ပြည်တွင်းကုန်သွယ်မှုသတင်း

  ၂၀၂၅-၂၀၂၆ ခုနှစ်၊ မိုးသီးနှံစိုက်ပျိုးရာသီတွင် ရှမ်းပြည်နယ်(အရှေ့ပိုင်း)၊ ကျိုင်းတုံခရိုင်၌ မြေပဲ (၅၉၂၉) ဧက စိုက်ပျိုးရန်လျာထားပြီး မေလမှ စတင်စိုက်ပျိုးခဲ့ရာတွင် ကျိုင်းတုံခရိုင်၊ ကျိုင်းတုံမြို့၌ မြေပဲ (၂၃၅၇) ဧက၊ မိုင်းခတ်မြို့၌ မြေပဲ (၂၄၈၆) ဧက၊ မိုင်းပျဉ်းမြို့၌ မြေပဲ (၈၀၈) ဧက၊ စုစုပေါင်း (၅၆၅၁) ဧက  စိုက်ပျိုးခဲ့ပြီး ဩဂုတ်လမှ ယခု စက်တင်ဘာလ (၃၀) ရက်နေ့ထိ မြေပဲသီးနှံရိတ်သိမ်းခဲ့ရာတွင် ကျိုင်းတုံမြို့ (၁၃၆၉) ဧက၊ မိုင်းခတ်မြို့ (၂၄၁၆) ဧက၊ မိုင်းပျဉ်းမြို့ (၃၁၅) ဧက၊ စုစုပေါင်း (၄၁၀၀) ဧက ရိတ်သိမ်းပြီးစီးကြောင်း စိုက်ပျိုးရေးဦးစီးဌာန၏ (၃၀.၉.၂၀၂၅) ရက်နေ့ထိ စာရင်းအရ သိရှိရပါသည်။

          ကျိုင်းတုံခရိုင်၌ ဒေသနှင့်ကိုက်ညီပြီး အရေအသွေးကောင်း ဒေသမျိုးများ အဓိကထား စိုက်ပျိုးကြကြောင်း သိရှိရပါသည်။ အဆိုပါ မြေပဲစိုက်ပျိုးသည့် တောင်သူများမှာ တစ်ဧက အထွက်နှုန်း တိုးတက်စေရန် မြေပြုပြင်ခြင်း ၊ စိုက်ပျိုးခြင်း၊ အပင်ပြုစုခြင်း၊ ရိတ်သိမ်းခြင်း၊ သွင်းအားစုများ၊ နွားချေး၊ ကွန်ပေါင်းဓာတ်မြေဩဇာ၊ မြေတွင်းအောင်းပိုးသတ်ဆေး စုစုပေါင်း တစ်ဧက ကုန်ကျစရိတ်မှာ (၁၂) သိန်းကျော်ခန့် ကုန်ကျကြောင်း တောင်သူကြီးများထံမှ သိရှိရ ပါသည်။

          ယခု ၂၀၂၅ ခုနှစ်တွင် မြေပဲ တစ်ဧကအထွက်နှုန်းမှာ တင်း (၅၂) တင်းခန့် ထွက်ရှိကြောင်း သိရပါသည်။ ယခု မြေပဲ လက်ကားဈေး တစ်တင်းလျှင် (၄၀၀၀၀) ကျပ် ခန့်မှန်းပေါက်ဈေး အရောင်းအဝယ်ရှိပြီး မြေပဲ တင်း (၅၂) တင်းကို (၄၀၀၀၀) ကျပ်နှုန်းဖြင့်ရောင်းလျှင် (၂၀) သိန်း ကျော်ခန့်ရရှိကာ တစ်ဧက၏ အထွေထွေကုန်ကျစရိတ် (၁၂) သိန်းကျော်ခန့်နှုတ်လျှင် မြေပဲ စိုက်တောင်သူများအနေဖြင့် မြေပဲ တစ်ဧကစိုက်လျှင် (၈) သိန်းကျော်ခန့် အမြတ်အစွန်းရရှိမည် ဖြစ်ကြောင်း သိရှိရပါသည်။

DOCA(ရှမ်း)

         ခရမ်းကဆော့သီး ကိုဆေးဖက်ဝင်မယ်ဆိုတာ သတိမထားမိဘူးသေချာ မသိခဲ့ကြဘူး တခါတလေစားဖြစ်ပါကြောင်းသိရှိရပါသည်။ ဆေးဖက်ဝင်ခရမ်းကဆော့သီးကို ကျန်းမာရေး အတွက်အထောက်အကူဖြစ်စေပါကြောင်းသိရှိရပါသည်။ ငပိရည်နဲ့တို့စရာအဖြစ်လည်းကောင်း၊ ငပိနှင့်ကြော်စား၍လည်းကောင်း စားလိုက်တိုင်းဖောက်ခနဲဖြစ်ပြီး အရသာရှိတဲ့ ခရမ်းကဆော့ သီးကို လူကြိုက်များတယ်လို့သိရှိရပါသည်။ ကင်ဆာရောဂါ ကာကွယ်ပေးခြင်း ၊အကိုက်အခဲ သက်သာစေခြင်း၊ ရောင်ရမ်းမှုကို သက်သာစေနိုင်ခြင်း၊ အနာတွေကိုသက်သာစေနိုင်ခြင်း၊ အဖျား ကျစေနိုင်ခြင်း၊ ဘက်တီးရီးယားတွေကိုတိုက်ဖျက်ပေးနိုင်ခြင်း၊ ဗီတာမင်စီချို့တဲ့မှုကင်း စေခြင်း၊ ရေယုန် သက်သာစေနိုင်ခြင်း၊ ဓာတ်တိုးဆန့်ကျင်အာနိသင်ကြွယ်ဝနိုင်ခြင်း၊ သန်ကျစေနိုင်ခြင်း၊ အမြင်အာရုံ ကောင်းစေနိုင်ခြင်းရှိသလို အရသာလည်းရှိ၊ စားလို့လည်းကောင်းတဲ့ ခရမ်းကဆော့ သီးသည် ကျန်းမာရေးအကျိုးကျေးဇူးများ ကြောင်းသိရသည်။

              မြင်းခြံမြို့နယ်ရှိ‌ လေးအိမ်တန်းကျေးရွာနှင့်အခြားကျေးရွာများတွင် ခရမ်းကဆော့ ပင်များ စိုက်ပျိုးကြကြောင်းသိရှိရပါသည်။ ခရမ်းကဆော့သီးများကို မြင်းခြံမြို့အေးမြသီတာဈေး တွင် ရောင်းချလျက်ရှိကြောင်းသိရှိရပါသည်။ ယခုအောက်တိုဘာလ ဒုတိယပတ် ခရမ်းကဆော့သီး ဈေးနှုန်းမှာ အစိတ်သား (၂၀၀၀) ကျပ်ထိ ရောင်းချကြောင်းသိရပါသည်။ ယခုအခါအိမ်ရှင်မများ ဟင်းချက်ရာတွင်လည်းကောင်း၊ ထမင်းဆိုင်များမှအများဆုံး ဝယ်ယူကြသဖြင့်ခရမ်းကဆော့သီးများ အရောင်းအဝယ်ရှိကြောင်း ကုန်စိမ်းရောင်းချသူတစ်ဦးထံမှသိရှိရပါသည်။

DOCA(မန္တလေး)

             ဂေါ်ဖီထုပ်သည် မည်သည့်ဒေသတွင်မဆို အလွယ်တကူဝယ်ယူရရှိနိုင်ပြီး ဈေးနှုန်းချိုသာ သော ဟင်းသီးဟင်းရွက်တစ်မျိုးဖြစ်သည်။ ဂေါ်ဖီထုပ်တွင် သကြားဓာတ်၊ အမျှင်ဓာတ်၊ ပရိုတင်း၊ ဗီတာမင်စီ၊ ဖောလ်လစ်အက်ဆစ်၊ ဗီတာမင်ဘီ၊ ကယ်လ်ဆီယမ်၊ ပိုတက်ဆီယမ်၊ ဗီတာမင်အေ၊ သံဓာတ်၊ အန်တီအောက်ဆီဒန့်စသော အာဟာရဓာတ်များပါဝင်သည့်အတွက် ကျန်းမာရေးကို များစွာအထောက်အကူပြုနိုင်သည်။ ဂေါ်ဖီထုပ်ကို လူအများစုကဟင်းချိုချက်ခြင်း၊ အသားတစ် မျိုး မျိုးဖြင့် အစိမ်းကြော်၍စားသုံးခြင်း၊ အသုပ်ထဲထည့်၍စားသုံးခြင်း၊ အကြော်စုံများနှင့် တွဲဖက် စားသုံးခြင်း၊   စားတော်ပဲနဲ့ကြော်စားခြင်း၊  ကော်ပြန့်၊ စမူဆာစသောသရေစာမုန့်များထဲတွင် အဆာ ပလာအဖြစ်ထည့်ခြင်း၊ တို့စရာအဖြစ်ငပိရည်နှင့်စားသုံးခြင်းစသည်ဖြင့် အမျိုးမျိုးစားသုံး ကြပါသည်။ ဂေါ်ဖီထုပ်သည် ရာသီပေါ်အစားအစာမဟုတ်ပဲ တစ်နှစ်ပတ်လုံး ဝယ်ယူစားသုံး၍ ရရှိသော သီးနှံတစ် မျိုးဖြစ်ပါသည်။ ဂေါ်ဖီထုပ်သည်ကိုယ်ခံစွမ်းအားကောင်းစေခြင်း၊ ကင်ဆာနှင့် နှလုံးရောဂါဖြစ်ပွားနိုင် ခြေကို လျော့ကျစေခြင်း၊ ဝမ်းမှန်စေခြင်း၊ သွေးအတွင်းမကောင်းသော အဆီဓာတ်များကို လျော့နည်း စေခြင်းစသည့်ကျန်းမာရေးအကျိုးကျေးဇူးများစွာ ရရှိစေပါသည်။ ဂေါ်ဖီထုပ်ကိုစားသုံးသောအခါ သတိထားရမည့်အချက်များမှာ တစ်ခါစားလျှင်အနည်းဆုံး (၁၀၀)ဂရမ်သာစားသုံးသင့်ပြီး အစိမ်းစား မည်ဆိုပါက ရေစင်အောင်သေချာဆေးကြောသင့် ပါသည်။ ထို့အပြင် ဂေါ်ဖီထုပ်ကို ကြော်ချက်ပါက မီးပြင်းပြင်းဖြင့်အချိန်ကြာကြာကြော်ချက်လျှင် ကျန်းမာရေးအကျိုးပြုသော အာဟာရဓာတ်များ ပျက်စီး ဆုံးသွားနိုင်ပါသည်။ ထိုသို့ကျန်းမာရေးအတွက်ကောင်းကျိုးများသောဂေါ်ဖီထုပ်ကို မြင်းခြံမြို့နယ်ရှိ ကျေးရွာများ နှင့်ရှမ်းပြည်ဘက်မှ အများဆုံးဝင်ရောက်ကြကြောင်းသိရသည်။ မြင်းခြံမြို့အေးမြသီတာ ဈေး၌ ယခုအောက်တိုဘာလ ဒုတိယပတ်တွင် ရောင်းချနေသော ဂေါ်ဖီထုပ် ဈေးနှုန်းများမှာ တစ်စိပ်ကို(၅၀၀)ကျပ် တစ်ထုပ်လျှင်(၁၅၀၀-၂၀၀၀)ကျပ် ဖြင့် ရောင်းချလျက်ရှိကြောင်း သိရှိရသည်။

DOCA(မန္တလေး)

      ကျွန်းလှမြို့တွင် သစ်သီးမျိုးစုံဖြစ်သည့် နာနတ်သီး၊ နဂါးမောက်သီး၊ သရက်သီး၊ ငှက်ပျောသီး၊ စပျစ်သီး၊ သင်္ဘောသီး၊ ဖရဲသီး၊ ဩဇာသီး၊ သခွားမွှေးသီး၊ ကျောက်သခွားမွှေးသီး၊ ပန်းသီး၊ ပန်းသစ်တော်သီး၊ မင်းဂွတ်သီး၊  ဒညှင်းသီး  နှင့် ဖရဲသီးများကို  ရောင်းချလျက်ရှိကြောင်း သိရသည်။

          ၂၀၂၅ ခုနှစ်၊ အောက်တိုဘာလ ဒုတိယပတ်အတွင်း ဖြစ်ပေါ်နေသော ကျွန်းလှမြို့၏ နာနတ်သီ ဈေးနှုန်းများမှာ နာနတ်သီး အကြီး(၁)လုံးလျှင်(၇၅၀၀)ကျပ်၊ အသေး(၁)လုံးလျှင်(၇၀၀၀)ကျပ်ဈေးနှုန်း တို့ဖြင့်လည်းကောင်း အလားတူပင် ထောပတ်သီး ဈေးနှုန်းများမှာ ထောပတ်သီး အကြီး(၁)လုံးလျှင် (၂၀၀၀)ကျပ်၊ ငွေကျပ်(၅၀၀၀)ဖိုးလျှင်(၃)လုံး နှင့် အသေး(၁)လုံးလျှင်(၁၅၀၀)ကျပ်ဈေးနှုန်းတို့ဖြင့်‌ အရောင်းအဝယ်ဖြစ်လျက်ရှိကြောင်း  သီးနှံမျိုးစုံထဲမှ ဖရဲသီး၊ ဩဇာသီး၊ နဂါးမောက်သီး၊ ငှက်ပျောသီး နှင့် မာလကာ သီးတို့ကို မိမိတို့ ဒေသထွက်နှင့် အခြားသစ်သီးများကိုမူ မြစ်ကြီးနားမြို့တို့မှ မှာယူ ရောင်းချ လျက်ရှိကြောင်း သစ်ရာမြိုင် ဈေးတိုက်တန်းတွင် သစ်သီးမျိုးစုံ ရောင်းချနေသော ဈေးသည်ထံမှ သိရသည်။

DOCA(စစ်ကိုင်း)

               စိုက်ပျိုးရေးမှိုတစ်မျိုးဖြစ်သော ငွေနှင်းမှိုသည်တစ်နှစ်ပတ်လုံးထွက်ရှိ၍ နေအိမ်များ၌ စားသုံးမှုများသလို စားသောက်ဆိုင်များ၊ ထမင်းဆိုင်များ၌လည်း ချက်ပြုတ်ရောင်းချကြသဖြင့် ဈေးကွက် ပုံမှန်ရှိသော မှိုတစ်မျိုးဖြစ်ပါသည်။

          မြင်းခြံမြို့နယ်တွင် မြင်းခြံမြို့နှင့် အချို့ကျေးရွာများ၌ စီးပွားဖြစ်သော်လည်းကောင်း၊ တစ်နိုင် တစ်ပိုင်သော်လည်းကောင်း စိုက်ပျိုးထွက်ရှိပြီး မန္တလေးဘက်မှလည်း မှာယူ၍ ရောင်းချ ကြောင်း သိရသည်။ ငွေနှင်းမှိုကို ကန်စွန်းရွက်နှင့်ရော၍ကြော်စားခြင်းမှာ လူအများကြိုက် နှစ်သက်မှုများပြီး ငရုတ်သီး၊ မျှင်ငါးပိနှင့်အစပ်ဟင်းပုံစံချက်ပြုတ်၍လည်း စားသုံးကြလေ့ရှိပါ သည်။ အသားငါးရှောင် သော သက်သတ်လွတ်စားသုံးသူများအတွက် အကြိုက်တွေ့စေပြီး စားသုံးမှုများသောဟင်းလျာ တစ်မျိုးဖြစ်ပါသည်။ မြင်းခြံမြို့အေးမြသီတာဈေးအတွင်းရှိ ဈေးကွက်များတွင် ယခုအောက်တိုဘာလ ဒုတိယပတ်တွင်ရောင်းချနေသော ငွေနှင်းမှို တစ်ဆယ်ကျပ်သားဈေးနှုန်းအနေဖြင့် (၁၅၀၀)ကျပ် ဈေးနှုန်းများဖြင့် ရောင်းချ လျက်ရှိကြောင်း သိရသည်။

DOCA(မန္တလေး)