ပြည်တွင်းကုန်သွယ်မှုသတင်း

ပဲခူးတိုင်းဒေသကြီးပြည်ခရိုင်သည် ဆန်စပါးနှင့်ပဲမျိုးစုံ အဓိကစိုက်ပျိုးသော်လည်း ကြက်သွန်နီကို နိုဝင်ဘာလနှင့် ဒီဇင်ဘာလတို့တွင် စတင်စိုက်ပျိုးပြီး မတ်လနှင့် ဧပြီလများတွင် တူး ဖော်ကာ တစ်နိုင်တစ်ပိုင်စိုက်ပျိုးသည့် ခရိုင်ဖြစ်၍ စိုက်ဧကအားဖြင့် ပြည်ခရိုင်အတွင်း ပန်းတောင်း မြို့နယ်တွင် ၃၂ ဧက ရွှေတာင်မြို့နယ်တွင် ၆၇ဧက ကို ခုနှစ် နိုဝင်ဘာလကုန်အထိ စိုက်ပျိုးပြီးစီး မှုရှိကြောင်းသိရသည်။ ပြည်ခရိုင်အတွင်း စားသုံးမှုနှင့် နှိုင်းယှဉ်ပါက လိုအပ်ချက်ရှိသဖြင့် ကြက်သွန်နီအဓိကစိုက်ပျိုးရာ မကွေးတိုင်း၊ မန္တလေးတိုင်းတို့မှ တင်သွင်းကာ ရောင်းဝယ်စားသောက် ကြရသည်။ ယခုဒီဇင်ဘာလ နောက်ဆုံးပတ်အတွင်း ကြက်သွန်နီ အသစ်များ ပြည်ဈေးကွက်သို့ ရေနံချောင်း၊ တောင်တွင်းကြီး၊ ကျောက်ပန်းတောင်း၊ ဆိပ်ဖြူ စသည့်နယ်ဘက်မှ ကြက်သွန်နီအသစ် များနေ့စဉ်ပိဿာချိန် (၅၀၀၀)ခန့် အဝင်ရှိပြီး ဒီဇင်ဘာလတတိယပတ်အစမှ စတင်ဝင်ရောက်မှုရှိကာ တစ်ပတ်အတွင်း ပိဿာချိန် (၃၀၀၀၀)ပတ်လည်ခန့် အဝင်ရှိနေသည်။ ပြည်ဈေးကွက်သို့ ယခုကာလ တွင် ကြက်သွန်နီ အသစ်များသာ ဝင်ရောက်မှုရှိပြီး အဟောင်းမှာ အဝင်မရှိတော့ဘဲ ပြည်ဈေးကွက်ရှိ ပစ္စည်းလက်ကျန်ဖြင့်သာ ရောင်းဝယ်မှုရှိနေသည်။ အဟောင်းလက်ကျန်မှာ ပိဿာချိန်အားဖြင့် လက်ကားပွဲရုံများနှင့် လက်လီစည် ပင်ဈေးများတွင် (၂၈၀၀၀)ကျပ်ရှိနေပြီး ပစ္စည်းအရည်အသွေးမှာ အစို့ပေါက် အခွံချွတ်များ ဖြစ်နေသဖြင့် အရောင်းအဝယ်မှာ အသစ်နှင့်အတူ မျှတစွာရောင်းဝယ်မှု ရှိနေသည်။ နယ်ကျော်အရောင်းအဝယ်အနေဖြင့် ပြည်ဈေးကွက်မှတစ်ဆင့် သာယာဝတီခရိုင်၊ နတ်တလင်းခရိုင်၊ ပန်းတောင်း(ဥသျှစ်ပင်)နှင့် ရေကြောင်းမှလည်း ထုံးဘို၊ ရွှေဘုံသာ၊ ဆင်တဲ၊ ဧရာဝတီတိုင်းတို့သို့ ရက်ခြားစီးဆင်းမှုရှိနေပြီး ဝင်ရောက်မှု၏ ထက်ဝက်ခန့် ရောင်းဝယ်မှုရှိနေသည်။ ဈေးနှုန်းအနေဖြင့် ပွဲရုံ လက်ကားဈေးမှာ အသစ် (ကြီး၊လတ်၊သေး) တစ်ပိဿာကို ကျပ်(၂၈၀၀-၃၀၀၀-၃၂၀၀)နှုန်း၊ အဟောင်း လက်ကားတစ်ပိဿာကို ကျပ်(၃၀၀၀-၃၃၀၀-၃၆၀၀)နှုန်း နှင့် မြို့ပေါ်လက်လီဈေးတစ်ပိဿာလျှင် အသစ် ကျပ်(၃၅၀၀-၃၈၀၀-၄၀၀၀)နှုန်း၊ အဟောင်းလက်လီ တစ်ပိဿာ ကျပ်( ၃၇၀၀-၄၀၀၀-၄၂၀၀)နှုန်း တို့ဖြင့် အသီးသီးရောင်းဝယ်မှုရှိနေ ကြောင်းသိရသည်။

DOCA(ပဲခူး)

“နွေအချို၊ မိုးအခါး၊ ဆောင်းအချဉ်”ဟူသော ဆိုရိုးစကားနှင့်အညီ ရာသီပေါ်ဇီးဖြူသီးကို ဈေးများတွင် ရောင်းချနေပြီဖြစ်ပါသည်။ ယခုကဲ့သို့ ရာသီချိန်၌ ထမင်းစားပွဲမှာ ဇီးဖြူသီးထောင်း (သို့) ဇီးဖြူသီးထည့်၍ ချက်ထားသော ဟင်းလျာတစ်မျိုးမျိုးကို စားသုံးကြပါသည်။ ဇီးဖြူသီးသည် နေရာတိုင်း၊ ဒေသတိုင်း၌ ပေါက်ရောက်တတ်သော အပင်တစ်မျိုး ဖြစ်ပါသည်။ ဆီးဖြူသီးသည် အကြီးမျိုး၊ အငယ်မျိုး၊ အချဉ်မျိုး၊ အချိုမျိုး စသည်ဖြင့် ကွဲပြားမှုရှိ သော်လည်း စွမ်းရည် သတ္တိများ မှာ အတူတူပင်ဖြစ်ပါသည်။ တချို့ဒေသများတွင် ဆီးဖြူသီးကို သျှိသျှားသီးဟူ၍လည်း ခေါ်ဝေါ် ကြောင်းသိရှိရပါသည်။ ဒေသထွက်ဇီးဖြူသီးများကို မိုးရာသီနှင့် ဆောင်းရာသီများ၌ ဆွတ်ခူး ရောင်းချကြပါသည်။ ဇီးဖြူသီးအလုံးချော နို့ဆီဘူးတစ်ဘူးလျှင် ကျပ် (၆၀၀)၊ ဇီးဖြူသီး အလုံး အသေး နို့ဆီဘူးတစ်ဘူးလျှင် ကျပ် (၅၀၀) ဖြင့် ရောင်းချနေကြောင်း သိရပါ သည်။

ဆီးဖြူပင်သည် မြန်မာနိုင်ငံတွင် သဘာဝအလျောက်သော်လည်းကောင်း၊ စိုက်ပျိုးခြင်းဖြင့် သော်လည်းကောင်း ပေါက်ရောက်ပါသည်။ ရွက်ကြွေပင်လတ်မျိုးဖြစ်ပြီး အပင်ရဲ့ အကိုင်းအခက် တလျှောက်တွင် စိမ်းဝါရောင်အပွင့်များ အဆုပ်လိုက် အဆုပ်လိုက်ပွင့်ပါသည်။ ဆီးဖြူသီး၏ ပုံစံမှာ လုံးဝိုင်းပြီး အမြှောင်း ၆ မြှောင်းပါရှိပါသည်။ သူရဲ့အစေ့ကတော့ သုံးတောင့် ပုံစံ ရှိ ပြီး ဆီးဖြူသီးသည် အစိမ်းဖျော့ရောင်ရှိပြီး အထဲကအစေ့သည် အစိမ်းရင့်ရောင်ရှိပါ သည်။ ချဉ်ပေါင်းသည်တိုင်းလိုလိုမှာ ဆီးဖြူသီးပါလေ့ရှိပြီး ဆီးဖြူသီးကို အမျိုးမျိုးလုပ်စားကြပါသည်။ ထောင်းပြီး သုပ်စားနိုင်သလို အလုံး လိုက်ဆားရည်စိမ်ထားပြီး အတို့အမြုပ်အဖြစ်နဲ့ စားတာလည်းရှိပါတယ်။ ဒါ့အပြင် ငါးပိတို့ ခရမ်းချည် သီးတို့နဲ့ရောပြီး ဇီးဖြူသီးငပိချက်အနေနဲ့လည်း စားကြပါသည်။ အခုနောက်ပိုင်းမှာဆိုရင် ဆီးဖြူသီး ကိုဖျော်ရည်လုပ်သောက်ကြတာမျိုးလည်း ရှိလာကြပါသည်။

DOCA(ပဲခူး)

ဒီဇင်ဘာလကုန်ပတ် ပြည်ပဲဈေးကွက်မှာဘိုကိတ်ပဲသစ်များ ဝင်‌ရောက်မှုအနေဖြင့် ဝင်ရောက်မှုများလာပြီး တစ်ရက်အိတ် (၁၀၀မှ ၂၀၀)‌ကျော်အထိ ဝင်‌ရောက်မှုရှိလာခဲ့ပါသည်။ ပြည်အနီးတဝိုက်ဒေသများမှ ဝင်ရောက်မှုရှိပြီး ဝယ်လိုအားအနေဖြင့် လက်လီ/လက်ကား ရောင်းဝယ်မှုဖြစ်ကြပါသည်။ လက်ကားရောင်းဝယ်မှုအနေဖြင့် ရန်ကုန်ဝယ်လက်သမားများ အဓိက ဝယ်ယူမှုရှိကာအိတ် (၂၀၀)ကျော်နေ့စဉ်ဝယ်ယူကြသလို ဒေသတွင်း လက်လီသမားများမှလည်း နေ့စဉ်ဝယ်ယူကြတာကြောင့် ပဲအဝင်ရှိလာသလောက် အရောင်းအဝယ်ဖြစ် ခဲ့သည်ဟုသိရပါသည်။ ပဲဈေးနှုန်းများ တစ်တင်း (၉၃၀၀၀)ကျပ်ဖြင့် အရောင်းအဝယ်ဖြစ်သည့်အတွက် ပဲဈေးကွက်များတွင် ဈေးကောင်းရသည်ဟု ဆိုရသော်လည်း ပဲနီပြား၊ ထောပတ်ပဲ ဈေးထက်လျော့နည်းနေ ခဲ့ပါသည်။ ယခင်နှစ်က ဘိုကိတ်ပဲသီးနှံယခုကာလဈေးနှုန်းမှာ တစ်တင်း (၇၂၅၀၀)ကျပ်သာ ရရှိခဲ့တာကြောင့် ယခုနှစ်ဘိုကိတ်ပဲသီးနှံဈေး မှာ ယခင်နှစ်ထက်ဈေး ကိုရနေခဲ့ကြောင်းသိရပါသည်။

DOCA(ပဲခူး)

ပြည်ဈေးကွက်မှာဆောင်းပဲသစ်များ ဝင်ရောက်လျက်ရှိရာ ပဲတီစိမ်းသီးများ ဝင်ရောက်မှုများ နေခဲ့ပါသည်။ တစ်ရက်လျှင် အိတ် (၈၀၀/၉၀၀) ကျော်အထိဝင်‌ရောက်ခဲ့ပြီး ဝယ်လိုအားအနေဖြင့် ဝင်ရောက်လာသမျှ အဝယ်ရှိကြောင်းသိရပါသည်။ ရန်ကုန်၊ မန္တလေးလိုင်းသမားများ အဓိက ဝယ်ယူမှုရှိတာကြောင့် အဝင်ရှိခဲ့သလောက် အရောင်းအဝယ်ဖြစ်ကြောင်း သိရပါသည်။ ပဲဈေးနှုန်း အနေဖြင့် ပိဿာ (၂၀)တစ်တင်းလျှင် (၉၇၀၀၀)ကျပ် မှ (၉၈၀၀၀၀)ကျပ်အထိ ပဲအရည်အသွေး အလိုက် ဈေးကွာခြားမှုရှိခဲ့ပါသည်။  ပဲတီစိမ်းသီးနှံသည် ယခင်နှစ်ကပြည်ပဝယ်လက်ဈေးကွက်မှာ မတ်ပဲ၊ ပဲစဉ်းငုံ သီးနှံများနှင့်ယှဉ်လျှင်ဈေးအေးခဲ့သည့် သီးနှံဖြစ်ခဲ့သည့်အတွက် တစ်ဆင့် (၆၄၀၀၀)ကျပ်ဖြင့်သာ ရောင်းဝယ်ခဲ့ရပါသည်။ ယခုနှစ်ပဲဈေးနှုန်းအရ ယခင်နှစ်နှင့်ယှဉ်လျှင် ဈေးပိုရ လာသည်ဆိုသော်လည်း မတ်ပဲနှင့်ပဲစဉ်းငုံသီးနှံဈေးမှာ ဆက်လက်လျော့နည်းနေခဲ့ကြောင်း သိရပါ သည်။

DOCA(ပဲခူး)

ပြည်မြို့၏ဈေးကွက်များအတွင်းသို့ ဆောင်းရာသီဒီဇင်ဘာလတွင် သင်္ဘောသီးအမှည့်များ လာရောက်ရောင်းချကြောင်း သိရပါသည်။ ဆောင်းရာသီတွင် သင်္ဘောသီးအမှည့်များမှာ ဓါတ်စာ တစ်ခုလည်းဖြစ် လှိုင်လှိုင်ပေါတဲ့အချိန်လည်းဖြစ်၍ ဈေးမှာလည်း အကြီးတစ်လုံးလျှင် (၂၀၀၀) ကျပ်မှ အသေးတစ်လုံးလျှင် (၁၅၀၀)ကျပ် အထိရောင်းချကြောင်းသိရပါသည်။ သင်္ဘောသီးများ ရင့်မှည့်ချိန် ဖြစ်၍ သင်္ဘောသီးစိမ်းများမှာ ရှားပါးလာမှုကြောင့် ဈေးမြင့်တက်လာပါသည်။ သင်္ဘောသီးအစိမ်း များကို အသုတ်သမားများက ဝယ်ယူမှုရှိ၍ အကြီးတစ်လုံးလျှင် (၁၅၀၀)ကျပ်နှင့် အသေးတစ်လုံးလျှင် (၁၀၀၀)ကျပ်ဖြင့် ရောင်းချလျက်ရှိပါသည်။

ပြည်မြို့ဈေးကွက်များသို့ လာရောက်ရောင်းချလျက်ရှိသော သင်္ဘောသီးများကို ရွှေဘုံသာရွာ ဘက်မှ လာရောက်ရောင်းချကြသလို ပြည်မြို့အနီးတဝိုက်ရှိကျေးရွာများမှလည်း လာရောက်ရောင်း ချကြပါသည်။ သင်္ဘောသီးအစိမ်းများမှာ ယခင်နှစ်က (၇၀၀)ကျပ်မှ (၅၀၀)ကျပ် ရောင်းချရာမှ ယခုနှစ်တွင် (၁၅၀၀)ကျပ်၊ (၁၀၀၀)ကျပ်ဖြင့် ဈေးနှုန်းမြင့်တက်လာခဲ့ပါသည်။

DOCA(ပဲခူး)