ဆိပ်ဖြူမြို့နယ်တွင် ကြက်သွန်နီသီးနှံကို ဒေသစီးပွားဖြစ် စိုက်ပျိုးရေးလုပ်ငန်းအဖြစ် ဥစိုက်(မိုး)၊ ပင်စိုက်(ဆောင်း)နှင့် မျိုးစေ့ပက်စိုက်ခင်းများကို နှစ်စဉ် ယောချောင်း၊ ချစ်ချောင်း၊ ဆူးလေကုန်းချောင်းနှင့် ဧရာဝတီမြစ်ရိုးတစ်လျှောက်ရှိ ကိုင်းကျွန်းမြေများတွင် နေရာအနှံ့အပြားစိုက်ပျိုးကြသည်။ ယခင် (၂၀၂၁-၂၀၂၂)(၆)လ ဘဏ္ဍာနှစ်က ကြက်သွန်နီသီးနှံကို စိုက်ဧက(၆၂၀၄)ဧကစိုက်ပျိုးခဲ့ပြီး ကြက်သွန်နီပိဿာချိန် သိန်း(၃၀၀)ဝန်းကျင်ခန့်၊ တန်ချိန်(၄)သောင်းကျော်ခန့်ထွက်ရှိခဲ့ကြောင်း သိရှိရသည်။ (၂၀၂၂-၂၀၂၃)ဘဏ္ဍာနှစ်တွင် ကြက်သွန်နီစိုက်ဧက(၆၂၅၃)ဧကစိုက်ပျိုးပြီး တစ်ဧကလျှင် ပျမ်းမျှပိဿာ (၅၀၀၀)ဝန်းကျင်ခန့်ထွက်ရှိပြီး တစ်မြို့နယ်လုံး၌ ကြက်သွန်နီအထွက်ပိဿာပေါင်း သိန်း(၃၁၀)ခန့်၊ တန်ချိန်(၅)သောင်းကျော်ခန့်ထွက်ရှိကြောင်း သိရှိရသည်။
တစ်ဧကစိုက်ပျိုးထုတ်လုပ်မှုကုန်ကျစရိတ်နှင့် အကျိုးအမြတ်
ဆိပ်ဖြူမြို့နယ်တွင် ကြက်သွန်နီတစ်ဧကစိုက်ပျိုးလျှင် ကုန်ကျစရိတ်မှာ တောင်သူတစ်ဦးချင်း သွင်းအားစုအမျိုးမျိုးသုံးစွဲမှုနှင့် မြေသားအခြေအနေကွာခြားမှုရှိခြင်းကြောင့် ကုန်ကျစရိတ်မှာ မတူညီ၍ တောင်သူတစ်ဦးလျှင် တစ်ဧကလျှင် ကျပ်သိန်း(၃၀ မှ ၃၅)အထိကုန်ကျသည်။ ကြက်သွန်နီပင်စိုက်တစ်ဧကအနေဖြင့် ပျမ်းမျှအထွက်နှုန်းပိဿာ(၅၀၀၀)ခန့်ထွက်ရှိပြီး တစ်ပိဿာလျှင် ကျပ်(၁၀၀၀)ဈေးဖြင့်ရောင်းချရ၍ သိုလှောင်ရောင်းချရပါက ဝင်ငွေမှာ ကျပ်(၅၀)သိန်းခန့်ရရှိပြီး (၁၀)သိန်းခန့်ပိုမိုအကျိုးအမြတ်ရရှိနိုင်မည်ဖြစ်ပါသည်။
ကြက်သွန်နီဈေးနှုန်းဈေးကွက်
ဈေးနှုန်းဈေးကွက်အနေဖြင့် (၂၀၂၀-၂၀၂၁) ဘဏ္ဍာနှစ်တွင် ကြက်သွန်နီတစ်ပိဿာလျှင် အနိမ့်ဈေး ကျပ်(၁၅၀)နှင့် အမြင့်ဆုံးဈေး ကျပ်(၂၅၀)ဖြင့် အရောင်းအဝယ်ဖြစ်ခဲ့သည်။ (၂၀၂၁-၂၀၂၂) ဘဏ္ဍာနှစ်တွင် တစ်ပိဿာလျှင် ကျပ်(၅၀၀ မှ ၃၅၀၀)ထိဈေးနှုန်းအသီးသီးဖြင့် အရောင်းအဝယ်ဖြစ်ခဲ့ပြီး (၂၀၂၂-၂၀၂၃) ဘဏ္ဍာနှစ်တွင် ကြက်သွန်နီ(အသစ်)များတူးဖော်ရောင်းချချိန်တွင် ဒေသတွင်းဈေးကွက်၌ တစ်ပိဿာလျှင် ကျပ်(၂၀၀၀)ဝန်းကျင်ဈေးနှုန်းဖြင့် ရောင်းချခဲ့ရပြီး ယခုလက်ရှိအချိန်ကာလတွင် အမြင့်ဈေး ကျပ်(၁၀၀၀)ကျော်ဝန်းကျင်ဈေးနှုန်းဖြင့်ရောင်းချရ၍ တောင်သူများအတွက် အကျိုးအမြတ်ရရှိပါသည်။ ယခုနှစ်တွင် ကြက်သွန်နီတစ်ပိဿာထုတ်လုပ်မှုကုန်ကျစရိတ်မှာ ကျပ်(၇၀၀)ခန့်ဖြစ်ပါသည်။ ကြက်သွန်နီဈေးနှုန်းဈေးကွက်မှာ ယခင်နှစ်နှင့်ယခုနှစ်(၂)နှစ်ဆက်တိုက် ဈေးကောင်းရသဖြင့် ကြက်သွန်နီစိုက်တောင်သူများအကျိုးအမြတ်များစွာရရှိကြပါကြောင်း သိရှိရသည်။
ကြက်သွန်နီသိုလှောင်ထားရှိခြင်း
ဆိပ်ဖြူမြို့နယ်တွင် (မိုး)ကြက်သွန်နီများကို မိုးရာသီတွင်စိုက်ပျိုးရ၍ တူးဖော်ရာ၌ ကြက်သွန်ဥတွင် အစိုဓာတ်များစွာပါရှိခြင်းကြောင့် ကြာရှည်စွာသိုလှောင်၍မရပါ။ သိုလှောင်ပါက အစိုဓာတ်ကြောင့် လှောင်၍ပုပ်သွားနိုင်ပါသည်။ ထို့ကြောင့် (မိုး)ကြက်သွန်နီများကို သိုလှောင်ထားခြင်းမပြုဘဲ (ပင်စိုက်)နွေကြက်သွန်နီမပေါ်မီ စားသုံးရန်အတွက် အသုံးပြုစိုက်ပျိုးကြခြင်းဖြစ်ပါသည်။ (ပင်စိုက်)နွေကြက်သွန်နီများကို ဧပြီလနှင့် မေလများတွင် စတင်သိုလှောင်ကြသည်။ ဆိပ်ဖြူမြို့နယ်၊ ကြက်သွန်နီထွက်ရှိရာဒေသများ၌ ဆောက်လုပ်ထားသောသိုလှောင်ရုံများမှာ အထက်အောက်နှင့် ဘေးပတ်လည်တွင် လေဝင်လေထွက်ကောင်းစေမည့် ဝါးကြမ်းဖြင့်ယက်လုပ်ထားသော အခင်းအကာများအသုံးပြုကြပါသည်။ ပိဿာချိန်(၂)သောင်းမှ (၃)သောင်းအထိသိုလှောင်နိုင်ပြီး အများဆုံး ပိဿာချိန်(၁)သိန်းထိသိုလှောင်ထားနိုင်ပါသည်။ ကြက်သွန်နီများကို အမြင့်(၂)ပေခန့်ထိပုံ၍ထားရှိပြီး အတန်းလိုက် လေဝင်လမ်းကြောင်းများပေး၍ သိုလှောင်ထားရှိပါသည်။ သိုလှောင်ရာတွင် အခြားသီးနှံများနှင့်ရောနှောထားခြင်းမရှိ၍ သိုလှောင်သက်တမ်းမှာ (၇)လခန့်ထိရှိပါသည်။
ကြက်သွန်နီပြည်တွင်းပြည်ပတင်ပို့မှု
ဆိပ်ဖြူမြို့နယ်တွင် နှစ်စဉ်ကြက်သွန်နီစိုက်ဧက(၆၀၀၀)ဝန်းကျင်ခန့်စိုက်ပျိုးပြီး တစ်မြို့နယ်လုံး၌ ပိဿာချိန် သိန်း(၃၀၀)ခန့်ထွက်ရှိပါသည်။ ပြည်တွင်းဖြန့်ဖြူးမှုအနေဖြင့် ရန်ကုန်တိုင်းဒေသကြီး၊ ဘုရင့်နောင်ပွဲရုံနှင့် ဧရာဝတီတိုင်းဒေသကြီးတို့သို့ တင်ပို့လျက်ရှိသည်။ ပြည်ပပို့ကုန်အဖြစ် တရုတ်နိုင်ငံဝယ်လက်အတွက် မူဆယ်မြို့၊ အိန္ဒိယဝယ်လက်အတွက် တမူးမြို့၊ ဘင်္ဂလားဒေ့ရှ်ဝယ်လက်အတွက် မောင်းတောမြို့၊ ထိုင်း၊ ဗီယက်နမ်၊ လာအိုဝယ်လက်များအတွက် မြဝတီမြို့သို့ ကုန်းလမ်းမှ မော်တော်ယာဉ်များဖြင့် တင်ပို့လျက်ရှိပါသည်။
DOCA(မကွေး)
