သတင်းနှင့် လှုပ်ရှားမှုများ

     စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏လမ်းညွှန်မှုနှင့် ပခုက္ကူခရိုင်ဦးစီးမှူး၏ကြီးကြပ်မှုတို့ဖြင့် ဒုတိယခရိုင်ဦးစီးမှူးနှင့် ဝန်ထမ်းများအဖွဲ့သည် စားသုံးပြည်သူများဘေးအန္တရာယ်လုံခြုံစိတ်ချရမှုရှိစေရေးအတွက် (၁၆-၁၀-၂၀၂၃)ရက်နေ့၊ နံနက် (၀၉:၀၀)နာရီအချိန်တွင် ပခုက္ကူမြို့တွင်းရှိ စားသုံးဆီဆိုင်များအား မြို့နယ်စည်ပင်သာယာရေးအဖွဲ့၊ အစားအသောက်နှင့်ဆေးဝါးကွပ်ကဲရေးဦးစီးဌာနတို့နှင့်ပူးပေါင်း၍ ဈေးကွက်စောင့်ကြည့်စစ်ဆေးခဲ့ကြပါသည်။

    ထိုသို့ဈေးကွက်စောင့်ကြည့်စစ်ဆေးရာတွင် ဈေးကွက်အတွင်းရောင်းချလျက်ရှိသော စားသုံးဆီများ၌ စားသုံးဆီအတုပြုလုပ်၍ သိုလှောင်ဖြန့်ဖြူးရောင်းချမှုရှိ/မရှိနှင့် စားသုံးဆီအတုပြုလုပ်ရန်အတွက် မြေပဲဆီ၊ နှမ်းဆီ စသည့်အနံ့များရရှိစေရန် ရောစပ်သောဓာတုကုန်ကြမ်းပစ္စည်းများရောင်းချခြင်းရှိ/မရှိ ဈေးကွက်စောင့်ကြည့်စစ်ဆေးရာတွင် ‌ရောင်းချမှုမရှိကြောင်း စစ်ဆေးတွေ့ရှိရပါသည်။ ထို့နောက် စားသုံးဆီရောင်းချနေသောဆိုင်ရှင်များအား စားသုံးသူကာကွယ်ရေးဥပဒေ ၂၀၁၉ အခန်း(၁၈)၊ ပုဒ်မ(၄၁)အရ ကုန်စည်များတွင် ကုန်အညွှန်းအမှတ်အသားပြည့်စုံစွာဖော်ပြထားသည့် ကုန်စည်များကိုသာရောင်းချရန်နှင့် မြန်မာနိုင်ငံစားသုံးသူကာကွယ်ရေးကော်မရှင်မှထုတ်ပြန်ထားသည့် ညွှန်ကြားချက်အမှတ် (၂/၂၀၁၉)နှင့်အညီ ကုန်ဈေးနှုန်းအမှတ်အသားပြည့်စုံစွာဖော်ပြလာစေရေးနှင့် မြန်မာဘာသာဖြင့်ဖော်ပြရမည့် ကုန်ပစ္စည်းအမျိုးအမည်၊ အရွယ်အစား၊ အရေအတွက် (သို့မဟုတ်) အသားတင်ပမာဏ၊ ထားသိုသိမ်းဆည်းမှုအညွှန်း၊ ဓာတ်မတည့်ကြောင်းဖော်ပြချက်တို့ကို မဖြစ်မနေထည့်သွင်းဖော်ပြရမည်ဖြစ်ပြီး ထုတ်လုပ်သည့်ရက်စွဲနှင့် သက်တမ်းကုန်ဆုံးသည့်ရက်စွဲများကိုလည်းထည့်သွင်းဖော်ပြရမည်ဖြစ်ကြောင်း၊ ကုန်အညွှန်းအမှတ်အသားပြည့်စုံစွာဖော်ပြထားခြင်းမရှိသော ကုန်စည်များရောင်းချသည်ကို စစ်ဆေးတွေ့ရှိရပါက စားသုံးသူကာကွယ်ရေးဥပဒေအရ အရေးယူဆောင်ရွက်သွားမည်ဖြစ်ကြောင်းနှင့် စားသုံးသူကာကွယ်ရေးဥပဒေ အခန်း(၁၀)ပါ စီးပွားရေးလုပ်ငန်းရှင်၏ တာဝန်များ၊ တားမြစ်ချက်များ၊ ပြစ်မှုပြစ်ဒဏ်များအကြောင်းတို့ကို အသိပေးပြောကြားခဲ့ပြီး စားသုံးသူအသိပညာပေးလက်ကမ်းစာစောင်များဖြန့်ဝေခဲ့ကြောင်းသိရှိရပါသည်။

DOCA(မကွေး)

   ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မအူပင်ခရိုင်၊ မအူပင်မြို့နယ် ဦးစီးမှူး ဦးအောင်ဇော်ဦးနှင့်ဝန်ထမ်းများသည် (၁၆.၁၀.၂၀၂၃)ရက်နေ့၊နံနက် (၁၀:၀၀)နာရီ အချိန်တွင် မအူပင်မြို့နယ် တာပတ်အနောက်ကျေးရွာရှိ (အ.လ.က)ကျောင်းခွဲတွင် ကျောင်းသား/ကျောင်းသူ (၂၂၀)ဦးအား စားသုံးသူကာကွယ်ရေး အသိပညာပေးဟောပြောခဲ့ပါသည်။

 အဆိုပါဟောပြောပွဲတွင် စားသုံးသူရေးရာဦးစီးဌာန၊ ပန်းတနော်မြို့နယ်ဦးစီးမှူးမှ စားသုံးသူကာကွယ်ရေး ဥပဒေ(၂၀၁၉)ပါ ဥပဒေအကြောင်းများ၊ စားသုံးသူ၏အခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏တာဝန်များ၊ ဦးစီးဌာန၏လုပ်ပိုင်ခွင့်နှင့် လုပ်ငန်းတာဝန်များ၊ စစ်ဆေးရေးအရာရှိ၏ လုပ်ငန်းတာဝန်များ၊ စားသုံးသူရေးရာကော်မတီဖွဲ့စည်းခြင်းအကြောင်း၊ ကုန်စည်ဝန်ဆောင်မှုကို စားသုံးသူများမှရွေးချယ်ဝယ်ယူရာတွင် အာမခံချက်နှင့်စပ်လျဉ်း၍ စားသုံးသူက တောင်းဆိုနိုင်သည့်အခွင့်အရေး၊ စားသုံးသူအခွင့်အရေး နစ်နာဆုံးရှုံးမှုရှိလာပါက စားသုံးသူရေးရာဦးစီးဌာနသို့ တိုင်ကြားနိုင်သည့် နည်းလမ်းများအကြောင်းကို ရှင်းလင်းဟောပြောဆွေးနွေးခဲ့ပြီး ဟောပြောပွဲတက်ရောက်သူ ကျောင်းသား/ကျောင်းသူများက သိရှိလိုသည်များကို မေးမြန်းကြပြီး ညောင်တုန်းမြို့နယ်ဦးစီးမှူးမှ ပြန်လည်ရှင်းလင်းခဲ့ကြောင်း သတင်းရရှိပါသည်။

DOCA(ဧရာဝတီ)

   ဧရာဝတီတိုင်းဒေသကြီး၊ မအူပင်ခရိုင်/မြို့များတွင် အခြေခံစားသောက်ကုန်များဖြစ်သည့် စားအုန်းဆီနှင့် ကြက်ဥများအား စားသုံးသူလက်ဝယ်အရောက် ရောင်းချပေးလျက်ရှိရာ (၁၆.၁၀.၂၀၂၃) ရက်နေ့၊ မွန်းလွဲပိုင်းတွင် မအူပင်မြို့နယ် တလုတ်လပ်အနောက် ကျေးရွာ၌ ကျေးရွာနေပြည်သူများအား ရောင်းချပေးခဲကြသည်။

   ထိုသို့ရောင်းချရာတွင် မအူပင်ခရိုင် ဆီကုန်သည်နှင့် ဆီလုပ်ငန်းရှင်များအသင်းမှ စားအုန်းဆီ ၁ပိဿာလျှင် (၄၈၀၀/-)ကျပ်နှုန်းဖြင့် ပိဿာချိန် (၅၅၀)ပိဿာ၊ ကြက်ဥတစ်လုံးလျှင်(၂၅၀/-)ကျပ်နှုန်းဖြင့် ကြက်ဥအလုံးရေ (၅၀၀)အား သက်သာသောဈေးနှုန်းများ စားသုံးသူလက်ဝယ်အရောက် ရောင်းချပေးခဲ့ပါသည်။

    အဆိုပါရောင်းချမှုတွင် စားသုံးသူရေးရာဦးစီးဌာနမှ ဦးစီးအရာရှိ ဦးအောင်ဇော်ဦးနှင့် တာဝန်ရှိသူများက ကြည့်ရှုစစ်ဆေးခဲ့ကြပြီး ရပ်ကွက်ကျေးရွာရှိ ပြည်သူများကို လှည့်လည်ရောင်းချပေးခဲ့ကြပါသည်။

DOCA(ဧရာဝတီ)

    စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏လမ်းညွှန်မှုဖြင့် (၁၂-၁၀-၂၀၂၃) ရက်နေ့၊ နံနက်(၁၀:၀၀)နာရီအချိန်တွင် ပခုက္ကူခရိုင်၊ ပခုက္ကူမြို့၊ အထွေထွေအုပ်ချုပ်ရေးဦးစီးဌာနရှိ အစည်းအဝေးခန်းမ၌ ခရိုင်စီမံအုပ်ချုပ်ရေးအဖွဲ့ဥက္ကဋ္ဌဦးဆောင်၍ ဌာနဆိုင်ရာများ၊ ဆီကုန်သည်နှင့်ဆီလုပ်ငန်းရှင်(၂၀)ဦးတက်ရောက်ခဲ့ပြီး ခရိုင်ဆီကုန်သည်နှင့်ဆီလုပ်ငန်းရှင်အသင်းပြန်လည်ဖွဲ့စည်းနိုင်ရေး ညှိနှိုင်းဆွေးနွေးခဲ့ကြပါသည်။

    ခရိုင်စီမံအုပ်ချုပ်ရေးမှူးက အဖွင့်အမှာစကားပြောကြားပြီးနောက် ယခင်ဖွဲ့စည်းထားသော ခရိုင်ဆီလုပ်ငန်းရှင်အသင်းအဖွဲ့မှာ ကျန်းမာရေးမကောင်းသဖြင့် နှုတ်ထွက်သွားသူများနှင့် ယခင်ခရိုင်ဥက္ကဋ္ဌမှာလည်း သေဆုံးသွားခြင်း၊ အသင်းဝင်တချို့မှာလည်း မြို့ပေါ်တွင်မရှိခြင်းတို့ကြောင့် ခရိုင်အသင်းတို့ကိုပြန်လည်ဖွဲ့စည်းရန်လိုကြောင်း၊ ယခုတက်ရောက်လာသော ဆီလုပ်ငန်းရှင်များအနေဖြင့် ခိုင်မာသောဆီလုပ်ငန်းရှင်များအသင်းပြန်လည်ဖွဲ့စည်းရာတွင် အမှန်တကယ်ဦးဆောင်ဦးရွက်ပြုလုပ်နိုင်မည့် ဆီကုန်သည်များကိုရွေးထုတ်၍ ခိုင်မာအားကောင်းသော ဆီလုပ်ငန်းရှင်များအသင်းတစ်ခုဖြစ်ပေါ်စေရန် ဝိုင်းဝန်းပူပေါင်းဆောင်ရွက်ပေးကြပါရန် ပြောကြားခဲ့ပါသည်။

      ဆက်လက်၍ စားသုံးသူရေးရားဦးစီးဌာန၊ ပခုက္ကူခရိုင်ဦးစီးမှူးက အသင်းအဖွဲ့များ အားကောင်းလာစေရန်အတွက် စနစ်တကျရွေးချယ်ဖွဲ့စည်းလိုကြောင်း၊ မိမိမြို့နယ်ဖွံ့ဖြိုးတိုးတက်စေရန် ဒေသခံများဖြစ်သည့် လုပ်ငန်းရှင်များအနေဖြင့် ဝိုင်းဝန်းပူးပေါင်းဆောင်ရွက်စေလိုကြောင်းနှင့် စီးပွား‌ရေးကျင့်ဝတ်နှင့်အညီ ဆောင်ရွက်ကြရန်လိုအပ်ကြောင်း၊ တစ်ဦးတစ်ယောက်ချင်းဆောင်ရွက်သည်ထက် အသင်းအဖွဲ့နှင့်ပူးပေါင်းဆောင်ရွက်ပါက ပိုမိုထိရောက်အောင်မြင်ပါကြောင်းပြောကြားခဲ့ပြီး ခရိုင်ဆီကုန်သည်နှင့်ဆီလုပ်ငန်းရှင်များအသင်းကို ယာယီပြန်လည်ဖွဲ့စည်းနိုင်ရေး တက်ရောက်လာသည့် ဆီလုပ်ငန်းရှင်များက ညှိနှိုင်းပေါင်းစပ်ဆောင်ရွက်ခဲ့ကြောင်းသိရှိရပါသည်။

DOCA(မကွေး)

  စားသုံးသူရေးရာဦးစီးဌာန ဟင်္သာတမြို့နယ်တာဝန်ခံသည်(၁၆.၁၀.၂၀၂၃)ရက်နေ့ ၊နံနက်(၉)နာရီမှစ၍ စားသုံးဆီနှင့်ဆန်များ သက်သာသောဈေးနှုန်းဖြင့် စားသုံးသူပြည်သူများအား ရောင်းချပေးလျက် ရှိကြောင်း သိရှိရပါသည်။

      ထိုသို့ရောင်းချခြင်းကို ဟင်္သာတခရိုင်စီမံအုပ်ချုပ်ရေးအဖွဲ့၏ကြီးကြပ်မှုဖြင့် စားသုံးသူရေးရာဦးစီးဌာန၊ ရပ်ကွက်အုပ်ချုပ်ရေးမှူးများ၊ ဟင်္သာတခရိုင် ဆီကုန်သည်နှင့်ဆီလုပ်ငန်းရှင်အသင်းတို့ပူးပေါင်း၍ ဟင်္သာတမြို့နယ် ဘုရားကြီးရပ်ကွက်နှင့်ပတ္တမြားရပ်ကွက်ရှိ ရပ်ကွက်နေ ပြည်သူများအား အိမ်ထောင်တစ်စုလျှင် စားအုန်းဆီ၅၀ ကျပ်သားလျှင် ၂၄၀၀ ကျပ်နှင့် ဆန်(၁)ပြည်လျှင် ၂၅၀၀ ကျပ်နှုန်းဖြင့် ရပ်ကွက်(၂)ခုအတွက် ဆန်(၁၀)အိတ်နှင့် ဆီ(၂)ပေပါ ရောင်းချဖြန့်ဖြူးပေးခဲ့ကြောင်း သိရှိရပါသည်။

DOCA(ဧရာဝတီ)