ပြည်တွင်းကုန်သွယ်မှုသတင်း

                  မြန်မာနိုင်ငံသည် စိုက်ပျိုး‌ရေးကို အခြေခံသော နိုင်ငံတစ်နိုင်ဖြစ်သည့်အားလျှော်စွာ ရာသီအလိုက် စိုက်ပျိုးသော ကောက်ပဲသီးနှံများ၊ ဟင်းသီးဟင်းရွက်များအပြင် နှစ်ရှည်သီးပင်၊ စားပင်များကိုလည်း ဒေသအလိုက် စိုက်ပျိုးထုတ်လုပ်လျက်ရှိသည်။  မြန်မာနိုင်ငံတွင် မွန်ပြည်နယ်၊ ကရင် ပြည်နယ်နှင့် တနင်္သာရီတိုင်းဒေသကြီးတို့တွင် ရော်ဘာစိုက်ပျိုးမှုအများဆုံးဖြစ်ပြီး ရန်ကုန်တိုင်းဒေသကြီး နှင့် ပဲခူးတိုင်းဒေသကြီးတွင်လည်း စိုက်ပျိုးမှုများရှိပါသည်။ စိုက်ပျိုးရေးထွက်ကုန်များအနက် နှစ်ရှည်ပင်အမျိုးအစား တစ်ခုဖြစ်သော ရော်ဘာပင်ကို ပဲခူးတိုင်းဒေသကြီး၊ ရွှေကျင်မြို့နယ်အတွင်း ‌စိုက်ဧက စုစုပေါင်း ၄၃၀၀၀ဧကနီးပါးရှိပြီး ယခုနှစ်တွင်း အစီးလှီးဧက ပေါင်း၁၂၀၀၀ကျော်ခန့် ရှိကြောင်းသိရှိရပါသည်။ ရာဘာစိုက်တောင်သူများအနေဖြင့် ရော်ဘာစိုက်ပျိုးချိန်မှ အစေးစတင် ထွက်ရှိသည့် အချိန်ထိ ၇နှစ်ကျော် ကာလထိ တစ်ဧကလျှင် သိန်း၂၀ခန့်ရင်းနှီးမြှပ်နှံရကြောင်း သိရှိရသည်။ စိုက်ပျိုးပြီး အပင် သက်တမ်း၆နှစ် မှစတင်၍ နှစ်၃၀ထိ အစေးလှီး နိုင်ကြောင်းသိရှိရသည်။ အစေးလှီးရာတွင် တစ်ဧကလျှင် စတင်ထွက်ရှိသည့် ပထမနှစ်တွင်အစေးပေါင် ၆၀၀ခန့်၊ဒုတိယနှစ်တွင် အစေးပေါင် ၈၀၀ခန့်၊  တတိယနှစ်တွင် အစေးပေါင် ၁၀၀၀ခန့်၊ စတုတ္ထနှစ်တွင် အစေးပေါင် ၁၂၀၀ခန့်၊ ပဉ္မနှစ်မှစ၍ နောက်ပိုင်းနှစ်များတွင် ၂၅၀၀ခန့် ထွက်ရှိလျက်ရှိကြောင်းသိရှိရပါသည်။ အစေးလှီးကာလအနေဖြင့် ပုံမှန်မိုးရာသီကုန်ဆုံးချိန် အောက်တိုဘာလမှ မေလအထိ အစေးထုတ်ယူလျက်ရှိကြောင်း သိရှိရပါသည်။ အစေးများမှာ မျိုးကွဲအလိုက်အနည်းအများထွက်ရှိပါသည်။ ယခုနှစ်တွင် အစေး တစ်ပေါင်လျှင်  ၉၀၀ မှ ၁၀၀၀ ကျပ်ရှိ၍ မှိုင်းခံပြား တစ်ပေါင်လျှင် ၁၁၀၀  ကျပ်ဖြင့် ရောင်းချလျက်ရှိပါကြောင်း သိရှိရပါသည်။ တစ်နိုင်တစ်ပိုင်ရော်ဘာခြံလုပ်ငန်းရှင်များမှ မိမိခြံထွက်ရှိသည့် ရော်ဘာအစေးများကို ရွှေကျင်မြို့နယ် သရက်ချောင်းကျေးရွာရှိ ‌ရွှေကျင် ရွှေပင်စံအဆင့်မြင့်ရော်ဘာစက်ရုံသို့ ရောင်းချလျက်ရှိကြောင်းသိရှိရပါသည်။ ထိုစက်ရုံတွင် အစေးများကို ရေ၊ ဖော့မစ်အက်စစ်တို့နှင့် အချိုးကျ ရောစပ်၍ အေးခဲရပါသည်။ ရောင်းတန်းဝင် ရာဘာပြားဖြစ်ရန်အတွက် ၁ဒသမ၈ မီလီမီတာ အထူအရွယ်အစားရရှိရန် ကြိတ်စက်ဖြင့်ကြိတ်ရပါသည်။ ရေစစ်ရန်အတွက် တစ်ညလှန်းထားရ၍ ရရှိလာသော ရော်ဘာပြားများကို မှိုင်းခံပြီး ရော်ဘာပြားများကို အဆင့်ခွဲ၍ ထုတ်ပိုးပြီး ရန်ကုန်ရှိ ပြည်ပ တင်ပို့ရောင်းချသည့်ကုမ္ပဏီများသို့ တင်ပို့လျက်ရှိကြောင်း သတင်းရရှိပါသည်။

DOCA(ပဲခူး)

            စစ်ကိုင်းတိုင်းဒေသကြီး၊ မုံရွာမြို့ရှိ မုံရွာကုန်စည်ဒိုင်အဖွဲ့ဝင်များအနေဖြင့် Online စနစ်ဖြင့် အရောင်းဝယ်ဖြစ်နေကြောင်း သိရပါသည်။ မေလ ဒုတိယပတ်တွင် ဖြစ်ပေါ်နေသော ပဲဈေးနှုန်းများမှာ ပဲတီစိမ်း(ကြီး)တစ်တင်းကျပ် ၄၇၈၀၀၊ ပဲစဉ်းငုံ တစ်တင်းကျပ် ၄၂၃၀၀၊ မတ်ပဲ တစ်တင်းကျပ် ၄၅၅၀၀၊ ကုလားပဲ ထိုင်ဝမ် တစ်တင်းကျပ် ၄၁၃၀၀၊ ကုလားပဲ 929 တစ်တင်းကျပ် ၄၂၇၀၀၊ ကုလားပဲ V2(သစ်) တစ်တင်းကျပ် ၄၅၅၀၀၊ ကုလားပဲ V3,7 တစ်တင်းကျပ် ၄၆၈၀၀ ဈေးနှုန်းများဖြင့် အရောင်းအဝယ် ဖြစ်နေကြောင်း သိရပါသည်။

          ဂျုံဖြူသန့်တစ်တင်း ကျပ် ၃၇၅၀၀၊ ဂျုံနီတစ်တင်း ကျပ် ၃၅၀၀၀၊ ပဲကြီး(သစ်) တစ်တင်း ကျပ် ၆၂၅၀၀၊ ပဲနီလုံး ရိုးရိုး တစ်တင်း ကျပ် ၄၂၀၀၀၊ ပဲနီလုံးကြား တစ်တင်းကျပ် ၄၂၅၀၀၊  ပဲပုတ်စေ့ တစ်တင်း ကျပ် ၄၉၅၀၀၊ ထောပတ်ပဲ တစ်တင်းကျပ် ၄၁၀၀၀၊  မြေထောက်ပဲ တစ်တင်းကျပ် ၄၉၀၀၀၊ ပုဂံပဲ တစ်တင်းကျပ် ၅၈၀၀၀၊ ပဲလွန်းဖြူတစ်တင်း ကျပ် ၃၂၀၀၀၊ ပဲလွန်းပြာ တစ်တင်း ကျပ် ၂၈၀၀၀၊ ပဲယင်းဝါတစ်တင်း ကျပ် ၄၂၀၀၀၊ အစေ့ထုတ်ပြောင်း(CP) တစ်တင်း ကျပ် ၁၇၀၀၀၊ ပြောင်းနီ တစ်တင်း ကျပ် ၁၂၀၀၀၊ ပြောင်းဖြူတစ်တင်းကျပ် ၁၃၆၀၀၊ ဆီထွက်သီးနှံများ ဖြစ်သော နှမ်းသီးနှံ ပေါက်ဈေးနှုန်း များမှာ နှမ်းညိုတစ်တင်းကျပ် ၅၂၀၀၀၊ နှမ်းနီ တစ်တင်းကျပ် ၅၂၀၀၀၊ နှမ်းနက်တစ်တင်းကျပ် ၆၅၀၀၀၊ နှမ်းဖြူ တစ်တင်းကျပ် ၆၂၀၀၀၊ မြေပဲလုံး ဆံနီ တစ်ပိဿာ ကျပ်၃၉၀၀၊ မြေပဲလုံးဆံဖြူ တစ်ပိဿာကျပ် ၄၀၀၀၊ ပဲဖတ် တစ်ပိဿာကျပ် ၁၆၆၀၊ နှမ်းဖတ် တစ်ပိဿာကျပ် ၁၁၇၀၊ နေကြာဖတ် တစ်ပိဿာကျပ် ၉၈၀ ဈေးနှုန်းအသီးသီးဖြင့် အရောင်းအဝယ်ဖြစ်နေကြောင်း သိရပါသည်။

          ယခုအပတ်ဈေးနှုန်းများမှာ ယခင်အပတ်နှင့် နှိုင်းယှဉ်လျှင် ပဲဈေးနှုန်းများနှင့် ဆီထွက်သီးနှံဈေး နှုန်းများဖြစ်သော မြေပဲဆံနှင့် နှမ်းသီးနှံ ဈေးနှုန်းများမှာလည်း အနည်းငယ်မြင့်တက်လာကြောင်း သိရှိရပါသည်။

DOCA(စစ်ကိုင်း)

              စစ်ကိုင်းတိုင်းဒေသကြီး၊ တမူးခရိုင်၊ ခမ်းပါတ်မြို့ရှိ ကျေးရွာအချို့တွင် ဒေသနှင့် ကိုက်ညီပြီး ဈေးကွက်ရရှိသည့် ပြောင်းဖူးများကို ရွေးချယ်စိုက်ပျိုးလျက်ရှိကြပြီး မိသားစု  စီးပွားရေးအတွက် နေ့စဉ်ပုံမှန် ဝင်ငွေရရှိလျက်ရှိကြောင်း သိရှိရပါသည်။

              ယခင်က ရိုးပြတ်လယ်ကွက်များတွင် ကျွဲနွားများအစာရအောင် သီးနှံများ စိုက်ပျိုးမှုမရှိဘဲ ထားရှိရာမှ ရာသီစာများဖြစ်သည့် ပြောင်းသီးနှံကို တနိုင်တပိုင်စိုက်ပျိုးခြင်းမှ ပိုမိုအကျိုးအမြတ် ဖြစ်ထွန်းလာသည်ကို သိရှိလာကြပြီး မိမိတို့၏ လယ်ယာမြေများကို ကွင်းလပ်မထားတော့ဘဲ သင့်လျော်ရာ အသီးအနှံများကို ရွေးချယ်စိုက်ပျိုးလာကြပါကြောင်း စွန်လည်ကျေးရွာ ပြောင်းဖူး စိုက်တောင်သူ ကိုမင်းဦးမှ ပြောကြားခဲ့ပါသည်။

              အဆိုပါပြောင်းဖူးများကို မိမိတို့၏ ကျေးရွာတွင်းတွင်သာမက အနီးအနားရှိ ကျေးရွာများအထိ ဖြန့်ဖြူးရောင်းချလျက်ရှိကြောင်းလည်း သိရပါသည်။ ကိုယ့်ဒေသတွင်း ရောင်းချရပြီး အနီးအနား ကျေးရွာများတွင်လည်း ဖောက်သယ်ယူသူများရရှိကာ မိမိ၏အခင်းနှင့် အိမ်သို့တိုက်ရိုက်လာဝယ်မည်ဆိုပါက တစ်ထောင်ကျပ်ဖိုးလျှင် ( ၆ ) ဖူး ရောင်းချပေးလျက်ရှိပြီး များများဝယ်ယူသည့် ဖောက်သည်များဖြစ်ပါက တစ်ထောင်ကျပ်ဖိုးလျှင်( ၇ ) ဖူး မှ ( ၈ ) ဖူး နှုန်းဖြင့် ရောင်းချပေးလျက်ရှိကြောင်းသိရှိရပါသည်။

              ပြောင်းဖူးသီးနှံကို စိုက်ပျိုးရောင်းချခြင်းဖြင့် မိသားစုစီးပွားရေးအတွက် တစ်ဖက်တစ်လှမ်းမှ အထောက်အပံ့ဖြစ်ကာ ပုံမှန်ဝင်ငွေ ရရှိလျက်ရှိကြောင်း လေ့လာသိရှိရပါသည်။

DOCA(စစ်ကိုင်း)       

          စစ်ကိုင်းတိုင်းဒေသကြီးတွင် မေလ(ဒုတိယ)ပတ်၌ စပါး/ဆန်ဈေးနှုန်းများမှာ ဆန်ပိုဒေသများ ဖြစ်သော ရွှေဘိုခရိုင်၊ ကလေးခရိုင်တို့တွင် ဈေးတန့်နေပြီး၊ မုံရွာခရိုင်တွင် အနည်းငယ် မြင့်တက်ကာ ကသာခရိုင်တွင် ဈေးအနည်းငယ်ကျနေပါသည်။

      စစ်ကိုင်းတိုင်းဒေသကြီးအတွင်းမေလ(ဒုတိယပတ်)တွင်ဖြစ်ပေါ်နေသောအခြေခံစားကုန်ဈေးနှုန်းများမှာ ရွှေဘိုခရိုင်တွင် ရွှေဘိုပေါ်ဆန်း(စပါး) တင်း၁၀၀လျှင် ကျပ်(၁၅၀၀၀၀၀)၊ ပေါ်ဆန်း (ဆန်)၂၄ ပြည်ပါ တစ်အိတ်လျှင်ကျပ်  ၅၃၀၀၀၊ ဧရာမင်း(စပါး)တင်း ၁၀၀လျှင် ၁၀၀၀၀၀၀၊ ဧရာမင်း(ဆန်) ၂၄ ပြည်ပါ တစ်အိတ် ကျပ် ၄၃၀၀၀၊ ရေဦးမြို့မှ ပေါ်ဆန်း (စပါး) တင်း ၁၀၀လျှင် ကျပ် ၁၅၀၀၀၀၀၊ ပေါ်ဆန်း(ဆန်) တစ်အိတ်လျှင်ကျပ် ၅၄၀၀၀၊  ဧရာမင်း (စပါး) တင်း၁၀၀ လျှင် ၉၅၀၀၀၀၊ ဧရာမင်း (ဆန်)၂၄ ပြည်ပါ တစ်အိတ်  ၄၂၀၀၀ ကျပ်များဖြင့် အရောင်းအဝယ်ဖြစ်နေကြောင်း သိရပါသည်။

        ကလေးခရိုင်၊ ကလေးမြို့နယ်တွင် ဧည့်မထ(စပါး) တင်း၁၀၀ လျှင် ၈၅၀၀၀၀၊ ဧည့်မထ(ဆန်)‌ ၂၄ပြည်ပါ တစ်အိတ်မှာ ကျပ် ၂၇၀၀၀၊ ငစိန်(စပါး) တင်း ၁၀၀ လျှင် ၈၀၀၀၀၀ ၊ ငစိန်(ဆန်)၂၄ပြည်ပါ တစ်အိတ်မှာ ၂၆၅၀၀၊ ဧရာမင်း (စပါး)တင်း ၁၀၀ လျှင် ကျပ် ၁၀၀၀၀၀၀၊ ဧရာမင်း(ဆန်)၂၄ပြည်ပါ တစ်အိတ်မှာကျပ် ၃၇၀၀၀ ဖြင့် အရောင်းအဝယ်ဖြစ်နေကြောင်း သိရပါသည်။

        ကသာခရိုင်၊ အင်းတော်မြို့နယ်တွင် မှော်ဘီ(၂)(စပါး) တင်း ၁၀၀လျှင် ကျပ်၈၅၀၀၀၀၊ မှော်ဘီ(၂) ဆန် ၂၄ပြည် တစ်အိတ် လျှင် ကျပ် ၃၅၀၀၀၊ ဆင်းဧကရီ(၃)(စပါး) တင်း၁၀၀ လျှင် ကျပ် ၇၅၀၀၀၀၊ ဆင်းဧကရီ-၃ဆန် ၂၄ပြည်တစ်အိတ်မှာကျပ် ၃၀၀၀၀၊ ဧရာမင်း (စပါး) တင်း ၁၀၀ လျှင် ကျပ် ၉၈၀၀၀၀၊ ဧရာမင်းဆန် ၂၄ ပြည်ဆန်တစ်အိတ်လျှင် ကျပ် ၃၇၀၀၀ ဖြင့် အရောင်းအဝယ်ဖြစ်နေကြောင်း သိရပါသည်။

         မုံရွာခရိုင်၊ မုံရွာမြို့တွင် ဧရာမင်း(စပါး)တင်း ၁၀၀ လျှင် ကျပ် ၁၁၀၀၀၀၀၊  ဧရာမင်း(ဆန်) ၂၄ပြည် တစ်အိတ်မှာ ကျပ် ၄၃၀၀၀ ဖြင့် အရောင်းအဝယ် ဖြစ်နေကြောင်း သိရပါသည်။

       စစ်ကိုင်းတိုင်းဒေသကြီးမှ အခြားတိုင်းဒေသကြီးများသို့ ဆန်စီးထွက်မှုမှာ မေလ(ပထမ)ပတ်တွင် ရန်ကုန် သို့ အိတ်ရေ ၃၅၀၀၀၊ မန္တလေးသို့အိတ်ရေ ၄၉၈၀၀၊ မကွေးသို့အိတ်ရေ ၁၀၀၀၊ နေပြည်တော်သို့ အိတ် ရေ ၁၀၀၀၀၊ ရှမ်း (တောင်)သို့ အိတ်ရေ ၆၀၀၀၊ ရှမ်း(မြောက်)သို့ အိတ်ရေ ၆၀၀၀၊  စုစုပေါင်း အိတ် ရေ (၁၀၇၈၀၀)အိတ်၊ တန်အားဖြင့် (၅၃၉၀)စီးထွက်ခဲ့ပြီး၊ ယခု မေလ(ဒုတိယ)ပတ်တွင် စစ်ကိုင်းတိုင်း ဒေသကြီးမှ အခြားတိုင်းဒေသကြီးများသို့ ဆန်စီးထွက်မှုမှာ ရန်ကုန်သို့ အိတ်ရေ ၃၂၀၀၀၊ မန္တလေးသို့ အိတ်ရေ ၄၅၃၀၀၊ မကွေး သို့ အိတ်ရေ ၁၀၀၀၊ နေပြည်တော်သို့ အိတ်ရေ ၁၀၅၀၀၊ ရှမ်း(တောင်)သို့ အိတ်ရေ ၇၀၀၀၊ ရှမ်း(မြောက်)သို့အိတ်ရေ ၇၀၀၀၊ စုစုပေါင်းအိတ်ရေ (၁၀၂၈၀၀) အိတ်၊ တန်အားဖြင့် (၅၁၄၀) စီးထွက်ခဲ့သည့်အတွက် ယခင်ပတ်နှင့် နှိုင်းယှဉ်လျှင် ယခုပတ်တွင် အိတ်ရေ (၅၀၀၀)တန်အားဖြင့် (၂၅၀) လျော့နည်း စီးထွက်ခဲ့ပါကြောင်း သိရှိရပါသည်။

DOCA(စစ်ကိုင်း)

                စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်ရေးကော်မတီအနေဖြင့် စားအုန်းဆီ ကမ္ဘာ့ဈေးနှုန်း ဖြစ်ပေါ် ပြောင်းလဲမှုနှင့်အညီ ပြည်တွင်း၌ ဖြစ်သင့်ဖြစ်ထိုက်သည့် ဈေးနှုန်းများ ဖြစ်ပေါ်စေရေး ထိန်းကျောင်းဆောင်ရွက်လျက်ရှိပြီးစားအုန်းဆီ အဓိက ထုတ်လုပ်တင်ပို့သည့် မလေးရှားနိုင်ငံနှင့် အင်ဒိုနီးရှားနိုင်ငံတို့တွင် ဖြစ်ပေါ်နေသည့် FOB ဈေးနှုန်းများကို နေ့စဉ် စောင့်ကြည့်ကာ သယ်ယူပို့ဆောင်ခ ကုန်ကျစရိတ်များ၊ ဘဏ်စရိတ်များ၊ အခွန်အခများ ထည့်သွင်းတွက်ချက်၍ ပြည်တွင်းဈေးကွက်၌ ရောင်းဝယ်ဖောက်ကားရမည့် အခြေခံလက်ကားရည်ညွှန်း ဈေးနှုန်းကို ထုတ်ပြန်ပေးလျက်ရှိပါသည်။

            ယခုအပတ်အတွင်း ကမ္ဘာ့စားအုန်းဆီ ထုတ်လုပ်တင်ပို့သည့် နိုင်ငံများတွင် စားအုန်းဆီ ဈေးနှုန်းများ အနည်းငယ် ကျဆင်းလာပြီး တစ်ပတ်အတွင်း ဖြစ်ပေါ်ခဲ့သည့် FOB ဈေးနှုန်းများအပေါ် အခြေခံ၍ တွက်ချက်မှုအရ 2022 ခုနှစ်၊ မေလ 16 ရက်နေ့ မှ မေလ 22 ရက် နေ့အထိ ရန်ကုန်အထိုင်ဈေး အခြေခံလက်ကား ရည်ညွှန်းဈေးနှုန်းမှာ စားအုန်းဆီ တစ်ပိဿာလျှင် ၅၆၈၅ ကျပ် ဖြစ်ကြောင်း ထုတ်ပြန်ကြေညာထားသည်။

            ထို့အပြင် ပြည်တွင်းဈေးကွက်အတွင်း ဈေးနှုန်းမြှင့်တင်ရောင်းချခြင်း၊ ဈေးကစားရန် ရည်ရွယ်ချက်ဖြင့် သိုလှောင်ခြင်းနှင့် မသမာသည့် လုပ်ဆောင်မှုများ ပြုလုပ်ပါက အရေးကြီး ကုန်စည်နှင့် ဝန်ဆောင်မှုဥပဒေအရ အရေးယူ ဆောင်ရွက်သွားမည်ဖြစ်ကြောင်း အသိပေး ထုတ်ပြန်ထားသည်။

            အဆိုပါ အခြေခံလက်ကားရည်ညွှန်းဈေးနှုန်းများကို စားသုံးသူရေးရာဦးစီးဌာန၏ Website: www. doca .gov. mm နှင့် မြန်မာနိုင်ငံဆီကုန်သည်နှင့်ဆီလုပ်ငန်းရှင်များအသင်း၏ Facebook Page တွင် ဝင်ရောက်ကြည့်ရှုနိုင်ကြောင်း သိရသည်။