ပြည်တွင်းကုန်သွယ်မှုသတင်း

   ရန်ကုန်တိုင်းဒေသကြီး၊ သန်လျင်ခရိုင်၊ ခရမ်းမြို့နယ် စပါးသီးနှံကို နှစ်စဉ်စိုက်ပျိုးခဲ့ရာ ယခုနှစ် ၂၀၂၅-၂၀၂၆ မိုးစပါးစိုက်ပျိုးရာသီတွင် ခရမ်းတစ်မြို့နယ်လုံးတွင် စပါးစိုက်ပျိုးဧက (၁၁၀၆၃၉)စိုက်ပျိုးခဲ့ရာတွင် ခရမ်းမြို့နယ်၏ ကျေးရွာများဖြစ်သော ကြာကန်၊ ပိန်းကန်၊ မောင်းမ၊ ကမာကလူ၊ ရိုးကြီး၊ တမံကြီး၊ ကြူတောကျေးရွာများတွင် စပါးသက်တမ်းနုမျိုးများကို အခြောက် ကြဲ၍ ကောက်စောစပါးများ စတင်ထွက်ရှိလာခဲ့ပြီး ယခုနှစ်တွင် မိုးရေချိန်လုံလောက်စွာ ရရှိပြီး ပိုးမွှားများ ဖျက်ဆီးမှုမရှိကြောင်း သီးနှံအထွက်နှုန်းသည် ယခင်နှစ်များထက်ပိုမိုထွက်ရှိလာ ကြောင်း သိရပြီး ထွက်ရှိစပါးများသည် မိုးရွာသွန်းမှုများရှိခြင်းကြောင့် စပါးအစိုဓာတ်များခြင်း၊ စပါးဝယ်ယူမှုတွင် လမ်းများခြောက်သွေ့မှုမရှိသေးခြင်းကြောင့် သယ်ယူစရိတ်များခြင်းများရှိပြီး၊ စပါးဈေးကွက်အနေဖြင့် မြို့ပေါ်စက်ပိုင်း ကုန်ုသည်များက စက်အရောက် စပါးတင်း (၁၀၀)လျှင် (၅၅)ပေါင်ကိုက်ဖြင့် (၉)သိန်းခွဲမှ (၁၀)သိန်းအထိ ဝယ်ယူရရှိစပါးများအား အခြောက်ခံစက်များ ဖြင့် အခြောက်ခံ၍စပါးကြိတ်ခွဲပြီး ထွက်ရှိဆန်သစ်များအား ရန်ကုန်ဈေးကွက်တွင် (၁၀၈)ပေါင် (၁)အိတ်လျှင် (၄၆၀၀၀/-) ကျပ် ဖြင့် တင်ပို့ရောင်းချလျှက်ရှိကြောင်း သိရှိရပါသည်။

DOCA(ရန်ကုန်)

     စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ် ကန့်ဘလူမြို့ပေါ်နှင့် နတ်ပေးကျေးရွာ၊ နတ်အင်းကျေးရှိ ရွာတောင်သူဦးကြီးများသည် မိမိတို့ရဲ့ လယ်ယာစိုက်ပျိုးရေးလုပ်ငန်းများအပြင် တစ်ပိုင်တစ်နိုင် ဒေသနွားနှင့် မေထုံနွားများ မွေးမြူ၍ နွားနို့များညှစ်ကာ မိသားစုစားဝတ်နေရေးအဆင်ပြေအောင် ဆောင်ရွက်လုပ်ကိုင်လျက်ရှိကြောင်း သိရသည် ။

     မေထုံနွားမတစ်ကောင်ကို တစ်နေ့နို့ပိဿာ(၇)ပိသာခန့်နှင့် ဒေသနွားမတစ်ကောင်းကို (၃)ပိဿာခန့် ထွက်ရှိကြောင်း၊ ၂၀၂၅ ခုနှစ်၊ စက်တင်ဘာလ ဒုတိယပတ်တွင် ရောင်းချလျက်ရှိသော ဒေသထွက်နွားနို့(၁)လီတာ (၁)ဗူးလျှင် (၁၅၀၀မှ ၂၀၀၀)ကျပ်၊ နို့စားနွားနို့(၁)လီတာ (၁)ဗူးလျှင် (၁၃၀၀မှ ၁၆၀၀)ကျပ်တို့ဖြင့် ရောင်းချရပြီး လက်ဖက်ရည်ဆိုင်များ၊ နွားနို့ကြိုက်နှစ်သက်သူများက နေ့စဉ်ဝယ်ယူလျက်ရှိကြောင်း ဒေသထွက်နွားနို့ရောင်းချသူထံမှ သိရှိရပါသည်။

DOCA(စစ်ကိုင်း)

  စစ်ကိုင်းတိုင်းဒေသကြီး၊ ကန့်ဘလူမြို့ အမှတ်(၂)ရပ်ကွက်တွင် တစ်နိုင်တစ်ပိုင်ကောက်ရိုးမှို စိုက်ပျိုးခြင်းဖြင့် တစ်ဖက်တစ်လမ်းမှ မိသားစုအပိုဝင်ငွေရရှိနေကြောင်း၊ ထိုသို့ကောက်ရိုးမှိုစိုက်ပျိုး ရာတွင် ၆ပေ ၃ပေရှိ မှိုတစ်ဘောင်ကို မှိုမျိုးစေ့ထုတ်(၄)ထုတ်နှင့် ကုန်ကြမ်းပစ္စည်းများဖြစ်သည့် ထုံး အနည်းငယ်၊ ဂျပ်စက္ကူ(၁၀)ပိဿာခန့်၊ ဖွဲနု၊ နွားချေး (၃)အိတ်၊ ဝါး၊ ဗေဒါပင်နှင့် ကောက်ရိုးတို့အသုံး ပြုရကြောင်း၊ (၁၀)ရက်မြောက်နေ့မှာတော့ အောင်မြင်ဖြစ်ထွန်းပြီး ဈေးကွက်ဝင်တဲ့ မှိုတွေကို နှုတ်ယူရောင်းချနိုင်ပါကြောင်း၊ ကိုယ့်မိသားစုအတွက်လည်း ဟင်းတစ်ခွက်ဖြစ်တာကြောင့်  အိမ်ခြံ ဝင်းကျယ်ပြီး မြေပိုရှိတဲ့ သူတွေအနေနဲ့ ကောက်ရိုးမှိုကို စီးပွားဖြစ်မဟုတ်တောင် တစ်ပိုင်တစ်နိုင် စိုက်ပျိုးသင့်ကြောင်း သိရသည်။

      ၂၀၂၅ ခုနှစ်၊ စက်တင်ဘာလ ဒုတိယပတ်အတွင်း ကန့်ဘလူမြို့မဈေးတွင်  ကောက်ရိုးမှို တစ်ပိဿာလျှင် လက်လီဈေး(၁၀၀၀၀)ကျပ်၊ လက်ကားဈေး (၉၅၀၀၀)ကျပ်နှင့် (၅၀)ကျပ်သားလျှင် (၅၀၀၀)ကျပ်ဈေးနှုန်းတို့ဖြင့် ရောင်းချလျှက်ရှိကြောင်း၊ ယခင်အပတ်ဈေးနှုန်းများနှင့် နှိုင်းယှဉ်ပါက ယခုလဒုတိယပတ်အတွင်း ကောက်ရိုးမှိုဈေးနှုန်း အနည်းငယ်ကျဆင်းလျက်ရှိကြောင်း၊ စိုက်ပျိုးသူ ဦးဝင်းဦးထံမှ သိရှိရပါသည်။

DOCA(စစ်ကိုင်း)

      ဧရာဝတီတိုင်းဒေသကြီး ညောင်တုန်းမြို့နယ်  ငါးကန် မွေးမြူးရေးလုပ်ငန်းများကို လုပ်ကိုင်လျှက် လုပ်ကိုင်ဆောင်ရွက်လျှက်ရှိပါသည်။ ညောင်တုန်းမြို့သည် စိုက်ပျိုးရေး အဓိက ထားစိုက်ပျိုးကြသလို မွေးမြူရေးလုပ်ငန်းဖြင့်လည်း စီးပွားဖြစ်ထွန်းအောင် လုပ်ကိုင်ဆောင်ရွက်နေပြီး ညောင်တုန်းမြို့နယ် ထွက်ရှိသော ငါးများကို ရန်ကုန်သို့ တင်ပိုလျှက်ရှိပြီး ရန်ကုန်မှ တဆင့် ပြည်ပပို့ကုန်အဖြစ် ငါးများတင်ပို့နေကြောင်း ငါးမွေးမြူရေးလုပ်ငန်းရှင်မှ ပြောပြ၍ သိရသည်။

         ညောင်တုန်းမြို့နယ်မှ ရန်ကုန်ဈေးကွက်သို့ ဩဂုတ်လအတွင်း တီလားဗီးယားငါး ပိဿာချိန် ၆၅၀၀၀ ထိ တင်ပို့ရောင်းချနိုင်ခဲ့ကြောင်း သိရသည်။ စက်တင်ဘာလ ဒုတိယပတ်အတွင်း  တီလားဗီး ယားငါး ပိဿာချိန်၂၀၀၀၀ ထိသာ တင်ပို့ရောင်းချနိုင်ခဲ့သည်။ 

        ညောင်တုန်းမြို့နယ် မှ ထွက်သော ငါးများကို ပြည်တွင်း ရန်ကုန်ဈေးကွက်ကလဲ တီလားဗီးယားငါးတွေ ဝယ်ယူမှုများကြောင်း  နှစ်စဉ် ငါးပိဿာ ချိန်တွေတော်တော်များများတင်ပို့နေပြီး ရေလုပ်ငန်းရှင်တွေနဲ့ ငါးရောင်းဝယ်ရေ ဒိုင်များ၊ ကုန်သည်တွေပါ အဆင်ပြေလျှက်ရှိကြောင်း၊ ငါးမွေးမြူသူတွေ ငါးအကောင်ရေ ထပ်တိုးမွေးမြူလာကြပြီး  မွေးမြူသည့် တီလားဗီးယားငါးနှင့် သဘာဝအတိုင်း ဖမ်းဆီးရရှိသည့် တီလားဗီးယား ငါးများထွက်ရှိကြောင်း၊ ညောင်တုန်းမြို့နယ်မှ ရန်ကုန်ဈေးကွက်သို့ တင်ပို့ရောင်းချနေသည့် တီလားဗီး ယားငါးတစ်ပိဿာလျှင် ငွေကျပ် ၁၂၀၀၀ ထိ ဈေးပေါက်နေကြောင်း သိရှိရသည်။

DOCA(ဧရာဝတီ)

          ဧရာဝတီတိုင်းဒေသကြီး မအူပင်ခရိုင် ညောင်တုန်းမြို့နယ်မှ ကွမ်းသီးခြောက်များ ဝယ်ယူမှုအား ကောင်းနေပြီး အ‌ရောင်းအဝယ်ကောင်းမွန်နေကြောင်း ညောင်တုန်းမြို့နယ် ကွမ်းသီးရောင်းဝယ် ရေးလုပ်ငန်းရှင် ဦးရာမွန်က ပြောပြ၍ သိရသည်။ ညောင်တုန်းမြို့နယ်မှ ကွမ်းသီးခြောက်များကို ဩဂုတ်လ မှ နိုဝင်ဘာလ ၁၅ ရက်နေ့ထိ ဝယ်ယူမှုအားကောင်းလာပြီး အရောင်းအဝယ်ကောင်းမွန်နေကြောင်း၊ အဆိုပါဒေသမှ ကွမ်းသီးခြောက် တစ်ပိဿာလျှင် ငွေကျပ် ၁၈၀၀၀ ထိ ဈေးပေါက်နေကြောင်း သိရသည်။

        ညောင်တုန်းမြို့နယ်ဘက်ကထွက်တဲ့ ကွမ်းသီးခြောက်တွေကို ရန်ကုန်ဈေးကွက်ဘက်က ဝယ်ယူကြောင်း၊ လက်ရှိကွမ်းသီးခြောက်တွေက ပိုမိုထွက်ရှိလာပြီး ကွမ်းသီးခြောက်က အခုအချိန်မှာ အရောင်းအဝယ် အားကောင်းနေပါတယ်။ ညောင်တုန်းမြို့နယ်တွင် ကွမ်းသီးခြောက် စိုက်ဧက  ၁၅၅ ဧကရှိပြီး ၁ဧကတွင် အပင်ရေ ၃၀၀ ခန့်စိုက်ပျိုးနိုင်ပြီး ကွမ်းသီးအပင်မျိုး အနေဖြင့် တစ်လုံးကို ၅၀၀  ထိ ပေးဝယ်ရကြောင်း၊ ၁ဧက ကုန်ကျစရိတ်အနေဖြင့် ၃၅၀၀၀၀ခန့်သာ ကုန်ကျကြောင်း၊ ကွမ်းသီးပင် နှစ်ရှည်ပင်ဖြစ်၍ နှစ်တစ်ပတ်လည်လုံး အသီးသီး၍ တစ်နေ့ကို အလုံးရေ ၈၀၀-၉၀၀ ထိ ထွက်ရှိကြောင်း၊ တစ်နှစ်တွင် ၈လလောက် ကွမ်းသီးထွက်ရှိသည်။ ၁လကို အလုံးရေ ၂သောင်းခွဲထိ ထွက်ရှိပြီး ယနေ့ ကွမ်းသီးခြောက် ၁လုံးကို ၂၀၀ကျပ်ဖြင့် ရောင်းချရပြီး တစ်နှစ်ကို အကျိုးအမြတ် သိန်း၂၀အကျိုးအမြတ်ရရှိကြောင်းသိရသည်။ ညောင်တုန်းမြို့နယ်တွင် ကွမ်းသီးစိမ်း များကို ဒေသကွမ်းသီးရောင်းဝယ်ရေးလုပ်ငန်းရှင်များကဝယ်ယူပြီး စနစ်တကျသန့်စင်ထုပ်ပိုးကာ ရန်ကုန်ဈေးကွက်သို့ အများဆုံးတင်ပို့ရောင်းချလျက်ရှိကြောင်း ညောင်တုန်းမြို့နယ် ကွမ်းသီးရောင်း ဝယ်ရေးပွဲရုံပိုင်ရှင် ဒေါ်သူအောင်က ပြောပြ၍ သိရသည်။

DOCA(ဧရာဝတီ)