ပြည်တွင်းကုန်သွယ်မှုသတင်း

    ၁၀.၅.၂၀၂၃ ရက်နေ့တွင် တိုင်းဒေသကြီးနှင့်ပြည်နယ် မြို့နယ်အလိုက် ဆန်၊ ဆီ၊ မီးဖိုချောင်သုံးပစ္စည်းများ၊ သားငါး၊ စက်သုံးဆီ၊ ရွှေ၊ ဒေါ်လာ ဈေးနှုန်းများအား အောက်ပါ .pdf တွင် ဝင်ရောက်ကြည့်ရှုနိုင်ပါသည်-

    ပြည်မြို့ ဈေးများအတွင်းရောင်းချနေကြသော သစ်သီးဝလံ၊ ပန်းမာန်ဈေးကွက်တွင် အလှပန်းအိုးထိုးရန်နှင့် ဘုရားပန်းကပ်လှူပူဇော်ရန်တို့အတွက် ပန်းဈေးတန်းမှာ ပန်းအလှမျိုးစုံ ရောင်းဝယ်လျက်ရှိကြရာ သစ္စာပန်း၊ မေမြို့ပန်း၊ ဇော်စိမ်း၊ ဇော်လုံး၊ ဇော်ကျား၊ နှင်းဆီ၊ လီလီ၊ သစ်ခွ စသည်ဖြင့် ဒေသထွက်ပန်းများအပြင် နေရာဒေသစုံမှ ထွက်ရှိသော ပန်းမျိုးစုံ ရောင်းဝယ်မှု ရှိကြပါသည်။ အဆိုပါ ပန်းများနှင့်အတူ ဘုရားပန်း အိုးကပ်လှူရန်၊ ကြာရှည်လည်းခံ၊ အညွှန့် အခက်များဖြင့် ဝေဝေဆာဆာ၊ စိမ်းစိမ်းစိုစို လှပကျက်သရေရှိလှသော အောင်သပြေပန်း ငုတ်များမှာလည်း ဘုရားပန်းဈေးကွက်၏ ၃ပုံ ၂ပုံခန့်မှာ တွင်ကျယ်စွာ ရောင်းချလာကြပါသည်။ ပြည်ပန်း ဈေးကွက်အတွင်း ရောင်းချကြသော သပြေပန်းငုတ်များသည် ပြည်ဒေသမှ ထွက်ရှိခြင်း မဟုတ်ဘဲ နေပြည်တော်နှင့် အနီးတဝိုက်ဒေသများမှ ထွက်ရှိသည့်အတွက် နေပြည်တော်မှ မှာယူရောင်းချကြသည်ဟု သိရပါသည်။ မှာယူရောင်းချကြသူများအနေဖြင့် ပန်းငုတ် အကြီး ၁၀၀ ပါ ခြင်းတစ်ခြင်းလျှင် (၁၅၀၀၀၀)ကျပ်ခန့်နှင့် ပန်းငုတ်အရွယ်အစားအသေးငုတ် (၁၅၀)ပါ ခြင်း တစ်ခြင်းလျှင် (၁၂၀၀၀၀)ကျပ် မှ (၁၅၀၀၀၀)ကျပ်ထိ ပန်းပုံသဏ္ဍာန်၊ အရွယ်အစား ပါဝင်မှု့ ပမာဏအပေါ်မူတည်၍ ဈေးကွာခြားမှုရှိကြောင်း သိရပါသည်။ ဒါ့ကြောင့်ပန်းငုတ် အပင်ကြီး တစ်ပင်လျှင် (၁၅၀၀)ကျပ် မှ (၂၀၀၀)ကျပ်ကျော်ခန့်အထိ ရောင်းချကြပြီး ပန်းငုတ်အသေး၊ အရွယ်အစား၊ အလတ်စား ခွဲခြား၍ တစ်ပင်လျှင် (၅၀၀)ကျပ်မှ ကျပ် (၁၀၀၀-၁၂၀၀)ကျပ်ထိ ရောင်းချကြပါသည်။ ဘုရားပန်းကပ်လှူရန် ဝယ်ယူသူများအနေဖြင့်လည်း ယခုလိုရာသီဥတု အပူရှိန်များချိန်မှာ အဆိုပါ အောင်သပြေငုတ်များအား ဘုရားပန်းကပ်လှူသည့်အခါ အောင်အိုးများတွင်သာမက ဘုရားပန်းအိုးများ ကပ်လှူထားသည့်အခါမှာလည်း  မညိုးနွမ်းလွယ်ဘဲ စိမ်းစိမ်း စိုစိုဖြင့် အနည်းဆုံး ရက်သတ္တ(၂)ပတ်၊(၃)ပတ်မှ (၁)လကျော်ထိ ကြာရှည်ခံသည့် အတွက် ဈေးကြီးပေး ဝယ်ရသော်လည်း အကြိုက်တွေ့ကြကြောင်း သိရှိရပါသည်။ အဆိုပါ သပြေငုတ်များသည် အမွှေးရနံ့ မရှိသော်လည်း စိမ်းစိုလှပ ကျက်သရေရှိလှသော အောင်သပြေပန်းငုတ်များမှာ ပန်းဈေးကွက်အတွင်း ရောင်းပန်းလှသော ရောင်းအားကောင်းနေသော ပန်းတစ်မျိုးဖြစ်ကြောင်း လေ့လာသိရှိရပါသည်။

DOCA(ပဲခူး)

     ပဲခူးတိုင်းဒေကြီး၊ ပြည်ခရိုင်အတွင်းတွင် ပဲမျိုးစုံစိုက်ပျိုးကြသော်လည်း မတ်ပဲ၊ ပဲတီစိမ်း၊ ပဲစင်းငုံ၊ ကုလားပဲသီးနှံများသာ စိုက်ဧကများပြားကြပြီး ကျန်ပဲသီးနှံများမှာ စိုက်ပျိုးဧက နည်းပါးကြပါသည်။ အများဆုံး စိုက်ပျိုးသည့် ပဲများတွင် မတ်ပဲသီးနှံမှာ စိုက်ဧက(၆၀၀၀၀)ကျော်၊ ပဲတီစိမ်းသီးနှံမှာ မိုး၊ ဆောင်း (၂)ရာသီစိုက်ပျိုးပြီး မိုးပဲတီစိမ်း စိုက်ဧက (၄)ထောင်ကျော်၊ ဆောင်းပဲတီစိမ်း စိုက်ဧကမှာ (၁၉၀၀၀)ကျော်၊ ပဲစင်းငုံစိုက်ဧကမှာ (၁၄၀၀၀)ကျော်၊ ကုလားပဲ စိုက်ဧကမှာ (၁၆၀၀၀)ကျော် စိုက်ပျိုးမှုရှိကြပါသည်။ အဆိုပါပဲများအနေဖြင့် စိုက်ဧကများ၏ ထွက်ရှိမှု ပမာဏမှာလည်း များပြားကြပြီး အရောင်းအဝယ်ဖြစ်မှုပမာဏအနေဖြင့် ပြည်တွင်း၊ ပြည်ပ ရောင်းဝယ်မှုဖြစ်ကြပါသည်။ ပြည်ဈေးကွက်သို့ ဝင်ရောက်လာသော ပဲများအား ရန်ကုန်၊ မန္တလေး မြို့ကြီးများသို့ တင်ပို့ရောင်းချကြပါသည်။ ကျန်ပဲများဖြစ်သော ထောပတ်ပဲ၊ ပဲလွမ်းဖြူ၊ ပဲနီပြား စသည့် ပဲများမှာ စိုက်ဧကနည်းပါးသောကြောင့် ပဲထွက်ပေါ်ချိန်ကာလများတွင် အရောင်း အဝယ်ဖြစ်မှုများကာ ကျန်ကာလများမှာ ပဲလက်ကျန် အနည်းငယ်သာ လက်လီ ရောင်းဝယ်မှု ဖြစ်ကြပါသည်။ အဆိုပါပဲများအနက် ထောပတ်ပဲသီးနှံသည် ပြည်ခရိုင်အတွင်းရှိ မြို့နယ်များ အားလုံးတွင် စိုက်ပျိုးခြင်း မရှိဘဲ ပန်းတောင်းမြို့နယ်နှင့် ရွှေတောင်မြို့နယ်တွင်သာ စိုက်ပျိုးသည့်အတွက် စိုက်ဧက စုစုပေါင်း (၄၀၀၀)ကျော်ခန့်သာ စိုက်ပျိုးမှုရှိပါသည်။ အထွက်နှုန်းအနေဖြင့် တစ်ဧကလျှင် ပျမ်းမျှ (၁၇)တင်း နှုန်းခန့် ထွက်ရှိသည်ဟု သိရပါသည်။ ဈေးနှုန်းအနေဖြင့် မတ်ပဲ၊ ပဲတီစိမ်း၊ ကုလားပဲစသော သီးနှံများကဲ့သို့ပင် ဈေးကောင်းရလျက်ရှိပြီး ပိဿာ(၂၀)တစ်တင်းကို ကျပ်(၆) သောင်းကျော် (၇)သောင်းနီးပါးအထိ ရရှိခဲ့ပါသည်။ ဈေးကောင်းရသောကြောင့် စိုက်ပျိုးထုတ်လုပ်သူ တောင်သူများအတွက် ယခုနှစ်မှာ ထောပတ်ပဲသီးနှံမှ အကျိုးအမြတ် ရရှိခဲ့သော နှစ်ဖြစ်ပါသည်။ ထောပတ်ပဲသီးနှံ၏ နှစ်အလိုက်ဈေးနှုန်းများကို လေ့လာကြည့်ရာတွင် ၂၀၂၀ ခုနှစ် မေလတွင် တစ်တင်းလျှင် (၂)သောင်းကျပ်နှုန်း၊ ၂၀၂၁ မေလတွင်လည်း တစ်တင်းလျှင် (၂)သောင်းကျပ်နှုန်း၊ ၂၀၂၂ မေလတွင် တစ်တင်း (၄၆၀၀၀)ကျပ်ဖြင့် ရရှိခဲ့တာကြောင့် နှစ်အလိုက်ဈေးနှုန်းများတွင် ၂၀၂၀ ခုနှစ်နှင့် ၂၀၂၁ ခုနှစ်၌ ယခင်နှစ်ဈေးနှင့် တူညီနေခဲ့ပါသည်။ ၎င်းနှစ်များ၌ အခြားပဲများအပြင် ထောပတ်ပဲသီးနှံကလည်း ဈေးအေးခဲ့ကြောင်း သိရပါသည်။ ၂၀၂၂ခုနှစ်တွင် ပြည်ပတင်ပို့သောပဲအားလုံးလိုလို ဈေးမြင့်တက်လာခဲ့ပြီး ပြည်တွင်းစားသုံးမှုများသော ထောပတ်ပဲ သီးနှံဈေးအနေဖြင့်လည်း တစ်တင်း (၄၀၀၀၀)ကျပ်အထိ ပြည်ပတင်ပို့သော ပဲများ၏ ဈေးနှုန်း များနှင့်အပြိုင်မြင့်တက်လာခဲ့ကြပါသည်။ ယခု ၂၀၂၃ ပဲဈေးကွက်အတွင်း ပဲမျိုးစုံ ဈေးနှုန်းများမှာ ပဲအားလုံးလိုလို ဈေးကောင်းရလျက်ရှိ၍ ပြည်တွင်းစားသုံးမှုများသော ပဲများအားလုံးမှာလည်း ဈေးကောင်းရလျက်ရှိနေခဲ့ပါသည်။ ထောပတ်ပဲသီးနှံအနေဖြင့် ယခုကာလတွင် ပဲလက်ကျန် နည်းသွားပြီဖြစ်၍ ပဲထွက်ပေါ်စ အချိန်ရောင်းဝယ်မှုဖြစ်သည့် ပမာဏလောက် အရောင်း အဝယ်မဖြစ်တော့ဘဲ ဒေသတွင်း လက်လီသမား အချို့ဖြင့်သာ ရောင်းချနေကြရကြောင်း သိရပါသည်။ ပဲစိုက်တောင်သူများကလည်း ယခုနှစ်တွင် ထောပတ်ပဲဈေးကောင်းရနေသည့်အတွက် မျိုးပဲ အချို့သာချန်ပြီး ထွက်ရှိလာသမျှ ပဲအားလုံးကို ရောင်းချကြသောကြောင့် တောင်သူများထံတွင် ပဲလက်ကျန်မရှိတော့ဘဲ ဈေးကွက်အတွင်း သိုလှောင်ထားသူများ၏ လှောင်ပဲအနည်းငယ်သာ ကျန်ရှိနေခဲ့ကြောင်း သိရပါသည်။ လက်ကျန်လည်း နည်းလာသည့်အတွက် အခြားပဲများကဲ့သို့ အရောင်းအဝယ်ဖြစ်မှု ပမာဏမများတော့ဘဲ အိတ်အနည်းငယ်ခန့်သာ ရောင်းဝယ်နေခဲ့ကြောင်း သိရပါသည်။ ပြည်ပတင်ပို့မှုရှိသော မတ်ပဲ၊ ပဲစင်းငုံ၊ ပဲတီစိမ်း၊ ကုလားပဲ သီးနှံများဟာဆိုလျှင် စိုက်ပျိုးဧကများသလို ထွက်ရှိမှုပမာဏလည်းများသည့်အတွက် ဈေးကွက်အတွင်း တစ်နှစ်တာလုံး ရောင်းချမှုရှိခဲ့ပါသည်။ သို့သော်လည်း ထောပတ်ပဲသီးနှံစိုက်ဧကပမာဏမှာ အဆိုပါပဲများ ထက် ဧကအများကြီး လျော့နည်းခဲ့၍ ပဲထွက်ပေါ်ချိန်နှင့် အထွက်လှိုင်ချိန်များတွင်သာ လက်လီလက်ကားရောင်းဝယ်မှုများပြီး သင်္ကြန်ပြီးချိန်မှစ၍ ပစ္စည်းလက်ကျန်များ တဖြည်းဖြည်း လျော့နည်းလာပြီး ပဲလက်ကျန်ပျက်သည်အထိဖြစ်ခဲ့ကြကာ လာမည့်ပဲသစ်ပေါ်ချိန်ကာလမှသာ ဈေးကွက်အတွင်းပြန်လည်အရောင်းအဝယ်ဖြစ်မည့် ပဲအမျိုးအစားဖြစ်ပါသည်။ ထို့ကြောင့် ယခု လက်ရှိ စိုက်ပျိုးဖြစ်ထွန်းနေသော ဒေသများတွင် တစ်နှစ်ထက်တစ်နှစ်ဈေးကောင်းရရှိလာသော ထောပတ်ပဲသီးနှံအား အထွက်ကောင်းမျိုးများရွေးချယ်ကာ နောင်လာမည့်နှစ်များတွင် တစ်နှစ်ထက် တစ်နှစ်စိုက်ဧကပိုမိုတိုးချဲ့စိုက်ပျိုးနိုင်မည်ဆိုပါက ပဲစိုက်တောင်သူများ အကျိုးအမြတ် ဝင်ငွေပိုမို ရရှိလာနိုင်မည်ဖြစ်ပါကြောင်း ရေးသားလိုက်ရပါသည်။

DOCA(ပဲခူး)

       သရက်မြို့ရှိ အခွန်လွတ်ဈေးသည် စည်ပင်သာယာဈေး၌ရောင်းချလျက်ရှိသည့် စားဖိုဆောင်သီးနှံ၊ အသား၊ ငါးနှင့် အခြားသော ဟင်းသီးဟင်းရွက်များအား တစ်ဆင့်ခံရောင်းချသောဈေးဖြစ်ပါသည်။ စည်ပင်သာယာဈေးတွင် ရောင်းချလျက်ရှိသော ကြက်သွန်ဖြူ၊ အာလူးတို့မှာလည်း ရှမ်းပြည်နယ် ကလောမြို့ နှင့်အောင်ပန်းမြို့တို့မှ တစ်ဆင့်ဝယ်ယူရောင်းချခြင်းဖြစ်ပြီး ငရုတ်သီးအစို/ အခြောက်တို့မှာ သရက်မြို့ အနီးရှိ ကျေးရွာများဖြစ်သော စမ်းအိုင့်ရွာ၊ ကိုးပင်ရွာနှင့် အခြားစားသောက်ကုန်များကို အောင်လံမြို့နှင့် ပြည်မြို့တို့မှ အများဆုံးဝင်ရောက်လျက်ရှိကြောင်း သိရပါသည်။

     မေလ(ဒုတိယ)ပတ် (၇.၅.၂၀၂၃မှ ၉.၅.၂၀၂၃)ရက်နေ့အတွင်း သရက်မြို့ အခွန်လွတ်ဈေး၌ ရောင်းချလျက်ရှိသော အခြေခံစားကုန်ဈေးနှုန်းများမှာ ကြက်သွန်ဖြူ(၁)ပိဿာလျှင် ကျပ်(၅၂၀၀)၊ ကြက်သွန်နီ (၁)ပိဿာလျှင် ကျပ်(၁၆၀၀မှ ၁၈၀၀)ထိ၊ ချင်း (၁)ပိဿာလျှင် ကျပ်(၂၀၀၀)၊ အာလူး(၁) ပိဿာလျှင် ကျပ်(၂၄၀၀)၊ ခရမ်းချဉ်သီး (၁)ပိဿာလျှင် ကျပ်(၁၃၀၀မှ ၁၈၀၀)ထိ၊ ကြက်ဥ(၁)လုံးလျှင် ကျပ်(၂၂၀-၂၂၅)၊ ဘဲဥ(၁)လုံးလျှင် ကျပ်(၃၅၀)၊ ကြက်သား (၁)ပိဿာလျှင် ကျပ်(၁၅၀၀၀)၊ ဝက်သား (၁)ပိဿာလျှင် ကျပ်(၁၆၀၀၀)၊ အမဲသား (၁)ပိဿာလျှင် ကျပ်(၁၆၀၀၀)နှင့် ငါးကြင်း (၁)ပိဿာလျှင် ကျပ်(၁၅၀၀၀)ဈေးနှုန်းများဖြင့် အရောင်းအဝယ်ဖြစ်လျက်ရှိကြောင်း ဈေးသည်တစ်ဦးထံမှသိရှိရပါသည်။

DOCA(မကွေး)

   ရခိုင်ပြည်နယ် စားသုံးသူရေးရာဦးစီးဌာန မြောက်ဦးခရိုင်၊ မင်းပြားမြို့နယ်တာဝန်ခံ ဦးမောင်သန်းဝင်း(ဒု-ဦးစီးမှူး)နှင့် ဝန်ထမ်းများသည် ၂၀၂၃ ခုနှစ် မေလ ၅ ရက်နေ့ နံနက် (၁၀:၀၀) နာရီအချိန်တွင် သဲတန်းကျေးရွာရှိ မတ်ပဲပွဲရုံပိုင်ရှင် ဦးမောင်ဝင်းနှင့်တွေ့ဆုံ၍ စိုက်ပျိုးထုတ်လုပ်မှု၊ ရောင်းဝယ်ဖောက်ကားမှု အခြေအနေများအား ကွင်းဆင်းလေ့လာခဲ့ပါသည်။

    ယခုနှစ်တွင် တောင်သူများအနေဖြင့် ဆောင်းသီးနှံများစိုက်ပျိုးရာတွင် မတ်ပဲကိုလည်း အများအပြားစိုက်ပျိုးကြပြီး (၂၀၂၂-၂၀၂၃) ခုနှစ်တွင် မင်းပြားမြို့နယ်အတွင်း မတ်ပဲစုစုပေါင်း စိုက်ဧကမှာ (၃၅၉၉)ဧက ခန့် စိုက်ပျိုးကြောင်း သိရှိရပြီး ၎င်းမတ်ပဲများကို စမ္ဘလေကျေးရွာအုပ်စု၊ ဆပ်ကျာကျေးရွာအုပ်စု၊ နာဂရာကျေးရွာအုပ်စု၊ အဝရွာကျေးရွာအုပ်စု၊ စပါးထားကျေးရွာအုပ်စု၊ ရွှေတမာကျေးရွာအုပ်စုနှင့် ပန်းမြောင်းကျေးရွာအုပ်စုတို့တွင် အများဆုံး စိုက်ပျိုးကြပါသည်။ မတ်ပဲ စိုက်ပျိုးတောင်သူများသည် မတ်ပဲများကို ဖေဖော်ဝါရီလနှင့် မတ်လများတွင် ရိတ်သိမ်းကြပြီး တစ်ဧက အထွက်နှုန်းမှာ (၁၆.၉၄) တင်းခန့်ဖြစ်ပြီး ယခုနှစ်မတ်ပဲပေါ်ချိန်တွင် ပိဿာ (၃၀)၊ တစ်အိတ်လျှင် ကျပ် (၈၀၀၀၀ မှ ၈၁၀၀၀)အတွင်း ဈေးနှုန်းဖြင့် ရောင်းချကြရသဖြင့်  ယခင်နှစ် မတ်ပဲပေါ်ချိန်တွင် ပိဿာ (၃၀) တစ်အိတ်လျှင် (၅၉၀၀၀ မှ ၆၀၀၀၀)ဈေးနှုန်းဖြင့်သာ အရောင်း အဝယ်ဖြစ်ပေါ်ခဲ့ပါသဖြင့် ယခုနှစ်တွင် ပိဿာ (၃၀) တစ်အိတ်လျှင် ကျပ် (၂၀၀၀၀) ဝန်းကျင်ထိ ကွာဟမှုရှိပါသည်။ ယခုကဲ့သို့ မတ်ပဲစိုက်ပျိုးတောင်သူများ မတ်ပဲဈေးကောင်းရရှိခြင်းမှာ မတ်ပဲများကို ဒေသတွင်း စားသုံးရန် ဟင်းအဖြစ် အပင်ပေါက်လုပ်ပြီး ရောင်းချခြင်း၊ ရန်ကုန်တိုင်းဒေသကြီး၊ မန္တလေးတိုင်းဒေသကြီးသို့ မတ်ပဲကုန်သည်များ ကုန်းလမ်းဖြင့် တင်ပို့ရောင်းချနေခြင်းကြောင့် မတ်ပဲစိုက်ပျိုးတောင်သူများ ယခင်နှစ်ထက် ဈေးကောင်းရရှိနေပြီး ဝင်ငွေတိုးပွားလျက်ရှိကြောင်း မတ်ပဲပွဲရုံလုပ်ကိုင်နေသည့် ဦးမောင်ဝင်းထံမှ သိရှိရပါသည်။

DOCA(ရခိုင်)