ပြည်တွင်းကုန်သွယ်မှုသတင်း

            စားသုံးသူရေးရာဦးစီးဌာန၊ မကွေးတိုင်းဒေသကြီး မကွေးခရိုင်/ ချောက်ခရိုင်ဦးစီးမှူး ဒေါ်တင်တင်လှ (လက်ထောက် ညွှန်ကြားရေးမှူး)၊ ဒု-ခရိုင်ဦးစီးမှူး ဦးမျိုးဝင်းနှင့် ဝန်ထမ်းများသည် (၉.၈.၂၀၂၂)ရက်နေ့တွင် မကွေးမြို့၊ မကျီးကန်ကျေးရွာ သင်ကြားရေးဆေးရုံလမ်းရှိ “နေခြည်” အာလူးကြော်လုပ်ငန်းနှင့် မကွေးမြို့၊ အောင်စေတနာ(စီ)လမ်းရှိ “ကျော်ဇော” ပဲအမွကြော် လုပ်ငန်းများသို့ သွားရောက်ကွင်းဆင်းပြီး ထုတ်လုပ်မှု အခြေအနေ၊ နေ့စဉ်စားသုံးဆီသုံးစွဲမှု အခြေအနေများအား လေ့လာမေးမြန်းခဲ့ပြီး အမှတ်တံဆိပ်များတွင် ဌာနမှသတ်မှတ်ထားသော ကုန်အညွှန်းအမှတ်အသားများ ပြည့်စုံမှန်ကန်စွာ ထည့်သွင်းဖော်ပြပေးရေး အသိပညာပေးဆွေးနွေးခဲ့ပါသည်။

          “နေခြည်”အာလူးကြော်လုပ်ငန်းသည် နေ့စဉ် အာလူးအိတ်(၃၂)ပိဿာဝင်(၅၀)အိတ်(၁၆၀၀) ပိဿာခန့်ကို Auto အကြော်စက်များ အသုံးပြုထုတ်လုပ်နိုင်ကြောင်းနှင့် ထွက်ရှိလာသော အာလူး ကြော်များကို (၈၀)ဂရမ်ပါ တစ်ထုတ်လျှင် (၅၅၀)ကျပ်ဖြင့် မကွေးတိုင်းအတွင်းနှင့် မန္တလေးတိုင်း ဒေသကြီးများသို့ တင်ပို့ရောင်းချကြောင်း လုပ်သားဦးရေ(၅၀)ခန့်ရှိပြီး လုပ်ငန်းပြီးစီးမှုအပေါ် အာလူးတစ်အိတ်လှီးခ (၁၀၀၀)ကျပ်နှင့် အာလူးကြော်တစ်ဖာထုတ်ပိုးခ (၇၀၀)ကျပ် ပေးချေရ ကြောင်း နေ့စဉ်စားသုံးဆီ (၂၈)ပေပါ (၃၀၈၀)ပိဿာခန့် သုံးစွဲရကြောင်း သိရှိရပါသည်။

          “ကျော်ဇော” ပဲအမွကြော်လုပ်ငန်းတွင်လည်း နေ့စဉ်ပဲကြီး(၃၀)ပိဿာဝင် (၄၀)အိတ် (၁၂၀၀)ပိဿာခန့်ကို Auto အကြော်စက်(၂)လုံး၊ လက်ဖို(ဒယ်အိုး) (၄)လုံးဖြင့် ထုတ်လုပ်ပြီး ပဲကြီး (၁)ပိဿာ (၃၇၀၀)ကျပ်ဖြင့် ဝယ်ယူရကြောင်း ထွက်ရှိလာသော ပဲအမွကြော်များကို (၂၅)ကျပ်သား တစ်ထုတ်လျှင်(၂၁၂၅)ကျပ်၊ (၅၀)ကျပ်သားတစ်ထုတ်လျှင် (၄၂၅၀)ကျပ်နှင့် (၁)ပိဿာတစ်ထုတ် လျှင် (၈၅၀၀)ကျပ်ဖြင့် ဒေသတွင်း လက်လီရောင်းချပြီး ရန်ကုန်မြို့သို့ (၃၀)ပိဿာဝင်အိတ်များဖြင့် တင်ပို့ရောင်းချရကြောင်း လုပ်သားဦး‌ရေ(၂၀)ခန့်ရှိပြီး တစ်နေ့လျှင် အမျိုးသား(၁)ဦး (၈၅၀၀)ကျပ် နှင့် အမျိုးသမီး(၁)ဦး (၄၅၀၀)ကျပ်ဖြင့် အလုပ်အကိုင်များ ဖန်တီးပေးနေကြောင်း နေ့စဉ်စားသုံးဆီ (၁၄)ပေပါ (၁၅၄၀)ပိဿာခန့်သုံးစွဲနေရကြောင်း အခြားလိုအပ်သော ကုန်ကြမ်းပစ္စည်းများအား အလွယ်တကူ ဝယ်ယူရရှိနေသော်လည်း စားသုံးဆီဝယ်ယူရရှိရန် အခက်အခဲရှိကြောင်း သိရှိရပါသည်။

          မကွေးခရိုင်/ ချောက်ခရိုင်ဦးစီးမှူး ဒေါ်တင်တင်လှမှ အဆိုပါလုပ်ငန်းရှင်များအား စားသုံးသူ ကာကွယ်‌ရေးဥပဒေ-၂၀၁၉ အခန်း(၁၈)ပါ ကုန်အညွှန်းအမှတ်အသားများ ပြည့်စုံမှန်ကန်စွာ ထည့်သွင်းရေးနှင့် စီးပွားရေးလုပ်ငန်းရှင်၏ တာဝန်/တားမြစ်ချက်များနှင့် ပြစ်မှု/ပြစ်ဒဏ်များကို ရှင်းလင်းဆွေးနွေးခဲ့ပြီး မြန်မာနိုင်ငံစားသုံးသူကာကွယ်‌ရေးကော်မရှင်မှ ထုတ်ပြန်ထားသည့် ညွှန်ကြားချက်အမှတ်(၂/၂၀၁၉) လက်ကမ်းစာစောင်များ ဖြန့်ဝေပေးခဲ့ကြောင်း သိရှိရပါသည်။

DOCA(မကွေး)

         (၁၀-၈-၂၀၂၂) ရက်နေ့မှာတော့ စားသုံးသူရေးရာဦးစီးဌာန၊ နေပြည်တော်ဦးစီးမှူးရုံးမှ ဝန်ထမ်းများနှင့် Diamond Dragon Co;Ltd မှ ဆီလုပ်ငန်းရှင် ဒေါ်နီလာထွေးတို့ဦးဆောင်မှုဖြင့် နေပြည်တော်ကောင်စီရုံးဝင်းအတွင်းရှိ ဌာနများနှင့် ဝန်ထမ်းအိမ်ယာများကို စားသုံးဆီများ “ရာသက်ပန်တံဆိပ် ဟင်းသီးဟင်းရွက်ဆီ”အား ရောင်းချပေးခဲ့ပါတယ်။

          ထိုရောင်းချမှုတွင် စားသုံးဆီတစ်ပိဿာလျှင် (၃၉၀၀)ကျပ်နှုန်းဖြင့် ဌာနဆိုင်ရာ ဝန်ထမ်းတစ်ဦးလျှင် တစ်ပိဿာနှုန်းဖြင့်လည်းကောင်း၊ ဝန်ထမ်းအိမ်ရာသို့သွားရောက်၍လည်း တစ်ဦးလျှင် တစ်ပိဿာနှုန်းဖြင့် စားသုံးသူများ လက်ဝယ်အရောက်ဈေးကားဖြင့် သွားရောက်ရောင်းချပေးခဲ့ကြောင်းနှင့် နံနက်ပိုင်းတွင် ဆီပိဿာချိန် (၁၁၃၆)ပိဿာ ရောင်းချပေးခဲ့ပြီး နေ့ခင်းပိုင်း၌ ဆီပိဿာချိန် (၉၆၀)အား ဆက်လက်ရောင်းချပေးခဲ့ကြောင်း သတင်းရရှိပါတယ်။

           ထိုသို့ရောင်းချပေးမှုများကြောင့် ဝန်ထမ်းများအတွက် အဆင်ပြေမှုများစွာရှိပြီး မှန်ကန်သည့် ဈေးနှုန်းဖြင့်ဝယ်ယူရရှိခြင်းနှင့်  ဝန်ထမ်းအိမ်ရာနေသူများ လက်ဝယ်အရောက်ဈေးကားဖြင့် လာရောက်ရောင်းချပေးမှုကြောင့် အထူးကျေးဇူးတင်ရှိ‌ကြောင်း ဌာနဆိုင်ရာဝန်ထမ်းများမှ ပြောကြားခဲ့ပါတယ်။

DOCA(ပြည်ထောင်စုနယ်မြေ)

            စားသုံးဆီတင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်ရေးကော်မတီသည် စားသုံးဆီများ သတ်မှတ်အရည်အသွေး စံချိန်စံညွှန်းများနှင့် ပြည့်မီစေရေး၊ စားသုံးသူပြည်သူများ ကျန်းမာရေးနှင့် ညီညွတ်သော စားသုံးဆီများဝယ်ယူ သုံးစွဲနိုင်ရေး၊ စျေးနှုန်းတည်ငြိမ်စွာဖြင့် ဝယ်ယူသုံးစွဲနိုင်ရေးတို့ အတွက် ကြီးကြပ်ထိန်းကျောင်းဆောင်ရွက်လျက်ရှိပါသည်။ထိုသို့ ဆောင်ရွက်လျှက်ရှိရာ ဒေသအလိုက် စျေးကားဖြင့် လှည့်လည်ရောင်းချမည့်အစီအစဉ်ကိုလည်းထည့်သွင်းဆောင်ရွက်လျက်ရှိရာ မိတ္ထီလာမြို့ နယ်အတွင်း(၂၉-၇-၂၀၂၂)ရက်နေ့မှစ၍ တစ်ရက်ခြားစီ (၈-၈-၂၀၂၂)ထိ ယာဉ်(၄)စီးဖြင့် စျေးအရှေ့ပြင် ဘူတာလမ်း၌လည်းကောင်း၊ ရတနာမာန်အောင် ဘုရားအနီး၌လည်းကောင်း၊ ကြည်တော်ကုန်းကွေ့၌ လည်းကောင်း၊ အောင်စံပယ််ကုန်း GTC ကျောင်းအနီး၌လည်းကောင်း တစ်ပိဿာလျှင် (၄၂၀၀) နှုန်းဖြင့် ပီပါ (၁၄၄) ပီပါ ရောင်းချရာ မိတ္ထီလာခရိုင်၊ စားသုံးသူရေးရာဦးစီး ဌာနမှ ကွင်းဆင်းကြပ်မတ် ဆောင်ရွက်ခဲ့ကြောင်း သိရှိရပါသည်။

DOCA(မန္တလေး)

          အင်းစိန်မြို့နယ်ရှိတညင်းကုန်းလက်ကားဈေးကြီးအတွင်းသို့ ဩဂုတ်လ(၅)ရက်နေ့မှ ဩဂုတ်လ (၁၁)ရက်အတွင်း ညောင်တုန်း၊ မှော်ဘီ၊ သာရဝေါ၊ ညောင်နှစ်ပင်ကျေးရွာ၊ ကြာကန်စု ကျေးရွာ၊ နေပြည်တော်၊ တပ်ကုန်း၊ ရွှေဒါး၊  မင်္ဂလာဒုံ၊ အင်းစိန်၊ ခရမ်း၊ သုံးခွ၊ ပြည်၊ လက်ပံတန်း၊ မင်းလှ၊ ဝါးနက်ချောင်း၊ မော်လမြိုင်၊ မန္တလေး၊ အုတ်ဖိုနှင့် ရှမ်းပြည်နယ်တို့မှ ဟင်းသီးဟင်းရွက်နှင့် သစ်သီးဝလံပန်းမန်များ အများဆုံးဝင်ရောက် ရောင်းချနေကြောင်း သိရှိရပါတယ်။ ထိုသို့ဝင်ရောက် ရာတွင် ယခုရက်သတ္တပတ်အတွင်း ခရမ်းချဉ်သီးထိုင်ဝမ် (ပိဿာ)ကျပ် ၆၀၀ မှ ၁၀၀၀ အတွင်း၊ ဂေါ်ဖီထုပ်(တစ်ထုပ်)ကျပ် ၆၀၀ မှ ၈၀၀ အတွင်း၊ ပန်းဂေါ်ဖီ(ထုပ်)ကျပ် ၆၀၀ မှ ၈၀၀ အတွင်း၊ အာလူး(ပိဿာ)ကျပ် ၁၇၀၀ မှ ၂၀၀၀ အတွင်း၊ မုန့်လာဉနီ(ပိဿာ) ကျပ် ၁၃၀၀ မှ ၁၇၀၀ အတွင်း ရွှေဖရုံသီး(လုံး)ကျပ် ၂၀၀၀ မှ ၃၀၀၀ အတွင်း၊ ဗူးသီး(လုံး) ကျပ် ၈၀၀ မှ ၁၂၀၀ အတွင်း၊ မုန်ညှင်း(ထုပ်)(ပိဿာ)ကျပ် ၁၂၀၀ မှ ၁၆၀၀ အတွင်း၊ ကြက်သွန်နီ(ဆိပ်ဖြူ)ကျပ် ၁၄၀၀ မှ ၂၀၀၀ အတွင်း၊ ကြက်သွန်ဖြူ(ရှမ်း)(ပိဿာ) ၃၀၀၀ မှ ၃၂၀၀ အတွင်း၊ ကြက်သွန်ဖြူ(ကြူကုတ်)(ပိဿာ) ကျပ် ၂၈၀၀ မှ ၃၂၀၀ အတွင်း၊ ချင်း(ပိဿာ)ကျပ် ၈၀၀ မှ ၁၂၀၀ အတွင်း၊ ဆလပ်ရွက် (စီး) ကျပ် ၁၀၀ မှ ၂၀၀ အတွင်း၊ ချဉ်ပေါင်ရွက်(စီး) ကျပ် ၅၀ မှ ၁၀၀ အတွင်း၊ ခရမ်းသီး(ရှည်)(ပိဿာ)ကျပ် ၁၂၀၀ မှ ၁၇၀၀ အတွင်း၊ သံပရာသီး(လုံး)ကျပ် ၂၀ မှ ၁၀၀ အတွင်း၊ ငရုတ်သီးစိမ်း (ကျောက်စိမ်း) (ပိဿာ) ၁၈၀၀ မှ ၂၀၀၀ အတွင်း၊ ဖရဲသီး (အကြီး၊ အလတ်၊ အသေး)ကျပ် ၁၅၀၀ မှ ၂၀၀၀ အတွင်း ဖြစ်ကြောင်း သိရှိရပါတယ်။ တညင်းကုန်း လက်ကားဈေးကြီးအတွင်းသို့ ယခုရက်သတ္တပတ် အတွင်း သံပုရာသီးအလုံးပေါင်း (၁၄၄၃၀၀)ကျော်၊ ခရမ်းသီး(ရှည်)(ပိဿာ)(၁၀၆၄၅)ကျော်၊ ဗူးသီးအလုံး ပေါင်း (၁၀၆၀)ကျော်၊ ရွှေဖရုံသီးအလုံးပေါင်း (၇၇၆၀)ကျော်၊ ဂေါ်ဖီထုပ်ပေါင်း (၃၀၇၀၀)ကျော်၊ ပန်းဂေါ်ဖီထုပ်ပေါင်း (၁၃၂၀၀)ကျော်၊ မုန်ညှင်းထုပ်(ပိဿာ)ပေါင်း (၁၄၀၁၅)ကျော်၊ ဖရဲသီးလုံး ပေါင်း (၂၁၆၀၀)ကျော်  အသီးသီးကုန်အဝင်ရှိကြောင်း သိရပါတယ်။

DOCA(ရန်ကုန်)

နေပြည်တော် ဩဂုတ် ၁၄ 

           စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်းသိုလှောင် ဖြန့်ဖြူးခြင်းလုပ်ငန်းကြီးကြပ်ရေးကော်မတီအနေဖြင့် စားအုန်းဆီ ကမ္ဘာ့ဈေးနှုန်းဖြစ်ပေါ် ပြောင်းလဲမှုနှင့်အညီ ပြည်တွင်း၌ ဖြစ်သင့်ဖြစ်ထိုက်သည့် ဈေးနှုန်းများ ဖြစ်ပေါ်စေရေး ထိန်းကျောင်းဆောင်ရွက်လျက်ရှိပြီး စားအုန်းဆီ အဓိက ထုတ်လုပ်တင်ပို့သည့် မလေးရှား နိုင်ငံနှင့် အင်ဒိုနီးရှားနိုင်ငံတို့တွင် ဖြစ်ပေါ်နေသည့် FOB ဈေးနှုန်းများကို နေ့စဉ်စောင့်ကြည့်ကာ သယ်ယူပို့ဆောင်ခ ကုန်ကျစရိတ်များ၊ ဘဏ်စရိတ်များ၊ အခွန်အခများ ထည့်သွင်းတွက်ချက်၍ ပြည်တွင်းဈေးကွက်၌ ရောင်းဝယ်ဖောက်ကားရမည့် အခြေခံ လက်ကား ရည်ညွှန်းဈေးနှုန်းကို ထုတ်ပြန်ပေးလျက်ရှိပါသည်။

      ယခုအပတ်အတွင်း ကမ္ဘာ့စားအုန်းဆီ ထုတ်လုပ်တင်ပို့သည့် နိုင်ငံများတွင် ဈေးကွက်နှင့်ဈေးနှုန်းဖြစ်ပေါ်မှုများအရ ၂၀၂၂ ခုနှစ်၊ ဩဂုတ်လ ၁၅ ရက်နေ့မှ ၂၁ ရက်နေ့အထိ ရန်ကုန်အထိုင်ဈေး အခြေခံလက်ကားရည်ညွှန်း ဈေးနှုန်းမှာ စားအုန်းဆီ တစ်ပိဿာလျှင် ၄၁၄၀ ကျပ် ဖြစ်ကြောင်း ထုတ်ပြန်ကြေညာထားပါသည်။

       ထို့အပြင် ပြည်တွင်းဈေးကွက်အတွင်း ဈေးနှုန်းမြှင့်တင်ရောင်းချခြင်း၊ ဈေးကစားရန် ရည်ရွယ်ချက်ဖြင့် သိုလှောင်ခြင်းနှင့် မသမာသည့် လုပ်ဆောင်မှုများ ပြုလုပ်ပါက အရေးကြီး ကုန်စည်နှင့် ဝန်ဆောင်မှုဥပဒေအရ အရေးယူ ဆောင်ရွက်သွားမည်ဖြစ်ကြောင်း အသိပေး ထုတ်ပြန်ထားသည်။

    အဆိုပါ အခြေခံလက်ကားရည်ညွှန်းဈေးနှုန်းများကို စားသုံးသူရေးရာဦးစီးဌာန၏ Website: www.doca.gov.mm၊  Facebook Page  နှင့် မြန်မာနိုင်ငံ ဆီကုန်သည်နှင့် ဆီလုပ်ငန်းရှင်များအသင်း၏ Facebook Page တွင် ဝင်ရောက်ကြည့်ရှုနိုင်ကြောင်း သိရသည်။