ပြည်တွင်းကုန်သွယ်မှုသတင်း

      “နိုင်ငံ့စီးပွားမြှင့်တင်ဖို့၊ ဆန်စပါးဖြင့်ကြိုးပမ်းစို့” ဆောင်ပုဒ်နှင့်အညီ ပဲခူးတိုင်းဒေသကြီး၊ တောင်ငူမြို့နယ်တွင် နွေစပါးများ စိုက်ပျိုးထားရှိပါသည်။ ၂၀၂၂-၂၀၂၃ ခုနှစ်တွင် သုံးသီးစားစနစ် မိုးစပါး၊ မတ်ပဲ၊ နွေစပါး အောင်မြင်ဖြစ်ထွန်းအောင် စိုက်ပျိုးကြပါသည်။ တောင်ငူမြို့နယ်သည် တန်ဖိုးရှိလှသော သဘာဝအရင်းအမြစ်များ တည်ရှိနေပါသည်။ အရှေ့ရှမ်းရိုးမပေါ်တွင် ပသိဆည်၊ တောင်ခြေတွင် ကရင်ချောင်းဆည်၊ ကမ်းနီဆည်၊ စစ်တောင်းမြစ်၊ အနောက်ရိုးမ တောင်ပေါ်တွင် ခပေါင်းဆည်တို့ ရှိနေခြင်းကြောင့် နွေစပါးစိုက်ပျိုးမှုအတွက် လုံလောက်စွာရေပေးထားနိုင်ပါသည်။

     ယခုနှစ်တွင် သဖန်းပင်ကျေးရွာနှင့် ပဲချက်ကျေးရွာတို့၌ ဆိုလာစနစ်ဖြင့် ရေတင်၍ နွေစပါးများအား ရေလုံလောက်စွာ ပေးထားပါသည်။ ပသိဆည်ရေသောက် ၁၅၁၁ ဧက၊ ကမ်းနီ ဆည်ရေ သောက် ၁၂၂၀ ဧက၊ ကရင်ချောင်းဆည်ရေသောက် ၆၁၆ ဧက၊ ခပေါင်းဆည်ရေသောက် ၁၀၇၉၂ ဧက၊ ရွာတန်းရှည် လျှပ်စစ်မြစ်ရေတင်စီမံကိန်း ၆၀၀ ဧက၊ သဖန်းပင်ဆိုလာစနစ် မြစ်ရေ တင်စီမံကိန်း ၂၀၀ ဧက၊ ပဲချက်ဆိုလာစနစ် ဆည်ရေတင်စီမံကိန်း ၁၅၀ ဧက၊ ချောင်းပိတ်/တာတမံ ပိတ် ၅၁၃ ဧကနှင့် အင်းအိုင် ၁၀၇၁ ဧက၊ စုစုပေါင်း ၁၇၈၉၁ ဧကကို အောင်မြင်စွာ စိုက်ပျိုးထားကြောင်း သက်ဆိုင်ရာဌာန၏ စာရင်းဇယားများအရ သိရပါသည်။ စပါးများ ရေသောက်ချိန်တွင် ဆည်ရေကို လုံလောက်စွာပေးထားသည်ကို တွေ့ရပါသည်။ နှံကောက်၊ နယူးဧရာ၊ ဆင်းသုခ၊ ရက် ၉၀ စပါးများ အများဆုံးစိုက်ပျိုးထားပါသည်။

    နိုင်ငံ့စီးပွားရေး မြှင့်တင်ရေး ရန်ပုံငွေဖြင့် နွေစပါးစိုက်ပျိုးသည့် တောင်သူလယ်သမားများ အား လယ်တစ်ဧကစိုက်ပျိုးလျှင် ငွေကျပ်နှစ်သိန်းနှင့်ညီမျှသော သွင်းအားစုများကို ထုတ်ပေးထားသည့်အတွက် စပါးများပိုမိုဖြစ်ထွန်းလာသည်ကိုလည်း တွေ့ရပါသည်။ ဇန်နဝါရီလလယ်လောက်မှ စတင်မြေပြင်စိုက်ပျိုးထားသည့် စပါးများမှာ ဧပြီလကုန်တွင် ရိတ်သိမ်းတော့မည် ဖြစ်ပါသဖြင့် တောင်သူကြီးများ နွေစပါးစိုက်ပျိုး ဝင်ငွေတိုး၍ ပြုံးပျော်နိုင်ကြတော့မည် ဖြစ်ပါသည်။

DOCA(ပဲခူး)

     တောင်ငူမြို့၊ ညောင်ပင်ဈေးတွင် ယခင်လ လကုန်ပိုင်းက ကြက်သား(ရင်အုပ်သီးသန့်) တစ်ပိဿာလျှင် ၁၀၀၀၀ ကျပ်ရှိရာမှ ယခုသင်္ကြန်အပြီးတွင် တစ်ပိဿာလျှင် ၁၄၀၀၀ ကျပ်၊ အခြမ်းလိုက်ဈေး ယခင်လကုန်ပိုင်းက တစ်ပိဿာလျှင် ၉၀၀၀ ကျပ်ရှိရာမှ ယခုအပတ်တွင် တစ်ပိဿာလျှင် ၁၂၀၀၀ ကျပ် အသီးသီးဈေးတက်သွားပါသည်။

      ငါးကြင်းမှာ ယခင်လကုန်ပိုင်းက တစ်ပိဿာလျှင် ၉၀၀၀ ကျပ်မှ ယခုအပတ်တွင် အကောင်လိုက်  တစ်ပိဿာလျှင် ၁၀၀၀၀ ကျပ်၊ အမြီးလွတ် ခေါင်းလွတ် တစ်ပိဿာလျှင် ၁၂၀၀၀ ကျပ်၊ ငါးကြင်းဖြူမှာ ယခင်လကုန်ပိုင်းက အကောင်လိုက်ဈေး တစ်ပိဿာ ၁၂၀၀၀ ကျပ်၊ ယခုအပတ်တွင် တစ်ပိဿာ လျှင် ၁၄၀၀၀ ကျပ်၊ အမြီးလွတ် ခေါင်းလွတ် တစ်ပိဿာလျှင် ၁၈၀၀၀ ကျပ်၊ ငါးမြင်း တစ်ပိဿာလျှင် ယခင်လကုန်ပိုင်းက ၈၀၀၀ ကျပ်၊ ယခုအပတ်တွင် ၁၀၀၀၀ ကျပ်၊ ငါးရံ့မှာ ယခင်လကုန်ပိုင်းက တစ်ပိဿာလျှင် ၁၄၀၀၀ ကျပ်နှင့် ယခုအပတ်တွင် ၁၆၀၀၀ကျပ် အသီးသီး ဈေးတက်သွားပါသည်။

   ဝက်သား(ရေလွတ်သား)သုံးထပ်သားမှာ ယခင်လကုန်ပိုင်းက တစ်ပိဿာလျှင် ၁၂၀၀၀ ကျပ် ရှိရာမှ ယခုအပတ်တွင် ၁၇၀၀၀ ကျပ်၊ ပေါင်သားမှာ ယခင်လကုန်ပိုင်းက တစ်ပိဿာလျှင် ၁၄၀၀၀ ကျပ်မှ ယခုအပတ်တွင် ၁၈၀၀၀ ကျပ်၊ အသားသီးသန့်မှာ ယခင်လကုန်ပိုင်းက တစ်ပိဿာလျှင် ၁၈၀၀၀ ကျပ်မှ ယခုအပတ်တွင် ၂၀၀၀၀ ကျပ် ဖြင့် အသီးသီး ဈေးတက်ခဲ့ပါသည်။

      ပုဇွန်ဆိတ်မှာ ယခင်လကုန်ပိုင်းက တစ်ပိဿာလျှင် ၅၀၀၀ ကျပ်ရှိရာမှ ယခုအပတ်တွင် တစ်ပိဿာလျှင် ၈၀၀၀ ကျပ်၊ ပုဇွန်အကြီးမှာ ယခင်လကုန်ပိုင်းက တစ်ပိဿာလျှင် ၃၆၀၀၀ ကျပ် ရှိရာမှ ယခုအပတ်တွင် ၄၀၀၀၀ ကျပ်၊ ပုဇွန်အလတ်မှာ ယခင်လကုန်ပိုင်းက တစ်ပိဿာလျှင် ၃၀၀၀၀ ကျပ်ရှိရာမှ ယခုအပတ်တွင် တစ်ပိဿာလျှင် ၃၅၀၀၀ ကျပ်၊ ပုဇွန်အသေးမှာ ယခင်လကုန်ပိုင်းက တစ်ပိသာလျှင် ၂၄၀၀၀ ကျပ်ရှိရာမှ ယခုအပတ်တွင် ၂၈၀၀၀ ကျပ် အသီးသီး ဈေးတက်သွားကြောင်း တောင်ငူမြို့ ညောင်ပင်ဈေးရှိ အသား/ငါးဆိုင်များမှ သိရပါသည်။

DOCA(ပဲခူး)

   ဆူးပုတ်ရွက်ဆိုတာ ဆူးပုတ်ပင်၏အရွက်ဖြစ်ပါသည်။ အရွက်ဆိုရာမှာလည်း အရွက်အနု၊ အညွှန့်ကိုပဲ စားကြတာများပါသည်။ ရိုးတံထဲမှာအဆူးလေးတွေပါတတ်ပြီး အရွက်လေးတွေက သေးငယ်ကာ ရွက်ဆိုင်လေးတွေ ပေါက်တာဖြစ်ပါသည်။ ရိုးတံလေးများမှာဖြာထွက်ပြီး အရောင်မှာ‌တော့ အစိမ်းရောင်လေးဖြစ်ပါသည်။ အရွက်၏ အနံမှာတော့ နည်းနည်းပြင်း တဲ့အနံ့ဖြစ်ပါသည်။ အရွက်မှာနူးညံ့ပြီး ကြွပ်ကြွပ်လေးဖြစ်ကာ အရသာမှာတော့ နည်းနည်းခါးသက်ပါသည်။ ဆူးပုတ် ရွက်တွင် အာဟာရဓါတ်တွေများစွာရှိပြီး ပါဝင်သည့် အဟာရတွေမှာ ဗီတာမင်အေ၊ ကယ်ဆီယမ်၊ ဖောစ‌ဖရိတ်၊ ဗီတာမင်စီ၊ ဗီတာမင်ဘီ၊ အမျှင်ဓါတ်နှင့် သံဓါတ်တို့ပါဝင်ပါသည်။

    ဆူးပုတ်ရွက်အား ပဲကြီးဟင်းချိုထဲတွင် ထည့်ချက်လေ့ရှိပြီး၊ ဘဲဥနှင့် ဆူးပုတ်ရွက် ခေါက်ကြော် စားသောက်ကြပါသည်။ ဆူးပုတ်ရွက်သည် ထမင်းစားဝိုင်းတွင် အရံဟင်းလျာ အဖြစ်သာစားသောက်ရုံသာမက ကိုယ်ခန္ဓာအတွက်လည်း ဆေးဖက်ဝင်သည့် အပင်တစ်မျိုး ဖြစ်ပါသည်။ ဆူးပုတ်ပင်တွင် ကယ်ဆီယမ်ဓါတ် ပါဝင်သောကြောင့် သွားနဲ့ခံတွင်း ကျန်းမာစေ ပါသည်။ သွားဖုံးသွေးယိုတာနဲ့ ခံတွင်းမှာရှိသော ပိုးများကို သေစေနိုင်ပါသည်။ ဆူးပုတ်ရွက် အရင်းကိုင်းများအားကြိတ်ပြီးသောက်လျှင် ပန်းနာရင်ကြပ်ကို ပျောက်ကင်းစေပါသည်။ ဗီတာမင်စီ ပါဝင်သောကြောင့် ဖျားနာတာတွေ အအေးမိတာတွေအတွက် မဖြစ်စေဖို့ ကာကွယ်ပေးနိုင်ပါသည်။ ဆူးပုတ်ရွက် အနုလေးများအား တို့ပေးပါက ကိုယ်လက်ကိုက်ခဲ့ခြင်းကိုလည်း သက်သာစေပါသည်။ သံဓါတ်ပါဝင်တာဖြစ်သည့်အတွက် သွေးနီဥဆဲလ်တွေကိုဖြစ်ပေါ်စေပြီး သွေးအားနှင့် ကိုယ်တွင်းအောက်ဆီဂျင်ပြည့်ဝစေဘို့ အထောက်အကူဖြစ်စေပါသည်။ အဆစ်ရောင်ခြင်း၊ ဝမ်းဖောဝမ်းရောင်ဖြစ်ခြင်းကိုလည်း ကာကွယ်ပေးပါသည်။ ဆူးပုတ်ရွက်က အစာကြေသလို အူတွေကိုအာဟာရ စုပ်ယူနိုင်စေဖို့နဲ့ လှုပ်ရှားမှုကောင်းစေပါသည်။ ဆူးပုတ်ရွက်က ကျန်းမာရေးအတွက် အကျိုးများတယ်ဆိုပေမယ့် စားသောက်ရန် မသင့်တော်သူများမှာ ဆီးချိုရောဂါရှိသူ၊ သွေးတိုးရောဂါရှိသူ၊ ကိုယ်ဝန်ဆောင်မိခင်နှင့် ခလေးသူငယ်များစားသောက်ရန်မသင့်ပါ။

    ဆူးပုတ်ရွက်ဟာ ကိုယ်ခန္ဓာအတွက်ကောင်းမွန်တဲ့ အာဟာရတွေပါဝင်ပေမယ့် အလွန်အကျွံ့ စားသုံးမိလျှင် ဘေးထွက်ဆိုးကျိုးအနေဖြင့် အော့အန်ခြင်း၊ မအီမသာဖြစ်ခြင်းများဖြစ်တတ်ပါသည်။ ဆူးပုတ်ရွက်ပင်များအား စိုက်ပျိုးရာတွင် လွယ်ကူစွာရှင်သန်နိုင်ပါသဖြင့် တောရောမြို့များမှာပါ စိုက်ပျိုးလျှင်ဖြစ်ထွန်းပါသည်။ ဆူးပုတ်ပင်အား စီးပွားဖြစ်စိုက်ပျိုးလျှင် မြေကျင်းတူးပြီး တစ်ပင်နှင့် တစ်ပင်အကြား တစ်တောင်အကွာခြားပြီး စိုက်ပျိုးရပါသည်။ ကျင်းအနက်တူးလျှင် တစ်ပေအနက် တူးပြီး နွားချေးနှင့်ယူရီးယားဓါတ်မြေဩဇာရောကာ ထည့်ပေးရပါသည်။ နွေရာသီအချိန်တွင် ဆူးပုတ်ပင်များအား ရေများများလောင်းပေးရပြီး အညွှန့်များအား (၃)ရက်လျှင် တစ်ကြိမ် ခူးယူရ ပါသည်။ ဆူးပုတ်ပင်သည် အရွက်နုများအားရောင်းစားရနိုင်သကဲ့သို့ အပင်အားကိုင်းကူးပြီး ဈေးကွက်တွင်ရောင်းချနိုင်ပါသည်။ ဆူးပုတ်ရွက်များအား ဈေးကွက်အတွင်းရောင်းချရာတွင် ဆူးပုတ်ရွက်အနုလေးများ အခက်(၃)ခက်ပါ တစ်စည်းလျှင် (၅၀)ကျပ်ဖြင့် ရောင်းချပါသည်။

   ရွှေတောင်မြို့နယ်အနီးတဝိုက်ရှိရွာများတွင်လည်းကောင်း၊ ပြည်မြို့နယ်အတွင်းရှိ ကျေးလက်ဒေသများတွင်လည်းကောင်း၊ ဆူးပုတ်ပင်များအား တစ်နိုင်တစ်ပိုင်စီးပွားဖြစ်စိုက်ပျိုးကြပြီး ဈေးကွက်အတွင်းရောင်းချရာတွင် ပွဲစားများမှလာရောက်ဝယ်ယူပြီး ရန်ကုန်မြို့ရှိ သီရိမင်္ဂလာဈေးသို့ တင်ပို့ရောင်းချကြောင်း သိရပါသည်။

DOCA(ပဲခူး)

   ပြည်စျေးကွက်တွင် အရောင်းအဝယ်ဖြစ်သော ခရမ်းချဉ်သီးများမှာ ရှမ်းသီးနှင့် ကိုင်းခရမ်းချဉ်သီးတို့ဖြစ်ပါသည်။ ယခင်က ခရမ်းချဉ်သီးစျေး တစ်ပိဿာလျှင် (၂၀၀၀)ကျပ်သာရှိရာမှ ယခု ဧပြီလနောက်ဆုံးပတ်တွင် ခရမ်းချဉ်သီး တစ်ပိဿာလျှင် (၃၅၀၀)ကျပ် မှ (၄၀၀၀)ကျပ်ထိ မြင့်တက်လာခဲ့ပါသည်။ ခရမ်းချဉ်သီးကို တခြားတိုင်းဒေသကြီးမှ ဝယ်ယူရောင်းချခြင်းနှင့် ရွှေတောင်မြို့နယ်မှ ဝယ်ယူရောင်းချကြောင်း သိရပါသည်။ ယခုအချိန်တွင် ခရမ်းချဉ်သီးစျေး မြင့်တက်လာခြင်းမှာ ခရမ်းချဉ်သီး စိုက်ပျိုးသည့်ရာသီချိန် မဟုတ်သည့်အတွက် ခရမ်းချဉ်သီး ရှားပါးသဖြင့် စျေးများမြင့်တက်လာခြင်းဖြစ်ကြောင်း သိရပါသည်။

DOCA(ပဲခူး)

      ပြည်စျေးကွက်သို့ သင်္ကြန်ပြီးစ ပွဲရုံများ စတင်ဖွင့်လှစ်သည့်အချိန်တွင် မြေပဲဆန်အိတ်များ နေ့စဉ်ဝင်ရောက်လျက်ရှိပါသည်။ ဝင်ရောက်လာသော နယ်/မြို့များမှာ တောင်ကုတ်၊ ကံမ၊ရွှေတောင်(ကျွန်းတဲ) နှင့် ပေါက်ခေါင်းဘက်မှ တစ်အိတ်လျှင် ပိဿာချိန် (၃၀)ဝင်အိတ် (၆၀၀-၇၀၀)ခန့် ဝင်ရောက်လာတာ တွေ့ရပါသည်။ ဝင်ရောက်လာသော မြေပဲဆန်များဖြစ်သော လုံးဆန် (အနီ)ကို မန္တလေးဝယ်လက်များနှင့် မြို့တွင်း ပဲကြော်ဖိုသမားများက ဝယ်ယူမှုရှိသလို လုံးဆန် (အဖြူ)ကို မြဝတီသို့ တင်ပို့ရန် ဝယ်ယူမှုရှိသဖြင့် နေ့စဉ်အရောင်းအဝယ်ဖြစ်မှုမှာ အိတ်(၄၀၀-၅၀၀)ခန့်ရှိသည်ဟု သိရပါသည်။ ဆီကြိတ်မြေပဲဆန်ကို မြို့တွင်းဆီစက်သမားများက နေ့စဉ်ဝယ်ယူမှုရှိသဖြင့်  အ‌ရောင်းအဝယ်ဖြစ်လျက်ရှိပါသည်။ မြေပဲဆန်စျေးနှုန်းများအနေဖြင့် ဆီကြိတ်မြေပဲဆန်(အဖြူ)တစ်ပိဿာလျှင် (၅၇၀၀)ကျပ် ၊ ဆီဆန်(အနီ) တစ်ပိဿာလျှင် (၆၇၀၀) ကျပ်ဖြင့် သင်္ကြန်မတိုင်မီစျေးနှင့် နှိုင်းယှဉ်ပါက စျေးအနည်းငယ် ကျလာသော်လည်း နေ့စဉ်အရောင်းအဝယ်ဖြစ်လျက်ရှိပါသည်။ မြေပဲဆန် လုံးဆန် (အဖြူ)တစ်ပိဿာလျှင် (၆၅၀၀)ကျပ်၊ လုံးဆန်(အနီ) တစ်ပိဿာလျှင် (၇၄၀၀၀)ကျပ်ဖြင့် သင်္ကြန်မတိုင်မီစျေးနှင့် နှိုင်းယှဉ်လျှင် တစ်ပိဿာလျှင် (၃၀၀-၄၀၀)ခန့် စျေးနှုန်းများ မြင့်တက်လာကြောင်း သိရပါသည်။ မြေပဲဆီစျေးမှာ တစ်ပိဿာလျှင် (၁၃၀၀၀) ကျပ်ဖြင့် စျေးငြိမ်နေကြောင်း တွေ့ရပါသည်။

DOCA(ပဲခူး)