ပြည်တွင်းကုန်သွယ်မှုသတင်း

          မကွေးတိုင်းဒေသကြီးသည် မြန်မာနိုင်ငံ၏ဆီအိုးကြီးဟု တင်စားခေါ်ဝေါ်ရအောင် ဆီထွက် သီးနှံ (နှမ်း၊ မြေပဲ၊ နေကြာ) တို့အား အဓိကစိုက်ပျိုးလျက်ရှိရာ မကွေးခရိုင်အတွင်းရှိ (မကွေး/ တောင်တွင်းကြီး/ နတ်မောက်နှင့် မြို့သစ်) မြို့နယ်များတွင် ဆီထွက်သီးနှံ (နှမ်းမျိုးစုံ)အား ဒေသ တွင်း စားသုံးဆီဖူလုံစေရေးတိုးချဲ့စိုက်ပျိုးလျက်ရှိပါသည်။

          ၂၀၂၂-၂၀၂၃ခုနှစ်တွင် နှမ်းပေါင်း (၅၃၈၉၄၃)ဧက စိုက်ပျိုးရန် လျာထားခဲ့ပြီး အမှန်စိုက်ပျိုးမှု (၅၅၀၆၀၂)ဧကရှိ၍ (၁၁၆၅၉)ဧက ပိုမိုစိုက်ပျိုးခဲ့ပြီး အဓိကစိုက်ပျိုးသည့် မိုးနှမ်းမှာ တစ်ဧကလျှင် (၇.၂၇)တင်း ထွက်ရှိခဲ့ကြောင်း၊ ၂၀၂၃-၂၀၂၄ ခုနှစ်တွင် နှမ်းပေါင်း (၅၃၈၀၆၀)ဧက စိုက်ပျိုးရန် လျာထားခဲ့ပြီး အမှန်စိုက်ပျိုးမှု (၅၆၇၈၆၁)ဧကရှိ၍ လျာထားချက်ထက် (၂၉၈၀၁)ဧက ပိုမိုစိုက်ပျိုး နိုင်ခဲ့ပြီး မိုးနှမ်းတစ်ဧကလျှင် (၉.၃၅)တင်းထွက်ရှိခဲ့ကြောင်း၊ ၂၀၂၃-၂၀၂၄ခုနှစ်ကလည်း မိုးနှမ်း စိုက်ပျိုးချိန်တွင် မိုးရရှိမှုကောင်းမွန်မှုကြောင့် အထွက်နှုန်းတိုးတက်လာကြောင်းနှင့် ၂၀၂၄-၂၀၂၅ ခုနှစ်တွင်လည်း နှမ်းပေါင်း (၅၆၅၈၀၄)ဧက စိုက်ပျိုးရန်လျာထားခဲ့ပြီး မိုးနှမ်းစိုက်ပျိုးပြီးစီးမှု (၄၉၆၂၂၁)ဧကရှိပြီး ဖြစ်ကြောင်းနှင့် မကွေးခရိုင်အတွင်း ၂၀၂၄-ခုနှစ်၊ မေလ (၂၅)ရက်‌နေ့မှစတင်၍ မုန်တိုင်းအရှိန်ကြောင့် မိုးဦးရွာသွန်းမှု၊ ဇွန်လ (ပထမပတ်၊ ဒုတိယပတ်)အတွင်း မိုးရွာသွန်းမှုများကြောင့် အထွက်နှုန်းများလည်း ယခင်နှစ်များ ထက် တိုးတက်လာနိုင်ကြောင်း နှမ်းသီးနှံ အဓိက တိုးချဲ့ စိုက်ပျိုးလျက်ရှိသည့် မြို့သစ်မြို့နယ် အနောက်ကုန်းရွာ ဝါးကြီးအိုင်၊ လေးတိုင်စင်၊ ရုန်းတော၊ အောင်မြင်သာကျေးရွာ တို့ဖြစ်ကြပြီး စိုက်ပျိုးသည့် နှမ်းသီးနှံမျိုးများမှာ ဆင်းရတနာ (၃/၄/၅/၈/၉နှင့် ၁၂)တို့ဖြစ်ကြောင်းနှင့် နှမ်းသီးနှံသည် စိုက်ပျိုးထုတ်လုပ်မှုကုန်ကျစရိတ်  သက်သာခြင်း၊ တောင်သူ များ အလွယ်တကူစိုက်ပျိုးနိုင်ခြင်း၊ ရာသီဥတုကောင်းမွန်ခြင်း၊ အကျိုးအမြတ်ရရှိမှုတို့ကြောင့် နှမ်းစိုက်ပျိုးသူတောင်သူများမှ တစ်နှစ်ထက်တစ်နှစ် လျာထားသည့် ဧကများထက် ပိုမို စိုက်ပျိုးလာကြကြောင်း လေ့လာသိရှိရပါသည်။

DOCA(မကွေး)

      မွန်ပြည်နယ်၊ မော်လမြိုင်မြို့ ကုန်စည်ဒိုင်၏ ပဲမျိုးစုံဈေးနှုန်းအခြေအနေသည် ၂၀၂၄ခုနှစ်၊ လအလိုက်ဖြစ်ပေါ်ခဲ့သော ဈေးနှုန်းများအရ ဈေးနှုန်းအနိမ့်အမြင့် (အတက်အကျ) ဖြစ်ပေါ်ခဲ့သည်။ ယခုလ ဇွန်လနောက်ဆုံးပတ်၌ ပဲမျိုးစုံဈေးနှုန်းမြင့်တက်လာကြောင်း တွေ့ရသည်။

၂၀၂၄ခုနှစ် ဇန်နဝါရီလမှ ဇွန်လထိ (၆လ) အတွင်း ပဲဈေးနှုန်းပြောင်းလဲမှု

တစ်တင်းဈေးနှုန်း (ကျပ်)

       ထို့ပြင် မွန်ပြည်နယ်အတွင်း ပဲစိုက်ဧကနှင့်အထွက်နှုန်းသည် ၂၀၂၃-၂၀၂၄ ခုနှစ်တွင် ပဲစိုက်ပျိုးဧက ၇၄၃၃၀ဧက၊ ရိတ်သိမ်းဧက ၇၄၃၃၀ဧက၊ အထွက် ၁၁၉၀၄၃၈တင်းထွက်ရှိသည်။ ယခင် ၂၀၂၂-၂၀၂၃ ခုနှစ်တွင် ပဲစိုက်ပျိုးဧက ၆၇၃၄၆ဧက၊ ရိတ်သိမ်းဧက ၆၇၃၄၆ဧက၊ အထွက် ၁၀၅၅၈၀၂တင်းထွက်ရှိခဲ့သဖြင့် ယခင်နှစ်ထက် ပဲစိုက်ပျိုးမြေဧက ၉၆၈၄ဧကပိုမိုစိုက်ပျိုး၍ အထွက်နှုန်း ၁၃၄၆၃၆တင်းပိုမိုထွက်ရှိသည်။

      မွန်ပြည်နယ်တွင် ပဲမျိုးစုံများအနက် မြေပဲ၊ ပဲတီစိမ်း၊  မတ်ပဲ၊ ပဲလွမ်း၊ ဗိုလ်ကိတ်ပဲ၊ ပဲပုပ်ပဲ စသည့်ပဲမျိုးတို့ကို အများဆုံးစိုက်ပျိုးကြသည်။ မွန်ပြည်နယ်ဒေသထွက်ပဲမျိုးစုံကို  စိုက်ပျိုးသူ တောင်သူများအကျိုးအမြတ်ရရှိခြင်း၊  ကုန်သည်များအနေဖြင့် အရောင်းအဝယ်ကောင်းခြင်း၊ ပဲဈေးနှုန်းဈေးကွက်ခိုင်မာမှုရှိခြင်း၊ လူမျိုးဘာသာမရွေးစားသုံးကြခြင်း၊  စားသုံသူများအတွက် ဈေးကွက်၌ ပြတ်လပ်မှုမရှိ ဝယ်ယူစားသုံးမှုရရှိခြင်း၊ ပဲစားသုံးခြင်းဖြင့် အာဟာရဓာတ်အပြည့်အဝလည်းရရှိသည်။ ၎င်းပဲမျိုးစုံများကို ဒေသအတွင်း စားသုံးဖူလုံမှုအပြင် ပိုလျှံသည့်ပဲများကို  အခြားမြို့များသို့လည်း တင်ပို့လျက်ရှိကြောင်းသိရှိရပါသည်။

DOCA(မွန်)

     ဧရာဝတီတိုင်းဒေသကြီး၊ မအူပင်ခရိုင်၊ မအူပင်မြို့နယ်၊ ထနီး၊ သုံးဂွ၊ ကျောင်းရွာနှင့် သုံကြိုင်ကျေးရွာအုပ်စုတို့သည် တိုးမြစ်ကမ်းဘေးတွင်တည်ရှိပြီး သရက်ပင်၊ ငှက်ပျောပင်နှင့် သင်္ဘောပင်များအောင်မြင်ဖြစ်ထွန်းသော ကျေးရွာများဖြစ်ကြသည်။ မအူပင်ခရိုင်အနေဖြင့် မြို့နယ် ၄မြို့နယ်ရှိပြီး၊ မအူပင်၊ ပန်းတနော်၊ ညောင်တုန်း၊ ဓနုဖြူမြို့နယ်များတွင်  သရက်ပင်စိုက်ပျိုးမှုလည်းရှိပါသည်။        

      မအူပင်ခရိုင်၏ သရက်စိုက်ပျိုးမှုအနေဖြင် ၂၀၂၃-၂၀၂၄ ခုနှစ်တွင် မအူပင်ခရိုင်စိုက်ဧက (၁၂၂၄၂)ဧက၊ ခူးစွပ်ရိတ်ဧက (၅၁၀၅)၊ အထွက်နှုန်းအနေဖြင့် (၄၀၅၇.၆၆)လုံး၊ အလုံးရေထွက်ရှိမှုစုစုပေါင်း (၂၀၇၁၄၃၆၄)ထွက်ရှိကြောင်း မြေစာရင်းဌာန၏ စာရင်းများအရသိရသည်။

      သရက်ပျဉ်အစားအစာသည် ရာသီစာတစ်ခုဖြစ်ပြီး မြန်မာလူမျိုးတို့နှစ်သက်စွဲလမ်းသော အစားအစာတစ်ခုဖြစ်ပါသည်။ သရက်ပျဉ်အများဆုံးပြုလုပ်သူအများဆုံးဖြစ်သည့် သုံကြိုင်ကျေးရွာတွင် သရက်ပျဉ်ပြုလုပ်ရောင်းချသူ (၁၁၀) ဦးခန့်ရှိပြီး သရက်ပျဉ်ထုတ်လုပ်သူများ စုပေါင်းဖွဲ့စည်း၍ ရသာမွန်သရက်ပျဉ်လုပ်ငန်းစုဖွဲ့စည်းတည်ထောင်ခဲ့ပါသည်။

        သရက်ပျဉ်လုပ်ငန်းရှင် ဦးစိန်ဝင်းနှင့်တွေ့ဆုံစဉ် သရက်သီးမှည့်ချိန် မေလ၊ ဇွန်၊ ဇူလိုင်လများတွင် သရက်သီးတစ်လုံးလျှင် ၁၀၀/ကျပ်နှင့် ၁၅၀/-ကျပ်နှုန်းဖြင့်ဝယ်ရပြီး သရက်သီးမှည့်များကိုအခွံခွာ၍ ဒန်အိုးထဲသို့ခြစ်ချပြီး နာရီဝက်ခန့်ကျိုချက်ပြီး ငှက်ပျောရွက်များတွင်ဖြန့်ခင်း၍ နေသာလျှင် လှမ်းပြီး၊ မိုးရွာလျှင် မီးကင်အပူပေးရကြောင်း၊ သရက်သီးအလုံး ၁၀၀ကိုကျိုချက်၍ လှမ်းပြီးနောက် သရက်ပျဉ် (၃) ပိဿာရရှိကြောင်း၊ သရက်ပျဉ်တစ်ပိဿာလျှင် ၈၀၀၀/-ကျပ်ဈေးဖြင့် အရောင်းအဝယ်တွင်ကျယ်လျက်ရှိပြီး သရက်သီးအလုံး၁၀၀ကျိုချက်လှန်းပြီး သရက်ပျဉ်ရောင်းချပါက ၉၀၀၀/-ကျပ်အကျိုးအမြတ်ရရှိကြောင်းနှင့် ရာသီချိန်တွင် သရက်ပျဉ်လုပ်ငန်းကို တွင်ကျယ်စွာလုပ်ကိုင်လျက်ရှိကြောင်း၊ အိမ်ခြံများတွင် စိုက်ပျိုးသရက်များကိုသာဝယ်ယူ၍ သရက်ပျဉ်လုပ်ငန်းကို လုပ်ကိုင်ဆောင်ရွက်နေကြောင်းသိရသည်။

          သရက်ပျဉ်ဈေးကွက်အနေဖြင့် မအူပင်၊ တွံတေး၊ ရန်ကုန်များမှဝယ်လက်များ လာရောက်ဝယ်ယူလျက်ရှိပြီး ဈေးကွက်ရရှိလျက်ရှိပါသည်။

       ရာသီစာသရက်ပျဉ်လုပ်ငန်းဖွံ့ဖြိုးတိုးတက်ရေးအတွက် ရင်းနှီးမြုပ်နှံမှုနည်းပညာလိုအပ်ချက်များကို ဖြည့်ဆည်းလုပ်ကိုင်ပေးပါက သရက်ပျဉ်ဈေးကွက် ပိုမိုအလားအလာကောင်းများ ရရှိလာမည်ဟု သရက်ပျဉ်လုပ်ငန်းရှင်တစ်ဦးက ထပ်မံပြောပြခဲ့ပါသည်။ မအူပင်မြို့နယ်အတွင်းမှ သရက်ပင်များရှိသည့် နေရာများအရောက် ကိုယ်တိုင်လိုက်ခူး၍ လက်ကားလိုက်လံဝယ်ယူသူများလည်းရှိသည့်အပြင် ကိုယ်တိုင်ခူး၍ ဈေးကွက်အတွင်း ကိုယ်တိုင်ရောင်းချမှုများလည်းရှိသည်။ မအူပင်မြို့နယ်တွင် မန္တလေးရင်ကွဲသရက်သီးပင်များပေါက်ရောက်လေ့ရှိပြီး သရက်သီးမှည့်ပေါ်ချိန်တွင် ဈေးကွက်အသီးသီးသို့ တင်ပို့ရောင်းချမှုများရှိပြီး သရက်သီးမှည့်ပေါများချိန်များတွင် တစ်နိုင်တစ်ပိုင် သရက်ပျဉ်လုပ်ငန်းကို ထနီး၊ သုံးဂွကျောင်းရွာနှင့် သုံကြိုင်ကျေးရွာအုပ်စုတို့ဘက်တွင် လုပ်ကိုင်ဆောင်ရွက်ကြသူများလည်းရှိကြောင်းသိရှိရပါသည်။

DOCA(ဧရာဝတီ)

       ၂၆-၆-၂၀၂၄ ရက်နေ့တွင်  တိုင်းဒေသကြီး/ ပြည်နယ်များရှိ ကုန်စည်ဒိုင်များတွင်ဖြစ်ပေါ်နေသော မတ်ပဲ၊ ပဲတီစိမ်းနှင့် ပဲစင်းငုံများ၏ ယခင်နှစ်၊ ယခင်လ၊ ယခင်အပတ်၊ ယခင်နေ့၊ ကာလတူဈေးနှုန်းစာရင်းဇယားနှိုင်းယှဉ်ချက်အား အောက်ပါ .pdf တွင် ဝင်ရောက်ကြည့်ရှုနိုင်ပါသည်-

    မြန်မာနိုင်ငံသည် စိုက်ပျိုးရေးကိုအခြေခံပြီး အခြားစီးပွားရေးကဏ္ဍများကိုလည်း ဖွံ့ဖြိုးတိုးတက်အောင်ဆောင်ရွက်နေသော နိုင်ငံတစ်ခုဖြစ်သည်။ စစ်ကိုင်းတိုင်းဒေသကြီး၊ ကန့်ဘလူမြို့နယ်တွင်လည်း သီးနှံစိုက်ပျိုးရေးလုပ်ငန်းများအပြင် ကွမ်းခြံများကို မိမိတို့ယာကွက်များတွင်လည်းကောင်း၊ နေအိမ်ခြံဝင်းများတွင်လည်းကောင်း စိုက်ပျိုးကြကြောင်း သိရှိရပါသည်။

     ၂၀၂၄ ခုနှစ် ၊ ဇွန်လ တတိယပတ်အတွင်းဖြစ်ပေါ်နေသော ကန့်ဘလူခရိုင်၏ကွမ်းဈေးနှုန်းမှာ ကွမ်းရွက်ရှယ်တစ်ပိဿာလျှင် ၁၀၀၀၀ကျပ်၊ ကွမ်းရွက်အလတ်တစ်ပိဿာလျှင် ၅၀၀၀ကျပ်၊ ကွမ်းရွက်အသေးတစ်ပိဿာလျှင် ၂၀၀၀ ကျပ်ဖြင့် အရောင်းအဝယ်ဖြစ်လျက်ရှိကြောင်း၊  ကွမ်းရွက်များကို ကန့်ဘလူမြို့၊ ကျွန်းလှမြို့နှင့် မန္တလေးမြို့တို့ကို တင်ပို့ရောင်းချလျက်ရှိကြောင်း၊ ကွမ်းဝင်ရောက်မှုအပေါ်မူတည်၍ ဈေးနှုန်းအပြောင်းအလဲရှိကြောင်း ကွမ်းရောင်းဝယ်ရေးလုပ်ငန်း ရှင်ထံမှ သိရှိရပါသည်။

DOCA(စစ်ကိုင်း)