ပြည်ပကုန်သွယ်မှုသတင်းများ
ဖိလစ်ပိုင်နိုင်ငံ၌ ၂၀၂၃ ခုနှစ် တတိယသုံးလပတ် ဇူလိုင်လမှ စက်တင်ဘာလအတွင်း စပါးစိုက်ပျိုးထုတ်လုပ်မှုသည် ဒုတိယသုံးလပတ်ထုတ်လုပ်မှု တန်ချိန် ၅.၀၃ သန်းအပေါ် ၀.၄% တိုးတက်လျက် တန်ချိန် ၅.၀၄ သန်း ထွက်ရှိခဲ့ကြောင်း ဖိလစ်ပိုင် စာရင်းအင်းအာဏာပိုင် အဖွဲ့က ပြောကြားခဲ့ပါသည်။
အဆိုပါ စပါးထွက်ရှိမှုပမာဏသည် ယခင်က ကနဦးခန့်မှန်းခဲ့သော တန်ချိန် ၃.၇၉ သန်း ထက် ၃၂.၈% မြင့်မားခဲ့ပြီး ၂၀၂၂ ခုနှစ် ကာလတူ၌ ထုတ်လုပ်မှု စပါးတန်ချိန် ၄.၉ သန်းနှင့် နှိုင်းယှဉ်ပါက ၁.၀% တိုးတက်မှုရရှိခဲ့ခြင်းဖြစ်သည်။
ဗီယက်နမ်နိုင်ငံကဲ့သို့သော ပြိုင်ဖက်နိုင်ငံများမှ ဆန်ဈေးနှုန်းများမှာ မြင့်မားလျက်ရှိရာ ထိုင်းဆန်တင်ပို့သူများအသင်းသည် ၂၀၂၃ ခုနှစ်အတွင်း ဆန်တင်ပို့ရန် လျာထားချက်ကို တန်ချိန် ၈.၅ သန်း သို့ တိုးမြှင့်ဆောင်ရွက်သွားမည်ဖြစ်ကြောင်း သိရှိရပါသည်။
ထိုင်းနိုင်ငံ၌ ဆန်စပါး အရည်အသွေး ဖွံ့ဖြိုးတိုးတက်စေရန် ရည်ရွယ်လျက် ထပ်ဆောင်း ပံ့ပိုးမှု ရန်ပုံငွေအဖြစ် ဘတ်ငွေ ၅၆ ဘီလီယံ သုံးစွဲခွင့်အား အစိုးရအဖွဲ့က အတည်ပြုခဲ့ရာ ၂၀၂၃-၂၄ ခုနှစ် သီးနှံရာသီကာလအတွင်း ဆန်စပါးကဏ္ဍအတွက် အထောက်အပံ့ပေးမည့် ရန်ပုံငွေ စုစုပေါင်း မှာ ဘတ်ငွေ ၁၁၁ ဘီလီယံသို့ တိုးတက်ခဲ့ကြောင်း သိရှိရပါသည်။
အိန္ဒိယနိုင်ငံ၌ စားသုံးသူများ၏ လွယ်လင့်တကူ ဝယ်ယူရရှိနိုင်မှုကို ပိုမိုကောင်းမွန်စေရန်နှင့် သိုလှောင်ဈေးကစားမှုများကို တားဆီးနိုင်ရန်အတွက် ပဲမျိုးစုံ တင်သွင်းသူများနှင့် လက်ကားကုန်သည်များ၏ လက်ဝယ်တွင် အများဆုံး သိုလှောင်ထားရှိနိုင်သည့် ပဲစင်းငုံနှင့် မတ်ပဲ ပမာဏကို တန်ချိန် ၅၀ သာ ခွင့်ပြုထားရာမှ တန်ချိန် ၂၀၀ သို့ တိုးမြှင့်သတ်မှတ်လိုက်ကြောင်း သိရှိရပါသည်။
မလေးရှားနိုင်ငံအနေဖြင့် တရုတ်နိုင်ငံသို့ ပို့ကုန်တင်ပို့မှုတိုးမြှင့်နိုင်ရန် မျှော်မှန်းဆောင်ရွက် လျက်ရှိရာ ယခုနှစ်အတွင်း စားအုန်းဆီပို့ကုန်တန်ဖိုး မလေးရှားရင်းဂစ် ၁၄ ဘီလီယံကျော်အထိ တင်ပို့နိုင်မည်ဟု မလေးရှား ဒုတိယဝန်ကြီးချုပ် Datuk Seri Fadillah Yusof က ပြောကြားခဲ့ ပါသည်။
တရုတ်နိုင်ငံ၏ ဝယ်လိုအားကျဆင်းမှုမှ ဆုံးရှုံးမှုဖြစ်ပေါ်ခြင်းမှာ နည်းပါးမှုရှိခဲ့သော်လည်း အိန္ဒိယ၏ စားသုံးဆီတင်သွင်းမှု နိမ့်ကျခြင်းနှင့်အတူ မလေးရှားနိုင်ငံ၌ သိုလှောင်မှုများပြားခြင်းကြောင့် မလေးရှားစားအုန်းဆီ ကြိုပွိုင့်ဈေးနှုန်းသည် ၃-၁၁-၂၀၂၃ ရက်၊ သောကြာနေ့တွင် အနိမ့်ဈေးဖြင့် ပိတ်သိမ်းခဲ့ကြောင်း Hellenic Shipping News က ဖော်ပြပါသည်။
မလေးရှားနိုင်ငံ၌ စားအုန်းဆီကဏ္ဍတွင် မမျှော်လင့်ပဲရရှိသော အမြတ်အစွန်းများအပေါ် ကောက်ခံသည့်အခွန် (windfall profit levy) စည်းကြပ်ခြင်းကို အစိုးရအနေဖြင့် ပြန်လည် သုံးသပ်ပေးရန် စားအုန်းဆီအသင်းအဖွဲ့များက ၆-၁၁-၂၀၂၃ ရက်၊ တနင်္လာနေ့တွင် တောင်းဆိုခဲ့ကြသည်။
၂၀၂၃-၂၀၂၄ ခုနှစ် ကြံရာသီအတွင်း တရုတ်-လာအို နှစ်နိုင်ငံအကြား ကြံသီးနှံကို နယ်စပ်ဖြတ်ကျော်သယ်ယူမှု စတင်သည့်အနေဖြင့် ယူနန်ပြည်နယ်၊ Xishuangbanna Dai ကိုယ်ပိုင်အုပ်ချုပ်ခွင့်ရစီရင်စုရှိ Mengman ကုန်းတွင်းဆိပ်ကမ်းမှတစ်ဆင့် ကြံကုန်တင်ယာဉ်များ တရုတ် နိုင်ငံသို့ ဝင်ရောက်ခဲ့ကြောင်း China Daily သတင်းစာတွင် ဖော်ပြထားသည်။
တရုတ်၊ အမေရိကန်၊ ဩစတြေးလျနှင့် အိန္ဒိယတို့တွင် ဝါဂွမ်းအထွက်ပမာဏ ကျဆင်းခဲ့ ခြင်းကြောင့် ၂ဝ၂၃ ခုနှစ်အောက်တိုဘာလမှ ၂ဝ၂၄ ခုနှစ် စက်တင်ဘာလအထိ ရာသီကာလ အတွင်း ကမ္ဘာ့ဝါဂွမ်းထုတ်လုပ်မှုမှာ ဘေထုပ်ရေ ၅ သန်း (၂၁၇.၇ ကီလိုဂရမ်ဝင်) လျော့နည်းနိုင် ကြောင်း သိရှိရပါသည်။ ဝါဂွမ်းဈေးနှုန်းမှာ လက်ရှိ သုံးလပတ်ကာလတွင် ကျဆင်းဖွယ်ရှိသော် လည်း ၂ဝ၂၄ ခုနှစ် ဒုတိယသုံးလပတ်မှ စတင်၍ ဈေးနှုန်းများ ပြန်လည်မြင့်တက်လာနိုင်ကြောင်း ကျွမ်းကျင်သူများက သုံးသပ်ပြောဆိုကြသည်။
ကမ္ဘောဒီးယားနိုင်ငံ၌ လုပ်ကွက်ငယ် တောင်သူပေါင်း ၁၀၀၀၀ ကျော်သည် အော်ဂဲနစ်ဆန် ထုတ်လုပ်တင်ပို့မှု အကြီးဆုံးကုမ္ပဏီတစ်ခုဖြစ်သည့် Armu Rice ကုမ္ပဏီနှင့် ကန်ထရိုက် လယ်ယာစနစ် လုပ်ကိုင်ဆောင်ရွက်ခြင်းမှ အကျိုးဖြစ်ထွန်းလျက်ရှိကြောင်း Khmer Times သတင်းဌာန၏ ဖော်ပြချက်အရ သိရှိရပါသည်။
ပထမအကြိမ် တရုတ်-အာဆီယံ အရည်အသွေးမြင့် အင်ဒီကာဆန်မျိုးကွဲများ (Indica Rice Variety) ၏ အရည်အသွေး အရသာ အကဲဖြတ်ခြင်းပြိုင်ပွဲတွင် ကမ္ဘောဒီးယားနိုင်ငံ၏ စုပေါင်း ကုန်အမှတ်တံဆိပ် (Collective Trademark) ရရှိထားသော Sen Kra Ob (SKO) ဆန်သည် ရွှေတံဆိပ်ဆုရရှိခဲ့ကြောင်း သိရှိရပါသည်။
ကမ္ဘောဒီးယားနိုင်ငံမှ အင်ဒိုနီးရှားနိုင်ငံသို့ ပထမဆုံးအကြိမ် တင်ပို့ခဲ့သော ဆန်များတင်ဆောင်လာသည့် သင်္ဘောသည် အင်ဒိုနီးရှားနိုင်ငံ အလယ်ပိုင်း ဂျာဗားပြည်နယ်ရှိ ဆီမာရမ်မြို့သို့ ၂-၁၁-၂၀၂၃ နေ့တွင် ဆိုက်ရောက်ခဲ့ပြီဖြစ်ကြောင်း ကမ္ဘောဒီးယားဝန်ကြီးချုပ် ဟွန်မနက်က ပြောကြားခဲ့ပါသည်။
