ပြည်တွင်းကုန်သွယ်မှုသတင်း

      ပဲခူးတိုင်းဒေသကြီး၊ ပြည်ခရိုင်၊ ပြည်မြို့အတွင်းရှိ မြို့မစည်ပင်သာယာဈေးကြီးနှင့် အခြား ဈေးများတွင် နံနံပင်ဈေးနှုန်းများ ကျဆင်းလျက်ရှိပြီး (၁၀)ပင်စည်း တစ်စည်းလျှင် (၃၀၀)ကျပ်မှ (၂၀၀)ကျပ်ထိ တဖြည်းဖြည်း ကျဆင်းလာကြောင်းသိရပါသည်။ ပြည်ဈေးကွက်သို့ ပြည်မြို့ အတွင်းရှိ ကျေးရွာများဖြစ်သော မှော်ဇာ၊ ဇီးအုပ်၊ တောင်လုံးညို၊ ဝက်ထီးကန်၊ ရွှေတောင်၊ ပုတီးကုန်း၊ သဲကုန်း၊ ဝက်ပုတ်နယ်များမှ ကားလမ်းဖြင့်လည်းကောင်း၊ ရထားများဖြင့်လည်းကောင်း ရက်ခြားဝင်ရောက်လာရောက် ရောင်းချကြကြောင်းသိရပါသည်။ ဈေးနှုန်းအနေဖြင့် ၁၀ ပင်စည်း တစ်စည်းကို (၂၀၀)ကျပ်နှင့် တစ်ပိဿာလျှင် ကျပ် (၂၀၀၀၀)နှုန်းများဖြင့် အသီးသီးရောင်းချလျက် ရှိကြောင်းသိရပါသည်။ ဈေးနှုန်းချိုသာသောကြောင့် စားသုံးသူပြည်သူများ စိတ်ကြိုက်ဝယ်ယူ စားသုံးမှုများကြောင့် ရောင်းအားတက်လာကြောင်း သိရပါသည်။

DOCA(ပဲခူး)

     သံပုရာသီးကို နွေသီးနှင့် မိုးသီးဟူ၍ နှစ်မျိုးရှိပြီး ယခုမိုးတွင်းကာလတွင် သီးသော အသီးမှာ လှိုင်လှိုင်ထွက်ပြီး အသီးအလုံးလည်းကြီးကာ အရည်လည်း ရွှမ်းသောကြောင့် ဈေးကွက်တွင် အရောင်းအဝယ်လိုက်လျှက်ရှိပါသည်။ ယခင်က နွေရာသီတွင် ထွက်ရှိသော အသီးများမှာ အလုံး သေးပြီး အရည်နည်းကာ အထွက်နည်းသောကြောင့် တစ်လုံးလျှင် ၂၀၀ ခန့်ထိဈေးမြင့်ခဲ့သော်လည်း ယခု ဩဂုတ်လတွင်တော့ သံပုရာသီးအရည်ရွှမ်း၊ အလုံးကြီး တစ်လုံးကို (၈၀ - ၁၀၀)ကျပ်ခန့် ရောင်းချကြောင်း သိရှိရပါသည်။

DOCA(ပဲခူး)

       နတ်တလင်းခရိုင်၊ နတ်တလင်းမြို့နယ်တွင် ရာသီစာကြောင်လျှာသီးများ ထွက်ပေါ်နေ လျက်ရှိကြောင်း သိရပါသည်။ ကြောင်လျှာပင်များကို အိမ်ခြံမြေများရှိ စည်းရိုးများတွင် ရာသီစာ သီးနှံပင်များအဖြစ် စိုက်ပျိုးထားကြပြီး သုံးနှစ်ကျော်တွင် အပွင့်ပွင့်၍ အသီးများကို ဆွတ်ခူးရောင်းချ စားသောက်နိုင်သည်။ ကြောင်လျှာသီးကို မီးဖြင့် အုံး၍သော်လည်ကောင်း၊ ပြုတ်ပြီး တို့တို့၊ ပါးပါးလှီးပြီး ချဉ်ဖက်စိမ်၍လည်ကောင်း၊ ဆီချက်ပဲမှုန့်တို့နှင့် သုပ်စား၍လဲ ရပါသည်။ ၂၀၂၅ခုနှစ်၊ ဩဂုတ်လ၊ တတိပတ်တွင် အရွယ်အစားကိုလိုက်၍ ကြောင်လျှာသီး တစ်တောင့်လျှင် (၄၀၀-၇၀၀)ကျပ်နှုန်း ပေါက်ဈေးရှိပြီး  ကုန်စိမ်းဒိုင်များမှ  တဆင့်ရန်ကုန်မြို့သို့ အဓိကတင်ပို့ရောင်းချပြီး သုံးဆယ်နှင့် ကြို့ပင်ကောက်မြို့များသို့ တင်ပို့ရောင်းချကြောင်း သိရပါသည်။ 

  DOCA(ပဲခူး)

       ဧရာဝတီတိုင်းဒေသကြီးအတွင်း ပြည်တွင်း၊ ပြည်ပဈေးကွက် ဝယ်လိုအားရှိသော ငါးရှဉ့် များကို ပြည်ပသို့ နှစ်ပတ်လည်တင်ပို့ရောင်းချမှုရှိသော်လည်း ပွင့်လင်းရာသီထက် ယခုလို မိုးတွင်းတွင် ငါးရှဉ့်များကို ပိုမိုဝင်ရောက်လျက်ရှိကြောင်း ဈေးကွက်မှသိရသည်၊၊

    ငါးရှဉ့်မျိုးများကို ထိန်းသိမ်းရန် ငါးလုပ်ငန်းဦးစီးဌာနမှ (၅)စင်တီမီတာ လုံးပတ် အထက်သာ ဖမ်းဆီးတင်ပို့ရောင်းချခွင့်ပြုပြီး ဇွန်လမှ နိုဝင်ဘာလအထိ ဈေးကွက်မှတင်ပို့မှုများ၍ ဒီဇင်ဘာလ နောက်ပိုင်းငါးရှဉ့်အဝင်နည်းသွားကြောင်း ပုသိမ်ဈေးကွက်မှပြည်ပတင်ပို့သော ငါးရှဉ့်များမှာ ပါးနီ၊ ပါးမွှား(၂)မျိုးသာ Export ဈေးကွက်သို့တင်ပို့လျက်ရှိပြီး ငါးရှဉ့်တွင် ကျန်းမာရေးအတွက် ပရိုတင်း ကြွယ်ဝလျက် အာရုံကြောကောင်းမွန်၍ သတ္တုဓာတ်နှင့် ဗီတာမင် တွေလည်း ပါဝင်ပြီး သံဓာတ်များ လည်းပါဝင်ကြောင်း သံဓာတ်လုံလောက်မှုမရှိရင် ခန္ဓာကိုယ်ထဲမှာ သွေးနီဥနည်းပါး၍ ခေါင်းမူး ခေါင်းကိုက်အားနည်းတာတွေဖြစ်နိုင်ကြောင်း ၎င်းအပြင်နွားနို့၊ ဒိန်ချဉ်တို့လို အရိုးကိုသန်မာစေသော Phoshorus ဓာတ်များပါဝင်ပြီး သွေးအာကောင်း၍ သွေးအား ကောင်း၍ ငါးရှဉ့်ကို ပြည်တွင်း စားသောက်ဆိုင်များနှင့်ဟိုတယ်စာအဖြစ် စားသုံးလျက်ရှိကြောင်း ဈေးကွက်မှ သိရသည်၊၊

          ပုသိမ်မြို့ပေါ်အဝယ်ဒိုင်သို့ ပုသိမ်မြို့နယ်၊ သာပေါင်းမြို့နယ်၊ ငပုတောမြို့နယ်များရှိ ကျေးရွာ များမှ အဝယ်ဒိုင်သို အဓိကလာရောက်ရောင်းချလျက်ရှိပြီး အကောင်အကြီး၊ အသေးပေါ် မူတည်၍ (၁)ပိဿာလျှင် ၁၂၀၀ဝိ/- ၁၆၀၀ဝိ/- ဈေးဖြင့် ဝယ်ယူလျက်ဝယ်ယူထားသော ငါးရှဉ့် များကို ရေနှစ်ထပ်၊ သုံးထပ်လဲလှယ်၍ ငါးရှဉ့်အသေးများကို ဖယ်ပြီးဖော့ပုံး၊ ပလပ်စတစ်ပုံး များတွင် ၂၀/၂၅ပိဿာ ထည့်သွင်း၍ ရန်ကုန်မြို့ရှိစံပြဈေး၊ လှိုင်သာယာဈေးနှင့် အင်းစိန်မြို့နယ် ကြို့ကုန်း ငါးရှဉ့်အဝယ်ဒိုင်ကြီးများသို့ တင်ပို့လျက် ရန်ကုန်မှတဆင့် ပြည်ပနိုင်ငံများသို့ တင်ပို့ ရောင်းချလျက်ရှိကြောင်း ပုသိမ်မြို့ငါးရှဉ့်လုပ်ငန်းရှင်များထံမှ သိရသည်၊၊

 DOCA (ဧရာဝတီ)

        ဧရာဝတီတိုင်းဒေသကြီးသည် ဆန်စပါးအများဆုံး စိုက်ပျိုးထုတ်လုပ်လျက်ရှိသော တိုင်းဒေသကြီး တစ်ခုဖြစ်ပြီး လယ်ယာကဏ္ဍအတွက် သုံးစွဲရန်လိုအပ်သော စက်ကိရိယာများကို ပြည်ပမှ မှာယူတင် သွင်းခြင်းထက် ပြည်ပအသုံးစရိတ်လျှော့ချရေးပြည်တွင်းထွက်ကုန်များကို အစားထိုးသုံးစွဲရန် ပုသိမ်မြို့ စက်မှုဇုန်မှ လယ်ယာသုံးစက်ကိရိယာထုတ်လုပ်၍ ဒေသအာဏာပိုင် ၊ စိုက်ပျိုးရေးဦးစီးဌာန ၊ စက်မှု လယ်ယာဦးစီးဌာနနှင့် စက်မှုဇုန်လုပ်ငန်းရှင်များပေါင်းစပ်၍ တိုင်းအတွင်းရှိ တောင်သူများကို လယ်ယာ သုံးစက်ကိရိယာများ ထုတ်လုပ်ရောင်းချလျက်ရှိကြောင်း သိရသည်။

       ပြည်တွင်းစက်မှုဇုန်များမှ ပြုလုပ်သော လယ်ယာသုံးစက်ကိရိယာများမှာ မျိုးစေ့ချကိရိယာ Drum Seeder ၊ ရေတင်ပိုက် ၊ ရေတင်စက် ၊ စပါးခြွေလှေ့စက် ၊ အင်ဂျင်ပါလက်စွဲကောက်စိုက်စက် စသည့်တို့ကို ထုတ်လုပ်ရောင်းချလျက်ရှိကြောင်း သိရသည်။

      မျိုးစေ့ချကိရိယာ Drum Seeder သည် လူဖြင့်ဆွဲပြီး မျိုးစေ့များကို အတန်းလိုက်ညီညာစွာ ချထားပေးသောကိရိယာဖြစ်၍ ရွံထဲတွင်လှိမ့်သွားနိုင်မှာဖြစ်ပြီး အချင်း (၂၄) လက်မခွဲခန့်ရှိသော Fiber glass ဖြင့် ပြုလုပ်ထားသောကြောင့် ပေါ့ပါးခိုင်ခံပြီး ကြာရှည်ခံသည့်အပြင် ပြုပြင်ထိန်းသိမ်းရလွယ်ကူ ၍ အပိုပစ္စည်းဝယ်ယူရာတွင်လည်း လွယ်ကူကြောင်း ၊ မျိုးစေ့ချကိရိယာအသုံးပြုရာတွင် လူ တစ်ယောက်သာ လိုအပ်သည့်အတွက် လုပ်သားလိုအပ်ချက်ကို လျော့နည်းစေကြီး ဗီယက်နမ်နိုင်ငံ၏ စနစ်ဖြစ်သော လွယ်ကူရိုးရှင်းသော တိုက်ရိုက်မျိုးစေ့ချစနစ်ဖြစ်ကြောင်း သိရသည်။

DOCA (ဧရာဝတီ)