ပြည်တွင်းကုန်သွယ်မှုသတင်း

   တိုင်းဒေသကြီး/ပြည်နယ်များရှိ ကုန်စည်ဒိုင်များတွင် ဖြစ်ပေါ်နေသော မတ်ပဲ၊ ပဲတီစိမ်း နှင့် ပဲစဉ်းငုံ တစ်တန် ဈေးနှုန်းများအား ယခင်နှစ်၊ ယခင်လ၊ ယခင်အပတ်၊ ယခင်နေ့၊ ကာလတူ ဈေးနှုန်းစာရင်းအား နှိုင်းယှဉ်ပြုစု တင်ပြအပ်ပါသည်။

       ပဲခူးတိုင်းဒေသကြီး ၊  သာယာဝတီခရိုင် ၊  ကြို့ပင်ကောက်မြို့နယ် ၊ စားသုံးသူရေးရာဦးစီးဌာန မြို့နယ်တာဝန်ခံ ဒေါ်ရီရီရှိန်နှင့် ဝန်ထမ်းများသည် (၁၉.၄.၂၀၂၃)ရက်နေ့ ၊  နံနက် ၁၁:၀၀ နာရီအချိန်တွင် ပျဉ်ထောင်တွင်းအုပ်စု ၊ နွယ်ခွေရပ်ကွက် ၊ မြရတနာလမ်းရှိ ပြောင်းစိုက်တောင်သူ ဦးသိန်းစိုးနှင့် တွေ့ဆုံ၍ ပြောင်းဖူးစိုက်ပျိုးထုတ်လုပ်မှုအခြေအနေနှင့် အကျိုးအမြတ်ရရှိမှု အခြေအနေတို့ကို သွားရောက် ကွင်းဆင်း လေ့လာခဲ့ပါသည်။

        တောင်သူဦးသိန်းစိုးမှ ယခုနှစ်တွင် ပြောင်းဖူး စိုက်ဧကတစ်ဝက်ကို စိုက်ပျိုးထားရှိကြောင်း ၊ စိုက်ပျိုးရာတွင် တောင်သူမှ ပြောင်းဖူးမျိုးကောင်းမျိုးသန့်စေ့ (၅၀၀) ဂရမ်ပါ မဟာရွှေ ၁၇၅၉ တစ်ဘူးကို (၃၅၀၀၀) နှင့် နှစ်ဗူး Miki အဖြူမျိုးအထုပ် (၁၀)ထုပ်၊ တစ်ထုပ်လျှင် (၁၈၀၀) ဖြင့် ဝယ်ယူစိုက်ပျိုးရပါသည်။ ဘူးထဲတွင်ပါရှိသော မျိုးစေ့များ အားလုံးအောင်မြင်ကြပါသည်။ ယင်းမျိုးစေ့များကို ၈ နာရီကြာ ရေစိမ်ပြီး မျိုးစေ့ကို ဆယ်ယူကာ စွပ်ကျယ်ဖြင့် (၂) ရက်ခန့် ထုပ်ထားရပါသည်။ အစို့လေးများ ထွက်လာချိန်တွင် စတင် စိုက်ပျိုးရပါသည်။ ပြောင်းဖူးမှာ အရွယ်အစား ကြီးမားညီညာပြီး ဈေးကွက်အတွင်း ကြိုက်နှစ်သက်ကြပါသည်။ ရာသီဥတုဒဏ် ခံနိုင်ရည်ရှိပြီး အဖူးထိပ်ဖက်အထိလုံ၍ တစ်နှစ်ပတ်လုံး စိုက်ပျိုးဖြစ်ထွန်းပါသည်။ အပင်သန်စွမ်းပြီး အပင် ယိုင်လဲမှုဒဏ် ခံနိုင်ရည်ရှိပါသည်။ ပြောင်းသားအစေ့အဆံ နူးညံ့ပြီး အထားခံကာ အဝေး သယ်ယူခံနိုင်သောကြောင့် ပြောင်းအချို မျိုးကောင်း မျိုးသန့်ဖြစ်ပါသည်။

     ပြောင်းစိုက်ပျိုးရာတွင် ဧကတစ်ဝက်ကို မြောင်း ၁၃ မြောင်းဖော်ပြီး စိုက်ပျိုး၍ တစ်ပင်နှင့် တစ်ပင်ကို (၉) လက်မ ခွာ၍ စိုက်ရပါသည်။ မြောင်းတစ်တန်းနှင့် တစ်တန်းကို (၄)ပေတန်းခြား စိုက်ပျိုးရပါသည်။ ပြောင်းဖူး ပင်ကို  တစ်ပတ်တစ်ခါ ကန်မှ စက်ဖြင့် ရေတင်၍ ရွှဲရွှဲ လောင်းပေးရပါသည်။ ပြောင်းဖူးပင် အမြင့်မှာ (၆) ပေ ကျော်ခန့်မြင့်ပါသည်။ မြေသြဇာအနေဖြင့် မြေဆီ ၁၅ ပေ ပတ်လည် တစ်ပိဿာ ကို  (၃၀၀၀) ကျပ်နှင့် ၁၀ ပိဿာ ကို (၃၀၀၀၀) ကျပ် ၊ ပိုးသတ်ဆေး တစ်ထုပ်ကို (၁၂၀၀၀) ကျပ်နှင့်  (၃)ထုပ် ကို (၃၆၀၀၀) ကျပ်ဖြင့် သုံးစွဲရပါသည်။ကိုယ်တိုင်စိုက်ပျိုးပြီး လုပ်သားမငှားရမ်းပဲ မိသားစုလုပ်သား (၄) ဦးဖြင့် လုပ်ကိုင်ကြောင်း သိရပါသည်။

     ဇန်နဝါရီလတွင် ပြောင်းဖူးကို စတင်စိုက်ပျိုးပြီး ဧပြီလတွင် ခူးဆွတ်ရပါသည်။ တစ်ကြိမ်ခူးဆွတ်လျှင် အဖူးရေ (၄၅၀) မှ (၅၀၀) အထိ တစ်နှစ်ပတ်လုံး (၅) ကြိမ် မှ (၆) ကြိမ်လောက် ခူးဆွတ်ရရှိကြောင်း သိရှိရပါသည်။

   ပြောင်းဖူးဈေးကွက်အနေဖြင့် သကြားပြောင်းဖူး (၃) ဖူးကို (၁၀၀၀) ကျပ်၊ ပြောင်းအဖြူပြောင်း (၄) ဖူးကို (၁၀၀၀)ကျပ် ၊ အဖူးချော (၃) ဖူးကို(၁၀၀၀) ကျပ်နှင့် မြို့တွင်းညနေခင်းဈေးတွင် ကိုယ်တိုင် ရောင်းချကြပါသည်။အကျိုးအမြတ်အနေဖြင့် ဧကဝက် ကုန်ကျစရိတ်မှာ (၂၀၀၀၀၀) ကျပ်သာကုန်ကျပြီး (၇၀၀၀၀၀) ခန့်ရရှိကြောင်း ပြောင်းစိုက်တောင်သူထံမှ သိရှိရပါသည်။

DOCA(ပဲခူး)

     ပဲခူးတိုင်းဒေသကြီး ၊ သာယာဝတီခရိုင် ၊ မင်းလှမြို့နယ်ရှိ စပါးဆန် ဈေးကွက်အခြေအနေမှာ သင်္ကြန်မတိုင်မီ စပါးဆန် ဈေးနှုန်းများ ငြိမ်နေပြီး သင်္ကြန်ကာလအတွင်းနှင့် သင်္ကြန်ပြီးကာလတို့တွင် ဈေးနှုန်းများ အနည်းငယ် မြင့်တက်လာကြောင်း သိရှိရသည် ။

    ဧပြီလဆန်းပိုင်းတွင် ဆင်းသုခ ၊ မနောသုခ စပါး (၄၆)ပေါင် တင်း၁၀၀လျှင် ၁၄၂၆၀၀၀ ကျပ်ရှိခဲ့ပြီး မနောသုခ ၊ ဆင်းသုခ ဆန်တစ်အိတ်လျှင် ၅၄၀၀၀ကျပ် ၊ ဆန်ကာတင် ရတနာတိုးတစ်အိတ်လျှင် ၇၇၀၀၀ ကျပ် ၊ ပေါ်ဆန်းမွှေးတစ်အိတ်လျှင် ၈၈၀၀၀ ကျပ်ဖြင့် အ‌ရောင်းအဝယ်ဖြစ်ခဲ့ကြပါသည်။

      ဧပြီလလယ်နှင့် လကုန်ပိုင်းတွင် စပါးဆန်ဈေးနှုန်းများ အနည်းငယ်မြင့်တက်ခဲ့ပါသည်။ ဆင်းသုခ ၊ မနောသုခ စပါး (၄၆)ပေါင် တင်း ၁၀၀ လျှင် ၁၄၇၂၀၀၀ ကျပ် ၊         ဆင်းသုခ ၊ မနောသုခ ဆန်တစ်အိတ်လျှင် ၅၆၅၀၀ကျပ်ဖြင့် အရောင်းအဝယ်ဖြစ်နေပြီး ရတနာတိုးနှင့် ပေါ်ဆန်းမွှေးဆန်များမှာ ဈေးနှုန်းအတက်အကျမရှိဘဲ ဈေးငြိမ်လျက်ရှိနေကြောင်း သိရှိရပါသည်။

DOCA(ပဲခူး)

     တောင်ငူမြို့ရှိ သစ်သီးဆိုင်၊ ကုန်စုံဆိုင်နှင့် ပွဲရုံများသို့ တောင်ငူမြို့နှင့် အနီးတဝိုက်ရှိ ဒေသများမှ ထွက်ရှိသော ရာသီပေါ်သစ်သီးများ တင်ပို့ရောင်းချလျက်ရှိရာ တောင်ငူမြို့ ညောင်ပင်ဈေးနှင့် ကန်လမ်းရှိ သစ်သီးဆိုင်များတွင် ဒူရင်းသီးများ စတင်ဝင်ရောက်နေပြီ ဖြစ်ပါသည်။

     ဒူးရင်းသီး အသေးမှာ တစ်လုံးလျှင် ၆၀၀၀ ကျပ်၊ အလတ်မှာ ၉၀၀၀ ကျပ်နှင့် အကြီးမှာ ၁၂၀၀၀ ကျပ် ဈေးနှုန်းအသီးသီးဖြင့် ရောင်းချလျက်ရှိပြီး ရာသီဥတုပူပြင်းသော်လည်း ဒူးရင်းသီးမှာ ပုံမှန်အတိုင်း ရောင်းရလျက်ရှိကြောင်း သိရပါသည်။

DOCA(ပဲခူး)

       တောင်ငူခရိုင်၊ ဖြူးမြို့တွင် ဧပြီလဆန်းပိုင်းက ရွှေဘိုပေါ်ဆန်း တစ်အိတ်လျှင် ၈၅၀၀၀ ကျပ်ရှိရာမှ ယခုလကုန်ပိုင်းတွင် ၉၅၀၀၀ ကျပ်၊ ဧည့်မထဈေးနှုန်းမှာ ဧပြီလဆန်းပိုင်းက တစ်အိတ်လျှင် ၅၇၀၀၀ ကျပ် ယခုလကုန်ပိုင်းတွင် တစ်အိတ်လျှင် ၆၀၀၀၀ ကျပ်ဖြင့် ဈေးနှုန်း မြင့်တက်လာပါသည်။

          မြေပဲဆီမှာ တစ်ပိဿာလျှင် ၁၄၀၀၀ ကျပ်၊ စားအုန်းဆီမှာ တစ်ပိဿာလျှင် ၇၄၀၀ ကျပ်မှ ယခုအပတ်တွင် တစ်ပိဿာလျှင် ၆၈၀၀ ကျပ် ဖြင့် ဧပြီလဆန်းပိုင်းကအတိုင်း ဈေးနှုန်း တည်ငြိမ်နေပါသည်။

          ကြက်သွန်နီမှာ အသေး တစ်ပိဿာ ၁၀၀၀ ကျပ်၊ အကြီးတစ်ပိဿာလျှင် ၁၃၀၀ ကျပ်၊ အကြီးမှာ တစ်ပိဿာလျှင် ၁၇၀၀ ကျပ်၊ ကြက်သွန်ဖြူမှာ ယခင်အပတ်က အသေး တစ်ပိဿာလျှင် ၄၀၀၀ ကျပ်၊ အလတ် ၄၅၀၀ ကျပ်နှင့် အကြီး ၅၀၀၀ ကျပ် တို့ဖြင့် ဧပြီလဆန်းပိုင်းအတိုင်း ဈေးနှုန်း ကွာခြားကြောင်း သိရှိရပါသည်။

        ငရုတ်သီး အရှည်တောင့်မှာ ဧပြီလဆန်းပိုင်းက တစ်ပိဿာလျှင် ၁၂၅၀၀ ကျပ်မှ ၁၃၀၀၀ ကျပ်ရှိရာမှ ယခုအပတ်တွင် တစ်ပိဿာလျှင် ၁၃၅၀၀ ကျပ်မှ ၁၄၀၀၀ ကျပ်ဖြင့် ဈေးနှုန်းအနည်းငယ် မြင့်တက်ခဲ့ပါသည်။ အာလူးမှာလည်း တစ်ပိဿာလျှင် ၂၀၀၀ ကျပ်မှ ၂၂၀၀ ကျပ်အထိဖြင့် ဧပြီ လဆန်းပိုင်းကအတိုင်း ဈေးနှုန်းတည်ငြိမ်နေပါသည်။

       မြေပဲဆံအနီမှာ  ဧပြီလဆန်းပိုင်းက တစ်ပိဿာလျှင် ၇၆၀၀ - ၈၀၀၀ ကျပ်ရှိရာမှ ယခု လကုန်ပိုင်းတွင် တစ်ပိဿာလျှင် ၈၀၀၀ ကျပ်၊ မြေပဲဆံအဖြူမှာ တစ်ပိဿာ လျှင် ၇၀၀၀ ကျပ် တို့ဖြင့် ဈေးနှုန်းတည်ငြိမ်နေပြီး ကုလားပဲခြမ်းမှာ ဧပြီလဆန်းပိုင်းက တစ်ပိဿာလျှင် ၅၀၀၀ ကျပ်မှ ယခုအပတ်တွင် ၅၂၀၀ ကျပ်၊ ကုလားပဲလုံးမှာ ဧပြီလဆန်းပိုင်းက တစ်ပိဿာလျှင် ၄၀၀၀ ကျပ်မှ ယခုလကုန်ပိုင်းတွင် တစ်ပိသာလျှင် ၄၄၀၀ ကျပ်ဖြင့် ဈေးနှုန်းအနည်းငယ်မြင့်တက်ကြောင်း သိရပါသည်။

DOCA(ပဲခူး)