ပြည်တွင်းကုန်သွယ်မှုသတင်း

       စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်ရေး ကော်မတီအနေဖြင့် စားအုန်းဆီ ကမ္ဘာ့ဈေးနှုန်းဖြစ်ပေါ် ပြောင်းလဲမှုနှင့်အညီ ပြည်တွင်း၌ ဖြစ်သင့်ဖြစ်ထိုက်သည့် ဈေးနှုန်းများ ဖြစ်ပေါ်စေရေး ထိန်းကျောင်းဆောင်ရွက်လျက်ရှိပြီး စားအုန်းဆီ အဓိကထုတ်လုပ်တင်ပို့သည့် မလေးရှားနိုင်ငံတွင် ဖြစ်ပေါ်နေသည့် FOB ဈေးနှုန်းများကို နေ့စဉ်စောင့်ကြည့်ကာ သယ်ယူပို့ဆောင်ခ ကုန်ကျစရိတ်များ၊ ဘဏ်စရိတ်များ၊ အခွန်အခများ ထည့်သွင်းတွက်ချက်၍ ပြည်တွင်းဈေးကွက်၌ ရောင်းဝယ်ဖောက်ကားရမည့် အခြေခံလက်ကားရည်ညွှန်းဈေးနှုန်းကို ထုတ်ပြန်ပေးလျက်ရှိပါ သည်။

      ယခုအပတ်အတွင်း ကမ္ဘာ့စားအုန်းဆီ ထုတ်လုပ်တင်ပို့သည့် နိုင်ငံများတွင် ဈေးကွက်နှင့် ဈေးနှုန်းဖြစ်ပေါ်မှုများအရ ၂၀၂၄ ခုနှစ်၊ ဖေဖော်ဝါရီလ ၅ ရက်နေ့မှဖေဖော်ဝါရီလ ၁၂ ရက်နေ့ အထိ ရန်ကုန်အထိုင်ဈေး အခြေခံလက်ကားရည်ညွှန်းဈေးနှုန်းမှာ စားအုန်းဆီ တစ်ပိဿာလျှင် ၅,၂၇၅ ကျပ်ဖြစ်ကြောင်း ထုတ်ပြန်ကြေညာထားပါသည်။

      ထို့အပြင် ပြည်တွင်းဈေးကွက်အတွင်း ဈေးနှုန်းမြှင့်တင်ရောင်းချခြင်း၊ ဈေးကစားရန် ရည်ရွယ်ချက်ဖြင့် သိုလှောင်ခြင်းနှင့် မသမာသည့် လုပ်ဆောင်မှုများ ပြုလုပ်ပါက အရေးကြီး ကုန်စည်နှင့်ဝန်ဆောင်မှုဥပဒေအရ အရေးယူဆောင်ရွက်သွားမည်ဖြစ်ကြောင်း အသိပေးထုတ် ပြန်ထားသည်။

      အခြေခံလက်ကားရည်ညွှန်းဈေးနှုန်းများကို စားသုံးသူရေးရာဦးစီးဌာန ၏ Website: www.doca.gov.mm၊  Facebook Page  နှင့် မြန်မာနိုင်ငံ ဆီကုန်သည်နှင့် ဆီလုပ်ငန်းရှင်များ အသင်း၏ Facebook Page တွင် ဝင်ရောက်ကြည့်ရှုနိုင်ကြောင်း သိရသည်။

စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ကန့်ဘလူမြို့နယ်တာဝန်ခံရုံးအနေဖြင့် “ပြည်တွင်းကုန်သွယ်မှုဖွံ့ဖြိုးရေးနှင့် စားသုံးသူကာကွယ်ရေးလုပ် ငန်းများဖြင့် နိုင်ငံ့စီးပွားရေးဖွံ့ဖြိုးတိုးတက်ရန်”ဆိုသည့် ဌာန၏ မျှော်မှန်းချက်တာဝန်ကိုလည်း အကောင်အထည်ဖော်ဆောင်ရွက်လျက်ရှိရာ ကန့်ဘလူမြို့၊ မြို့မဈေးတွင် ငါးမျိုးစုံရောင်းချလျက်ရှိပြီး ဇန်နဝါရီလ စတုတ္ထပတ်အတွင်းဖြစ်ပေါ်နေသော ငါးလက်လီဈေးနှုန်းများမှာ ငါးရံ့အကောင်လိုက် တစ်ပိဿာလျှင် (၁၂၀၀၀)ကျပ်၊ တီလားဗီးယားအကောင်သေးတစ်ပိဿာလျှင် (၅၀၀၀)ကျပ်၊ တီလားဗီးယားအကောင်ကြီး တစ်ပိဿာလျှင် (၈၀၀၀)ကျပ်၊ ငါးကြင်း တစ်ပိဿာလျှင် (၁၀၀၀၀)ကျပ်၊ ငါးဖယ် တစ်ပိဿာလျှင် (၈၀၀၀)ကျပ်၊ ငါးမုတ် တစ်ပိဿာလျှင် (၇၀၀၀) ကျပ်၊ ငါးမြင်းတစ်ပိဿာလျှင် (၆၅၀၀)ကျပ်၊ ငါးဘတ် တစ်ပိဿာလျှင် (၂၀၀၀၀)ကျပ်၊ ငါးဂျောင်း တစ်ပိဿာလျှင် (၁၂၀၀၀)ကျပ်၊ ငါးအုံတုံ တစ်ပိဿာလျှင် (၁၁၀၀၀)ကျပ်၊ ငါးအုံတုံခုတ်သား တစ်ပိဿာလျှင်  (၁၈၀၀၀)ကျပ်၊ ငါးမြင်းခုတ်သား တစ်ပိဿာလျှင် (၁၀၀၀၀)ကျပ်၊ ငါးကြင်းခုတ်သား တစ်ပိဿာလျှင် (၁၄၀၀၀)ကျပ်၊ ငါးဖယ်ခြစ်တစ်ပိဿာလျှင် (၁၈၀၀၀)ကျပ်၊  ပုစွန်ထုပ် တစ်ပိဿာလျှင် (၃၂၀၀၀)ကျပ်ဖြင့် အရောင်းအဝယ်ဖြစ်လျက်ရှိပါသည်။

          ငါးဈေးနှုန်းများအား ဇန်နဝါရီလ တတိယပတ်နှင့်နှိုင်းယှဉ်ပါက ငါးရံ့အကောင်လိုက် တစ်ပိဿာလျှင် (၂၀၀၀)ကျပ်၊ ငါးမုတ် တစ်ပိဿာလျှင် (၅၀၀)ကျပ်ဈေးနှုန်းမြင့်တက်ကာ တီလားဗီးယားအကောင်သေး တစ်ပိဿာလျှင် (၁၀၀၀)ကျပ်၊ ငါးဘတ် တစ်ပိဿာလျှင် (၁၀၀၀)ကျပ်၊  ငါးကြင်းခုတ်သား တစ်ပိဿာလျှင် (၂၀၀၀)ကျပ် ဈေးနှုန်းကျဆင်းပြီး   ကျန်ငါးဈေးနှုန်းများမှာ ပုံမှန်အတိုင်း အရောင်းအဝယ်ဖြစ်လျက်ရှိကြောင်း  ကန့်ဘလူမြို့မဈေးအတွင်း ရောင်းချလျက်ရှိသောငါးဒိုင်များမှ သတင်းရရှိပါသည်။

DOCA(စစ်ကိုင်း)

    လှည်းကူးခရိုင်၊ လှည်းကူးမြို့နယ်၊ ကလီထော်အုပ်စု၊ ရွှေကြာကန်ကျေးရွာရှိ စီးပွားရေးလုပ်ငန်းရှင် ဦးကျော်လင်းဦး၏ CP အသားစားကြက်မွေးမြူရေးလုပ်ငန်းသို့ သွားရောက်လေ့လာခဲ့ရာတွင် ခြံမန်နေဂျာ ဦးမျိုးချစ်က ကြက်ပေါက်များကို ထောက်ကြန့်မြို့ရှိ “ထွန်း”မွေးမြူရေးအစာ၊ ဆေးနှင့်ကြက်ပေါက်ဖြန့်ချိရေးလုပ်ငန်းမှဝယ်ယူ၍ မွေးမြူရကြောင်း၊ ၎င်းတို့တွင် ကြက်ခြံ(၂)ခြံရှိရာ တစ်ခြံလျှင် ကြက်အကောင် (၃၀၀၀) ဖြင့်  စုစုပေါင်း (၆၀၀၀)ကျော်ကို စီးပွားဖြစ်မွေးမြူထားကြောင်းနှင့် ကြက်ပေါက်တစ်ကောင်လျှင် (၁၃၀၀)ကျပ်နှုန်းဖြင့် ဝယ်ယူမွေးမြူခဲ့ကြောင်းသိရှိရပါသည်။

    ကြက်ပေါက်များကို စတင်မွေးမြူစမှ ရက်ပေါင်း(၂၀)ရက်နေ့အထိ ဖွဲမှုန့်ခံ၍ မိမိအနေဖြင့် မွေးမြူထားကြောင်း၊ ရက်ပေါင်း(၂၀)ကျော်ပါက ဖွဲမှုန့်များကိုဖယ်ပြီး ကြမ်းကျင့်ချိန်တွင် ကြမ်း၏ အအေးဒဏ်နှင့် ရေ၏အအေးဒဏ်ကိုမခံရအောင် အထူးဂရုပြု၍စိုက်မွေးမြူရပါသည်။ CP ကြက်စာဈေးနှုန်းအနေဖြင့် ကြက်သားပေါက်အစာ (၅၀ကီလို) တစ်အိတ်လျှင် (၈၅၀၀၀)ကျပ်၊ ကြက်လတ်စာ (၅၀ကီလို) တစ်အိတ်လျှင် (၈၂၀၀၀)ကျပ်နှင့် ကြက်ကြီးစာ (၅၀ကီလို) တစ်အိတ်လျှင် (၈၁၀၀၀)ကျပ်နှုန်းဖြင့်ဝယ်ယူကာ ကြက်စာများကို တစ်နေ့လျှင် (၃)ကြိမ်ခန့်ကျွေးမွေး၍ မွေးမြူရပါသည်။ ရက် (၄၀) မှ (၄၅)ရက်အတွင်းရှိသော CP အသားစားကြက်ကို ဈေးကွက်အတွင်း၌ (၁)ပိဿာလျှင် (၄၂၀၀) ကျပ်မှ (၄၃၀၀) ကျပ်ဖြင့် ရွှေပြည်သာမြို့နယ်ရှိ ကြက်ဒိုင်မှ မိမိတို့ မွေးမြူရေးခြံသို့ လာရောက်ဝယ်ယူခဲ့ကြောင်း ခြံမန်နေဂျာ၏ ပြောပြမှုအရသိရှိရပါသည်။

DOCA(ရန်ကုန်)

    ကြက်သွန်နီမျိုးစိတ် အများအပြားရှိသည့်အထဲမှ ရဲကျွန်း(ခေါ်)မင်းတုန်းကြက်သွန်နီသည် အသေးဆုံးနှင့် အချိုဆုံးကြက်သွန်နီဖြစ်ပါသည်။ ရိုးရိုးကြက်သွန်များကို ဈေးများတွင် အလွယ်တကူ ဝယ်ယူ၍ရပေမဲ့ မင်းတုန်းကြက်သွန်နီကတော့ တစ်ရာသီပဲပေါ်သောကြောင့် ယခုအချိန်တွင် ဝယ်ယူစုဆောင်းထားသင့်ပါသည်။ ပင်ခြောက် ဆောင်းကြက်သွန်နီ ဖြစ်သောကြောင့် နှစ်ပေါက် အထားခံသောဆောင်းကြက်သွန်ဖြစ်ပါသည်။ အသုပ်သုပ်ရာတွင်ထည့်စားပါက အလွန်ချိုပြီး ကျွပ်ပါသည်။ မင်းတုန်းကြက်သွန်နီကို ထမင်းစားရာတွင် အတို့အနေဖြင့် အများဆုံးစားသုံးကြပါသည်။ ရာသီစာ ခရမ်းချဉ်သီးချက်နှင့် တွဲဖက်၍ စားသုံးပါက အလွန်လိုက်ဖက်သော တို့စရာတစ်မျိုး ဖြစ်ပါသည်။ မင်းတုန်းကြက်သွန်နီ ဈေးနှုန်းအနေဖြင့် တစ်ပိဿာလျှင် ၃၀၀၀ကျပ်နှုန်းဖြင့် ရောင်းချပြီး အထုံးတစ်ထုံးလျှင် ၃၀၀ကျပ်နှုန်းဖြင့် ရောင်းချကြောင်း သိရပါသည်။

DOCA(ပဲခူး)

   ပြည်ဈေးကွက်တွင် မိုးစပါးဈေးများမှာ ဈေးများ ဆက်လက်မြင့်တက်နေပါသည်။ ၂၀၂၄ ဇန်နဝါရီလမှစ၍ စပါးတင်း ၁၀၀လျှင် ၂၀၀၀၀၀၀ ကျပ်၊ ဆန်တစ်အိတ်လျှင် ၇၄၀၀၀ကျပ် ရှိရာမှ ယခု ဇန်နဝါရီ စတုတ္ထပတ်တွင် ကရင်မစပါးမှာ ၄၆ပေါင် တင်း ၁၀၀လျှင် ၂၁၀၀၀၀၀ကျပ် ၊ ဆန်တစ်အိတ် လျှင် ၇၆၀၀၀ကျပ်၊ မှော်ဘီစပါးတင်း(၁၀၀)လျှင် ၂၁၅၀၀၀၀ ကျပ်၊ ဆန်တစ်အိတ်လျှင် ၈၂၀၀၀ ကျပ်ဖြင့် ဈေးဆက်လက်မြင့်တက်လာခဲ့ပါသည်။ ဆင်းသွယ်ဆန် တစ်အိတ်လျှင် ၈၅၀၀၀ ကျပ်၊ မနောသုခဆန်တစ်အိတ်လျှင် ၈၀၀၀၀ကျပ်၊ ရတနာတိုးဆန်မှာ ၇၄၀၀၀ကျပ်၊ ကျော်ဇေယျ ဆန်မှာ ၇၆၀၀၀ကျပ်ဖြင့် အရောင်းအဝယ်ရှိပြီး ဆန်ကွဲ Extra တစ်အိတ်လျှင် ၅၁၀၀၀ကျပ် ၊ ဆန်ကွဲ 2,3,4 တစ်အိတ်လျှင် ၄၉၀၀၀ကျပ်၊ ဆန်ကွဲ 1,2  တစ်အိတ်လျှင် ၅၀၀၀၀ကျပ်ဖြင့် ဈေးအနည်းငယ် မြင့်တက်ခဲ့ပါသည်။ ဖွဲနုတစ်ပေါင်လျှင် ၂၆၀ ကျပ်ဖြင့် အရောင်းအဝယ်ရှိပါသည်။

     ပြည်မြို့မှ ရန်ကုန်မြို့သို့ ဆန်တင်ပို့ရောင်းချမှုမှာ တစ်ပတ်လျှင် ရန်ကုန်သို့ ၃၁၅၀အိတ် တင်ပို့ ရောင်းချမှုရှိပါသည်။ စပါးဈေးများမှာဆက်လက်မြင့်တက်နေသော်လည်း အရောင်းအဝယ် ဖြစ်လျက်ရှိကြောင်း သိရှိရပါသည်။

DOCA(ပဲခူး)