HighLight News

     ချင်းပြည်နယ်အတွင်းရှိ ပြည်သူများ  စားသုံးသူကာကွယ်ရေးဆိုင်ရာအသိပညာများ တိုးပွားလာစေရန်ရည်ရွယ်၍ စားသုံးသူအသိပညာပေးဟောပြောပွဲနှင့် ဉာဏ်စမ်းပဟေဠိပြိုင်ပွဲကို ၂၀၂၃ခုနှစ်၊ မတ်လ၁၄ရက်နေ့၊ နံနက်(၁၀:၀၀)နာရီအချိန်တွင် ချင်းပြည်နယ်အစိုးရအဖွဲ့ရုံးခန်းမ၌ ကျင်းပပြုလုပ်ခဲ့ပါသည်။

   အစည်းအဝေးတွင် စားသုံးသူရေးရာဦးစီးဌာန၊ ချင်းပြည်နယ်ဦးစီးမှူး ဦးလှမိုးနိုင်က အဖွင့်အမှာစကားပြောကြားရာတွင် ယနေ့အခမ်းအနားတွင် တက်ရောက်လာကြသော ကျောင်းအုပ်ဆရာမကြီးနှင့်တကွ ကျောင်းသား/ကျောင်းသူများအားလုံးကို အထူးပင်ကျေးဇူးတင်ရှိပါကြောင်းနှင့် စားသုံးသူအခွင့်အရေးဆိုင်ရာ ဉာဏ်စမ်းပဟေဠိကျင်းပရသည့်ရည်ရွယ်ချက်ကို အကျယ်တဝင့်ရှင်းလင်းဆွေးနွေးခဲ့ပါသည်။ ထို့နောက် ပြည်နယ်ဦးစီးမှူးရုံးမှ ဦးကီးအောင်လိန်း(ဒု-ဦးစီးမှူး)က စားသုံးသူအခွင့်အရေးနှင့်သတ်သက်၍ စားသုံးသူကာကွယ်ရေးဥပဒေပါပြဋ္ဌာန်းချက်များကို ရှင်းလင်းဆွေးနွေးခြင်း၊ ကျောင်းသား/ကျောင်းသူများနှင့် အမြင်ချင်းဖလှယ်ဆွေးနွေးခြင်းပြုလုပ်ခဲ့ပြီးနောက်  ကျောင်းတွင်သင်ကြားသည့် အတန်းပညာများအပြင် စားသုံးသူအခွင့်အရေးဆိုင်ရာ အသိပညာဗဟုသုတများကိုလည်း လေ့လာမှတ်သားစေလိုကြောင်းနှင့် မိမိဘဝဖွံ့ဖြိုးတိုးတက်ရေးအတွက် လက်တွေ့အသုံးချဆောင်ရွက်သွားကြရန် တိုက်တွန်းခဲ့ပါသည်။ အဆိုပါအခမ်းအနားတွင် နောက်ဆုံးအစီအစဉ်အဖြစ် ဉာဏ်စမ်းပဟေဠိပြိုင်ပွဲကို ဆက်လက်ကျင်းပခဲ့ပြီး  ကော်မတီဖွဲ့ဝင်များ၊ ဆရာ/ဆရာမများ၊ ကျောင်းသား /ကျောင်းသူများ စုစုပေါင်း (၄၀)ဦးတက်ရောက်ခဲ့ကြောင်း သိရှိရပါသည်။

DOCA(ချင်း)

     စစ်ကိုင်းတိုင်းဒေသကြီးအတွင်းရှိ ကလေးခရိုင်၊ ကလေးမြို့၊ ပင်လုံရပ်ကွက်အတွင်းရှိ အလှကုန်ဆိုင် ( ၃ ) ဆိုင်အား ၁၃-၃-၂၀၂၃ ရက်နေ့က စားသုံးသူရေးရာဦးစီးဌာန၊ ကလေးခရိုင်ဦးစီးမှူးမှဦးဆောင်၍ ဝန်ထမ်း ( ၃ )ဦးတို့သည် ဈေးကွက်စောင့်ကြည့်စစ်ဆေးခြင်းလုပ်ငန်းများ ဆောင်ရွက်ခဲ့ပါသည်။

     ထိုသို့ဈေးကွက်စောင့်ကြည့်စစ်ဆေးရာတွင် စားသုံးသူပြည်သူများအသုံးပြုနေသည့် အလှကုန်ပစ္စည်းများအား ဘေးအန္တရာယ်ကင်းရှင်းစွာဖြင့် လုံခြုံစိတ်ချမှုရှိသောကုန်စည်များာကိုး အသုံးပြုနိုင်ရန်၊ အစားအသောက်နှင့်ဆေးဝါးကွပ်ကဲရေးဦးစီးဌာနက သုံးစွဲရန်မသင့်ကြေငြာထားသော အလှကုန်ပစ္စည်းများ ရောင်းချခြင်းရှိ/မရှိနှင့် သက်တမ်းလွန်နေသည့်အလှကုန်ပစ္စည်းများ ရောင်းချခြင်း ရှိ/မရှိတို့ကို သွားရောက်စစ်ဆေးရခြင်းဖြစ်ပါသည်။

  ကလေးခရိုင်ဦးစီးမှူးက အလှကုန်ဆိုင်ပိုင်ရှင်များအား မိမိတို့ရောင်းချနေသော အလှကုန်ပစ္စည်းများအား ကုန်အညွှန်းအမှတ်အသားများပြည့်စုံသည့် အလှကုန်များကိုသာရောင်းချရန်နှင့် အစားအသောက်နှင့်ဆေးဝါးကွပ်ကဲရေးဦးစီးဌာနက သုံးစွဲရန်မသင့်ကြေညာထားသော အလှကုန်များအား ရောင်းချခြင်းမပြုရန်ဆွေးနွေးခဲ့ကြောင်း သတင်းရရှိပါသည်။

DOCA(စစ်ကိုင်း)

      ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ လပွတ္တာခရိုင်၊ မော်လမြိုင်ကျွန်းမြို့နယ် မြို့နယ်တာဝန်ခံ ဦးမင်းဇော်လတ်သည် (၉-၃-၂၀၂၃)ရက်နေ့ နေ့လယ်(၁၄:၃၀)နာရီက မော်လမြိုင်ကျွန်းမြို့နယ်၊ မြို့ပေါ်ရှိ စက်သုံးဆီအရောင်းဆိုင်များသို့သွားရောက်၍ သတ်မှတ်ရည်ညွှန်းဈေးဖြင့် ရောင်းချနေခြင်း ရှိ/မရှိ ကွင်းဆင်းစိစစ်ကြပ်မတ်ဆောင်ရွက်ခဲ့ပါသည်။

      ထိုသို့စစ်ဆေးရာတွင်  မြို့နယ်တာဝန်ခံက စက်သုံးဆီတင်သွင်းရောင်းချဖြန့်ဖြူးနေသည့် လုပ်ငန်းရှင်များအား တရားမဝင်သွင်းကုန်များဖြစ်သော စက်သုံးဆီ၊ ချောဆီများအား တရားမဝင်ကုန်သွယ်မှုတိုက်ဖျက်ရေးအထူးအဖွဲ့ဖြင့် စစ်ဆေးဖော်ထုတ်ဆောင်ရွက်နေကြောင်း၊ စက်သုံးဆီ၊ ချောဆီများ သယ်ဆောင်မှုအား စောင့်ကြည့်စစ်ဆေးခြင်းဖြစ်ကြောင်း၊ မြို့နယ်အလိုက် စက်သုံးဆီအရောင်းဆိုင်အရေအတွက်နှင့် လက္ကားဝယ်ယူသည့်ကုမ္ပဏီစာရင်းများကို ကောက်ယူနေသဖြင့် လုပ်ငန်းရှင်များအနေဖြင့် တရားမဝင်စက်သုံးဆီ၊ ချောဆီများတင်သွင်း၊ ဖြန့်ဖြူးရောင်းချနေခြင်းတို့ကို စစ်ဆေးတွေ့ရှိရပါက အရေးယူဆောင်ရွက်သွားမည်ဖြစ်ကြောင်းကို အသိပညာပေးကာ ရေနံနှင့်ရေနံထွက်ပစ္စည်းကြီးကြပ်စစ်ဆေးရေးဦးစီးဌာန (PPRD) က နေ့စဉ်ထုတ်ပြန်ထားသော စက်သုံးဆီရည်ညွှန်းဈေးထက် ပိုမိုရောင်းချခြင်းရှိ/မရှိနှင့် ပြည်သူများအဆင်ပြေစွာဝယ်ယူနိုင်ရေးအတွက် မြို့နယ်အတွင်းရှိ စက်သုံးဆီအရောင်းဆိုင်များ စက်သုံးဆီပြတ်လပ်မှုမရှိစေရေး ပုံမှန်ဖွင့်လှစ်ရောင်းချနိုင်ရေးနှင့် စက်သုံးဆီများကို သတ်မှတ်ဈေးနှုန်းထက် ပိုမိုရောင်းချခြင်းမပြုဘဲ အချိန်အတွယ်မှန်ကန်စွာရောင်းချနိုင်ရေးတို့အတွက် ထုတ်ပြန်ထားသောညွှန်ကြားချက်များအတိုင်း လိုက်နာဆောင်ရွက်ကြခြင်းရှိ/မရှိတို့ကို စက်သုံးဆီလုပ်ငန်းရှင်များထံသို့သွားရောက်၍ ကွင်းဆင်းစစ်ဆေးဆောင်ရွက်ခဲ့ကြောင်း သိရှိရပါသည်။

DOCA(ဧရာဝတီ)

   စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူးရုံးအနေဖြင့် စားသုံးသူကာကွယ်ရေးလုပ်ငန်းများအပြင် ပုဂ္ဂလိကကဏ္ဍဖွံ့ဖြိုးတိုးတက်ရေးလုပ်ငန်းများကို ဆောင်ရွက်လျက်ရှိရာ ရွှေဘိုခရိုင်စားသုံးသူရေးရာဦးစီးဌာနမှ ခရိုင်ဦးစီးမှူး၊ ရွှေဘိုမြို့နယ်တာဝန်ခံနှင့် ဝန်ထမ်း(၁)ဦးတို့သည် (၈-၃-၂၀၂၃)ရက်နေ့တွင် ရွှေဘိုမြို့၊ အမှတ်(၁၀)ရပ်ကွက်ရှိ “ဦးတာနှင့်ညီများ” ဆီစက်လုပ်ငန်းရှင်အား တွေ့ဆုံဆွေးနွေးခဲ့ပါသည်။

     ထိုသို့တွေ့ဆုံဆွေးနွေးရာတွင် ခရိုင်ဦးစီးမှူးမှ စားသုံးသူရေးရာဦးစီးဌာနအနေဖြင့် စားသုံးသူကာကွယ်ရေးလုပ်ငန်းများအပြင် ပြည်တွင်းကုန်သွယ်ရေးဖွံ့ဖြိုးမှုလုပ်ငန်းများကိုလည်း ဆောင်ရွက်လျက်ရှိသဖြင့် ဆီစက်၏ကုန်ကြမ်းရရှိမှုအခြေအနေ၊ ကုန်ချောထုတ်လုပ်မှုအခြေအနေ၊ ရောင်းချသည့် ဈေးနှုန်းနှင့်ဈေးကွက်အခြေအနေ၊ လုပ်သားသုံးစွဲမှုနှင့် စက်လည်ပတ်နိုင်မှုအခြေအနေ၊ တွက်ခြေကိုက်မှုအခြေအနေများကို မေးမြန်းဆွေးနွေးပြီး ဌာနက စားသုံးသူကာကွယ်ရေးလုပ်ငန်းများကို စားသုံးသူကာကွယ်ရေးဥပဒေနှင့် နည်းဥပဒေပါပြဋ္ဌာန်းချက်များနှင့်အညီ ဆောင်ရွက်လျက်ရှိကြောင်း၊ ကုန်စည်ကိုထုတ်လုပ်သည့် စီးပွားရေးလုပ်ငန်းရှင်များအနေဖြင့် မိမိထုတ်လုပ်သည့်ကုန်စည်ပေါ်တွင် စားသုံးသ ကာကွယ်ရေးဥပဒေ ၂၀၁၉၊ အခန်း(၁၈)တွင် ပြဋ္ဌာန်းထားသည့်အတိုင်း ကုန်အညွှန်းအမှတ်အသားများကို ပြည့်စုံစွာထည့်သွင်းဖော်ပြ၍ ထုတ်လုပ်ရောင်းချရမည်ဖြစ်ကြောင်း၊ အကယ်၍ ကုန်အညွှန်းအမှတ်အသားများကို ထုပ်ပိုးပစ္စည်းပေါ်တွင် ဖော်ပြရန်အခက်အခဲရှိပါက ကုန်စည်အမျိုးအစားနှင့်စပ်လျဉ်းသည့် လက်ကမ်းစာစောင်/အညွှန်းတို့ဖြင့်ဖော်ပြပြီး ကုန်စည်နှင့်အတူ စားသုံးသူထံသို့ တစ်ပါတည်းပေးအပ်ရန်လိုအပ်ပါကြောင်း၊ စားသုံးဆီအမျိုးမျိုးတွင် အမျိုးအမည်၊ အရွယ်အစား၊ အရေအတွက်နှင့်အသားတင်ပမာဏ၊ ထားသိုသိမ်းဆည်းမှုအညွှန်းတို့ကို မြန်မာဘာသာဖြင့် ဖော်ပြရမည်ဖြစ်ကြောင်း၊ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ် (၂/၂၀၁၉)ပါ အကြောင်းအရာများ၊ ဟင်းသီးဟင်းရွက်ဆီနှင့်စပ်လျဉ်း၍ ဝန်ကြီးဌာနကထုတ်ပြန်ထားသော ညွှန်ကြားချက်အမှတ် (၁/၂၀၂၁)ပါအကြောင်းများကို ရှင်းလင်းဆွေးနွေးခဲ့ပြီး စားသုံးသူကာကွယ်ရေးအသိပညာပေးလက်ကမ်းစာစောင်များဖြန့်ဝေခဲ့ကြောင်း သတင်းရရှိပါသည်။

DOCA(စစ်ကိုင်း)

    စားသုံးသူရေးရာဦးစီးဌာန၊ မုံရွာခရိုင်ဦးစီးမှူးရုံးမှ ခရိုင်ဦးစီးမှူးသည် တိုင်းဒေသကြီးစက်ပစ္စည်းကြီးကြပ်ရေးနှင့်စစ်ဆေးရေးဦးစီးဌာန၊ တိုင်း‌ဒေသကြီးဆီစက်လုပ်ငန်းရှင်များအသင်းဥက္ကဋ္ဌတို့နှင့်ပူးပေါင်း၍ (၇-၃-၂၀၂၃) ရက်နေ့၊ နံနက်(၁၀)နာရီအချိန်တွင် မုံရွာမြို့၊ စက်မှုဇုံရပ်ကွက်ရှိ တိုင်းဒေသကြီးဆီစက်လုပ်ငန်းရှင်များအသင်းနာယက၊ “ဒို့ဗမာ” ဆီစက်ပိုင်ရှင် ဦးကျော်မျိုးဝင်းနှင့်တွေ့ဆုံ၍ ဆီစက်များလည်ပတ်ကြိတ်ခွဲမှုအခြေအနေများကို ဈေးကွက်စောင့်ကြည့်စစ်ဆေးခြင်းနှင့် လုပ်ငန်းရှင်တွေ့ဆုံဆွေးနွေးခြင်းများ ဆောင်ရွက်ခဲ့ကြပါသည်။

    ထိုသို့ တွေ့ဆုံဆွေးနွေးရာတွင် ဆီစက်ပိုင်ရှင် ဦးကျော်မျိုးဝင်းက မိမိတို့ဆီစက်များအ‌နေဖြင့် နိုင်ငံတော်ကချမှတ်ထားသောမူဝါဒများနှင့်အညီ ပြည်ပသွင်းကုန်များအစားထိုးမှုကို လျှော့ချ၍ ပြည်တွင်းဆီစက်များပုံမှန်လည်ပတ်နိုင်ရေးညွှန်ကြားချက်များနှင့်အညီ  ဆီကြိတ်ခွဲမှုများမှာ ပုံမှန်လည်ပတ်လျက်ရှိပြီး မိမိတို့ “ဒို့ဗမာ” ဆီစက်မှာ ၂၄ နာရီလည်ပတ်နိုင်ကြောင်း၊ ကုန်ကြမ်းဖြစ်သောမြေပဲနှင့် နှမ်းတို့ကို ကလေး၊ မော်လိုက်၊ ဖောင်းပြင်၊ ဘုတလင်မြို့နယ်များမှ ဝယ်ယူရရှိ၍ ထွက်ရှိသောဆီကုန်ချောများကို ဒေသတွင်းစားသုံးကြပြီး မန္တလေး၊ ရန်ကုန်နှင့် City Mark များသို့လည်း တင်ပို့ရောင်းချရပါကြောင်း၊ စက်များကို ပြန်လည်မွမ်းမံပြီး လိုအပ်သောပစ္စည်းများဝယ်ယူရန်အတွက်လည်း နိုင်ငံတော်သို့ ချေးငွေများလျှောက်ထားပါကြောင်းသိရှိခဲ့ကာ ဆီစက်လုပ်ငန်းရှင်များကြုံတွေ့နေရသောအခက်အခဲများကို ဆွေးနွေးပြောကြားခဲ့ပြီး ဆီစက်ကဏ္ဍဖွံ့ဖြိုးတိုးတက်ရေးအတွက် ပံ့ပိုးကူညီပေးရမည့်အချက်များအား မေးမြန်းဆွေးနွေးခဲ့ကြပါသည်။

   ဆက်လက်၍ စားသုံးသူရေးရာဦးစီးဌာန၊ ခရိုင်ဦးစီးမှူးက စားသုံးသူကာကွယ်ရေးဥပဒေပါ စားသုံးသူအခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏တာဝန်များ၊ ကုန်အညွှန်းအမှတ်အသားဖော်ပြခြင်း၊ ပြစ်မှုပြစ်ဒဏ်များ၊ စားသုံးသူကာကွယ်ရေးဥပဒေ အခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့်ပတ်သက်၍ ပုဒ်မ ၄၁။ (ခ) နှင့် (ဆ) တို့တွင်ဖော်ပြထားသည့် ကုန်စည်၏အမျိုးအမည်၊ အရွယ်အစား၊ အရေအတွက်နှင့်အသားတင်ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်း၊ ကျန်းမာ‌ရေးဆိုင်ရာဘေးထွက်ဆိုးကျိုး သို့မဟုတ် ဓာတ်မတည့်ကြောင်းဖော်ပြချက်နှင့် ကြိုတင်သတိပေးချက်တို့ကို မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု သို့မဟုတ် တစ်ခုထက်ပို၍ တွဲလျက်ဖြစ်စေ ရေးသားဖော်ပြရမည်ဖြစ်ကြောင်း အသိပညာပေးဆွေးနွေးခဲ့သည်ဟု သိရှိရပါသည်။

DOCA(စစ်ကိုင်း)