ပြည်တွင်းကုန်သွယ်မှုသတင်း

   စားသုံးသူရေးရာဦးစီးဌာန၊ ပဲခူးတိုင်းဒေသကြီးဦးစီးမှူးရုံးအနေဖြင့် ပဲခူးမြို့နယ်အတွင်းရှိ စားသုံးသူပြည်သူများအတွက် စားသုံးဆီများအား သက်သာသောရည်ညွှန်းဈေးနှုန်းဖြင့် ဝယ်ယူသုံးစွဲနိုင်စေရန် ရည်ရွယ်၍ (၂၀.၄.၂၀၂၃)ရက်နေ့၊ နံနက် (၁၀:၃၀)အချိန်တွင်  ပဲခူးမြို့၊ ကလျာရာနီရပ်ကွက်၌ မြန်မာနိုင်ငံဆီကုန်သည်နှင့်ဆီလုပ်ငန်းရှင်များအသင်းနှင့် ပူးပေါင်း၍ အိမ်ထောင်စုတစ်စုလျှင်  တစ်ပိဿာနှုန်းဖြင့် စားသုံးဆီများအား လှည့်လည်ရောင်းချပေးခြင်း ဆောင်ရွက်ခဲ့ပါသည်။

       ထိုသို့စားသုံးဆီများ ရောင်းချပေးခြင်းဆောင်ရွက်ရာတွင် စားသုံးဆီတစ်ပိဿာလျှင် သက်သာ သောဈေးနှုန်းဖြစ်သော (၅၂၀၀)ကျပ်ဖြင့် ပိဿာချိန် (၄၄၀)ပိဿာအား ကလျာရာနီရပ်ကွက်နေ ပြည်သူများသို့ရောင်းချပေးခဲ့ပါကြောင်း သတင်းရရှိပါသည်။

  DOCA (ပဲခူး)

       ညောင်လေးပင်မြို့ရှိ  ဓာတ်မြေသြဇာဈေးနှုန်းများသည် ယခုအပတ်တွင် ယူရီးယား ဓာတ်မြေသြဇာ (အာမို)  50 kg တစ်အိတ်လျှင် ၈၅၀၀၀ ကျပ်၊ ယူရီးယား ဓာတ်မြေသြဇာ (သြဘာ)  50 kg တစ်အိတ်လျှင် ၈၅၀၀၀ ကျပ် ၊ ယူရီးယား ဓာတ်မြေသြဇာ (ရွှေနဂါး)  50 kg တစ်အိတ်လျှင် ၉၅၀၀၀ ကျပ် ၊  ကွန်ပေါင်း (အာမို) ဓာတ်မြေသြဇာ  50kg တစ်အိတ်လျှင်  ၁၃၀၀၀၀ ကျပ်၊ ပိုတက် ဓာတ်မြေသြဇာ ( ဂျာမနီ)   50kg တစ်အိတ်လျှင် ၁၂၀၀၀၀ ကျပ်၊ ရွှေကောမတ် (သြဘာ) )   50kg တစ်အိတ်လျှင် ၁၃၀၀၀၀ ကျပ် ၊ ကွန်ပေါင်း (သြဘာ) ဓာတ်မြေသြဇာ  50kg တစ်အိတ်လျှင်  ၁၁၀၀၀၀ ကျပ်ဖြင့် အရောင်းအဝယ်ဖြစ်လျက်ရှိပြီး ဧပြီ ၊ ပထမပတ် ဈေးနှုန်းနှင့် နှိုင်းယှဉ်ပါက  ဈေးနှုန်းများ အတက်အကျရှိသည်ကို တွေ့ရှိရပါသည်။

DOCA(ပဲခူး)

     ပဲခူးတိုင်းဒေသကြီး ၊ ပြည်ခရိုင်တွင် နွေနှမ်းများစိုက်ပျိုးနေပြီဖြစ်သော်လည်း အနည်းငယ်သာ စိုက်ပျိုးထားကြောင်းသိရပါသည်။ ရွှေတောင်မြို့နယ်နှင့် ပေါက်ခေါင်းမြို့နယ်တို့တွင် ဧက အနည်းငယ်သာစိုက်ပျိုးပြီး ထွက်ရှိလာသောနှမ်းများကို တောင်သူအချို့က မိုးရာသီတွင်စိုက်ပျိုးရန် မျိုးအဖြစ် ထားသလို မိမိစားသုံးရန်အတွက် ဆီကြိတ်၍ထားကြပါသည်။ ဈေးကွက်တင်၍ ရောင်းချရန် ပစ္စည်း အနည်းငယ်သာရှိ၍ ရောင်းချမှုနည်းကြောင်း သိရပါသည်။ ယခုအချိန် ဧပြီလတွင် နှမ်းဝင်ရောက်မှု နည်းပါးပြီး ပွဲရုံများတွင် အရောင်းအနည်းငယ်ပါးသွားကာ ဆီကြိတ်နှမ်းနီသာ ရံဖန်ရံခါ အရောင်း အဝယ်ဖြစ်ကြောင်းသိရပါသည်။ နှမ်းတင်ပို့သောဝယ်လက်များက သင်္ကြန်ပြီး အချိန်ဖြစ်၍ အရောင်းအဝယ် ခေတ္တရပ်ထားသောကြောင့် ပြည်ဈေးကွက်တွင် နှမ်းဈေးသာဖြစ်ပြီး အရောင်းအဝယ် ပါးနေကြောင်း သိရပါသည်။

       ယခုအပတ်နှမ်းဈေးနှုန်းများအနေဖြင့် နှမ်းနီ(၃)တင်းတစ်အိတ်လျှင် (၁၇၀၀၀၀)ကျပ်ဖြင့် ယခင် မတ်လဈေးနှုန်းနှင့်နှိုင်းယှဉ်ကြည့်လျှင် (၅၀၀၀၀)ကျပ်ခန့်ဈေးများကျဆင်းလာခဲ့ပါသည်။ ထို့အတူ နှမ်းနက်မှာလည်း ယခုဧပြီလ တတိယပတ်တွင် (၃)တင်းတစ်အိတ်လျှင် (၁၈၅၀၀၀)ကျပ်၊ စမုံနက်နှမ်း (၃)တင်း တစ်အိတ်လျှင် (၂၀၀၀၀၀)ကျပ်ဖြင့် ယခင်မတ်လနှင့်နှိုင်းယှဉ်လျှင် နှမ်းနက်နှင့် စမုံနက်နှမ်းမှာ (၃)တင်း တစ်အိတ်လျှင် (၉၅၀၀၀)ကျပ်ခန့် ဈေးကျဆင်းလာကြောင်း တွေ့ရပါသည်။ နှမ်းဈေးများ ကျဆင်း လာသော်လည်း ဝယ်လိုအားနည်းသွားသဖြင့် ပွဲရုံများတွင် ယခုအပတ်၌ အရောင်းအဝယ် ပါးလာကြောင်း သိရပါသည်။

DOCA(ပဲခူး)

    တိုင်းဒေသကြီး/ပြည်နယ်များရှိ ကုန်စည်ဒိုင်များတွင် ဖြစ်ပေါ်နေသော မတ်ပဲ၊ ပဲတီစိမ်း နှင့် ပဲစဉ်းငုံ တစ်တန် ဈေးနှုန်းများအား ယခင်နှစ်၊ ယခင်လ၊ ယခင်အပတ်၊ ယခင်နေ့၊ ကာလတူ ဈေးနှုန်းစာရင်းအား နှိုင်းယှဉ်ပြုစု တင်ပြအပ်ပါသည်။

     ပဲခူးတိုင်းဒေသကြီး၊ ပြည်ခရိုင်၊ ရွှေတောင်မြို့နယ် မီးလောင်အုပ်စု၊ အင်္ဂလှိုင်ဂန် ကျေးရွာတွင် ဂန္ဓမာပန်းများ စီးပွားဖြစ်စိုက်ပျိုးထားရှိပါသည်။ ဂန္ဓမာပန်းမှာ အရောင်အသွေးစုံလင်သဖြင့် လူအများ ကြိုက်နှစ်သက်ကြသလို ဘုရားပန်းအဖြစ်လည်းကောင်း၊ အလှပန်းအိုးထိုးအဖြစ် လည်းကောင်း အသုံးပြုကြပါသည်။ ဂန္ဓမာပန်းကို နတ်တော်လတွင် စတင်စိုက်ပျိုးပြီး တန်ခူးလတွင် စတင်ခူးဆွတ်ရပါသည်။ စိုက်ပျိုးသည့်မျိုးမှာ မြနှင်းဖြူမျိုးကို စိုက်ပျိုးပြီးတစ်ဧကလျှင် အပင်ရေ (၂၈၀၀၀)ခန့် စိုက်ပျိုး၍ ရကြောင်း သိရပါသည်။ ဂန္ဓမာပန်းတစ်ဧက စိုက်ပျိုးထုတ်လုပ် ကုန်ကျစရိတ်မှာ သိန်း(၂၀) ကျော်ခန့် ကုန်ကျသည်ဟု သိရပါသည်။ ယခုအချိန်တွင် စိုက်ပျိုးစရိတ်များ ကြီးမြင့်ခြင်း၊ သွင်းအားစု များဈေးမြင့်ခြင်းတို့ကြောင့် တစ်ဧကစိုက်ပျိုးစရိတ်မှာမြင့်လာကြောင်း ဖြစ်သည်ဟုသိရပါသည်။ ဂန္ဓမာ ပန်းကို တစ်ခါခူးဆွတ်လျှင် တစ်ရက်ခြားခူးဆွတ်ရပြီး အစည်းရေ (၁၈၀၀)ခန့်ရရှိသည်ဟု သိရပါသည်။ ဂန္ဓမာပန်းရောင်းချရာတွင် တောင်လုံးညိုရွာမှ ဒိုင်၊ ပွဲစားများမှ လာရောက်ဝယ်ယူပြီး အစည်းတစ်စည်းလျှင် ဖောက်သည်ဈေး (၁၅၀)ကျပ်နှုန်းဖြင့် ရောင်းချကြောင်း သိရပါသည်။ ရွှေတောင်မြို့နယ်မှ တစ်ဆင့် ဂန္ဓမာပန်းကို ရန်ကုန်မြို့ရှိ ပန်းဒိုင်များသို့တင်ပို့ရောင်းချကြောင်း သိရပါသည်။

    ဂန္ဓမာပန်းစိုက်ပျိုးသူတောင်သူများအနေဖြင့် တစ်ဧကစိုက်ပျိုးလျှင် အသားတင် အကျိုးအမြတ်အနေဖြင့် (၂၄)သိန်းခန့်ရရှိသဖြင့် စိုက်ပျိုးရန်သင့်တော်သော ပန်းတစ်မျိုးဖြစ်ပါသည်။ ပန်းစိုက်ပျိုးသူများအနေဖြင့် ကုသိုလ်လည်းရ ဝမ်းလည်းဝသဖြင့် ဧကများကို တိုးချဲ့စိုက်ပျိုးလျှင် ပိုမို အကျိုးအမြတ်ဖြစ်ထွန်းမည်ဖြစ်ကြောင်း လေ့လာတင်ပြအပ်ပါသည်။

DOCA(ပဲခူး)