ပြည်တွင်းကုန်သွယ်မှုသတင်း

       ပဲခူးမြို့၊ တောင်သူစုကျေးရွာတွင် တောင်ကြီးပဲပွကြော်၊ စားတော်ပဲကြော်၊ ပဲလွန်းကြော်၊ နှစ်ပြန်ကြော်လုပ်ငန်းများဖြင့် အကြော်စုံလုပ်ငန်းအား  လုပ်ကိုင်ဆောင်ရွက်လျက်ရှိပါသည်။

    အကြော်စုံလုပ်ငန်းမှ တောင်ကြီးပဲပွဲကြော်ကို တစ်မျိုးအားဖြင့် တရုတ်ပဲကြီးကြော်(သို့) ဒိုကြီးကြော်ဟုခေါ်ကြောင်း သိရှိရပါသည်။ တောင်ကြီးပဲနှင့် ပဲလွန်းများကို မန္တလေးတိုင်းဒေသကြီးမှ ပိဿာချိန် (၅၀) လျှင် (၃)သိန်းကျပ်ခန့်ဖြင့်  ဝယ်ယူရကြောင်း သိရပါသည်။

     ဝယ်ယူရရှိသော ပဲများကို သန့်စင်ပြီး စဉ့်အိုးများဖြင့် (၂၄)နာရီကြာရေစိမ်၍ ကြော်လှော်ခြင်း လုပ်ငန်းများကို အလျား(၄)ပေ၊ အနံ(၃)ပေရှိ ဆီဘွိုင်လာအိုးဖြင့်ကြော်ပြီး ပဲများကို အရသာ ရောယှက်ကာ Mixer ဖြင့် ရောသမမွှေ၍ လေလုံခံသည့် ပလတ်စတစ်အိတ်များဖြင့် ထည့်၍ ပီနံအိတ်များဖြင့် ထုပ်ပိုးသည်ဟု သိရှိရပါသည်။

     တောင်ကြီးပဲပွကြော်နှင့် စားတော်ပဲကြော်များကို ရန်ကုန်မြို့ရှိ ကျားကမ္ဘာပွဲရုံ၊ ဘုရင်နောင်ပွဲရုံ၊ ကျောက်ဆူးပွဲရုံများသို့ (၁)ပိဿာလျှင် (၆၀၀၀)ကျပ်နှုန်းဖြင့် တင်ပို့ရောင်းချပြီး ပဲခူးမြို့တွင်းနှင့် အနီးရှိမြို့ရွာများသို့ တောင်ကြီးပဲပွကြော်(၁)ပိဿာလျှင် (၈၀၀၀)ကျပ်၊ စားတော်ပဲကြော်(၁)ပိဿာလျှင် (၅၅၀၀) ကျပ်၊ ပဲလွန်းကြော်(၁)ပိဿာလျှင် (၅၀၀၀)ကျပ်နှင့် နှစ်ပြန်ကြော် (၁)ပိဿာလျှင်(၉၀၀၀) ကျပ်ဖြင့် ရောင်းချကြောင်း သိရှိရပါသည်။

    ပဲခူးမြို့နယ် ၊တောင်သူစုကျေးရွာရှိ အကြော်စုံလုပ်ငန်းများသည် လွန်ခဲ့သော (၁၅)နှစ်ခန့်က စတင်လုပ်ကိုင်ခဲ့သော လုပ်ငန်းဖြစ်ကာ လုပ်သားအင်အား(၇)ဦးဖြင့် တစ်ပိုင်တစ်နိုင်မိသားစု အိမ်တွင်းမှု စီးပွားရေး လုပ်ငန်းအဖြစ် အကျိုးအမြတ်ရရှိနေကြောင်း သိရှိရသည်။   

DOCA(ပဲခူး)

   ပဲခူးခရိုင် ၊ ပဲခူးမြို့နယ်အတွင်းရှိ ‌တောင်သူလယ်သမားများအနေဖြင့် မိုးစပါးအပြင် အခြားသီးနှံများ စိုက်ပျိုးလျက်ရှိရာ ပဲခူးမြို့နယ် ၊ မုန်တိုင်းကျေးရွာတွင် ခရမ်းစိုက်တောင်သူများ အောင်မြင်ဖြစ်ထွန်းပြီး နေ့စဉ် ဆွတ်ခူး‌ရောင်းချနေရသဖြင့် အပိုဝင်ငွေရရှိကာ မိသားစုစားဝတ်နေရေး အဆင်ပြေလျက်ရှိကြောင်း သိရှိရပါသည်။

    အဆိုပါ  ခရမ်းသီးနှံကို  တစ်ဧကလျှင် မျိုးစေ့ (၃၀၀) ဂရမ်နှုန်းဖြင့် ပျိုးနိုင်ခြင်း၊ တစ်ပင်နှင့် တစ်ပင်    ငါးပေခြား  စိုက်ပျိုး၍   ရေသွင်းရေထုတ်လွယ်ကူစေရန် မြေဘောင်များ  ပြုလုပ်ပေးရပါသည်။ အပင်ငယ်ချိန်တွင် မြေ ပေါင်းသင်ပေးကာ  တစ်လတစ်ကြိမ် အပင်ခြေများတွင်  မြေသြဇာ အနည်းငယ်မျှ ထည့်ရပြီး လိုအပ်ပါက  အပင်အားဖြည့်ဆေးနှင့် ပိုးသတ်ဆေး  ဖြန်းပေးရပါသည်။ စတင်စိုက်ပျိုးသည့် အချိန်မှစ၍ ခူးဆွတ်နိုင်သည့်ကာလမှာ အချိန် (၃)လ ခန့်ကြာမြင့်ပြီး  ဆွတ်ခူး ရောင်းချသည့်အခါ   ရက်ခြားခူး၍   ရောင်းရသကဲ့သို့  နေ့စဉ်ဆွတ်ခူး၍ လည်းရောင်းချရကြောင်း သိရှိရပါသည်။  ရင်းနှီးမြှုပ်နှံရသည့် (မျိုးစေ့၊ ပိုးသတ်ဆေး၊ အလုပ်သမား ငှားရမ်းခနှင့် ဓာတ်မြေသြဇာ) စသည့်ကုန်ကျစရိတ်များမှာ စုစုပေါင်း ကျပ် နှစ်သိန်း ဝန်းကျင်ခန့်ရှိပြီး ရောင်းစျေးအနေဖြင့်  ဖောက်သည်စျေး  ၁ပိဿာ ကျပ် ၁၈၀၀  မှ ၂၀၀၀ အထိ ရောင်းချ ရသည့်အတွက် နေ့စဉ် အပိုဝင်ငွေရရှိကာ မိသားစု စားဝတ်နေရေး အဆင်ပြေလျက်ရှိကြောင်း သိရပါသည်။

DOCA(ပဲခူး)

   ပဲခူးတိုင်းဒေသကြီးအစိုးရအဖွဲ့၏ လမ်းညွှန်မှုဖြင့် တောင်ငူမြို့နေပြည်သူများအား အခြေခံစားကုန်များကို ဈေးနှုန်းသင့်တင့်စွာဝယ်ယူနိုင်ရေးအတွက် ကိုယ်တိုင်စိုက်ပျိုးမွေးမြူထုတ်လုပ်သူများက ဆန်၊ ဆီ၊ အသားငါးနှင့် ဟင်းသီးဟင်းရွက်များကိုတိုက်ရိုက်ရောင်းချပေးလျက်ရှိရာ  ၂၀၂၃ခုနှစ်၊ ဇူလိုင်လ ၁၇ရက်နေ့၊ နံနက်ပိုင်းအချိန်တွင် တောင်ငူမြို့၊ ဘုရင့်နောင်ဈေးအနီးရှိ သံတောင်လမ်းမကြီးဘေးတွင် ရောင်းချပေးခဲ့ပါသည်။

  ယနေ့တွင် တောင်ငူမြို့နယ်၊ ဆန်စက်ပိုင်ရှင်များအသင်းက ဆန်တစ်ပြည်လျှင် ၂၅၀၀ကျပ်ဖြင့် လူတစ်ဦးလျှင် နှစ်ပြည်နှုန်းဖြင့်ရောင်းချပေးပါသည်။ ပဲခူးခရိုင်၊ ဆီကုန်သည်အသင်းမှ ဆီအရောင်းဈေးကားသည် စားအုန်းဆီ ၅၀ကျပ်သားတစ်ဘူးလျှင် ၂၅၀၀ကျပ်ဖြင့် လူတစ်ဦးလျှင် တစ်ဘူးနှုန်းရောင်းချပေးပါသည်။

    မွေးမြူရေးလုပ်ငန်းရှင်များကလည်း အမဲသားတစ်ပိဿာလျှင် ၁၂၀၀၀ကျပ်၊ ကြက်သားတစ်ပိဿာလျှင် ၁၀၀၀၀ကျပ်၊ ဝက်သားတစ်ပိဿာလျှင် ၁၅၀၀၀ကျပ်၊ ငါးတစ်ပိဿာလျှင် ၅၈၀၀ကျပ်၊ ကြက်ဥ ၁၀လုံးလျှင် ၂၅၀၀ကျပ်၊ ဘဲဥ ၁၀လုံးလျှင် ၂၇၀၀ကျပ်ဖြင့် ရောင်းချပေးလျက်ရှိရာ မည်သူမဆို လွတ်လပ်စွာဝယ်ယူနိုင်ပါသည်။

   ထို့တူ တစ်နိုင်တစ်ပိုင်စိုက်ပျိုးရေးလုပ်ကိုင်သူများကလည်း ဟင်းသီးဟင်းရွက်များကို သင့်တင့်သောဈေးနှုန်းဖြင့် လာရောက်ရောင်းချပေးကြောင်း၊  ကိုယ်တိုင်စိုက်ပျိုးမွေးမြူထုတ်လုပ်သူများ၏ ဆန်၊ ဆီ၊ အသားငါးနှင့် ဟင်းသီးဟင်းရွက်များ နေ့စဉ်တိုက်ရိုက်ရောင်းချနိုင်ရေးကို သက်ဆိုင်ရာဌာနများက စီမံဆောင်ရွက်လျက်ရှိကြောင်းသိရပါသည်။

DOCA(ပဲခူး)

    နဂါးမောက်သီးများကို  ပုပ္ပားကျေးရွာ၊ တောင်ကလပ်ကျေးရွာ၊ နတ်ကန်လည်ကျေးရွာများတွင် အများဆုံးစိုက်ပျိုးလျက်ရှိပါသည်။ ပုပ္ပားဒေသထွက် နဂါးမောက်သီးပင်သည် အရည်အသွေးကောင်းမွန်သော်လည်း နဂါးမောက်သီး ခြံတိုင်းလှိုင်လှိုင်ထွက်ရှိချိန်တွင် ဈေးနှုန်းကျဆင်းသွားလေ့ရှိကြောင်း သိရှိရပါသည်။

     နဂါးမောက်သီးတွင် အဖြူသီးနှင့် အနီသီးနှစ်မျိုးရှိပြီး နဂါးမောက်သီးများမှာ ကဆုန်လတွင် စတင်ဖူးပွင့်ကာ နယုန်လတွင် အသီးမှည့်၍ စတင်ရောင်းချရကြောင်း သိရှိရပါသည်။ နဂါးမောက်သီးမှာ တစ်နှစ်တွင် (၄)ကြိမ်အထိ အသီးရရှိကြောင်း သိရှိရပါသည်။ နဂါးမောက်ပင်များသည့် (၁)ဧကလျှင် အပင်(၂၀၀)ကျော် စိုက်ပျိုးနိုင်ပြီး (၂)နှစ်သားမှစ၍ အသီးများစတင်ရရှိပြီး တစ်ဧကလျှင်(၁၀၀) ကီလိုကျော်အထိ ရရှိကြောင်း သိရှိရပါသည်။

     နဂါးမောက်သီးခြံများမှ တိုက်ရိုက်ဝယ်ယူသည့် ခြံဈေးအနေဖြင့် တစ်ကီလိုလျှင် (၁၃၀၀) ကျပ် ၊ (၈၀၀)ကျပ် ၊ (၃၀၀)ကျပ် ၊ အလုံးအရွယ်အစားလိုက် ဈေးအမျိုးအမျိုးရှိပြီး နေပြည်တော်၊ မန္တလေး၊ ရန်ကုန်များသို့ တင်ပို့လျှက်ရှိကြောင်းနဂါးမောက်သီးစိုက်ပျိုးသည့် တောင်သူထံမှ သိရှိရပါသည်။ ပဲခူးမြို့ ဈေးကွက်တွင် နဂါးမောက်သီး တစ်လုံးလျှင် ၁၅၀၀-၁၃၀၀-၁၀၀၀ ကျပ်ဖြင့် အသီးအရွယ်အစားပေါ် မူတည်၍ အ‌ရောင်းအဝယ်ဖြစ်ပေါ်နေကြောင်း သိရှိရပါသည်။

   နဂါးမောက်သီးသည် နာတာရှည်ရောဂါ ခံစားနေရသူများ၊ အသားအရေ စိုပြည်လှပလိုသူများ၊ နှလုံးသွေးတိုး ဆီးချိုရောဂါနဲ့ အစာအိမ်အူလမ်းကြောင်း ပြဿနာရှိသူများ ရွေးချယ်စားသုံးသင့်သော အသီးအနှံတစ်မျိုးဖြစ်၍ နဂါးမောက်သီးသည် လူကြိုက်များပြီး ဈေးနှုန်းဈေးကွက် ကောင်းမွန်ကြောင်း သိရှိရပါသည်။

DOCA(ပဲခူး)

     တောင်ငူမြို့၊ ညောင်ပင်လေးဈေးရှိ ဟင်းသီးဟင်းရွက်ဈေးတွင် ၂၀၂၃ခုနှစ်၊ ဇူလိုင်လ (စတုတ္ထအပတ်) ၌ ငရုတ်သီးစိမ်း (မိုးထောင်သီး) မှာ တစ်ပိဿာလျှင် ၇၀၀၀ကျပ်မှ ၈၀၀၀ကျပ်၊ ငရုပ်သီးစိမ်း (ကျောက်စိမ်းသီး) မှာ တစ်ပိဿာလျှင် ၃၀၀၀ကျပ်မှ ၄၀၀၀ကျပ်၊  ကုလားအော်သီးမှာ တစ်ပိဿာလျှင် ၁၈၀၀၀ကျပ်မှ ၂၀၀၀၀ကျပ်၊ ခရမ်းသီး (အဖြူ)မှာ တစ်ပိဿာလျှင် ၁၃၀၀ကျပ်မှ ၁၅၀၀ကျပ်၊ ခရမ်းသီး (အညို) မှာ တစ်ပိဿာလျှင်  ၁၆၀၀ကျပ်မှ ၁၈၀၀ကျပ်ဖြင့် ဈေးနှုန်းတည်ငြိမ်နေပါသည်။ ဂေါ်ဘီမှာ တစ်ပိဿာလျှင် ၆၀၀ကျပ်မှ ၈၀၀ကျပ်ဖြင့် ဈေးနှုန်းတည်ငြိမ်နေပါသည်။

      ဒေသသခွားသီးမှာ ယခင်လကုန်ပိုင်းတွင် တစ်ပိဿာလျှင် ၅၀၀ကျပ်မှ ၆၀၀ကျပ်အထိရှိခဲ့ရာမှ ယခုအပတ်တွင် တစ်ပိဿာလျှင် ၇၀၀ကျပ်မှ ၈၀၀ကျပ်အထိ၊ ရှမ်းပြည်သခွားသီးမှာ ယခင်လကုန်ပိုင်းတွင် တစ်ပိဿာလျှင် ၇၀၀ကျပ်မှ ၈၀၀ကျပ်အထိရှိခဲ့ရာမှ ယခုအပတ်တွင် တစ်ပိဿာလျှင် ၈၀၀ကျပ်မှ ၉၀၀ကျပ်၊ ဂေါ်ဘီမှာ ယခင်လကုန်ပိုင်းတွင် တစ်ပိဿာလျှင် ၆၀၀ကျပ်မှ ၈၀၀ကျပ်‌အထိရှိခဲ့ရာမှ ယခုအပတ်တွင် တစ်ပိဿာလျှင် ၁၂၀၀ကျပ်မှ ၁၅၀၀ကျပ်ဖြင့် ဈေးနှုန်းမြင့်တက်လာခဲ့ပါသည်။

    ခရမ်းချဉ်သီးမှာ ယခင်လကုန်ပိုင်းတွင် တစ်ပိဿာလျှင် ၁၃၀၀ကျပ်မှ ၁၅၀၀ကျပ်အထိရှိခဲ့ရာမှ ယခုအပတ်တွင် တစ်ပိဿာလျှင် ၁၇၀၀ကျပ်မှ ၂၀၀၀ကျပ်၊ နံနံပင်မှာ ယခင်လကုန်ပိုင်းတွင် တစ်ဆယ်ကျပ်သားလျှင် ၄၀၀ကျပ်မှ ၅၀၀ကျပ်အထိရှိခဲ့ရာမှ ယခုအပတ်တွင် တစ်ဆယ်ကျပ်သားလျှင် ၅၀၀ကျပ်မှ ၆၀၀ကျပ်၊ မုံလာဥဖြူမှာ ယခင်လကုန်ပိုင်းတွင် တစ်ပိဿာလျှင် ၁၆၀၀ကျပ်မှ ၁၈၀၀ကျပ်ရှိခဲ့ရာမှ ယခုအပတ်တွင် တစ်ပိဿာလျှင် ၁၈၀၀ကျပ်မှ ၂၀၀၀ကျပ်၊ မုံလာဥနီမှာ ယခင်လကုန်ပိုင်းတွင် တစ်ပိဿာလျှင် ၁၅၀၀ကျပ်မှ ၁၇၀၀ကျပ်အထိရှိခဲ့ရာမှ ယခုအပတ်တွင် တစ်ပိဿာလျှင် ၂၀၀၀ကျပ်မှ ၂၂၀၀ကျပ်အထိဖြစ်၍ ဈေးနှုန်းမြင့်တက်လာခဲ့ပြီး မုန်ညင်းဖြူမှာ တစ်ပိဿာလျှင် ၁၈၀၀ကျပ်မှ ၂၀၀၀ကျပ်အထိဖြင့် ဈေးနှုန်းတည်ငြိမ်နေပါသည်။

     ကန်စွန်းရွက်မှာ တစ်စည်းလျှင် ၂၀၀ကျပ်၊ ၁၀စည်းယူလျှင် ၁၇၀၀ကျပ်၊ ချဉ်ပေါင်ရွက်မှာ တစ်စည်းလျှင် ၁၀၀ကျပ်၊ ၁၀စည်းယူလျှင် ၇၀၀ကျပ်၊ ကင်ပွန်းချဉ်ရွက်မှာ တစ်စည်းလျှင် ၂၀၀ကျပ်နှင့် ၁၀စည်းယူလျှင် ၁၇၀၀ကျပ်တို့ရှိကြောင်း သိရပါသည်။

DOCA(ပဲခူး)