ပြည်တွင်းကုန်သွယ်မှုသတင်း

    မကွေးတိုင်းဒေသကြီး၊ ပခုက္ကူခရိုင်၊ ရေစကြိုမြို့နယ်အတွင်း ချင်းတွင်းမြစ်ရေဝင်ရောက်ရာ ဒေသများတွင် မြစ်ရေကျချိန်၌ ဆောင်းသီးနှံများဖြစ်သည့် ကြက်သွန်နီ၊ မြေပဲ၊ ကုလားပဲ၊ ထောပတ်ပဲ စသည့်အခြားပဲမျိုးစုံ သီးနှံများကို စိုက်ပျိုးကြပါသည်။ ချင်းတွင်းမြစ်၏ အနောက်ဘက်ကမ်းကျေးရွာ များဖြစ်သည့် ညောင်တော၊ ရှစ်အိမ်တန်း၊ ကျွန်းဘိုပင်၊ ဇီးကျွန်း၊ ကူတုတ်နှင့် အောင်ချမ်းသာကျေးရွာ များတွင် ထောပတ်ပဲများကို အများအပြားစိုက်ပျိုးကြပါသည်။ အောင်ချမ်းသာကျေးရွာနေ ထောပတ် ပဲစိုက်တောင်သူ ဦးကျော်မင်းက ချင်းတွင်းမြစ်ရေကျချိန် အောက်တိုဘာ၊ နိုဝင်ဘာလများတွင် ထောပတ်ပဲများကို စတင်စိုက်ပျိုးကြပြီး မိမိအနေဖြင့် (၅)ဧကခန့်စိုက်ပျိုးထားကြောင်း၊ ထောပတ်ပဲ သီးနှံ (၁)ဧကလျှင် စိုက်ပျိုးကုန်ကျမှုစရိတ်အနေဖြင့် မျိုး၊ သွင်းအားစု၊ မြေပြင်ခြင်း၊ ရိတ်သိမ်းခြင်းများ အတွက် ကျပ်(၇၀၀၀၀၀)ခန့် ယခင်နှစ်က ကုန်ကျခဲ့ကြောင်း၊ အထွက်အနေဖြင့် ပိုးမွှားအန္တရာယ်ကင်းလျှင် (၁၅/၂၀)တင်း ခန့် ထွက်ရှိခဲ့ကြောင်း စိုက်ပျိုးတောင်သူပြောပြချက်အရ သိရှိရပါသည်။ 

     ယခုနှစ်တွင် အောင်ချမ်းသာကျေးရွာအုပ်စုတစ်ခုလုံးတွင် (၇၀)ဧကခန့် စိုက်ပျိုးကြကြောင်း မိမိအနေဖြင့် စိုက်ပျိုးထားသည့် ထောပတ်ပဲ စိုက်ခင်းများ၏ လတ်တလောအခြေအနေအရ အသီးအပွင့်များ ဝေဆာ၍ အထွက်နှုန်းကောင်းနိုင်ကြောင်း၊ မတ်လကုန်ခန့်တွင် ရိတ်သိမ်းရမည်ဖြစ်ကြောင်း၊ ယခုလက်ရှိအတိုင်း ပိုးမွှားအန္တရာယ်ကျရောက်မှုမရှိခြင်းနှင့် ရာသီဥတုဖောက်ပြန်မှုမရှိပါက (၁)ဧက လျှင် (၂၀/၂၅) တင်းခန့် ထွက်ရှိနိုင်ကြောင်း ခန့်မှန်းမိပါသည်။ ယခုနှစ် ကုန်ကျစရိတ်အနေဖြင့် မျိုး၊ သွင်းအားစု၊ မြေပြင်ခြင်း၊ ရိတ်သိမ်းခြင်းများမှာ ဈေးနှုန်းများကြီးမြင့်နေသောကြောင့် (၁)ဧကလျှင် ကုန်ကျစရိတ် ကျပ်(၁၀၀၀၀၀၀)ခန့် ကုန်ကျကြောင်း၊ လက်ရှိအနေဖြင့် အရောင်းမဝယ်မရှိကြောင်း၊ ယခင်ဈေးငုတ်အနေဖြင့် (၁)တင်းလျှင် ကျပ်(၈၀၀၀၀) မှ (၉၀၀၀၀)ခန့်ရှိကြောင်း၊ ကျွန်တော်တို့ ထောပတ်ပဲ စိုက်တောင်သူများအနေဖြင့် မကြာမီ ရိတ်သိမ်းတော့မည်ဖြစ်သည့်အတွက် ယခင်ဈေးငုတ်အတိုင်းရရှိမည်ဆိုလျှင် အကျိုးအမြတ်အနေဖြင့် ကျပ်(၆၀၀၀၀၀)ခန့် ရရှိနိုင်ကြောင်း၊ အထွက်နှုန်းကောင်းပြီး ဈေးကောင်းရရှိနိုင်ရေး မျှော်လင့်လျက်ရှိကြောင်း တောင်သူဦးကျော်မင်း၏ ပြောပြချက်အရ သိရှိရပါသည်။

DOCA(မကွေး)

      မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့သည် စပါးစိုက်ဧကနည်းပြီး ဆန်လိုအပ်ချက်ရှိသောဒေသဖြစ်သောကြောင့် အခြားတိုင်းဒေသကြီးများနှင့် မြို့နယ်များမှ ဆန်တင်သွင်းရသောမြို့ဖြစ်ပါသည်။ ဧရာဝတီတိုင်းဒေသကြီးဖြစ်သော ပုသိမ်၊ မြောင်းမြမြို့များမှ ရေလမ်းကြောင်းဖြင့် အများဆုံးဝင်ရောက်ပြီး  ရွှေဘိုခရိုင်၊ ဆင်ဖြူကျွန်း၊ စလင်း ဒေသများမှလည်း နေ့စဉ်ဝင်ရောက်လျက်ရှိပါသည်။

     ယခုအချိန်တွင် ပခုက္ကူဒေသ၌ ဆန်အသစ်များ ဝင်ရောက်လျက်ရှိပြီး  ယခင် ၂၀၂၃ခုနှစ်၊ ဒီဇင်ဘာလထက် ဈေးနှုန်းမြင့်တက်လာသည်ကို တွေ့ရှိရပါသည်။ ၂၀၂၄ခုနှစ်၊ ဇန်နဝါရီလ (တတိယပတ်)တွင် အများသုံးဆန်ဖြစ်သော မြောင်းမြ ဧရာပဒေသာ ဆန်ဈေးနှုန်းမှာ တစ်အိတ်လျှင် ကျပ်(၁၄၀၀၀၀)၊ စလင်းမြို့နယ်၊ ရှောက်တောမှလာသော ဧရာပဒေသာဆန်(အသစ်)တစ်အိတ်လျှင် ကျပ်(၁၅၅၀၀၀)ရှိပါသည်။ ဧည့်မထဆန်မျိုးဖြစ်သော ချန်ဧရာ တစ်အိတ်လျှင် ကျပ်(၉၅၀၀၀)၊ မနောဖြူ(အသစ်)တစ်အိတ်လျှင် ကျပ်(၁၂၂၀၀၀)၊ နေလဆန် တစ်အိတ် လျှင် ကျပ်(၉၅၀၀၀)၊ ဝန်ကြီးပဒေသာ ဆန်တစ်အိတ်လျှင် ကျပ်(၁၅၅၀၀၀)၊ ဧရာမင်းဆန် တစ်အိတ်လျှင် ကျပ် (၉၅၀၀၀)၊ မနောသုခ(အသစ်) တစ်အိတ်လျှင် ကျပ်(၉၅၀၀၀)၊ ချန်သုခ(အသစ်) တစ်အိတ်လျှင် ကျပ်(၈၇၀၀၀)၊ နေလ ဧရာပဒေသာဆန်(ရှယ်) တစ်အိတ်လျှင် ကျပ်(၁၅၅၀၀၀)၊ ဖန်သီး(နွေဆန်အသစ်) တစ်အိတ်လျှင် ကျပ် (၉၀၀၀၀) ၊ ရွှေသမင် (နွေဆန်အသစ်) တစ်အိတ်လျှင် ကျပ် (၉၅၀၀၀) ၊ ရတနာတိုး (အသစ်) တစ်အိတ်လျှင် ကျပ် (၈၅၀၀၀)၊ ဇီယာဆန်(အသစ်) တစ်အိတ်လျှင် ကျပ် (၉၅၀၀၀) ဈေးဖြင့် အသီးသီးအရောင်းအဝယ်ဖြစ်လျက်ရှိပြီး ကောက်ညှင်းဆန်(အသစ်) တစ်အိတ်လျှင် ကျပ်(၁၂၀၀၀၀)ဖြင့် ဈေးမြင့်တက်နေကြောင်း  သိရှိရပါသည်။

      ပေါ်ဆန်းမွှေးမှာ ဒုတိယအများဆုံး စားသုံးသောဆန်ဖြစ်ပြီး မြောင်းမြဒေသမှ ဝင်ရောက်သလို ရွှေဘိုဒေသမှလည်း အများဆုံးဝင်ရောက်ပါသည်။ ရွှေဘိုပေါ်ဆန်းမွှေးမှာ ပိုမိုအရည်အသွေးကောင်း မွန်ပြီး ယခုလ(တတိယပတ်)တွင် (ရှယ်)တစ်အိတ်လျှင် ကျပ် (၁၆၀၀၀၀-၁၆၅၀၀၀)၊ မြောင်းမြပေါ် ဆန်းမှာ တစ်အိတ်လျှင် ကျပ်(၁၅၀၀၀၀)နှင့် အရောင်းအဝယ်ဖြစ်နေကြောင်း ဆန်ရောင်းဝယ်ရေး လုပ်ငန်းရှင်ထံမှ သိရှိရပါသည်။

DOCA(မကွေး)

     တောင်ငူဒေသပတ်ဝန်းကျင်ရှိ ကျေးရွာများ၌ ဟင်းသီးဟင်းရွက်များကို တစ်နိုင်တစ်ပိုင်စိုက်ပျိုးကြသူများပေါများပါသည်။ မိမိတို့စိုက်ခင်းများမှထွက်ရှိသော ဟင်းသီးဟင်းရွက်များအား တောင်ငူမြို့ရှိ ဘုရင့်နောင်ဈေးနှင့် ညောင်ပင်ဈေးများသို့ ကိုယ်တိုင်ရောင်းချ၍သော်လည်းကောင်း၊ တစ်ဆင့်ပြန်လည်ရောင်းချသူများအား ဖောက်သည်ပေး၍သော်လည်းကောင်း ရောင်းချကြပါသည်။

      စစ်တောင်းမြစ်နှင့် ခပေါင်းချောင်းကမ်းဘေးတစ်လျှောက်ရှိ ကျေးရွာများ၌ နေထိုင်သူများသည် ကမ်းဘေးနှင့် သဲသောင်ပြင်များပေါ်တွင် ဟင်းသီးဟင်းရွက်များကို ရာသီအလိုက် စိုက်ပျိုး ကြပါသည်။ တောင်ငူမြို့၊ အရှေ့ဘက်ကျေးရွာများမှထွက်သော ဘူးသီးများမှာ ယခုအခါ လှိုင်လှိုင်ပေါ်၍ ဈေးနှုန်းများလည်းကျဆင်းသွားပါသည်။

      ဘူးသီးတစ်လုံးလျှင် ယခင်က ၇၀၀ ကျပ်တန်ဘူးသီးများမှာ ယခု ၂၀၂၄ခုနှစ်၊ ဇန်နဝါရီလ စတုတ္ထပတ်တွင် တစ်လုံးလျှင် ၃၀၀ကျပ်ဖြင့်လည်းကောင်း၊ ယခင်က တစ်လုံးလျှင် ၁၀၀၀ကျပ်၊ ၁၅၀၀ကျပ်တန်ဘူးသီးများမှာ ယခုအခါ၌ တစ်လုံးလျှင် (၅၀၀/၇၀၀) ကျပ်ဖြင့်လည်းကောင်း ဈေးနှုန်းများကျဆင်းနေကြောင်းသိရှိရပါသည်။

DOCA(ပဲခူး)

     မြန်မာ့အာဟာရအစားအစာတစ်ခုဖြစ်သော ကန်စွန်းဥကို ပြုတ်စားခြင်း၊  ကြော်စားခြင်း၊ သာကူနှင့်ကျိုစားခြင်း၊ ဟာလဝါမုန့်ပြုလုပ်ခြင်း  စသည်ဖြင့် နည်းမျိုးစုံလုပ်စားလေ့ရှိကြပါသည်။ ကန်စွန်းဥတွင် အတွင်းသား လိမ္မော်ရောင်၊ အဖြူရောင်၊ ခရမ်းရောင်ဟူ၍ (၃) မျိုးရှိရာ ကြော်ရာ၌ ခရမ်းရောင်ကန်စွန်းဥကိုသာ အများဆုံးအသုံးပြုလျက်ရှိကြောင်းသိရှိရပါသည်။ ကုန်ကြမ်းအနေဖြင့် ရှမ်းပြည်တောင်ပိုင်းမှ အဓိကဝယ်ယူကြောင်းသိရှိရပါသည်။ ကန်စွန်းဥကြော်ပြုလုပ်ရာတွင် ကန်စွန်းဥအား ရေနှင့်သန့်စင်အောင်ဆေး၍ အပေါ်ယံအခွံခွာပြီးနောက် စက်ဖြင့် ပါးပါးလှီးကာ  စားအုန်းဆီ၊ ဆား၊ ဟင်းခတ်မှုန့်တို့နှင့်ကြော်ရပါသည်။ ယခုကဲ့သို့ ကန်စွန်းဥလှိုင်လှိုင်ပေါ်ချိန်တွင်  ကန်စွန်းဥ (၁) ပိဿာလျှင် ကျပ်၁၃၀၀ဖြင့်ဝယ်ယူရပြီး ကန်စွန်းဥ(၁) အိတ်လျှင် အချိန် (၄၀) ပိဿာခန့်ပါရှိကြောင်းနှင့် ကန်စွန်းဥအချိန်  (၄၀) ပိဿာပါ (၁) အိတ်လျှင် စားအုန်းဆီ (၄) ပိဿာဖြင့် ကြော်ရကြောင်းသိရှိရပါသည်။ လောင်စာဆီခမှာ ၂၀၀၀၀/-ကျပ်နှင့် လုပ်သားခမှာ ၁၀၀၀၀/-ကျပ်ကုန်ကျပါသည်။ ကန်စွန်းဥ (၁)အိတ်လျှင်   ကန်စွန်းဥကြော် ၁၂ပိဿာခန့်ထွက်ရှိကြောင်းသိရှိရပါသည်။ ကန်စွန်းဥကြော် ၁ပိဿာလျှင် ၁၂၀၀၀ကျပ်ဖြင့်ရောင်းချပြီး ၃၀၀ဂရမ်ပါ ဘူးတစ်ဘူးလျှင် ၅၀၀၀ကျပ်ဖြင့်ရောင်းချလျက်ရှိခြင်းကြောင့်  (၂၀၀၀၀/-) ကျပ်ခန့်အမြတ်ကျန်ကြောင်း ပဲခူးမြို့၊ ညောင်အင်းကျေးရွာမှ ကန်စွန်းဥကြော်လုပ်ငန်းလုပ်ကိုင်သူတစ်ဦး၏ ပြောကြားချက်အရသိရှိရပါသည်။

DOCA(ပဲခူး)

   မကွေးတိုင်းဒေသကြီး၊ ပွင့်ဖြူမြို့နယ်သည် စိုက်ပျိုးရေးကို အဓိကထားလုပ်ကိုင်ပြီး ဥယျာဉ်ခြံ စိုက်ပျိုးလုပ်ကိုင်ရာတွင် ရာသီစာဟင်းသီးဟင်းရွက်များကို စိုက်ပျိုးကြသလို ဖီးကြမ်းငှက်ပျောကိုလည်း အများအပြား စိုက်ပျိုးကြကြောင်း သိရှိရပါသည်။

   ငှက်ပျောသီးကို ငှက်ပျောသီးမှည့်အဖြစ်လည်း စားသုံးသလို၊ ငှက်ပျောသီးကြော်၊ ငှက်ပျောရွှေကြည်၊ ငှက်ပျောယို၊ ငှက်ပျောခြောက်၊ ငှက်ပျောပူတင်း အစရှိသော သရေစာများလုပ်၍လည်း စားသုံးနိုင်ပါသည်။ ငှက်ပျောသီးမှည့်ကို ရှေ့လူကြီးများ အဆိုအရ မနက်ငှက်ပျော ညသင်္ဘောဆိုသလို မနက်စာ ဖီးကြမ်းငှက်ပျောသီးမှည့် တစ်လုံးကို စားသုံးပေးခြင်းဖြင့် ကျန်းမာရေးကိုများစွာ အထောက် အကူပြုပြီး အာဟာရပြည့်ဝစေပါသည်။ ကိုယ်ခံအားကောင်းစေပါသည်။ အစာအုပ်စု(၃)စုအနက် အာဟာရပြည့်ဝသည့် အစာအုပ်စုတွင်ပါဝင်ပြီး အမျှင်ဓါတ်ပါရှိ၍ ဝမ်းချုပ်ခြင်းမှလည်း ကာကွယ်ပေးပါသည်။ ဖီးကြမ်းငှက်ပျောသီးတစ်လုံးကို နေ့စဉ်စားသုံးပေးပါက ခန္ဓာကိုယ်အတွင်းရှိ မလိုအပ်သော အဆီပိုများကို လျော့ကျစေသည့်အပြင် ကိုယ်ခံအားကို ကောင်းမွန်စေပြီး ရောဂါများမဖြစ်စေရန် ကာကွယ်ပေးပါသည်။

   ပွင့်ဖြူမြို့၊ မြို့မဈေးအတွင်းရှိ အုန်း၊ ငှက်ပျောရောင်းဝယ်ရေးဆိုင်များတွင် ငှက်ပျောတစ်ဖီးလျှင် ကျပ်(၂၅၀၀-၃၀၀၀)ဖြင့်ရောင်းချပြီး ဖီးကြမ်းငှက်ပျောသီးကို ဈေးကွက်အတွင်းတွင် အဖီးလိုက်၊ အခိုင်လိုက်ရောင်းချလျက်ရှိသည့်အပြင် ပွင့်ဖြူမြို့မှထွက်ရှိသော ဖီးကြမ်းငှက်ပျောများကို စလင်း-ဆင်ဖြူကျွန်းနှင့် ချောက်မြို့နယ်များသာမက မင်းဘူး၊ မကွေးမြို့များထိ တင်ပို့ရောင်းချရကြောင်း သိရှိရပါသည်။

DOCA(မကွေး)