သတင်းနှင့် လှုပ်ရှားမှုများ

    ဧရာဝတီတိုင်းဒေသကြီးအတွင်း လယ်ယာကဏ္ဍ ပိုမိုဖွံ့ဖြိုးတိုးတက်ရေးအတွက် နိုင်ငံစီးပွားမြှင့်တင်‌ရေး ၊ အရင်းမပျောက် မတည်ရန်ပုံငွေ (၈၆) ဘီလီယံဖြင့် ၂၀၂၃-၂၀၂၄ ခုနှစ် မိုးစပါးရာသီတွင် သွင်းအားစုများ ဖြန့်ဖြူးရေးအတွက် စီမံကိန်းလုပ်ငန်းများ အောင်မြင်စွာ အကောင်အထည်ဖော် ဆောင်ရွက်နိုင်ရန် ဧရာဝတီတိုင်းဒေသကြီးအစိုးရအဖွဲ့ လုံခြုံရေးနှင့် နယ်စပ်ရေးရာဝန်ကြီးမှ ဦးဆောင်၍ အဖွဲ့ဝင်  တိုင်းအဆင့်ဌာနဆိုင်ရာ (၉) ဦးနှင့် ဖွဲ့စည်း ဆောင်ရွက်လျက်ရှိရာ ၂၀၂၃ ခုနှစ်၊ မိုးစပါးစီမံကိန်းဆောင်ရွက်ရာတွင် လုပ်ငန်းစီမံချက်အရ ဝယ်ယူကြိတ်ခွဲတင်ပို့သူများ သွင်းအားစုကုမ္ပဏီများ တောင်သူများပါဝင်သော စာချုပ် (၁) ခု၊ တိုင်းအဆင့် ကော်မတီနှင့် ဝယ်ယူကြိတ်ခွဲအဖွဲ့ (၁) ခု ၊ စုစုပေါင်းစာချုပ် (၂) ဆင့် ချုပ်ဆို၍ (၅၀%) အာမခံပစ္စည်းပါရှိရမည်ဖြစ်ကြောင်း ခရိုင်/မြို့နယ် လုပ်ငန်းကော်မတီများအနေဖြင့် စာချုပ်စတင် ချုပ်ဆိုသည့် အချိန်မှစ၍ သွင်းအားစု ရယူသည့်အထိ တောင်သူ (၁) ဦးချင်း မှတ်တမ်းထားရှိရန်နှင့် တိုင်းအဆင့်ကော်မတီမှ ဝယ်ယူကြိတ်ခွဲတင်ပို့သူများနှင့် စာချုပ်ချုပ်ဆိုရာတွင် ၎င်းတောင်သူ စာရင်းများ တင်ပြရမည်ဖြစ်ပြီး လုပ်ငန်းစဉ်ပါအတိုင်း ပါရှိရမည့် အာမခံပစ္စည်းများအား စစ်ဆေးပြီး အာမခံပေးရန်နှင့် မြို့နယ်/ခရိုင်များမှ စစ်ဆေးအတည်ပြုထားသည့် ဝယ်ယူကြိတ်ခွဲ အဖွဲ့များကိုသာ တိုင်းအဆင့်ကော်မတီမှ အတည်ပြုပေးသွားမည်ဖြစ်ကြောင်း တွေ့ရသည်။

   ဧရာဝတီတိုင်းဒေသကြီးအစိုးရအဖွဲ့ရုံး အစည်းအဝေးခန်းမတွင် ဩဂုတ်လ (၁၆) ရက်နေ့ ၊ မိုးစပါးဆောင်ရွက်လျက်ရှိသော ခရိုင်/မြို့နယ်ကော်မတီဝင်များအား တိုင်းဒေသကြီးအဆင့် လုပ်ငန်းကြီးကြပ်ရေးကော်မတီမှ ပထမအကြိမ်လုပ်ငန်းစီမံချက် (SOP) ပါအတိုင်း ဆောင်ရွက် ထားရှိမှုများကို စစ်ဆေးခဲ့ရာ စားသုံးသူ‌ရေးရာဦးစီးဌာနမှ ဒုတိုင်းဦးစီးမှူးတက်ရောက်ခဲ့ပါသည်။

DOCA(ဧရာဝတီ)

     ဧရာဝတီတိုင်းဒေသကြီး စားသုံးသူရေးရာဦးစီးဌာန ၊ စားသုံးသူရေးရာကော်မတီသို့ ပုသိမ်မြို့ပေါ်ရှိ Ocean Supercenter တာဝန်ခံနှင့် ဝန်ထမ်း (၁) ဦး ၊ ဩဂုတ်လ (၁၇) ရက်နေ့ ၊ နေ့လယ်(၁၃:၀၀) နာရီတွင် လာရောက်တွေ့ဆုံခဲ့ပါသည်။

     ဧရာဝတီတိုင်းဒေသကြီး စားသုံးသူရေးရာဦးစီးဌာန ၊ ဒုတိုင်းဦးစီးမှူး ဦးဆောင်သော စစ်ဆေးရေးအဖွဲ့သည့် ဇူလိုင်လ (၁၄) ရက်နေ့ ၊ ပုသိမ်မြို့ ၊ ကမ်းနားလမ်း Ocean Supercenter တွင် ဈေးကွက်စောင့်ကြည့်ကွင်းဆင်း စစ်ဆေးခြင်း ဆောင်ရွက်ခဲ့ရာ ကုန်ညွှန်းအမှတ်အသား ပြည့်စုံမှုမရှိသည့်အပြင် သက်ဆိုင်ရာ ထောက်ခံချက် FDA ထောက်ခံချက် မပါရှိသည့် စားသုံးဆီ (၇) မျိုးတွေ့ရှိခဲ့ရာ စီးပွားရေးရာဝန်ကြီး ဥက္ကဋ္ဌအဖြစ် ဖွဲ့စည်းထားသော ဧရာဝတီတိုင်းဒေသကြီး စားသုံးသူရေးရာကော်မတီသို့ လာရောက်ရာတွင် စားသုံးသူရေးရာဦးစီးဌာန၊ ဒုတိုင်းဦးစီးမှူး ဦးစိုးဦး ၊ စားသုံးသူရေးရာဦးစီးဌာနခွဲ တာဝန်ခံ ဦးကျော်စိုးရီနှင့် ထုတ်ကုန်လုံခြုံ စိတ်ချရမှုဌာနခွဲ တာဝန်ခံ ဒေါ်ဖြူဖြူလတ် ၊ ပုသိမ်ခရိုင် ဦးစီးမှူး ဦးတင်စိုးလှိုင်တို့နှင့် တွေ့ဆုံခဲ့ပါသည်။

     ဒုတိုင်းဦးစီးမှူး ဦးစိုးဦးက အဆိုပါ ကိစ္စနှင့်စပ်လျဉ်း၍ စားသုံးသူကာကွယ်ရေးဥပဒေ ၊ နည်းဥပဒေ ၊ အမိန့် ၊ ညွှန်ကြားချက်များနှင့် ကိုက်ညီမှုမရှိသော စားသုံးဆီများ နောင်တွင် ရောင်းချခြင်းမပြုရန် စားသုံးသူအကာအကွယ်ပေးရေး ဥပဒေများကို ရှင်းလင်း၍ စားသုံးသူရေးရာ ဌာနခွဲတာဝန်ခံ ၊ ထုတ်ကုန်လုံခြုံစိတ်ချရမှု တာဝန်ခံနှင့် ပုသိမ်ခရိုင်ဦးစီးမှူးတို့မှလည်း လုပ်ငန်းရှင်များ လိုက်နာရမည့် တာဝန်များနှင့်ပတ်သက်၍ အသိပညာပေး ဆွေးနွေးခဲ့ပါသည်။

DOCA(ဧရာဝတီ)

   တနင်္သာရီတိုင်းဒေသကြီး၊ မြိတ်ခရိုင်စားသုံးသူရေးရာဦးစီးဌာနမှ တာဝန်ရှိသူများသည် ခရိုင်အစားအသောက်နှင့်ဆေးဝါးကွပ်ကဲ‌ရေးဦးစီးဌာနတို့နှင့်ပူးပေါင်း၍ ၂၀၂၃ခုနှစ်၊ သြဂုတ်လ(၁၈) ရက်နေ့တွင် အောင်ဇမ္ဗူဘုန်းတော်ကြီးသင်ပညာရေးကျောင်းရှိ ကျောင်းသား/ကျောင်းသူများအား ဘေးအန္တရာယ်ကင်းရှင်းသော စားသောက်ကုန်များဝယ်ယူစားသုံး‌နိုင်ရေးရည်ရွယ်၍ စားသုံးသူကာကွယ်ရေးဆိုင်ရာသိကောင်းစရာများဟောပြောခဲ့ပါသည်။

      အဆိုပါ ဟောပြောပွဲတွင် စားသုံးသူများအတွက် အခွင့်အရေးနှင့်တာဝန်များ၊ ကုန်စည်များတွင် မြန်မာဘာသာဖြင့် ကုန်အညွှန်းအမှတ်အသားဆိုင်ရာဖော်ပြချက်များအကြောင်းနှင့် ဖော်ပြရမည့်အချက်အလက်များ၊ ဘေးအန္တရာယ်ဖြစ်စေနိုင်၍  အန္တရာယ်ရှိသောဆိုးဆေးများ၊  တားမြစ်ထားသောစားသောက်ကုန်များ၊ နစ်နာမှုများကြုံတွေ့ရပါက တိုင်ကြားနိုင်မည့်နေရာများနှင့် ဖြေရှင်းချက်များ၊ အစားအသောက်များကို ချက်ပြုတ်မစားသောက်မီ သတိပြုဆင်ခြင်ရမည့်အချက်များအပြင် အစားအသောက်ခွင့်ပြုထောက်ခံချက်များအကြောင်းတို့ကိုဆွေးနွေးပြောကြားခဲ့ပါသည်။ ဟောပြောပွဲသို့ ဆရာ/ မ၊ ကျောင်းသား/သူစုစုပေါင်း (၁၅၀)ဦးတက်ရောက်ခဲ့ကြောင်းသိရှိရပါသည်။

DOCA(တနင်္သာရီ)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏လမ်းညွှန်မှုနှင့် ပခုက္ကူခရိုင်ဦးစီးမှူး၏ကြီးကြပ်မှုတို့ဖြင့် စားသုံးသူအခွင့်အရေးနှင့် အကျိုးစီးပွားကိုကာကွယ်ရန်အတွက် (၁၄-၈-၂၀၂၃)ရက်နေ့တွင် အလယ်ပိုင်းရပ်ကွက်၊ အခြေခံပညာမူလတန်းကျောင်း၌ ဆရာ/ဆရာမ(၁၄)ဦး၊ ကျောင်းသား/ ကျောင်းသူ (၁၉၀)ဦး၊ စုစုပေါင်း(၂၀၄)ဦးနှင့် (၁၅-၈-၂၀၂၃)ရက်နေ့တွင် ယောဝရပ်ကွက်ရှိ အခြေခံပညာ မူလတန်းကျောင်း၌ ဆရာ/ဆရာမ(၉)ဦး၊ ကျောင်းသား/ ကျောင်းသူ(၁၇၁)ဦး၊ စုစုပေါင်း(၁၈၀)ဦးတို့အား နံနက်(၁၀:၀၀)နာရီအချိန်တွင် ဆိပ်ဖြူမြို့နယ်တာဝန်ခံ ဒု-ဦးစီးမှူး ဒေါ်မြင့်မြင့်သန်းနှင့် ဒေါ်တင်မာရီတို့သည် မိတ်ဖက်ဌာနဖြစ်သော သဘာဝပတ်ဝန်းကျင်ထိန်းသိမ်းရေးဦးစီးဌာနနှင့်ပူးပေါင်း၍ စားသုံးသူကာကွယ်ရေးဆိုင်ရာအသိပညာပေးဟောပြောပွဲပြုလုပ်ခဲ့ပါသည်။

 ဟောပြောပွဲတွင် ကျောင်းအုပ်ဆရာမကြီးက ကြိုဆိုနှုတ်ခွန်းဆက်အဖွင့်အမှာစကားပြောကြားခဲ့ပြီးနောက် ဒု-ဦးစီးမှူး ဒေါ်မြင့်မြင့်သန်းက ဌာန၏သမိုင်းကြောင်း၊ မျှော်မှန်းချက်၊ ရည်မှန်းချက်များ၊ ဌာနမှဆောင်ရွက်နေသည့်လုပ်ငန်းများအကြောင်းတို့ကိုရှင်းလင်းခဲ့ပါသည်။

   ဒု-ဦးစီးမှူး ဒေါ်တင်မာရီက  စားသုံးသူကာကွယ်ရေးဥပဒေ ၂၀၁၉ အခန်း(၉)ပါ စားသုံးသူများရရှိနိုင်မည့်အခွင့်အရေးများနှင့် လိုက်နာရမည့်တာဝန်များ၊ စားသုံးသူအခွင့်အရေးဦးစားပေးရန်မှာ အလွန်အရေးကြီးသောကြောင့် ယခုလိုအသိပညာပေးရခြင်းဖြစ်ကြောင်း၊ အခြေခံလိုအပ်ချက်များအပေါ် စိတ်ကျေနပ်မှုရရှိခွင့်မှာ အရေးကြီးကြောင်း၊ ကုန်စည်နှင့်ဝန်ဆောင်မှုများကိုဝယ်ယူအသုံးပြုရာတွင် သတင်းအချက်အလက်မှန်ကန်ပြည့်စုံစွာရရှိရန်လိုအပ်ကြောင်း၊ စိတ်ကြိုက်ရွေးချယ်ဝယ်ယူခွင့်ရှိကြောင်း၊ စားသုံးသူများအတွက် ကုန်စည်သုံးစွဲရာတွင်ဖြစ်စေ၊ ဝန်ဆောင်မှုရယူရာတွင်ဖြစ်စေ၊ ဘေးအန္တရာယ်ကင်းရှင်းမှုမှာ အလွန်အရေးကြီးသောကြောင့် စားသုံးသူကာကွယ်ရေးဥပဒေပါ ကုန်အညွှန်းအမှတ်အသားဖော်ပြချက်များနှင့်ကိုက်ညီသည့် ကုန်စည်များအား စိစစ်ရွေးချယ်ဝယ်ယူစေလိုကြောင်း အသေးစိတ်ရှင်းလင်းဆွေးနွေးခဲ့ပါသည်။

    ဆက်လက်၍ မြို့နယ်သဘာဝပတ်ဝန်းကျင်ထိန်းသိမ်းရေးဦးစီးဌာနမှ ဦးစီးအရာရှိကလည်း ပလတ်စတစ်အန္တရာယ်နှင့် သဘာဝဘေးအန္တရာယ်အကြောင်းများကို အသေးစိတ်ရှင်းလင်းဆွေးနွေးပြီး နိဂုံးချုပ်အနေဖြင့် စားသုံးသူရေးရာဦးစီးဌာနမှ ဒု-ဦးစီးမှူး ဒေါ်မြင့်မြင့်သန်းက စားသုံးသူကာကွယ်ရေးဥပဒေ အခန်း (၁၈)ပါ ကုန်စည်များတွင် ဖော်ပြရမည့်ကုန်အညွှန်းအမှတ်အသားများကို နမူနာပစ္စည်းများပြသ၍ ကျယ်ကျယ်ပြန့်ပြန့်ရှင်းလင်းပြီး ယခုကဲ့သို့ ကုန်အညွှန်းအမှတ်အသားများပြည့်စုံစွာမပါလျှင် ဝယ်ယူစားသောက်ရောင်းချခြင်းမပြုစေချင်ကြောင်း၊ ကုန်အညွှန်းအမှတ်အသားပြည့်စုံမှသာလျှင် ဝယ်ယူသုံးစွဲစေလိုကြောင်း ရှင်းလင်းဆွေးနွေးခဲ့ပြီး ကုန်စည်နှင့်ဝန်ဆောင်မှုကိုဝယ်ယူသုံးစွဲရာတွင် နစ်နာဆုံးရှုံးမှုများဖြစ်ပေါ်လာပါက ပြောရေးဆိုခွင့်၊ တိုင်ကြားနိုင်ခွင့်၊ ပြန်လည်ကုစားနိုင်ခွင့်များနှင့် CICC ရုံးများဖွင့်လှစ်ထားရှိပြီးဖြစ်၍ နစ်နာသည့်စားသုံးသူများကတိုင်ကြားနိုင်ကြောင်း၊ DOCAWebsite၊  Facebook စာမျက်နှာ၊ DOCA Myanmar Mobile Application    နှင့်  Consumer Call Center No. (1535) တို့တွင် တိုင်ကြားနိုင်ကြောင်းတို့ကို အသေးစိတ်ရှင်းလင်းဆွေးနွေးပြီး တက်ရောက်လာသောကျောင်းသား/ ကျောင်းသူများအား စားသုံးသူကာကွယ်ရေးဥပဒေပါ အခွင့်အရေး(၈)ချက်ကိုမေးမြန်းပြီး ဖြေဆိုနိုင်သောကျောင်းသား/ကျောင်းသူများအား ဆုလက်ဆောင်များချီးမြှင့်ပြီး  စားသုံးသူကာကွယ်ရေးဆိုင်ရာ အသိပညာပေးလက်ကမ်းစာစောင်များဖြန့်ဝေပေးခဲ့ကြောင်းသိရှိရပါသည်။

DOCA(မကွေး)

     စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူးနှင့် မင်းဘူးခရိုင်ဦးစီးမှူးတို့၏ လမ်းညွှန်မှုဖြင့် မင်းဘူးခရိုင်၊ ပွင့်ဖြူမြို့နယ်  မြို့နယ်တာဝန်ခံ  ဒု-ဦးစီးမှူး ဒေါ်ဌေးဌေးဝင်းသည် (၁၄.၈.၂၀၂၃)နေ့ နံနက်(၀၇:၀၀)နာရီ အချိန်တွင် ပွင့်ဖြူမြို့နယ် ကုန်းဇောင်းဈေး၌ ကျင်းပသော ပလတ်စတစ် ကြွပ်ကွပ်အိတ်သုံးစွဲမှုလျော့ချစေရေး  Compaing များပြုလုပ်ခြင်းနှင့် စားသုံးသူများ အစားအစာဘေးအန္တရာယ်ကင်းရှင်းစွာ စားသုံးနိုင်စေရေးအတွက် ကွင်းဆင်းပူးပေါင်းဆောင်ရွက်ခဲ့ပါသည်။

   ထိုသို့ ကွင်းဆင်းဆောင်ရွက်ရာတွင် မြို့နယ်စီမံအုပ်ချုပ်ရေးအဖွဲ့၏ စီမံပေးမှုဖြင့် ကုန်းဇောင်းကျေးရွာအုပ်စု အုပ်ချုပ်ရေးမှူး ဦးကျော်မြင့်၊ မြို့နယ်စည်ပင်သာယာရေးအဖွဲ့မှ အမှုဆောင်အရာရှိ ဦးလင်းမင်းညွှန့်နှင့် ဝန်ထမ်းများ၊ စားသုံးသူရေးရာဦးစီးဌာန မြို့နယ်တာဝန်ခံ ဒု-ဦးစီးမှူး ဒေါ်ဌေးဌေးဝင်းနှင့်အတူ ကုန်းဇောင်းကျေးရွာတိုက်နယ် ကျန်းမာရေးမှ ဝန်ထမ်းများ ပူးပေါင်း၍ ကုန်းဇောင်းဈေးအတွင်း ရောင်းချလျက်ရှိသော ဈေးသည်များအား အပတ်စဉ် တနင်္လာနေ့တိုင်းအား ပလတ်စတစ် ကြွပ်ကြွပ်အိတ်အား သုံးစွဲခြင်းမပြုကြရန်နှင့် ကြွပ်ကြွပ်အိတ်အစား ငှက်ပျောဖက်၊ အင်ဖက်၊ ကြာဖက်များနှင့် သတင်းစာစက္ကူများ အစားထိုးသုံးစွဲကြရန်နှင့် မိမိ မြို့ရွာနှင့် မိမိပတ်ဝန်းကျင် သာယာလှပပြီး ကျန်းမာရေးဆိုးကျိုးများ ဖြစ်စေနိုင်သော အသိပညာများ ဖြန့်ဝေခဲ့ပြီး ကုန်းဇောင်းဈေးအတွင်းရှိ ကုန်စုံဆိုင်များ၌ စားသုံးဆီများအား ကုန်အညွှန်း အမှတ်အသားများပြည့်စုံစွာပါဝင်ခြင်း ရှိ/ မရှိ စစ်ဆေးခြင်းများကိုလည်း မိတ်ဖက်ဌာနများဖြင့် ပူးပေါင်းဆောင်ရွက်ခဲ့ပါသည်။

    ထိုနောက် မြို့နယ်တာဝန်ခံသည် ကုန်စုံဆိုင်ရောင်းချနေသော ဈေးဆိုင်ပိုင်ရှင်များအား စားသုံးသူများဘေးအန္တရာယ်ကင်းပြီး လုံခြုံစိတ်ချရမှုရှိသော ကုန်အညွှန်းအမှတ်အသားများ ပြည့်စုံစွာပါရှိသော စားသုံးဆီများကိုသာ ရောင်းချကြပါရန်နှင့် စားသုံးသူကာကွယ်ရေးဉပဒေ (၂/၂၀၁၉) အခန်း(၁၀)ရှိ စီးပွားရေးလုပ်ငန်းရှင်များ၏ တာဝန်(၁၁)ချက်အား ရှင်းလင်းဆွေးနွေးခဲ့ပြီး လက်ကမ်းစာစောင်များ ဖြန့်ဝေခဲ့ပါသည်။

DOCA(မကွေး)