ပြည်တွင်းကုန်သွယ်မှုသတင်း

   စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ဝန်ကြီးရုံး၏ ရည်ညွှန်းပါစာလမ်းညွှန်ချက်အရ ဆန်စပါးဆိုင်ရာ အပတ်စဉ်လေ့လာသုံးသပ်ချက်(အကျဉ်းချုပ်) ၁၃/၂၀၂၃ အား သိရှိလမ်းညွှန်မှုပြုနိုင်ပါရန် တင်ပြအပ်ပါသည်။

    မန္တလေးတိုင်းဒေသကြီး၊ ကျောက်ဆည်ခရိုင်အနေဖြင့် နွေနှမ်းများ အောင်မြင်စွာ စိုက်ပျိုးပြီးစီးလျက် ရှိပါသည်။ ၂၀၂၃ ခုနှစ်တွင် နွေနှမ်းလျာထားစိုက်ဧက (၃၉၇၀၃)ဧက စိုက်ပျိုးနိုင်ရန်လျာထားလျက်ရှိရာ အမှန်စိုက်ပျိုးဧက ၂၀၂၂-၂၀၂၃ ဘဏ္ဍာနှစ်တွင် (၂၈၁၃၉)ဧက စိုက်ပျိုးပြီးစီးပြီဖြစ်ကြောင်း သက်ဆိုင်ရာဌာန၏ စာရင်းများအရ သိရှိရပါသည် ။ နွေနှမ်းစိုက်ပျိုးမှုအနေဖြင့် (၁)ဧကလျှင် မျိုး၊ သွင်းအားစု ၊ လုပ်သားခ ၊ စုစုပေါင်း(၂၆၀၀၀၀/-) ကျပ်ဝန်းကျင်ခန့် ကုန်ကျကြောင်း သိရှိရပါသည် ။ စိုက်ပျိုးသောနှမ်းအမျိုးအစားများမှာ နှမ်းဖြူ၊နှမ်းညို၊နှမ်းနက်မျိုးများကို အများဆုံးစိုက်ပျိုးကြပါသည်။ နှမ်းစျေးနှုန်းများအနေဖြင့် ယခင်နှစ်တွင် နှမ်းဖြူတစ်တင်းလျှင် (၅၉၀၀၀/-)ကျပ်၊နှမ်းနက်ရိုးရိုး တစ်တင်းလျှင်(၅၄၀၀၀/-)ကျပ်၊ နှမ်းနက်စမုံတစ်တင်းလျှင်(၅၂၀၀၀/-)ကျပ်၊ နှမ်းညိုတစ်တင်းလျှင် (၅၄၀၀၀/-)ကျပ် စျေးနှုန်းများရှိပြီး ယခုလက်ရှိ ပေါက်စျေးအနေဖြင့် နှမ်းဖြူတစ်တင်းလျှင် (၁၀၂၀၀၀/-)ကျပ် ၊ နှမ်းနက်ရိုးရိုး တစ်တင်းလျှင်(၈၃၀၀၀/-)ကျပ် ၊ နှမ်းနက်စမုံ တစ်တင်းလျှင် (၈၀၀၀၀/-)ကျပ်၊နှမ်းညိုတစ်တင်းလျှင်(၈၀၀၀၀/-)ကျပ်စျေးနှုန်းများဖြင့် အရောင်းအဝယ်ဖြစ်နေပြီး ယခုလက်ရှိ နှမ်းဆီ တစ်ပိဿာလျှင်(၁၂၀၀၀/-)ကျပ် စျေးနှုန်းများဖြင့် အရောင်းအဝယ်ဖြစ်နေကြောင်း၊နှမ်းစျေးနှုန်းနှင့် နှမ်းဆီစျေးနှုန်းများ ကောင်းမွန်သောကြောင့် နှမ်းစိုက်ပျိုးသောတောင်သူများအနေဖြင့် အကျိုးအမြတ်များ ပိုမိုရရှိနိုင်သောကြောင့် နှမ်းများကို ကျယ်ကျယ်ပြန့်ပြန့် စိုက်ပျိုးလျက်ရှိပါသည်။

DOCA(မန္တလေး)

      ပဲခူးတိုင်းဒေသကြီး၊ တောင်ငူခရိုင်၊ တောင်ငူမြို့၊ အမှတ်(၂)ရပ်ကွက်၊ ရွှေဟင်္သာဘုရားလမ်းရှိ အေးမေတ္တာ တန်(၂၀၀)ကျဆန်စက်ကြီးသည် စပါးခွံဓါတ်ငွေ့အသုံးပြု၍ လျှပ်စစ်ဓါတ်အားရရှိအောင် ဆောင်ရွက်နေပါသည်။ တောင်ငူမြို့နယ်တွင် နွေစပါး ၁၈၇၄၁ ဧက စိုက်ပျိုးထားရာ နွေစပါးထွက်ရှိလာချိန်တွင် လုံလောက်သော လျှပ်စစ်ဓါတ်အားရရှိအောင် ကိုယ်ပိုင်အရင်းအနှီးဖြင့် ဆောင်ရွက်နေပါသည်။

     စပါးစိုက်တောင်သူများသည် စပါးရိတ်သိမ်းချိန်တွင် ခေတ်မီစပါးရိတ်သိမ်း ချွေလှေ့စက် ဖြင့်ရိတ်သိမ်းကြပါသည်။ စပါးပွဲစားများသည် လယ်ကွင်းထဲ၌ဆင်း၍ ဝယ်ယူကြရာ တောင်သူဦးကြီး များသည် ရိတ်သိမ်းချွေလှေ့စက်မှ စပါးချသည်နှင့် အိတ်သွတ်၍ ချက်ချင်းရောင်းချကြပါသဖြင့် အစို ဓါတ် ၁၉ % မှ ၂၁ % အထိ ရှိနေတတ်ပါသည်။ စပါးပွဲစားများက စက်ရုံသို့ ပြန်လည်ရောင်းချသည့်အခါ စက်ရုံများက အစိုဓါတ်များနေသည့် စပါးများကို ခေတ်မီအခြောက်ခံစက်များဖြင့် အစိုဓါတ် ၁၄ % သို့ ရောက်ရှိအောင် အခြောက်ခံကြရပါသည်။

       စပါးအခြောက်ခံစက် အသုံးပြုချိန်တွင် လုံလောက်သောလျှပ်စစ်ဓါတ်အား မရရှိပါက စပါးများ အပင်ပေါက်ခြင်း၊ ဆန်အဝါရောင်ပြောင်းသွားခြင်းများ ဖြစ်ပေါ်နိုင်ပါသည်။ နေရောင်ခြည်ဖြင့် စပါးလှမ်းမည်ဆိုပါကလည်း နေရာအခက်အခဲရှိခြင်း၊ လုပ်သားများ ပိုမိုသုံးစွဲရခြင်း၊ မိုးဦးရာသီဖြစ်သည့်အတွက် အချိန်မရွေးမိုးရာသွန်းနိုင်၍ လှမ်းထားသောစပါးများ မိုးမိနိုင်ခြင်းစသည့်အခက်အခဲများ ရှိပါသည်။

       အေးမေတ္တာဆန်စက်သည် စပါးခွံဓါတ်ငွေ့ဖြင့် လျှပ်စစ်ဓါတ်အား ထုတ်လုပ်နိုင်ရန် 300 KW စက်နှစ်လုံး တပ်ဆင်လိုက်သည့်အတွက် လျှပ်စစ်ဓါတ်အား လိုအပ်ချက်ကို စိတ်ပူစရာမလိုတော့ဘဲ ဝယ်ယူရရှိသည့်စပါးများကို နေ့ချင်းအခြောက်ခံနိုင်မည် ဖြစ်ပါသည်။ ရင်းနှီးမြှုပ်နှံမှုအဖြစ် RH-10 NISSAN DIESEL အင်ဂျင်နှစ်လုံး ကျပ်သိန်း ၁၁၀၀၊ စပါးခွံ Gasifier နှစ်လုံး ကျပ်သိန်း ၆၀၀၊ ဒိုင်နမို  300 KW နှစ်လုံး ကျပ်သိန်း ၄၀၀၊ စက်တပ်ဆင်ခ ကျပ် ၆၅ သိန်းဖြင့် အဆောက်အဦမပါ ရင်းနှီးမြှုပ်နှံငွေ ကျပ်သိန်း ၂၂၀၀ ရင်းနှီးထားပါသည်။

  Gasifier မှ ထွက်လာသောရေဆိုးကို စနစ်တကျစွန့်ပစ်နိုင်အောင် ရေစစ်ကန်များ အဆင့်ဆင့် ပြုလုပ်ထားရှိပါသည်။ အင်ဂျင်များမှ အသံဆူညံခြင်းမရှိအောင် အသံလုံစနစ်များ တပ်ဆင်ထားခြင်း၊ မီးခိုးငွေ့များ စနစ်တကျ ထုတ်ထားခြင်းများကိုလည်း ဆောင်ရွက်ထားပါသည်။

    ဒီဇယ်အင်ဂျင်တွင် Gasifier မှ ဓါတ်ငွေ့နှင့် ဒီဇယ်ကို တွဲသုံးနိုင်ပြီး Dual ဖြစ်သည့်အတွက် ဒီဇယ်ဆီ ၇၅ % မှ ၈၀ % အထိ လျှော့ချနိုင်ပါသည်။ RH-10 ဒီဇယ်အင်ဂျင်တစ်လုံး ပုံမှန် တစ်နာရီမောင်းလျှင် ဒီဇယ်ဆီ ၉ ဂါလံကုန်ကျပါသည်။ ယခု ဓါတ်ငွေ့ကို တွဲသုံးသည့်အတွက် တစ်နာရီလျှင် ဒီဇယ်ဆီ တစ်ဂါလံသာ ကုန်ကျပါသည်။ စပါးခွံ အသုံးပြုမှုအနေဖြင့် တစ်နာရီလျှင် စပါးခွံ နှစ်တင်းဝင်အိတ် ၁၈ အိတ်သာ အသုံးပြုရပါသည်။

     Gasifier လည်ပတ်နိုင်အောင် စက်များတပ်ဆင်သည့်အပိုင်းကို ဧရာဝတီတိုင်းဒေသကြီးမှ ဆရာဦးမြင့်ခိုင်က တာဝန်ယူဆောင်ရွက်ပေးပါသည်။ လုပ်ငန်းစတင်ချိန်တွင် ရင်းနှီးငွေများသော်လည်း ဆန်စက်များတွင် စပါးခွံပေါများစွာ ရရှိနေခြင်း၊ ဒီဇယ်အသုံးပြုမှု ကုန်ကျစရိတ် လျှော့ချလာနိုင်ခြင်းတို့ကြောင့်  ရေရှည်တွင် အကျိုးအမြတ်ရရှိလာနိုင်ကြောင်း ဆန်စက်ပိုင်ရှင် ရှင်းလင်း ပြောကြားချက်အရ သိရပါသည်။

DOCA(ပဲခူး)

တိုင်းဒေသကြီး/ပြည်နယ်များ၏ စပါးဆန် ဈေးနှုန်းများအား ယခင်နှစ်၊ ယခင်လ၊ ယနေ့ ကာလတူ နှိုင်းယှဉ်ပြုစုတင်ပြအပ်ပါသည်။

      ၂၄.၄.၂၀၂၃ ရက်နေ့တွင် တိုင်းဒေသကြီးနှင့်ပြည်နယ် မြို့နယ်အလိုက် ဆန်၊ ဆီ၊ မီးဖိုချောင်သုံးပစ္စည်းများ၊ သားငါး၊ စက်သုံးဆီ၊ ရွှေ၊ ဒေါ်လာ ဈေးနှုန်းများအား အောက်ပါ .pdf တွင် ဝင်ရောက်ကြည့်ရှုနိုင်ပါသည်-   ၂၄.၄.၂၀၂၃ ရက်နေ့တွင် တိုင်းဒေသကြီးနှင့်ပြည်နယ် မြို့နယ်အလိုက် ဆန်၊ ဆီ၊ မီးဖိုချောင်သုံးပစ္စည်းများ၊ သားငါး၊ စက်သုံးဆီ၊ ရွှေ၊ ဒေါ်လာ ဈေးနှုန်းများအား အောက်ပါ .pdf တွင် ဝင်ရောက်ကြည့်ရှုနိုင်ပါသည်-