မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့မစည်ပင်သာယာဈေး၊ အမှတ်(၂) ဈေးတို့ တွင် အိမ်ရှင်မများအတွက် ဟင်းလျာတစ်မျိုးဖြစ်သည့် ခရမ်းချဉ်သီးများ ဈေးကျဆင်းပြီး အရောင်း အဝယ်ဖြစ်လျက်ရှိပါသည်။ ခရမ်းချဉ်သီးများကို  မိမိတို့ဒေသမှ မထွက်ရှိသေး၍ အခြားပြည်နယ်များမှ ဝင်ရောက်အရောင်းအဝယ်ဖြစ်လျက်ရှိပါသည်။ အခြားပြည်နယ်ဖြစ်သော ရှမ်းပြည်နယ် အင်းလေးဒေသမှ ထွက်ရှိသော ခရမ်းချဉ်သီးများ၊ မန္တလေးတိုင်းဒေသကြီး၊ ကျောက်ပန်းတောင်း ပုပ္ပါးနယ်မှ ထွက်ရှိသော ခရမ်းချဉ်သီးများ ဝင်ရောက် အရောင်းအဝယ်ဖြစ်လျက်ရှိပါသည်။

     ဈေးနှုန်းဈေးကွက် အနေဖြင့် ရှမ်းပြည်နယ် အင်းလေးဒေသမှ ထွက်ရှိသောခရမ်းချဉ်သီး မှာ ၂၀၂၅ခုနှစ်၊ ဩဂုတ်လ(တတိယပတ်)တွင် အရည်အသွေးနှင့် အလုံးအရွယ်အစားအလိုက် ခရမ်းချဉ်သီး တစ်ပိဿာလျှင် ကျပ်(၂၅၀၀ မှ ၂၀၀၀) ဈေးဖြင့် အရောင်းအဝယ်ဖြစ်ကြောင်း၊ ယခင် ဩဂုတ်လ(ဒုတိယပတ်)နှင့်နှိုင်းယှဉ်ပါက ခရမ်းချဉ်သီး တစ်ပိဿာလျှင် ကျပ်(၅၀၀)ခန့်ဈေးကျပြီး အရောင်းအဝယ်ဖြစ်ကြောင်း မြို့မဈေးသည်များထံမှ သိရှိရပါသည်။

DOCA(မကွေး)

           စစ်ကိုင်းတိုင်းဒေသကြီး၊ ကန့်ဘလူခရိုင်၊ မြို့မဈေးတွင် ရာသီပေါ်ကုန်စိမ်းသီးနှံအစုံဖြစ်သည် ပန်ဂေါ်ဖီ၊ ‌ဂေါ်ဖီထုပ်၊ ‌ရွှေပဲသီး၊ မုန့်ညှင်းထုတ်၊ ပန်းငရုပ်ပွသီး၊ တိုင်ထောင်ဘို စားပဲသီး၊ ဂေါ်ရခါးသီး၊ ခါကြက်ဥနှင့် မုန့်ညှင်းဖြူထုတ်ကိုတို့ကို ရောင်းချလျက်ရှိရာ မန္တလေးမြို့နှင့် ရှမ်းပြည်နယ်တို့မှမှာယူ ရောင်းချကြောင်း သိရှိရသည်။

        ကန့်ဘလူမြို့မဈေးရှိ ဟင်းသီးဟင်းရွက်ဈေးတန်း၌ ၂၀၂၅ ခုနှစ်၊ ဩဂုတ်လ တတိယပတ်အတွင်း  ရောင်းချလျက်ရှိသည့် မုန်ညှင်းဖြူထုပ်ဈေးနှုန်းမှာ မုန့်ညှင်းဖြူထုပ် လက်လီတစ်ပိဿာလျှင် (၁၂၀၀၀) ကျပ်၊ လက်က္ကားတစ်ပိဿာလျှင်(၁၁၀၀၀)ကျပ်၊ (၅၀)ကျပ်သားလျှင် (၆၀၀၀)ကျပ်တို့ဖြင့် အရောင်းအ ဝယ်ဖြစ်လျက်ရှိကြောင်း၊ မုန့်ညှင်းဖြူထုပ်ကို စားသောက်ဆိုင်များက အဓိကဝယ်ယူလျက်ရှိပြီး အိမ်ရှင်မ များကလည်းဝယ်ယူကြောင်း ဟင်းသီးဟင်းရွက်ရောင်းချသူများထံမှ သိရှိရသည်။

DOCA (စစ်ကိုင်း)

    ရုံးပတီသီးဆိုသည်မှာ ပန်းပွင့်သည့်အပင်မျိုးဖြစ်ပြီး ကမ္ဘာ့နေရာတော်တော်များများတွင် ပေါက်ရောက်လေ့ရှိပါသည်။ ရုံးပတီသီးကိုကြော်စားခြင်း၊ ချဉ်ဟင်းချက်စားခြင်း၊ ပဲဟင်းနှင့် ချက်စားခြင်း၊ အတို့အမြှုပ်အဖြစ်စားသုံးခြင်း၊ ကင်ပြီးစားခြင်း၊ ဆီပူထိုးပြီး အချဉ်ရည်နှင့်တို့စား ခြင်းစသည်ဖြင့် အမျိုးမျိုးချက်ပြုတ်ပြုလုပ်စားသုံးလေ့ရှိကြသည်။ ရုံးပတီသီးတွင်ကျန်းမာရေး အတွက်အထောက်အကူပြုစေနိုင်သော အာဟာရဓာတ်များစွာပါဝင်ပြီး ကျန်းမာရေးအတွက်လည်း ကောင်းကျိုးများစွာရရှိစေပါသည်။ ရုံးပတီသီးတွင် အမျှင်ဓာတ်ကြွယ်ဝစွာ ပါဝင်သောကြောင့် နေ့စဉ်ခန္ဓာကိုယ်အတွက်လိုအပ်သော အမျှင်ဓာတ်များစွာကိုရရှိစေပြီး သဘာဝဝမ်းနှုတ်ဆေးအဖြစ်အသုံး ပြုနိုင်ပါသည်။ အမြင်အာရုံနှင့်အရေပြားကျန်းမာရေးအတွက်အထောက်အပံ့ပေးပြီး ကိုယ်ခံအား စနစ်ကိုလည်းကောင်းမွန်စေပါသည်။ ကိုယ်ဝန် ဆောင်မိခင်များအနေဖြင့်လည်း လိုအပ်သော အာဟာရဓာတ်များကို ဖြည့်တင်းပေးပြီး ကလေးငယ်များကိုမွေးရာပါချို့ယွင်းချက်မပါအောင်လည်း ကာကွယ်ပေးနိုင်ပါသည်။ အရိုးကျန်းမာရေးအတွက်လည်း အရေးပါသလို သွေးတိတ်စေသည့်နေရာ တွင်လည်း အရေးပါသောဗီတာမင်တစ်မျိုးဖြစ်သည့် ဗီတာမင်ကေကြွယ်ဝစွာပါဝင်ပါသည်။ ထိုကဲ့သို့ ကျန်းမာရေးအကျိုးကျေးဇူးများသည့်အပြင် အမျိုးမျိုးချက်ပြုတ်စားသောက်နိုင် သောရုံးပတီသီးကို မြင်းခြံမြို့၊ အေးမြသီတာဈေးရှိ ကုန်စိမ်းရောင်းချသည့်ဆိုင်များတွင် (၁၀) ကျပ်သားလျှင် (၄၀၀) ကျပ်၊ (၂၅) ကျပ်သားလျှင် (၁၀၀၀) ကျပ်၊ တစ်ပိဿာလျှင် (၄၀၀၀) ကျပ်ဖြင့် အရောင်းအဝယ်ဖြစ်လျက်ရှိ ပါသည်။

DOCA(မန္တလေး)

            စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်သည် စိုက်ပျိုးရေးလုပ်ငန်းများဖြစ်သည့် စပါး၊ပဲမျိုးစုံနှင့် ဆီထွက်သီးနှံတို့ကို အဓိကစိုက်ပျိုးသည့်အပြင် ရာသီစာသီးနှံများနှင့် စားဖိုဆောင်သီးနှံများကိုလည်း စိုက်ပျိုးကြသည်။

           ယခုအခါ ကန့်ဘလူမြို့ပေါ်၊ နတ်ပေးကျေးရွာနှင့် အခြားသောကျေးရွာများတွင် စပါးလင်ပင်နှင့် ကြက်သွန်မြိတ်များကို စိုက်ပျိုးကြကြောင်း၊ စပါးလင်ပင်များကို ကန့်ဘလူမြို့မဈေးတွင်ရောင်းချကြောင်း၊ ၂၀၂၅ ခုနှစ်၊ ဩဂုတ်လ တတိယပတ်အတွင်း စပါးလင်(၁၁)ပင်လျှင် (၁၀၀၀)ကျပ်၊ (၅)ပင်လျှင် (၅၀၀)ကျပ်၊ (၁)ပင်လျှင်(၁၀၀)ကျပ်နှင့် ကြက်သွန်မြိတ်(၁)စည်းလျှင် (၃၀၀)ကျပ်၊ (၂) စည်းလျှင် (၅၀၀)ကျပ်ဖြင့်ရောင်းချကြောင်း၊ ကြက်သွန်မြိတ်ကို အိမ်ရှင်မများဟင်းချက်ရာတွင်လည်းကောင်း၊ စားသောက်ဆိုင်များတွင်လည်းကောင်း အသုံးပြုကြကြောင်း၊ စပါးလင်ကို ဟင်းခတ်အမွှေးအကြိုင်ဖြစ်လည်းကောင်း၊ စားသောက်ဆိုင်များ၌ ငါးကင်၊ ငါးပေါင်းများပြုလုပ်ရာတွင်လည်းကောင်း၊ မုန့်ဟင်းခါးချက်ရာတွင်လည်း စပါးလင်ကိုထည့်သွင်းအသုံးပြုကြသဖြင့် အရောင်းအဝယ် သွက်လျက်ရှိကြောင်း မြို့မဈေးရှိ ကုန်စိမ်းရောင်းချသူတစ်ဦးထံမှ သိရှိရပါသည်။

DOCA(စစ်ကိုင်း)

   သကြားဆိုသည်မှာ များသောအားဖြင့် အစားအစာများနှင့်‌သောက်စရာများတွင် ပါလေ့ရှိ သော ကာဗိုဟိုက်ဒရိတ်တစ်မျိုးဖြစ်ပါသည်။ ကော်ဖီနှင့်အခြားသော မြန်မာမုန့်များစားသည့် အခါ တွင်လည်း သကြားကိုတွဲဖက်၍ စားလေ့ရှိကြပါသည်။ ဟင်းချက်သည့်အခါထည့်သုံးလေ့ရှိကြသလို သစ်သီးဖျော်ရည်များတွင်လည်းထည့်ကြပါသည်။ အချိုပွဲတော်တော်များများတွင်လည်း သကြားသည်မပါမဖြစ်အသုံးပြုကြပါသည်။ သကြားသည်စွဲလမ်းတတ်စေသောသဘောရှိပါသည်။ အချို ရည်များ၊ ဒိုးနပ်စ်များ၊ မုန့်ချိုချိုလေးများကို တစ်ခါလောက်စားပြီးပါက နောက်ထပ်စားချင်လာခြင်း မှာ သကြားကြောင့်ဖြစ်လာသောစွဲလမ်းမှု့ကြောင့်ဖြစ်ပါသည်။ ခန္ဓာကိုယ်တွင်အင်အားပြည့်ဝစေဖို့  သကြားဓာတ်ကိုလိုအပ်သော်လည်း အများအပြားစားသုံးမိပါက နောက်ဆက်တွဲဆိုးကျိုးများ ဖြစ်သည့် အဝလွန်ခြင်း၊ နှလုံးရောဂါဖြစ်နိုင်ခြေများခြင်း၊ အာဟာရချို့တဲ့စေခြင်း၊ ဆီးချိုဖြစ်နိုင် ခြေများခြင်းစသည့်ရောဂါများအပြင် အသည်းအဆီဖုံးခြင်း၊ ဝက်ခြံဖြစ်ခြင်း၊ အရွယ်မတိုင်ခင် အိုမင်း ရင့်ရော်ခြင်း၊ ဂေါက်ရောဂါ၊ သွားနှင့်ခံတွင်းရောဂါ၊ ကျောက်ကပ်ရောဂါနှင့်သိမြင်မှု စွမ်းရည်ကျဆင်း မှုများကိုခံစားရနိုင်ပါသည်။ သကြားသည်အများအပြားစားသုံးလျှင် ဆိုးကျိုးများရှိသော်လည်း သကြားနှင့်ပြုလုပ်ရသော မြန်မာမုန့်များရောင်းချသူများအနေဖြင့် သကြားကို ဝယ်ယူသုံးစွဲကြရပါသည်။ သကြားကိုကုန်စုံဆိုင်များနှင့် ဈေးများတွင် တစ်ပိဿာလျှင် (၅၅၀၀) ကျပ်ဖြင့်အရောင်းအဝယ်ဖြစ်လျက်ရှိပါသည်။

 DOCA(မန္တလေး)