HighLight News

    ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ ညောင်တုန်းမြို့နယ်ဦးစီးမှူး ဦးအောင်လွင်နှင့်ဝန်ထမ်းများသည် (၃-၁၀-၂၀၂၂) ရက်နေ့၊ နေ့လယ် (၁၀:၀၀) နာရီအချိန်မှ (၁၂:၀၀)နာရီအချိန်ထိ ညောင်တုန်းမြို့နယ်၊ ဆားမလောက်ကျေးရွာရှိ ဖြူစင်သန့်ဆန်စက်သို့သွားရောက်၍ ထုတ်ကုန်လုံခြုံစိတ်ချရမှုရှိစေရေး ကွင်းဆင်းဆောင်ရွက်ခဲ့ကြပါသည်။

      ထိုသို့ကွင်းဆင်းစစ်ဆေးဆောင်ရွက်ရာတွင် ဖြူစင်သန့်ဆန်စက်ပိုင်ရှင်နှင့်တွေ့ဆုံ၍ ဆန်စက်ကြိတ်ခွဲထုတ်လုပ်မှုအဆင့်ဆင့်၊ ထွက်ရှိလာသောဆန်များကို ဈေးကွက်သို့တင်ပို့ရောင်းချမှုအခြေအနေ၊ ဆန်/စပါးဈေးနှုန်းဈေးကွက်အခြေအနေများာကိုမေးမြန်းရား (၂၀၂၂-၂၀၂၃) ခုနှစ်၊ မိုးမနောသုခစပါး (၅၀) ပေါင်လျှင် ကွင်းဈေးမှာ ၁၉၃၀၀/-ကျပ်၊ စက်ဈေးနှုန်းမှာ ၁၉၅၀၀/-ကျပ်ဖြစ်ကြောင်း၊ (၂၀၂၂-၂၀၂၃)ခုနှစ်၊ မနောသုခဆန်(၁၀၈)ပေါင်လျှင် လတ်စဈေးမှာ ၇၀၀၀၀/-ကျပ်၊ ထိပ်စဈေးမှား ၇၂၀၀၀/-ကျပ်နှင့် (၂၀၂၂-၂၀၂၃) ခုနှစ်၊ မိုးနှံကားစပါး(၅၀)ပေါင်လျှင် ကွင်းဈေးမှာ ၁၆၈၀၀/-ကျပ်၊ စက်ဈေးမှာ ၁၇၀၀၀/-ကျပ်နှင့် ( ၂၀၂၂-၂၀၂၃) ခုနှစ်၊ မိုးနှံကားဆန်(၁၀၈)ပေါင်လျှင် လတ်စဈေးမှာ ၆၀၀၀၀/-ကျပ်နှင့် ထိပ်စဈေးမှာ (၆၂၀၀၀)ကျပ်ရှိကြောင်းရှင်းလင်းပြောကြားပြီး ဆန်စက်မှထွက်ရှိလာသောဆန်များကို အရည်အသွေးမြင့်ကုန်စည်ထွက်ရှိစေရေးနှင့် လုပ်ငန်းရှင်တို့၏ ကုန်စည်အပေါ် အာမခံချက်ပေးနိုင်ခြင်းနှင့်စပ်လျဉ်း၍ ဆွေးနွေးခြင်း၊ လုပ်ငန်းရှင်လိုက်နာရမည့်တာဝန်၊ တားမြစ်ချက်များ၊ ပြစ်မှု၊ ပြစ်ဒဏ်များအကြောင်းကို ရှင်းလင်းဆွေးနွေးခဲ့ကြောင်း သတင်းရရှိပါသည်။

DOCA(ဧရာဝတီ)

     စစ်ကိုင်းတိုင်းဒေသကြီး၊ ရွှေဘိုခရိုင်၌ ရွှေဘိုပေါ်ဆန်း (G.I) ရရှိရေးအတွက် ပြင်သစ်နိုင်ငံ AFD (France Development Agency) ၏ထောက်ပံ့ကူညီမှုဖြင့် Recognition and Promotion of Geographical indication in Cambodia, Lao PDR and Myanmar (မြန်မာ၊ လာအိုနှင့် ကမ္ဘောဒီးယားနိုင်ငံတို့တွင် ဒေသဆိုင်ရာအညွှန်းများကိုအသိအမှတ်ပြုခြင်းနှင့် မြှင့်တင်ခြင်းစီမံကိန်း)ကို GRET Myanmar အဖွဲ့အစည်းက  အကောင်အထည်ဖော်ဆောင်ရွက်လျက်ရှိပါသည်။ 

   ယခုလက်ရှိအချိန်တွင် ရွှေဘိုပေါ်ဆန်း (G.I) ရရှိရေး ဆောင်ရွက်မှုအနေဖြင့် (၉/၂၀၂၃)လအတွင်း ရွှေဘိုပေါ်ဆန်းမျိုးကောင်း၊ မျိုးသန့်များပိုမိုစိုက်ပျိုးထုတ်လုပ်ပြီး ဒေသတွင်းလုံလောက်စွာဖြန့်ဖြူးနိုင်ရန် အသင်းဝင်မျိုးစေ့ထုတ်တောင်သူများနှင့် ရွှေဘိုပေါ်ဆန်းစိုက်ပျိုးထုတ်လုပ်တင်ပို့ရောင်းချသူများအသင်း ရုံးတွင် တွေ့ဆုံဆွေးနွေးခြင်း၊ ဒေသဆိုင်ရာအညွှန်း (G.I) ကုန်အမှတ်တံဆိပ်ရရှိရေး တောင်သူအသိပညာပေးဆွေးနွေးပွဲကို ရွှေဘိုမြို့နယ်အတွင်းရှိ ကျေးရွာပေါင်း(၈)ရွာမှ တောင်သူကိုယ်စားလှယ်များကိုဖိတ်ခေါ်၍ ရွှေဘိုပေါ်ဆန်းစိုက်ပျိုးထုတ်လုပ်တင်ပို့ရောင်းချသူများအသင်းရုံးတွင် ဆောင်ရွက်လျက်ရှိပါသည်။  ရွှေဘိုပေါ်ဆန်း၏ အများပိုင်ကုန်အမှတ်တံဆိပ် (Logo) သုံးစွဲရေး လုပ်ငန်းညှိနှိုင်းအစည်းအဝေးကို (၂၅-၉-၂၀၂၃)ရက်နေ့တွင် မန္တလေးမြို့၊ အမရာနဒီဟိုတယ်တွင်ကျင်းပခဲ့ရာ G.I Project မှ National Coordinator၊ ရွှေဘိုပေါ်ဆန်းစိုက်ပျိုးထုတ်လုပ်တင်ပို့ရောင်းချသူများအသင်းရုံးမှ ဝန်ထမ်းများ၊ ဆန်စက်ပိုင်/ဆန်ကုန်သည်များတက်ရောက်ခဲ့ကြောင်း၊ အဆိုပါအစည်းအဝေးတွင် (၁-၁၁-၂၀၂၃)ရက်နေ့မှစတင်၍ ရွှေဘိုပေါ်ဆန်းစစ်မှန်ကြောင်း အများပိုင်ကုန်အမှတ်တံဆိပ် တရားဝင် (Logo) ဖြင့် စတင်သုံးစွဲမည်ဖြစ်ကြောင်း၊ (၁-၁၁-၂၀၂၃)ရက်နေ့မှ (၃၀-၄-၂၀၂၄)ရက်နေ့ထိ ရွှေဘိုပေါ်ဆန်းစစ်မှန်ကြောင်း အများပိုင်ကုန်အမှတ်တံဆိပ် (Logo) ကို Sticker ဖြင့်သုံးစွဲမည်ဖြစ်ကြောင်း၊ (၁-၁၁-၂၀၂၃)ရက်နေ့တွင်  ရွှေဘိုပေါ်ဆန်းစစ်မှန်ကြောင်း အများပိုင်ကုန်အမှတ်တံဆိပ် (Logo) သုံးစွဲမည့် ဆန်စက်ပိုင်/ ဆန်ကုန်သည်များစားရင်းကောက်ယူ၍ အသေးစိတ်ညှိနှိုင်းခြင်းများဆောင်ရွက်ခဲ့ကြောင်း၊ ဆက်လက်၍ (၂၈-၉-၂၀၂၃) ရက်နေ့နှင့် (၂၉-၉-၂၀၂၃) ရက်နေ့တို့တွင် ရွှေဘိုပေါ်ဆန်း၏ အများပိုင်ကုန်အမှတ်တံဆိပ် (Logo) သုံးစွဲခြင်းနှင့် (G.I) ရရှိရေးအတွက် အဖွဲ့တွင်းစစ်ဆေးသူသင်တန်းကို ရွှေဘိုမြို့ရှိ ရွှေဘိုပေါ်ဆန်းစိုက်ပျိုးထုတ်လုပ်တင်ပို့ရောင်းချသူများအသင်းရုံး၌ပြုလုပ်ခဲ့ရာ ပြင်သစ်နိုင်ငံမှ Mr. Andre de la Bretesche (Trainer, Consultant) က ပထမအကြိမ် Online မှတစ်ဆင့် (၂) ရက် သင်တန်းပို့ချခဲ့ကြောင်း၊ အဆိုပါသင်တန်းသို့  inspector (၁၀) ဦး၊  Admin Officer နှင့် ရွှေဘိုပေါ်ဆန်းစိုက်ပျိုးထုတ်လုပ်တင်ပို့ရောင်းချသူများအသင်းအလုပ်အမှုဆောင်အဖွဲ့ဝင်များတက်ရောက်ခဲ့ကြကြောင်း သတင်းရရှိပါသည်။

DOCA(စစ်ကိုင်း)

    ကချင်ပြည်နယ်၊ စားသုံးသူရေးရာဦးစီးဌာန၊ ဗန်းမော်ခရိုင်ဦးစီးမှူးရုံးမှ ခရိုင်ဦးစီးမှူး ဦးအောင်ကျော်ဦးသည် (၅-၁၀-၂၀၂၃) ရက်နေ့တွင် ဗန်းမော်မြို့၊ တာမိုင်းလုံကျေးရွာ၊ ဘုန်းတော်ကြီးကျောင်းခန်းမဆောင်၌ ခရိုင်အသေးစားစက်မှုလက်မှုလုပ်ငန်းဉီးစီးဌာနမှသင်ကြားပို့ချသော အခြေခံစက်ချုပ်သင်တန်းရှိ သင်တန်းသူ ၁၅ဦးအား စားသုံးသူကာကွယ်ရေးဆိုင်ရာ အသိပညာများဟောပြောဆွေးနွေးခဲ့ပါသည်။

     ထိုသို့ဆွေးနွေးရာတွင် ခရိုင်ဦးစီးမှူး ဦးအောင်ကျော်ဦးက စားသုံးသူဆိုသည်မှာ ကုန်စည် သို့မဟုတ် ဝန်ဆောင်မှုကို ကုန်သွယ်ရောင်းဝယ်မှုပြုရန် သို့မဟုတ် အသက်မွေးဝမ်းကျောင်းပြုရန်မဟုတ်ဘဲ ကိုယ်တိုင်သုံးစွဲမှုအတွက်သော်လည်းကောင်း၊ တခြားသူအတွက်သော်လည်းကောင်း ရည်ရွယ်၍ဝယ်ယူခြင်း၊ အသုံးပြုခြင်း၊ ရယူခြင်း၊ ကုန်စည်ချေးငှားခြင်းပြုလုပ်သူများ သို့မဟုတ် ပေးကမ်းထောက်ပံ့ခြင်းခံရသူများကိုဆိုလိုကြောင်းနှင့် စားသုံးသူကာကွယ်ရေးဥပဒေ ၂၀၁၉ပါ စားသုံးသူ၏အခွင့်အရေးနှင့်တာဝန်များ၊ ဝန်ဆောင်မှုနှင့်စပ်လျဉ်း၍ အာမခံချက်ပေးခြင်းအပေါ် စီးပွား‌ရေးလုပ်ငန်းရှင်များသည် မိမိတို့ဝန်ဆောင်မှုနှင့်စပ်လျဉ်း၍ အချက်အလက်များကို စားသုံသူများသိရှိစေရန် ကြိုတင်အသိပေးခြင်း၊ မှန်ကန်သောသတင်းအချက်အလက်နှင့် ပြည့်စုံသောဝန်ဆောင်မှုအဆင့်အတန်းနှင့်အညီ ပြည့်ဝစွာပေးခြင်း၊ စားသုံးသူ၏လိုအပ်ချက်နှင့်ကိုက်ညီမှုရှိခြင်း၊ အာမခံထားသောကာလအတွင်း ပြီးမြောက်အောင်ဆောင်ရွက်ပေးခြင်း၊ စားသုံးသူနှင့်သဘောတူညီသည့် ဝန်ဆောင်မှုတန်ဖိုးအတိုင်း ပေးအပ်စေခြင်း  စသည့်တို့ကို  အကျယ်တဝင့်ရှင်းလင်းခြင်း၊ ဝန်ဆောင်မှုလုပ်ငန်းများ၏ အာမခံချက်နှင့်စပ်လျဉ်း၍  စားသုံးသူကတောင်းဆိုနိုင်သည့် အခွင့်အရေးများဖြစ်သည့် ဝန်ဆောင်မှုပေးရန်ပျက်ကွက်ခဲ့မှုကြောင့်  နစ်နာဆုံးရှုံးမှုဖြစ်ခဲ့လျှင် ယင်းအတွက် လျော်ကြေးပေးရန် အာမခံထားသောအချိန်ကာလအတွင်း သဘောတူညီထားသော ဝန်ဆောင်မှုမရရှိခဲ့လျှင် စားသုံးသူ၏နစ်နာမှုအတွက် ကုစားခွင့်ပေးခြင်း စသည့်အချက်များကိုရှင်းလင်းပြောကြားပြီး စားသုံးသူကာကွယ်ရေးဆိုင်ရာ အသိပညာပေးလက်ကမ်းစာစောင်များဖြန့်ဝေခဲ့ကြောင်းသိရှိရပါသည်။

DOCA(ကချင်)

   မွန်ပြည်နယ်၊ စားသုံးသူရေးရာဦးစီးဌာန၊ ဘီးလင်းမြို့နယ်တာဝန်ခံရုံးမှ ဝန်ထမ်းများသည် (၅-၁၀-၂၀၂၃) ရက်နေ့တွင် ဘီးလင်းမြို့နယ်၊ ဆရာစံရပ်ကွက် (အ.မ.က-၃) ကျောင်း၌ စားသုံးသူကာကွယ်ရေးအသိပညာပေးဟောပြောဆွေးနွေးခဲ့ကြသည်။

      အဆိုပါဟောပြောဆွေးနွေးပွဲတွင် ကျောင်းအုပ်ဆရာမကြီးက အဖွင့်အမှာစကားပြောကြားခဲ့ပြီး စားသုံးသူရေးရာဦးစီးဌာန၊ ဘီးလင်းမြို့နယ်တာဝန်ခံ ဒေါ်ဇင်ဖြူဝင်းက ဦးစီးဌာန၏မျှော်မှန်းချက်၊ ရည်မှန်းချက်၊ လုပ်ငန်းတာဝန်များ၊ စားသုံးသူအခွင့်အရေးနှင့်တာဝန်များ၊ ကုန်အညွှန်းအမှတ်အသားနှင့်ပတ်သက်သည့် သိကောင်းစရာများ၊ စားသုံးသူများနစ်နာဆုံးရှုံးမှုများဖြစ်ပေါ်လာပါက တိုင်ကြားနိုင်သည့်နေရာများ၊ နည်းလမ်းများ၊ Consumer Call Center ဖွင့်လှစ်ထားရှိမှုအခြေအနေများနှင့် www. doca. gov. mm တွင်လည်း ဝင်ရောက်ကြည့်ရှုလေ့လာနိုင်ကြောင်း ဟောပြောဆွေးနွေးခဲ့ပါသည်။

     အဆိုပါ ဟောပြောဆွေနွေးပွဲသို့ ဆရာ၊ ဆရာမ၊ ကျောင်းသား၊ ကျောင်းသူများ (၁၅၀) ဦး တက်ရောက်ခဲ့ကြပြီး စားသုံးသူအသိပညာပေးလက်ကမ်းစာစောင်များဖြန့်ဝေပေးခဲ့ကြောင်းသိရှိရပါသည်။

DOCA(မွန်)

     စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးရုံး၌ ဝန်ထမ်းများသည်     (၅-၁၀-၂၀၂၃) ရက်နေ့တွင် စွမ်းဆောင်ရည်မြှင့်အထောက်အကူပြု Thursday Talk ကျင်းပပြုလုပ်ခဲ့ရာ ပြည်နယ်ရုံးနှင့် မော်လမြိုင်ခရိုင်ရုံးတို့မှ ဝန်ထမ်းစုစုပေါင်း (၂၅) ဦးတက်ရောက်ခဲ့ကြပါသည်။

  ဆွေးနွေးပွဲတွင် ပြည်နယ်ဦးစီးမှူးက အဖွင့်အမှာစကားပြောကြားပြီးနောက် စီမံရေးရာဌာနခွဲမှ ဦးစီးမှူး ဦးမင်းနောင်က ခေါင်းဆောင်မှု (Leadership) အကြောင်းကိုလည်းကောင်း၊ ပြည်တွင်းကုန်သွယ်ရေးဖွံ့ဖြိုးမှုနှင့်သုတေသနဌာနခွဲမှ ဒု-ဦးစီးမှူး ဒေါ်သီတာလွင်က ပြည်တွင်းကုန်သွယ်ရေးဖွံ့ဖြိုးမှုနှင့်သုတေသနဌာနခွဲလုပ်ငန်းတာဝန်များကိုလည်းကောင်း၊ ငွေစာရင်းဌာနခွဲမှ အငယ်တန်းစာရေး ဒေါ်အေးမြင့်မြတ်ထက်က ဓနိဝိုင်ပြုလုပ်နည်းအကြောင်းကိုလည်းကောင်း အသီးသီးရှင်းလင်းဆွေးနွေးခဲ့ကြပြီး တက်ရောက်လာသူများက သိလိုသည်များကို အပြန်အလှန်မေးမြန်းဆွေးနွေးခဲ့ကြောင်းသိရှိရပါသည်။

DOCA(မွန်)