ပြည်တွင်းကုန်သွယ်မှုသတင်း

       ၂၀၂၄ခုနှစ်၊ ဖေဖော်ဝါရီလ (ပထမပတ်)အတွင်း ပဲမျိုးစုံများ၏ ဈေးနှုန်းအခြေအနေမှာ  ပဲတီစိမ်း(ရွှေဝါ) ၂၀ ပိဿာ (တစ်တင်း) ကျပ် ၈၅၀၀၀၊ ပဲတီစိမ်း၂၀ ပိဿာ (တစ်တင်း) ကျပ် ၆၇၀၀၀၊ မတ်ပဲ၂၀ ပိဿာ (တစ်တင်း) ကျပ် ၁၁၅၀၀၊ ပဲလွန်းဖြူ ၂၀ ပိဿာ(တစ်တင်း)ကျပ် ၇၂၀၀၀၊ ဘိုကိတ်၂၀ ပိဿာ (တစ်တင်း)ကျပ် ၇၅၀၀၀၊ ပဲပုပ်၂၀ပိဿာ(တစ်တင်း)ကျပ် ၆၁၄၀၀၊ မြေပဲ(အသစ်)၂၀ ပိဿာ (တစ်တင်း) ကျပ် ၁၆၂၀၀၀  ဈေးနှုန်းဖြစ်ပေါ်ခဲ့သည်။ ၎င်းလ၏ (စတုတ္တပတ်)အတွင်းတွင် ပဲတီစိမ်း(ရွှေဝါ) ၂၀ ပိဿာ (တစ်တင်း) ကျပ် ၇၃၅၀၀၊ ပဲတီစိမ်း၂၀ ပိဿာ (တစ်တင်း) ကျပ် ၆၅၀၀၀၊ မတ်ပဲ၂၀ ပိဿာ (တစ်တင်း) ကျပ် ၉၆၀၀၀၊ ပဲလွန်းဖြူ ၂၀ပိဿာ(တစ်တင်း)ကျပ် ၆၃၀၀၀၊ ဘိုကိတ်၂၀ ပိဿာ (တစ်တင်း) ကျပ် ၇၂၀၀၀၊ ပဲပုပ်၂၀ပိဿာ(တစ်တင်း)ကျပ် ၆၁၀၀၀၊ မြေပဲ(အသစ်)၂၀ ပိဿာ (တစ်တင်း) ကျပ် ၃၆၃၀၀၀ ဈေးနှုန်းဖြစ်ပေါ်နေသည်။

       သို့ဖြစ်၍ မွန်ပြည်နယ်၏ ဖေဖော်ဝါရီလ(ပထမပတ်)နှင့်နှိုင်းယှဉ်ပါက စတုတ္ထပတ် တွင် ပဲဈေးနှုန်းအခြေအနေမှာ တချို့ပဲများမှာ ၁၀၀၀ကျပ်မှ ၁၀၀၀၀ကျပ်ခန့်အတွင်း သိသာစွာ ဈေးနှုန်းကျဆင်းလာကြောင်းသိရပါသည်။ ထိုသို့ ပဲဈေးနှုန်းကျဆင်းရခြင်း သည် ပဲထွက်ရာသီချိန်ဖြစ်ကြောင်းနှင့် မော်လမြိုင်သို့ ပဲမျိုးစုံဝင်ရောက်မှုရှိနေခြင်း ကြောင်း ဖြစ်သည်ဟု သုံးသပ်ရပါ၍ ဈေးနှုန်းကျဆင်းကြောင်း သိရှိရပါသည်။

DOCA(မွန်)

   ပြင်ဦးလွင်မြို့သည် ရာသီဥတုကောင်းမွန်ပြီး အမြဲတမ်းစိမ်းလန်းစိုနေသည့်အတွက် သီးနှံများ စိုက်ပျိုးရာ၌ ကောင်းမွန်သည့်သာယာလှပသော တောင်ပေါ်ဒေသဖြစ်ပါသည်။ ယခုလိုအေးမြသည့် ဆောင်းရာသီအချိန်တွင် စိုက်ပျိုးလုပ်ကိုင်သူများက ရာသီပေါ်သီးနှံများကို မိသားစုတစ်ပိုင်တစ်နိုင် စိုက်ပျိုးကြသလို ဈေးကွက်အတွင်း တင်ပို့ရောင်းချရန်အတွက် စီးပွားဖြစ်စိုက်ပျိုးလုပ်ကိုင်သူများလည်းရှိကြောင်း သိရပါသည်။

     ယခုလအတွင်း ဈေးကွက်အတွင်းအရောင်းအဝယ်ဖြစ်နေသည်မှာ ပြင်ဦးလွင်ဒေသထွက် ရာသီချိန်မုန်ညှင်းဖြူနှင့် ဂေါ်ဖီထုပ်များ ဖြစ်ပါသည်။ ဈေးနှုန်းအနေဖြင့် ယခင်နှစ် မုန်ညှင်းဖြူထုပ် တစ်ပိဿာလျှင် (၄၀၀၀) ကျပ်၊ ဂေါ်ဖီထုပ် တစ်ထုပ်လျှင် (၁၅၀၀) ကျပ်ဖြင့်ရောင်းချမှုရှိခဲ့ပြီး ယခုနှစ်တွင် မုန်ညှင်းဖြူထုပ် တစ်ပိဿာလျှင် (၂၀၀၀) ကျပ်၊ ဂေါ်ဖီထုပ် တစ်ထုပ်လျှင် (၅၀၀) ကျပ်မှ (၃၀၀) ကျပ်အထိသာ ရောင်းချလျက်ရှိကြောင်း၊ စိုက်ပျိုးလုပ်ကိုင်သူများပြားလာပြီး လမ်းပန်းဆက်သွယ်ရေးအနေဖြင့်လည်း ကုန်ပစ္စည်းသယ်ယူစရိတ်မြင့်မားလာ၍ တခြား ဒေသ များသို့ တင်ပို့ ရောင်းချမှုနည်းပါး၍လည်းကောင်း၊ ယခင်နှစ်လောက်ဈေးရရှိမှု နည်းပါးကြောင်း၊ ရာသီသီးနှံဖြစ်သည့်အတွက် မုန်ညှင်းဖြူထုပ်နှင့် ဂေါ်ဖီထုပ်များကို လတ်လတ်ဆတ်ဆတ်ကြော်စား ခြင်းနှင့် အသားနှင့်ရော၍ကြော်စားခြင်းဖြင့်လည်းကောင်း အမျိုးမျိုးချက်ပြုတ်စားနိုင်ပြီး ကျန်းမာရေး အတွက်လည်း ကောင်းမွန်သည့်အတွက် ဈေးကွက်အတွင်း အရောင်းအဝယ်ဖြစ်နေကြောင်း သိရှိရ ပါသည်။

DOCA(ရှမ်း)

    ယခုတစ်ပတ်တွင် ပြည်မြို့ပေါ်ဈေးကွက်များအတွင်း သံပုရာသီးနှင့်ရှောက်သီးများ ရှားပါး၍ ဈေးမြင့်တက်မှုရှိနေကြောင်း သိရှိရပါသည်။ ယခင်မိုးတွင်းစိုက်သံပုရာသီးနှင့် ရှောက်သီးများမှာ မိုးရေရ၍ အလုံးချောကာ ပေါများသဖြင့် ဈေးနှုန်းအနေဖြင့် ဈေးချိုသော်လည်း ယခု ဆောင်းတွင်းကာလ ရေသွင်း စိုက်ပျိုးရသဖြင့် ရှားပါးကာ ဈေးမြင့်ရခြင်းဖြစ်ကြောင်း သိရှိရပါ သည်။ ပြည်မြို့ပေါ် ဈေးများသို့ ယခုအချိန်တွင် ဇီးအုပ်၊ နတ်တလင်းနှင့် ရွှေတောင်ဘက်မှ အဝင်ရှိနေပြီး တစ်ပတ်လျှင်ရက်ခြား သံပုရာသီးနှင့် ရှောက်သီးအလုံး ၁၀၀၀၊ ၁၅၀၀ ခန့် ဝင်ရောက်မှုရှိနေပါသည်။ ဈေးကွက်အတွင်း သံပုရာသီးတစ်လုံးလျှင် ကျပ် ၃၅၀-၄၀၀ ရှိပြီး ရှောက်သီးတစ်လုံးလျှင် ကျပ် ၇၀၀-၈၀၀-၁၀၀၀ နှုန်းတို့ဖြင့် အသီးသီး ရောင်းဝယ်မှုရှိကြောင်း သိရှိရပါသည်။

DOCA(ပဲခူး)

      ရွှေဖရုံသီး စိုက်ပျိုးရာတွင် ပူနွေးသောရာသီတွင်စိုက်ပျိုးလျှင် ပိုမိုဖြစ်ထွန်းပါသည်။ သက်တမ်းမှာ (၄)လကြာမြင့်၍ မြေဩဇာအနေဖြင့် နုန်းဆန်သောမြေ၊ မြေနီသဲဝန်း မြေများတွင် ကောင်းမွန်ဖြစ်ထွန်းပါသည်။ ရွှေဖရုံပင်အား စိုက်ပျိုးလျှင် (၃)ပေခြား တစ်တန်းနှင့်တစ်တန်း (၂၀)ပေခွာ၍ တစ်ကျင်းလျှင် အစေ့(၃-၄)စေ့ချ စိုက်ရပါသည်။ တစ်ဧကလျှင် မျိုးစေ့ (၃)ကီလို ဂရမ် ပါဝင်ပါသည်။ ရွှေဖရုံပင်ငယ်များ တစ်လသားခန့်ရှိသောအခါ ကြားထွန်ဝင်ပေးပြီး အပင်ခြေရင်းရှိ ပေါင်းများကို လက်ပေါင်းလိုက်ပေးရပါသည်။ ရွှေဖရုံသီးများကို ကောင်းစွာရင့်မှည့်မှ ခူးဆွတ်ရန်လိုပြီး ခူးဆွတ်ရာတွင် အညှာပါအောင်ခူးဆွတ်ထားပါက ကြာရှည်အထားခံပါသည်။ ရွှေဖရုံသီးမှာ ကယ်လိုရီ ၊ ပရိုတင်း၊ ကာဗွန်ဟိုက်ဒရိုတ်၊ အမျှင်ဓါတ်၊ ဗီတာမင်အေ၊ ဗီတာမင်ကေ၊ ဗီတာမင်အီး၊ သံဓါတ်၊ မဂ္ဂနီဆီယမ်၊ ဗီတာမင်စီ၊ ပိုတက်ဆီယမ်တို့ အဓိကပါဝင်ကြပါသည်။ ဖရုံသီးမှာတန်ဖိုးရှိသော ဗီတာမင်နဲ့ အာဟာရဓါတ်များစွာပါဝင်သောကြောင့် လူတို့စားသုံးရန်သင့်တော်ပါသည်။ ရွှေဖရုံသီးများအား ခြံဖြင့် သီးသန့်စိုက်ပျိုးသလို အိမ်ခြံဝန်းအတွင်းတွင် လည်း စားဖိုဆောင်သီးနှံအဖြစ် စိုက်ပျိုးကြပါသည်။ ရွှေဖရုံသီးအစေ့လှော်ဆိုလျှင်လည်း အစာပြေ ၊ အပျင်ပြေဝါးစားလျှင် စိမ့်သောအရသာဖြင့် အလွန်စားကောင်းပါသည်။

      ဖရုံသီးပင်များကိုတစ်နိုင်တစ်ပိုင်အဖြစ် ကျေးလက်ဒေသများတွင် စိုက်ပျိုးကြပြီး စီးပွားဖြစ်အနေဖြင့် မှော်ဇာရွာ၊ တောင်လုံးညိုရွာများတွင် စိုက်ပျိုးပြီး ထိုဖရုံသီးများကို ပွဲစားများမှတစ်ဆင့် ရန်ကုန်သီရိမင်္ဂလာဈေးသို့ တင်ပို့ရောင်းချကြောင်း သိရပါသည်။ ရောင်းချသောဈေးများမှာ အလုံးချော တစ်လုံးလျှင် ၂၀၀၀ကျပ်၊ အသေးတစ်လုံးလျှင် ၇၀၀ကျပ်ဖြင့်ရောင်းချကြောင်း သိရှိရပါသည်။

DOCA(ပဲခူး)

     မကွေးတိုင်းဒေသကြီး၊ ပခုက္ကူခရိုင်အတွင်းရှိ မြို့နယ်များဖြစ်သော ရေစကြို၊ မြိုင်၊ ပေါက်၊ ဆိပ်ဖြူတို့တွင် ပဲစင်းငုံ(နီ)၊ ကုလားပဲအမျိုးမျိုး၊ မတ်ပဲ၊ ပဲလွန်း၊ ပဲပုတ်၊ အခြားပဲအမျိုးမျိုးများ စိုက်ပျိုးကြပါသည်။ ရေစကြိုမြို့နယ်တွင် မတ်ပဲကို ကျယ်ကျယ်ပြန့်ပြန့်အဓိကစိုက်ပျိုးကြပြီး စိုက်ဧကအနေဖြင့် မိုး/ဆောင်းစိုက်ပျိုးမှုမှာ ဧက(၄၂၀၀)ကျော်ရှိပြီး အထွက်တင်းအနေဖြင့် (၁၈)တင်းထွက်ရှိကြောင်းသိရှိရပါသည်။ ဖေဖော်ဝါရီလ(တတိယပတ်)တွင် မတ်ပဲဈေးများ တဖြည်းဖြည်းဈေးနှုန်းကျဆင်းလျက်ရှိကြောင်း ကုန်စည်ဒိုင်မှသိရှိရပါသည်။

      ဖေဖော်ဝါရီ(ဒုတိယပတ်)တွင် တစ်တင်းလျှင် ကျပ်(၁၀၂၅၀၀မှ ၁၀၅၀၀၀)၊ ဖေဖော်ဝါရီလ (တတိယပတ်)တွင် ကျပ်(၉၈၅၀၀)ဖြင့် နေ့စဉ်အိတ်ရေ (၅၀မှ ၂၀၀ထိ) အရောင်းအဝယ်ဖြစ်နေပြီး တင်ပို့မှုအနေဖြင့် ရန်ကုန်ဘုရင့်နောင်ကုန်စည်ဒိုင်သို့တင်ပို့နေရကြောင်း ကုန်စည်ဒိုင်မှသိရှိရပါသည်။

DOCA(မကွေး)