ပြည်တွင်းကုန်သွယ်မှုသတင်း

     မိတ္ထီလာစျေးကွက်တွင် ယခု ၂၀၂၃ခုနှစ်၊ မတ်လ ဒုတိယပတ်အတွင်း ယခင်ပတ်နှင့်နှိုင်းယှဉ်ပါက ကြက်သွန်နီစျေးနှုန်းမှာ မြင့်တက်လာသကဲ့သို့ နယ်ဝေးတင်ပို့မှုတွင်လည်း နယ်မြေကျယ်ပျံ့လာကြောင်းသိရပါသည်။ ယခင်က ရန်ကုန်မြို့နှင့် ပဲခူးမြို့သို့ ပုံမှန်တင်ပို့နေပြီး မော်လမြိုင်မြို့နှင့် မြဝတီမြို့တို့၌ စျေးကွက်အဝယ်ရှိမှသာ တင်ပို့ကြောင်း၊ ယခုအခါ တာချီလိတ်နယ်မှ အဝယ်လိုက်လာကြောင်း သိရပါသည်။

      မတ်လ ဒုတိယပတ်အတွင်း မိတ္ထီလာမှ ရန်ကုန်သို့ ကုန်ချိန်တန် (၅၀) ခန့်၊ ပဲခူးသို့ တန် (၂၀) ခန့်၊ မော်လမြိုင်သို့ (၁၄) တန်ခန့်နှင့် ယခုတစ်ပတ်မှစ၍ တာချီလိတ်သို့ ကုန်ချိန် တန် (၅၀) ခန့်တင်ပို့နိုင်ခဲ့ကြောင်း  သိရပါသည်။

          ကုန်တင်ခမှာ တစ်ပိဿာလျှင် ရန်ကုန်သို့ (၁၀၅) ကျပ်ဖြင့် ယခင်တစ်ပတ်အောက် (၅) ကျပ်ကျဆင်းလာသော်လည်း ပဲခူးသို့တင်ပို့ခမှာ တစ်ပိဿာလျှင် (၁၀၀) ကျပ်၊ မော်လမြိုင်သို့တင်ပို့ခမှာ တစ်ပိဿာလျှင် (၁၄၀) ကျပ်နှင့် စျေးငြိမ်နေပြီး ယခုတစ်ပတ်မှစတင်၍  တာချီလိတ်သို့တင်ပို့ခမှာ တစ်ပိဿာလျှင် (၂၅၀) ကျပ်ရှိကြောင်းသိရပါသည်။ နယ်လက်အဝယ်လိုက်သဖြင့် ကြက်သွန်နီစျေးနှုန်းမှာ လက်ကားစျေးတစ်ပိဿာလျှင် ယခင်တစ်ပတ်၌ (၉၀၀ မှ ၉၂၅) ကျပ်ရှိခဲ့ပြီး၊ ယခုပတ်၌ (၁၀၀၀ မှ ၁၁၀၀) ကျပ်ထိစျေးမြင့်လာကြောင်း သိရှိရပါသည်။

DOCA(မန္တလေး)

   မန်ကျည်းပင်သည် အပူပိုင်းဆန်သောအညာဒေသတွင် အများအားဖြင့် အလေ့ကျပေါက်သောနှစ်ရှည်ပင်တစ်မျိုးဖြစ်ပါသည်။ မန်ကျည်းပင်သည် မန္တလေးတိုင်းဒသကြီး၊ မိတ္ထီလာ၊ မလှိုင်၊ သာစည်နှင့် ဝမ်တွင်းမြို့နယ်ကျေးရွာများရှိ အိမ်ခြံစည်းရိုးများတွင် အလေ့ကျပေါက်လျက်ရှိပါသည်။ မန်ကျည်းပင်သည် (၅) နှစ်သားအရွယ်မှစသီးပြီး နိုဝင်ဘာလ၌ အသီးကင်းစတင်ကာ ဖေဖော်ဝါရီလ တွင် မန်ကျည်းမှည့်ပေါ်ပါသည်။ မန်ကျည်းမှည့်ကို အကြော်၊ အကင်များနှင့်တွဲဖက်၍ အချဉ်ရည်အဖြစ်လည်းကောင်း၊ ဟင်းချက်ရာတွင်လည်းကောင်း၊ တိုင်းရင်းဆေးဝါးများဖော်စပ်ရာတွင်လည်းကောင်း၊ မန်ကျည်းဖျော်ရည်ထုတ်လုပ်ရာတွင်လည်းကောင်း၊ မန်ကျည်းတော်ဖီပြုလုပ်ရာတွင်လည်းကောင်း စသည့် တန်ဖိုးမြှင့်ထုတ်ကုန်များလည်းထုတ်လုပ်ကြပါသည်။

    မန်ကျည်းမှည့်သည် ဘက်စုံအသုံးဝင်၍ စျေးကွက်ရှိသဖြင့် တောင်သူများစိုက်ပျိုးသည့် သီးနှံဝင်ငွေအပြင် တစ်ဖက်တစ်လမ်းမှ အပိုဝင်ငွေရရှိလျက်ရှိပြီး၊ မန်ကျည်းမှည့်အား ကုန်သည်ပွဲစားများက အပင်ပြတ်ကြိုတင်ဝယ်ယူခြင်း၊ အစေ့ပါ (သို့မဟုတ်) အစေ့မပါစျေးနှုန်းများဖြင့် မိတ္ထီလာကုန်သည်များနှင့် မလှိုင်ကုန်သည်များက ဝယ်ယူကြပြီး ပဲခူး၊ ရန်ကုန်မြို့များသို့ တင်ပို့ကြပါသည်။ ယခုမတ်လတွင် စျေးကွက်အတွင်းဖြစ်ပေါ်နေသော မန်ကျည်းမှည့်စျေးနှုန်းမှာ အစေ့ပါတစ်ပိဿာလျှင် (၁၃၀၀) ကျပ်နှင့် အစေ့မပါတစ်ပိဿာလျှင် (၄၀၀၀) ကျပ်စျေးဖြင့် ရောင်းချလျက်ရှိကြောင်း၊ ယခင်ဖေဖော်ဝါရီလ မန်ကျည်းသီးပေါ်ချိန်တွင် အစေ့ပါတစ်ပိဿာလျှင် (၁၅၀၀) ကျပ်နှင့် အစေ့မပါတစ်ပိဿာလျှင် (၃၀၀၀) ကျပ်သာရှိပြီး ယခင်လနှင့်ယခုလနှိုင်းယှဉ်လျှင် စျေးနှုန်းအနည်းငယ် ပြန်လည်မြှင့်တက်လာကြောင်းသိရှိရပါသည်။

DOCA(မန္တလေး)

      မန္တလေးတိုင်း‌ဒေသကြီး၊ မိတ္ထီလာခရိုင်တွင် စက်မှုကုန်ကြမ်းသီးနှံတစ်မျိုးဖြစ်သည့်ဝါသီးနှံကို မိတ္ထီလာ၊ မလှိုင်၊ သာစည်၊ ဝမ်းတွင်း စသည့်မြို့နယ်များတွင်စိုက်ပျိုးကြရာ ဝါသီးနှံကို မေ၊ ဇွန်လများတွင်စိုက်ပျိုးကြပြီး အောက်တိုဘာလမှ ဒီဇင်ဘာလအထိ လှိုင်လှိုင်ခူးဆွတ်ရပါသည်။ (၂၀၂၂-၂၀၂၃) ဘဏ္ဍာနှစ်၌ ဝါစိုက်ဧက (၃၂၈၆၇၄) ဧက၊ ရိတ်သိမ်းဧက (၃၁၈၆၇၃) ဧက၊ အထွက်နှုန်းမှာ (၁၂၄၀၈၄၇) ပိဿာထွက်ရှိကြောင်း၊ လက်ရှိတွင် မတ်လအတွင်းဖြစ်ပေါ်နေသောဝါစျေးနှုန်းမှာ တစ်ပိဿာလျှင် (၃၀၀၀) ကျပ်၊ ဂွမ်းစျေးနှုန်းမှာ တစ်ပိဿာလျှင် (၇၃၀၀) ကျပ်စျေးရှိပြီး၊ ယခင် ဖေဖော်ဝါရီလအတွင်း ဝါစျေးနှုန်းမှာ တစ်ပိဿာလျှင် (၃၃၀၀) ကျပ်၊ ဂွမ်းတစ်ပိဿာလျှင် (၇၃၀၀) ကျပ်စျေးရှိကြောင်း၊ ယခင်လနှင့်ယခုလနှိုင်းယှဉ်လျှင် ဝါတစ်ပိဿာလျှင် (၃၀၀) ကျပ်ခန့် စျေးအနည်းငယ်ကျဆင်းပြီး ဂွမ်းစျေးနှုန်းတည်ငြိမ်လျက်ရှိပါသည်။

      လာမည့် (၂၀၂၃-၂၀၂၄) ဘဏ္ဍာနှစ်တွင်လည်း မိုးကြိုဝါစိုက်ပျိုးရာတွင် အထွက်နှုန်းကောင်းမွန်သည့် အာမို B-31 စပ်မျိုးဝါများကို မိတ္ထီလာခရိုင်တွင် စိုက်ဧက (၈၀၀) ဧကစိုက်ပျိုးမည်ဖြစ်ရာ လိုအပ်သည့်မျိုစေ့များကို အခမဲ့ပေးအပ်ထားကြောင်း စိုက်ပျိုးရေးဦးစီးဌာနမှတစ်ဆင့် သိရှိရပါသည်။

DOCA(မန္တလေး)

     မန္တလေးတိုင်းဒေသကြီး၊ ကျောက်ဆည်ခရိုင်တွင် နွေနှမ်းများကို စတင်စိုက်ပျိုးလျက်ရှိပါသည်။ ၂၀၂၃ခုနှစ်အတွက် ကျောက်ဆည်ခရိုင်တွင် နွေနှမ်းလျာထားစိုက်ဧက (၃၉၇၀၃)ဧကစိုက်ပျိုးနိုင်ရန် လျာထားချက်ရှိကြောင်း သက်ဆိုင်ရာဌာန၏စာရင်းများအရသိရှိရပါသည်။ ယခုမတ်လဆန်းမှစ၍ ဆည်ရေသောက်လယ်မြေဧကများတွင် နှမ်းကြဲရေများလွှတ်ပေးသဖြင့် နွေနှမ်းများကို တောင်သူများစတင်စိုက်ပျိုးလျက်ရှိပါသည်။ နွေနှမ်းစိုက်ပျိုးမှုအနေဖြင့် တစ်ဧကလျှင် မျိုး၊ သွင်းအားစုနှင့် လုပ်သားခစုစုပေါင်း (၂၆၀၀၀၀)ကျပ်ခန့်ကုန်ကျကြောင်းသိရှိရပါသည်။ စိုက်ပျိုးသောနှမ်းအမျိုးအစားများမှာ နှမ်းဖြူ၊ နှမ်းညို၊ နှမ်းနက်မျိုးများကို အများဆုံးစိုက်ပျိူးကြပါသည်။ နှမ်းဈေးနှုန်းများအနေဖြင့် ယခင်နှစ်တွင် နှမ်းဖြူတစ်တင်းလျှင် (၅၉၀၀၀)ကျပ်၊ နှမ်းနက်ရိုးရိုးတစ်တင်းလျှင် (၅၄၀၀၀)ကျပ်၊ နှမ်းနက်စမုံတစ်တင်းလျှင် (၅၂၀၀၀)ကျပ်၊ နှမ်းညိုတစ်တင်းလျှင် (၅၄၀၀၀)ကျပ်ဈေးနှုန်းများရှိပြီး ယခုလက်ရှိပေါက်ဈေးအနေဖြင့် နှမ်းဖြူတစ်တင်းလျှင် (၁၀၈၀၀၀)ကျပ်၊ နှမ်းနက်ရိုးရိုးတစ်တင်းလျှင် (၈၁၀၀၀)ကျပ်၊ နှမ်းနက်စမုံတစ်တင်းလျှင် (၈၀၀၀၀)ကျပ်၊ နှမ်းညိုတစ်တင်းလျှင် (၈၁၀၀၀)ကျပ်ဈေးနှုန်းများဖြင့် အရောင်းအဝယ်ဖြစ်နေပြီး ယခုလက်ရှိ၌ နှမ်းဆီတစ်ပိသာလျှင် (၁၂၀၀၀)ကျပ်ဖြင့် ရောင်းဝယ်လျက်ရှိပါသည်။ နှမ်းဈေးနှုန်းများကောင်းမွန်သောကြောင့် နှမ်းစိုက်ပျိုးသောတောင်သူများအနေဖြင့် မိသားစုစားသုံးဆီဖူလုံရုံမျှမက အကျိုးအမြတ်များရရှိသဖြင့် နှမ်းများကို ကျယ်ကျယ်ပြန့်ပြန့်စိုက်ပျိုးလာကြသည်ကိုတွေ့ရှိရပါသည်။

DOCA(မန္တလေး)

     ဝါသီးနှံကို မိုးကြိုရာသီ၊ မိုးရာသီနှင့် မိုးနှောင်းရာသီများတွင် စိုက်ပျိုးလေ့ရှိပါသည်။ မိုးကြိုရာသီတွင် ဖေဖော်ဝါရီလလယ်မှ ဇွန်လကုန်အတွင်း၊ မိုးရာသီတွင် မေလလယ်မှ ဇွန်လကုန်အတွင်း၊ မိုးနှောင်းရာသီတွင် ဇူလိုင်လမှ ဩဂုတ်လလယ်အတွင်း စိုက်ပျိုးလေ့ရှိကြပါသည်။ အပင်သန်မာဖြစ်ထွန်းရန်နှင့် ဝါအထွက်နှုန်းကောင်းစေရန်အတွက် ထယ်ရေးနက်နက်နှင့် ထွန်ရေးညက်ညက်ကောင်းအောင် လုပ်ဆောင်ပေးရမည်ဖြစ်ပါသည်။

     ဝါစိုက်ပျိုးထားရှိမှုအနေဖြင့် မြင်းခြံခရိုင်ချုပ်တွင် ယခင်နှစ် (၂၀၂၁-၂၀၂၂)၌ ဝါစိုက်ဧကပေါင်း (၁၇၈၈၃) ဧကစိုက်ပျိုးခဲ့ပြီး ရာသီဥတုကောင်းမွန်သဖြင့် စိုက်ဧကအားလုံးရိတ်သိမ်းနိုင်ခဲ့ပါသည်။ တစ်ဧကပျမ်းမျှအထွက်နှုန်းမှာ (၃၃၂.၈၇)ပိဿာဖြင့် ပိဿာပေါင်း (၅၉၅၂၆၉၂) ပိဿာထွက်ရှိခဲ့ပါသည်။ ယခုနှစ်(၂၀၂၂ -၂၀၂၃)တွင် ဝါစိုက်ဧကမှာ (၂၀၄၉၂) ဧကတွင် ဧကအားလုံးရိတ်သိမ်းခဲ့ပြီး အထွက်နှုန်းမှာ (၃၅၈.၇) ပိဿာနှုန်းဖြင့် အထွက်ပိဿာပေါင်း (၇၃၅၀၇၃၀) ပိဿာခန့်ထွက်ရှိခဲ့ကြောင်း သက်ဆိုင်ရာဌာန၏စာရင်းများအရသိရှိရပါသည်။  မြို့နယ်များအနေဖြင့် ဝါစိုက်ပျိုးထားရှိမှုမှာ မြင်းခြံမြို့နယ်တွင် စိုက်ဧက (၈၇၇၃) ဧကတွင် ဧကအားလုံးရိတ်သိမ်းခဲ့ပြီး တစ်ဧကပျမ်းမျှအထွက်နှုန်းမှာ (၄၈၄၈.၅၀) ပိဿာဖြင့် အထွက်ပိဿာပေါင်း း(၃၉၃၄၇၉၀) ပိဿာရှိပါကြောင်း၊ တောင်သာမြို့နယ်တွင် စိုက်ဧက (၅၀၇၄) ဧကတွင် ဧကအားလုံးရိတ်သိမ်းခဲ့ပြီး အထွက်နှုန်းမှာ(၂၆၃.၈၂)ပိဿာဖြင့် ပိဿာပေါင်း (၁၃၃၈၆၁၁) ပိဿာရှိပါကြောင်း၊ နွားထိုးကြီးမြို့နယ်တွင် စိုက်ဧက (၆၆၄၅) ဧကတွင် ဧကအားလုံးရိတ်သိမ်းခဲ့ပြီး အထွက်နှုန်းမှာ (၃၁၂.၆၂) ပိဿာဖြင့် ပိဿာပေါင်း (၂၀၇၇၃၉၂) ပိဿာထွက်ရှိခဲ့ကြောင်းသိရှိရပါသည်။ မြင်းခြံခရိုင်အနေဖြင့် ဝါစိုက်ပျိုးမှုတွင် ယခုနှစ်၌ ယခင်နှစ်ထက် စိုက်ဧက (၂၆၀၉) ဧက ပိုမိုစိုက်ပျိုးနိုင်ခဲ့ပြီး အထွက်ပိဿာချိန်မှာလည်း (၁၃၉၈၀၃၈) ပိဿာပိုမိုထွက်ရှိခဲ့ပါသည်။

    မြင်းခြံခရိုင်အတွင်း ချည်မျှင်ရှည်ဝါအမျိုးအစားကို အများဆုံးစိုက်ပျိုးထုတ်လုပ်ရောင်းဝယ်ကြပြီး ယခင်နှစ်၌ ဝါတစ်ပိဿာလျှင် (၁၅၂၅) ကျပ်မှ (၁၆၅၀) ကျပ်ခန့်များဖြင့် ရောင်းဝယ်ခဲ့ကြောင်းသိရှိရပါသည်။ ယခုနှစ်၌ ဝါတစ်ပိဿာလျှင် (၂၇၀၀) ကျပ်မှ (၃၀၀၀) ကျပ်ခန့်းဖြင့် ရောင်းဝယ်လျက်ရှိကြောင်း၊ ဈေးကွက်အနေဖြင့် ထွက်ရှိသောဝါဂွမ်းများကို မန္တလေး၊ မြစ်သား၊ မလှိုင် စသည့်မြို့များသို့ တင်ပို့ရောင်းချကြပြီး၊ မြင်းခြံခရိုင်အတွင်းမှာလည်း လက်ယက္ကန်းလုပ်ငန်းများမှဝယ်ယူ၍ ချည်ထည်များထုတ်လုပ်ရန်အတွက် ဝယ်ယူကြကြောင်း ဝါကုန်သည်တစ်ဦး၏ပြောကြားမှုအရသိရှိရပါသည်။

DOCA(မန္တလေး)