ပြည်တွင်းကုန်သွယ်မှုသတင်း

     ကျိုက်မရောမြို့နယ်၊ မြွေဟောက်ကျေးရွာ၌ မိုးသခွားသီးများကို တစ်နိုင်တစ်ပိုင်စိုက်ပျိုးကြသူများ ယခုအချိန်၌ စျေးကောင်းရရှိ၍ မိသားစုဝင်‌ငွေတိုးလျက်ရှိကြောင်း သိရသည်။

     သခွားသီးကို ဝါခေါင်လကွယ်မှစ၍ မျိုးများချကာ ရက်ပေါင်း (၂၅) ရက်အကြာ၌ အညွှန့် လေးများထွက်လာရန် တိုင်ထောင်ပေးရပြီး အပွင့်စပွင့်ချိန်တွင် အသီးများကြီးထွားစေရန် အားဆေးဖြန်းပေးရကြောင်း၊ စိုက်ပြီး ရက် (၃၀) အကြာတွင် သခွားသီးအကင်းလေးများ စတင် သီးလာပြီး ရက်ပေါင်း (၄၅) ရက်အကြာတွင် သခွားသီးများ လှိုင်လှိုင်ထွက်ရှိလာကြပြီး စျေးကွက်တွင် ရောင်းချနိုင်ပြီးဖြစ်ကြောင်း မြွေဟောက်ကျေးရွာမှ သခွားသီးတစ်နိုင်တစ်ပိုင် စိုက်ပျိုးသူ ဦးအုန်းရွှေကပြောသည်။

     သခွားသီးများ စတင်ထွက်ရှိချိန်၌ တစ်ကြိမ်ခူးလျှင် ပိဿာချိန် (၆၀)ခန့်ထိ ခူးနိုင်ပြီး တစ်ပိဿာလျှင် ၁၅၀၀ ကျပ်ခန့် ဖောက်သည်ပေးရပြီး တစ်ပတ်လျှင် သခွားသီးရောင်းချရငွေ နှစ်သိန်းကျော်ထိ ဝင်ငွေရရှိသဖြင့် မိသားစု စားဝတ်နေရေး အဆင်ပြေလျက်ရှိကြောင်း သိရသည်။ သခွားသီးမှာ လူတိုင်းကြိုက်နှစ်သက်သည့် တို့စရာအသီးအနှံဖြစ်ကာ မြန်မာတို့၏ ထမင်းဝိုင်းတွင် မပါမဖြစ်တို့စရာအပြင် သခွားသီးသုတ်အဖြစ်လည်း စား၍ရကြောင်း သိရသည်။

DOCA (မွန်)

          စစ်ကိုင်းတိုင်းဒေသကြီး၊ မုံရွာမြို့တွင် ရာသီပေါ်သီးနှံများကို စိုက်ပျိုးရောင်းချလျက်ရှိရာ ပဲစောင်းလျားသီးနှင့် ဟင်းနုနွယ်ရွက်များကို မိမိတို့နေအိမ် ခြံဝင်းများတွင်လည်းကောင်း၊ မိမိပိုင်လယ်တောများတွင်လည်းကောင်း တစ်နိုင်တစ်ပိုင်စိုက်ပျိုး၍ မုံရွာမြို့ပေါ်ရှိ မန်ကျည်းပင်ဈေးနှင့် မုံရွာမြို့ပေါ်ဈေးများ၊ ရပ်ကွက်ဈေးများတွင် လာရောက်ရောင်းချလျက်ရှိကြောင်း သိရှိရပါသည်။ ပဲစောင်းလျားသီးနှင့် ဟင်းနုနွယ်ရွက်ကို ပြုတ်၍ မြေပဲဆံ၊ ပဲမှုန့်တို့ဖြင့် သုပ်စားကြသလို ငပိရည်နှင့်တွဲဖက်၍ အတို့အမြုပ်အဖြင့်လည်း စားသုံးကြပါသည်။

          ၂၀၂၅ ခုနှစ်၊ စက်တင်ဘာလ ဒုတိယပတ်တွင် မုံရွာမြို့၊ သာစည်ဈေးတွင် ပဲစောင်း လျားသီး(၂၅)ကျပ်သားလျှင် (၁၀၀၀/-)ကျပ်၊ ၁ပိသာလျှင် (၄၀၀၀)ကျပ်နှင့် ဟင်းနုနွယ်ရွက် ဈေးနှုန်းမှာ အစီးသေးတစ်စီးလျှင် (၃၅၀ /၅၀၀ ) ကျပ်ဖြင့် ရောင်းချလျက်ရှိကြောင်း သိရှိရပါသည်။

DOCA(စစ်ကိုင်း)

        ကျွန်းလှမြို့ ပိတောက်မြိုင်ရပ်ကွက်တွင် မိသားစုအပိုဝင်ငွေရရှိရေးအတွက်သော်လည်း၊ ဝါသနာအရသော်လည်းကောင်း  စိုက်ပျိုးရေးနှင့် မွေးမြူရေးလုပ်ငန်းများကို လုပ်ကိုင်လျက်ရှိပြီး၊  ပန်းပျိုးပင်မျိုးစုံဖြစ်သည့် တယူဇနာပန်း(ခေါ်) တောင်ကြီးသနပ်ခါးပန်း၊ ငှက်ပျောပန်း၊ ပိန်းပန်း၊ ရှင်သီဝလိဂမုန်းပန်း၊ သစ်ခွပန်း၊ ဒေစီပန်း၊ သဇင်ပန်း၊ ခွာညိုပန်းနှင့် နှင်းဆီပန်းပင်များကိုလည်း စိုက်ပျိုးရောင်းချရန်အတွက်  တစ်နိုင်တစ်ပိုင် စိုက်ပျိုးလာကြသည်။

         ပိန်းပန်းသည် အရောင်အသွေးစုံရှိသည့်အနက် အနီရောင်း၊ ပန်းရောင်းနှင့် အဖြူတို့ကိုသာ အကြိုက်များကြသည်။  ၂၀၂၅ ခုနှစ်၊ စက်တင်ဘာလ ဒုတိယပတ် ကျွန်းလှမြို့၏ ပိန်းပန်းပျိုးပင်ဈေးနှုန်းနှင့် ပိန်းပန်းအပွင့်ဈေးနှုန်းအနေဖြင့် ပိန်းပန်းပျိုးပင် တစ်ပင်လျှင်(၅၀၀၀)ကျပ် ဈေးနှုန်းရှိပြီး ပိန်းပန်း တစ်ပွင့်လျှင် (၅၀၀)ကျပ် ဈေးနှုန်းတို့ဖြင့် ရောင်းချလျက်ရှိကြောင်း ပန်းဥယာဉ် စိုက်ပျိုး ရောင်းချသူ ထံမှ သိရှိရပါသည်။

DOCA(စစ်ကိုင်း)

   တနင်္သာရီတိုင်းဒေသကြီး၊ မြိတ်ခရိုင်သို့ ဝင်ရောက်လာသော သီးနှံများထဲမှ  ခရမ်းချဉ်သီး စျေးနှုန်း အနည်းငယ်မြင့်တက်လျက်ရှိကြောင်းသိရှိရပါသည်။ မြိတ်မြို့တွင်စိုက်ပျိုးနိုင်သော်လည်း အပင်ပျက်စီးမှုမြန်သောကြောင့် စိုက်ပျိုးမှုမရှိသလောက်နည်းပါးကြောင်းသိရှိရပါသည်။ ကားလမ်း အခြေအနေ၊ ဒေသထွက်လုံလောက်အောင် မစိုက်ပျိုးနိုင်မှုကြောင့် စျေးနှုန်းမြင့်တက်လျက်ရှိပြီး ယခုအချိန် စက်တင်ဘာလစျေးနှုန်းအရ ခရမ်းချဉ်သီးစျေးနှုန်းမှာ ကျပ် ၇၀၀၀ခန့်ရှိကြောင်း သိရှိရပါသည်။ ယခင်သြဂုတ်လများတွင်ခရမ်းချဉ်သီး‌စျေးနှုန်းမှာ ၃၅၀၀ကျပ်ခန့်သာရှိပြီး စျေးနှုန်း နှိုင်းယှဉ်ချက် အရ ကျပ် ၃၅၀၀ကျပ်ခန့်စျေးနှုန်းမြင့်တက်သွားကြောင်းသိရှိရပါသည်။ ဒေသတွင်း စားသုံးရန်ခရမ်းချဉ်သီးကို ရန်ကုန်မြို့ ကုန်စည်ဒိုင်များမှ မှာယူလျက်ရှိကြောင်းသိရှိရပါသည်။

DOCA(တနင်္သာရီ)

   ပင်လယ်ကမ်းရိုးတန်းဒေသဖြစ်သည့်အလျောက် ‌ရေထွက်ကုန်များ အများအပြား ထွက်ရှိပြီး ဒေသထွက်ကုန်များ၊ ရေထွက်ကုန်များနှင့် စိုက်ပျိုးသီးနှံများကို တစ်နိုင်တစ်ပိုင်ရောင်းချလျက် ရှိပါသည်။ မြိတ်မြို့ပေါ်တွင် ခရု၊ ပုဇွန်၊ ကဏန်း စသည့်တို့ကို လတ်ဆတ်စွာရနိုင် သောကြောင့် ခရီးသွားများလည်း အင်မတန် ကြိုက်နှစ်သက်ကြသော နေရာဒေသတစ်ခု ဖြစ်သည်။ ဈေးများ ပေါ်တွင် ရေထွက်ပစ္စည်းများရောင်းချရာမှ ခရုတရွင်းပြားသည်လည်း ဈေးကောင်း ရရှိကြောင်း သိရှိရပါသည်။ခရုတရွင်းပြားကို အခွံမာကိုချွတ်၍ အသားချည်းသာ ရောင်းချကြပါသည်။

   ယခုလ စက်တင်ဘာလတတိယပတ်တွင် ခရုတရွင်းပြားကို ဆယ်လုံးတစ်ထုတ်လျှင် (၁၂၀၀၀) ကျပ်ဖြင့် ရောင်းချကြကြောင်း သိရှိရပါသည်။

DOCA(တနင်္သာရီ)