သတင်းနှင့် လှုပ်ရှားမှုများ

   (၅-၇-၂၀၂၃) ရက်နေ့တွင် စားသုံးသူရေးရာဦးစီးဌာန၊ ရန်ကုန်အရှေ့ပိုင်းခရိုင်ဦးစီးမှူးရုံးမှ ဝန်ထမ်းများသည် သက်ဆိုင်ရာဈေးတာဝန်ခံများနှင့်အတူ ဈေးကွက်အတွင်းရောင်းချနေ‌သော Sprite အချိုရည်များသည် အစားအသောက်နှင့်ဆေးဝါးကွပ်ကဲရေးဦးစီးဌာန၏ ထောက်ခံချက်နှင့် စားသုံးသူကာကွယ်ရေးဥပဒေ ၂၀၁၉ပါ ကုန်အညွှန်းအမှတ်အသားများဖော်ပြထားခြင်းရှိ/မရှိနှင့် (CCOBM) ကုမ္ပဏီမှထုတ်လုပ်သော ကုန်အမှတ်တံဆိပ်နှင့်ပုံစုံတူ Sprite အချိုရည်များရောင်းချခြင်းရှိ/မရှိတို့ကို ဈေးကွက်အတွင်း ကွင်းဆင်းစစ်ဆေးခြင်းများဆောင်ရွက်ခဲ့ကြောင်းသိရှိရပါသည်။

   ထိုသို့ ကွင်းဆင်းစစ်ဆေးဆောင်ရွက်ခြင်းများကို ဦးနေလင်း (ဒု-ကြီးကြပ်ရေးမှူး) နှင့် ဝန်ထမ်းများက ဗိုလ်တထောင်မြို့နယ်၊ ဘိုကလေးဈေးတွင်လည်းကောင်း၊ ဒေါ်အေးအေးမော် (ဒု-ကြီးကြပ်ရေးမှူး) နှင့် ဝန်ထမ်းများက တောင်ဥက္ကလာပမြို့နယ်၊ နန္ဒဝန်ဈေးတွင်လည်းကောင်း၊ ဒေါ်မိုးမိုးကြည် (ဌာနခွဲစာရေး) နှင့် ဝန်ထမ်းများသည် ပုဇွန်တောင်မြို့နယ်၊ ပုဇွန်တောင်ဈေးတွင်လည်းကောင်း၊ Sprite  အချိုရည်ဘူးများကိုစစ်ဆေးခဲ့ရာတွင် တရားမဝင်ရောင်းချနေခြင်းမရှိကြောင်းနှင့် ဆိုင်ခန်း (၁၃) ဆိုင်ကိုစစ်ဆေးခဲ့ကြောင်း သိရှိရပါသည်။

DOCA(ရန်ကုန်)

  စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏လမ်းညွှန်မှုဖြင့် ခရိုင်ဦးစီးမှူး ဦးဝေဠုအောင်ကကြီးကြပ်၍  ပခုက္ကူခရိုင်ဦးစီးမှူးရုံးမှ စားသုံးသူရေးရာဌာနခွဲတာဝန်ခံ ဒေါ်နွယ်နွယ်အေး၊ ဒု-ဦးစီးမှူး ဒေါ်တင်တင်မော်နှင့် ဒု-ဦးစီးမှူး ဒေါ်သူဇာကျော်တို့သည် (၁၁-၇-၂၀၂၃) ရက်နေ့၊ နံနက် (၀၉:၀၀) နာရီအချိန်တွင် ပခုက္ကူမြို့၊ အမှတ် (၃) အခြေခံပညာအထက်တန်းကျောင်း၌ စားသုံးသူကာကွယ်ရေးအသိပညာပေးဆွေးနွေးပွဲကျင်းပခဲ့ရာ ဆရာ/ဆရာမ (၂၇) ဦး၊ ကျောင်းသား/ ကျောင်းသူ (၃၂၀) ဦးတို့တက်ရောက်ခဲ့ပါသည်။

  ကျောင်းအုပ်ဆရာမကြီးက အဖွင့်အမှာစကားပြောကြားခဲ့ပြီးနောက် ဒု-ဦးစီးမှူး ဒေါ်နွယ်နွယ်အေးက ဌာန၏သမိုင်းကြောင်းနှင့် လုပ်ငန်းဆောင်ရွက်ချက်များ၊ ဦးစီးဌာန၏ဆောင်ပုဒ်၊ မျှော်မှန်းချက်၊ ရည်မှန်းချက်များ၊ စားသုံးသူကာကွယ်ရေးဥပဒေ ၂၀၁၉ပါအကြောင်းအရာများ၊ ဌာနကလက်ရှိဆောင်ရွက်နေသော လုပ်ငန်းတာဝန်များနှင့် ဆက်လက်ဆောင်ရွက်မည့်လုပ်ငန်းများ၊ စားသုံးသူ၏အခွင့်အရေးနှင့် အကျိုးစီးပွားကာကွယ်ရေးဆောင်ရွက်ရန်အတွက် စားသုံးသူကာကွယ်ရေးဆိုင်ရာအသိပညာပေးလုပ်ငန်းများကို စဉ်ဆက်မပြတ်ဆောင်ရွက်ပေးလျက်ရှိပါကြောင်း ဟောပြောဆွေးနွေးခဲ့ပါသည်။

ဒု-ဦးစီးမှူး ဒေါ်တင်တင်မော်က ဦးစီးဌာန၏ဆောင်ပုဒ်ဖြစ်သော စားသုံးသူအခွင့်အရေး ဦးစားပေးရန်မှာ အလွန်အရေးကြီးသောကြောင့် ယခုကဲ့သို့ လာရောက်အသိပညာပေးရခြင်းဖြစ်ကြောင်း၊ အခွင့်အရေးများကိုသိရှိမှသာ ရယူနိုင်ပြီး နစ်နာဆုံးရှုံးမှုများဖြစ်ပေါ်မလာနိုင်ကြောင်း၊ စားသုံးသူများမှာ အခွင့်အရေးရှိသကဲ့သို့ တာဝန်များလည်းရှိကြောင်း၊ စားသုံးသူ၏တာဝန်များကိုလည်း လိုက်နာရန် အရေးကြီးကြောင်း၊ ကုန်စည် (သို့) ဝန်ဆောင်မှုနှင့်စပ်လျဉ်း၍ ထိခိုက်နစ်နာမှုများရှိလာပါက တိုင်ကြားခွင့်၊ အလျော်အစားရပိုင်ခွင့်နှင့် ကုစားခွင့်တို့ကို သိရှိစေရန်လိုအပ်ကြောင်း  ရှင်းလင်းကာ ဟောပြောဆွေးနွေးခဲ့ပါသည်။

ဒု-ဦးစီးမှူး ဒေါ်သူဇာကျော်က စားသုံးသူကာကွယ်ရေးဥပဒေ ၂၀၁၉ အခန်း(၁၈)ပါ ကုန်အညွှန်းအမှတ်အသားဖော်ပြချက်များကိုရှင်းလင်းခဲ့ရာ ကုန်စည်၏အမျိုးအမည်၊ အရွယ်အစား၊ အရေအတွက်နှင့် အသားတင်ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်း၊ ကျန်းမာရေးဆိုင်ရာဘေးထွက်ဆိုးကျိုး (သို့မဟုတ်) ဓာတ်မတည့်ကြောင်းဖော်ပြချက်နှင့် ကြိုတင်သတိပေးချက် စသည့်အချက်များကို မြန်မာလိုဖော်ပြထားသည့်စားသောက်ကုန်များကိုသာ ဝယ်ယူသုံးစွဲရန်လိုအပ်ကြောင်း၊ ထုတ်ကုန်လုံခြုံစိတ်ချရမှုရှိသောအစားအသောက်နှင့် ကုန်အညွှန်းအမှတ်အသားပြည့်စုံမှုရှိသောအစားအသောက်များကို ရွေးချယ်ဝယ်ယူစားသုံးစေလိုကြောင်း အသိပညာပေးဆွေးနွေးခဲ့ကာ လက်ကမ်းစာစောင်များဖြန့်ဝေခဲ့ပါသည်။ ဆက်လက်၍ အသိပညာပေးဟောပြောဆွေးနွေးပွဲအပြီးတွင် ဟောပြောခဲ့သည့်အကြောင်းအရာများကို အမေးအဖြေပြုလုပ်၍ ဖြေဆိုနိုင်သောကျောင်းသား/ကျောင်းသူများကို အမှတ်တရလက်ဆောင်များပေးအပ်ခဲ့ကြောင်း သိရှိရပါသည်။

DOCA(မကွေး)

     စားသုံးသူရေးရာဦးစီးဌာန၊ မန္တလေးတိုင်းဒေသကြီး၊ မိတ္ထီလာခရိုင်ဦးစီးမှူးရုံး၊ ခရိုင်ဦးစီးမှူး ၏လမ်းညွှန်မှုဖြင့် မလှိုင်မြို့နယ်တာဝန်ခံသည် ပြန်ကြားရေးနှင့်ပြည်သူ့ဆက်ခံရေးဦးစီးဌာနနှင့် ပူးပေါင်း၍ ၂၀၂၃ ခုနှစ်၊ ဇူလိုင်လ ၇ ရက်နေ့၌ မလှိုင်မြို့နယ် ပြန်ကြားရေးနှင့်ပြည်သူ့ဆက်ခံရေးဦးစီး ဌာနရုံး၌ စားသုံးသူကာကွယ်ရေး အသိပညာပေး (Talk Show) ကျင်းပပြုလုပ်ခဲ့ကြောင်း သိရပါသည်။

      အဆိုပါ (Talk Show) တွင် မလှိုင်မြို့နယ်၊ ပြန်ကြားရေးနှင့်ပြည်သူ့ဆက်ခံရေးဦးစီးဌာမှ (Talk Show) ပြုလုပ်ရခြင်း၏ ရည်ရွယ်ချက်ကို ရှင်းလင်းဆွေးနွေးခဲ့ပြီးနောက် စားသုံးသူကာကွယ်ရေးဦးစီးဌာန၊ ဦးရဲမြင့်ဆန်း၊   ဒု-ကြီးကြပ်ရေးမှူးမှ စားသုံးသူကာကွယ်ရေးဥပဒေအကြောင်း၊ ဥပဒေတွင် ပါဝင်သော စကားရပ်များ၏အဓိပ္ပါယ်များ၊ ဥပဒေ၏မျှော်မှန်းချက်နှင့် ရည်ရွယ်ချက်များ၊ စီးပွားရေးလုပ်ငန်းရှင်များအနေဖြင့် ကုန်စည်နှင့်စပ်လျဉ်း၍ ဖော်ပြရမည့်အာမခံချက်များ၊ ဝန်ဆောင်မှုနှင့် စပ်လျဉ်း၍ ဖော်ပြရမည့် အာမခံချက်များ၊ စားသုံးသူများမှ တောင်းဆိုနိုင်သည့် အခွင့်အရေးများကို သိရှိနားလည်စေရန် ရှင်းလင်းပြောကြားခဲ့ပါသည်။ စားသုံးသူအခွင့်အရေးနစ်နာဆုံးရှုံးမှုများရှိခဲ့လျှင် DOCA Myanmar Application နှင့် စားသုံးသူရေးရာဦးစီးဌာန၏ Websit www.doca.gov.mm တွင် ဝင်ရောက်လေ့လာတိုင်ကြားနိုင်ကြောင်း ရှင်းလင်းဆွေးနွေးခဲ့ပါသည်။

DOCA(မန္တလေး)

      မိတ္ထီလာခရိုင်၊ မလှိုင်မြို့နယ်တွင် ယခု ၂၀၂၃ ခုနှစ် မိုးသီးနှံစိုက်ပျိုးရာသီ၌ လုပ်သားခများ စျေးပိုလာကြောင်း သိရသည်။ နေ့စားလုပ်သားခမှာ ကျား၊မ မရွေးတစ်ဦးလျှင် ယခင်နှစ်က တစ်ရက်လျှင် (၅၀၀၀) ကျပ်၊ ပေးရသော်လည်း ယခုနှစ်တွင် (၅၅၀၀ ကျပ်မှ ၆၀၀၀ ကျပ်ထိ) ရှိကြောင်းသိရသည်။ လုပ်သားများအနေနှင့် ၎င်းတို့ဝယ်ယူစားသုံးရသော စားသောက်စရိတ်များမြင့်တက်လာခြင်းကြောင့် နေ့စားခကို ပိုမိုတောင်းခံလာရာ မြေ၊ ယာပိုင်ရှင်များမှာလည်း လုပ်သားရှားပါးမှုနှင့် အချိန်မီစိုက်ပျိုးရန် လိုအပ်ခြင်းကြောင့်ဖြစ်သည်။ လုပ်သားခမြင့်တက်လာသကဲ့သို့ ထယ်၊ထွန်ခမှာလည်း ယခင်နှစ်က နွားတစ်ရှဉ်းလျှင် (၁၀၀၀၀) ကျပ် ရှိခဲ့ပြီး၊ ယခုနှစ်မှာတော့ (၁၅၀၀၀) ကျပ်သို့ မြင့်တက်လာပါသည်။ ဒေသတွင်း တောင်သူများအနေနှင့် မြေသြဇာကို ဓါတုမြေသြဇာအနည်းငယ်သာသုံးပြီး သဘာဝမြေသြဇာဖြစ်သည့် နွားချေားကို ပိုမိုသုံးစွဲရာ နွားချေားလှည်းတစ်စီးလျှင် (၂၀၀၀၀) ကျပ်၊ Faw ကားတစ်စီး လျှင် (၂၀၀၀၀၀) ကျပ်နှင့် ကြက်ချေးတစ်တင်းခွဲ တစ်အိတ်လျှင် (၅၅၀၀) ကျပ် ရှိကြောင်း သိရသည်။ မိုးသီးနှံအနေနှင့် နှမ်း၊မြေပဲ၊ ဝါ၊ နေကြာ၊ ပဲစဉ်းငုံ၊ နွာစားပြောင်း၊ ခရမ်းချဉ်၊ ငရုတ်တို့ကို စိုက်ပျိုးထားကြောင်း သိရသည်။

DOCA(မန္တလေး)

   မြိတ်ခရိုင်၊ စားသုံးသူရေးရာဦးစီးဌာန၊ ခရိုင်အစားအသောက်နှင့်ဆေးဝါးကွပ်ကဲရေးဦးစီးဌာနနှင့် ခရိုင်အသေးစားစက်မှုလက်မှုလုပ်ငန်းဦးစီးဌာနတို့သည် ၂၀၂၃ခုနှစ်၊ ဇူလိုင်လ (၁၂) ရက်နေ့တွင် “ကန်စွန်းအင်း” ကိုယ်ပိုင်အထက်တန်းကျောင်း၌ ဘေးအန္တရာယ်ကင်းရှင်းစွာဝယ်ယူစားသုံးနိုင်ရေး ရည်ရွယ်၍ စားသုံးသူကာကွယ်ရေးဆိုင်ရာ သိကောင်းစရာများ‌ဟောပြောခဲ့ကြပါသည်။

   အဆိုပါ ဟောပြောပွဲတွင် စားသုံးသူများအတွက် ဘေးအန္တရာယ်ဖြစ်စေနိုင်သောအကြောင်းအရာများ၊ စားသုံးသူများ၏အခွင့်အရေးနှင့်နစ်နာမှုအတွက် တိုင်ကြားခွင့်၊  ကုန်အညွန်းအမှတ်အသားဆိုင်ရာအချက်အလက်များ၊ အန္တရာယ်ရှိသောဆိုးဆေးများ၊ တားမြစ်ထားသောစားသောက်ကုန်များ၊ အစားအသောက်များကို ချက်ပြုတ်မစားသောက်မီ လိုအပ်သောအချက်များအပြင် အစားအသောက်ခွင့်ပြုထောက်ခံချက်အကြောင်းတို့ကိုလည်း ‌ဆွေးနွေးပြောကြားခဲ့ကြပါသည်။ ဟောပြောပွဲအပြီးတွင် အစားအသောက်ဘေးကင်းလုံခြုံရေးအတွက် ကျောင်းမုန့်ဈေးတန်းနှင့် ကျောင်းထမင်းဆိုင်များသို့လည်း ကွင်းဆင်းစစ်းဆေးခဲ့ကြကြောင်း သတင်းရရှိပါသည်။

DOCA(တနင်္သာရီ)