ပြည်တွင်းကုန်သွယ်မှုသတင်း

     ပဲခူးတိုင်းဒေသကြီး၊ ပြည်ခရိုင်၊ ပြည်မြို့တွင် ဖေဖော်ဝါရီလ ပထမပတ်မှစတင်ကာ ပြည်မြို့၊ စည်ပင်သာယာဈေးကြီးနှင့် အခြားဈေးများတွင် သံပရာသီးများကို လှိုင်လှိုင်ရောင်းချနေပြီဖြစ်ပါသည်။ သံပုရာသီးအများဆုံးထွက်ရှိသော ဇီးအုပ်နှင့် နတ်တလင်းဘက်တို့မှ ပြည်မြို့မဈေးကြီးနှင့် အခြားဈေးများအပြင် ရန်ကုန်မြို့သို့လည်း တိုက်ရိုက်တင်ပို့ရောင်းချကြောင်းသိရပါသည်။ သံပရာသီးကို ပြည်မြို့အနီးတဝိုက်ကျေးရွာများတွင် တစ်နိုင်တစ်ပိုင်စိုက်ပျိုးကြသည့်အပြင် စီးပွားဖြစ်လည်းစိုက်ပျိုးကြပါသည်။ သံပုရာသီးပေါ်ချိန်ဖြစ်သော်လည်း ပေါ်ခါစဖြစ်၍  ဈေးကောင်းရပြီး သံပရာသီးအလုံးချော (အကြီး)တစ်လုံးလျှင် (၃၀၀-၃၅၀) ကျပ်၊ အနေတော်တစ်လုံးလျှင် (၂၀၀-၂၅၀) ကျပ်ဖြင့် အရောင်းအဝယ်ဖြစ်နေသောကြောင့် သံပရာသီးစိုက်တောင်သူများအနေဖြင့် ယခုနှစ်တွင် ဈေးကောင်းရ၍ တွက်ချေကိုက်လျက်ရှိကြောင်းသိရပါသည်။

DOCA(ပဲခူး)

     ပြည်ခရိုင်၊ ပြည်မြို့ရှိဈေးကွက်များတွင် နယ်စုံမှ မြေပဲဆန်များဝင်ရောက်မှုရှိရာ ယခုအချိန်တွင် ဆောင်းမြေပဲများထွက်ပေါ်ချိန်ဖြစ်၍ ဈေးကွက်တွင် မြေပဲသီးနှံများပေါများလာပြီး အရောင်းအဝယ်ဖြစ်လျက်ရှိပါသည်။ ယခုအချိန်သည် ထမနဲရာသီချိန်ဖြစ်၍ မြေပဲဆန်ဈေးနှုန်းများမှာ မြင့်တက်လာခြင်းမရှိဘဲ ယခင်ဖေဖော်ဝါရီလဆန်းပိုင်းအတိုင်း ဈေးအေးနေသည်ကိုတွေ့ရပါသည်။ ယခုဖေဖော်ဝါရီလ နောက်ဆုံးပတ်တွင် ဖြစ်ပေါ်လျက်ရှိသော မြေပဲဆန်ဈေးနှုန်းများမှာ ဆီကြိတ်ဆန် (အဖြူ)တစ်ပိဿာလျှင် ၅၈၀၀ကျပ်၊ ရွေးဆန်(အဖြူ)တစ်ပိဿာလျှင် (၆၃၀၀-၆၈၀၀) ကျပ်၊ လုံးဆန်(အဖြူ)တစ်ပိဿာလျှင် (၇၀၀၀-၈၀၀၀) ကျပ်အထိရှိပြီး လုံးဆန်(အနီ)တစ်ပိဿာလျှင် (၇၅၀၀-၈၀၀၀) ကျပ်အထိရောင်းချကြောင်းသိရပါသည်။ ဈေးကွက်အနေဖြင့်  မြို့တွင်းဆီစက်သမားများ၊ ပဲကြော်၊ ပဲလှော်သမားများနှင့် မကွေးနှင့် မန္တလေးတိုင်းများမှ ဝယ်ယူသဖြင့် နေ့စဉ် အရောင်းအဝယ်ဖြစ်လျက်ရှိပြီး တစ်ခါတစ်ခါအရောင်းအဝယ်ဖြစ်လျှင် အိတ်(၅၀၀)ခန့်ရှိကြောင်းသိရပါသည်။

DOCA(ပဲခူး)

      ပြည်ဈေးကွက်အတွင်း ဝင်ရောက်မှုရှားပါးနေသည့် ကင်ပွန်းချဉ်ရွက်၊ မန်ကျည်းရွက်များမှာ ဈေးနှုန်းမြင့်တက်ပြီး အရောင်းသွက်လျက်ရှိပါသည်။ ပြည်မြို့ပေါ်ဈေးများသို့ ပြည်မြို့၊ အရှေ့ဘက်ရွာများဖြစ်သော ဇီးအုပ်၊ နတ်တလင်းရွာများတွင် ရေသွင်းစိုက်ပျိုးထားသည့် ကင်ပွန်းချဉ်ရွက်၊ မန်ကျည်းရွက်များမှာ (၃)ရက်ခြားတစ်ခါ ပိဿာချိန် (၅)ပိဿာခန့် အဝင်ရှိနေပြီး ရှားပါးချိန်ဖြစ်၍ အဝင်ရှိသလောက် အရောင်းအဝယ်ဖြစ်လျက်ရှိသည်။ ဈေးနှုန်းအနေဖြင့် ကင်ပွန်းချဉ်ရွက်နှင့် မန်ကျည်းရွက်တို့ကို ၁၀ကျပ်သားလျှင် ကျပ် (၉၀၀-၁၀၀၀) ဈေးနှုန်းတို့ဖြင့် ရောင်းချလျက်ရှိပြီး ယခင်ဇန်နဝါရီလဆန်းပိုင်းတွင် ကျပ်၇၀၀ဖြစ်ခဲ့သောကြောင့် အဆိုပါဈေးနှုန်းတို့ကိုနှိုင်းယှဉ်ပါက ဈေးနှုန်းပိုမိုမြင့်တက်လာကြောင်းသိရှိရပါသည်။

DOCA(ပဲခူး)

    စတော်ဘယ်ရီသီးများကို ယခင်က တောင်ပေါ်ဒေသတွင် စိုက်ပျိုးခဲ့ပြီး ယခုအခါတွင် တောင်ပေါ်၊ မြေပြန့်နေရာဒေသအသီးသီးတွင် စိုက်ပျိုးလာကြကြောင်း၊ တောင်ပေါ်ဒေသဖြစ်သည့် ပြင်ဦးလွင်မြို့တွင် တစ်ပိုင်တစ်နိုင်စိုက်ပျိုးခြင်းမှ စီးပွားဖြစ်စိုက်ပျိုးလာကြကြောင်း သိရသည်။

   ယခုရာသီချိန်တွင် စတော်ဘယ်ရီသီးများထွက်ပေါ်လာပြီဖြစ်၍ ဈေးကွက်အတွင်းရောင်း အားကောင်းနေကြောင်း၊ စတော်ဘယ်ရီသီးများမှ ဒေသမျိုး၊ ထိုင်ဝမ်မျိုးနှင့် ဂျပန်မျိုးဟူ၍ရှိရာ ဒေသသီးခေါ် အလုံးသေးအသီးများသာမက ခမ်ပြားပြားသဏ္ဍာန်ရှိပြီး အရသာချဉ်သော ထိုင်ဝမ်သီးများနှင့် အလုံးကြီးပြီးချိုသော ဂျပန်သီးများကို အဓိကစိုက်ပျိုးကြကြောင်း သိရပါသည်။

     စတော်ဘယ်ရီသီးများကို သစ်သီးပွဲရုံများသို့ ဒေသမျိုး တစ်ပိဿာလျှင် ၈၀၀၀ ကျပ်၊ ထိုင်ဝမ်မျိုး တစ်ပိဿာလျှင် ၁၃၀၀၀ ကျပ်၊ ဂျပန်မျိုး တစ်ပိဿာလျှင် ၁၅၀၀၀ ကျပ် ဈေးဖြင့် ရောင်းချပြီး မန္တလေးနှင့် အခြားမြို့များသို့လည်း တင်ပို့ရောင်းချကြောင်း၊ ပြင်ဦးလွင်မြို့သို့ အပန်းဖြေအလည်အပတ်ရောက်ရှိလာသည့် ဧည့်သည်များနှင့် ခရီးသွားပြည်သူများမှလည်း အိမ်ပြန်လက်ဆောင်အဖြစ်ဝယ်ယူပြီး ၊ စားသောက်ဆိုင်များမှလည်းဝယ်ယူကြ၍ စားသုံးသူများမှလည်း ဖျော်ရည်များပြုလုပ်သောက်သုံးရန် ဝယ်ယူကြသည့်အတွက် ဈေးကွက်အတွင်း ရောင်းအားကောင်းသောကြောင့် စတော်ဘယ်ရီစိုက်ပျိုးသူများ အရောင်းအဝယ်ဖြစ်နေကြောင်း သိရှိရပါသည်။

DOCA(ရှမ်း)

     မကွေးတိုင်းဒေသကြီး၊ မကွေးခရိုင်၊ မကွေးစျေးကွက်အတွင်း စားဖိုဆောင်သုံးသီးနှံတစ်မျိုး ဖြစ်သည့် ကြက်သွန်နီစျေးနှုန်းများ ကျဆင်းလာပါသည်။ ၂၀၂၄ခုနှစ်၊ ဖေဖော်ဝါရီလ (စတုတ္ထပတ်)တွင် ကြက်သွန်နီ (၁)ပိဿာလျှင် ကျပ် (၂၆၀၀-၂၇၀၀-၂၈၀၀)ဖြစ်ပြီး မတ်လ (ပထမပတ်)တွင်  ကြက်သွန်နီ (၁)ပိဿာလျှင် ကျပ်(၁၆၀၀-၂၂၀၀-၂၄၀၀)ဖြစ်၍ ကျပ်(၁၀၀၀-၅၀၀-၄၀၀)စျေးနှုန်း ကျဆင်းလာကြောင်း၊ ပွင့်ဖြူ၊ စည်တော်၊ မဲဇလီတို့မှဝယ်ယူကြောင်း၊ ကြက်သွန်နီများကို ပွဲရုံမှ တစ်ဆင့် မင်းဘူး၊ သရက်၊ ကံမ၊ နတ်မောက်၊ ငဖဲမြို့များမှ ပြန်လည်ဝယ်ယူကြပြီး တစ်နေ့လျှင် ပိဿာချိန်(၁၀၀၀)ခန့်၊ တစ်ပတ်လျှင် တန်ချိန်(၉)တန်ခန့် အရောင်းအဝယ်ဖြစ်လျက်ရှိကြောင်း ပွဲရုံများမှ သိရှိရပါသည်။

    ရေနံချောင်းစျေးကွက်တွင်လည်း ဒေသထွက်ကုန်ဖြစ်သော ကြက်သွန်နီစျေးနှုန်းများမှာ ဖေဖော်ဝါရီလ(စတုတ္ထပတ်)တွင် ကြက်သွန်နီ(၁)ပိဿာလျှင် ကျပ်(၁၈၀၀-၂၅၀၀-၂၈၀၀)ဖြစ်ပြီး မတ်လ(ပထမပတ်)တွင် ကြက်သွန်နီ (၁)ပိဿာလျှင် ကျပ် (၁၆၀၀-၂၂၀၀-၂၄၀၀)ဖြစ်၍ ကျပ်(၂၀၀-၃၀၀-၄၀၀) စျေးနှုန်းများကျဆင်းလာကြောင်း၊ ဆိပ်ဖြူ၊ ပခုက္ကူ၊ တောင်တွင်းကြီးမြို့များမှ ဝယ်ယူကြောင်း၊ ပွဲရုံမှတဆင့် ရန်ကုန်၊ ပြည်၊ အောင်လံမြို့သို့ တင်ပို့ရောင်းချပြီး တစ်နေ့လျှင် ပိဿာချိန် (၁၀၀၀၀)ခန့်၊ တစ်ပတ်လျှင် တန်ချိန်(၉၇)တန်ခန့် အရောင်းအဝယ်ဖြစ်လျက်ရှိကြောင်း ပွဲရုံများမှ သိရှိရပါသည်။

DOCA(မကွေး)