HighLight News

    ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ ပန်းတနော်မြို့နယ်သို့သွားရောက်၍ မအူပင်ခရိုင်ဦးစီးမှူး ဦးဇော်မင်းနှင့်ဝန်ထမ်းများသည် ၂၀၂၃ခုနှစ်၊ အောက်တိုဘာလ( ၆)ရက်နေ့၊  နံနက် (၁၀:၃၀) နာရီအချိန်တွင် ပန်းတနော်မြို့နယ်၊ အလယ်ပိုင်းရပ်ကွက်၊ မြို့နယ်အုပ်ချုပ်ရေးမှူးရုံး၌ ဆန်စပါးလုပ်ငန်းရှင်(၁၀)ဦးနှင့်တွေ့ဆုံ၍ အသိပညာပေးဆွေးနွေးခဲ့ကြပါသည်။

     အဆိုပါဆွေးနွေးပွဲတွင် ခရိုင်ဦးစီးမှူးနှင့် ပန်းတနော်လုပ်ငန်းရှင်များဆွေးနွေးကြရာ ပန်းတနော်မြို့နယ်ရှိ ဆန်စပါးဈေးကွက်အခြေအနေ၊ ဆန်စပါးရောင်းဝယ်ထွက်ရှိမှုအခြေအနေများ၊ ရောင်းဝယ်ကြိတ်ခွဲမှုအခြေအနေ၊ တင်ပို့ရောင်းချမှုအခြေအနေများကိုဆွေးနွေးပြီးနောက် ဧရာဝတီတိုင်းဒေသကြီးတွင် မြို့နယ်ပေါင်း (၂၆)မြို့နယ်ရှိပြီး အသင်းအဖွဲ့များ ထပ်မံဖွဲ့စည်းတိုးချဲ့သင့်ကြောင်း၊ အသင်းအဖွဲ့ရှင်သန်အားကောင်းမှသာ ဆန်စပါးကဏ္ဍကောင်းမွန်ဖွံ့ဖြိုးတိုးတက်လာပြီး ဆန်စပါးကဏ္ဍနှင့်သက်ဆိုင်သည့် စိုက်ပျိုးထုတ်လုပ်သောတောင်သူ၊ ဆန်စက်လုပ်ငန်းရှင်၊ ဆန်စပါးကုန်သည်များ အကျိုးအမြတ်ကောင်းခံစားရရှိနိုင်ပါကြောင်း၊ ဆန်ကိုအဓိကထားစိုက်ပျိုးသည့်ဒေသဖြစ်၍ တောင်သူစိုက်ပျိုးသောမျိုး ၅မျိုး၊ ၆မျိုးရှိပြီး အကောင်းဆုံးမျိုးစပါးအရည်အသွေးတန်ဖိုးမြင့်စိုက်ပျိုးကြိတ်ခွဲမှု၌ ပြည်ပဈေးကွက်ဝင်အောင် တန်းမြင့်ဆန်ကိုခွဲခြားနိုင်သည့် ဆန်စက်နည်းပညာအရည်အသွေးမြင့်မားအောင်ဆောင်ရွက်ကာ ပြည်ပသို့တင်ပို့နိုင်သည့် အရည်အသွေးကောင်းသောဆန်ထွက်ရှိရေး၊ ပြည်ပတင်ပို့မှုတည်ငြိမ်နိုင်ရေး၊ ဈေးနှုန်းတည်ငြိမ်ရေးတို့ကို အသေးစိတ်ဆွေးနွေးခဲ့ကြကြောင်း သတင်းရရှိပါသည်။

DOCA(ဧရာဝတီ)

          စားသုံးသူရေးရာဦးစီးဌာန၊ မြောက်ပိုင်းခရိုင်ဦးစီးမှူးရုံးမှ ဒေါ်နီလာဦး၊ ဒု-ဦးစီးမှူးနှင့် ဝန်ထမ်းများသည် ၁၀.၁၀.၂၀၂၃ ရက်နေ့၊ နံနက်(၁၁:၀၀)နာရီအချိန်တွင် အင်းစိန်မြို့နယ်၊ အောင်ဆန်းဈေးနှင့် ရွှေပြည်သာမြို့နယ်၊ ပတ္တမြားဈေးတို့ရှိ ကုန်စုံဆိုင်များသို့ ဈေးစည်ပင်သာယာရေးအဖွဲ့နှင့် ပူးပေါင်း၍ ဈေးကွက်အတွင်း ရောင်းချနေသော အမှတ်တံဆိပ်ပါ စားသုံးဆီများအား ကုန်အညွှန်းအမှတ်အသားပြည့်စုံစွာ ဖော်ပြပါဝင်ခြင်း ရှိ/မရှိ တို့ကို သွားရောက်ကွင်းဆင်းစစ်ဆေးခဲ့ကြပါသည်။

         ထိုသို့ စစ်ဆေးခဲ့ရာ စားသုံးသူများ ဘေးအန္တရာယ်ကင်းရှင်းရေးအတွက် ဌာနမှ ပြဌာန်းချက်များကို စီးပွားရေးလုပ်ငန်းရှင်များ လိုက်နာဆောင်ရွက်ရန်နှင့် ဈေးအတွင်းရှိ ရောင်းချနေသော စားသုံးဆီအမျိုးမျိုးနှင့် စပ်လျဉ်း၍ “စားသုံးသူကာကွယ်ရေးဥပဒေပါ” ကုန်စည်များ၌ ကုန်အညွှန်းအမှတ်အသား ပြည့်စုံစွာ ရှိ/မရှိ စစ်ဆေးခဲ့ကာ ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု(သို့မဟုတ်) တစ်ခုထက်ပို၍ တွဲလျက်ဖြစ်စေ ရေးသားဖော်ပြပါဝင်သော ကုန်စည်များကိုသာ ရောင်းချကြရန်၊ ကုန်အညွှန်းအမှတ်အသား မပါဝင်သော ကုန်စည်များကို ဈေးကွက်အတွင်း မရောင်းချရန်၊ ကုန်စည်နှင့် ဝန်ဆောင်မှုများနှင့်ပတ်သက်၍ စားသုံးသူပြည်သူ များ နစ်နာဆုံးရှုံး မရှိစေရေး ရောင်းချပေးရန်နှင့် စားအုန်းဆီများ ရောင်းချရာတွင် စားသုံးဆီတင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်ကော်မတီ ရန်ကုန်အထိုင် အခြေခံလက်ကားရည်ညွှန်းဈေးအတိုင်း မိမိတို့ မြို့နယ်အတွင်း ဖြန့်ဖြူးရောင်းချပေးနိုင်ရေးတို့ကို ကုန်စုံဆိုင်များနှင့် စီးပွားရေးလုပ်ငန်းရှင်များ ကို အသိပညာပေး ပြောကြားခဲ့ပါသည်။

DOCA(ရန်ကုန်)

      ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မအူပင်ခရိုင်ဦးစီးမှူးရုံးမှ  ဒု-ခရိုင်ဦးစီးမှူး ဦးအောင်ဇော်ဦး(ဦးစီးအရာရှိ)သည် ခရိုင်ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့်ပူးပေါင်း၍ စားသုံးသူကာကွယ်ရေးအသိပညာပေး Talk Show အား (၉-၁၀-၂၀၂၃) ရက်နေ့၊ နံနက်(၁ဝး၀၀)နာရီအချိန်တွင် လူထုအခြေပြုဗဟိုဌာန (Community Centre) ခန်းမတွင် ပြုလုပ်ခဲ့ကြောင်းသိရှိရပါသည်။

     ထိုအသိပညာပေး Talk Show မှတစ်ဆင့် စားသုံးသူများ ကုန်စည်နှင့်ဝန်ဆောင်မှုများဝယ်ယူသုံးစွဲရာတွင် မိမိတို့၏အခွင့်အရေးများကို သိရှိထားရန်လိုအပ်ပါကြောင်း၊ လုပ်ငန်းရှင်များအနေဖြင့် ထုတ်လုပ်ဖြန့်ဖြူးရောင်းချရာတွင် လိုက်နာရမည့်အချက်များ၊ ဌာနက စားသုံးသူဘေးအန္တရာယ်ကင်းရှင်းရေးအတွက် ဈေးကွက်အတွင်း ကွင်းဆင်းစစ်ဆေးဆောင်ရွက်နေခြင်းနှင့် စားသုံးသူအခွင့်အရေးနစ်နာဆုံးရှုံးမှုများရှိခဲ့ပါက တိုင်ကြားနိုင်သည့်နည်းလမ်းများအကြောင်းနှင့်  အွန်လိုင်းစနစ်ဖြင့် ရောင်းချခြင်းလုပ်ငန်းကို အရေးကြီးကုန်စည်နှင့် ဝန်ဆောင်မှုလုပ်ငန်းမှတ်ပုံတင်ခြင်းကိစ္စနှင့်ပတ်သက်၍ မှတ်ပုံတင်ရာတွင် တင်ပြရမည့်အချက်များအကြောင်းကိုရှင်းလင်းပြောကြားခဲ့ပြီး (၁-၁-၂၀၂၄)ရက်နေ့မှစတင်၍ အွန်းလိုင်းမှတ်ပုံတင်ခြင်းမရှိဘဲ ရောင်းချနေသည့်လုပ်ငန်းများကိုစစ်ဆေးတွေ့ရှိပါက အရေးယူခံရမည်ဖြစ်ကြောင်း အသိပညာပေးရှင်းလင်းဆွေးနွေးခဲ့ကြောင်း သတင်းရရှိပါသည်။ 

DOCA(ဧရာဝတီ)

     စားသုံးသူရေးရာဦးစီးဌာန၊ တောင်ငူခရိုင်၊ အုတ်တွင်းမြို့နယ်တာဝန်ခံ ဒေါ်အေးအေးခိုင်သည် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ဒုတိယမြို့နယ်ဦးစီးမှူး ဒေါ်ခင်ခင်မာနှင့်အတူ ၂၀၂၃ခုနှစ်၊ အောက်တိုဘာလ ၆ရက်နေ့၊ နံနက်ပိုင်းတွင် အုတ်တွင်းမြို့နယ်၊ အုန်းပင်ကျေးရွာ၊ အခြေခံပညာမူလတန်းလွန်ကျောင်းသို့သွားရောက်၍ ကျောင်းသား/ ကျောင်းသူများအား စားသုံးသူကာကွယ်ရေးဆိုင်ရာများ အသိပညာပေးဟောပြောခဲ့ပါသည်။

     ဟောပြောပွဲတွင် စားသုံးသူရေးရာဦးစီးဌာန၊ အုတ်တွင်းမြို့နယ်တာဝန်ခံ ဒေါ်အေးအေးခိုင်က စားသုံးသူ၏အခွင့်အရေးနှင့်တာဝန်များ၊ စားသုံးသူနစ်နာဆုံးရှုံးမှုများမဖြစ်ပေါ်စေရေးအတွက် စားသုံးသူရေးရာဦးစီးဌာနက ဆောင်ရွက်လျက်ရှိသည့်အခြေအနေများ၊ ကုန်စည်များဝယ်ယူရာတွင် ကုန်အညွှန်းအမှတ်အသားဖော်ပြထားသော ကုန်စည်များကိုဝယ်ယူသင့်ပုံများနှင့် ကုန်အညွှန်းအမှတ်အသားတွင် ဖော်ပြထားသည့်အတိုင်း လိုက်နာသုံးစွဲသင့်ပုံများကိုဟောပြောခဲ့ပါသည်။

    ဆက်လက်၍ ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ဒုတိယမြို့နယ်ဦးစီးမှူး ဒေါ်ခင်ခင်မာက စာဖတ်ခြင်း၏အကျိုးကျေးဇူးများကိုဟောပြောခဲ့ကြောင်းနှင့် ဟောပြောပွဲသို့ ကျောင်းသား/ ကျောင်းသူ ၁၁၃ဦးတက်ရောက်ခဲ့ကြကြောင်းသိရပါသည်။

DOCA(ပဲခူး)

     ဖျာပုံခရိုင်၊ ဒေးဒရဲမြို့နယ်၊ စားသုံးသူရေးရာဦးစီးဌာန၊ မြို့နယ်တာဝန်ခံ ဦးသိန်းမောင်သည် ၂၀၂၃ခုနှစ်၊ အောက်တိုဘာလ၊ နံနက်(၁၁း၀၀)နာရီအချိန်တွင် ဒေးဒရဲမြို့နယ်၊ အောက်ချောင်းကလေးကျေးရွာ၊ အခြေခံပညာမူလကျောင်းရှိ ကျောင်းသား/ကျောင်းသူ(၆၅)ဦး၊ ဆရာ/ဆရာမ(၄)ဦး၊ စုစုပေါင်း(၆၉)ဦးအား စားသုံးသူကာကွယ်ရေးအသိပညာပေးဟောပြောခဲ့ပါသည်။

   အဆိုပါဟောပြောပွဲတွင် မြို့နယ်တာဝန်ခံ ဦးသိန်းမောင်က  မိမိတို့ဌာန၏ စားသုံးသူများဘေးဥပဒ်အန္တရာယ်ကင်းရှင်းစေရေးအတွက် ဆောင်ရွက်နေမှုအခြေအနေများ၊ ကုန်စည်များတွင်ဖော်ပြရမည့် ကုန်အညွှန်းအမှတ်အသားသိကောင်းစရာများ၊ စားသုံးသူနစ်နာဖြစ်ပေါ်ပါက တိုင်ကြားနိုင်မှုအခြေအနေများနှင့် ကျောင်းသား/ ကျောင်းသူများအနေဖြင့် စားသောက်ကုန်စည်များနှင့်ပတ်သက်ပြီး ရွေးချယ်ဝယ်ယူစားသုံးသင့်သည့်ကုန်စည်များအကြောင်းတို့ကို နားလည်သဘောပေါက်လွယ်အောင် အသိပညာပေးဟောပြောခဲ့ကြောင်း သတင်းရရှိပါသည်။

DOCA(ဧရာဝတီ)