ပြည်တွင်းကုန်သွယ်မှုသတင်း

    တောင်ငူမြို့၊ မြို့မဈေးကြီးအတွင်းရှိ ငါးခြောက်ဆိုင်များတွင် ရောင်းချနေသော အာဗြဲခြောက်များသည် လူကြိုက်များသော ငါးခြောက်တစ်မျိုးဖြစ်ပါသည်။ အရသာမှာချိုပြီး ဆားလည်းပေါ့သဖြင့် စားကောင်းသည့် ငါးခြောက်တစ်မျိုးဖြစ်ပါသည်။

     ယခင်အောက်တိုဘာလတွင် အာဗြဲခြောက် တစ်ဆယ်ကျပ်သားလျှင် ၃၅၀၀ ကျပ်၊ တစ်ပိဿာယူလျှင် ၃၂၀၀၀ ကျပ်ရှိရာမှ ယခုအပတ်တွင် တစ်ဆယ်ကျပ်သားလျှင် ၄၅၀၀ ကျပ်၊ တစ်ပိဿာယူလျှင် ၄၀၀၀၀ ကျပ်ဖြင့် ရောင်းချလျက်ရှိပါသည်။

    ထို့အတူ အသင့်စားအာဗြဲခြောက်များကိုလည်း ရောင်းချလျက်ရှိရာ ယခင်က တစ်ထုပ်လျှင် ၈၀၀ ကျပ်ရှိရာမှ ယခုအခါတွင် တစ်ထုပ်လျှင် ၁၂၀၀ ကျပ်ဖြင့် ရောင်းချလျက်ရှိပါသည်။ အသင့်စား အာဗြဲခြောက်ပြုလုပ်ရာတွင် အာဗြဲခြောက်ကို အမြီးညှပ်၊ ခေါင်းဖြတ်သန့်စင်ပြီး အနည်းငယ် ထုထောင်း၍ မီးကင်စက်ဖြင့် ကင်ရပါသည်။ ထို့နောက် နောက်တစ်ကြိမ် ထပ်မံထုထောင်းပြီး ဆီဆမ်း၍ အသင့်စားသုံးနိုင်သည့်အာဗြဲခြောက်ဖုတ်များကို ပလတ်စတစ်ဖြင့် ထုပ်ပိုး၍ ဈေးကွက်အတွင်း ရောင်းချကြောင်း သိရပါသည်။

DOCA(ပဲခူး)

     မကွေးတိုင်းဒေသကြီး၊ အထက်မင်းလှမြို့၊ မယ်ဇလီတောကျေးရွာသည် ကြက်သွန်နီ၊ ဝါ၊ ပဲစဉ်းငုံ၊ ကုလားပဲ၊ ပဲကြီးသီးနှံတို့ကို ရာသီအလိုက်စိုက်ပျိုးလျက်ရှိပြီး မေမြို့ပန်းကို တစ်နိုင်တစ်ပိုင် စိုက်ပျိုးလျက်ရှိကြောင်း သိရသည်။

     မယ်ဇလီတောကျေးရွာ၌ မေမြို့ပန်းကို ၂၀၂၄ခုနှစ်၊ ဒီဇင်ဘာလ(ပထမပတ်)တွင် (၁)ဧက ခန့်စိုက်ပျိုးထားကြောင်း၊ မျိုးကိုယခင်နှစ် မေမြို့ ပန်းခင်းမှထွက်ရှိသည့် ပန်းများမှ မျိုးစေ့များကို မျိုးအဖြစ်ဖယ်ချန်၍ ပြန်လည်စိုက်ပျိုးကြောင်း၊ ၎င်းမျိုးစေ့များကို ပျိုးပင်အဖြစ် ပျိုးထောင်၍ အပင် (၄၅)ရက်သားအရွယ်တွင် မြေချ၍စိုက်ပျိုးရပြီး အပင်သက်တမ်း(၂)လအကြာတွင် အပင်လိုက်ခူး၍ ရောင်းချရကြောင်း၊ စိုက်ပျိုးကုန်ကျစရိတ် အနေဖြင့် ယခင်နှစ်က (၁)ဧကလျှင် ကျပ်(၈)သိန်း ကုန်ကျခဲ့ပြီး ယခုနှစ်တွင်မှု သွင်းအားစုစရိတ် မြင့်တက်လာ၍ မြေပြုပြင်ခ၊ ရေသွင်းခ၊ ပေါင်းသတ် ဆေးခနှင့် အခြားသွင်းအားစုစရိတ်အပါအဝင် စုစုပေါင်း ကျပ်(၁၄) သိန်းခန့်ကုန်ကျကြောင်း၊ ယခင်နှစ်ကမေမြို့ပန်းတစ်ပင်လျှင် လက်ကားဈေး ကျပ်(၃၀ မှ ၄၀)ရရှိကာ အကျိုးအမြတ်အနေဖြင့် ကျပ်(၁၂)သိန်းနီးပါးရရှိခဲ့ကြောင်း၊ ရောင်းချမှုအနေဖြင့် မလွန်ဈေးနှင့် မန်းသံပုရာကန်ရေနံချက် စက်ရုံ(PIC)ဈေးများသို့ လက်ကား တင်ပို့ရောင်းချကြောင်း မယ်ဇလီတောကျေးရွာနေ ပန်းစိုက်တောင်သူတစ်ဦးထံမှ သိရှိရပါသည်။

DOCA(မကွေး)

      မကွေးတိုင်းဒေသကြီး၊ အထက်မင်းလှမြို့၊ ဇေယျာသီရိဈေးတွင် ပန်းဂေါ်ဖီကို မကွေးမြို့၊  မင်းဘူးမြို့၊ ရှမ်းပြည်နယ်၊ အောင်ပန်းမြို့နှင့် တောင်တွင်းကြီးမြို့တို့မှ မှာယူရောင်းချကြောင်း သိရသည်။

   ၂၀၂၄ခုနှစ်၊ ဒီဇင်ဘာလ(ပထမပတ်)တွင် ပန်းဂေါ်ဖီ အပွင့်ကြီး(၁)ပွင့်လျှင် ကျပ်(၂၅၀၀)၊ အပွင့် လတ်(၁)ပွင့်လျှင် ကျပ်(၂၀၀၀)၊ အပွင့်သေး(၁)ပွင့်လျှင် ကျပ်(၁၈၀၀) ဈေးနှုန်းများဖြင့် ရောင်းချလျက်ရှိပြီး ယခင်တစ်ပတ်နှင့်ဈေးနှုန်းနှိုင်းယှဉ်ပါက ကျပ်(၅၀၀ - ၁၀၀၀)ဈေးနှုန်းကျဆင်းလာကြောင်း၊ ပန်းဂေါ်ဖီစိုက်ပျိုးရာ ဒေသများတွင် လှိုင်လှိုင်ထွက်ရှိနေသောကြောင့် ဈေးနှုန်းမှာ ကျဆင်းလာရခြင်းဖြစ်ကြောင်း သိရှိရပါသည်။

DOCA(မကွေး)

    မကွေးတိုင်းဒေသကြီး၊ မကွေးခရိုင်၊ မကွေးဈေးကွက်သို့ မြို့နယ်အတွင်းရှိ မိကျောင်းရဲ၊ လျောင်းတော်ဦး၊ ကံသစ်၊ ရွာဟောင်းကန်၊ သစ်ရာကောက် စသည့်ကျေးရွာများနှင့် စလင်း၊ ဆင်ဖြူကျွန်း၊ မင်းဘူး၊ မြို့သစ်၊ နတ်မောက်မြို့တို့မှထွက်ရှိသော ပဲတီစိမ်း၊ ပဲနောက်၊ ကုလားပဲ၊ ပဲကြီး၊ စားတော်ပဲ၊ မတ်ပဲနှင့် အခြားပဲမျိုးစုံများ ဝင်ရောက်ရောင်းဝယ်ဖောက်ကားလျက်ရှိပါသည်။

          ၂၀၂၄ခုနှစ်၊ ဒီဇင်ဘာလ(ပထမပတ်)တွင် ကုလားပဲ(929)(၁)တင်းလျှင် ကျပ်(၉၈၅၀၀)၊ ကုလားပဲဟော်လန်(၁)တင်းလျှင် ကျပ်(၉၇၀၀၀)၊ ပဲလွန်းဝါ(ကျွန်း) (၁)တင်းလျှင် ကျပ်(၅၅၀၀၀)၊ ပဲကြီးဖြူ(၁)တင်းလျှင် ကျပ်(၈၅၀၀၀)၊ ပဲတီစိမ်း(၁)တင်းလျှင် ကျပ်(၉၇၀၀၀)၊ ပဲနောက်(၁)တင်းလျှင် ကျပ်(၉၄၀၀၀)၊ ပဲစဉ်းငုံ(နီ) ကျပ်(၁၂၅၀၀၀)၊ စားတော်ပဲ ကျပ်(၁၄၆၀၀၀)၊ မတ်ပဲ ကျပ်(၁၁၇၀၀၀)၊  မြေပဲလုံးဆံ(နီ)(၁)ပိဿာလျှင် ကျပ်(၈၅၀၀)၊ မြေပဲလုံးဆံ(ဖြူ) (၁)ပိဿာလျှင် ကျပ်(၈၆၀၀)၊ မြေပဲ(အောက်ကျဆီဆံ)(၁)ပိဿာလျှင် ကျပ်(၇၅၀၀) တို့ဖြင့် အရောင်း အဝယ်ဖြစ်လျက်ရှိပြီး နိုဝင် ဘာလ(စတုတ္ထပတ်)နှင့်နှိုင်းယှဉ်ပါက ယခုတစ်ပတ်တွင်  မြေပဲ(အောက်ကျဆီဆံ) ကျပ်(၂၀၀)ဈေးနှုန်း မြင့်တက်ခဲ့ပြီး ပဲလွန်းဝါ(ကျွန်း) ကျပ်(၅၀၀၀)၊ မြေပဲလုံးဆံ(နီ) ကျပ်(၃၀၀)၊ မြေပဲလုံးဆံ(ဖြူ) ကျပ်(၄၀၀)၊ ပဲတီစိမ်း ကျပ်(၈၀၀၀)၊ ပဲနောက် ကျပ်(၁၀၀၀) ဈေးနှုန်းလျော့ကျခဲ့ကြောင်း၊ တင်ပို့မှု အနေဖြင့် တစ်ပတ်အတွင်း ရန်ကုန်မြို့သို့ ကုလားပဲ အိတ်(၇၀၀)၊ ပဲတီစိမ်းအိတ်(၁၂၀၀)၊ မြေပဲအိတ်(၃၀၀)၊ မန္တလေးမြို့သို့ မြေပဲအိတ်(၃၀၀၀)၊  စုစုပေါင်းအိတ်ရေ (၅၂၀၀)တင်ပို့ခဲ့ပြီး တန်ချိန်(၂၅၀) အရောင်းအဝယ်ဖြစ်ခဲ့ကြောင်း သိရှိရပါသည်။

DOCA(မကွေး)

     မကွေးတိုင်းဒေသကြီးသည်  နှမ်း၊ မြေပဲနှင့် ပဲမျိုးစုံ၊ နေကြာ၊ ဝါ၊ စပါး၊ ပြောင်း စသည့်တို့ကို နှစ်စဉ် စိုက်ပျိုးလျက်ရှိ၍ စိုက်ပျိုးရေးလုပ်ငန်းကို အဓိကထားလုပ်ကိုင်လျက်ရှိသော ဒေသတစ်ခုဖြစ်ပြီး စိုက်ပျိုးရေးတွင် လိုအပ်သည့် သွင်းအားစု(ဓါတ်မြေဩဇာ၊ ပိုးသတ်ဆေး)များလည်း သုံးစွဲကြကြောင်း သိရသည်။

     မကွေးမြို့၌ ၂၀၂၄ခုနှစ်၊ ဒီဇင်ဘာလ(ပထမပတ်)အတွင်း ဓါတ်မြေဩဇာဈေးကွက်မှာ ဈေးနှုန်း အနည်ငယ်မြင့်တက်၍ အရောင်းအဝယ်ပုံမှန်ဖြစ်လျက်ရှိပြီး ကွန်ပေါင်းအုပ်စုများဖြစ်သည့် တက်တိုး မြေဩဇာတစ်အိတ်လျှင် ကျပ်(၁၀၀၀၀၀)၊ အာမိုအပြာ(15:15:15)တစ်အိတ်လျှင် ကျပ်(၁၄၂၀၀၀)၊ MC  (15:15:15) တစ်အိတ်လျှင် ကျပ်(၁၄၀၀၀၀)၊ ပုလဲပန်းဘူး(ဖြူ) တစ်အိတ်လျှင် ကျပ်(၁၀၂၀၀၀)နှင့် ကောမတ် G 46% (ပုလဲ) တစ်အိတ်လျှင် ကျပ်(၁၀၂၀၀၀) တို့ဖြင့် အရောင်းအဝယ်ဖြစ်နေကြောင်း သိရသည်။

    ပိုးသတ်ဆေးအမျိုးအစားများဖြစ်သည့် ပရိုမက်တင် ၅၁.၈ EC (500cc) တစ်ဘူးလျှင် ကျပ် (၃၅၀၀၀)၊ ဆလက်ပက်(စ်) (500cc) တစ်ဘူးလျှင် ကျပ်(၃၇၀၀၀)၊ ဖို(စ်)တင်း EC (500cc) တစ်ဘူးလျှင် ကျပ်(၂၇၅၀၀)တို့ဖြင့် အရောင်းအဝယ်ဖြစ်လျက်ရှိကြောင်း၊ ယခုအချိန်သည် သီးနှံထွက် ပေါ်ချိန်ဖြစ်သောကြောင့် ဓါတ်မြေဩဇာနှင့် ပိုးသတ်ဆေးဈေးနှုန်းများမှာ အတက်အကျမရှိဘဲတည်ငြိမ်လျက်ရှိကြောင်း သိရပါသည်။

DOCA(မကွေး)