ပြည်တွင်းကုန်သွယ်မှုသတင်း

       (၂၀၂၂-၂၀၂၃)ခု ဘဏ္ဍာနှစ်တွင် ပြည်ခရိုင်အတွင်းရှိ မြို့နယ်များအနေဖြင့် ထောပတ်ပဲသီးနှံ စိုက်ပျိုးထွက်ရှိမှု အခြေအနေမှာ ပန်းတောင်းမြို့နယ်တွင် (၂၀၆) ဧက စိုက်ပျိုးထားရှိရာ (၂၀၆)ဧက ရိတ်သိမ်းခဲ့ပြီး တင်း (၂၈၀၀)ကျော် ထွက်ရှိကာ အထွက်နှုန်းအနေဖြင့် (၁၃.၉၉)တင်း ထွက်ရှိ ကြောင်း၊ ရွှေတောင်မြို့နယ်တွင် (၄၂၁၀)ဧက စိုက်ပျိုးထားရှိပြီး (၄၂၁၀) ဧက ရိတ်သိမ်း၍ တင်းပေါင်း(၅၉၀၀၀)ကျော်ထွက်ရှိခဲ့ကာ  အထွက်နှုန်းအားဖြင့် (၁၄.၀၂) တင်း ထွက်ရှိကြောင်း၊ ပြည်မြို့နယ်နှင့် ပေါက်ခေါင်းမြို့နယ်တို့တွင် ထောပတ်ပဲသီးနှံအား စိုက်ပျိုးမှုမရှိကြောင်း သိရှိရပါသည်။ ပြည်ခရိုင်အနေဖြင့် (၄၄၁၆) ဧက စိုက်ပျိုးနိုင်ခဲ့ကာ (၄၄၁၆)ဧက ရိတ်သိမ်းခဲ့သဖြင့် တင်းပေါင်း (၆၀၀၀၀)ခန့် ထွက်ရှိခဲ့၍ အထွက်နှုန်းအားဖြင့် (၁၃.၅၉)တင်း ထွက်ရှိပါသည်။ ထောပတ်ပဲသီးနှံကို မတ်လပိုင်းတွင် စတင်ရိတ်သိမ်းနေပြီဖြစ်ရာ သီးနှံစတင်ထွက်ရှိချိန်ကာလတွင် (၁)တင်းလျှင် (၆၀၀၀၀)ကျပ်ဖြင့် စျေးစဖွင့်ခဲ့ပြီး နောက်ပိုင်းတွင် ထွက်ရှိလာသည့် သီးနှံအရည်အသွေးကောင်းမွန်ခြင်း၊ ဒေသတွင်းအဝယ်လိုက်ခြင်းများကြောင့် (၁)တင်းလျှင် (၇၅၀၀၀)ကျပ်ထိ စျေးရရှိကြောင်း သိရှိရပါသည်။

DOCA(ပဲခူး)

      ပြည်ဈေးကွက်အနေဖြင့် ငရုတ်သီးစိမ်းများရောင်းချရာတွင် အမျိုးအစားအလိုက်ခွဲခြား၍ ဈေးနှုန်းများ သတ်မှတ်လျက်ရှိပြီး ပီနန်သီးနှင့် စပ်သီးအမျိုးအစားများမှာ အမြင့်ဈေးနှင့်ရောင်းချကြပါသည်။ ကျောက်စိမ်းသီး အမျိုးအစားမှာ အနှစ်ရပြီးသိပ်မစပ်သည့်အတွက် ရောင်းဈေးမှာလည်း ဈေးသက်သာပါသည်။

     ကျောက်စိမ်းသီးအမျိုးအစားမှာ ပေါင်းတလည်နှင့် ဇီးအုပ်နယ်ဘက်မှ ဝင်ရောက်မှုရှိပြီး စပ်သီးအမျိုးအစားမှာ ဝက်ထီးကန်နှင့် ပေါက်ခေါင်းဘက်မှ ဝင်ရောက်ခြင်းဖြစ်ပါသည်။ ပီနန်သီး အမျိုးအစားမှာ ရန်ကုန်ဘက်မှ ပြန်လည် ဝင်ရောက်မှုရှိကြောင်း သိရပါသည်။ စားသုံးသူများ အနေဖြင့် မိမိကြိုက်နှစ်သက်သည့်အမျိုးအစားကို ရွေးချယ်ဝယ်ယူစားသုံးလျက်ရှိပြီး ပြည်ဈေးကွက်အတွင်း ရောင်းချသည့်ငရုတ်သီးစိမ်း ဈေးနှုန်းများမှာ ကျောက်စိမ်းငရုတ်သီးစိမ်း ပျမ်းမျှတစ်ပိဿာလျှင် ကျပ် (၂၇၀၀ မှ ၃၀၀၀) အထိရှိကာ စပ်သီးမှာ (၆၀၀၀ မှ ၇၀၀၀-၈၀၀၀) ကျပ်ဖြင့် ရောင်းချပြီး ပီနန်သီးမှာ ကျပ်(၈၀၀၀ မှ ၉၀၀၀- ၁၀၀၀၀) ရောင်းချကြောင်း သိရပါသည်။

DOCA(ပဲခူး)

    ပြည်(ချင်း)ပွဲရုံများသို့ ချင်းထွက်ရာဒေသတို့မှ အဝင်နည်းနေခဲ့သည်။ ပြည်ပွဲရုံများတွင် ချင်းဈေးလုံးဝ ငြိမ်နေခဲ့ရာမှ ယခင်အပတ်မှစ၍ တစ်ပိဿာ‌ဈေးနှုန်း ၈၀၀မှ ၁၀၀၀ အထိ ဈေးနှုန်းမြင့်တက်လာတာ တွေ့ရပါသည်။ ယခုအပတ်ချင်းဈေးမှာ (ပွဲရုံဈေး) ၃၅၀၀ ကျပ်ဖြစ်ပြီး (လက်လီဈေး) မှ ၄၀၀၀ / ၄၂၀၀ ကျပ်တို့ဖြင့် ရောင်းဝယ်နေသည်ကို တွေ့ရပါသည်။ ဒါးလှီးချင်း(ဖတ်) တစ်ပိဿာ ၃၈၀၀ကျပ်ဈေးဖြစ်ပြီး အရောင်းအဝယ်မှာ ခရိုင်တွင်ဈေးများမှ ဝယ်လက်များနှင့် ဒေသတွင်းလက်လီသမားတို့ အခွဲများနေသောကြောင့် အရောင်းအဝယ်ဖြစ်နေကြောင်း သိရပါသည်။

DOCA(ပဲခူး)

      အင်းစိန်မြို့နယ်ရှိ တညင်းကုန်းလက်ကားဈေးကြီးအတွင်းသို့ ဧပြီလ(၁၂)ရက်နေ့မှ ဧပြီလ (၁၈)ရက်အတွင်း ညောင်တုန်း၊ မှော်ဘီ၊ သာရဝေါ၊ ညောင်နှစ်ပင်ကျေးရွာ၊ ကြာကန်စု ကျေးရွာ၊ နေပြည်တော်၊ တပ်ကုန်း၊ ရွှေဒါး၊  မင်္ဂလာဒုံ၊ အင်းစိန်၊ ခရမ်း၊ သုံးခွ၊ ပြည်၊ လက်ပံတန်း၊ မင်းလှ၊ ဝါးနက်ချောင်း၊ မော်လမြိုင်၊ မန္တလေး၊ အုတ်ဖိုနှင့် ရှမ်းပြည်နယ်တို့မှ ဟင်းသီးဟင်းရွက်နှင့် သစ်သီးဝလံပန်းမန်များ အများဆုံးဝင်ရောက် ရောင်းချနေကြောင်း သိရှိရပါတယ်။ ထိုသို့ဝင်ရောက်ရာတွင် ယခုရက်သတ္တပတ်အတွင်း ခရမ်းချဉ်သီးထိုင်ဝမ်(ပိဿာ)ကျပ် ၂၂၀၀ မှ ၂၇၀၀ အတွင်း၊ ဂေါ်ဖီထုပ်(တစ်ထုပ်)ကျပ် ၁၅၀၀ မှ ၃၅၀၀ အတွင်း၊ ပန်းဂေါ်ဖီ(ထုပ်)ကျပ် ၆၀၀ မှ ၁၆၀၀ အတွင်း၊ အာလူး(ပိဿာ)ကျပ် ၁၅၀၀ မှ ၂၃၀၀ အတွင်း၊ မုန့်လာဉနီ(ပိဿာ) ကျပ် ၁၂၀၀ မှ ၂၀၀၀ အတွင်း ရွှေဖရုံသီး(လုံး)ကျပ် ၁၅၀၀ မှ ၆၀၀၀ အတွင်း၊ ဗူးသီး(လုံး) ကျပ် ၁၀၀၀ မှ ၂၇၀၀ အတွင်း၊ မုန်ညှင်း(ထုပ်)(ပိဿာ)ကျပ် ၁၅၀၀ မှ ၂၅၀၀ အတွင်း၊ ကြက်သွန်နီ(ဆိပ်ဖြူ)ကျပ် ၁၂၀၀ မှ ၁၅၀၀ အတွင်း၊ ကြက်သွန်ဖြူ(ရှမ်း)(ပိဿာ)ကျပ် ၃၈၀၀ မှ ၄၂၀၀ အတွင်း၊ ကြက်သွန်ဖြူ (ကြူကုတ်) (ပိဿာ) ကျပ် ၄၂၀၀ မှ ၄၅၀၀ အတွင်း၊ ချင်း(ပိဿာ)ကျပ် ၂၅၀၀ မှ ၄၀၀၀ အတွင်း၊ ဆလပ်ရွက် (စီး) ကျပ် ၂၀၀ မှ ၃၀၀ အတွင်း၊ ချဉ်ပေါင်ရွက်(စီး) ကျပ် ၈၀ မှ ၁၀၀ အတွင်း၊ ခရမ်းသီး  (ရှည်)(ပိဿာ)ကျပ် ၁၅၀၀ မှ ၂၆၀၀ အတွင်း၊ သံပရာသီး(လုံး)ကျပ် ၁၀၀ မှ ၃၀၀ အတွင်း၊ ငရုတ်သီး စိမ်း (ကျောက်စိမ်း) (ပိဿာ)ကျပ် ၁၈၀၀ မှ ၂၅၀၀ အတွင်း၊ ဖရဲသီး (အကြီး၊ အလတ်၊ အသေး)ကျပ် ၁၀၀၀ မှ ၉၀၀၀ အတွင်းဖြစ်ကြောင်း သိရှိရပါတယ်။ တညင်းကုန်းလက်ကားဈေးကြီးအတွင်းသို့ ယခုရက်သတ္တပတ်အတွင်း သံပုရာသီးအလုံးပေါင်း(၁၀၅၀၀၀)ကျော်၊ ခရမ်းသီး(ရှည်) (ပိဿာ) (၂၆၄၄၀)ကျော်၊ ဗူးသီးအလုံးပေါင်း (၄၆၂၀)ကျော်၊ ရွှေဖရုံသီးအလုံးပေါင်း(၃၈၅၀)ကျော်၊ ဂေါ်ဖီထုပ် ပေါင်း (၆၈၀၀)ကျော်၊ ပန်းဂေါ်ဖီထုပ်ပေါင်း (၁၄၁၀၀)ကျော်၊ မုန်ညှင်းထုပ်(ပိဿာ)ပေါင်း (၅၅၁၅) ကျော်၊ ဖရဲသီးလုံးပေါင်း (၁၁၆၀၀)ကျော်  အသီးသီးကုန်အဝင်ရှိကြောင်း သိရပါတယ်။

DOCA(ရန်ကုန်)

        ပြည်ကုန်စည်တွင် ဖေဖော်ဝါရီလနှင့် မတ်လ ပဲမျိုးစုံအရောင်းအဝယ်ဖြစ်မှုနှင့် ဈေးနှုန်းဈေးကွက်အခြေအနေကို နှိုင်းယှဉ်ကြည့်ခြင်းဖြင့် ဖြစ်ပေါ်နေသော ဈေးနှုန်းနှင့် အရောင်းအဝယ်ဖြစ်မှုကို လေ့လာသိရှိရပါသည်။

မတ်ပဲ

    ပြည်ကုန်စည်ဒိုင်တွင် ဖေဖော်ဝါရီလ ပထမပတ်တွင် မတ်ပဲတစ်တင်းကို (၅၈၅၀၀)ကျပ်၊ ဒုတိယ ပတ်တွင် (၆၁၀၀၀)ကျပ်ဖြင့် တစ်ရက်ကို အိတ်(၃၀၀)ခန့် အရောင်းအဝယ်ဖြစ်ခဲ့ပါသည်။ ဖေဖော်ဝါရီ တတိယပတ်တွင် မတ်ပဲတစ်တင်းကို (၆၂၀၀၀)ကျပ်ဖြင့် လှောင်သမားနှင့် ရန်ကုန်အဝယ်တစ်ရက်ကို အိတ် (၃၀၀/၄၀၀)ခန့် အရောင်းအဝယ်ဖြစ်ခဲ့ပါသည်။ စတုတ္တပတ်တွင် ပဲတစ်တင်းကို (၆၂၀၀၀)ကျပ်ဖြင့် ဈေးငြိမ်နေခဲ့ပြီး ရန်ကုန်အဝယ်ရှိခဲ့ပါသည်။ မတ်လပထမပတ်တွင် မတ်ပဲတစ်တင်းကို (၆၀၀၀၀-၆၁၀၀၀)ကျပ်ထိဈေးကျလာခဲ့ပြီး လှောင်သမားနှင့် ရန်ကုန်အဝယ် တစ်ရက်ကို အိတ် (၃၀၀/၃၅၀)ခန့် တင်ပို့မှုရှိခဲ့ပါသည်။ မတ်လဒုတိယပတ်တွင် မတ်ပဲတစ်တင်းကို (၆၄၀၀၀)ကျပ်ဖြင့်‌ ဈေးတက်လာခဲ့ပါသည်။ တတိယပတ်တွင် တစ်တင်းကို (၆၆၅၀၀-၆၇၀၀၀)ကျပ်ဖြင့် ဈေးပိုတက်ခဲ့ပြီး ရန်ကုန် အဝယ်တစ်ရက်ကို အိတ် (၂၀၀/၃၀၀)ခန့်ရှိပါသည်။ မတ်လ စတုတ္ထပတ်တွင် မတ်ပဲတစ်တင်းကို (၆၇၅၀၀)ကျပ်ဖြင့် လှောင်သမားနှင့် ရန်ကုန်အဝယ်ရှိခဲ့ပါသည်။

ပဲစင်းငုံ

     ပြည်ကုန်စည်ဒိုင်၏ ဖေဖော်ဝါရီ ပထမပတ်တွင် ပဲစင်းငုံသီးနှံတစ်တင်းကို (၆၁၀၀၀)ကျပ်၊ ဒုတိယပတ်တွင် (၆၅၀၀၀)ကျပ်ထိ ဈေးမြင့်လာခဲ့ပြီး ရန်ကုန်အဝယ်တစ်ရက်ကို အိတ်(၂၀၀/၃၀၀)ခန့် တင်ပို့မှုရှိခဲ့ပါသည်။ ဖေဖော်ဝါရီတတိယပတ်တွင် ပဲစင်းငုံတစ်တင်းကို (၆၆၀၀၀)ကျပ်ဖြင့် ရန်ကုန် အဝယ်ရှိခဲ့ပါသည်။ စတုတ္ထပတ်တွင် ပဲစင်းငုံတစ်တင်းကို (၆၉၀၀၀-၆၉၅၀၀)ကျပ်ဖြင့် ရန်ကုန်အဝယ် တစ်ရက်ကိုအိတ် (၂၀၀/၃၀၀)ခန့် အဝယ်ရှိခဲ့ပါသည်။ မတ်လပထမပတ်တွင် ပဲစင်းငုံတစ်တင်းကို (၆၈၅၀၀-၆၉၀၀၀)ကျပ်ဖြင့် ရန်ကုန်အဝယ်တစ်ရက်ကိုအိတ် (၂၀၀/၃၀၀)ခန့်ရှိခဲ့ပါသည်။ ဒုတိယ ပတ်တွင် ပဲစင်းငုံတစ်တင်းကို (၇၁၅၀၀-၇၂၀၀၀)ကျပ်ဖြင့် ရန်ကုန်အဝယ်ရှိခဲ့ပါသည်။ မတ်လ တတိယပတ်တွင် ပဲစင်းငုံတစ်တင်းကို (၇၄၅၀၀-၇၅၀၀၀)ကျပ်ထိ ဈေးမြင့်ခဲ့ပြီး ရန်ကုန်အဝယ်ရှိခဲ့ပါသည်။ မတ်လစတုတ္ထပတ်တွင် ပဲစင်းငုံဈေးအေးနေပြီး ရန်ကုန်အဝယ်တစ်ရက်ကို အိတ် (၂၀၀/၃၀၀)ခန့် တင်ပို့ခဲ့ပါသည်။

ကုလားပဲ

   ပြည်ကုန်စည်ဒိုင်၏ ဖေဖော်ဝါရီပထမပတ်တွင် ကုလားပဲဟော်လန်တစ်တင်းကို (၆၈၀၀၀)ကျပ်၊ ကုလားပဲ မြကြေးမှုံ တစ်တင်းကို (၆၅၀၀၀-၆၆၀၀၀)ကျပ်ဖြင့် ခွဲစက်သမားနှင့် မြို့တွင်း အဝယ် တစ်ရက်ကိုအိတ် (၃၀၀)ခန့်ရှိခဲ့ပါသည်။ ဒုတိယပတ်တွင် ကုလားပဲဟော်လန်တစ်တင်းကို (၆၅၀၀၀) ကျပ်၊ကုလားပဲ မြကြးမှုံတစ်တင်းကို (၆၂၅၀၀)ကျပ်ဖြင့် မြို့တွင်းနှင့် ရန်ကုန်အဝယ်တစ်ရက်ကို အိတ် (၃၀၀/၄၀၀)ခန့် အဝယ်ရှိခဲ့ပါသည်။ တတိယပတ်တွင် ကုလားပဲဟော်လန်တစ်တင်းကို (၆၆၀၀၀-၆၆၅၀၀)ကျပ်၊ကုလားပဲ မြကြးမှုံတစ်တင်းကို (၆၆၀၀၀-၆၆၅၀၀)ကျပ်ဖြင့်အရောင်းအဝယ်ဖြစ်ခဲ့ပါသည်။ စတုတ္တပတ်တွင် ကုလားပဲဟော်လန်တစ်တင်းကို (၆၇၀၀၀-၆၈၀၀၀)ကျပ်၊ကုလားပဲ မြကြေးမှုံနှင့် ဈေးတူပြီး မြို့တွင်းအဝယ်ရှိခဲ့ပါသည်။ မတ်လပထမပတ်တွင် ကုလားပဲဟော်လန်တစ်တင်းကို (၆၈၀၀၀)ကျပ်ဖြင့် မြို့တွင်းခွဲစက်သမားများ တစ်ရက်ကို အိတ်(၃၀၀)ခန့် အဝယ်ရှိခဲ့ပါသည်။ မတ်လ ဒုတိယပတ်တွင် ကုလားပဲဟော်လန်တစ်တင်းကို (၇၃၀၀၀-၇၄၀၀၀)ကျပ်၊ ကုလားပဲ မြကြးမှုံတစ်တင်း ကို (၇၃၀၀၀-၇၃၅၀၀)ကျပ်ဖြင့် မြို့တွင်းအဝယ်ရှိခဲ့ပါသည်။ မတ်လတတိယပတ်တွင် ကုလားပဲ ဟော်လန် တစ်တင်းကို (၇၄၀၀၀)ကျပ်၊ ကုလားပဲ မြကြေးမှုံတစ်တင်းကို (၇၄၅၀၀-၇၅၀၀၀)ကျပ်ဖြင့် ခွဲစက်သမားများ အဝယ်တစ်ရက်ကို အိတ် (၃၀၀/၄၀၀)ခန့် ရှိခဲ့ပါသည်။ စတုတ္ထပတ်တွင် ကုလားပဲ ဟော်လန်တစ်တင်းကို (၇၃၀၀၀)ကျပ်၊ ကုလားပဲ မြကြေးမှုံတစ်တင်းကို (၇၃၅၀၀-၇၄၀၀၀)ကျပ်ဖြင့် ခွဲစက်သမားနှင့် ရန်ကုန်အဝယ်ရှိခဲ့ပါသည်။

ဘိုကိတ်ပဲ

   ဖေဖော်ဝါရီပထမပတ် ပြည်ကုန်စည်ဒိုင်တွင် ဘိုကိတ်တစ်တင်းကို (၄၇၅၀၀)ကျပ်၊ ဒုတိယပတ်တွင် ဘိုကိတ်တစ်တင်းကို (၄၈၀၀၀)ကျပ်ဖြင့် မြို့တွင်းနှင့်ရန်ကုန်အဝယ်တစ်ရက်ကိုအိတ် (၅၀/၁၀၀) ခန့်ရှိခဲ့ပါသည်။ ဖေဖော်ဝါရီတတိယပတ်တွင် ဘိုကိတ်ပဲတစ်တင်းကို (၄၇၀၀၀)ကျပ်၊ စတုတ္ထ ပတ်တွင် ဘိုကိတ်ဈေးအေးနေပြီး ပဲတစ်တင်းကို (၄၇၀၀၀)ကျပ်ဖြင့် မြို့တွင်းအဝယ်ရှိခဲ့ပါသည်။ မတ်လပထမပတ်တွင် ဘိုကိတ်ပဲတစ်တင်းကို (၄၇၀၀၀)ကျပ်၊ ဒုတိယပတ်နှင့် တတိယပတ်တွင်လည်း ဘိုကိတ်ပဲတစ်တင်းကို (၄၇၀၀၀)ကျပ်ဖြင့် ဈေးအေး၍ အရောင်းအဝယ်ဖြစ်ခဲ့ပါသည်။ စတုတ္ထပတ် တွင်လည်း (၄၇၀၀၀)ကျပ်ဖြင့် မြို့တွင်းအဝယ်တစ်ရက်ကို (၅၀/၁၀၀)ခန့် အရောင်းအဝယ်ဖြစ်ခဲ့ပါသည်။

    ပြည်ကုန်စည်ဒိုင်၏ ဖေဖော်ဝါရီလနှင့် မတ်လ ပဲမျိုးစုံဈေးကိုကြည့်လျှင် မတ်ပဲ၊ ပဲစင်းငုံ၊ ကုလားပဲဈေးမှာ မတ်လတွင် ဈေးပိုတက်ခဲ့ပြီး ဘိုကိတ်ပဲဈေးမှာ ဈေးအေးလျက်ရှိကြောင်း သိရပါသည်။

DOCA(ပဲခူး)