HighLight News

             စားသုံးသူများ အသုံးပြုလျက်ရှိသည့် ကုန်စည်နှင့်ဝန်ဆောင်မှုများ ဘေးအန္တရာယ် ကင်းရှင်းစေရေးအတွက် စားသုံးသူရေးရာဦးစီးမှူးရုံး၏ လမ်းညွှန်ချက်များအရ အစားအသောက် ပြုပြင်ရောင်းချသည့် နေရာများ မသန့်ရှင်းခြင်း၊ အစားအသောက် ကိုင်တွယ်ချက်ပြုတ်သူများ၊ ဝန်ဆောင်မှုပေးသူများ၏ တစ်ကိုယ်ရည်သန့်ရှင်းမှု အားနည်းခြင်း၊ အစားအသောက်များ သန့်ရှင်း လတ်ဆက်မှုမရှိခြင်း စသည့် အကြောင်းအရင်းများကြောင့် ဖြစ်ပေါ်သည့် ကျန်းမာရေး ပြဿနာများမှ စားသုံးသူအား ကာကွယ်ရန်၊ စားသောက်ဆိုင်များသည် မိမိတို့ဆိုင်များမှပေးအပ် သည့်ဝန်ဆောင် မှုနှင့်စပ်လျဉ်း၍ စားသုံးသူများအား လုံလောက်သည့် သတင်းအချက်အလက်များကို အသိပေး ဖော်ပြစေခြင်းဖြင့် စားသုံးသူအခွင့်အရေးရရှိစေရန် နှင့် ရောင်းချသည့် စားသောက် ဖွယ်ရာများ၏ အမျိုးအစား၊အရွယ်အစား၊ပမာဏအလိုက် ဈေးနှုန်းအားပွင့်လင်းမြင်သာစွာ ကြိုတင် အသိပေး‌ ဖော်ပြထားခြင်းဖြင့် စားသုံးသူတို့၏ အခွင့်အရေးကို ကာကွယ်ရန် ရည်ရွယ်၍ ၂၀၂၅ခုနှစ် ဧပြီလအတွင်း အစားအသောက်ရောင်းချသည့် ဝန်ဆောင်မှုလုပ်ငန်းများ ဈေးကွက်စောင့်ကြည့် စစ်ဆေးရန်  အကြောင်းကြားမှုအပေါ် ဆောင်ရွက်လျက်ရှိရာ ပြည်ခရိုင်အတွင်းပြည်မြို့နယ်တွင် ခေတ္တရာမြို့သစ်ရပ်ကွက်၊ အနောက်မြို့ပတ်(၁၂)လမ်းထိပ်ရှိ "လိုတရ"စားသောက်ဆိုင်၊ ရွှေတောင် မြို့နယ်တွင် ကြာနီကန်ရပ်ကွက်၊ရန်ကုန်-ပြည်လမ်းရှိ "Sky Star"စားသောက်ဆိုင်၊ ပန်းတောင်း မြို့နယ်တွင် ဝန်လိုရပ်ကွက်၊ ပန်းတောင်း-တောင်ကုတ်လမ်းရှိ "ငွေသော်တာ"စားသောက်ဆိုင်၊ ပေါက်ခေါင်းမြို့နယ်တွင် အမှတ်(၄)ရပ်ကွက်ရှိ ပြည်-တောင်ငူလမ်းပေါ်ရှိ "မေတ္တာအိမ်"စားဖွယ်စုံ ဆိုင်များသို့ သက်ဆိုင်ရာမြို့နယ်တာဝန်ခံနှင့် ဝန်ထမ်းများသည် မိမိတို့ခရိုင်/မြို့နယ်များရှိ မိတ်ဖက်ဌာနဆိုင်ရာများဖြစ်သော ခရိုင်FDAဌာန၊မြို့နယ်ထွေ/အုပ်၊ မြိုနယ်ပြည်သူ့ကျန်းမာရေး၊ မြို့နယ်စည်ပင်သာယာရေးအဖွဲ့များနှင့် ပူးပေါင်း၍ ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ပါသည်။

           ထိုသို့ဆောင်ရွက်ရာတွင် ‌အစားအသောက်ပြုပြင်ရောင်းချသည့်နေရာများ သန့်ရှင်းမှု ရှိ/မရှိ၊ အစားအသောက်ကိုင်တွယ်ချက်ပြုတ်သူများနှင့် ဝန်ဆောင်မှုပေးသူများ၏ တစ်ကိုယ်ရည်သန့်ရှင်းမှု ရှိ/မရှိ၊ အစားအသောက်များ သန့်ရှင်းလတ်ဆက်မှုရှိ/မရှိ၊ စားသောက်ဆိုင်များသည် မိမိတို့ဆိုင် များမှပေးအပ်သည့် ဝန်ဆောင်မှုနှင့် စပ်လျဉ်း၍ စားသုံးသူများအား လုံလောက်သည့် သတင်းအချက်အလက်များကို အသိပေးဖော်ပြခြင်းရှိ/မရှိနှင့် ရောင်းချသည့်စားသောက်ဖွယ်ရာ များ၏ အမျိုးအစား၊အရွယ်အစား(size)ပမာဏအလိုက် ဈေးနှုန်းအား ပွင့်လင်းမြင်သာစွာ ကြိုတင်ဖော်ပြထားခြင်းရှိ/မရှိ ၊ ဈေးကွက်စောင့်ကြည့် စစ်ဆေးခြင်းများ ဆောင်ရွက်ခဲ့ရာ သန့်ရှင်းလတ်ဆက်မှုရှိခြင်း၊ ဝန်ဆောင်မှုနှင့် စပ်လျဉ်း၍ သီးခြားရယူထားမှုမရှိခြင်းနှင့် ဈေးနှုန်းများ ဖော်ပြထားသည့် Menuစာရွက်များကို စားပွဲများတွင်တင်ထားသည်ကို စစ်ဆေးတွေ့ရှိခဲ့ပါကြောင်း နှင့်အစားအသောက်ရောင်းချသည့် ဝန်ဆောင်မှုလုပ်ငန်းများ အနေဖြင့် စားသုံးသူများအား ဝန်ဆောင်မှုပေးရာတွင် စားသုံးသူစိတ် ကျေနပ်မှုရှိစေရေး၊ စားသုံးသူဘေးအန္တရာယ် ကင်းရှင်းစွာ စားသောက်နိုင်ရေး၊ စားသုံးသူနစ်နာဆုံးရှုံးမှု မဖြစ်စေရေးတို့ကို ဦးစားပေးဆောင်ရွက်ရန် အသိပညာပေးဆွေးနွေးခြင်းများ ဆောင်ရွက်ခဲ့ပါကြောင်း သတင်းရရှိပါသည်။

DOCA(ပဲခူး)

              စားသုံးသူရေးရာဦးစီးဌာန တောင်ငူခရိုင်ဦးစီးမှူးရုံးမှ စစ်ဆေးရေးမှူးများဖြစ်ကြသော စားသုံး/ထုတ်လုံဌာနခွဲတာဝန်ခံနှင့် တောင်ငူမြို့နယ်တာဝန်ခံတို့သည် မေလ ၈ ရက်နေ့ မွန်းလွဲပိုင်း က တောင်ငူမြို့၊ အမှတ်(၈)ရပ်ကွက်၊ အုတ်ကျွတ်တန်း(တောင်)ရှိ ဗိုလ်တထောင်ဆီစက်သို့ သွား ရောက်၍ မြေပဲဆီများအား ဈေးကွက်အတွင်း ဖြန့်ဖြူးရောင်းချခြင်းမပြုမီ ကုန်အညွှန်းအမှတ် အသားများ ပြည့်စုံစွာဖော်ပြထားခြင်း ရှိ/မရှိကို ဈေးကွက်စောင့်ကြည့် စစ်ဆေးခဲ့ပါသည်။

              စစ်ဆေးရေးအရာရှိများသည် ဆီစက်ပိုင်ရှင် ဦးမောင်မောင်သန်းနှင့်တွေ့ဆုံပြီး လုပ်ငန်း ဆောင်ရွက်မှုအခြေအနေများ၊ လုပ်ငန်းဆောင်ရွက်ရာတွင် စားသုံးသူကာကွယ်ရေးဥပဒေပါ ပြဌာန်း ချက်များနှင့်အညီ လိုက်နာဆောင်ရွက်ခြင်းဖြင့် စားသုံးသူအကျိုးစီးပွားအတွက် ပူးပေါင်းဆောင်ရွက် လျှက်ရှိနေမှုများ၊ စားသုံးသူနစ်နာဆုံးရှုံးမှု မဖြစ်စေရေးကို ဦးစားပေးဆောင်ရွက်ရန် လိုအပ်ပုံများကို ဆွေးနွေးခဲ့ပါသည်။

              ဗိုလ်တထောင်ဆီစက်သည် မြေပဲဆီများကို တစ်လီတာ၊ တစ်ပိဿာ၊ ၃ ပိဿာ၊ ၅ ပိဿာ နှင့် ၁၀ ပိဿာဘူးများသွင်း၍ ဈေးကွက်အတွင်း ဖြန့်ဖြူးရောင်းချလျှက်ရှိရာ ကုန်အညွှန်းအမှတ် အသားဖော်ပြခြင်းနှင့်စပ်လျဉ်း၍ စားသုံးသူကာကွယ်ရေးဥပဒေပါ ပြဌာန်းချက်များနှင့် ကိုက်ညီမှု ရှိ/မရှိ စိစစ်ပေးနိုင်ပါရန် ၂၀၂၀ ခုနှစ်၊ မတ်လက စားသုံးသူရေးရာဦးစီးဌာန၊ တောင်ငူ ခရိုင်ဦးစီးမှူးရုံးသို့ တင်ပြခဲ့ကြောင်းသိရပါသည်။

DOCA(ပဲခူး)

           ဧရာဝတီတိုင်းဒေသကြီး၊ ဖျာပုံခရိုင်၊ ကျိုက်လတ်မြို့ရှိ စားသုံးသူရေးရာဦးစီးဌာနမှ မြို့နယ်တာဝန်ခံနှင့် ဝန်ထမ်းတို့သည် ၂၀၂၅ ခုနှစ်၊ မေလ (၈) ရက်နေ့ စားသုံးသူရေးရာ ဦးစီးဌာနရုံး၌ ဆန်စက် အလုပ်သမား (၁၀)ဦးအား စားသုံးသူကာကွယ်ရေး အသိပညာပေး ဟောပြောခြင်း ဆောင်ရွက်ခဲ့ကြောင်း သတင်းရရှိသည်။

          အဆိုပါဟောပြောပွဲတွင် မြို့နယ်တာဝန်ခံက စားသုံးသူ ကာကွယ်ရေး အကြောင်း စားသုံးသူများ ဘေးအန္တရာယ် ကင်းရှင်းစေရန်၊ ဓာတုဆေးဝါးများအကြောင်း၊ အစားအစာများတွင် မြန်မာဘာသာဖြင့် ဖော်ပြထားသော ကုန်အညွှန်းအမှတ်အသား ပြည့်စုံစွာ ပါဝင်သော အစားအစာများကို ဝယ်ယူသုံးစွဲကြရန်နှင့် စားသုံးသူ အခွင့်အရေးများအကြောင်း၊ စားသုံးသူနစ်နာဆုံးရှုံးမှုများရှိပါက (၁၅၃၅)သို့ တိုင်ကြားနိုင်ကြောင်း အသိပညာပေး ဟောပြောခဲ့သည်ဟု သတင်းရရှိပါသည်။

DOCA(ဧရာဝတီ)

          ဧရာဝတီတိုင်းဒေသကြီး၊ ဖျာပုံခရိုင်၊ ဒေးဒရဲမြို့ရှိ စားသုံးသူရေးရာဦးစီးဌာန၊ မြို့နယ်တာဝန်ခံနှင့် ဝန်ထမ်းတို့သည် ၂၀၂၅ ခုနှစ်၊ မေလ (၉) ရက်နေ့တွင် ဒေးဒရဲမြို့ ထောက်မှူးချောင် ကျေးရွာရှိ Gold Detal ဆန်စက်သို့  MSMEs လုပ်ငန်းများ ဖွံ့ဖြိုးရေးကွင်းဆင်းစစ်ဆေးခြင်းဆောင်ရွက် ခဲ့ကြောင်း သိရသည်။

          ထိုသို့ကွင်းဆင်းစိစစ်ရာတွင် ထုတ်လုပ်မှုနှင့်ပတ်သက်၍  ထုတ်ကုန်များ အရည်အသွေး ပြည့်မှီစေရေး၊ ထုတ်ပိုးမှု အခြေအနေများ၊ ဆန်၊စပါးဈေးနှုန်းဈေးကွက်အခြေအနေများ တည်ငြိမ်မှု ရှိ/မရှိ၊ ပုဂ္ဂလိက ကဏ္ဍနှင့် ကုန်သွယ်မှု ဖွံ့ဖြိုးတိုးတက်ရေး ထုတ်ကုန်လုံခြုံစိတ်ချမှုနှင့် MSMEs လုပ်ငန်းများဖွံ့ဖြိုးတိုးတက်ရေး၊ စက်ကိရိယာနှင့် ပတ်သက်၍ နည်းစနစ်သစ်များ တပ်ဆင်မှုများ၊ ခေတ်မီ ဖွံ့ဖြိုးတိုးတက်မှသာ ထုတ်ကုန်များ ပိုမိုထုတ်လုပ်နိုင်ခြင်း၊ ထုတ်ကုန်များ ပိုမို ထုတ်လုပ်နိုင်မှသာ အလုပ်သမား မိသားစုများအတွက် စားဝတ်နေရေး ပြေလည်စေနိုင်ခြင်း၊ စွန့်ပစ်ပစ္စည်းများ စနစ်တကျ စွန့်ပစ်ခြင်း ရှိ/မရှိတို့ကို ကွင်းဆင်းစစ်ဆေးခဲ့ကြောင်း သတင်းရရှိပါသည်။

DOCA(ဧရာဝတီ)

            ဧရာဝတီတိုင်းဒေသကြီး၊ ဖျာပုံခရိုင်၊ ကျိုက်လတ်မြို့ရှိ စားသုံးသူရေးရာဦးစီးဌာနမှ မြို့နယ်တာဝန်ခံနှင့် ဝန်ထမ်းတို့သည် ၂၀၂၅ ခုနှစ်၊ မေလ (၈) ရက်နေ့တွင် သမက်ပြေကျေးရွာရှိ ဦးနေလင်းသန့် ပိုင်ဆိုင်သော ထွန်းဇဗ္ဘူဆန်စက်သို့ ထုတ်ကုန်လုံခြုံစိတ်ချမှု့နှင့် MSMEs လုပ်ငန်းများဖွံ့ဖြိုးရေးကွင်းဆင်းစစ်ဆေးခြင်း ဆောင်ရွက်ခဲ့ကြောင်း သိရသည်။

          ထိုသို့ကွင်းဆင်းစိစစ်ရာတွင် ထုတ်ကုန်လုံခြုံစိတ်ချမှု ရှိစေရန် ဆန်စက်ကြိတ်ခွဲရာမှ ထွက်ရှိသော ထုတ်ကုန်များ အရည်အသွေး ပြည့်မှီစေရေး၊ ထုတ်ပိုးမှု အခြေအနေများ၊ ဆန်၊စပါးဈေးနှုန်းဈေးကွက်အခြေအနေများ သိုလှောင်ရုံ မှတ်ပုံတင်ခြင်းကိစ္စ၊ မှတ်ပုံတင်သက်တမ်းတိုးခြင်းကိစ္စ၊ သိုရုံဆန်စပါးလက်ကျန် အခြေအနေ တို့ကို စားသုံးသူရေးရာဦးစီးဌာန၊ သဘာဝပတ်ဝန်းကျင် ထိန်းသိမ်းရေးဌာန၊ စက်မှုကြီးကြပ်ဌာန၊   ဆန်စက်အသင်းတို့မှ ပူးပေါင်းကွင်းဆင်းစိစစ်ခဲ့ကြပါသည်။

DOCA(ဧရာဝတီ)