ပြည်တွင်းကုန်သွယ်မှုသတင်း

           စားသုံးသူရေးရာဦးစီးဌာန၊ မန္တလေးတိုင်းဒေသကြီး၊ မိတ္ထီလာခရိုင်ဦးစီးမှူးရုံးမှ ရမည်းသင်းမြို့နယ်တာဝန်ခံ၊ ဦးစန်းအောင် (ဒု-ဦးစီးမှူး) သည် ၁၅.၈.၂၀၂၅ ရက်၊ နံနက် (၁၀.၃၀) နာရီအချိန်တွင် ရမည်းသင်းမြို့နယ် သိမ်ကုန်းစံပြကျေးရွာရှိ ဦးဆန်းဝင်း၏ ဒေသထုတ်ကုန်ပဲကြော်၊ ပဲလှော်လုပ်ငန်းအား သွားရောက်ကွင်းဆင်းစစ်ဆေး ခဲ့ပါသည်။

         ကွင်းဆင်းရာတွင် မြို့နယ်တာဝန်ခံမှ ဒေသထုတ်ကုန် MSME လုပ်ငန်းများ၏ ဖွံ့ဖြိုးတိုးတက်မှုအခြေအနေ၏၊ ထုတ်လုပ်နိုင်မှုအခြေအနေ၏၊ ဈေးနှုန်းဈေးကွက်အခြေအနေ၊ အကျိုးအမြတ်ရရှိမှုအခြေအနေနှင့် ဈေးကွက်တင်ပို့နိုင်မှုအခြေအနေများအား မေးမြန်းဆောင်ရွက်ခဲ့ပါသည်။ ကုန်ကြမ်းဖြစ်သော ပဲများကို မန္တလေး၊ မိတ္ထီလာ ၊တပ်ကုန်း၊ လယ်ဝေးမြို့နယ်မျာမှ ဝယ်ယူရသည်ဟု သိရပါသည်။ ပဲကြီး တစ်ပိဿာလျှင် ၆၅၀၀ ကျပ်၊ ကုလားပဲခြမ်းတစ်ပိဿာလျှင် ၆၀၀၀/ကျပ်၊ မြေပဲတစ်ပိဿာလျှင် ၇၅၀၀/ကျပ်၊ တရုတ်ပဲကြီးတစ်ပိဿာလျှင် ၁၃၀၀၀/ကျပ်၊ ရွှေယင်းမာပဲတစ်ပိဿာလျှင် ၄၀၀၀/ကျပ်၊  ထောပတ်ပဲတစ်ပိဿာလျှင် ၅၀၀၀/ကျပ် ဈေးနှုန်းဖြင့် ဝယ်ယူရပါသည်။ ပဲကြော်၊ ပဲလှော်လုပ်ငန်းကို လက်ရှိလုပ်သား(၂၀)ဦး၊ ပဲကြော်ဖို(၂)ဖို၊ ပဲလှော်ဖို(၄)ဖိုဖြင့် လုပ်ကိုင်ဆောင်ရွက်လျက်ရှိကြောင်း သိရပါသည်။ ပဲကြော်ရန်အတွက် (၁)ရက်လျှင် စုစုပေါင်းပဲကုန်ကြမ်း(၁၅၀)ပိဿာခန့်ကြော်ပြီး ကုန်ချော (၁၄၅)ပိဿာ ခန့်ထွက်ရှိကြောင်း၊ ပဲလှော်ပြုလုပ်ရန်အတွက် စုစုပေါင်းကုန်ကြမ်း(၂၂၅)ပိဿာ ခန့်ရှိပြီး ကုန်ချော(၂၀၀)ပိဿာခန့်ထွက်ရှိကြောင်း သိရှိရပါသည်။ ပဲဖူးကြော် တစ်ပိဿာလျှင် (၁၂၀၀၀)ကျပ်၊ ကုလားပဲခြမ်းကြော်တစ်ပိဿာလျှင်(၉၀၀၀/)ကျပ်၊ တရုတ်ပဲကြော်တစ်ပိဿာလျှင်(၁၃၀၀၀/)ကျပ်၊  မြေပဲကြော်တစ်ပိဿာလျှင်(၁၁၅၀၀)ကျပ်၊ ပဲကြီးလှော်တစ်ပိဿာလျှင်(၇၅၀၀/)ကျပ်၊ ရွှေယင်းမာပဲ လှော်တစ်ပိဿာလျှင်(၇၅၀၀)ကျပ်၊ ကုလားပဲလုံးလှော်တစ်ပိဿာ (၉၀၀၀)ကျပ်၊ ထောပတ်ပဲလှော် တစ်ပိဿာ(၉၅၀၀)ကျပ်၊ မြေပဲဆားလှော်တစ်ပိဿာ (၁၂၅၀၀)ကျပ် ဖြင့်ရောင်းချရကြောင်းသိရပါ သည်။ (၁)ရက်လျှင်ကုန်ကြမ်းပဲအပါအဝင် အလုပ်သမားခ၊ ဆီနှင့် အထွေထွေစုစုပေါင်းကုန်ကျစရိတ် (၃၅)သိန်းခန့်ရှိပြီး ကုန်ချောဖြစ်သည့်ပဲကြော်၊ ပဲလှော်ရောင်းရငွေမှာ(၄၀)သိန်းခန့်ရရှိသည့်အတွက် အကျိုးအမြတ်အနေဖြင့် (၅)သိန်းခန့်ရှိကြောင်း၊ ပဲလှော်ပဲကြော်များကို ဒေသတွင်းရှိအရောင်းဆိုင်များတွင်လည်းကောင်း၊ ပျော်ဘွယ်၊ တပ်ကုန်မြို့များသို့လည်းကောင်း တင်ပို့ရောင်းချကြကြောင်း သိရှိရပါသည်။

DOCA(မန္တလေး)

            မန္တလေးတိုင်းဒေသကြီး၊ မိတ္ထီလာခရိုင်၊ မိတ္ထီလာမြို့မဈေးအတွင်း ရောင်းချနေသော ဟင်းသီးဟင်းရွက်ဈေးတန်း၌ ဂေါ်ဖီနှင့် ပန်းဂေါ်ဖီများကို ရှမ်းပြည်နယ် တောင်ကြီး၊ အောင်ပန်းဘက်မှ ဝင်ရောက်လျက်ရှိပါသည်။

          ဩဂုတ်လ တတိယပတ်တွင် ပန်းဂေါ်ဖီအသေးတစ်ပွင့်လျှင် (၈၀၀)ကျပ်၊ အလတ်တစ်ပွင့်လျှင် (၁၅၀၀)ကျပ်၊ အကြီးတစ်ပွင့်လျှင်(၂၀၀၀)ကျပ်ရှိကြောင်း၊ ဂေါ်ဖီအသေးတစ်ထုပ်လျှင်(၅၀၀)ကျပ်၊ အလတ်တစ်ထုပ်လျှင်(၁၀၀၀)ကျပ်၊ အကြီးတစ်ထုပ်လျှင်(၂၀၀၀)ကျပ်ဖြင့် ရောင်းချလျက်ရှိကြောင်း သိရသည်။ ယခင်လနှင့်ကာလတူ နှိုင်းယှဉ်ပါက ယခုပတ်အတွင်း ပန်းဂေါ်ဖီတစ်ပွင့်လျှင် (၂၀၀)ကျပ်၊ အလတ်တစ်ပွင့်လျှင်(၇၀၀)ကျပ်၊ အကြီးတစ်ပွင့်လျှင်(၅၀၀)ကျပ်၊ ဂေါ်ဖီအသေးတစ်ထုပ် လျှင်(၂၀၀) ကျပ်၊ အလတ်တစ်ထုပ်လျှင်(၃၀၀)ကျပ်နှင့် အကြီးတစ်ထုပ်လျှင်(၈၀၀)ကျပ်ဈေးနှုန်း မြင့်တက်လာကြောင်း၊  ဈေးနှုန်းမြင့်တက်လာခြင်းမှာ စိုက်ကွင်းများအတွင်း မိုးမပြတ်ရွာသွန်းမှုကြောင့် ရေနစ်မြှုပ်သဖြင့် ဈေးကွက်အတွင်း အဝင်နည်းလာခြင်းကြောင့်ဖြစ်သည်ဟု သိရှိရပါသည်။

DOCA(မန္တလေး)

          မန္တလေးတိုင်းဒေသကြီး၊  ကျောက်ဆည်ခရိုင်တွင် စိုက်ပျိုးရေးနှင့်မွေးမြူရေးကိုအခြေခံသော ဒေသတစ်ခုဖြစ်သည့်အလျှောက် စပါး၊ ပဲ၊ ပြောင်း၊ ကြက်သွန်သီးနှံများအပြင် စီးပွားဖြစ်ဝင်ငွေတိုးသော ဝက်မွေးမြူခြင်းလုပ်ငန်းကိုလည်း လုပ်ကိုင်လျက်ရှိပါသည်။ ဝက်မွေးမြူခြင်းဖြင့် ကျေးလက်နေ ဒေသပြည်သူများ ပုံမှန်ဝင်ငွေရရှိလျှက်ရှိကြောင်း၊ ယခုအချိန်တွင် ဝက်သားစျေးများ ကောင်းမွန်သောကြောင့် ဝက်မွေးမြူသူများ စီးပွားဖြစ်တွက်ခြေကိုက်လျက်ရှိကြောင်း၊ အများဆုံးမွေးမြူသော ဝက်မျိုး မှာအသားတိုးဝက်(CP)မျိုးများကို အများဆုံးမွေးမြူကြကြောင်း၊ မွေးမြူရာတွင်စနစ်တကျ ကွန်ကရစ်ခင်း၍ အမိုးအကာများဖြင့်သန့်ရှင်းသပ်ရပ်စွာ မွေးမြူကြကြောင်း၊ (CP)ဝက်မျိုး၊ ဝက်ပေါက်တစ်ကောင် (၁)လခွဲ(၂)လသား ဝက်များကို (၅၀၀၀၀၀-၆၀၀၀၀၀)ကျပ်ဝန်းကျင်ခန့် ဝယ်ယူ၍မွေးရကြောင်း၊ ထိုသို့ဝယ်ယူရာတွင် 1Kg တွင် (၄၀၀၀၀/-)ကျပ်ရှိပြီး ကီလိုဂရမ်ပေါ်မူတည်၍ စျေးပေးရကြောင်း၊ (CP)ဝက်မျိုးများသည် မွေးမြူပြီး (၃-၄)လအကြာတွင် ရောင်းတန်းဝင်ဝက်များဖြစ်လာကြောင်း၊ သက်တမ်းတို၍ စီးပွားဖြစ်မြန်ကြောင်း၊ (CP)ဝက် ၁၀ကောင်လျှင် အစာဖိုး(၁)ရက်လျှင်(၈၀၀၀၀/-) ကျပ်ခန့်ကုန်ကျကြောင်း၊ (CP)ဝက်စာ 50kgအိတ် တစ်အိတ်လျှင် (၁၀၀၀၀၀/-)ကျပ်ပေးရကြောင်း၊ (၁)ကောင်မွေးမြူသူများအနေဖြင့် အစာ 50kg အိတ် တစ်အိတ်ဝယ်ထားလျှင် (၁)လခန့်အထိ ကျွေးနိုင်ကြောင်း၊ အချိန်(၅၀)ရှိ ရောင်းတန်းဝင်ဝက်များကို စျေးကွက်သို့တင်ပို့ရောင်းချကြောင်း၊ ဝက်ဝယ်ယူသူများအနေဖြင့် ဝက်ခြံအထိ လာရောက်ဝယ်ယူကြကြောင်း၊ ဝက်စျေးနှုန်းအနေဖြင့် (၁)ပိဿာလျှင်(၃၆၀၀၀/-)ကျပ် စျေးဖြင့်ရောင်းချရကြောင်း၊ အချိန်(၅၀)အထက် (CP)ဝက် တစ်ကောင်လျှင်(၁၆-၁၇)သိန်းအထိစျေးရရှိကြောင်း၊ ဝက်မွေးမြူမှုအကျိုးအမြတ်အနေဖြင့်(CP) ဝက် တစ်ကောင်လျှင် ဝက်ဖိုး(၅၀၀၀၀၀/-)ကျပ်၊ အစာဖိုး(၈၀၀၀၀၀/-)ကျပ် နှုတ်ပြီးပါက ယခင်က တစ်ကောင်လျှင်(၃၅၀၀၀၀/-)ကျပ်သာ မြတ်ခဲ့ရာ ယခုအချိန်တွင် ဝက်စျေးများကောင်းမွန်သဖြင့် (CP)ဝက် တစ်ကောင်လျှင်(၅၀၀၀၀၀-၆၀၀၀၀၀) ကျပ်အထိမြတ်ကြောင်း၊ ဝက်မွေးမြူသူတစ်ဦး၏ ပြောကြားချက်အရ သိရှိရပါသည်။

DOCA(မန္တလေး)

            မန္တလေးတိုင်းဒေသကြီး၊ ကျောက်ဆည်ခရိုင်သည် စိုက်ပျိုးရေးကို အဓိကထားလုပ်ကိုင် ဆောင်ရွက်သော ဒေသတစ်ခုဖြစ်ပြီး သီးနှံမျိုးစုံ စိုက်ပျိုးဖြစ်ထွန်းလျက်ရှိရာ ဈေးကွက်ဝယ်လိုအားရှိသော သခွားသီးနှံကိုလည်း စိုက်ပျိုးလျက်ရှိကြောင်း၊ သခွားစိုက်ပျိုးမှုအနေဖြင့် မျိုးစေ့ဝယ်၍ ပျိုးထောင်စိုက်ပျိုးရကြောင်း၊ ပျိုးသက်တမ်း (၂၅)ရက်မတိုင်မီ စိုက်ခင်းထဲသို့ ပြောင်းရွေ့ စိုက်ပျိုးရကြောင်း၊ မျိုးစေ့ကို စိုက်ပျိုးရေးဆေးဆိုင်များမှ ဝယ်ယူစိုက်ပျိုးကြကြောင်း၊ သခွားမျိုးစေ့ တစ်ထုတ် လျှင် (၃၅၀၀၀-၄၀၀၀၀)ကျပ်ဖြင့် ဝယ်ယူရကြောင်း၊ တစ်ဧကမျိုး (၂၀၀)ဂရမ် စိုက်ပျိုးရကြောင်း၊ တစ်ဧက ကုန်ကျစရိတ်အနေဖြင့် မျိုး၊သွင်းအားစု၊ လုပ်သားခ၊ တိုင်ထောင်ဝါး၊ ပလပ် စတစ်လိပ်ဖိုး များအပါအဝင် စုစုပေါင်း (၆၀၀၀၀၀၀/-)ကျပ်ခန့် ကုန်ကျကြောင်း၊ သွင်းအားစုများ ပိုမိုသုံးစွဲပါက ကုန်ကျစရိတ် ပိုမိုများပြားနိုင်ကြောင်း၊ သခွားစိုက်ပျိုးရာတွင် တန်းကြားတစ်ပင်လျှင် (၃)ပေခြား၊ (၂)ပေခြား၍ စိုက်ပျိုးကြောင်း ၊ တစ်ဧကလျှင် အပင် (၇၀၀၀)ကျော်ခန့် ဝင်ဆန့်ကြောင်း ၊ စတင်အသီးသီးချိန်မှ (၃)လုံးအထိ တင်စေပြီး တင်းနစ်ဘောလုံး အရွယ်အစားရောက်လျှင် တစ်ပင်ကို (၂)လုံးသာ ယူကြောင်း၊ အသီးတင်ပြီး (၁၀)ရက်တစ်ကြိမ် သွင်းအားစုများ ထည့်ပေးရကြောင်း၊ စိုက်ပျိုးပြီး ရက်(၃၀)အကြာတွင် ပန်းများစတင်ပွင့်ပြီး ပန်းပွင့်ပြီး (၃၅)ရက်၊ (၄၅) ရက်တွင် အသီးများစတင်ခူးခွတ်နိုင်ပြီးဖြစ်ကြောင်း၊ စိုက်ပျိုးမှု မျိုးအနေဖြင့် ရွှေသခွား၊ ကျောက်စိမ်း သခွားနှင့် ပိုက်ကွက်သခွားမျိုးများကို စိုက်ပျိုးကြကြောင်း၊ ဇွန်လဆန်းတွင် စိုက်ပျိုးခဲ့သောကြောင့် စက်တင်ဘာလဆန်းပိုင်းတွင် ထွက်ပေါ်မည်ဖြစ်ကြောင်း၊ တစ်ဧကအထွက်နှုန်းအနေဖြင့် အလုံး ပေါင်း (၁၄၀၀၀)ခန့် ထွက်ရှိကြောင်း၊ ခရိုင်အတွင်း လက်ရှိစိုက်ပျိုးမှု အနည်းငယ်သာရှိပြီး စိုက်ပျိုးသောရွာမှာ မြေစိုရွာဖြစ်ကြောင်း၊ ယခုလက်ရှိဈေးကွက်အတွင်း ဝင်ရောက်နေသော သခွားသီးများ မှာ မြို့နယ်အတွင်း ထွက်ရှိသော အသီးများဖြစ်ပြီး သစ်သီးဆိုင်များမှ ဝင်ရောက်သော အသီး အနည်းငယ်သာရှိကြောင်း ထွက်ပေါ်ချိန်မှသာ အသီးများဖြိုင်ဖြိုင်ရောင်းချနိုင်မှာဖြစ်ကြောင်း သစ်သီးရောင်းချသော ဆိုင်ရှင်တစ်ဦး၏ ပြောကြားချက်အရ သိရှိရပါသည်။ သခွားဈေးနှုန်းအနေဖြင့် ကျောက်စိမ်းသခွား/ ပိုက်ကွက်သခွား တစ်လုံးလျှင် အလုံးသေး (၇၀၀၀/-)ကျပ်၊ အလုံးကြီး (၁၀၀၀၀/-) ကျပ်၊ ရွှေသခွား တစ်လုံးလျှင် အလုံးကြီး(၈၀၀၀/-)၊ အလုံးသေး (၅၀၀၀/-) ကျပ်တို့ဖြင့် ရောင်းဝယ်လျက်ရှိကြောင်း ဈေးကွက်အနေဖြင့် မြို့ပေါ်ရှိ သစ်သီးဆိုင်များ၊ သစ်သီးပွဲရုံများနှင့် ဈေးများသို့ ရောင်းချလျက်ရှိပြီး ပွဲရုံများမှတစ်ဆင့် မန္တလေးမြို့၊ ရန်ကုန်မြို့များသို့ တင်ပို့လျက်ရှိကြောင်း၊ သစ်သီးဆိုင်များမှ စိုက်ခင်းထဲ အရောက်လာရောက် ဝယ်ယူသူများလည်းရှိကြောင်း သိရှိရပါသည်။

DOCA(မန္တလေး)

          ကျောက်ဆည်ခရိုင်အတွင်းရှိ တောင်သူကြီးများသည် မိသားစုစားဝတ်နေရေးအတွက် ရာသီအလိုက် သီးနှံမျိုးစုံ စိုက်ပျိုးလျက်ရှိကြပါသည်။ နံနံပင်ကို ရာသီဥတုမရွေး စိုက်ပျိုးကြပါကြောင်း၊ နံနံပင်စိုက်ပျိုးမည်ဆိုပါက ရေမဝပ်သော နုံးမြေသည် အကောင်းဆုံးဖြစ်ပါသည်။ နံနံကို ဘောင်ပြုလုပ်ပြီးစိုက်ပျိုးပါက ပိုမိုကောင်းမွန်ကြောင်း၊ ဘောင်များကို (၅)လက်မ အမြင့်ပြုလုပ်ပြီး ဘောင် အကျယ် (၂-၃)ပေထားရှိနိုင်ပြီး၊ ဘောင်အရှည်ကို လိုသလောက်ထားကာ နံနံကိုစိုက်ပျိုးနိုင်ကြောင်း သိရှိရပါသည်။ နံနံမစိုက်ခင် မျိုးစေ့ကို မြန်မြန်အပင်ပေါက်စေရန် နံနံစေ့ကို ဂုန်နီအိတ်ပေါ်တွင်တင်၍ နံနံစေ့နှစ်ခြမ်းကွဲသွားစေရန် ပုလင်းခွံဖြင့် အသာအယာလှိမ့် ပေးရပါသည်။ ထို့နောက် နံနံမျိုးစေ့များကို ရေတွင် (၂၄)နာရီကြာ ရေစိမ်ပေးရပြီး၊ ရေစိမ်ပြီးမျိုးစေ့ကို (၀.၅)လက်မအနက်ရှိ မြောင်းများကို (၄)လက်မခြား ဂေါက်ကြောင်းဆွဲပြီး မျိုးစေ့များကို စိုက်ရပါသည်။ နွားချေးမှုန့်၊ မြေဆွေးမှုန့်ဖြင့် ပါးပါးဖုံးပြီး မျိုးစေ့ချပြီး ဘောင်ကို ကောက်ရိုးခြောက်တို့ဖြင့် အုပ်ပေးရပါသည်။ ထိုသို့ပြုလုပ်ပေးခြင်းဖြင့် မြေတွင်အစိုဓာတ်ထိန်းသိမ်းပေးနိုင်ပြီး အပင်ပေါက်မှုအားကောင်းစေပြီး သန်မာသော နံနံပင်များ ရရှိစေနိုင်ပါသည်။ နံနံပင်များပေါက်ပြီးနောက် ရေကိုတစ်နေ့နှစ်ကြိမ် ရေလောင်းပေးရပြီး အပင်များအနည်းငယ်ကြီးထွားလာပါက ရေကိုလျော့လောင်းရပါသည်။ ရေများများလောင်းပါက နံနံပင်များ ခါးရိရောဂါ ကျရောက်စေနိုင်ပါသည်။ နံနံပင်ပေါက်ပြီး (၄၅)ရက်သားမှစတင်၍ နှုတ်ယူ စားသုံး၍ရနိုင်ကြောင်း၊ ဈေးကွက်သို့ တင်ပို့ရောင်းနိုင်ကြောင်း သိရှိရပါသည်။ နံနံပင်လက်လီ ဈေးနှုန်းအနေဖြင့် (၃)ပင်ပါတစ်စီးကို (၁၀၀/-)ကျပ် အရောင်းအဝယ်ဖြစ်နေကြောင်း သိရှိရပါသည်။ ယခုအခါ နံနံပင်များ စိုက်ပျိုးသော တောင်သူများအနေဖြင့် ဈေးကောင်းရလျက်ရှိသောကြောင့် နံနံများပိုမို စိုက်ပျိုးသင့်ကြောင့် တင်ပြအပ်ပါသည်။

DOCA(မန္တလေး)