ပြည်တွင်းကုန်သွယ်မှုသတင်း

              ပြည်မြို့နယ်အတွင်းရှိ ကြာအင်း၊ ဖုမ္မသိမ်ရွာ၊ ပေါင်းတလည်မြို့ရှိ ကျေးလက်ဒေသများလည်း ကွမ်းပင်များကို တပိုင်စိုက်ပျိုးမှုရှိသလို စီးပွားဖြစ်လည်းစိုက်ပျိုးလျှက်ရှိပါသည်။ ကွမ်းပင်စိုက်ပျိုးရာ တွင် ကွမ်းခြံတစ်ခြံလျှင် ပျမ်းမျှအားဖြင့် ကွမ်းပင်(၁၀၀၀)ခန့်စိုက်ပျိုးကြပါသည်။ ကွမ်းညွှန့် တစ်ညွှန့် လျှင် ၁၀၀ကျပ်နှုန်းဖြင့် ဝယ်ယူစိုက်ပျိုးကြပြီး အပင် (၁၀၀၀)စိုက်ပျိုးလျှင် (အညွှန့်၊ တိုင်၊ အမိုး၊ အကာ၊ အလုပ်သမားခအပါအဝင်) ကုန်ကျစရိတ်မှာ ကျပ်(၃)သိန်းခန့် ကုန်ကျသည် ဟုသိရပါသည်။ ကွမ်းပင် စိုက်ပျိုးပြီး (၄၅)ရက်ကြာလျှင် အညွှန့်အသေးလေးများ စတင်ထွက်ပေါ်လာပြီး နောက်ထပ် (၄၅)ရက် ကြာလျှင် စတင်ခူးယူရပါသည်။ ကွမ်းရွက်ကို (၁၅)ရက်တစ်ခါခူးယူရ၍ တစ်လလျှင် (၂)ခါခူးယူရပါသည်။ ကွမ်းတစ်ထောင်စိုက်ပျိုးလျှင် ပျမ်းမျှကွမ်းရွက် ပိဿာချိန်(၃၀) ခန့်ထွက်ရှိပါသည်။ ကွမ်းခြံတစ်ခြံ၏ သက်တမ်းမှာ (၁)နှစ် (သို့မဟုတ်) (၆)လဖြစ်ပြီး ကွမ်းပင်အမျိုးအစားမှာ ဒေသအလိုက်အခေါ်အဝေါ် အမျိုးမျိုးရှိပြီး အများဆုံးစိုက်ပျိုးသည့်မျိုးမှာ ကွမ်းနုဝါမျိုးများ ဖြစ်သည်ဟု သိရပါသည်။ ဈေးကွက်အတွင်း ရောင်းချသည့် ကွမ်းရွက်ဈေးနှုန်းများမှာ ယခုအချိန်တွင် မိုးရာသီဖြစ်သည့်အတွက် ကွမ်းရွက် တစ်ပိဿာလျှင် (၅၀၀၀-၅၅၀၀)ကျပ်ဖြင့် ရောင်းချလျှက်ရှိသဖြင့် ယခင်ဇူလိုင်လ စတုတ္ထပတ်ထက် ကျဆင်းသွားကြောင်း သိရှိရပါသည်။ ကွမ်းရွက်များကို ပြည်မြို့ ဈေးကွက်များအပြင် ရန်ကုန်မြို့နှင့် ရခိုင်မြို့များသို့ တင်ပို့ရောင်းချကြောင်း သိရှိရပါသည်။

DOCA(ပဲခူး)

          ပြည်ကြက်သွန်ဖြူပွဲရုံများသို့ တောင်ကြီး၊ အောင်ပန်းနှင့် မန္တလေးဘက်မှ ပုံမှန်အဝင်ရှိ နေကြောင်းသိရှိရပါသည်။ ယခုရက်ပိုင်းတွင် ဒေသတွင်း လက်လီ/လက်ကားဝယ်ယူသူများ ရှိသည့် အပြင် လက်ပံတန်း၊ ဇီးကုန်းနှင့် ကြို့ပင်ကောက်မြို့နယ်များသို့လည်း အမှာရှိသလောက် ပို့နေရကြောင်းနှင့် ဧရာဝတီတိုင်း၊ ပုသိမ်မြို့နယ်မှလည်း အဝယ်ရှိနေပါသည်။ ကြက်သွန်ဖြူ မှာယူသူ များအနေဖြင့် ကြက်သွန်ဖြူဈေးကျလျှင် အသုံးများသည့်အတွက် အိတ် ၁၀၀ခန့်ထိ အဝယ်ရှိပြီး ဈေးတက်လာလျှင် အသုံးလျော့ကာ အိတ် ၂၀သာ ပို့ပေးရကြောင်း သိရှိရပါသည်။ ယခုရက်ပိုင်း အတွင်း ကြက်သွန်ဖြူ ၁ပိဿာကို ၃၀၀ကျပ် ဈေးတက်လာသည့်အတွက် ပြည်ဈေးကွက်တွင် ကြက်သွန်ဖြူ (ကြူကုတ်) ၁ပိဿာလျှင် လက်ကား(ပွဲရုံဈေး) ကျပ် ၃၅၀၀-၃၇၀၀၊ လက်လီ ၁ပိဿာလျှင် ကျပ် ၃၈၀၀-၄၀၀၀ဈေးရှိပြီး ရှမ်းစ ၁ပိဿာလျှင် လက်ကား(ပွဲရုံဈေး) အလုံးအသေး အကြီးပေါ်လိုက်၍ ကျပ် ၂၅၀၀-၃၀၀၀-၃၅၀၀-၄၀၀၀၊ လက်လီ ၁ပိဿာလျှင် အရော ကျပ် ၃၅၀၀-၄၀၀၀ဈေး ရှိပါကြောင်း သိရှိရပါသည်။

DOCA(ပဲခူး)

         ပြည်ခရိုင်အတွင်းရှိ ပြည်ကုန်စည်ဒိုင်တွင် ဩဂုတ်လအစတွင် ပဲဈေးများတက်လျှက်ရှိပြီး အရောင်းအဝယ်ရှိသောပဲများမှာ မတ်ပဲ၊ ပဲစင်းငုံ၊ ကုလားပဲ၊ ပဲကြီး၊ ဘိုကိတ်၊ စားတော်ပဲ တို့ဖြစ်ပါသည်။  

      ပြည်ကုန်စည်ဒိုင်တွင် ဩဂုတ်လအစမှာ မတ်ပဲပိဿာ(၂၀)ဝင် တစ်တင်းကို  ၅၄၅၀၀-၅၅၀၀၀ ကျပ်ဖြင့် တစ်ရက်ကို ၁၅၀/၂၀၀ခန့် အရောင်းအဝယ် ဖြစ်ပြီး  ရန်ကုန်သို့တင်ပို့မှုရှိခဲ့ပါသည်။ ဒုတိယပတ်တွင် မတ်ပဲဈေးတက်လာခဲ့ပြီး တစ်တင်းကို (၅၈၅၀၀-၅၉၀၀၀-၅၉၅၀၀) ကျပ်ဖြင့် အရောင်းအဝယ်ရှိခဲ့ပါသည်။

         ဩဂုတ်လပထမပတ်တွင် ပဲစင်းငုံဈေးတက်လာပြီး ပဲတစ်တင်းကို ၄၉၅၀၀-၅၀၀၀၀-၅၀၅၀၀ ကျပ်ဖြင့် ရန်ကုန်အဝယ် တစ်ရက်ကိုအိတ် ၃၀၀ခန့် အဝယ်ရှိပါသည်။ ဒုတိယပတ်တွင် ပဲစင်းငုံဈေး ပိုတက်လာပြီး ပဲတစ်တင်းကို (၅၈၀၀၀-၅၈၅၀၀-၅၉၀၀၀)ကျပ်ဖြင့် အဝယ်ရှိ၍ တစ်ရက်ကိုအိတ် ၂၅၀/၃၀၀ခန့် ရန်ကုန်တင်ပို့လျှက်ရှိပါသည်။

         ကုလားပဲသီးနှံဈေးမှာ ဩဂုတ်လ ပထမပတ်တွင် ကုလားပဲ(HL)တစ်တင်းကို ၅၃၀၀၀- ကျပ်၊ ကုလားပဲ(မြကြေးမှုံ)တစ်တင်းကို ၅၃၀၀၀ကျပ်ဖြင့် မြို့တွင်းခွဲစက်သမားများ ရန်ကုန်ဝယ်လက်တို့ အဝယ်ရှိပြီး တစ်ရက်ကို အိတ် ၃၀၀/၄၀၀ ခန့် အဝယ်ရှိခဲ့ပါသည်။ ဇွန်လကထက် ဈေးတက် လာခဲ့ပါသည်။ ဒုတိယပတ်တွင် ကုလားပဲ(ဟော်လန်)တစ်တင်းကို ၅၅၀၀၀ကျပ်၊ ကုလားပဲ (မြကြေးမှုံ) တစ်တင်းကို ၅၅၀၀၀ကျပ်ဖြင့် မြို့တွင်းခွဲစက်သမားများ နှင့် တစ်ခါတစ်ရံနယ်စုံ တင်ပို့မှုရှိခဲ့ပြီး တစ်ရက်ကိုအိတ် ၃၀၀ ခန့် အဝယ်ရှိပါသည်။

          ဩဂုတ်လပထမပတ်တွင် ပဲကြီး(ကမ်းနား)တစ်တင်းကို (၆၇၀၀၀၊၆၈၀၀၀၊၇၀၀၀၀)ကျပ်ဖြင့် တစ်ရက်ကိုအိတ် ၃၀၀/၄၀၀ခန့် ပဲကြော်သမားများ မြို့တွင်းအဝယ်ရှိခဲ့ပါသည်။ ဩဂုတ်လ ဒုတိယပတ်တွင်  ပဲကြီး(ကမ်းနား) တစ်တင်းကို ၆၉၀၀၀ကျပ်ဖြင့် အရောင်းအဝယ်ဖြစ်ခဲ့ပါသည်။

          ဩဂုတ်လ အစတွင် ဘိုကိတ်ပဲတစ်တင်းကို ၃၆၅၀၀ကျပ်ဈေးဖြင့် မြို့တွင်းအဝယ်နှင့် ရန်ကုန်အဝယ် ရှိခဲ့ပါသည်။ ဒုတိယပတ်တွင် ဘိုကိတ်ပဲဈေးတက်လာပြီး တစ်တင်းကို ၃၇၀၀၀-၃၈၀၀၀ကျပ်ဖြင့် မြို့တွင်းအဝယ်တစ်ရက်ကို  အိတ် ၅၀/၁၀၀ခန့် အဝယ်ရှိခဲ့ပါသည်။ 

          ဩဂုတ်လပထမပတ်တွင် စားတော်ပဲ(ကျွန်း) တစ်တင်းကို ၉၈၀၀၀-၁၀၀၀၀၀ ကျပ်ဖြင့် မြို့တွင်းအဝယ် ၃၀/၄၀ခန့် အဝယ်ရှိခဲ့ပါသည်။ ဒုတိယပတ်တွင်  စားတော်ပဲ(ကျွန်း)တစ်တင်းကို  ၁၀၀၀၀၀ကျပ်ဖြင့် မြို့တွင်းအဝယ်ရှိခဲ့ပါသည်။

          ပြည်ကုန်စည်ဒိုင်တွင် ပဲမျိုးစုံ အရောင်းအဝယ်ဖြစ်လျှက်ရှိပြီး မတ်ပဲ၊ ပဲစင်းငုံ၊ ကုလားပဲ၊ ဘိုကိတ်ပဲများ ပုံမှန်အဝယ်ဖြစ်လျှက်ရှိကြောင်း သိရှိရပါသည်။

DOCA(ပဲခူး)

            ကယားပြည်နယ်တွင် ဆန်/စပါးသည် အဓိကစိုက်ပျိုးသောသီးနှံ တစ်မျိုးဖြစ်ပြီး ပြည်နယ်တွင်း ထွက်ရှိသောဆန်များကို အခြားဒေသများသို့ တင်ပို့ခြင်း အခြားဒေသများမှ ဆန်များကို တင်သွင်း၍ အရောင်းအဝယ်ဖြစ်လျက်ရှိရာ ယခုဩဂုတ်လ ဒုတိယပတ်အတွင်း ဈေးကွက်တွင် ဖြစ်ပေါ်နေသော ဆန်ဈေးနှုန်းများမှာ ဒေသဆန် တရုတ်မွှေး တစ်အိတ်လျှင် (၄၂၀၀၀) ကျပ်၊ ရွှေရင်အေး (၁) တစ်အိတ်လျှင် (၅၀၀၀၀) ကျပ်ရှိပြီး အခြားဒေသမှ ဆန် ရွှေဘိုပေါ်ဆန်း တစ်အိတ်လျှင် (၉၀၀၀၀)ကျပ်၊ ပေါ်ဆန်းကျော် တစ်အိတ်လျှင် (၇၇၀၀၀) ကျပ်၊ ဧရာမင်း တစ်အိတ်လျှင် (၇၅၀၀၀) ကျပ်၊ ဇီယာတစ်အိတ်လျှင် (၄၂၀၀၀) ကျပ် ဖြင့် အရောင်းအဝယ် ဖြစ်လျက်ရှိပြီး ၊ ယခင်ဇူလိုင်လ ဒုတိယပတ်တွင် ဒေသဆန် တရုတ်မွှေး တစ်အိတ်လျှင် (၄၀၀၀၀) ကျပ်၊ ရွှေရင်အေး (၁) တစ်အိတ်လျှင် (၄၆၀၀၀) ကျပ်၊ ရွှေဘိုပေါ်ဆန်း တစ်အိတ်လျှင် (၆၇၀၀၀)ကျပ်၊ ပေါ်ဆန်းကျော် တစ်အိတ်လျှင် (၆၅၀၀၀) ကျပ်၊ ဧရာမင်း တစ်အိတ်လျှင် (၇၂၀၀၀) ကျပ်၊ ဇီယာတစ်အိတ်လျှင် (၃၈၀၀၀) ကျပ်ခန့် ရှိခဲ့ပြီး ယခင်ဇူလိုင် ဒုတိယပတ်နှင့် ယခု ဩဂုတ်လ ဒုတိယပတ် နှိုင်းယှဉ်လျှင် တရုတ်မွှေး တစ်အိတ်လျှင် (၂၀၀၀) ကျပ်၊ ရွှေရင်အေး (၁) တစ်အိတ်လျှင် (၄၀၀၀) ကျပ်၊ ရွှေဘိုပေါ်ဆန်း တစ်အိတ်လျှင် (၂၃၀၀၀)ကျပ်၊ ပေါ်ဆန်းကျော် တစ်အိတ်လျှင် (၁၂၀၀၀) ကျပ်၊ ဧရာမင်း တစ်အိတ်လျှင် (၃၀၀၀) ကျပ်၊ ဇီယာတစ်အိတ်လျှင် (၄၀၀၀) ကျပ်ခန့်ဈေးနှုန်းမြှင့်တက်လျက်ရှိကြောင်း၊ ဈေးနှုန်းမြှင့်တက်လာရခြင်းမှာ စိုက်ပျိုးထွက်ရှိရာ ဒေသများတွင် စိုက်ပျိုးထွက်ရှိမှု ကျဆင်းလာခြင်း၊ လုပ်သားခနှင့် သွင်းအားစုများ ဈေးနှုန်းမြှင့်တက်လာခြင်းကြောင့်ဖြစ်သည်ဟု သိရှိရပါသည်။

DOCA(ကယား)

             ယခုတစ်ပတ်တွင် ပြည်ဈေးကွက်၌ ကြက်သွန်နီဈေးနှုန်းများ တစ်ပိဿာလျှင် ယခင် အပတ်ထက် ကျပ်၂၀၀ခန့် ဆက်လက်မြင့်တက်သွားကြောင်းသိရှိရပါသည်။ ကျောက်ပန်းတောင်း၊ အောင်လံ၊ ဆိပ်ဖြူဘက်မှ ကြက်သွန်နီအိတ် ၄၀၀ခန့် ရက်ခြားအဝင်ရှိနေပါသည်။ အရောင်း အဝယ်အနေဖြင့် ဝင်ရောက်မှု၏ ထက်ဝက်အိတ် ၂၀၀ခန့် အရောင်းအဝယ်ဖြစ်ကြောင်း သိရပြီး ပန်းတောင်း(ဥသျှစ်ပင်)၊ ဧရာဝတီ(ကြံခင်း)နှင့် သာယာဝတီခရိုင်တို့သို့ စီးဆင်း၍ ရောင်းဝယ်မှုရှိနေပါသည်။ ပြည်ဈေးကွက်တွင် ပွဲရုံဈေး တစ်ပိဿာလျှင် (ကြီး/လတ်/သေး) ကျပ် ၁၈၀၀-၁၉၅၀-၂၁၅၀ တို့ရှိပြီး လက်လီဈေးအသေးများတွင် ကြီး/လတ်/သေး ကျပ် ၂၀၀၀-၂၂၀၀-၂၄၀၀ နှုန်းတို့ဖြင့် အသီးသီးရောင်းဝယ်မှုရှိနေပါကြောင်း သိရှိရပါသည်။

DOCA(ပဲခူး)