ပြည်တွင်းကုန်သွယ်မှုသတင်း

    ၂၅.၈.၂၀၂၃ ရက်နေ့တွင် တိုင်းဒေသကြီးနှင့်ပြည်နယ် မြို့နယ်အလိုက် ဆန်၊ ဆီ၊ မီးဖိုချောင်သုံးပစ္စည်းများ၊ သားငါး၊ စက်သုံးဆီ၊ ရွှေ၊ ဒေါ်လာ ဈေးနှုန်းများအား အောက်ပါ .pdf တွင် ဝင်ရောက်ကြည့်ရှုနိုင်ပါသည်-

    “ငါးပိမှာ ကော့ရင်း မျှစ်မှာ ကော့လုံ” ဆိုသည့်အတိုင်း ကရင်ပြည်နယ်တွင် ရေချိုငါးပိအကောင်းဆုံးမှာ ကော့ရင်းဒေသထွက် ငါးပိဖြစ်ကြောင်းနှင့် ငါးပိရည်နှင့် တွဲဖက်စားသုံးသော မျှစ်ချို (ဝါးနွယ်မျှစ်) မှာ ကော့လုံဒေသထွက် မျှစ်များဖြစ်ကြောင်း ဒေသခံများက ဆိုရိုးပြုရသည့်တိုင် မြန်မာလူမျိုးများနှစ်ခြိုက်စွာတွဲ၍ စားသုံးကြသည့် ကရင်ပြည်နယ်၊ ဘားအံခရိုင်၊ ကော့လုံဒေသထွက် မျှစ်များမှာ မကြာမီတွင် မျှစ်ချိုးချိန် /မျှစ်ပေါ်ချိန်ရာသီကုန်ဆုံးတော့မည်ဖြစ်သည်။

   ကရင်ပြည်နယ်၊ ကော့လုံဒေသထွက် ဝါးနွယ်မျှစ် (မျှစ်ချို) များသည် နှစ်စဉ် မိုးဦးကျချိန် မေလနှောင်းပိုင်းတွင် စတင်ထွက်ပေါ်လေ့ရှိပြီး ဩဂုတ်လတွင် မျှစ်ချိုးရာသီကုန်ဆုံးလေ့ရှိသည်။ ကရင်ပြည်နယ်၊ ကော့လုံဒေသထွက် မျှစ်များသည် ပေါ်ဦးပေါ်စအချိန်တွင် ၁ပိဿာလျှင် ၁သောင်းကျပ်ဖြင့် အရောင်းအဝယ်ဖြစ်ကြောင်းနှင့် မျှစ်ပေါ်သည့်ကာလ ဇွန်လနှင့် ဇူလိုင်လတို့တွင် ၁ပိဿာလျှင် ၂၅၀၀ကျပ်သာဈေးနှုန်းရရှိကြောင်း၊ လက်ရှိတွင် ၁ပိဿာလျှင် ၃၅၀၀ကျပ်ဖြင့် အရောင်းအဝယ်ဖြစ်လျက်ရှိကြောင်း သိရသည်။

     ကော့လုံဒေသထွက် မျှစ်များကို ဘားအံမြို့၊ ရေပေါ်ဈေးတွင်လာရောက်ရောင်းချနေသော ဒေသခံတိုင်းရင်းသူတစ်ဦးက မျှစ်ရောင်းချရမှုနှင့်ပတ်သက်၍ “ အေး ကော့လုံက လာရောင်းတာ၊ မျှစ်က ဒီလဆိုကုန်တော့မှာလေ၊ ခု ၁ပိဿာ ၃၅၀၀ ရောင်းတယ်၊ တစ်နေ့ကို ၅သောင်းဖိုးလောက် ရောင်းရတယ်၊ ကယ်ရီခ ၅ထောင်ပေးရတယ်၊ ငါ့အတွက် ၂သောင်းလောက်ကျန်တယ်၊ နင်လိုချင်ယူသွား” ဟု ခပ်ပြုံးပြုံးဖြင့် ပြောပြလေသည်။ မျှစ်ကို ဝါးပင်ရက်သတ္တပတ် နှစ်ပတ်သား မတိုင်ခင် ဝါးပင်ပေါက်အရွယ်၌ ချိုးယူ၍ မျှစ်အဖြစ် စားသောက်ခြင်းဖြစ်ကြောင်းနှင့်  မျှစ်ကို ချက်ချင်းလက်ငင်းချိုးယူ၍ ငါးပိရည်၊ ငရုတ်သီးစပ်စပ်တို့နှင့် တို့မြှုပ်၍  စားသုံးနိုင်သကဲ့သို့ တာရှည်ခံအောင်ထား၍လည်း နည်းအမျိုးမျိုးစားသုံးကြလေ့ရှိပြီး မြန်မာလူမျိုများကြိုက်နှစ်သက်သော အစား အစာတစ်မျိုးဖြစ်ပေသည်၊၊ 

DOCA(ကရင်)

  ကရင်ပြည်နယ်၊ ဘားအံမြို့၊ ရေပေါ်ဈေးရှိ အခြေခံစားကုန်များ၏ နေ့စဉ်ကုန်ဈေးနှုန်းအခြေအနေများကို ကွင်းဆင်းကောက်ယူစာရင်းပြုစုလျက်ရှိရာ (၂၂-၈-၂၀၂၃) ရက်နေ့တွင် ကွင်းဆင်း၍ စာရင်းကောက်ယူမှုအရ အခြေခံစားသောက်ကုန်ဖြစ်သော ကြက်သွန်နီဈေးနှုန်းမြင့်တက်ခဲ့ကြောင်း သိရသည်။

  ဈေးနှုန်းစာရင်းနှိုင်းယှဉ်မှုများအရ ယခင်လတွင် ကြက်သွန်နီအလတ်စ လက်လီဈေးမှာ ၁ပိဿာလျှင် ၂၅၀၀/ကျပ်၊ ၁၀ပိဿာဝင် အိတ်ဆွဲတစ်ဆွဲလျှင် ၂၃၀၀၀ကျပ်ဖြစ်သော်လည်း ယခုလ၊ တတိယအပတ်တွင် ၁ပိဿာလျှင် ၃၅၀၀/ကျပ် ၁၀ပိဿာဝင် အိတ်ဆွဲတစ်ဆွဲလျှင် ၃၃၀၀၀ ကျပ်ဖြင့်လည်းကောင်း ဈေးကွက်အတွင်း အရောင်းအဝယ်ဖြစ်လျက်ရှိကြောင်းနှင့် ကြက်သွန်ဈေးမှာ ‌ဈေးနှုန်းတည်ငြိမ်မှုမရှိဘဲ အတက်အကျဖြစ်နေသောကြောင့် ခန့်မှန်းရခက်လျက်ရှိကြောင်း သိရသည်။

     စာရင်းဇယားများအရ ကရင်ပြည်နယ်တွင် ကြက်သွန်နီဈေးနှုန်းများမှာ ၂၀၂၂ခုနှစ်၊ ဒီဇင်ဘာလတွင် ၁ပိဿာလျှင် ၄၅၀၀ကျပ်ဖြင့် ဈေးနှုန်းအမြင့်ဆုံးဖြစ်ခဲ့ပြီး ယခုနှစ်ဧပြီလ၊ သင်္ကြန်မတိုင်မီတွင် ၁ပိဿာလျှင် ၁၂၅၀ကျပ်ဖြင့် အရောင်းအဝယ်ဖြစ်ခဲ့ကြောင်းသိရပါသည်။

DOCA(ကရင်)

    ၂၀၂၃ခုနှစ်၊ ဩဂုတ်လတွင် ကရင်ပြည်နယ်နယ်ထွက် RSS 3 ရော်ဘာဈေးနှုန်းမှာ တစ်ပေါင်လျှင် ၁၅၀၀ကျပ်မှ ၁၆၈၀ကျပ်အထိဈေးမြင့်တက်ခဲ့ကြောင်း သိရသည်။

    ပွင့်လင်းရာသီ ရော်ဘာအစေးခြစ်ချိန်ရာသီအတွင်း ကရင်ပြည်နယ်ဒေသထွက် RSS 3 အမျိုးအစား ရော်ဘာ ၁ပေါင်လျှင် ၁၂၁၀ကျပ်ဖြင့် ဈေးဖွင့်ခဲ့ပြီး မိုးဦးကျအစေးခြစ်ကာလပြီးဆုံးချိန်တွင် တစ်ပေါင်လျှင် ၁၃၄၀ကျပ်ဖြင့် ဈေးပိတ်ခဲ့ရာမှ တဖြည်းဖြည်းဈေးနှုန်းမြင့်တက်လာခဲ့ခြင်းဖြစ်ပြီး ယခုဩဂုတ်လတွင် ၁၅၀၀ကျပ်မှ ၁၆၈၀ကျပ်အထိမြင့်တက်လာပါသည်။ လက်ရှိအချိန်တွင် ကရင်ပြည်နယ်၌ RSS 3 နှင့် RSS 5 အမျိုးအစား ၂မျိုးတို့မှာ အရောင်းအဝယ်ဖြစ်လျက်ရှိပြီး RSS 5 အမျိုးအစားမှာ  တစ်ပေါင်လျှင် ၁၆၄၀ကျပ်ဖြစ်ကြောင်းနှင့် ယခုမိုးကာလမှာ ကရင်ပြည်နယ်တွင် ရော်ဘာစိုက်တောင်သူအများစုအနေဖြင့် ရော်ဘာအစေးခြစ်လုပ်ငန်းများရပ်နား၍ မြေပြုပြင်ခြင်း၊ ခြံရှင်း/ ခြုံခုတ်နှင့် အပင်အစာကျွေးခြင်းလုပ်ငန်းများကို ဆောင်ရွက်ဆဲကာလဖြစ်ကြောင်းနှင့် ရော်ဘာဈေးနှုန်းမြင့်တက်လာခြင်းကြောင့် လာမည့်အစေးခြစ်ကာလတွင် လုပ်ငန်းရှင်များအနေဖြင့် ရော်ဘာလုပ်ငန်းလုပ်ကိုင်ကြခြင်းဖြင့် အကျိုးအမြတ်ပိုမိုရရှိလာနိုင်ဖြစ်ကြောင်း သိရပါသည်။

DOCA(ကရင်)

    စစ်ကိုင်းတိုင်းဒေသကြီးသည် ဆန်ပိုဒေသများဖြစ်သော ကလေး၊ ကသာ၊ ကန့်ဘလူ၊ ရွှေဘိုနှင့် ရေဦးခရိုင်များအနေဖြင့် ရွှေဘိုနှင့်ရေဦးခရိုင်တို့တွင် ဧရာမင်းစပါးလက်ကျန်မရှိသလောက် နည်းပါနေကြောင်း၊ တောင်သူများ စပါးလက်ကျန်နည်းပါးလာပြီး အဝယ်များနေခြင်းကြောင့် ကလေးခရိုင်တစ်ခုသာ ဈေးအနည်းငယ်တက်နေပြီး ကျန်ခရိုင်အားလုံး‌‌ဈေးငြိမ်နေပါကြောင်း သိရှိရပါသည်။

      စစ်ကိုင်းတိုင်းဒေသကြီးအတွင်း ဩဂုတ်လ(တတိယ)ပတ်တွင် ဖြစ်ပေါ်နေသော စပါး/ဆန် ဈေးနှုန်းများမှာ ရွှေဘိုခရိုင်၊ ရွှေဘိုမြို့နယ်မှ ရွှေဘိုပေါ်ဆန်း(စပါး)  တင်း ၁၀၀လျှင် ကျပ် ၃,၇၀၀,၀၀၀၊ ပေါ်ဆန်း (ဆန်) ၂၄ပြည်ပါ တစ်အိတ်လျှင် ၁၃၅,၀၀၀ကျပ်၊ ဧရာမင်း (ဆန်) ၂၄ပြည်ပါ တစ်အိတ်လျှင် ၁၃၈,၀၀၀ ကျပ်၊ နွေစပါး(ရွှေဝါထွန်း) စပါးတင်း(၁၀၀)လျှင် ကျပ် ၁,၉၀၀,၀၀၀၊  နွေစပါး(ရွှေဝါထွန်း)(ဆန်) ၂၄ပြည် ပါတစ်အိတ်လျှင် ကျပ် ၈၀,၀၀၀ ဖြင့် အရောင်းအဝယ်ဖြစ်နေကြောင်း သိရပါသည်။

      ရေဦးခရိုင်၊ ရေဦးမြို့နယ်မှ ပေါ်ဆန်း (စပါး)တင်း ၁၀၀လျှင် ကျပ် ၃,၇၀၀,၀၀၀၊ ပေါ်ဆန်း (ဆန်) တစ်အိတ်လျှင်ကျပ် ၁၃၅,၀၀၀၊  ဧရာမင်း(ဆန်)၂၄ပြည်ပါ တစ်အိတ် ၁၃၈,၀၀၀ ကျပ်၊ နွေစပါး (ရွှေဝါ ထွန်း) စပါးတင်း(၁၀၀)လျှင် ကျပ် ၁,၉၀၀,၀၀၀၊  နွေစပါး (ရွှေဝါထွန်း) (ဆန်) ၂၄ပြည်ပါ တစ်အိတ်လျှင် ကျပ် ၈၀,၀၀၀ များဖြင့် အရောင်းအဝယ် ဖြစ်နေကြောင်း သိရပါသည်။

      ကလေးခရိုင်၊ ကလေးမြို့နယ်မှ ဧည့်မထ(စပါး) တင်း၁၀၀ လျှင် ၂,၈၀၀,၀၀၀၊ ဧည့်မထ (ဆန်) ‌၂၄ပြည်ပါ တစ်အိတ်မှာ ကျပ် ၁၁၅,၀၀၀၊ ငစိန်(စပါး)တင်း၁၀၀လျှင် ၂,၇၀၀,၀၀၀၊ ငစိန် (ဆန်)၂၄ပြည်ပါ တစ်အိတ်မှာ ၁၀၅,၀၀၀၊ ဧရာမင်း(စပါး) တင်း ၁၀၀ လျှင် ကျပ် ၃,၀၀၀,၀၀၀၊ ဧရာမင်း(ဆန်)၂၄ပြည်ပါ တစ်အိတ်မှာ ကျပ် ၁၂၅,၀၀၀၊ နွေစပါး(ဒေသမျိုး)(စပါး) တင်း ၁၀၀ လျှင် ကျပ် ၁,၁၀၀,၀၀၀၊ နွေစပါး (ဒေသမျိုး)(ဆန်)၂၄ပြည်ပါ တစ်အိတ်မှာကျပ် ၈၇,၀၀၀ ဖြင့် အရောင်းအဝယ်ဖြစ်နေကြောင်း သိရပါသည်။

      ကသာခရိုင်၊ အင်းတော်မြို့နယ်မှ မှော်ဘီ(၂)(စပါး) တင်း ၁၀၀ လျှင် ကျပ်၁,၉၅၀,၀၀၀၊ မှော် ဘီ(၂) ဆန် ၂၄ပြည် တစ်အိတ်လျှင် ကျပ် ၈၁,၀၀၀၊ ဆင်းဧကရီ(၃)(စပါး)  တင်း၁၀၀ လျှင် ကျပ် ၂,၁၀၀,၀၀၀၊ ဆင်းဧကရီ-၃ ဆန် ၂၄ပြည်တစ်အိတ်မှာကျပ် ၈၅,၀၀၀၊ ဧရာမင်း (စပါး)တင်း ၁၀၀လျှင် ကျပ် ၂,၄၀၀,၀၀၀၊ ဧရာမင်း(ဆန်) ၂၄ပြည် ဆန်တစ်အိတ်လျှင် ကျပ် ၁၁၀,၀၀၀၊ နွေစပါး(ဆင်း-၃)(စပါး) တင်း ၁၀၀ လျှင် ကျပ် ၁,၃၀၀,၀၀၀၊ နွေစပါး (ဆင်း-၃)(ဆန်)၂၄ပြည်ပါ တစ်အိတ်မှာကျပ် ၆၅,၀၀၀ ဖြင့် အရောင်းအဝယ် ဖြစ်နေကြောင်း သိရပါသည်။

     မုံရွာခရိုင်၊ မုံရွာမြို့တွင် ဧရာမင်း(စပါး)တင်း ၁၀၀ လျှင် ကျပ် ၃,၁၅၀,၀၀၀၊  ဧရာမင်း (ဆန်) ၂၄ပြည် တစ်အိတ်မှာ ကျပ် ၁၃၀,၀၀၀၊ ပေါ်ဆန်း (စပါး) တင်း ၁၀၀ လျှင် ကျပ် ၃,၅၀၀,၀၀၀၊  ပေါ်ဆန်း (ဆန်) ၂၄ပြည် တစ်အိတ်မှာ ကျပ် ၁၃၅,၀၀၀၊ မနောသုခ(စပါး) တင်း ၁၀၀လျှင် ကျပ် ၂,၀၀၀,၀၀၀၊ မနောသုခ (ဆန်)၂၄ ပြည် တစ်အိတ်လျှင် ကျပ် ၉၀,၀၀၀ ဖြင့် အရောင်းအဝယ် ဖြစ်နေကြောင်း သိရ ပါသည်။

     ကန့်ဘလူခရိုင်၊ ကန့်ဘလူမြို့တွင်  ဧရာမင်း(စပါး)တင်း ၁၀၀ လျှင် ကျပ် ၃,၀၀၀,၀၀၀၊  ဧရာမင်း (ဆန်)၂၄ပြည် တစ်အိတ်မှာ ကျပ် ၁၃၀,၀၀၀၊ ပေါ်ဆန်း(စပါး) တင်း ၁၀၀လျှင် ကျပ် ၃,၅၀၀,၀၀၀၊ ပေါ်ဆန်း (ဆန်)၂၄ပြည်တစ်အိတ်လျှင် ကျပ် ၁၃၀,၀၀၀၊ နွေစပါး ရွှေဝါထွန်း (စပါး)တင်း ၁၀၀ လျှင် ကျပ် ၁,၈၀၀,၀၀၀၊  ရွှေဝါထွန်း (ဆန်) ၂၄ပြည် တစ်အိတ်မှာ ကျပ် ၈၀,၀၀၀ ဖြင့် အရောင်းအဝယ်ဖြစ်နေကြောင်း သိရပါသည်။

    စစ်ကိုင်းတိုင်းဒေသကြီးမှ ဩဂုတ်လ (တတိယ)ပတ်တွင် စစ်ကိုင်းတိုင်းဒေသကြီးမှ အခြားတိုင်း ဒေသကြီးများသို့ ဆန်စီးထွက်မှုမှာ ရန်ကုန်သို့ အိတ်ရေ ၁၂,၅၀၀၊ မန္တလေး သို့ အိတ်ရေ ၂၈,၇၀၀၊ မကွေးသို့ အိတ်ရေ ၆၀၀၊ နေပြည်တော်သို့ အိတ်ရေ ၅,၅၀၀၊ ရှမ်း (တောင်)သို့ အိတ်ရေ ၄,၅၀၀၊ ရှမ်း(မြောက်) သို့အိတ်ရေ ၄,၅၀၀၊ ကချင်သို့ အိတ်ရေ ၁,၂၀၀၊ စုစုပေါင်း အိတ်ရေ (၅၆,၅၀၀)အိတ်၊ တန်အားဖြင့် (၂,၈၂၅) စီးထွက်ခဲ့ပြီး၊ ယခု ဩဂုတ်လ (စတုတ္တ)ပတ်တွင် စစ်ကိုင်းတိုင်းဒေသကြီးမှ အခြားတိုင်းဒေသကြီးများသို့ ဆန်စီးထွက်မှုမှာ ရန်ကုန်သို့ အိတ်ရေ ၁၅,၀၀၀၊ မန္တလေး သို့ အိတ်ရေ ၂၈,၁၀၀၊ မကွေး သို့ အိတ်ရေ ၆၀၀၊ နေပြည်တော်သို့ အိတ်ရေ ၅,၀၀၀၊ ရှမ်း (တောင်)သို့ အိတ်ရေ ၄,၅၀၀၊ ရှမ်း(မြောက်) သို့အိတ်ရေ ၄,၅၀၀၊ ကချင်သို့ အိတ်ရေ ၅၀၀၊ စုစုပေါင်း အိတ်ရေ (၅၈,၂၀၀)အိတ်၊ တန်အားဖြင့် (၂,၉၁၀) စီးထွက်ခဲ့သည့် အတွက် ယခင်ပတ်နှင့် နှိုင်းယှဉ်လျှင် ယခုပတ်တွင် အိတ်ရေ (၁၇၀၀) တန်အားဖြင့် (၈၅) ပိုမို စီးထွက်ခဲ့ပါကြောင်း သိရှိရပါသည်။

DOCA(စစ်ကိုင်း)