ပြည်တွင်းကုန်သွယ်မှုသတင်း

     မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့ကုန်စိမ်းသီးနှံဈေးကွက်သို့ ကလေး၊ လူကြီးမရွေး ဝယ်ယူစားသုံးမှုများသော သကြားပြောင်းဖူးများ ဈေးကွက်သို့ နေ့စဉ်ဝင်ရောက်လျက်ရှိရာ စိုက်ပျိုးမှုများသော ပခုက္ကူကျွန်း ကျေးရွာများဖြစ်သော ကျွန်းဦး၊ ကျွန်းညို၊ ကျွန်းညိုကြီး၊ ကံလှ၊ နန်းတော်ရပ်ကျေးရွာများနှင့် ညောင်ဦးမြို့နယ်အတွင်းရှိ အထက်ညဉ့် အောက်ညဉ့်  ကျေးရွာများမှ အများဆုံးဝင်ရောက်ကြောင်း၊ ယခု၂၀၂၄ခုနှစ်၊ ဇူလိုင်လ(ဒုတိယပတ်)တွင် ဈေးကွက်သို့ ပြောင်းဖူးများ ဝင်ရောက်မှုနည်း၍ ဈေးတက်ပြီး အရောင်းအဝယ်ဖြစ်ကြောင်း သီးနှံရောင်းဝယ်သည့် ကုန်စိမ်းဈေးသည်များထံမှ သိရှိရသည်။

     ပြောင်းဖူးဈေးကွက်အနေဖြင့် ဇူလိုင်လ(ဒုတိယပတ်)တွင် ပြောင်းဖူးတစ်ဖူးလျှင် အကြီး/ အသေး၊ အဆံ(အနု/အရင့်)ပေါ်မူတည်ပြီး (၁၀)ဖူးလျှင် ကျပ်(၆၀၀၀)၊ (၁)ဖူးလျှင် ကျပ်(၇၅၀-၈၀၀) အရောင်းအဝယ်ဖြစ်ကြောင်း၊ ယခင်ဇွန်လ(ဒုတိယပတ်)တွင် ပြောင်းဖူး(၁)ဖူးလျှင် ကျပ်(၆၀၀-၇၀၀) ဈေးဖြင့် အရောင်းအဝယ်ဖြစ်ကြောင်း၊ ပြောင်းဖူးပြုတ်(၁)ဖူးလျှင် ကျပ်(၁၀၀၀)ဈေးဖြင့် ခေါင်းရွက် တွန်းလှည်းဈေးသည်များမှ ရောင်းချလျက်ရှိကြောင်း၊ (၁)လအတွင်းပြောင်းဖူး(၁)ဖူးလျှင် ကျပ် (၂၀၀)ခန့် ဈေးတက်ပြီး အရောင်းအဝယ်ဖြစ်လျက်ရှိကြောင်း၊ ဇူလိုင်လ(ဒုတိယပတ်)တွင် ဧရာဝတီမြစ်ရေတက်၍ ကိုင်း၊ ကျွန်းမြေ ပြောင်းဖူးစိုက်ခင်းများတွင် မြစ်ရေဝင်မြုပ်ခြင်းဖြစ်၍ ဈေးကွက်သို့ ပြောင်းဖူးဝင်ရောက်ခြင်းနည်းခြင်းကြောင့် ဈေးတက်ခြင်းဖြစ်ကြောင်း ကုန်စိမ်းသီးနှံဈေးကွက်မှ သိရှိရပါသည်။

DOCA(မကွေး)

     မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့ ကြက်သွန်နီဈေးကွက်၌ ၂၀၂၄ ခုနှစ်၊ ဇူလိုင်လ(ဒုတိယပတ်)တွင် စားဖိုဆောင် သီးနှံကြက်သွန်နီဈေးငြိမ်ပြီး အရောင်းအဝယ်ဖြစ်နေပါ သည်။ မြို့ပေါ်ရှိ ကြက်သွန်နီဈေးကွက်သို့ ဒေသတွင်းကြက်သွန်နီစိုက်ပျိုးမှုများသော ရွာသစ်၊ အနောက်ပိုင်းရပ်ကွက်၊ ချတောက်၊ ရွာသစ်၊ ဂွေးပင်၊ ချောင်းမကြီး၊ လိပ်ခြံကျေးရွာများမှ ကုန်ချိန်အများဆုံးဝင်ရောက်လျက်ရှိပြီး၊ ဥပုဒ်နေ့မှလွဲ၍ တစ်ရက်လျှင် ကုန်ချိန်ပိဿာ(၃)သောင်း၊ တစ်ပတ်အတွင်း ကုန်ချိန်ပိဿာ(၂)သိန်းခန့် ဝင်ရောက် အရောင်းအဝယ်ဖြစ်လျက်ရှိကြောင်း သိရှိ ရပါသည်။

    ဈေးကွက်အနေဖြင့် ဇူလိုင်လ(ဒုတိယပတ်)တွင် ကြက်သွန်နီတစ်ပိဿာလျှင် ထိပ်စ ကျပ်(၁၈၀၀)၊ အလတ်စ ကျပ်(၁၆၅၀)၊ အသေးစ ကျပ်(၁၅၀၀)တို့ဖြင့် အရောင်းအဝယ်ဖြစ်ခဲ့ပြီး ယခင်ဇူလိုင်လ(ပထမပတ်)နှင့် ဈေးနှုန်းနှိုင်းယှဉ်လျှင် ဈေးငြိမ်၍ အရောင်းအဝယ်ဖြစ် လျက်ရ ှိကြောင်း သိရှိရပါသည်။

    ကုန်စည်စီးဆင်းမှုအနေဖြင့် ဇူလိုင်လ(ဒုတိယပတ်)တွင် ဆိပ်ဖြူမြို့မှ ကြက်သွန်နီများကို ရန်ကုန်ဘုရင့်နောင်ပွဲရုံနှင့် ပြည်၊ ပုသိမ်မြို့များသို့ အများဆုံး တင်ပို့လျက်ရှိကြောင်း၊ ကြက်သွန်နီ ကုန်ချိန်ပိဿာ(၃)သိန်း၊ တန်ချိန်အားဖြင့် (၅၇၂)တန်ခန့် ကုန်ချိန်စီးဆင်းခဲ့ကြောင်း သိရှိရပါသည်။

DOCA(မကွေး)

     မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့ပေါ်၌ ဒေသထွက်ကုန်ဖြစ်သော ပဲစဉ်းငုံနီမှာ ကုန်စည်ဒိုင်သာမကမြို့ပေါ်ရှိပွဲရုံများ တွင်လည်းနေ့စဉ်အရောင်းအဝယ်ဖြစ်နေကြောင်း ပခုက္ကူ ကုန်သည်များထံမှ သိရှိရပါသည်။ ပခုက္ကူမြို့နယ်တွင် ပဲစဉ်းငုံနီ စိုက်ဧက(၃၁၁၇)ကျော်ရှိပြီး  အဓိကစိုက်ပျိုးသောနေရာများမှာ  ကံတော်၊ ကဲလှ၊ ကံရပ်၊ ချောက်ကန်အုပ်စုရွာများ၊ ကိုင်းအုပ်စု ကျေးရွာ များနှင့် မြိုင်မြို့နယ်ရှိရွာများ ဖြစ်သော ကျောက်ဆောက်၊ လက်ပဲအိုက်၊ မြို့သာရွာများမှ သီးညှပ်အဖြစ် အခြားသီးနှံများနှင့်ရော၍ စိုက်ပျိုးကြပါသည်။ ပခုက္ကူမြို့သည်  စီးပွားရေးအချက်အချာကြသော မြို့တစ်မြို့ဖြစ်၍ ဈေးကွက်သို့ သီးနှံမျိုးစုံဝင်ရောက် အရောင်းအဝယ်ဖြစ်လျက်ရှိသည်။

     ၂၀၂၄ခုနှစ်၊ ဇူလိုင်လ(ပထမပတ်)တွင် အရောင်းအဝယ်ဖြစ်ခဲ့သော ပဲစဉ်းငုံနီ ဈေးနှုန်းများမှာ ပဲစဉ်းငုံနီ တစ်တင်းလျှင် ကျပ်(၁၄၁၀၀၀)၊ ဇူလိုင်လ(ဒုတိယပတ်)တွင် ပဲစဉ်းငုံနီတစ်တင်းလျှင် ကျပ် (၁၃၉၆၀၀)၊ ဇူလိုင်လ(တတိယပတ်)အစတွင် ပဲစဉ်းငုံနီ တစ်တင်းလျှင် ကျပ်(၁၄၁၆၀၀)ဖြစ်ပြီး ဇူလိုင်လ(ဒုတိယပတ်)နှင့်(တတိယပတ်)နှိုင်းယှဉ်ပါက တစ်တင်းလျှင် ကျပ်(၂၀၀၀)ကျပ်ခန့်ဈေးကျနေသော်လည်း အရောင်းအဝယ်မှာ သွက်လျက်ရှိကြောင်းကုန်သည်များထံမှသိရှိရပါသည်။ နေ့စဉ် အရောင်းအဝယ်ဖြစ်ခဲ့သော အိတ်ရေမှာ တစ်နေ့လျှင် အိတ်ရေ (၁၀၀) မှ (၃၀၀)ထိ ဖြစ်ပြီး တင်ပို့မှုအနေဖြင့် မြန်မာပြည်အောက်ပိုင်းသို့ တင်ပို့နေရကြောင်း ကုန်သည်များထံမှ သိရှိရပါသည်။

DOCA(မကွေး)

     မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့သည် မြစ်ခြေ၊ ကမ္မ၊ ပခုက္ကူကျွန်းဒေသများ၊ မြိုင်၊ ပေါက်၊ ရေစကြိုမြို့များ၊ ဂန့်ဂေါခရိုင်အတွင်းရှိ ယောနယ်ဒေသများနှင့် စစ်ကိုင်းတိုင်းဒေသကြီးအတွင်းရှိ မြို့များမှ ထွက်ရှိသော သီးနှံမျိုးစုံ ဝင်ရောက်ပြီး ရောင်းဝယ်ဖောက်ကားရာဖြစ်သော စီးပွား ရေးဈေးကွက် အချက်အချာကျသောမြို့ဖြစ်သည်။ ၂၀၂၄ခုနှစ်၊ ဇူလိုင်လ(ဒုတိယပတ်)တွင် ဈေးကွက်သို့ နှမ်းနက် (စမုံ)နှင့်နှမ်းဖြူများ အရောင်းအဝယ်ဖြစ်ပြီး နှမ်းနက်မှာ ဈေးတက်ပြီး နှမ်းဖြူမှာ ဈေးကျ၍ အရောင်းအဝယ်ဖြစ်ကြောင်း၊ နေ့စဉ်အရောင်းအဝယ်ဖြစ်ပြီး တစ်ရက်လျှင် ပိဿာ(၃၀) ဝင်အိတ် (၁၀၀ မှ ၂၀၀ ထိ) ဝင်ရောက်အရောင်းအဝယ်ဖြစ်ကြောင်း သိရှိရသည်။

    ဈေးကွက်အနေဖြင့် ဇူလိုင်လ(ဒုတိယပတ်)တွင် နှမ်းဖြူတစ်တင်းလျှင် ကျပ်(၁၂၅၀၀ -၁၂၀၀၀)၊ ယခင်ဇွန်လ(ဒုတိယပတ်)တွင် နှမ်းဖြူတစ်တင်းလျှင် ကျပ်(၁၃၉၀၀၀ - ၁၃၃၀၀၀)ဈေးဖြင့် အရောင်းအဝယ်ဖြစ်ခဲ့ပြီး တစ်လအတွင်း နှမ်းတစ်တင်း ကျပ်(၁၄၀၀၀)ခန့် ဈေးကျ၍ အရောင်း အဝယ် ဖြစ်ကြောင်း၊ နှမ်းနက်(စမုံ)တစ်တင်းလျှင် ကျပ်(၁၅၀၀၀၀-၁၄၇၀၀၀)ဈေးဖြင့် အရောင်း အဝယ်ဖြစ်လျက်ရှိပြီး ယခင်ဇူလိုင်လ(ဒုတိယပတ်)တွင် နှမ်းနက်တစ်တင်းလျှင် ကျပ်(၁၄၂၀၀၀-၁၃၉၀၀၀)ဈေးဖြင့် အရောင်းအဝယ်ဖြစ်ခဲ့၍ တစ်လအတွင်း နှမ်းနက်တစ်တင်း ကျပ်(၈၀၀၀)ခန့် ဈေးတက်ပြီး အရောင်းအဝယ်ဖြစ်ကြောင်း၊ ဆီထွက်သီးနှံ(နွေ)နှမ်းများကို ရေစကြိုမြို့နယ်အတွင်းရှိ ကျေးရွာများနှင့် မြစ်ခြေ၊ ကမ္မဒေသများမှ ဝင်ရောက်ကြောင်း သိရှိရသည်။

    ဈေးကွက်သို့ဝင်ရောက်လာသည့်နှမ်းများကို မြို့ပေါ်ရှိ ဆီစက်လုပ်ငန်းရှင် နှမ်းလှော်လုပ်ငန်းရှင်နှင့် စားသောက်ကုန်ထုတ်လုပ်သည့်လုပ်ငန်းရှင်များမှ ဝယ်ယူလျက်ရှိပြီး မန္တလေးဈေးကွက်သို့လည်း တင်ပို့လျက်ရှိကြောင်း၊ ကုန်ဝင်သလောက်အရောင်းအဝယ်ဖြစ်ကြောင်း မြို့ပေါ်ရှိ ဆီထွက်သီးနှံရောင်းဝယ်ရေးတစ်ဦးထံမှ သိရှိရပါသည်။

DOCA(မကွေး)

     မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့နယ်သည် စိုက်ပျိုးရေးနှင့် မွေးမြူရေးကို အခြေပြု၍ ဒေသစီးပွားဖြစ် လုပ်ကိုင်ဆောင်ရွက်လျက်ရှိသည်။ စိုက်ပျိုးရေးအနေဖြင့် သီးနှံမျိုးစုံကို ရာသီအလိုက် စိုက်ပျိုးလျက်ရှိရာ မိမိတို့ကိုင်း/ယာမြေများတွင် စိုက်ပျိုးလျက်ရှိပြီး စပါးစိုက်ပျိုးမှုကိုလည်း နှစ်စဉ် စိုက်ဧက(၃၅၀၀)ခန့် စိုက်ပျိုးပြီး ယခုနှစ်တွင် စိုက်ဧက(၄၀၀၀)ဝန်းကျင်ခန့် စိုက်ပျိုးလျက်ရှိသည်ပြီး တစ်နှစ်လျှင် နွေး/မိုး နှစ်ရာသီ စိုက်ပျိုးကြောင်း သိရှိရသည်။ ယခုနှစ်မိုးရာသီတွင် ဆိပ်ဖြူမြို့နယ်၊ ချင်တောင်နှင့် မြင်ကဝအုပ်စုအတွင်းရှိ အောက်ဆိပ်၊ ဆူးလေကုန်းကျေးရွာများတွင်  နှစ်စဉ် မိုးစပါး စိုက်ဧက(၅၀၀)ခန့် စိုက်ပျိုးပြီး သီးနှံပေါ်ချိန် စပါးဈေးကွက် မြင့်တက်ပြီး ရောင်းလိုအား ဝယ်လိုအားကောင်း၍ စိုက်တောင်သူများ အကျိုးအမြတ်ရှိခြင်းကြောင့် စိုက်ဧက(၆၀၀)ခန့်အထိ တိုးချဲ့ စိုက်ပျိုးထားရှိပြီး မြစ်ရေတင်ဆည်ရေဖြင့် စိုက်ပျိုးကြောင်း သိရှိရသည်။

     စိုက်ပျိုးမှုအနေဖြင့် ဧရာပဒေသာနှင့် ဆင်းသုခစပါးမျိုးကို စိုက်ပျိုးပြီး မျိုးအနေဖြင့် တောင်သူများမှ ယခင်နှစ်များတွင် မိမိစိုက်ခင်းထွက်မျိုးကို စိုက်ပျိုးခဲ့သော်လည်း အပင်သေပျောက် မှုများပြီး အထွက်နှုန်းလျော့နည်းခြင်းကြောင့် မြို့ပေါ်ရှိစိုက်ပျိုးရေးဦးစီးဌာနနှင့် နေပြည်တော်၊ ပျဉ်းမနားစိုက်ပျိုးရေးဦးစီးဌာနမှ စပါးမျိုးစေ့များကို စိုက်ပျိုးကြောင်း၊ ဧရာပဒေသာစပါးတစ်တင်းလျှင် ကျပ်(၄၅၀၀၀)၊ ဆင်းသုခစပါး တစ်တင်းလျှင် ကျပ်(၃၀၀၀၀)ဈေးနှုန်းဖြင့် ဝယ်ယူစိုက်ပျိုးရကြောင်း၊ တောင်သူတစ်ဦးချင်းအနေဖြင့် စိုက်ပျိုးရာတွင် စိုက်ပျိုးပုံချင်းမတူ၍ တစ်ဧကလျှင် မျိုးစေ့(၈)ပြည်မှ (၁၆)ပြည်အထိကုန်ကျကြောင်း၊ ပျိုးခုံဖြင့် ကျဲပက်ပျိုးပြီး ပျိုးပင်သက်တမ်း ရက်(၂၀)ခန့်အကြာတွင် စိုက်ပျိုးကြောင်း၊ ဇူလိုင်လ ဆန်းတွင် စတင်စိုက်ပျိုးပြီး စပါးသက်တမ်းမှာ (၅)လခန့်ကြာမြင့်၍ နိုဝင်ဘာလတွင် စတင်ရိတ်သိမ်းကြောင်း၊ တောင်သူများအနေဖြင့် (၁)ဧကမှ (၃)ဧကထိစိုက်ပျိုးကြပြီး စိုက်ပျိုးမှုဧကအနည်းအများလိုက်၍ အကျိုးအမြတ်ရရှိမှုမှာ မတူညီကြောင်း၊ ဒေသတွင်း ထွက်ရှိသည့် စပါးများကို မြို့ပေါ်ရှိ ဆန်စက်ပိုင်ရှင်များ၊ ဆန်ရောင်းဝယ်ရေးလုပ်ငန်းရှင်များနှင့် တညောင်ဒေသရှိ ပွဲစားများမှ လာရောက်ဝယ်ယူလျက်ရှိကြောင်း၊ စပါးရိတ်သိမ်းပြီး အခင်းကျွတ်များတွင် ကုလားပဲနှင့် ပဲတီစိမ်းသီးနှံများကို သီးထပ်အဖြစ် စိုက်ပျိုးကြောင်း သိရှိရပါသည်။

   ယခင်နှစ် မိုးစပါးစိုက်ပျိုးချိန်တွင် (၁)ဧကလျှင် စပါးတင်း ပျမ်းမျှ(၈၀)ခန့် ထွက်ရှိပြီး၊ ကုန်ကျစရိတ်မှာ(၁၂)သိန်းခန့်ကုန်ကျကြောင်း၊  ဒေသတွင်း သီးနှံပေါ်စဈေးကွက်တွင် ဆင်းသုခ စပါးတစ်တင်းလျှင် ကျပ်(၂၅၀၀၀)၊ ဧရာပဒေသာစပါးတစ်တင်းလျှင် ကျပ်(၃၀၀၀၀)ဈေးဖြင့် ရောင်းချရ၍ တောင်သူတစ်ဦးလျှင် တစ်ဧကစိုက်ပျိုးမှု ကျပ်(၁၀)သိန်းခန့် အကျိုးအမြတ်ရရှိကြောင်း၊ ယခုနှစ်စိုက်ပျိုးရာတွင် အလုပ်သမားငှားရမ်းခ၊ သွင်းအားစုအမျိုးမျိုးဝယ်ယူခနှင့် စက်ကိရိယာငှါးရမ်းခ ဈေးနှုန်းကြီးမြင့်၍ တစ်ဧကလျှင် ကျပ်(၁၈)သိန်းခန့် ကုန်ကျမည်ဟု ခန့်မှန်းကြောင်း၊ သီးနှံရောင်းချချိန်တွင် စပါးတစ်တင်းလျှင် ကျပ်(၃၅၀၀၀-၄၀၀၀၀)ဈေးနှုန်းဖြင့် ရောင်းချမှသာလျှင် တောင်သူအဆင် ပြေမည်ဖြစ်ကြောင်း မြင်ကဝကျေးရွာရှိ စပါးစိုက်တောင်သူတစ်ဦးထံမှ သိရှိရပါသည်။

       ဆန်စပါးသည် မြန်မာလူမျိုးများအနေဖြင့် နေ့စဉ်မပါမဖြစ် သုံးစွဲလျက်ရှိသော အဓိကအခြေခံစားကုန်တစ်မျိုးဖြစ်ပြီး နိုင်ငံတော်အနေဖြင့်လည်း ပြည်တွင်းစားသုံးပြီး ပိုလျှံသည့် ဆန်များကို ပြည်ပ နိုင်ငံများသို့ ပို့ကုန်အဖြစ်တန်ချိန်အများဆုံးတင်ပို့လျှက်ရှိ၍ ပြည်ပဝင်ငွေရရှိခြင်းကြောင့် နိုင်ငံစီးပွားဖွံ့ဖြိုးတိုးတက်ရေးကို အထောက်အပံ့ဖြစ်စေသည်။ စပါးစိုက်ပျိုးခြင်းဖြင့် ဒေသတွင်း စိုက်တောင်သူများ စီးပွားရေးလုပ်ငန်းရှင်များမှလည်း အလုပ်အကိုင်အခွင့်အလမ်းများစွာရရှိသည့်အပြင် မိမိဒေသစီးပွားဖွံ့ဖြိုးရေးနှင့် နိုင်ငံတော်၏ စီးပွားရေးကိုလည်း အထောက်အကူဖြစ်စေသည့် စပါးသီးနှံကို တိုးချဲ့စိုက်ပျိုးသင့်ပါကြောင်း ရေးသားသုံးသပ်တင်ပြအပ်ပါသည်။

DOCA(မကွေး)