို့ တည်ရှိရာလည်း ဖြစ်သည်။မွေးမြူရေးတွင် အသားတိုးကြက်၊ ဥစားကြက်၊ ဝက်၊ ဆိတ်၊ နွား၊ ငါး၊ နှင့် ငုံး စသည်တို့ကို အဓိက မွေးမြူကြသည်။

              ပဲခူးတိုင်းဒေသကြီး၊ တောင်ငူခရိုင် တောင်ငူမြို့နယ်၊ မဟင်ကျေးရွာမှ ဦးတင်ဖေသည် ဥစားကြက်မွေးမြူရေးလုပ်ငန်းဖြင့် အောင်မြင်လျက်ရှိသည်။ ဥစားကြက် မွေးမြူခြင်းလုပ်ငန်းကို ၁၉၉၄ ခုနှစ်က စတင်၍ အကောင် ၅၀၀ခန့် စတင်မွေးမြူဆောင်ရွက်ခဲ့သည်။ ယခုအခါ တစ်ခြံအကောင် ၃၀၀၀ဖြင့် စုစုပေါင်း ၁၂၀၀၀ခန့် မွေးမြူထားသည်။ ကြက်အကောင်ပေါက်များကို CP ကုမ္ပဏီမှ ဝယ်ယူရရှိပြီး ကြက်အကောင်ပေါက်(၁)ကောင်လျှင် ၂၅၀၀ကျပ် ဈေးပေးရကြောင်း၊ ဥစတင်ဥရန် (၅)လခန့် အစာကျွေးမွေးမြူရကြောင်း၊ (၅)လကျော်(၆)လပိုင်းအတွင်း မဒန်းဥ စတင်ဥပြီး ကြက်ဥကာလ (၁၈)လ အထိ ဥရရှိကြောင်း သိရသည်။

              ကြက်စာအဖြစ် ပဲဖတ်၊ ပဲပုတ် ၊ CPစာ၊ ပြောင်း၊ ငါးခြောက်မှုန့်၊ ထုံးကျောက်၊ ခရုမှုန့် ၊ဖွဲနုတို့ အချိုးကျ ရောစပ်ကျွေးရပြီး ဥစားကြက်၏ ကုန်ကျစရိတ် (၇၀)ရာခိုင်နှုန်းသည် ကြက်စာဖြစ်သည့် အတွက် ကုန်ကြမ်းများဝယ်ယူကာ မိမိအိမ်တွင် အစာကြိတ်ရောစပ်ဆောင်ရွက်ကြောင်း သိရသည်။ ယခုအခါ ကြက်အကောင်၁၂၀၀၀ခန့်တွင် အကောင်ရေ (၆၀၀၀)ခန့် ဥနေသည့်အတွက် တစ်နေ့         ဥအလုံး (၆၀၀၀)နီးပါး ရရှိနေသည်။ ရရှိလာသည့် ဥများကို ဥကြီး၊ဥလတ်၊ ဥသေးဟူ၍ (၃)စားခွဲကာ ဈေးကွက်ဖြန့်ဖြူးရောင်းချပေးလျက်ရှိသည်။ မဟင်ကျေးရွာ ကြက်ခြံသို့ လာရောက်ဝယ်ယူသည့် ဖောက်သည်များကိုလည်း ရောင်းချပေးနေသည်။ထို့ပြင် တောင်ငူမြို့ပေါ်ရှိ ငါးသုံးလုံး ကြက်ဥပွဲရုံ သို့လည်း ရောင်းချပါသည်။ ကြက်စာဈေးနှုန်းပေါ် မူတည်၍ ကြက်ဥ အကြီး တစ်လုံးလျှင် ၄၈၀ကျပ်၊ အလတ်တစ်လုံးလျှင်၄၅၀ကျပ်နှင့် အသေးတစ်လုံးလျှင်၃၅၀ကျပ်ဖြင့် ရောင်းချပေးနေသည်

              မွေးမြူထားသည့် အကောင်ရေ (၈၀) ရာခိုင်နှုန်းအထက် ဥရရှိနေပါက အကျိုးအမြတ် ရရှိပါသည်။ ဝန်ထမ်းခန့်ထားခြင်း မရှိပဲ မိသားစု တစ်ပိုင်တစ်နိုင် လုပ်ငန်းအဖြစ် ဆောင်ရွက်နေခြင်း ဖြစ်သည်။ မွေးမြူရေးကဏ္ဍအတွက် နိုင်ငံတော်မှ ချေးငွေများအတိုးနှုန်း သက်သာစွာဖြင့် ချေးပေးသည့်အတွက် များစွာအထောက်အကူပြုသည်။ဥတုံးသွားသည့်ကြက်များ အသားဈေးနှုန်းဖြင့် ရောင်းချသည်။ မွေးမြူရေးအခြေခံ စားသောက်ကုန်များ ထုတ်လုပ်ရောင်းချခြင်းသည် လူဦးရေ တိုးတက်များပြားလာခြင်းနှင့်အတူ ရေရှည်တွင် အလားအလာကောင်းများ ရှိနေခြင်းကြောင့် တိုးချဲ့ မွေးမြူဆောင်ရွက်သွားမည်ဖြစ်ကြောင်း သိရပါသည်။

DOCA(ပဲခူး)

         မိတ္ထီလာမြို့ရှိ ပေါက်ချောင်းဈေးသည် မိတ္ထီလာ(တောင်)ကန်၏ အနီးနားမှာရှိပြီး နေ့စဉ်ပိတ်ရက်မရှိ ဈေးသည်၊ ဈေးဝယ်များနှင့် စည်ကားလျက်ရှိပါသည်။ ပေါက်ချောင်းဈေးတွင် အသားငါး၊ ဟင်းသီးဟင်းရွက်၊ ဘုရားပန်းစသည့် လက်လီဈေးသည်များမှာ ဈေးဝယ်များနှင့် နေ့စဉ်အရောင်းသွက်သည်ကို တွေ့ရသည်။

          ဩဂုတ်လ တတိယပတ်၊ ပေါက်ချောင်းဈေးရှိ ဘုရားပန်းဈေးသည်များတွင် ပန်းတိမ်မနိုင်၊ ကျောက်ဆည်သပြေငုတ်၊ ဂန္ဓမာ(အဖြူ/အဝါ/ပန်း/ခရမ်း) တို့အပြင် ယခုတပတ်မှာတော့ သစ္စာပန်းများပါ ရောင်းချနေတာကိုတွေ့ရပါတယ်။ ဈေးနှုန်းများအနေနဲ့ ပန်းတိမ်မနိုင်(၁၀ခက်စီး) တစ်စီး (၄၀၀၀-၅၀၀၀)ကျပ် ဂန္ဓမာ(အဖြူပွင့်အကြီး) တစ်စီး (၅၀၀၀)ကျပ် အဝါပွင့်ကြီးတစ်စီး (၄၀၀၀) ပန်းခရမ်းရောင် အပွင့်သေးတစ်စီး (၃၀၀၀)ကျပ် ကျောက်ဆည်သပြေငုတ် တစ်ငုတ် (၁၀၀၀) ကျပ် သစ္စာပန်းအဖြူ (၅)ခက်စီးတစ်စီး (၃၀၀၀)ကျပ်များနဲ့အရောင်းအဝယ်ဖြစ်နေပြီး ဩဂုတ်လဆန်းနှင့် နှိုင်းယှဉ်ပါက ဈေးငြိမ်နေကြောင်း သိရသည်။ ဗုဒ္ဓဘာသာ မြန်မာလူမျိုးအနေနှင့် နေအိမ်၊ ဘုန်းကြီးကျောင်းမှာရှိတဲ့ ဘုရားပန်းကိုမညှိုးအောင် ကပ်လှူကြတဲ့အတွက် ဘုရားပန်းဈေးကွက်ကတော့ ရာသီမရွေးအရောင်းသွက်ကြောင်း သိရှိရပါသည်။

DOCA(မန္တလေး)

           မိတ္ထီလာမြို့နယ်သည် စားဖိုဆောင်သီးနှံများအနက် အာလူးကို စိုက်ပျိုးမှုမရှိသော်လည်း စားသုံးမှုရှိသည့်အတွက် ဈေးကွက်တစ်ခုအနေနှင့် အရောင်းအဝယ်ရှိသည်ကို တွေ့ရပါသည်။ မိတ္ထီလာဈေးကွက်သို့ အာလူးကို ရှမ်းပြည်နယ်တောင်ပိုင်း တောင်ကြီး၊ အောင်ပန်း၊ ဟဲဟိုးတို့မှ ဝင်ရောက်ကြောင်း သိရသည်။ အာလူးကို ဟင်းလျာအဖြစ်ချက်ပြုတ်၍လည်းကောင်း၊ ကြော်၍လည်းကောင်း စားသုံးသည့်အပြင် အကြော်စုံလုပ်ငန်းများလည်း အာလူးကြော်ပြုလုပ်ရန် အများအပြားဝယ်ယူမှုရှိပါသည်။ မိတ္ထီလာဈေးကွက်တွင် အာလူးဈေးမှာ ဈေးကွက်သို့ အဝင်ပုံမှန်ရှိသည့်အတွက် ဇူလိုင်လဆန်းရှိ အာလူးတစ်ပိဿာလက်လီဈေးမှာ (၄၀၀၀-၄၅၀၀) ရှိခဲ့ရာမှ ဇူလိုင်လလယ်မှစ၍ ဩဂုတ်လလယ်ထိ တစ်ပိဿာ (၂၅၀၀-၄၀၀၀) ကျပ်ဖြင့် ဈေးအေးလာကြောင်း သိရှိရပါသည်။

DOCA(မန္တလေး)

         မိတ္ထီလာမြို့ဈေးကွက်၌ ရှမ်းပြည်နယ်တောင်ပိုင်းမှ ဝင်ရောက်လာသောကုန်စည်များအနက် ဂျင်းတက်မှာလည်း တစ်ခုအပါအဝင်ဖြစ်ပါသည်။ ဂျင်းတက်မှာ အသား/ငါးချက်ပြုတ်ရာတွင် အညှီနံ့ ပျောက်စေရန် အသုံးပြုသည့် ဟင်ခတ်အမွှေးအကြိုင်တစ်ခုဖြစ်သည့်အပြင် လဘ္ဘက်နှင့်တွဲဘက်၍ ဂျင်းလဘ္ဘက်၊ အထူးသဖြင့် ဂျင်းပေါက်(ဓါးစင်း)ကို ပဲကြော်စုံဖြင့် ခရမ်းချဉ်သီး၊ ပဲမှုန့်စသည်တို့နှင့် သုပ်၍ စားသုံးမှုများသဖြင့် ဈေးကွက်၌ နေရာတစ်နေရာနှင့် ရပ်တည်နိုင်တာကိုတွေ့ရသည်။ ဂျင်းတက်မှာ မိတ္ထီလာဈေးကွက်သို့ ရှမ်းပြည်နယ်တောင်ပိုင်း ဟဲဟိုး၊ အောင်ပန်း၊ တောင်ကြီးတို့မှ  ဝင်ရောက်ပြီး  ဒေသတွင်း၌ ဂျင်းကို အတက်အတိုင်းသော်၎င်း၊ ပြန်လည်ရောင်းချကြရာ ဂျင်းတက်တစ်ပိဿာလျင် ၄၀၀၀/ကျပ်၊ ဂျင်းပေါက်တစ်ပိဿာလျင်(၆၀၀၀/)ကျပ်ဈေးတို့ဖြင့် အရောင်းအဝယ်ဖြစ်ကြောင်း သိရှိရပါသည်။

DOCA(မန္တလေး)