HighLight News

    စားသုံးသူရေးရာဦးစီးဌာန၊ မန္တလေးတိုင်းဒေသကြီးဦးစီးမှူးရုံးမှ (၁၄-၇-၂၀၂၃) ရက်နေ့၊ နံနက် (၁၀:၀၀) နာရီအချိန်တွင် “ထွဋ်ခေါင်မြန်မာ” ကိုယ်ပိုင်အထက်တန်းကျောင်း၌ စားသုံးသူကာကွယ်ရေးအသိပညာပေးဟောပြောဆွေးနွေးပွဲအခမ်းအနားကို ကျင်းပပြုလုပ်ခဲ့ပါသည်။

    စားသုံးသူရေးရာဦးစီးဌာန၊ မန္တလေးတိုင်းဒေသကြီးဦးစီးမှူးရုံးမှ ဒုတိယတိုင်းဒေသကြီးဦးစီးမှူး ဦးရဲမျိုးလွင်က အဖွင့်အမှာစကားပြောကြားခဲ့ပြီးနောက် ဦးစီးမှူး ဦးတင်ချစ်ကောင်းက စားသုံးသူကာကွယ်ရေးအသိပေးဟောပြောဆွေးနွေးရာတွင် စားသုံးသူ၏အဓိပ္ပါယ်ဖော်ပြချက်နှင့် စားသုံးသူအခွင့်အရေး (၈) ချက်တို့ကို ကျောင်းသား/ကျောင်းသူများနားလည်သဘောပေါက်စေမည့် ဥပမာများဖြင့် ရှင်းလင်းဟောပြောခဲ့ပါကြောင်း၊ စားသုံးသူများအနေဖြင့် အခွင့်အရေး (၈) ချက်ရှိသကဲ့သို့ တာဝန် (၄) ချက်လည်းရှိပါကြောင်း၊ တာဝန်များကိုလည်းလိုက်နာရမည်ဖြစ်ပါကြောင်း၊ ကျောင်းသား/ကျောင်းသူများအား အသုံးအဆောင်ပစ္စည်းများနှင့် အစားအသောက်များဝယ်ယူရာတွင် ကုန်အညွှန်းအမှတ်အသားနှင့်ပတ်သက်ပြီး ထုတ်လုပ်သည့်ရက်စွဲ၊ သက်တမ်းကုန်ဆုံးသည့်ရက်စွဲ၊ ပါဝင်ပစ္စည်းများ၊ သုံးစွဲပုံနည်းလမ်းများကို အဓိကထားကြည့်ရှု၍ ဝယ်ယူသင့်ပါကြောင်း၊ ဟောပြောဆွေးနွေးခဲ့သည့်အကြောင်းအရာများကို မိဘ၊ ညီအစ်ကိုမောင်နှမများကိုလည်း ပြန်လည်မျှဝေပေးစေချင်ပါကြောင်း ပြောကြားခဲ့ပြီး  တက်ရောက်လာကြသည့် ဆရာ/ဆရာမများ၊ ကျောင်းသား/‌ကျောင်းသူများအား အသိပညာပေးလက်ကမ်းစာစောင်များဖြန့်ဝေပေးခဲ့ပါသည်။

      ဆက်လက်၍ “ထွဋ်ခေါင်မြန်မာ” ကိုယ်ပိုင်အထက်တန်းကျောင်းတည်ထောင်သူ ဦးဒီးကားက ယခုကဲ့သို့ လာရောက်ဟောပြောပေးခဲ့ခြင်းမှတစ်ဆင့် ကျောင်းသား/ကျောင်းသူများအနေဖြင့် အသိပညာဗဟုသုတများစွာရရှိမည်လို့လည်းမျှော်လင့်ပါကြောင်း၊ လာရောက်ဟောပြောပေးသည့် တာဝန်ရှိသူများကိုလည်း အထူးကျေးဇူးတင်ရှိပါကြောင်း ပြောကြားခဲ့ပြီးနောက် ဒုတိယတိုင်းဒေသကြီးဦးစီးမှူးနှင့် တာဝန်ရှိသူများသည် ကျောင်းမုန့်ဈေးတန်းသို့သွားရောက်၍ ကွင်းဆင်းစစ်ဆေးခဲ့ကြောင်းသိရှိရပါသည်။

DOCA(မန္တလေး)

    ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ တိုင်းဦးစီးမှူးရုံး၌ တိုင်းဒေသကြီးဦးစီးမှူး ဦးစိုးအောင်နှင့် ဒု-တိုင်းဦးစီးမှူး ဦးစိုးဦးတို့သည် ၂၀၂၃ခုနှစ်၊ ဇူလိုင်လ ၇ရက်နေ့၊ နံနက်ပိုင်းအချိန်တွင် ပုသိမ်မြို့၊ စက်မှုဇုန်ဥက္ကဋ္ဌ ဦးလေးကို၊ ဧရာဝတီတိုင်းဒေသကြီး၊း စီမံကိန်းကော်မရှင်တို့နှင့်တွေ့ဆုံခဲ့ပါသည်၊၊

    ထိုသို့တွေ့ဆုံခဲ့ရာတွင် ဧရာဝတီတိုင်းဒေသကြီးအတွင်း စက်မှုဇုန်များရှိ MSME လုပ်ငန်းများဖွံ့ဖြိုးတိုးတက်ရေး အရည်အသွေးမြင့်ထုတ်ကုန်များကိုထုတ်လုပ်ပြီး ပြည်တွင်းဈေးကွက်သာမက ပြည်ပသို့ပါတင်ပို့နိုင်ခြင်းဖြင့် ဒေသတွင်းစီးပွားရေးကောင်းမွန်လာကာ အလုပ်အကိုင်အခွင့်အလမ်းများလည်းရရှိမည်ဖြစ်ကြောင်း၊ နိုင်ငံ့စီးပွားတိုးတက်ရေးအတွက် ခေတ်နှင့်အညီပြောင်းလဲလာသောနည်းဥပဒေများနှင့် လိုက်လျောညီထွေစွာဆောင်ရွက်ပြီး (MSMEs) အငယ်စား၊ အသေးစားနှင့် အလတ်စားစီးပွားရေးလုပ်ငန်းများပိုမိုဖွံ့ဖြိုးတိုးတက်လာရန် အရင်းအနှီးနှင့် လိုအပ်ချက်များကိုလည်း ဒေသအာဏာပိုင်နှင့် သက်ဆိုင်ရာဌာနများက ကူညီဆောင်ရွက်ပေးသွားမည်ဖြစ်ကြောင်း ဆွေးနွေးပြောကြားခဲ့ပါသည်၊၊

DOCA(ဧရာဝတီ)

    စားသုံးသူရေးရာဦးစီးဌာန၊ ကြံခင်းမြို့၊ မြို့နယ်တာဝန်ခံသည် မိတ်ဖက်ဌာနဆိုင်ရာများနှင့်ပူးပေါင်း၍  ကြံခင်းမြို့၊ ရွာသစ်ရပ်ကွက်ရှိ စတိုးဆိုင်များအား (၆-၇-၂၀၂၃) ရက်နေ့၊ နေ့လယ် (၁၅:၀၀) နာရီအချိန်တွင် ဈေးကွက်စောင့်ကြည့်စစ်ဆေးခဲ့ပါသည်။

    ထိုသို့ကွင်းဆင်းစစ်ဆေးခဲ့ရာတွင် စားသုံးသူမိဘပြည်သူများဘေးအန္တရာယ်ကင်းရှင်းစေရန်အတွက် ဈေးကွက်အတွင်းရောင်းချနေသောကုန်စည်များပေါ်တွင် ကုန်စည်အမျိုးအစားကိုလိုက်၍ ကုန်အညွှန်းအမှတ်အသားများပြည့်စုံမှန်ကန်စွာဖော်ပြခြင်းရှိ/မရှိတို့ကိုစစ်ဆေးခဲ့ပြီးနောက် မြန်မာနိုင်ငံစားသုံးသူကာကွယ်ရေးကော်မရှင်ကထုတ်ပြန်ကြေညာထားသော ညွှန်ကြားချက်အမှတ် (၂/၂၀၁၉) နှင့်အညီ မြန်မာဘာသာဖြင့်ပြည်စုံစွာဖော်ပြထားသော ကုန်စည်များကိုသာရောင်းချရန်နှင့် စီးပွားရေးလုပ်ငန်းရှင်များအနေဖြင့် ထုတ်ပြန်ထားသောညွှန်ကြားချက်များအတိုင်း လိုက်နာဆောင်ရွက်ရန်၊  ကုန်စည်နှင့်စပ်လျဉ်း၍ အာမခံချက်ပေးရာတွင် စားသုံးသူများစိတ်ကျေနပ်မှုရှိစေရေးအတွက် သတ်မှတ်အရည်အသွေးပြည့်မီသောကုန်စည်များကိုသာရောင်းချရန်၊ စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏တာဝန်များအကြောင်း၊ တားမြစ်ချက်များအကြောင်းနှင့် ပြစ်မှုပြစ်ဒဏ်များအကြောင်း စသည်တို့ကိုသိရှိလိုက်နာကြရန် အသိပညာပေးဆွေးနွေးခဲ့ပြီး မုန်မျိုးစုံဆိုင် (၃) ဆိုင်အား ဈေးကွက်စောင့်ကြည့်စစ်ဆေးခြင်းများဆောင်ရွက်ခဲ့ကြောင်း သိရှိရပါသည်။

DOCA(ဧရာဝတီ)

    (၁၁-၇-၂၀၂၃) ရက်နေ့၊ နံနက် (၁၁:၃၀) နာရီအချိန်မှ နေ့လယ် (၁၅:၃၀) နာရီအချိန်အထိ ရန်ကုန်တိုင်းဒေသကြီးဦးစီးမှူး၏လမ်းညွှန်မှုဖြင့် စားသုံးသူရေးရာဦးစီးဌာန၊ ရန်ကုန်အရှေ့ပိုင်းခရိုင်ဦးစီးမှူးရုံးမှ ဝန်ထမ်းများသည် သက်ဆိုင်ရာဈေးတာဝန်ခံများနှင့်အတူ ဈေးကွက်အတွင်းရောင်းချနေ‌သော စားသုံးဆီအမျိုးမျိုးတွင် စားသုံးသူကာကွယ်ရေးဥပဒေ ၂၀၁၉ပါ ကုန်အညွှန်းအမှတ်အသားများဖော်ပြထားခြင်းပြဋ္ဌာန်းချက်များနှင့်အညီ ကိုက်ညီမှုရှိ/မရှိနှင့် ဈေးကွက်အတွင်း ကွင်းဆင်းစစ်ဆေးခြင်းများဆောင်ရွက်ခဲ့ပါသည်။

   ထိုသို့ ကွင်းဆင်းစစ်ဆေးဆောင်ရွက်ခြင်းများကို အရှေ့ပိုင်းခရိုင်ဦးစီးမှူးရုံးမှ စစ်ဆေးရေးမှူး ဒေါ်အေးအေးမော်(ဒု-ကြီးကြပ်ရေးမှူး)နှင့်အတူ တာဝန်ရှိဝန်ထမ်းများက တောင်ဥက္ကလာပမြို့နယ်၊ နန္ဒဝန်ဈေးနှင့် ရန်ကင်းမြို့နယ်(စံပြဈေး)အတွင်းရှိ စားသုံးဆီ(အမှတ်တံဆိပ်မျိုးစုံ)ကိုစစ်ဆေးခဲ့ရာ စားသုံးသူကာကွယ်ရေးဥပဒေပါအခန်း (၁၈)၊ ပုဒ်မ (41)၊ ပုဒ်မခွဲ (ခ)နှင့် (ဆ)တို့ပါ ပြဋ္ဌာန်းချက်များနှင့်ကိုက်ညီမှုရှိကြောင်း စစ်ဆေးတွေ့ရှိရပါသည်။

DOCA(ရန်ကုန်)

   (၅-၇-၂၀၂၃) ရက်နေ့တွင် စားသုံးသူရေးရာဦးစီးဌာန၊ ရန်ကုန်အရှေ့ပိုင်းခရိုင်ဦးစီးမှူးရုံးမှ ဝန်ထမ်းများသည် သက်ဆိုင်ရာဈေးတာဝန်ခံများနှင့်အတူ ဈေးကွက်အတွင်းရောင်းချနေ‌သော Sprite အချိုရည်များသည် အစားအသောက်နှင့်ဆေးဝါးကွပ်ကဲရေးဦးစီးဌာန၏ ထောက်ခံချက်နှင့် စားသုံးသူကာကွယ်ရေးဥပဒေ ၂၀၁၉ပါ ကုန်အညွှန်းအမှတ်အသားများဖော်ပြထားခြင်းရှိ/မရှိနှင့် (CCOBM) ကုမ္ပဏီမှထုတ်လုပ်သော ကုန်အမှတ်တံဆိပ်နှင့်ပုံစုံတူ Sprite အချိုရည်များရောင်းချခြင်းရှိ/မရှိတို့ကို ဈေးကွက်အတွင်း ကွင်းဆင်းစစ်ဆေးခြင်းများဆောင်ရွက်ခဲ့ကြောင်းသိရှိရပါသည်။

   ထိုသို့ ကွင်းဆင်းစစ်ဆေးဆောင်ရွက်ခြင်းများကို ဦးနေလင်း (ဒု-ကြီးကြပ်ရေးမှူး) နှင့် ဝန်ထမ်းများက ဗိုလ်တထောင်မြို့နယ်၊ ဘိုကလေးဈေးတွင်လည်းကောင်း၊ ဒေါ်အေးအေးမော် (ဒု-ကြီးကြပ်ရေးမှူး) နှင့် ဝန်ထမ်းများက တောင်ဥက္ကလာပမြို့နယ်၊ နန္ဒဝန်ဈေးတွင်လည်းကောင်း၊ ဒေါ်မိုးမိုးကြည် (ဌာနခွဲစာရေး) နှင့် ဝန်ထမ်းများသည် ပုဇွန်တောင်မြို့နယ်၊ ပုဇွန်တောင်ဈေးတွင်လည်းကောင်း၊ Sprite  အချိုရည်ဘူးများကိုစစ်ဆေးခဲ့ရာတွင် တရားမဝင်ရောင်းချနေခြင်းမရှိကြောင်းနှင့် ဆိုင်ခန်း (၁၃) ဆိုင်ကိုစစ်ဆေးခဲ့ကြောင်း သိရှိရပါသည်။

DOCA(ရန်ကုန်)