ပြည်တွင်းကုန်သွယ်မှုသတင်း

              ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မြောင်းမြခရိုင်ဦးစီးမှူးရုံး၊ ဒု-ခရိုင်ဦးစီးမှူး ဦးသန့်ဇင်နှင့် မြောင်းမြမြို့နယ်ဦးစီးမှူး  ဦးလှထွဋ်ဦးတို့သည်(၂၅.၆.၂၀၂၂)ရက်နေ့ နံနက် (၁၀:၀၀)နာရီအချိန်က စားသုံးဆီရည်ညွှန်းဈေးဖြင့် ရောင်းချနေမှုအား သွားရောက်ကွင်းဆင်းစိစစ် ဆောင်ရွက်ခဲ့ပါသည်။

                   ထိုသို့ကွင်းဆင်းစိစစ်ရာတွင် ဒု-ခရိုင်ဦးစီးမှူးဦးသန့်ဇင်မှ စားသုံးဆီရောင်းချပေးခြင်း၏ ရည်ရွယ်ချက်မှာ စားသုံးသူပြည်သူများအနေဖြင့် သက်သာသောဈေးနှုန်းဖြင့် ဝယ်ယူသုံးစွဲနိင်ရေး အတွက် စားသုံးဆီများကိုဖြန့်ဖြူးရောင်းချပေးရခြင်းဖြစ်ကြောင်း၊ ဆိုင်ပိုင်ရှင်များအနေဖြင့် ခွဲဝေရရှိ သည့် စားသုံးဆီပိဿာ(၄၄၀၀)အား တစ်ပိဿာလျှင် ရည်ညွှန်းဈေး(၅၈၅၀)ကျပ်ဈေးဖြင့် ပြည်သူ တစ်ဦးလျှင် (၁)ပိဿာနှုန်း ရောင်းချပေးလျှက်ရှိသော လယ်ယာသုံးဈေးရှိ ကျန်စစ်ဝင်းကုန်မျိုးစုံဆိုင်ရှင်အနေဖြင့် စားသုံးဆီရောင်းချမှုပုံစံနှင့် အချိန်အတွယ်မှန်ကန်ရေးတို့အား ကွင်းဆင်းကြပ်မတ် စိစစ်ဆောင်ရွက်ခဲ့ကြောင်း သိရှိရပါသည်။

DOCA(ဧရာဝတီ)

                ကယားပြည်နယ်တွင် ဟင်းသီးဟင်းရွက်၊ သစ်သီးဝလံများကို လွိုင်ကော်မြို့နယ်ရှိ လင်ဖုံလေးနှင့် ကုန်းသာကျေးရွာများတွင် အဓိကစိုက်ပျိုးကြပြီး ယခုမိုးရာသီအချိန်တွင် ၎င်းဒေသများမှထွက်ရှိသော ဟင်းသီးဟင်းရွက်များ ဈေးကွက်အတွင်း အများအပြားဝင်ရောက်လာရာ ဒေသ ထွက် ဂေါ်ဖီထုပ်ဈေးနှုန်းမှာ ယခု ဇွန်လအတွင်း ဂေါ်ဖီထုပ်တစ်ထုပ်လျှင် အကြီး(၅၀၀)ကျပ်၊ အသေး(၂၀၀)ကျပ်ဈေး အရောင်းအဝယ်ဖြစ်လျှက်ရှိရာ ယခင် မေလ တွင် ဂေါ်ဖီထုပ်တစ်ထုပ်လျှင် အကြီး (၈၀၀)ကျပ်၊ အသေး(၄၀၀) ကျပ်ဈေးရှိခဲ့ပြီး ယခင် မေလ နှင့် ယခု ဇွန်လ နှိုင်းယှဉ်လျှင် ဂေါ်ဖီထုပ်တစ်ထုပ်လျှင် အကြီး(၃၀၀)ကျပ် ၊အသေး (၂၀၀) ကျပ်ခန့် ဈေးနှုန်းကျဆင်းလာကြောင်း ၊ ဈေးနှုန်းကျဆင်းရခြင်းမှာ ဒေသထွက် ဂေါ်ဖီထုပ်များ ဈေးကွက်အတွင်း ဝင်ရောက်လာခြင်းကြောင့်  ဈေးနှုန်းကျဆင်းရခြင်းဖြစ်သည်ဟု လွိုင်ကော်မြို့၊  သီရိမင်္ဂလာဈေးရှိ ဂေါ်ဖီထုပ် ရောင်းချ သော လုပ်ငန်းရှင်တစ်ဦးထံမှ သိရပါသည်။

DOCA(ကယား)

          မန္တလေးတိုင်းဒေသကြီး၊ ကျောက်ဆည်ခရိုင်တွင် ကြက်သွန်နီစိုက်ဧက ၂၀၂၁-၂၀၂၂ ဘဏ္ဍာနှစ်တွင် (၂၇၉၇၁)ဧက စိုက်ပျိုးနိုင်ခဲ့ပြီး၊ စိုက်ဧကအားလုံး ရိတ်သိမ်းပြီးဖြစ်ပါသည်။ ဆောင်းကြက်သွန်နီများကို စက်တင်ဘာလ၊ အောက်တိုဘာလ၊ နိုဝင်ဘာလများတွင် စတင်စိုက်ပျိုးပြီး အစောဆုံးပေါ်သော ဆောင်းကြက်သွန်နီများမှာ ၂၀၂၁ ခုနှစ်၊ ဒီဇင်ဘာလ တတိယပတ်တွင် စတင်ထွက်ရှိခဲ့ပြီး ဖေဖော်ဝါရီလတွင် စိုက်ဧကများအားလုံးနီးပါး ရိတ်သိမ်းပြီးဖြစ်ပါသည်။ ကြက်သွန်ပေါ်ဦးပေါ်စတွင် တောင်သူများအနေဖြင့် တစ်ပိဿာလျှင် (၄၀၀/-)ကျပ်မှ (၅၀၀/)ကျပ်အထိသာ ရောင်းချခဲ့ရပြီး အရှုံးမရှိခဲ့သော်လည်း တောင်သူများအနေဖြင့် တွက်ချေမကိုက်၍ အချို့ကိုသာ ရောင်းချခဲ့ရပြီး ကျန်ရှိသည့်ကြက်သွန်နီများကို အိမ်တွင်သိုလှောင်ထားခဲ့ပါသည်။ ၂၀၂၂ခုနှစ်၊ ဧပြီလ ဒုတိယပတ်တွင် ကြက်သွန်နီစျေးကွက်မှာ (၇၀၀/-)ကျပ်မှ (၈၀၀/-)ကျပ်အထိ စျေးနှုန်းများ အနည်းငယ်မြှင့်တက်လာခဲ့ပြီး လက်ရှိအချိန် ဇွန်လတတိယပတ်မှစ၍ ကြက်သွန်နီစျေးနှုန်းမှာ အကြီး၊အသေး အရွယ်အစားပေါ်မူတည်၍ တစ်ပိဿာလျှင် (၁၈၀၀/-)ကျပ်မှ (၂၀၀၀/-)ကျပ်အထိ မြင့်တက်လျက်ရှိပါသည်။ စျေးနှုန်းများမြင့်တက်လာသဖြင့် ကြက်သွန်စိုက် တောင်သူများ၊ ပွဲစားများမှာ အကျိုးအမြတ်များ ပိုမိုရရှိလာခဲ့ပါသည်။ ကြက်သွန်နီစီးဆင်းမှုအနေဖြင့် ရန်ကုန်၊ မန္တ‌လေးနှင့် မြဝတီမြို့များသို့ အများဆုံး တင်ပို့ရောင်းချလျှက်ရှိကြောင်းသိရှိရပါသည်။ ကြက်သွန်နီစျေးကွက်မှာ ယခင်နှစ်ထက်စာလျှင် တောင်သူ၊ ကုန်သည်၊ ပွဲစားများအတွက် အကျိုးအမြတ်များ ပိုမိုရရှိလာမည်ဖြစ်ကြောင်း ရေးသားတင်ပြအပ်ပါသည်။

DOCA(မန္တလေး)

           မကွေးတိုင်းဒေသကြီးအတွင်း ဆီထွက်သီးနှံကဏ္ဍဖွံ့ဖြိုးတိုးတက်ရေးအတွက် နေကြာသီးနှံ တိုးချဲ့စိုက်ပျိုးရေး အလေးထားဆောင်ရွက်လျက်ရှိရာ မကွေးခရိုင်၊ တောင်တွင်းကြီးမြို့နယ်၊ ရေဦးအုပ်စု၊ ရေဦးကျေးရွာမှ လယ်ယာမြေများတွင် ၂၀၂၂ခုနှစ် မေလဆန်းမှစ၍ မိုးဦးမိုးဖြင့် စိုက်ပျိုးခဲ့ သည့် မိုးနှမ်းနှင့် နေကြာသီးညှပ် စိုက်ခင်းများ အောင်မြင်ဖြစ်ထွန်းလျက်ရှိကြောင်း သိရှိရပါသည်။

          တောင်တွင်းကြီးမြို့နယ်အတွင်း ၂၀၂၂-၂၀၂၃ ခုနှစ် စိုက်ပျိုးရာသီတွင် မိုးနှမ်း(၉၉၃၉၅) ဧက စိုက်ပျိုးရန် လျာထားခဲ့ကြောင်းနှင့် မိုးနေကြာသီးညှပ်(၃၅၂၇)ဧက၊ သီးသန့်(၁၂၃၀)ဧက စုစုပေါင်း (၄၇၅၇)ဧက စိုက်ပျိုးရန်လျာထားခဲ့သော ကျေးရွာအုပ်စု(၂၈)အုပ်စုတို့တွင် မိုးနေကြာ(၂၆၈၀)ဧက စိုက်ပျိုးနိုင်ခဲ့ပြီး သတ်မှတ်ဧက ပြည့်မီစိုက်ပျိုးရန်အတွက် ၂၀၂၂ခုနှစ်၊ ဩဂုတ်လနှင့် စက်တင်ဘာလများအတွင်း အပြီးစိုက်ပျိုးသွားမည် ဖြစ်ကြောင်း သိရှိရပါသည်။

DOCA(မကွေး)

             စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်ဦးစီးမှူးရုံးမှ ခရိုင်ဦးစီးမှူး၊ မြို့နယ်တာဝန်ခံနှင့် ဝန်ထမ်းများသည် စားသုံးသူဆိုင်ရာအသိပညာပေးလုပ်ငန်းများ၊ စားသုံးသူကာကွယ်ရေးဥပဒေပါ ပြဌာန်းချက်များအား သိရှိလိုက်နာဆောင်ရွက်နိုင်စေရန် စီးပွားရေးလုပ်ငန်းရှင်များနှင့် တွေ့ဆုံဆွေးနွေး အသိပညာပေးခြင်း၊ ထုတ်ကုန်များလုံခြုံစိတ်ချမှုရှိစေရေးအတွက် ဈေးကွက်စောင့်ကြည့်စစ်ဆေးခြင်း၊ ပြည်တွင်းကုန်သွယ်မှုကဏ္ဍ ဖွံ့ဖြိုးတိုးတက်လာစေရေးအတွက် စိုက်ပျိုးမွေးမြူသူတောင်သူများ၊ စီးပွားရေးလုပ်ငန်းရှင်များနှင့် တွေ့ဆုံဆွေးနွေးခြင်း၊ သတင်းအချက်အလက်များ ဖြန့်ဝေပေးခြင်း လုပ်ငန်းများဆောင်ရွက်လျက်ရှိရာ ဇွန်လ(၁၈)ရက်နေ့၊ နံနက် (၀၉:၀၀)အချိန်တွင် ပခုက္ကူမြို့ ပေါ်ရှိဈေးများ၊ အိမ်ဆိုင်များတွင် စားအုန်းဆီရောင်းချနေမှုများအား ကွင်းဆင်းကြီးကြပ်ခဲ့ပါသည်။

          ကွင်းဆင်းဆောင်ရွက်ရာတွင် စားအုန်းဆီရောင်းချသည့် ဆီကုန်သည်နှင့်ဆီလုပ်ငန်းရှင် အသင်းဝင်များအား ခရိုင်ဦးစီးမှူးမှ မိမိတို့ဝန်ကြီးဌာနသည် စားသုံးဆီတင်သွင်း၊ သိုလှောင်၊ ဖြန့်ဖြူးခြင်းလုပ်ငန်းကြီးကြပ်ရေး ကော်မတီဖွဲ့စည်းထားကြောင်း ပြည်ပမှတင်သွင်းလာသည့် စားသုံးဆီများ သတ်မှတ်အရည်အသွေး စံချိန်စံညွှန်းများနှင့်ပြည့်မှီစေရေး စားသုံးသူပြည်သူများ ကျန်းမားရေးနှင့်ညီညွှတ်သော စားသုံးဆီများကို သုံးစွဲနိုင်ရေး၊ ဈေးနှုန်းတည်ငြိမ်စွာဖြင့် ဝယ်ယူစားသုံးနိုင်စေရေးတို့အတွက် ကြီးကြပ်ထိန်းကျောင်းဆောင်ရွက်လျက်ရှိပါကြောင်း၊ လက်ကား ဖြန့်ဖြူးရောင်းချသူများအနေဖြင့် ဒေသအရောက် ဈေးနှုန်းများအပေါ်  ၂% အမြတ်ထက် မပိုသော ဈေးနှုန်းဖြင့် ဈေးကွက်အတွင်းသို့ ပြန်လည်ဖြန့်ဖြူးရောင်းချသွားရန်၊ လက်လီဈေးကွက်အတွင်း ဖြစ်သင့်ဖြစ်ထိုက်သည့် ဈေးနှုန်းများဖြင့်ရောင်းချသွားရန် အဆမတန်မြှင့်တင်ရောင်းချခြင်းများ မပြုလုပ်ရန်နှင့် ဈေးနှုန်းမြှင့်တင်ရောင်းချပါက အရေးကြီး ကုန်စည်နှင့်ဝန်ဆောင်မှု ဥပဒေအရ အရေးယူ ဆောင်ရွက်ခံရမည်ဖြစ်ကြောင်း အသိပေးရှင်းလင်းဆွေးနွေးခဲ့ပါသည်။

          ဆက်လက်၍ စားသုံးဆီကုန်သည် အသင်းဝင်များမှ စားသုံးသူပြည်သူများ ဈေးနှုန်း သက်သာစွာ ဝယ်ယူစားသုံးနိုင်ရေးအတွက် ဆိုင်များ၊ ဈေးများတွင် စားအုန်းဆီ (၁)ပိဿာလျှင် ၅၉၀ဝိ/-၊ ၆၀၀ဝိ/- ဈေးနှုန်းဖြင့် လူတစ်ဦးလျှင် (၃)ပိဿာနှုန်းဖြင့် ရောင်းချနေမှုအား စားသုံးသူပြည်သူများလက်ဝယ် မှန်ကန်စွာ ရောက်ရှိနိုင်ရေးအတွက် ခရိုင်ဦးစီးမှူးနှင့် ဝန်ထမ်းများက ကွင်းဆင်းကြီးကြပ်ဆောင်ရွက်လျက်ရှိပါကြောင်း ရေးသားတင်ပြပါသည်။

DOCA(မကွေး)